శ్రీ మహాకాళీ స్తోత్రం (పరశురామ కృతం)

 శ్రీ మహాకాళీ స్తోత్రం (పరశురామ కృతం)

పరశురామ ఉవాచ |
నమః శంకరకాంతాయై సారాయై తే నమో నమః |
నమో దుర్గతినాశిన్యై మాయాయై తే నమో నమః || 1 ||
నమో నమో జగద్ధాత్ర్యై జగత్కర్త్ర్యై నమో నమః |
నమోఽస్తు తే జగన్మాత్రే కారణాయై నమో నమః || 2 ||
ప్రసీద జగతాం మాతః సృష్టిసంహారకారిణి |
త్వత్పాదౌ శరణం యామి ప్రతిజ్ఞాం సార్థికాం కురు || 3 ||
త్వయి మే విముఖాయాం చ కో మాం రక్షితుమీశ్వరః |
త్వం ప్రసన్నా భవ శుభే మాం భక్తం భక్తవత్సలే || 4 ||
యుష్మాభిః శివలోకే చ మహ్యం దత్తో వరః పురా |
తం వరం సఫలం కర్తుం త్వమర్హసి వరాననే || 5 ||
రేణుకేయస్తవం శ్రుత్వా ప్రసన్నాఽభవదంబికా |
మా భైరిత్యేవముక్త్వా తు తత్రైవాంతరధీయత || 6 ||
ఏతద్ భృగుకృతం స్తోత్రం భక్తియుక్తశ్చ యః పఠేత్ |
మహాభయాత్సముత్తీర్ణః స భవేదేవ లీలయా || 7 ||
స పూజితశ్చ త్రైలోక్యే తత్రైవ విజయీ భవేత్ |
జ్ఞానిశ్రేష్ఠో భవేచ్చైవ వైరిపక్షవిమర్దకః || 8 ||
ఇతి శ్రీబ్రహ్మవైవర్తపురాణే గణేశఖండే షట్త్రింశోఽధ్యాయే శ్రీపరశురామకృత మహామాయా స్తోత్రం |