శ్రీ కృష్ణ స్తోత్రం (మోహినీ కృతం)

శ్రీ కృష్ణ స్తోత్రం (మోహినీ కృతం)

సర్వేంద్రియాణాం ప్రవరం విష్ణోరంశం చ మానసం |
తదేవ కర్మణాం బీజం తదుద్భవ నమోఽస్తు తే || 1 ||
స్వయమాత్మా హి భగవాన్ జ్ఞానరూపో మహేశ్వరః |
నమో బ్రహ్మన్ జగత్ స్రష్టస్తదుద్భవ నమోఽస్తు తే || 2 ||
సర్వాజిత జగజ్జేతర్జీవజీవమనోహర |
రతిబీజ రతిస్వామిన్ రతిప్రియ నమోఽస్తు తే || 3 ||
శశ్వద్యోషిదధిష్ఠాన యోషిత్ప్రాణాధికప్రియః |
యోషిద్వాహన యోషాస్త్ర యోషిద్బంధో నమోఽస్తు తే || 4 ||
పతిసాధ్యకరాశేషరూపాధార గుణాశ్రయ |
సుగంధివాతసచివ మధుమిత్ర నమోఽస్తు తే || 5 ||
శశ్వద్యోనికృతాధార స్త్రీసందర్శనవర్ధన |
విదగ్ధానాం విరహిణాం ప్రాణాంతక నమోఽస్తు తే || 6 ||
అకృపా యేషు తేఽనర్థస్తేషాం జ్ఞానవినాశనం |
అనూహరూప భక్తేషు కృపాసింధో నమోఽస్తు తే || 7 ||
తపస్వినాం చ తపసాం విఘ్నబీజావలీలయా |
మనః సకామం ముక్తానాం కర్తుం శక్త నమోఽస్తు తే || 8 ||
తపః సాధ్యాశ్చాఽఽరాధ్యాశ్చ సదైవం పాంచభౌతికాః |
పంచేంద్రియకృతాధారం పంచబాణ నమోఽస్తు తే || 9 ||
మోహినీత్యేవముక్త్వా తు మనసా సా విధేః పురః |
విరరామ నంరవక్త్రా బభూవ ధ్యానతత్పరా || 10 ||
ఉక్తం మాధ్యందినే కాంతే స్తోత్రమేతన్మనోహరం |
పురా దుర్వాససా దత్తం మోహిన్యై గంధమాదనే || 11 ||
స్తోత్రమేతన్మహాపుణ్యం కామీ భక్త్యా యదా పఠేత్ |
అభీష్టం లభతే నూనం నిష్కళంకో భవేద్ధ్రువం || 12 ||
చేష్టాం న కురుతే కామః కదాచిదపి తం ప్రియం |
భవేదరోగీ శ్రీయుక్తః కామదేవసమప్రభః |
వనితాం లభతే సాధ్వీం పత్నీం త్రైలోక్యమోహినీం || 13 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే ఏకత్రింశోఽధ్యాయే మోహినీకృత శ్రీ కృష్ణ స్తోత్రం ||