శ్రీ కృష్ణ స్తోత్రం (బ్రహ్మ కృతం)

శ్రీ కృష్ణ స్తోత్రం (బ్రహ్మ కృతం)

రక్ష రక్ష హరే మాం చ నిమగ్నం కామసాగరే |
దుష్కీర్తిజలపూర్ణే చ దుష్పారే బహుసంకటే || 1 ||
భక్తివిస్మృతిబీజే చ విపత్సోపానదుస్తరే |
అతీవ నిర్మలజ్ఞానచక్షుః ప్రచ్ఛన్నకారణే || 2 ||
జన్మోర్మిసంఘసహితే యోషిన్నక్రౌఘసంకులే |
రతిస్రోతః సమాయుక్తే గంభీరే ఘోర ఏవ చ || 3 ||
ప్రథమామృతరూపే చ పరిణామవిషాలయే |
యమాలయప్రవేశాయ ముక్తిద్వారాతివిస్తృతే || 4 ||
బుద్ధ్యా తరణ్యా విజ్ఞానైరుద్ధరాస్మానతః స్వయం |
స్వయం చ త్వం కర్ణధారః ప్రసీద మధుసూదన || 5 ||
మద్విధాః కతిచిన్నాథ నియోజ్యా భవకర్మణి |
సంతి విశ్వేశ విధయో హే విశ్వేశ్వర మాధవ || 6 ||
న కర్మక్షేత్రమేవేదం బ్రహ్మలోకోఽయమీప్సితః |
తథాపి న స్పృహా కామే త్వద్భక్తివ్యవధాయకే || 7 ||
హే నాథ కరుణాసింధో దీనబంధో కృపాం కురు |
త్వం మహేశ మహాజ్ఞాతా దుఃస్వప్నం మాం న దర్శయ || 8 ||
ఇత్యుక్త్వా జగతాం ధాతా విరరామ సనాతనః |
ధ్యాయం ధ్యాయం మత్పదాబ్జం శశ్వత్సస్మార మామితి || 9 ||
బ్రహ్మణా చ కృతం స్తోత్రం భక్తియుక్తశ్చ యః పఠేత్ |
స చైవాకర్ణ్య విషయే న నిమగ్నో భవేద్ధ్రువం || 10 ||
మమ మాయాం వినిర్జిత్య సుజ్ఞానం లభతే ధ్రువం |
ఇహ లోకే భక్తియుక్తో మద్భక్తప్రవరో భవేత్ || 11 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే ద్వాత్రింశోధ్యాయే బ్రహ్మకృత శ్రీ కృష్ణ స్తోత్రం |