గాయత్రీస్తవరాజః

గాయత్రీస్తవరాజః

శ్రీగణేశాయ నమః ..

అస్య శ్రీగాయత్రీస్తవరాజస్తోత్రమంత్రస్య విశ్వామిత్రః ఋషిః,

సకలజననీ చతుష్పదా గాయత్రీ,పరమాత్మా దేవతా,

సర్వోత్కృష్టపరం ధామ ప్రథమపాదో బీజం, ద్వితీయః శక్తిః, తృతీయః

కీలకం, దశప్రణవసంయుక్తా సవ్యాహృతికా తుర్యపాదసహితా వ్యాపకం,

మమ ధర్మార్థకామమోక్షార్థే జపే వినియోగః . అథ న్యాసాన్ కుర్యాత్ .

అథ ధ్యానం .

గాయత్రీం వేదధాత్రీం శతమఖఫలదాం వేదశాస్త్రైకవేద్యాం

చిచ్ఛక్తిం బ్రహ్మవిద్యాం పరమశివపదాం శ్రీపదం వై కరోతి .

సర్వోత్కృష్టం పదం తత్సవితురనుపదాంతే వరేణ్యం శరణ్యం

భర్గో దేవస్య ధీమహ్యభిదధతి ధియో యో నః ప్రచోదయాదిత్యౌర్వతేజః .. 1..

సామ్రాజ్యబీజం ప్రణవత్రిపాదం సవ్యాపసవ్యం ప్రజపేత్సహస్రకం .

సంపూర్ణకామం ప్రణవం విభూతిం తథా భవేద్వాక్యవిచిత్రవాణీ .. 2..

శుభం శివం శోభనమస్తు మహ్యం సౌభాగ్యభోగోత్సవమస్తు నిత్యం .

ప్రకాశవిద్యాత్రయశాస్త్రసర్వం భజేన్మహామంత్రఫలం ప్రియే వై .. 3..

బ్రహ్మాస్త్రం బ్రహ్మదండం శిరసి శిఖిమహద్బ్రహ్మశీర్షం నమోంతం

సూక్తం పారాయణోక్తం ప్రణవమథ మహావాక్యసిద్ధాంతమూలం .

తుర్యం త్రీణి ద్వితీయం ప్రథమమనుమహావేదవేదాంతసూక్తం

నిత్యం స్మృత్యానుసారం నియమితచరితం ములమంత్రం నమోంతం .. 4..

అస్త్రం శస్త్రహతం త్వఘోరసహితం దండేన వాజీహతం

చాదిత్యాదిహతం శిరోంతసహితం పాపక్షయార్థం పరం .

తుర్యాత్యాదివిలోమమంత్రపఠనం బీజం శిఖాంతోర్ధ్వకం

నిత్యం కాలనియమ్యవిప్రవిదుషాం కిం దుష్కృతం భూసురాన్ .. 5..

నిత్యం ముక్తిపదం నియమ్య పవనం నిర్ఘోషశక్తిత్రయం

సమ్యగ్జ్ఞానగురూపదేశవిధివద్దేవీంశిఖాంతామపి .

షష్ట్యైకోత్తరసంఖ్యయానుమతసౌషుమ్నాదిమార్గత్రయీం

ధ్యాయాన్నిత్యసమస్తవేదజననీం దేవీం త్రిసంధ్యామయీం .. 6..

గాయత్రీం సకలాగమార్థవిదుషాం సౌరస్య బీజేశ్వరీం

సర్వామ్నాయసమస్తమంత్రజననీం సర్వజ్ఞధామేశ్వరీమ్మ్ .

బ్రహ్మాదిత్రయస్పుటార్థకరణీం సంసారపారాయణీం

సంధ్యాం సర్వసమానతంత్రపరయా బ్రహ్మానుసంధాయినీం .. 7..

ఏకద్విత్రిచతుఃసమానగణనావర్ణాష్టకం పాదయోః

పాపాదౌ ప్రణవాదిమంత్రపఠనే మంత్రత్రయీసంపుటాం .

సంధ్యాయాం ద్విపదం పఠేత్పరతరం సాయం తురీయం యుతం

నిత్యానిత్యమనంతకోటిఫలదం ప్రాప్తం నమస్కుర్మహే .. 8..

ఓజోఽసీతి సహోఽస్యహో బలమసి భ్రాజోఽసి తేజస్వినీ

వర్చస్వీ సవితాగ్నిసోమమమృతం రూపం పరం ధీమహి .

దేవానాం ద్విజవర్యతాం మునిగణే ముక్త్యర్థినాం శాంతినా-

మోమిత్యేకమృచం పఠంతి యమినో యం యం స్మరేత్ప్రాప్నుయాత్ .. 9..

ఓభిత్యేకమజస్వరూపమమలం తత్సప్తధా భాజితం

తారం తంత్రసమన్వితం పరతరే పాదత్రయం గర్భితం .

ఆపోజ్యోతిరసోఽమృతం జనమహః సత్యం తపః స్వర్భువ-

ర్భూయోభూయ నమామి భూర్భువఃస్వరోమేతైర్మహామంత్రకం .. 10..

ఆదౌ బిందుమనుస్మరన్ పరతరే బాలా త్రివర్ణోచ్చరన్

వ్యాహృత్యాదిసబిందుయుక్తత్రిపదాతారత్రయం తుర్యకం .

ఆరోహాదవరోహతః క్రమగతా శ్రీకుండలీత్థం స్థితా

దేవీ మానసపంకజే త్రినయనా పంచాననా పాతు మాం .. 11..

సర్వే సర్వవశే సమస్తసమయే సత్యాత్మిక్రే సాత్వికే

సావిత్రీసవితాత్మకే శశియుతే సాంఖ్యాయనీగోత్రజే .

సంధ్యాత్రీణ్యుపకల్ప్య సంగ్రహవిధిః సంధ్యాభిధానాత్మకే

గాయత్రీప్రణవాదిమంత్రగురుణా సంప్రాప్య తస్మై నమః .. 12..

క్షేమం దివ్యమనోరథాః పరతరే చేతః సమాధీయతాం

జ్ఞానం నిత్యవరేణ్యమేతదమలం దేవస్య భర్గో ధియం .

మోక్షశ్రీర్విజయార్థినోఽథ సవితుః శ్రేష్ఠం విధిస్తత్పదం

ప్రజ్ఞా మేధప్రచోదయాత్ప్రతిదినం యో నః పదం పాతు మాం .. 13..

సత్యం తత్సవితుర్వరేణ్యవిరలం విశ్వాదిమాయాత్మకం

సర్వాద్యం ప్రతిపాదపాదరమయా తారం తథా మన్మథం .

తుర్యాన్యత్త్రితయం ద్వితీయమపరం సంయోగసవ్యాహృతిం

సర్వామ్నాయమనోమయీం మనసిజాం ధ్యాయామి దేవీం పరాం .. 14..

ఆదౌ గాయత్రిమంత్రే గురుకృతనియమం ధర్మకర్మానుకూలం

సర్వాద్యం సారభూతం సకలమనుమయం దేవతానామగమ్యం .

దేవానాం పూర్వదేవం, ద్విజకులమునిభిః సిద్ధవిద్యాధరాద్యైః

కో వా వక్తుం సమర్థస్తవమనుమహిమాబీజరాజాదిమూలం .. 15..

గాయత్రీం త్రిపదాం త్రిబీజసహితాం ద్వివ్యాహృతిం త్రైపదాం

త్రిబ్రహ్మాత్రిగుణాం త్రికాలనియమాం వేదత్రయీం తాం పరాం .

సాంఖ్యాదిత్రయరూపిణీం త్రినయనాం మాతృత్రయీం తత్పరాం

త్రైలోక్యత్రిదశవికోటిసహితాం సంధ్యాం త్రయీం తాం నుమః .. 16..

ఓమిత్యేతత్త్రిమాత్రాత్రిభువనకరణం త్రిస్వరం వహ్నిరూపం

త్రీణి త్రీణి త్రిపాదం త్రిగుణగుణమయం త్రైపురాంతం త్రిసూక్తం .

తత్త్వానాం పూరవశక్తిం త్రితయగురుపదం పీఠయంత్రాత్మకం తం

తస్మాదేతత్ త్రిపాదం త్రిపదమనుసరం త్రాహి మాం భో నమస్తే .. 17..

స్వస్తి శ్రద్ధాతిమేధా మధుమతిమధురః సంశయః ప్రజ్ఞకాంతి

ర్విద్యా బుద్ధిర్బలం శ్రీరతనుధనపతిః సౌమ్యవాక్యానువృత్తిః .

మేధా ప్రజ్ఞా ప్రతిష్ఠా మృదుమతిమధురాపూర్ణవిద్యాప్రపూర్ణం

ప్రాప్తం ప్రత్యూషచింత్యం ప్రణవపరవశాత్ప్రాణినాం నిత్యకర్మ .. 18..

పంచాశద్వర్ణమధ్యే ప్రణవపరయుతే మంత్రమాద్యం నమోంతం

సర్వం సవ్యాపసవ్యం శతగుణమభితో వర్మ హ్యష్టోత్తరం తే .

ఏవ నిత్యం ప్రజప్తం త్రిభువనసహితం సూర్యమంతం త్రిపాదం

జ్ఞానం విజ్ఞానగమ్యం గగనసుసదృశం ధ్యాయతే యః స ముక్తః .. 19..

ఆదిక్షాంతసబిందుయుక్తసహితం మేరుం క్షకారాత్మకం

వ్యస్తావ్యస్తసమస్తవర్గసహితం పూర్ణం శతాష్టోత్తరం .

గాయత్రీం జపతాం త్రికాలసహితాం నిత్యం సనైమిత్తికమేవం

జాప్యఫలం శివేన కథితం సద్భోగ్యమోక్షప్రదం .. 20..

సప్తవ్యాహృతిసప్తతారవికృతిః సత్యం వరేణ్యం ధృతిః

సర్వం తత్సవితుశ్చ ధీమహి మహాభర్గస్య దేవం భజే .

ధామ్నో ధామ ధమాధిధారణమహాంధీమత్పదం ధ్యాయతే

ఓం తత్సర్వమనుప్రపూర్ణదశకం పాదత్రయం కేవలం .. 21..

విజ్ఞానే విలసద్వివేకవచసః ప్రజ్ఞానుసంధారిణీం

శ్రద్ధామేధ్యయశఃశిరఃసుమనసః స్వస్తి శ్రియం త్వాం సదా .

ఆయుష్యం ధనధాన్యలక్ష్మిమతులాం దేవీం కటాక్షం పరం

తత్కాలే సకలార్థసాధనమదాన్ముక్తిర్మహత్త్వం పదం .. 22..

పృథ్వీగంధోఽర్చనాయాం నభసి కుసుమతా వాయుధూపప్రకర్షో

వహ్నిర్దీపప్రకాశో జలమమృతమయం నిత్యసంకల్పపూజా .

ఏతత్సర్వం నివేద్యం సుఖవతి హృదయే సర్వదా దంపతీనాం

త్వం సర్వజ్ఞా శివం మే కృరు తవ మమతా భక్తవృందే ప్రసిద్ధా .. 23..

సౌమ్యం సౌభాగ్యహేతుం సకలసుఖకరం సర్వసౌఖ్యం సమస్తం

సత్యం సద్భోగనిత్యం సుఖజనసుహృదం సుందరం శ్రీసమస్తం .

సౌమంగల్యం సమగ్రం సకలశుభకరం స్వస్తివాచం సమస్తం

సర్వాద్యం సద్వివేకం త్రిపదపదయుగం ప్రాప్తుమధ్యాసమస్తం .. 24..

గాయత్రీపదపంచపంచప్రణవద్వంద్వం విధౌ సంపుటం

సృష్ట్యాదిక్రమంత్రజాప్యదశకం దేవీపదం క్షుత్త్రయం .

మంత్రాతిస్థితికేషు సంపుటమిదం శ్రీమాతృకావేష్టనం

వర్ణాంత్యాదివిలోమమంత్రజపనం సంహారసమ్మోహనం .. 25..

భూరాద్యం భూర్భువఃస్వస్త్రిపదపదయుతం త్ర్యక్షమాద్యంతయోజ్యం

సృష్టిస్థిత్యంతకార్యం క్రమశిఖిసకలం సర్వమంత్రం ప్రశస్తం .

సర్వాంగం మాతృకాణాం మనుమయవపుషం మంత్రయోగప్రయుక్తం

సంహారం క్షాదివర్ణం వసుశతగణనం మంత్రరాజం నమామి .. 26..

విశ్వామిత్రముదాహృతం హితకరం సర్వార్థసిద్ధిప్రదం

స్తోత్రాణాం పరమం ప్రభాతసమయే పారాయణం నిత్యశః .

వేదానాం విధివాదమంత్రసఫలం సిద్ధిప్రదం సంపదాం

స ప్రాప్నోత్యపరత్ర సర్వసుఖదమాయుష్యమారోగ్యతాం .. 27..

ఇతి శ్రీవిశ్వామిత్రప్రణీతో గాయత్రీస్తవరాజః సంపూర్ణః ..