గాయత్రీస్తోత్రం 2

గాయత్రీస్తోత్రం 2

నారద ఉవాచ .

భక్తానుకంపిన్ సర్వజ్ఞ హృదయం పాపనాశనం .

గాయత్ర్యా కథితం తస్మాద్గాయత్ర్యాః స్తోత్రమీరయ .. 1..

శ్రీనారాయణ ఉవాచ .

ఆదిశక్తే జగన్మాతర్భక్తానుగ్రహకారిణి .

సర్వత్ర వ్యాపికేఽనంతే శ్రీసంధ్యే తే నమోఽస్తు తే .. 2..

త్వమేవ సంధ్యా గాయత్రీ సావిత్రీ చ సరస్వతీ .

బ్రాహ్మీ చ వైష్ణవీ రౌద్రీ రక్తా శ్వేతా సితేతరా .. 3..

ప్రాతర్బాలా చ మధ్యాహ్నే యౌవనస్థా భవేత్పునః .

వృద్ధా సాయం భగవతీ చింత్యతే మునిభిః సదా .. 4..

హంసస్థా గరుడారూఢా తథా వృషభవాహినీ ..

ఋగ్వేదాధ్యాయినీ భూమౌ దృశ్యతే యా తపస్విభిః .. 5..

యజుర్వేదం పఠంతీ చ అంతరిక్షే విరాజతే .

సా సామగాపి సర్వేషు భ్రామ్యమాణా తథా భువి .. 6..

రుద్రలోకం గతా త్వం హి విష్ణులోకనివాసినీ .

త్వమేవ బ్రహ్మణో లోకేఽమర్త్యానుగ్రహకారిణీ .. 7..

సప్తర్షిప్రీతిజననీ మాయా బహువరప్రదా .

శివయోః కరనేత్రోత్థా హ్యశ్రుస్వేదసముద్భవా .. 8..

ఆనందజననీ దుర్గా దశధా పరిపఠ్యతే .

వరేణ్యా వరదా చైవ వరిష్ఠా వరవర్ణినీ .. 9..

గరిష్ఠా చ వరాహా చ వరారోహా చ సప్తమీ .

నీలగంగా తథా సంధ్యా సర్వదా భోగమోక్షదా .. 10..

భాగీరథీ మత్యర్లోకే పాతాలే భోగవత్యయి .

త్రిలోకవాహినీ దేవీ స్థానత్రయనివాసినీ .. 11..

భూర్లోకస్థా త్వమేవాసి ధరిత్రీ లోకధారిణీ .

భువో లోకే వాయుశక్తిః స్వర్లోకే తేజసాం నిధిః .. 12..

మహర్లోకే మహాసిద్ధిర్జనలోకేఽజనేత్యపి .

తపస్వినీ తపోలోకే సత్యలోకే తు సత్యవాక్ .. 13..

కమలా విష్ణులోకే చ గాయత్రీ బ్రహ్మలోకదా .

రుద్రలోకే స్థితా గౌరీ హరార్ధాంగనివాసినీ .. 14..

అహమో మహతశ్చైవ ప్రకృతిస్త్వం హి గీయసే .

సామ్యావస్థాత్మికా త్వం హి శబలబ్రహ్మరూపిణీ .. 15..

తతః పరా పరాశక్తిః పరమా త్వం హి గీయసే .

ఇచ్ఛాశక్తిః క్రియాశక్తిర్జ్ఞానశక్తిస్త్రిశక్తిదా .. 16..

గంగా చ యమునా చైవ విపాశా చ సరస్వతీ .

శరయుర్దేవికా సింధుర్నర్మదైరావతీ తథా .. 17..

గోదావరీ శతద్రుశ్చ కావేరీ దేవలోకగా .

కౌశికా చంద్రభాగా చ వితస్తా చ సరస్వతీ .. 18..

గండకీ తపినీ తోయా గోమతీ వేత్రవత్యపి .

ఇడా చ పింగలా చైవ సుషుమ్నా చ తృతీయకా .. 19..

గాంధారీ హస్తజిహ్వా చ పూషాఽపూషా తథైవ చ .

అలంబుషా కుహూశ్చైవ శంఖినీ ప్రాణవాహినీ .. 20..

నాడీ చ త్వం శరీరస్థా గీయసే ప్రాక్తనైర్బుధైః .

హృత్పద్మస్థా ప్రాణశక్తిః కంఠస్థా స్వప్ననాయికా .. 21..

తాలుస్థా త్వం సదాధారా బిందుస్థా బిందుమాలినీ ..

మూలే తు కుండలీశక్తివ్యాపినీ కేశమూలగా .. 22..

శిఖామధ్యాసనా త్వం హి శిఖాగ్రే తు మనోన్మనీ .

కిమన్యద్బహునోక్తేన యత్కించిజ్జగతీత్రయే .. 23..

తత్సర్వం త్వం మహాదేవి శ్రియే సంధ్యే నమోఽస్తుతే .

ఇతీదం కీర్తిదం స్తోత్రం సంధ్యాయాం బహుపుణ్యదం .. 24..

మహాపాపప్రశమనం మహాసిద్ధివిధాయకం .

య ఇదం కీర్తయేత్ స్తోత్రం సంధ్యాకాలే సమాహితః .. 25..

అపుత్రః ప్రాప్నుయాత్పుత్రం ధనార్థీ ధనమాప్నుయాత్ .

సర్వతీర్థతపోదానయజ్ఞయోగఫలం లభేత్ .. 26..

భోగాన్భుక్త్వా చిరం కాలమంతే మోక్షమవాప్నుయాత్ .

తపస్విభిః కృతం స్తోత్రం స్నానకాలే తు యః పఠేత్ .. 27..

యత్ర కుత్ర జలే మగ్నః సంధ్యామజ్జనజం ఫలం .

లభతే నాత్ర సందేహః సత్యం సత్యం చ నారద .. 28..

శృణుయాద్యోఽపి తద్భక్త్యా స తు పాపాత్ప్రముచ్యతే .

పీయూషసదృశం వాక్యం సంధ్యోక్తం నారదేరితం .. 29..

ఇతి శ్రీమద్దేవీభాగవతే మహాపురాణేఽష్టాదశసాహస్ర్యాం సంహితాయాం

ద్వాదశస్కంధే శ్రీగాయత్రీస్తోత్రవర్ణనం నామ పంచమోఽధ్యాయః .. 5..