గాయత్రీస్తోత్రం 3

గాయత్రీస్తోత్రం 3

శ్రీః .

యస్మిందృష్టే నైవ దృశ్యేత విశ్వం యస్మింలబ్ధే నైవ లబ్ధవ్యశేషః .

యస్మిన్ జ్ఞాతే నైవ వేద్యాంతరాశా గాయత్ర్యర్థం పంచవక్త్రం ప్రపద్యే .. 1..

యా గాయత్రీ నామధేయం మహార్థం సార్థం కర్తుం సంప్రవిష్టోపనాయే .

మార్గే మంత్రాన్ సర్వతో దర్శయిత్వా తారే లీనా సర్వవేదార్థదీపే .. 2..

శ్రోతవ్యం మే వాక్యమేతత్సమస్తైర్వర్ణైర్భావ్యం స్వాశ్రమప్రాప్తచిహ్నైః .

తేభ్యస్తుష్యేచ్ఛంకరః శ్రీహరిర్వా ప్రష్టవ్యో వః శ్రీగురుః స్వైర్వినీతైః .. 3..

గాయత్రీ చేత్సమ్యగాప్తా క్రమేణ సా సంజప్తా కర్మశుద్ధయా ద్విజేన .

సా విజ్ఞాతా గోపితా సంప్రదాయాత్కిం నో దద్యాద్వేదమాతా మతా చేత్ .. 4..

బుద్ధావీశారోహణం కర్మ తస్యాః సా చేత్యక్తా త్యక్త ఈశో ద్విజేన .

యస్యాం సర్వా దేవతాః సంప్రవిష్టాః సర్వాత్మానం మంత్రరాజం ప్రపద్యే .. 5..

విష్ణుః శంభుర్భాస్కరో విఘ్నరాజో యా వా కా వా దేవతాఽస్యా విభూతిః .

సైకోపాస్యా వేదమార్గైకనిష్ఠైః క్షీరాబ్ధౌ కిం దుగ్ధభిక్షాప్రయాసః .. 6..

నేయం లభ్యా మానుషాణాం ఝషాణాం గంగాశబ్దో మానుషత్వైకహేతుః .

యస్యా లబ్ధ్యై వేదికాగ్రేసరాణాం వంశే వేదైః సంస్కృతే జన్మహేతుః .. 7..

మంత్రైః కిం తైర్యైః ప్రతీక్ష్యేత దేవీ గాయత్ర్యంబా సంప్రవేష్టుం ద్విజేషు .

దేవైః కిం తైరగ్నినా పుష్టిమద్భిస్తస్మాద్భస్మోద్భూషితైః సా నిషేవ్యా .. 8..

దత్తం భస్మ శ్రీత్రిపాదాంబయైతంత్ర్యంఘ్రేరగ్నేః శేషరూపం స్వరూపం .

తస్మాద్భస్మ ప్రోచ్యతే భాసనాచ్చ భూతిర్గాయత్ర్యంబయైక్యాస్త్త్రిపుండ్రం .. 9..

శైవోఽన్యో వా యాం వినా కిం ద్విజః స్యాచ్ఛైవోఽన్యో వా దీక్షయా వేదమాతుః .

తస్మాచ్ఛైవో వైష్ణవోఽన్యేషు గణ్యో గాయత్ర్ణాప్తా బ్రహ్మతా వేదమాన్యా .. 10..

భేదాపోహవ్యాపృతిం సా బిభర్తి ధ్యానైర్భిన్నైర్ధ్యాననిష్ఠైకవేద్యాం .

తస్మాన్నామాన్యత్ర సంయాంతి సర్వాణ్యస్యా నిష్ఠా శాంభవీ వైష్ణవీ చ .. 11..

లోకస్థాస్తే విష్ణురుద్రాదిదేవాః కైశ్చిత్కామైః కైశ్చిదేవాధికారైః .

గాయత్ర్యాస్తా మూర్తయః సేవనీయా గాయత్ర్యాం తే సేవితాః సంభ్రమేణ .. 12..

బ్రహ్మత్వం చేదాప్తుకామోఽస్యుపాస్వ గాయత్రీం చేల్లోకకామోఽన్యదేవం .

కామో జ్ఞాతః స్వీయపాదప్రవృత్యా వాదః కో వా తృప్తిహీనే ప్రవృత్తిః .. 13..

బుద్ధేః సాక్షీ బుద్ధిగమ్యో జపాదౌ గాయత్ర్యర్థః సోఽనఘో వేదసారః .

తద్బ్రహ్మైవ బ్రహ్మతోపాసకస్యాప్యేవం మంత్రః కోఽస్తి తంత్రే పురాణే .. 14..

జాత్యశ్వః కిం జాతిమాప్తుం సకామో గత్యభ్యాసాత్స్పష్టతామేతి జాతిః .

బ్రహ్మత్వాప్తౌ కః ప్రయాసో ద్విజానాం యద్గాయత్ర్యా వ్యజ్యతే చాష్టమేఽబ్దే .. 15..

బ్రహ్మత్వస్య ఖ్యాపనార్థం ప్రవిష్టా గాయత్రీయం తావతాస్యద్విజత్వం .

కర్ణద్వారా బ్రహ్మజన్మప్రదానాదుక్తో వేదే బ్రాహ్మణో బ్రహ్మనిష్ఠః .. 16..

ఏషా నిష్ఠా దుర్లభా మర్త్యబుద్ధౌ తస్మాల్లోకే వైష్ణవాః శాంభవాశ్చ .

భిన్నం భిన్నం మార్గమాస్థాయ వేదం క్షామం కుర్వంత్యాస్తికచ్ఛద్మనే మే .. 17..

పక్షిద్వంద్వం విద్యతే స్వస్వదేహే భోక్తారం సా ధ్యానమాచష్ట ఏతత్ .

యావత్క్షీణా భోక్తృతా స్యాత్తతస్తు జ్ఞాత్వా బ్రూయాద్రుహ్మతాం స్వస్య విద్వాన్ .. 18..

గాయత్ర్యర్థం నో విజానాతి కశ్చిత్తస్మాదన్యం దేవమాహ ద్విజోఽపి .

విజ్ఞాతశ్చేత్సర్వవాదస్య శాతిర్ముక్తిర్హస్తే గాయమానస్య మంత్రం .. 19..

భస్మాంతం చేద్విశ్వమేతత్సమస్తం భస్మోద్భూతం భస్మ సంభాసతే చ .

తస్మాద్బ్రహ్మ ప్రాహురాద్యైర్వచోభిర్వేదాస్తస్మాద్భస్మ లింగం ద్విజానాం .. 20..

ఇతి శ్రీశంకరాచార్యాభిప్రాయఃకృష్ణభిక్షుణా .

వర్ణితస్తేన గాయత్రీ విభూత్యా సహ నందతు .. 21..

ఇతి శ్రీమత్పరమహంసపరివ్రాజకాచార్యకృష్ణానందసరస్వతీవిరచితం

గాయత్రీస్తోత్రం సంపూర్ణం .