శ్రీ దత్త పాదుకాష్టకం (నృసింహవాడీ క్షేత్రే)

శ్రీ దత్త పాదుకాష్టకం (నృసింహవాడీ క్షేత్రే)

కృష్ణావేణీపంచగంగాయుతిస్థం
శ్రీపాదం శ్రీవల్లభం భక్తహృత్స్థం |
దత్తాత్రేయం పాదుకారూపిణం తం
వందే విద్యాం శాలినీం సంగృణంతం || 1 ||
ఉపేంద్రవజ్రాయుధపూర్వదేవైః
సపూర్వదేవైర్మునిభిశ్చ గీతం |
నృసింహసంజ్ఞం నిగమాగమాద్యం
గమాగమాద్యంతకరం ప్రపద్యే || 2 ||
పరిహృతనతజూర్తిః స్వీయకామప్రపూర్తి-
-ర్హృతనిజభజకార్తిః సచ్చిదానందమూర్తిః |
సదయహృదయవర్తీ యోగవిచ్చక్రవర్తీ
స జయతి యతిరాట్ దిఙ్మాలినీ యస్య కీర్తిః || 3 ||
ద్రుతవిలంబితకర్మవిచారణా
ఫలసుసిద్ధిరతోఽమరభాగ్జనః |
అనుభవత్యకమేవ తదుద్ధృతౌ
హరిరిహావిరభూత్పదరూప్యసౌ || 4 ||
విద్యున్మాలాతుల్యా సంపత్ప్రాఙ్మధ్యాంతేఽప్యస్యా ఆపత్ |
తత్తే ధార్యం జ్యోతిర్నిత్యం ధ్యానే మేఽస్తు బ్రహ్మన్ సత్యం || 5 ||
త్రిద్వారం తవ భవనం బహుప్రదీపం
విఘ్నేశామరపతియోగినీమరుజ్జైః |
జాహ్నవ్యావృతమభితోఽన్నపూర్ణయా చ
స్మృత్వా మే భవతి మతిః ప్రహర్షిణీయం || 6 ||
తతిం ద్విజానాం శివసోపజాతిం
పుష్ణాతి కృష్ణాఽత్ర వినష్టతృష్ణా |
అవాక్ప్రవాహాఽనుమతాశివాహా
యా సాఽష్టతీర్థా స్మృతిమేతు సార్థా || 7 ||
కలౌ మలౌఘాంతకరం కరంజ-
-పురే వరే జాతమకామకామం |
చరాచరాద్యం భువనావనార్థం
క్షణే క్షణే సజ్జనతానతాంఘ్రిం || 8 ||
భుజంగప్రయాతాద్గుణోత్థాదివాస్మా-
-ద్భవాద్భీత ఆగత్య న త్యక్తుమిచ్ఛేత్ |
నృసింహస్య వాట్యాం ప్రభో రాజధాన్యాం
స యాయాత్సుధన్యాం గతిం లోకమాన్యాం || 9 ||
ఇతి శ్రీవాసుదేవానందసరస్వతీ విరచితం దత్త పాదుకాష్టకం |