అన్నమయ్య కీర్తన మహినుద్యోగి కావలె

Stotra Lyrics

మహినుద్యోగి కావలె మనుజుడైన వాడు ।
సహజి వలె నుండి ఏమి సాధించలెడు ॥

వెదకి తలచుకుంటే విష్ణుడు కానవచ్చు ।
చెదరి మరచితే సృష్టి చీకటౌ ।
పొదలి నడిచితేను భూమెల్లా మెట్టి రావచ్చు ।
నిదురించితే కాలము నిమిషమై తోచు ॥

వేడుకతో చదివితే వేదశాస్త్ర సంపన్నుడౌ ।
జాడతో నూరకుండితే జడుడౌను ।
వోడక తపసియైతే వున్నతోన్నతుడౌ ।
కూడక సోమరి ఐతే గుణహీనుడౌను ॥

మురహరు గొలిచితే మోక్షము సాధించవచ్చు ।
వెరవెరగక ఉండితే వీరిడియౌను ।
శరణంటే శ్రీవేంకటేశ్వరుడు రక్షించును ।
పరగ సంశయించితే పాషండుడౌను ॥