తులజాష్టకం

తులజాష్టకం

దుగ్ధేందు కుందోజ్జ్వలసుందరాంగీం

     ముక్తాఫలాహారవిభూషితాంగీం .

శుభ్రాంబరాం స్తనభరాలసాంగీం

     వందేఽహమాద్యాం తులజాభవానీం .. 1..

బాలార్కభాసామతిచారుహాసాం

     మాణిక్యముక్తాఫలహారకంఠీం .

రక్తాంబరాం రక్తవిశాలనేత్రీం

     వందేఽహమాద్యాం తులజాభవానీం .. 2..

శ్యామాంగవర్ణాం మృగశావనేత్రాం

     కౌశేయవస్త్రాం కుసుమేషు పూజ్యాం ..

కస్తూరికాచందనచర్చితాంగీం

     వందేఽహమాద్యాం తులజాభవానీం .. 3..

పీతాంబరాం చంపకకాంతిగౌరీం

     అలంకృతాముత్తమమండనైశ్చ .

నాశాయ భూతాం భువి దానవానాం

     వందేఽహమాద్యాం తులజాభవానీం .. 4..

చంద్రార్కతాటంకధరాం త్రినేత్రాం

     శూలం దధానామతికాలరూపాం .

విపక్షనాశాయ ధృతాయుధాం తాం

     వందేఽహమాద్యాం తులజాభవానీం .. 5..

బ్రహ్మేంద్ర నారాయణరుద్రపూజ్యాం

     దేవాంగనాభిః పరిగీయమానాం .

స్తుతాం వచోభిర్మునినారదాద్యైః

     వందేఽహమాద్యాం తులజాభవానీం .. 6..

అష్టాంగయోగే సనకాదిభిశ్చ

     ధ్యాతాం మునీంద్రైశ్చ సమాధిగమ్యాం .

భక్తస్య నిత్యం భువి కామధేనుం

     వందేఽహమాద్యాం తులజాభవానీం .. 7..

సింహాసనస్థాం పరివీజ్యమానాం

     దేవైః సమస్తైశ్చ సుచామరైశ్చ .

ఛత్రం దధానామతిశుభ్రవర్ణాం

     వందేఽహమాద్యాం తులజాభవానీం .. 8..

పూర్ణః కటాక్షోఽఖిలలోకమాతు-

     ర్గిరీంద్రకన్యాం భజతాం సుధన్యాం .

దారిద్ర్యకం నైవ కదా జనానాం

     చింతా కుతః స్యాద్భవసాగరస్య .. 9..

తులజాష్టకమిదం స్తోత్రం త్రికాలం యః పఠేన్నరః .

ఆయుః కీర్తిర్యశో లక్ష్మీ ధనపుత్రానవాప్నుయాత్ .. 10..

.. ఇతి శ్రీమచ్ఛంకరాచార్య విరచితం తులజాష్టకం సంపూర్ణం ..

తురజాష్టకం, తుళజాష్టకం