శ్రీ రామ పంచరత్నం

Stotra Lyrics

కంజాతపత్రాయతలోచనాయ
కర్ణావతంసోజ్జ్వలకుండలాయ |
కారుణ్యపాత్రాయ సువంశజాయ
నమోఽస్తు రామాయ సలక్ష్మణాయ || 1 ||
విద్యున్నిభాంభోదసువిగ్రహాయ
విద్యాధరైః సంస్తుతసద్గుణాయ |
వీరావతారాయ విరోధిహంత్రే
నమోఽస్తు రామాయ సలక్ష్మణాయ || 2 ||
సంసక్తదివ్యాయుధకార్ముకాయ
సముద్రగర్వాపహరాయుధాయ |
సుగ్రీవమిత్రాయ సురారిహంత్రే
నమోఽస్తు రామాయ సలక్ష్మణాయ || 3 ||
పీతాంబరాలంకృతమధ్యకాయ
పితామహేంద్రామరవందితాయ |
పిత్రే స్వభక్తస్య జనస్య మాత్రే
నమోఽస్తు రామాయ సలక్ష్మణాయ || 4 ||
నమో నమస్తేఽఖిలపూజితాయ
నమో నమశ్చంద్రనిభాననాయ |
నమో నమస్తే రఘువంశజాయ
నమోఽస్తు రామాయ సలక్ష్మణాయ || 5 ||
ఇమాని పంచరత్నాని త్రిసంధ్యం యః పఠేన్నరః |
సర్వపాపవినిర్ముక్తః స యాతి పరమాం గతిం || 6 ||
ఇతి శ్రీరామకర్ణామృతాంతర్గతం శ్రీరామపంచరత్నం |