శ్రీ రామ స్తోత్రం (ఇంద్ర కృతం)

శ్రీ రామ స్తోత్రం (ఇంద్ర కృతం)

ఇంద్ర ఉవాచ |
భజేఽహం సదా రామమిందీవరాభం
భవారణ్యదావానలాభాభిధానం |
భవానీహృదా భావితానందరూపం
భవాభావహేతుం భవాదిప్రపన్నం || 1 ||
సురానీకదుఃఖౌఘనాశైకహేతుం
నరాకారదేహం నిరాకారమీడ్యం |
పరేశం పరానందరూపం వరేణ్యం
హరిం రామమీశం భజే భారనాశం || 2 ||
ప్రపన్నాఖిలానందదోహం ప్రపన్నం
ప్రపన్నార్తినిఃశేషనాశాభిధానం |
తపోయోగయోగీశభావాభిభావ్యం
కపీశాదిమిత్రం భజే రామమిత్రం || 3 ||
సదా భోగభాజాం సుదూరే విభాంతం
సదా యోగభాజామదూరే విభాంతం |
చిదానందకందం సదా రాఘవేశం
విదేహాత్మజానందరూపం ప్రపద్యే || 4 ||
మహాయోగమాయావిశేషానుయుక్తో
విభాసీశ లీలానరాకారవృత్తిః |
త్వదానందలీలాకథాపూర్ణకర్ణాః
సదానందరూపా భవంతీహ లోకే || 5 ||
అహం మానపానాభిమత్తప్రమత్తో
న వేదాఖిలేశాభిమానాభిమానః |
ఇదానీం భవత్పాదపద్మప్రసాదా-
-త్త్రిలోకాధిపత్యాభిమానో వినష్టః || 6 ||
స్ఫురద్రత్నకేయూరహారాభిరామం
ధరాభారభూతాసురానీకదావం |
శరచ్చంద్రవక్త్రం లసత్పద్మనేత్రం
దురావారపారం భజే రాఘవేశం || 7 ||
సురాధీశనీలాభ్రనీలాంగకాంతిం
విరాధాదిరక్షోవధాల్లోకశాంతిం |
కిరీటాదిశోభం పురారాతిలాభం
భజే రామచంద్రం రఘూణామధీశం || 8 ||
లసచ్చంద్రకోటిప్రకాశాదిపీఠే
సమాసీనమంకే సమాధాయ సీతాం |
స్ఫురద్ధేమవర్ణాం తడిత్పుంజభాసాం
భజే రామచంద్రం నివృత్తార్తితంద్రం || 9 ||
ఇతి శ్రీమదధ్యాత్మరామాయణే యుద్ధకాండే త్రయోదశః సర్గే ఇంద్ర కృత శ్రీ రామ స్తోత్రం |