శ్రీ జ్వాలాముఖీ స్తోత్రం –1

శ్రీ జ్వాలాముఖీ స్తోత్రం –1

శ్రీభైరవ ఉవాచ |
తారం యో భజతే మాతర్బీజం తవ సుధాకరం |
పారావారసుతా నిత్యం నిశ్చలా తద్గృహే వసేత్ || 1 ||
శూన్యం యో దహనాధిరూఢమమలం వామాక్షిసంసేవితం
సేందుం బిందుయుతం భవాని వరదే స్వాంతే స్మరేత్ సాధకః |
మూకస్యాపి సురేంద్రసింధుజలవద్వాగ్దేవతా భారతీ
గద్యః పద్యమయీం నిరర్గలతరా మాతర్ముఖే తిష్ఠతి || 2 ||
శుభం వహ్న్యారూఢం మతియుతమనల్పేష్టఫలదం
సబింద్వీందుం మందో యది జపతి బీజం తవ ప్రియం |
తదా మాతః స్వఃస్త్రీజనవిహరణక్లేశసహితః
సుఖమింద్రోద్యానే స్వపితి స భవత్పూజనరతః || 3 ||
జ్వాలాముఖీతి జపతే తవ నామవర్ణాన్
యః సాధకో గిరిశపత్ని సుభక్తిపూర్వం |
తస్యాంఘ్రిపద్మయుగళం సురనాథవేశ్యాః
సీమంతరత్నకిరణైరనురంజయంతి || 4 ||
పాశాంబుజాభయధరే మమ సర్వశత్రూన్
శబ్దం త్వితి స్మరతి యస్తవ మంత్రమధ్యే |
తస్యాద్రిపుత్రి చరణౌ బహుపాంసుయుక్తౌ
ప్రక్షాలయంత్యరివధూనయనాశ్రుపాతాః || 5 ||
భక్షయద్వయమిదం యది భక్త్యా
సాధకో జపతి చేతసి మాతః |
స స్మరారిరివ త్వత్ప్రసాదత-
-స్త్వత్పదం చ లభతే దివానిశం || 6 ||
కూర్చబీజమనఘం యది ధ్యాయేత్
సాధకస్తవ మహేశ్వరి యోఽంతః |
అష్టహస్తకమలేషు సువశ్యా-
-స్తస్య త్ర్యంబకసమస్తసిద్ధయః || 7 ||
ఠద్వయం తవ మనూత్తరస్థితం
యో జపేత్తు పరమప్రభావదం |
తస్య దేవి హరిశంకరాదయః
పూజయంతి చరణౌ దివౌకసః || 8 ||
ఓం హ్రీం శ్రీం త్ర్యక్షరే దేవి సురాసురనిషూదిని |
త్రైలోక్యాభయదే మాతర్జ్వాలాముఖి నమోఽస్తు తే || 9 ||
ఉదితార్కద్యుతే లక్ష్మి లక్ష్మీనాథసమర్చితే |
వరాంబుజాభయధరే జ్వాలాముఖి నమోఽస్తు తే || 10 ||
సర్వసారమయి శర్వే సర్వామరనమస్కృతే |
సత్యే సతి సదాచారే జ్వాలాముఖి నమోఽస్తు తే || 11 ||
యస్యా మూర్ధ్ని శశీ త్రిలోచనగతా యస్యా రవీంద్వగ్నయః
పాశాంభోజవరాభయాః కరతలాంభోజేషు సద్ధేతయః |
గాత్రే కుంకుమసన్నిభా ద్యుతిరహిర్యస్యాగలే సంతతం
దేవీం కోటిసహస్రరశ్మిసదృశీం జ్వాలాముఖీం నౌంయహం || 12 ||
నిద్రాం నో భజతే విధిర్భగవతి శంకా శివం నో త్యజే-
-ద్విష్ణుర్వ్యాకులతామలం కమలినీకాంతోఽపి ధత్తే భయం |
దృష్ట్వా దేవి త్వదీయకోపదహనజ్వాలాం జ్వలంతి తదా
దేవః కుంకుమపీతగండయుగళః సంక్రందనః క్రందతి || 13 ||
యామారాధ్య దివానిశం సురసరిత్తీరే స్తవైరాత్మభూ-
-రుద్యద్భాస్వరఘర్మభానుసదృశీం ప్రాప్తోఽమరజ్యేష్ఠతాం |
దారిద్ర్యోరగదష్టలోకత్రితయీసంజివనీం మాతరం
దేవీం తాం హృదయే శశాంకశకలాచూడావతంసాం భజే || 14 ||
ఆపీనస్తనశ్రోణిభారనమితాం కందర్పదర్పోజ్జ్వలాం
లావణ్యాంకితరంయగండయుగళాం యస్త్వాం స్మరేత్ సాధకః |
వశ్యాస్తస్య ధరాభృదీశ్వరసుతే గీర్వాణవామభ్రువః
పాదాంభోజతలం భజంతి త్రిదశా గంధర్వసిద్ధాదయః || 15 ||
హృత్వా దేవి శిరో విధేర్యదకరోత్ పాత్రం కరాంభోరుహే
శూలప్రోతమముం హరిం వ్యగమయత్ సద్భూషణం స్కంధయోః |
కాలాంతే త్రితయం ముఖేందుకుహరే శంభోః శిరః పార్వతి
తన్మాతర్భువనే విచిత్రమఖిలం జానే భవత్యాః శివే || 16 ||
గాయత్రీ ప్రకృతిర్గళేఽపి విధృతా సా త్వం శివే వేధసా
శ్రీరూపా హరిణాపి వక్షసి ధృతాప్యర్ధాంగభాగే తథా |
శర్వేణాపి భవాని దేవి సకలాః ఖ్యాతుం న శక్తా వయం
త్వద్రూపం హృది మాదృశాం జడధియాం ధ్యాతుం కథైవాస్తి కా || 17 ||
జ్వాలాముఖీస్తవమిమం పఠతే యదంతః
శ్రీమంత్రరాజసహితం విభవైకహేతుం |
ఇష్టప్రదానసమయే భువి కల్పవృక్షం
స్వర్గం వ్రజేత్ సురవధూజనసేవితః సః || 18 ||
ఇతి దేవీరహస్యే శ్రీ జ్వాలాముఖి స్తవం |