శ్రీ విష్ణు భుజంగ ప్రయాత స్తోత్రం

శ్రీ విష్ణు భుజంగ ప్రయాత స్తోత్రం

చిదంశం విభుం నిర్మలం నిర్వికల్పం
నిరీహం నిరాకారమోంకారగంయం |
గుణాతీతమవ్యక్తమేకం తురీయం
పరం బ్రహ్మ యం వేద తస్మై నమస్తే || 1 ||
విశుద్ధం శివం శాంతమాద్యంతశూన్యం
జగజ్జీవనం జ్యోతిరానందరూపం |
అదిగ్దేశకాలవ్యవచ్ఛేదనీయం
త్రయీ వక్తి యం వేద తస్మై నమస్తే || 2 ||
మహాయోగపీఠే పరిభ్రాజమానే
ధరణ్యాదితత్త్వాత్మకే శక్తియుక్తే |
గుణాహస్కరే వహ్నిబింబార్ధమధ్యే
సమాసీనమోంకర్ణికేఽష్టాక్షరాబ్జే || 3 ||
సమానోదితానేకసూర్యేందుకోటి-
-ప్రభాపూరతుల్యద్యుతిం దుర్నిరీక్షం |
న శీతం న చోష్ణం సువర్ణావదాత-
-ప్రసన్నం సదానందసంవిత్స్వరూపం || 4 ||
సునాసాపుటం సుందరభ్రూలలాటం
కిరీటోచితాకుంచితస్నిగ్ధకేశం |
స్ఫురత్పుండరీకాభిరామాయతాక్షం
సముత్ఫుల్లరత్నప్రసూనావతంసం || 5 ||
లసత్కుండలామృష్టగండస్థలాంతం
జపారాగచోరాధరం చారుహాసం |
అలివ్యాకులామోదిమందారమాలం
మహోరస్ఫురత్కౌస్తుభోదారహారం || 6 ||
సురత్నాంగదైరన్వితం బాహుదండై-
-శ్చతుర్భిశ్చలత్కంకణాలంకృతాగ్రైః |
ఉదారోదరాలంకృతం పీతవస్త్రం
పదద్వంద్వనిర్ధూతపద్మాభిరామం || 7 ||
స్వభక్తేషు సందర్శితాకారమేవం
సదా భావయన్సంనిరుద్ధేంద్రియాశ్వః |
దురాపం నరో యాతి సంసారపారం
పరస్మై పరేభ్యోఽపి తస్మై నమస్తే || 8 ||
శ్రియా శాతకుంభద్యుతిస్నిగ్ధకాంత్యా
ధరణ్యా చ దూర్వాదలశ్యామలాంగ్యా |
కలత్రద్వయేనామునా తోషితాయ
త్రిలోకీగృహస్థాయ విష్ణో నమస్తే || 9 ||
శరీరం కలత్రం సుతం బంధువర్గం
వయస్యం ధనం సద్మ భృత్యం భువం చ |
సమస్తం పరిత్యజ్య హా కష్టమేకో
గమిష్యామి దుఃఖేన దూరం కిలాహం || 10 ||
జరేయం పిశాచీవ హా జీవతో మే
వసామత్తి రక్తం చ మాంసం బలం చ |
అహో దేవ సీదామి దీనానుకంపిన్
కిమద్యాపి హంత త్వయోదాసితవ్యం || 11 ||
కఫవ్యాహతోష్ణోల్బణశ్వాసవేగ
వ్యథావిస్ఫురత్సర్వమర్మాస్థిబంధాం |
విచింత్యాహమంత్యామసంఖ్యామవస్థాం
బిభేమి ప్రభో కిం కరోమి ప్రసీద || 12 ||
లపన్నచ్యుతానంత గోవింద విష్ణో
మురారే హరే నాథ నారాయణేతి |
యథానుస్మరిష్యామి భక్త్యా భవంతం
తథా మే దయాశీల దేవ ప్రసీద || 13 ||
భుజంగప్రయాతం పఠేద్యస్తు భక్త్యా
సమాధాయ చిత్తే భవంతం మురారే |
స మోహం విహాయాశు యుష్మత్ప్రసాదా-
-త్సమాశ్రిత్య యోగం వ్రజత్యచ్యుతం త్వాం || 14 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీ విష్ణు భుజంగ ప్రయాత స్తోత్రం సంపూర్ణం |