గుహ్యషోఢాన్యాసోపనిషత్

గుహ్యషోఢాన్యాసోపనిషత్

అథ గుహ్యాం న్యసేత్ . శివో భవేత్ . శక్తిరూపో భవేత్ .

విద్యారాజ్ఞీన్యాసమేవం చరేత్ . న జపో న పూజా న సాధనం న

కాలనియమో న దివా న రాత్రిః . సర్వకాలం న్యసేత్ . శక్తియుక్తో భవేత్ .

యథాధికారవాన్ న్యసేత్ . పూర్ణదీక్షాం లభేత్ . షోఢారూపో భవేత్ .

చింతామణిర్భవేత్ . క్రీం మాతృస్థానే న్యసేత్ . పరాత్ పరతరో భవేత్ .

శివో భవేదిత్యేకః . అథ తారాద్వయపుటితాం మాతృకాం మాతృకాపుటితాం

తాం మాతృకాస్థానే న్యసేత్ . పరాతీతారూపో భవేదితి ద్వితీయః . అథ

శక్తికాద్వయపుటితాం మాతృకాం మాతృకాపుటితాం తాం న్యసేత్ . తుర్యారూపో

భవేత్ . తృతీయకలారూపో భవేత్ . కాలసంకలనాత్ కాలీ . సహేలం సలీలం

వా స్మరణాద్వరదానేషు చతురా . తేనేయం దక్షిణా . సంబోధనద్వయపుటితాం

మాతృకాం మాతృకాపుటితం నామద్వయం లిపిస్థానే న్యసేత్ . తుర్యాత్ పరారూపో

భవేత్ . చతుర్థీకలారూపో భవేత్ . లోకపాలసంవాదినీ చతుర్థీ .

అథ పంచమీం కలాం న్యసేత్ . పంచమీకలారూపో భవేత్ . సుభగాత్రయం

కూర్చవహ్నిలలనాం వహ్నేస్త్రికోణదైవతస్య లాలనాచ్ఛ్రీకంఠరూపస్తుర్యా

పరాతీతా . ఏతత్పుటితమాతృకాపుటితమేతన్మంత్రం మాతృకాస్థానే న్యసేదితి

పంచమీ . శివత్వం గచ్ఛతి . స సర్వరూపో భవేత్ . అథ షష్ఠీం

కలాం న్యసేత్ . పూర్ణాం విద్యారాజ్ఞీం లిపిస్థానే న్యసేద్వ్యాపయేత్ . స శివో

భవేత్ . స సర్వజ్ఞత్వం గచ్ఛతి . స కవిర్భవేత్ . స సంన్యాసీ భవేత్ .

దేవో హ వై భవేత్ . విశ్వరూపో భవేత్ . అయుతం న్యసేత్ . ఋషిచ్ఛందాది

పూర్వవద్భవేత్ . బ్రహ్మాండగోలకేఽపి యా జగతీతలే తాం సర్వాం భునక్తి .

యస్యాః స్మరణాత్ సిద్ధో నిదేశవర్తీ చ భవేత్ తాం న్యసేత్ . న్యసనం

న్యాసః . సమ్యక్ న్యాసః సన్న్యాసః . న తు ముండితముండః . తస్య దేవాదయో

నమస్యంతీతి ప్రోతం వేద . ఓం శివం ..

(శాక్త-ఉపనిషదః)

ఇత్యాథర్వణే సౌభాగ్యకాండే గుహ్యషోఢాన్యాసోపనిషత్ సమాప్తా .