గోమంత్రపాఠః

బహులే సమంగే హ్యకుతోభయే చ

క్షేమే చ సఖ్యేవ హి భూయసీ చ .

యథా పురా బ్రహ్మపురే సవత్సా

శతక్రతోర్వజ్రధరస్య యజ్ఞే .. 1..

భూయశ్చ యా విష్ణుపదే స్థితా యా

విభావసోశ్చాపి పథే స్థితా యా .

దేవాశ్చ సర్వే సహ నారదేన

ప్రకుర్వతే సర్వసహేతి నామ .. 2..

మంత్రేణైతేనాభివందేత యో వై

విముచ్యతే పాపకృతేన కర్మణా .

లోకానవాప్నోతి పురందరస్య

గవాం ఫలం చంద్రమసో ద్యుతిం చ .. 3..

ఏతం హి మంత్రం త్రిదశాభిజుష్టం

పఠేత యః పర్వసు గోష్ఠమధ్యే .

న తస్య పాపం న భయం న శోకః

సహస్రనేత్రస్య చ యాతి లోకం .. 4..

ఇతి గోమంత్రపాఠః సమాప్తః .

శ్రీసురభియాగపద్ధతిః .