గోమహిమావర్ణనం

గోమహిమావర్ణనం

గోషు యజ్ఞాః ప్రవర్తంతే గోషు దేవాః ప్రతిష్ఠితాః .

గోషు వేదాః సముత్కీర్ణాః సషడంగపదక్రమాః .. 24..

శృంగమూలే గవాం నిత్యం బ్రహ్మా విష్ణుశ్చ సంస్థితౌ .

శృంగాగ్రే సర్వతీర్థాని స్థావరాణి చరాణి చ .. 25..

శివో మధ్యే మహాదేవః సర్వకారణకారణం .

లలాటే సంస్థితా గౌరీ నాసావంశే చ షణ్ముఖః .. 26..

కంబలాశ్వతరౌ నాగౌ నాసాపుటసమాశ్రితౌ .

కర్ణయోరశ్వినౌ దేవౌ చక్షుర్భ్యాం శశిభాస్కరౌ .. 27..

దంతేషు వసవః సర్వే జిహ్వాయాం వరుణః స్థితః .

సరస్వతీ చ కుహరే యమయక్షౌ చ గండయోః .. 28..

సంధ్యాద్వయం తథోష్ఠాభ్యాం గ్రీవాయాం చ పురందరః .

రక్షాంసి కకుదే ద్యౌశ్చ పార్ష్ణికాయే వ్యవస్థితా .. 29..

చతుష్పాత్సకలో ధర్మో నిత్యం జంఘాసు తిష్ఠతి .

ఖురమధ్యేషు గంధర్వాః ఖురాగ్రేషు చ పన్నగాః .. 30..

ఖురాణాం పశ్చిమే భాగే రాక్షసాః సంప్రతిష్ఠితాః .

రుద్రా ఏకాదశ పృష్ఠే వరుణః సర్వసంధిషు .. 31..

శ్రోణీతటస్థాః పితరః కపోలేషు చ మానవాః .

శ్రీరపానే గవాం నిత్యం స్వాహాలంకారమాశ్రితాః .. 32..

ఆదిత్యా రశ్మయో వాలాః పిండీభూతా వ్యవస్థితాః .

సాక్షాద్గంగా చ గోమూత్రే గోమయే యమునా స్థితా .. 33..

త్రయస్త్రింశద్దేవకోట్యో రోమకూపే వ్యవస్థితాః .

ఉదరే పృథివీ సర్వా సశైలవనకాననా .. 34..

చత్వారః సాగరాః ప్రోక్తా గవాం యే తు పయోధరాః .

పర్జన్యః క్షీరధారాసు మేఘా బిందువ్యవస్థితాః .. 35..

జఠరే గార్హపత్యోఽగ్నిర్దక్షిణాగ్నిర్హృది స్థితః .

కంఠే ఆహవనీయోఽగ్నిః సభ్యోఽగ్నిస్తాలుని స్థితః .. 36..

అస్థివ్యవస్థితాః శైలా మజ్జాసు క్రతవః స్థితాః .

ఋగ్వేదోఽథర్వవేదశ్చ సామవేదో యజుస్తథా .. 37..

ఇతి భవిష్యపురాణే ఉత్తరపర్వణి ఏకోనసప్తత్యధ్యాయాంతర్గతం

         గోమహిమావర్ణనం సమాప్తం .

భవిష్యపురాణ . ఉత్తరభాగ . అధ్యాయ 69/24-37..