గోస్తవనం

గోస్తవనం

అవతారో గవాం శ్రేష్ఠః సర్వేషు భువి జంతుషు .

యతస్తాసాం వికారోఽపి హ్యుపకారాయ జాయతే .. 1..

గచ్ఛంత్యః సంస్థితాః సుప్తాః శకృన్మూత్రకృతోఽపి వా .

గావః పునంతి లోకాంస్త్రీనతో దేవత్వమాగతాః .. 2..

శుభ్రాః పీతాస్తథా శ్యామాశ్చిత్రా వై లోహితాస్తథా .

కుర్వతే నృహృది స్థానం గావః ప్రకృతిశోభనాః .. 3..

లోకేఽమృతం యథా క్షీరం గోమయం పావనం పరం .

ఆయుర్ఘృతం తథా చైవ మూత్రం రోగవినాశనం .. 4..

అపూర్వం పంచగవ్యం చ తీర్థం కల్మషనాశనం .

ఏషా పరంపరా భవ్యా దుర్లభా సురభిం వినా .. 5..

ప్రత్యక్ష దేవతా గావో గావో వై లోకమాతరః .

తస్మాదర్చ్యతమా ఏతా రక్షణీయాః ప్రయత్నతః .. 6..

గోదానం చ పరం దానం గోధనం చ పరం ధనం .

గోభక్తిః పరమా సిద్ధిర్గోసేవా పరమా గతిః .. 7..

గావో యత్ర హి పూజ్యంతే పాల్యంతే చైవ యత్నతః .

గోపాలో భగవాంస్తత్ర ముదా వసతి నిత్యశః .. 8..

గావో మే పురతః సంతు గావో మే సంతు పృష్ఠతః .

గావో మే సర్వతః సంతు గవాం మధ్యే వసాన్యహం .. 9..

గాం వినా న హి మే శాంతిర్భవేదిహ పరత్ర చ .

ఇతి సంచింత్య భగవాన్ గోలోకమధితిష్ఠతి .. 10..

అస్తి గోసదృశం నైవ త్రిషు లోకేషు కించన .

యద్వశే భగవాన్ విష్ణుః పశ్చాద్ధావతి నిత్యశః .. 11..

గోమాతస్త్వం హి ధన్యాసి ధన్యం చ తవ జీవనం .

ధన్యాశ్చ తే నరా లోకే త్వత్సేవావ్రతినశ్చ యే .. 12..

ఇతి గోస్తవనం సంపూర్ణం .

(రచయితా -- పం. శ్రీగౌరీశంకరజీ ద్వివేదీ, సాహిత్యరత్న)