జయావిజయావిరచితం గంగాస్తవనం

జయావిజయావిరచితం గంగాస్తవనం

జయా-విజయా సఖ్యావూచతుః .

నమః ప్రసీదాంబ మహేశి మాతర్గంగే త్రిలోకాఖిలదుఃఖహంత్రి .

విష్ణోః పదం తత్పరమంతు లబ్ధ్వా త్రైలోక్యమాప్లావసి సాధితార్థం .. 1..

త్వాం స్తౌమి పశ్యామి పరావరేశే నమామి కాయావయవైరపి త్వాం .

అజ్ఞానమోహాంధతమోనిరస్తచిత్తాం తు మాం బోధయ యాదృశీ త్వం .. 2..

త్వం బ్రహ్మణా విష్ణునా పూరుషేణ శివేన వై దేవవరేణ భూయః .

సిద్ధైః పరజ్ఞైరపి ధీరవర్గైః స్తుతా కిమావాం మనువో భవాదృశీం .. 3..

ధన్యాఽవనీయం ఖలు భూతధాత్రీ లోకైః సర్వైః పూజితేయం బభూవ .

త్వం వై యస్యామవగాహ్యా నవోఘైర్విభాసి పుణ్యాధికపుణ్యవత్యాం .. 4..

జానంతి కే త్వాం నను మూఢబుద్ధయో నరాః స్త్రియో వా వన జంతవో వా .

పీతామృతా దృష్టసహస్త్రసూర్యా జానంత్యనంతామృతసారభూతాం .. 5..

ప్రాణాంస్త్యజంతం త్వయి వా వసంతం గాయంతమానందమయీంచ వా త్వాం .

కః శ్రద్ధధీతాహితదేహబంధం వినాత్మఘాతాన్నరకాయ యోగ్యాన్ .. 6..

యః సర్వలోకామరయజ్ఞదేవః స్వయం శివః శ్రీమతి చోత్తమాంగే .

సర్వోత్తమాం త్వాం ప్రదధాతి గంగాం సార్థం శివత్వం హ్యధిమన్యమానః .. 7..

సర్వస్య సర్వత్ర తు నాధికారః కస్యాపి కుత్రాపి చ కో హి ఆస్తే .

త్వం ఖండితబ్రహ్మకటాహకోటిః సర్వత్ర చాఖండగతిః కిలాస్మే .. 8..

ధ్యాయే శివే త్వాం శశిశుల్కవర్ణాం

      చతుర్భుజాం పద్మవరాభయామృతైః .

యుక్తాంచ శుక్లే మకరే వసంతీం

      త్రిలోచనాం దేవనుతామలంకృతాం .. 9..

నమః శివాయై శాంతయై గంగాయై తే నమో నమః .

నమో మకరవాసిన్యై కౌటిచంద్రరుచే నమః .. 10..

చతుర్భుజాయై పద్మేన వరేణాప్యభయేన చ

      పీయూషపూర్ణకనకఘటేన చ విరాజినాం .

సర్వాలంకారభూషాఢ్యాం త్రినేత్రాం దైవతైర్నుతాం

      స్మితాస్యాం గౌరవసనాం స్థిరనూపురశించినీం .

      బ్రహ్మవిష్ణుశివారాధ్యాం దధానాయై తనుం నమః .. 11..

నమః కల్మషహంత్ర్యై చ లోకమాత్రే నమో నమః .

సర్వతీర్థభవాయై చ సులభాయై నమో నమః .. 12..

.. ఇతి బృహద్ధర్మపురాణాంతర్గతం జయా-విజయాకృతం గంగాస్తవనం సంపూర్ణం ..

.. బృహద్ధర్మపురాణం . పూర్వఖండః . గుణనిర్ణయ అధ్యాయః 5. 36-47..