జ్ఞానప్రసూనాంబాస్తోత్రం

జ్ఞానప్రసూనాంబాస్తోత్రం

మాణిక్యాంచితభూషణాం మణివరాం మాహేంద్రనీలోజ్జ్వలాం

     మందారద్రుమమాల్యభూషితకచాం మత్తేభకుంభస్తనీం .

మౌలిస్తోమనుతాం మరాళగమనాం మాధ్వీరసానందినీం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 1..

శ్యామాం రాజనిభాననాం రతిహితాం రాజీవపత్రేక్షణాం

     రాజత్కాంచనరత్నభూషణయుతాం రాజ్యప్రదానేశ్వరీం .

రక్షోగర్వనివారణాం త్రిజగతాం రక్షైకచింతామణిం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 2..

కల్యాణీం కరికుంభభాసురకుచాం కామేశ్వరీం కామినీం

     కల్యాణాచలవాసినీం కలరవాం కందర్పవిద్యాకలాం .

కంజాక్షీం కలబిందుకల్పలతికాం కామారిచిత్తప్రియాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 3..

భావాతీతమనఃప్రభావభరితాం బ్రహ్మాండభాండోదరీం

     బాలాం బాలకురంగనేత్రయుగలాం భానుప్రభాభాసితాం .

భాస్వత్క్షేత్రరుచాభిరామనిలయాం భవ్యాం భవానీం శివాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 4..

వీణాగానవినోదినీం విజయినీం వేతండకుంభస్తనీం

     విద్వద్వందితపాదపద్మయుగలాం విద్యాప్రదాం శంకరీం .

విద్వేషిణ్యభిరంజినీం స్తుతిభవాం వేదాంతవేద్యాం శివాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 5..

నానాభూషితభూషణాదివిమలాం లావణ్యపాథోనిధిం

     కాంచీచంచలఘాటికాకలరవాం కంజాతపత్రేక్షణాం .

కర్పూరాగరుకుంకుమాంకితకుచాం కైలాసనాథప్రియాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 6..

మంజీరాంచితపాదపద్మయుగలాం మాణిక్యభూషాన్వితాం

     మందారద్రుమమంజరీమధుఝరీమాధుర్యఖేలద్గిరాం .

మాతంగీం మదిరాలసాం కరశుకాం నీలాలకాలంకృతాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 7..

కర్ణాలంబితహేమకుండలయుగాం కాదంబవేణీముమాం

     అంభోజాసనవాసవాదివినుతామర్ధేందుభూషోజ్జ్వలాం .

కస్తూరీతిలకాభిరామనిటిలాం గానప్రియాం శ్యామలాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 8..

కౌమారీం నవపల్లవాంఘ్రియుగలాం కర్పూరభాసోజ్జ్వలాం

     గంగాఽఽవర్తసమాననాభికుహరాం గాంగేయభూషాన్వితాం .

చంద్రార్కానలకోటికోటిసదృశాం చంద్రార్కబింబాననాం

     ధ్యాయే చేతసి కాళహస్తినిలయాం జ్ఞానప్రసూనాంబికాం .. 9..

బాలాదిత్యనిభాననాం త్రినయనాం బాలేందునా భూషితాం

     నీలాకారసుకేశినీం విలసితాం నిత్యాన్నదానప్రదాం .

శంఖం చక్రవరాభయం చ దధతీం సారస్వతార్థప్రదాం

     తాంబూలీం త్రిపురాం శివసేనసహితాం ధ్యాయామి మూకాంబికాం  .. 10..

ఇతి జ్ఞానప్రసూనాంబికాస్తోత్రం సమాప్తం ..