జ్వాలాముఖీస్తోత్రం

జ్వాలాముఖీస్తోత్రం

ఓం నతాః స్తుతిపరాః సర్వే యస్యా నిత్యం దివౌకసః .

తమో హృత్వా శంకరస్య భూత్యై భూయాత్సదాశివా .. 1..

శ్రీసుందరీం జగద్ధాత్రీం జ్వాలావ్యాప్తదిగంతరాం .

సురైః సిద్ధైః స్తుతాం భూపైః సుముఖీం నౌమ్యహం శివాం .. 2..

దైత్యానాం భటకోటికోటిముకుటాటోపానధః కుర్వతీం

     విఘ్నానాం కటకాన్యతీవ కటకాన్యాపాటయంతీం స్ఫుటం .

భక్తానామభయం వరం చ దధతీం శాంతాత్మనాం సర్వదా

     షడ్వక్త్రేణ జితాం క్రియావిరహతో జ్వాలాముఖీం నౌమ్యహం .. 3..

బ్రహ్మాణం మధుకైటభౌ వధపరౌ సంత్రాసయంతౌ పరం

     నానారూపధరావతీవ భయదౌ స్థూలోన్నతౌ సంయుగే .

తౌ హత్వా వినివర్తితాం కృతవతీం తన్మేదసా మేదినీం

     సర్వేషాం శుభదాయినీం భగవతీం జ్వాలాముఖీం నౌమ్యహం .. 4..

సైన్యానాం మహిషాసురస్య మృతిదాం సింహాధిరూఢాం చ తాం

     నానాకారవిశేషసౌఖ్యజననీం దేహాంతరే సంస్థితాం .

బాలామధ్యమవృద్ధరూపరమణీం శ్రీసుందరీం వైష్ణవీం

     స్త్రీరూపేణ జగద్విమోహనకరీం జ్వాలాముఖీం నౌమ్యహం .. 5..

దేవానాం భయదాయకౌ సుకఠినౌ శుంభో నిశుంభస్తథా

     నానాశస్త్రధరౌ రిపూ ధృతిహరౌ తౌ చండముండాంకితౌ .

సంగ్రామేఽప్యపరాజితౌ వికసితౌ ద్వౌ రక్తబీజాన్వితౌ

     హత్వైవం సుబలాం ప్రసన్నవదనాం జ్వాలాముఖీం నౌభ్యహం .. 6..

సంసారార్ణవతారిణరిణీం రవిశశికోటిప్రభాం సుప్రభాం

     పాపాతంకనివారిణీం హరిహరబ్రహ్మాదిభిః సంస్తుతాం .

దారిద్ర్యస్య వినాశినీం సుకృతినాం జాడ్యం హరంతీం భృశ-

     మజ్ఞానాంధమతేః కవిత్వజననీం జ్వాలాముఖీం నౌభ్యహం .. 7..

రత్నపంచకనామానం శ్రీసుందర్యాః స్తవం వరం .

అవ్యాకులం యః పఠతి సోఽభీష్టాం సిద్ధిమాప్నుయాత్ .. 8..

జ్వాలాముఖి మహాజ్వాలే జ్వాలాపింగలలోచనే .

జ్వాలాతేజీ మహాతేజీ జ్వాలాముఖి నమోఽస్తు తే ..

ఇతి జ్వాలాముఖీస్తోత్రం సంపూర్ణం .