తారోపనిషత్

తారోపనిషత్

ఓం నమః శివాయ .

అథ హైనాం బ్రహ్మరంధ్రే తారిణీమాప్నోతి .

తారయీతీతి తారా . తారా స్యాదర్ద్వపంచాక్షరరూపా

బ్రహ్మవిష్ణుమహేశ్వరసదాశివబిందుమేలనరూపా విద్యా . తథా ప్రథమం

భువనాముచ్చరేత్ . వ్యోమజ్వలనేందిరాకలాబిందుమేలనరూపా . తతో

వధూముచ్చరేత్ . షోడశహలతూర్యస్వరబిందుమేలనరూపా . తతః

కూర్చం వ్యోమషష్ఠస్వరబిందుమేలనరూపం . నీలాఖ్యా సరస్వతీ .

ఇమామధీయానస్తర్కాగమపురాణాకావ్యాదివాగీశ్వరో భవతి . తారాదికాస్త్రాంతా

చేత్ తారా భవతి . ఏతస్యా జ్ఞానమాత్రేణ జీవన్ముక్తో భవేద్ వై .

తామేత్య సర్వవిద్యాజ్ఞానవాన్ భవతి .

వారత్రయం యః పఠేత్ స సన్యాసి శివ ఇవ

సర్వదేవమయో భవతి . తారరహితా పునరేకజటా భవతి .

ఏతద్రూపామధీయానా సమానఫలదా . నాత్ర మిత్రామిత్రాదివిచారణా .

సిద్ధవిద్యానామాసాం ఫలం దక్షిణావత్ . అథాతో మంత్రాన్

జలసుద్ధిక్షాలనాచమనకరాక్షతప్రక్షేప-

త్రివిధవిఘ్నోత్సారణభూమ్యభిమంత్రణం

జలాభ్యుక్షణకుసుమశుద్ధియంత్రనిర్మాణరూపానాగమవాదీ లిఖేత్ .

ఏకలింగే పితృభూమౌ చిరశూన్యనిర్జనే దేవాలయే విజనే చతుష్పథే

ఉజ్జటే భూధరతటే నిర్జనే దేశే నిర్జన దేవాగరి శ్రీఫలమూలే

విజనే నదీతీరే చైత్యహట్టే వటాశ్వత్థమూలే స్వగృహే వా పూజా .

పంచతత్వవిధినా . అక్షోభ్యమునిరస్యాపి ఛందస్తు బృహతీ కూర్చం

బీజం శక్తిర్భువనా వధూః కీలకం . ఏకజటా తారిణీ వజ్రోదకైకోగ్రజటా

మహాప్రతిసరా పింగోగ్రైకజటా ఆభిముఖ్యేన  షడంగాని ఇంద్రనీలావర్ణాభా

మూలమంత్రభాంజి మూలాధారనాభిహృదయబ్రహ్మరనంధ్రేషు భువనా

వధూకూర్చశోషణదహనప్రోత్సారణామృతాకృతిమూర్తిర్జననీయా తత్త్వవిధినా .

సజలప్రావృషేణ్యఘనరాజినిభాహ్యష్టవర్షా పీనోన్నతవక్షోరుహా

నానావిధస్త్ర్యలంకార విరాజితా . సర్వా లంబోదరీ భీమా

వ్యాఘృత్వగావృతా మహాచీనగురుకపాలపంచముద్రా విరాజితా

భీమదంష్ట్రా కరాలాస్యా పిఙ్లోగ్రైకజటా ఖడ్గకర్తృదక్షిణకరయుగా

కపాలోత్పలవామకారయుగా అక్షోభ్యమౌలీందుప్రజ్వలితా

పితృభూమిమధ్యస్ఠా ధ్యేయా . చిత్తతోష్ణానంతరం స్వయం తారిణీతి

ఆత్మభేదతయా ఆత్మని సంతోష్య పూర్వమోంకారం తత ఆకారః

పరే సురేఖే వజ్రరేఖే ఉత్తరే కూర్చం తదంతాస్త్రవహ్నిజాయా .

చతురస్రాష్టదలత్రికోణరూపం యంత్రం . లక్ష్మీ సరస్వతీ రతిః

ప్రీతిః కీర్తిః తుష్టిః శాంతిః సదాశివశ్చాత్ర గమాగమవశాత్

పుష్పాంజలియోగమూలమంత్రరూపపటలవిహితకుసుమపరద్రవ్యదానతర్పణం .

నైవేద్యభూతబలిదానాదిముఖ్యషడంగాని . గురూనపి యథాదేశం .

పూర్వాదిదిశి గణేశవటుకక్షేత్రపాలయోగిన్యః . ఆగ్నేయాదిషు

శంఖపాండర తారకాన్ . త్రికోణేషు బీజత్రయం . దిశి

పద్మాంతకయమాంతకవిఘ్నాంతకనరాంతకాన్ . త్రికోణేషు బీజత్రయం

బ్రాహ్మీ వైష్ణవీ మాహేశ్వరీ శక్తిత్రయయుతా యథాయోగ్యం వస్త్రాలంకార

మహాశంఖమాలయా లక్ష నియమేనానియమేన వా సిద్ధవిద్యానాం

దేవజ్ఞానప్రకాశకానాం సంజ్ఞానసంకాన్ . కాలికావిహితాని కల్పాని కుర్యాత్ .

అథ హైనం భగవంతం పరమేష్ఠినం సనత్కుమారః పప్రచ్ఛ యేన

సర్వస్య సర్వం భవతి తన్మంత్రం కథయ భగవన్ కో హి మంత్రాణాం

పరమా మంత్రదేవతానాంచ దైవతం కిముతాస్య విద్యాయుగశోధనం

పుత్రపౌత్రకవిత్వంచ ధనధాన్యకవిత్వంచ నిర్వాణమోక్షం చ

లభతే బుధః . కేన విధినా ఆరాధ్యతే కేన మంత్రేణ సర్వమితి .

అథాహ భగవాన్ బ్రహ్మా మంత్రాణాం పరమో మంత్రస్తారేతి పరమా తారా సా

దేవతానాంచ దేవతా . సర్వదా స్త్రీషు మధ్యేషు జపేత్ . స్త్రియా యోనౌ

సదా జపేత్ . ఋతుమతీం గచ్ఛేత్ . తులసీం త్యజేత్ . ఏవం కృత్వా గురుః

శిష్యోఽయుతద్వయం నిశాయాం ఏకాకీ శూన్యగృహే తిమిరాలయే .

తదా సర్వస్య సర్వం తరతి యశస్యంతే నరాః . ఓం .

ఇతి తారోపనిషత్ సమాప్తా .

ఓం తారాయై నమః .