శ్రీపద్మావతీపరిణయతారావలిః

శ్రీపద్మావతీపరిణయతారావలిః

శ్రీమానంభోధికన్యావిహరణభవనీభూతవక్షఃప్రదేశో

భాస్వద్భోగీంద్రభూమీధరవరశిఖరప్రాంతకేలీరసజ్ఞః .

శశ్వద్బ్రహ్మేంద్రవహ్నిప్రముఖసురవరారాధ్యమానాంఘ్రిపద్మః

పాయాన్నః శ్రీనివాసః ప్రణతజనమనఃకామనాకల్పశాఖీ .. 1..

శ్రీమచ్చంద్రాన్వవాయే త్రిజగతి మహితే భూపతిః కశ్చనాసీత్

ఆకాశాఖ్యః స్వతేజఃప్రశమితసకలారాతిగర్వాంధకారః .

ప్రాగాద్యాశావధూటీకుచకలశతటీక్షౌమితాత్మీయకీర్తిః

నిర్వేలౌదార్యశాలీ హరిరివ ధరణీం హ్లాదయన్నాదరేణ .. 2..

పుత్రాభావాత్కదాచిన్నృపకులతిలకః పుత్రకామేష్టిహేతోః

క్షోణీం సీరేణ కర్షన్ స్ఫురదమలదలం హైమమంభోజమస్యాం .

దృష్ట్వా తస్మింశ్చ కన్యాం సరసిజనయనాం పుత్రికేయం . త్వదీయే-

త్యాకర్ణ్యాకాశవాణీమనవధికుతుకస్మేరవక్త్రోఽగ్రహీత్తాం .. 3..

తస్మిన్ యజ్ఞం నృపేంద్రే కృతవతి మహిషీ భూరివాంతర్నిధానం

దివ్యం తేజో వహంతీ స్ఫుటతమవిభవా లబ్ధసంస్కారసంపత .

అర్థం శక్తిత్రయీవాక్షయమభిసుషువే శక్రసాధ్వీసదృక్షా

ప్రాప్తే కాలే ముహూర్తే లసితశుభగుణా మిత్రతుల్యం సుపుత్రం .. 4..

ధాత్రీ ప్రోక్తః స నిఘ్నో గురుషు విధివదాకల్ప్య తజ్జాతకర్మ

స్వారస్యంత్మీయం చాప్యపత్యం వసుదమవనిజాం పద్మతౌల్యేన పద్మాం .

చక్రే బాలశ్చ సోఽయం విధురివ వవృధే వాసరైశ్శుక్లపక్షే

పిత్రాదేర్బ్రహ్మచర్యవ్రతమథ విధినా ప్రాప చాస్త్రాణి వేదాన్ .. 5..

బాలా రాజన్యమౌలేరనుదినమతులాం వృద్ధిమాసాద్యమానా

సేయం లబ్ధోదయా శ్రీహిమకరకలికేవావలేహ్యాంగశోభా .

కర్ణాంతశ్రాంతాపంకేరుహదలనయనా మందహాసోజ్జ్వలాస్యా

సుభ్రూస్సౌందర్యలక్ష్మీరివ సకలజనాహ్లాదభూత్యై బభూవ .. 6..

తతః కదాచిత్--

తాం పద్మాం స్వాలివృందైస్సహ కుసుమవనే పారిజాతప్రసూనా-

న్యాదాయాదాయ రమ్యే క్వచిదనులవలీమంటపే నిక్షిపంతీం .

దృష్ట్వా కోఽప్యుత్తమస్త్వాం వివహతి పురుషశ్శ్రీసమృద్ధోఽచిరేణే-

త్యుక్తా దత్త్వా శుభాశీవచనమథ యయౌ నారదః పారదశ్రీః .. 7..

పశ్చాదాఖేటలోభాదధి గహనతలం ధావయంతం కరీంద్ర

దృష్ట్వా తుంగే తురంగే కమపి చ పురుషం పద్మపత్రాయతాక్షం .

కోఽయం శ్రీమాన్ వనాంతే విచరతి సఖి కిం దృష్టపూవస్త్వయాఽయం

నో చేత్ పృష్ట్వా స్వరూపం స్మరరుచిరతనోశ్చిత్తమాశ్వాసయామి .. 8..

ఇతి సఖీముక్తవా తం ప్రతి--

కస్త్వం భోఃశ్రీనివాసోఽస్మ్యహమఖిలజగన్నాయకః కాఽసి బాలే

శ్రీమానాకాశనామా నృపకులతిలకస్తస్య పద్మాఽస్మి పుత్రీ .

కస్మాదత్రాగతస్త్వం తరుణి మనసిజం పృఛ జానే న చాహం

వామో వామోరు యో మామనయదయి తవ శ్రీపదాంభోజమూలం .. 9..

ఇతి తేన ప్రత్యుక్తా-

సేయం శ్యామా లతాంగీ సరసిజనయనస్యాంతరంగం విదిత్వా

రేరే మా మానిషాద శృణు మమ వచనం యాహి శీఘ్రం పితా మే .

ఆగంతా కిం వివిక్తే వససి చిరమితి శ్లిష్టముచ్చార్య పార్శ్వే

జ్ఞాత్వా గూఢాం సఖీనాం స్థితిమథ నిరగాల్లజ్జితా తాః ప్రపేదే .. 10..

యాతే రాజీవనేత్రే స్వయమథ సకలాస్స్వాస్సఖీస్తా విహాయ

స్వీయం ప్రాప్యావరోధం హృది తమనుపదం చింతయంత్యేకరూపం .

దీనా కందర్పతీవ్రప్రహరణవికలస్వాంతరంగా కృశాంగీ

నో నక్తం నో దివా వా స్వపితి విహరతి స్నాతి భుంక్తే స్మ పద్మా .. 11..

చేతస్తస్యా విదిత్వా స చ హయమధిరుహ్యాశు గేహం ప్రపన్నః

కృచ్ఛ్రేణాతీత్య కక్ష్యాః కథమపి శయనాగారమభ్యేత్య తల్పే .

తామేవాంతర్దధానో దిశిదిశి పురతః పార్శ్వతశ్చాపి పద్మాం

పద్మాక్షీమీక్షమాణః ప్రతికలమముహ చ్చింతయంస్తద్గుణౌఘాన్ .. 12..

ఏహ్యేహ్యుత్తిష్ఠ శేషే కిమిదముపనతం నాస్తి తే కిం బుభుక్షా

భుంక్ష్వ ప్రాతశ్చ సమ్యఙ్న హి బత భవతా భుక్తమిత్యామనంతీ .

ఆసీనాఽఽరాచ్చ కిం తే హృదయగతమహో కిం ను వా సుందరీం తే

దృష్ట్వా ముగ్ధం మనస్తే కుత ఇతి వకులా మేఽభిధత్స్వేత్యపృచ్ఛత్ .. 13..

మాతః కాంతారదేశే ద్విరదమనుసరన్నేకతో దైవయోగాత్

ఆత్మీయాభిస్సఖీభిస్సహ కుసుమవనే పారిజాతాపచాయం .

కుర్వంతీం వ్యోమనామ్నో నృపకులతిలకస్యాత్మజామంబుజాక్షీం

అద్రాక్షం తత్కటాక్షైరపహృతమభవన్మన్మనశ్చేత్యవాదీత్ .. 14..

తతః

నేతుం సంభోజ్య తం ద్రాగథ కృతశపథా ప్రస్థితా తన్నగర్యాః

మధ్యేమార్గం మహేశం కలశజమునినా పూజితం సంప్రణమ్య .

ప్రాప్యానుజ్ఞాం మహర్షేర్మహితగుణనిధేర్వ్యాససూనోశ్శుకస్యా-

తీత్యారణ్యాని పద్మాలిభిరథ వకులా సంగతాఽఽసీత్ క్రమేణ .. 15..

దృష్ట్వా పృష్ట్వా చ బాలాః కిమిహ వసథ కా యూయమిత్యాదరోక్త్యా

మాతః పద్మావయస్యా వయమితి చ తదీయోత్తరం సా నిశమ్య .

పౌనఃపుణ్యేన మధ్యే పథి నృపతనయాశీలమాకర్ణయంతీ

ప్రాయాత్తూర్ణం ప్రమోదాద్వియదధిపపురీం ప్రాంశుహర్మ్యాగ్రభాగాం .. 16..

తదైవ

ఆయాంతీం వీథికాయామథ శతసుషిరేణాంశుకేనాంచితాంగీం

గుంజాశంఖాదిభూషామధిహృదయతలం స్వాత్మజం ధారయంతీం .

భూతం భవ్యం భవద్వః ఫలమపి కథయామీతి తారం భణంతీం

ఆనాయ్యోచే భవిష్యద్వద ఫలమితి తాం రాజపత్నీ పులిందాం .. 17..

సైవం పశ్చాత్పులిందాఽప్యయి తవ తనయోద్యానదేశే యువానం

దృష్ట్వా కందర్పతుల్యం సితనలినదృశం తం వృషస్యంత్యభీక్ష్ణం .

విద్ధా కందర్పబాణైరభిలషితమసావాప్నుయాదేవ బాలే-

త్యుక్త్వా రాజ్ఞీమయాసీత్పథిపథి చ పునర్వ్యాహరంతీ యథోక్తం .. 18..

తతః

పుత్రీమాసాద్య రాజ్ఞీ తవ కిమభిమతం బ్రూహి మే నైవగోప్యం

కిం వా కార్యం కరిష్యే తదపి చ తనయే తన్మమాచక్ష్వ సద్యః .

ఏవం సాంత్వం జనన్యా కథితమనుగతా మ్లిష్టమాహ స్మ పద్మా

మాతః శ్రీశావలోకాదహమభజమిమాం తద్వియోగజ్వరార్తిం .. 19..

రాజ్ఞీ పుత్ర్యా రహస్యం కథమపి కథితం సత్రపం సానుతాపం

శ్రుత్వా వై(ఫ)ల్యభీతస్ఫుటితనిజమనాః కృచ్ఛ్రతః స్థాస్నుధైర్యా .

వాసు త్వం నో విభీయాస్తవ హృదయగతం నైవ దుఃసాధమేతత్

సాధ్నోమి త్వాం చ సాధు ప్రియతమహృదయాం మోదయామీత్యవాదీత్ .. 20..

దృష్ట్వా పద్మాసఖీభిః సమమథ వకులాఽఽకాశభూమీశపత్నీం

దేవి ప్రఖ్యాతకీర్తిర్వృషగిరినిలయః శ్రీనివాసస్తవైవ .

కన్యాం సప్రేమమైచ్ఛత్కలయతు భవతీ పద్మినీదానపూర్వం

తత్కల్యాణం సుఖేనేత్యవదదథ నృపశ్చాభ్యనందత్తథేతి .. 21..

శ్రీమానాకారితస్తం సురగురురచిరాదేత్య చాకాశరాజం

శ్రీమన్వైశాఖమాసే సితదలనవమీసంయుతే శుక్రవారే .

అస్తి హ్యద్వాహలగ్నం ప్రతిహతకలుషం నిశ్చితం సుప్రశస్తం

తస్మిన్ పద్మావివాహో భవతు నృపవరేత్యేవమారాదవోచత్ .. 22..

సోఽయం రాజేంద్రమౌలిస్తదను స వకులాం ప్రేషయన్ వ్యాససూనుం

దూతైరానాయ్య తస్మై విధివదతిథిసత్కారమాధాయ ధీమాన్ .

పద్మిన్యా త్వాం విధిత్సుర్గృహిణమధిప ఇత్యుచ్యతాం భవ్యవార్తే-

త్యాఖ్యాయారాచ్ఛుకర్షిం ఫణిగిరినిలయస్యాంతికం ప్రాహిణోత్తం .. 23..

సద్యస్త్వష్టా తదాత్వే వియదధిపవిభోరాజ్ఞయా రాజధానీం

నవ్యప్రాసాదహర్మ్యప్రముఖనిరుపమప్రాభవాఢ్యామకార్షీత్ .

రన్భాస్తంభైః ప్రఫుల్లప్రసవఫలయుతై రమ్యచూతప్రవాలైః

చిత్రైస్సంస్థానభేదైస్తదను పురజనోఽభూషయద్రంగవల్ల్యా .. 24..

శ్రీరప్యాత్మప్రియం తం మణిగణనిచితే విష్టరే సన్నివేశ్యా-

భ్యజ్య శ్రీగంధతైలైర్గగనచరధునీవారిభిస్స్నాపయిత్వా .

క్షౌమం సంధార్య నూత్నం మృగమదతిలకం భాలభాగే విధాయా-

తానీద్గంధానులేపాద్యఖిలవిధపరిష్కారమామోదభూమ్నా .. 25..

పశ్చాద్బ్రహ్మేంద్రవైవస్వతవరుణకుబేరాదిభిర్దేవవృందైః

తైస్తైర్బ్రహ్మర్షివర్యైః ప్రథితనిజతపస్సంపదున్మేషవద్భిః .

వాణీంద్రాణీభవానీముఖవిబుధవధూసంచయైరంచితోఽసౌ

యుక్తో మాంగల్యవాద్యైర్వియదధిపపురీం ప్రావిశచ్ఛ్రీనివాసః .. 26..

పద్మాశ్రీశౌ తదానీం కరిపతగపతిస్కంధదేశే నిషణ్ణౌ

ఆదాయాకాశరాజో నిజకులగురుభిః పౌరవృద్ధైరమాత్యైః .

సాధ్వీలోకైర్మృదంగాద్యఖిలశుభమహాతూర్యఘోషైశ్చ సార్ధం

తీర్ణగ్రామోత్సవౌ తావనుపమకుతుకాదానినాయ స్వగేహం .. 27..

శ్రీపద్మాశ్రీనివాసౌ నిజగళలసితాం శ్రీమతీం పుష్పమాలాం

అన్యోన్యం మందహాసస్ఫుటరుచిరముఖాంభోరుహో లీలయైవ .

హర్షోత్కర్షం తదానీం పురజనహృదయేష్వావహంతౌ త్రివారం

వృద్ధాచారానురోధాద్వినిమయమవనీశాంగణే తావకార్ష్టాం .. 28..

స శ్రీమాన్ శ్రీనివాసో వియదధిపసుతాపాణిమాలంబ్య పాణౌ

నిర్దిష్టం తేన రాజ్ఞా వివిధమణిమయస్తంభదివ్యాంతరాలే .

శ్రీమత్కల్యాణగేహే మణిగణవిలసన్మంటపే వేదిమధ్యే

భాస్వద్భాస్వత్ప్రకాశం మణిమయమవిశత్ ప్రాంశు కల్యాణపీఠం .. 29..

పాదౌ నిర్ణిజ్య తీర్థైరథ మనుజపతిశ్శ్రీశమారాధ్య సమ్యక్

దత్త్వాఽనల్పం కిరీటప్రముఖమణిమయాశేషభూషావిశేషాన్ .

పుత్రీం పద్మాం సహేమాక్షతకుసుమశుభద్రవ్యపూర్ణాంబుధారా-

పూర్వం ప్రాదాత్ ప్రమోదాత్కరకమలతలే సోఽపి జగ్రాహ పద్మాం .. 30..

స్రష్టా శ్రీశేన పద్మాగలభువి విధివన్మంత్రపూతం ప్రశస్తే

లగ్నే మాంగల్యసూత్రం సహ శుభనినదైర్ధారయిత్వా విధిజ్ఞః .

పద్మాహస్తాబ్జదత్తైర్హుతభుజమపి తైర్హావయిత్వాఽథ లాజైః

ఏతౌ జాయాపతీ శ్రీద్విజవరవచసాఽతోషయత్సంప్రణమ్రౌ .. 31..

శ్రీమాన్బ్రహ్మేశసంక్రందనవరుణకుబేరాదిమాన్ దేవసంఘాన్

దేవోఽనుజ్ఞాప్య సర్వాన్ శ్వశురమపి ముదాఽఽనమ్య పాదారవిందే .

శేషాద్రౌ శృంగభాగే రుచిరమణిమహాసౌధసంఘే నితాంతం

లక్ష్మీపద్మావతీభ్యామరమత ముదితః ప్రేమసంపూర్ణచేతాః .. 32..

శ్రీమాన్ శ్రీవత్సాంకితవక్షా వక్షోధివాసిలక్ష్మీకః .

శ్రీవేంకటేశదేవస్సతతం శ్రేయాంసి దిశతు భూయాంసి .. 33..

శ్రీశేషశర్మాభినవోపక్లృప్తః ప్రియేణ భక్త్యా చ సమర్పితోఽయం .

పద్మావిభోర్మంగలకంఠదేశే విరాజతాం శ్రీనవకంఠతారః .. 34..

.. ఇతి శ్రీపద్మావతీపరిణయతారావలిః సమాప్తా ..