శ్రీ సంకటమోచన హనుమదష్టకం (తులసీదాస కృతం)

 శ్రీ సంకటమోచన హనుమదష్టకం (తులసీదాస కృతం)

తతోఽహం తులసీదాసః స్మరామి రఘుందనం |
హనూమంతం తత్పురస్తాద్రక్షార్థే భక్తరక్షకం || 1 ||
హనూమన్నంజనాసూనో వాయుపుత్ర మహాబల |
మహాలాంగూలనిక్షేపనిహతాఖిలరాక్షస || 2 ||
అక్షవక్షోవినిక్షేపకులిశాగ్రనఖాంచిత |
శ్రీరామహృదయానంద విపత్తౌ శరణం భవ || 3 ||
ఉల్లంఘ్య సాగరం యేన ఛాయాగ్రాహీ నిపాతితా |
సింహనాదహతామిత్ర విపత్తౌ శరణం భవ || 4 ||
లక్ష్మణే నిహతే భూమావానీయ హ్యచలం తతః |
యయా జీవితవానద్య తాం శక్తిం ప్రకటీ కురు || 5 ||
యేన లంకేశ్వరో వీరో నిఃశంకం విజితః స్వయం |
దుర్నిరీక్ష్యోఽపి దేవానాం తద్బలం దర్శయాధునా || 6 ||
యయా లంకాం ప్రవిశ్య త్వం జ్ఞాతవాన్ జానకీం స్వయం |
రావణాంతఃపురేఽత్యుగ్రే తాం బుద్ధిం ప్రకటీ కురు || 7 ||
రుద్రావతార భక్తార్తివిమోచన మహాభుజ |
కపిరాజ ప్రపన్నస్త్వాం శరణం భవ రక్ష మాం || 8 ||
ఇత్యష్టకం హనుమతో యః పఠేచ్ఛ్రద్ధయాన్వితః |
సర్వకష్టవినిర్ముక్తో లభతే వాంఛితం ఫలం || 9 ||
ఇతి శ్రీగోస్వామితులసీదాస కృత సంకటమోచనం నామ శ్రీహనుమదష్టకం ||