Sacred Stotras & Deities

జగదంబార్తిక్యం

సర్వస్య స్వమసి మతా సద్విదుషామాద్యా

శ్రుతిభిః స్మృతిమిః శాస్త్రైః కవిభిః ప్రతిపాద్యా

గాయంతి త్వచ్చరితం నిపుణా వృతవాద్యాః

సా కా త్వత్తోఽన్యావతి నామ్నా పాపాద్యా

జయ దేవి ప్రణమదఖిలవరవితరణదక్షే

జయ జగదంబ సముద్ధృతశరణాగతలక్షే . ధ్రువ0.. 1..

మాతర్జగదుత్పత్తిస్థితిసంహృతిలీలే

సంశ్రితజనకల్మషవనకల్పదహనకీలే

సర్వత్ర సదా సాదరనతలాలనశీలే

స్వవిమలగుణగణరంజితవిధిశివధననీలే . జయ దేవి 0.. 2..

తవ సేవాఽర్థిజనానాం చింతామణిశాలా

భక్తమయూరాణాం తే స్మృతిరంబుదమాలా

త్వాం స్తోతుం త్వత్పురతో గీరపి ఖలు బాలా

కా తత్రాన్యకవికథా క్వ సుధా క్వ చ (1)హాలా? . జయ దేవి0.. 3..

ఇతి శ్రీరామనందనమయూరేశ్వరకృతం జగదంబార్తిక్యం సంపూర్ణం .

1. హాలాసురా .

అష్టమహిషీప్రార్థనాశతకం

శ్రీవేంకటేశదారా ధీరా క్షేమస్య మే సదాధారా .

కరుణావనసంచారా తారాసంకాశరత్నమయహారా .. 1..

నారాయణవనజనితా నారీ నారాయణస్య మే మాతా .

పారాయణార్హచరితా త్రాతా పీతాంబరేణ చాయాతా .. 2..

మాతర్భూమేర్యాతః ప్రాతః సాయం నమామి తవ పోతః .

నిహితం తవ పది చేతః కాతః పరమవితుమస్తి మాం మాతః .. 3..

లసనప్రసూనవేషే ప్రసు మే వసు మేఽద్య దేహి హరియోషే .

కుసుమైరాభ్యాం భాషే ప్రాసూయామాం మనః స్వసంతోషే .. 4..

కాంచీలాంఛితదేవీం కాంచనదేవీం చ వరదవశనీవీం .

వందే మహతీం దేవీం చంద్రాం దంతావలాద్రిసుఖపృథివీం .. 5..

మాధవసాప్తపదీనే మామవ గతినిర్జితేభవతి యూనే .

నవనవభవనవిధానే భవ భవ నిత్యం మదీయహృత్స్థానే .. 6..

సజ్జనరక్షణధన్యాం మాన్యాం మన్యే సరిత్పతేః కన్యాం .

మేదిన్యాం కామిన్యాం గుణ్యాం గణయేయ భూరి సుధరిణ్యాం .. 7..

కరుణామధుమయచరణామరుణామరుణాన్వవాయపరిచరణాం .

కరుణావివృతాభరణాం సుగుణాభరణాం భజామి హరిశరణాం .. 8..

మజ్జనయిత్రీం ధాత్రీం సజ్జనపాత్రీం సుదీర్ఘఝషనేత్రీం .

భేజే ప్రసూనగాత్రీం దాత్రీం పాత్రీం నతస్య హరిమైత్రీం .. 9..

లక్ష్మీమక్షయసదయాం సార్ద్రసుహృదయాం సముద్రహితతనయాం .

ఆశ్రితరక్షణవిజయామాజానీయాస్యహృదయశుభనిలయాం .. 10..

అంబాం కచలోలంబాం కంబుగ్రీవాం ప్రసన్నముఖబింబాం .

పదగతిజితకాదంబామంబుజవల్లీం నమామి లోకాంబాం .. 11..

సీతాస్మాకం మాతా సాకేతాధీశ్వరీష్టిభూజాతా .

పీతాంబరపరిణీతా త్రాతా పూతాఖిలేభ్య ఇతి గీతా .. 12..

హరిపరిచర్యాప్రీతా భూతత్రాతార్చితేతి కవిగీతా .

తాతోపమితా మాతా త్రాతా శాతాంగినీహ మాం సీతా .. 13..

సేవితదనుజత్రిజటా పాలితనిశ్రీకగర్గరత్రిజటా .

స్వవశీకృనపీతపటా ప్రతిభటహరిణాయ చాస్తు హరివేలా .. 14..

భాషావినుతవిశేషా భాషాపతిశేషవినుతపరిభాషా .

భూషాభిలషితభూషా భూషా భూషాయమానవపుషాస్తు .. 15..

ఘటికాద్రికుశలపేటీ సజ్జనసంత్రాణసక్తపరిపాటీ .

విలసితకాంచనశాటీ పాతు రతిభీష్టిదీనజనకోటీః .. 16..

వైదేహి దేహి విత్తం శ్రీదే పాదే హ లగ్నమథ చిత్తం .

కుర్యామార్యావృత్తం ధార్యం నిత్యం కరోమి తవ వృత్తం .. 17..

కరలలితకమలయుగలా కరికరచామరసుజాతమృద్వనిలా .

త్వరమభయం మే కమలా కురుతాజ్జననీ కరేణ హరిమహిలా .. 18..

నామాచలలక్ష్మి రమే మాయైవాచల ....స్వలోభమయే .

ఆశ్రితరక్షాకామే స్వాత్మజయుగలం చ దేహి హరిమామే .. 19..

ఉపమానాముపమైషా భూషా భూషాసు భాసు మంజూషా .

స్వవశీకృతాదిపురుషా సవిశేషా పాతుమస్తు హరియోషా .. 20..

అబలానాం ప్రబలాసౌ స్త్రీషు శ్రీరుత్తమా చ వామానాం .

రామాభిరామరామా శాంతా కాంతాసు కోపనాస్వేషా .. 21..

సర్వదసర్వద ....శ్రీః శ్రీదా శ్రీదార్చితాబ్జమయపాదా .

కృతజీవేశ్వరభేదా నిర్భేదానందబోధనానందా .. 22..

ఆత్మోపమానరహితా సహితా శ్రీవత్సకౌస్తుభాభరణైః .

హరిమధ్యా హరివత్సా హరిపీఠాలంకృతాస్తు హరివాణీ .. 23..

అస్మాకం యా మాతా సా భవతి పితామహస్య చిత్రం తత్ .

గంగాతనయోపాస్యా గంగాజననీ హి గీతగాంగేయా .. 24..

హరివత్సప్రాసాదా హరివత్సప్రసాదబహులసమ్మోదా !

కరివత్సాంచితగమనా కరివత్సాంచితపదాస్తు మే వరదా .. 25..

శిరసాదృతనారతతా చరణాదృతనారదాదిమునిజనతా .

వచసాదృతశుకకలితా పదపాలిత ....శుకాస్తు మే మాతా .. 26..

గంధర్వపూర్వలలితా గంధర్వైః కిన్నరైశ్చ బహువినుతా .

గంధర్వవక్త్రవినుతా గంధద్వారా చ పాతు మాం మాతా .. 27..

శ్రీశుకనగరవిశేషే నాశితదారిద్ర్యదుఃఖబహుదోషే .

శ్రీశ్రీనివాసభూషే స్వాశాం మే పూరయస్వ హరియోషే .. 28..

దశశతకమలవికాసే దిశి దిశి మాతర్ధనాని దాతాసే .

మమ హృదయగృహనివాసే శిథిలా భూయ .... మద్వాసే .. 29..

విజ్ఞానాఖ్యో మనుతే పూర్వో హరిరేవ చేతి భూదేవీ .

శ్రియమథ విద్వానార్యః సాదరమార్యాం ప్రవతి పూర్వే త్వాం .. 30..

పూర్ణిమయా చామాయాః భాసశ్చిత్రం తిథిద్వయం త్వయి వై .

శిరసః పరతో దర్శః తత్పరతస్తే సుపూర్ణిమేంద్వాస్యే .. 31..

చంద్రాదమృతం పిప్సుః రాహుస్తం చాక్రమచ్చ చాహస్యే .

ముఖదృగ్భూషాచంద్రః బద్ధ్వా తం చాపహంతి గిరిమధ్యే .. 32..

నయనం సుదర్శనం తే శాంఖః కంఠః ఫణీ చ తవ వేణీ .

పరమం పదయుగలం తే యానే చరణే చ పక్షిరాజోఽస్తి .. 33..

నయనం సుభరద్వాజో ధమ్మిల్లో నారదశ్చ తవ మాతః .

శుకవదమోదాశీతే నానారత్నే మరీచిరపి దేవీ .. 34..

అవనే శక్తిశ్చాస్తే వక్షోజో కుంభసంభవో మాతః .

వల్మీకినిభో నాభిః వ్యాసోఽర్భక ఏవ నిత్యమా స్థానే .. 35..

తదిదం చిత్రం మాతః కాంచ్యాంతస్తేత్య హో బిలం చేతి .

నేదం పుత్రకచిత్రం హరిరుభయత్రాపి తత్ర సర్వే స్యాత్ .. 36..

కాంచీకుచకైలాసో మాతః శూన్యం తవాంతరతిహాసః .

కైలాసావపి కాంచీం న విశతి చేత్తం చ తేఽన్తరధికోఽయం .. 37..

హరికరకమలవిలాసే తవ కుచసూర్యో హి దేవి సుచకాసే .

హరినయనపద్మభాసే తవ ముఖచంద్రం ప్రకాశయత్యాసే .. 38..

డోలీకృతవనమాలా మాలీకృతవిధివశాండమణియుగలా .

యుగలీకృతహరిలీలా బాలా సింధోః ప్రభాతు కరకమలా .. 39..

పాదగ్రహణాత్ తాతోఽమోదత చాస్మాకమమ్వ బహుధాప్తః .

గృహ్ణామ్యంఘ్రీ పూర్ణం తూర్ణం మాం మోదయస్వ హరిగృహిణి .. 40..

కృష్ణః కచమారోఽధాన్నయతే మీనౌ తవాద్య భాసేతే .

హరిరంబ మధ్యమస్తే దేవోఽఙ్గీ సంబభూవ చాంగాని .. 41..

తవ చరణమీక్ష్య తారా అవదధురనిశం సరోరుహాకారే .

అవలోకయ నయనమిందుః తరణిం పర్యభవచ్చ కుముదాక్షి .. 42..

నీచైర్వాసవినిదాం మోక్తుం దిఙ్నాగనాగంకావద్య .

నాభేరుచ్చైర్మాతః భాతః కుచయోశ్చ రోమరాజ్యాం తే .. 43..

త్వామాశ్రిత్య విశేషః రోమ్ణా రాజ్యాం విభాతి సవిశేషః .

ఇతి వాసుకిరపి చాన్యో వేణీం శిశ్రాయ నాన్యవర్ధిష్ణుః .. 44..

ఆకాశే కాంచ్యైకా తస్యాం హరిరంబ యోగిసందృశ్యః .

మాతర్ధత్తే స హరిః గిరిమహిమిభమిందుమర్కమభ్రాదీన్ .. 45..

కుచయుగమస్తకమంచే దృష్ట్వా రోషాతురోఽపి హర్యక్షః .

నిజగణనామతిహీనో సన్నిధిమాహాత్మ్యతో హితేఽభూత్ సః .. 46..

ఏకత్ర చ తరణీందూ భూతే నామా తథాపి హరిగృహిణి .

ఏకత్ర రాహుచంద్రావుపరాగో నైవ చానురాగోఽభూత్ .. 47..

కమలే చంద్రోత్పత్తిః చంద్రాదుచ్చైశ్చ భాతి చంద్రోఽన్యః .

చంద్రద్వయభీతః సన్ రాహుర్నీచైః ప్రయాతి పశ్చాన్మే .. 48..

తవ భుజగవిహగరాజౌ శయనే యానే సదా ప్రథాభాజౌ .

భవతాం స తయోర్మాతః శేషో వేషే విశేషభాషాసీత్ .. 49..

ధన్యం కురు మాం మాన్యే ధన్యేవాసే సముద్రహితకన్యే .

మాన్యే లోకవరేణ్యే ధన్యాయ త్వాం ధినాయకాం మన్యే .. 50..

హరినఖభీతౌ కరిణావంతర్ధ్యాయేవ కంచుకే త్రాసి .

జననీవైరిరిరక్షా పత్యా ఘృణయా బభూవ కిం పద్మే .. 51..

శివపదయుగలాచ్ఛ్రేష్ఠం విధిపదదశకం చ మాతరాలేషు .

బహుధనదపురాణ్యన్యే విష్ణోః పదమేకమేవ పతివత్తే .. 52..

ఉపనయనం తవ భక్తిః ఉపదేష్టా తవ పతిశ్చ మే మాతః .

ఉపదిష్టం నామ చ తే భవతి సుభిక్షాం ప్రదేహి వైదేహి .. 53..

తవ భక్త్యా మంతూక్తిః భవతు చ మాతస్త్వయైవ కిల భుక్తిః .

గేహే ముఖ్యా గృహిణీ విఖ్యాతిశ్చాస్య ఏవ గృహముఖ్యః .. 54..

మాతః సాగరకన్యే తవ నను వక్త్రం సుధాంశురితి మన్యే .

సత్యస్త్వేషస్తర్కః నో చేత్ కా స్యాత్ విధావలోకేచ్ఛా .. 55..

తవ సన్నిధిమాహాత్మ్యాద్వేష్యో న త్విష్ట ఏవ తే దేవి .

నయనాబ్జే ముఖచంద్రే సింహాదుచ్చైః ప్రభాత ఇవ మస్తౌ .. 56..

మాతస్తవ మాహాత్మ్యాదుచ్చైర్నీచైశ్చ భాసమానేభౌ .

విక్రాంతౌ తౌ దృష్ట్వా మృగపతిమృగ్యః స ఏవ మూఢోఽభూత్ .. 57..

కాంతస్తే పరమాత్మానంతస్తల్పస్త్రయీమయో యానం .

అమరా నిత్యా భృత్యాః సత్యం పుత్రోఽస్మి యవనికా మాయా .. 58..

జక్షత్ క్రీడన్ శ్రుత్యా రక్షితుమేవాంబ రహసి కాంతేన .

జిత్వా పురుషం స్వవశం కృత్వా నస్తేన పాలయసి చాంబ .. 59..

సపది జటాయోర్మోక్షః త్వత్తః పత్యుః సుకంధరే పక్షః .

సా మాపితరి కటాక్షః త్వత్తో భర్తా బభూవ బహుదక్షః .. 60..

వీరః కిల తవ భర్తా విశ్వస్మిన్ యత్ర యత్ర యాతాసే .

వారః కిల తవ పాతా చింతా నారాయణే హి కిము న స్యాత్ .. 61..

శ్యామా వా హరిణీ త్వం హ్యచలాతనయాపి చంచలాసి త్వం .

జననీ మారస్య స్యాః సుకుమారేభ్యశ్చ నౌమి మాతస్త్వాం .. 62..

కవిజననుతచరణా వా గురుజననుతపాదుకైవ మే మాతః .

పుణ్యజనైర్నృతచరితా పుణ్యజనధ్వంసినీహ భూర్మాతః .. 63..

అలకాలంకృతవదనా హ్యలకేశాలంకృతాబ్జమృదుచరణా

పులకాంకితసంహననా ఫలకాలం నిత్యమేవ కురుతాం మే .. 64..

శతధృతిశతమతివినుతే శతమఖముఖవినుతలలితబహువసతే .

అతులితశతకృతిఫలితే గతిరిహ భవతీతి మే మనో మనుతే .. 65..

శ్రీశైలజఘనభాగా శ్రీరేఫాలంకృతోత్తమాంగా హి .

అస్తాచలమధ్యస్థా చక్షోః సౌదర్శనాస్తు మాం పాతుం .. 66..

హరివత్సేచ్ఛా వా స్యాత్ కరివత్సేచ్ఛేతి దేవి కవిగీతే .

హరివత్సేచ్ఛా వా స్యాత్ మాం కరివరదో యథా తథా పాహి .. 67..

రిపుశరపీడాం భర్తుః వారితుమేవాస ఉరసి తత్పూర్వా .

మమ పుత్రస్య హి మహితే పూర్వస్థా వారయాంబ వర .... .. 68..

ఏకస్యాం వ్యక్తౌ తే బహువచనం నిత్యపుంస్త్వమాసాతే .

స్వాతంత్ర్యం బహుతత్త్వే కిం న స్యాన్నను న యుజ్యతే హరిదారాః .. 69..

కో వా కా వా పురతః న వదతి తవ నామ న స్మరత్యంబ .

సర్వత్ర చ భవదీయం శిరసా నతిరస్తి కుత్ర వా దేవి .. 70..

ఇభ్యం సభ్యం కురు మామద్భిః ప్రక్షాలయామి తవ పాదౌ .

లభ్యం కురు మే సౌఖ్యం విఖ్యాతే దీనపోషణే దేవి .. 71..

పూర్వం విత్తం దత్త్వా పూజాం తేనైవ కారయస్వాంబ .

ధనసుతహితభూలాభం దత్త్వైవాగ్రే విధేహి తవ భక్తం .. 72..

తవ చరితం మమ విహితం సుకృతాల్లబ్ధం హి మాతరాఢ్యాసి .

మూఢం శ్రీదం కురు మాం బాఢం కరవాణి తేఽద్య పరిచర్యాం .. 73..

విధినా మమైవ సిద్ధిః యది తే కృపయా కిమస్తి మే మాతః .

తవ వా తవ పత్యుర్వా స్వాతంత్ర్యేణైకమేకమైశ్వర్యాత్ .. 74..

పృథుకా దత్తకుచేలాః రుచ్యాః కే తే చ పత్యురపి చాస్యాః .

తస్మాదివ మత్తస్త్వం కిం వా నాభ్యవజహశ్చ మాతస్త్వం .. 75..

ఆరాద్ధాసి చ యేన ప్రథమః పైతామహశ్చ మునిరాట్ సః .

తం భారద్వాజం వా బహుమానేనావలోక్య మాం పాహి .. 76..

పాపాదివధ్యవిషయే కరుణా కార్యా ను తేఽతిమృదువచనం .

ఊచిథ మారుతయే త్వం వ్యస్మార్షీః కిం తదుక్తమధికం మే .. 77..

ప్రత్యక్షం కార్యం మే దాతుం శక్నోషి న యది మే మాతః .

మోక్షం వా దాతా చేత్ కరుణాజనితా తవేతి మన్వీయ .. 78..

నార్థీతుమపి శక్నోమి స్మర్తుం స్తోతుం చ నాహాణ్ ఇహ భవతీం .

పూర్ణాం భుక్తిం శక్తిం దత్త్వాసక్తిం చ దేహి పదభక్తిం .. 79..

నిద్రాలుర్జనకో మే గ్రహయాలుర్మయి సదా స్వపతయాలుః .

స్పృహయాలుః శ్రద్ధాలుః మద్రక్షాయై సదాపి భవ మాతః .. 80..

ధ్యాయేమహి మహియాతః యాతః పూర్వం పరం చ జననీం త్వాం .

పూయేమహి వయమధునా గేయేఽమేయే త్వదీయభజనేన .. 81..

దిత్సాదిత్సాకుత్సైః కుత్సితబేరైః కుమారజననీభిః .

ఉత్సవహీనైః కిం వా చోత్సాహయ మేఽద్య కిం చాన్యైః .. 82..

ప్రత్యక్షమాత్రవార్తే చార్వాకే మధ్యగోద్యదాస్తిక్యం .

త్వమపి చ న ప్రత్యక్షః వక్తి హరిస్త్వయి తథా హి సిద్ధాంతే .. 83..

అద్వైతాన్వారంభౌ వవృధాతే తవ కుచౌ చ హే మాతః .

సిద్ధాంతే ద్వైతవిధౌ సూత్రాణ్యవలోక్య తత్ తథాభూతాం .. 84..

కమలం వికాసయేద్యో హ్యర్కం తం తర్కయంతి తర్కజ్ఞాః .

గురుకుచక్రమలేన చ తే హరినేత్రార్కే వికాస ఊహైః కిం .. 85..

పాదస్త్రయీమయస్తే వేదాః కామాశ్రయంతి మే మాతః .

భర్తా త్రివిక్రమస్తే స జటీ వా స్యాద్ధనాశ్చ తే కేశాః .. 86..

కతి కవయః కతి గురవః కతి మందాః కతి బుధాశ్చ రాజానః .

కతి భీమా అదితిసుతాః శిశ్రూయూరంఘ్రి .... గణకైః కా .. 87..

సగుణం నిర్గుణమితి వా తవ వాచా నిశ్చినోమి భో మాతః .

వాగ్భిః కిం పుత్రక మే జనకం కాంతం చ పశ్య సుగుణం మే .. 88..

ఆరోగ్యకారిణి ....స్వోషధినాథాః కటాక్షకామాస్తే .

అమృతాబ్ధేస్త్వాం తనయాం లబ్ధ్వా కిం ....జాతా .. 89..

అనిలజనుతపదకమలాం సలిలధి ...aర్యబలాం .

కరుణాతరంగశాలాం కాంచనమహిలాం కటాక్షసువిశాలాం .. 10..

గజరాజరాజిలలితామజశతసుతహేమపాదుకాంభోజాం .

సజ్జన కృతబహుపూజాం వాజిగ్రీవప్రభాతముఖభాజాం .. 91..

అర్జునసారథిమహిషీ దుర్జన నిర్మూలనేఽస్తు విదితకృషిః .

సజ్జనపాలనవిదుషీ నిర్జరదేవీ చ నిగమమంజూషా .. 92..

ఆకాశరాజతనయే చాకాశాకారమధ్యమప్రలయే .

పాకారీడితనిలయే మాతస్త్వాం నౌమి దేహి సంతతయే .. 93..

అనుభుక్తమాలికాదౌ శ్రీదా మాతావనేఽస్తు మే గోదా .

ధనునగరసుప్రసాదా హేమంతవ్రతతిశేషసమ్మోదా .. 94..

శార్ఙ్గకరకల్పవల్లీం కోమలవల్లీం భజే సుధావల్లీం .

శార్ఙ్గశ్రీభ్రూవల్లీం స్తౌమి చ నిత్యం ప్రమాణపదవల్లీం .. 95..

ఆశ్రితతాపద్రవితాం రాఘవవనితాం నమామి మృదుకలతాం .

ఆశ్రితశీర్షాభరణాం నాయకమణిభామతుల్యదివ్యాంగీం .. 96..

అరణీతటినీతోషా ధరణీదేవీ కుమారికావేషా .

కరిణీ పుష్కరిణీశా జననీ మాం పాతు భూరిహరియోషా .. 97..

మామపి కురు తవ తనయం త్వామథ తత్త్వేన నౌమ్యహం సనయం .

యామి చ కృపయా విజయం భూమిసుతే దేహి భద్రసముదాయం .. 18..

పవనజపూజాలోలామవనిజనత్రాణవిహితహరిలీలాం .

దుర్భూతదమనకాలామమృతాం వల్లీం భజామి మణిమాలాం .. 99..

ప్రణమతి కస్తవ పాదం ధనపతిరపి భవతి దేవి నిష్ఖేదం .

ప్రపఠతి కస్తవ వేదం స భవతి భువి యాతి మాతరామోదం .. 100..

ఆత్రేయగోత్రజనినా కథితం రామానుజార్యవిదుషేదం .

అంగీకుర్వంత్వార్యాః కృపయా శ్రీవేంకటేశదారాశ్చ .. 101..

ఇతి రామానుజార్యకృతం శ్రీ అష్టమహిషీప్రార్థనాశతకం సంపూర్ణం .

స్తోత్రసముచ్చయః 2 (81)

జగదంబా జయవాదః

జయ జగదంబ ! కదంబవిహారిణి ! మంగలకారిణి ! కామకలే !

జయ తనుశోభా-కంపితశంపే ! లసదనుకంపే ! కాంతినిధే !    .

జయ జితకామేఽపి జనితకామే ! ధూర్జటి-వామే ! వామగతే !

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 1..

      నానాలంకృతి-ఝంకృతిశాలిని ! మౌక్తికమాలిని ! కేలిపరే !

      మునిజన-హృదయాగార-నివాసిని ! విద్యాస్వామిని ! బోధఘనే !     .

      సాంద్రానంద-సుధారస-భాసిని ! వీణావాదిని ! వేదనుతే !

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 2..

ఆపత్తూల-మహానిలకీలే ! పాలనశీలే ! భూతిఖనే !

ద్యుతిజిత-చంపకదామకలాపే ! మధురాలాపే ! హంసగతే !

విభ్రమరంజిత-శంకరహృదయే ! కృతజగదుదయే ! శైలసుతే !

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 3..

      మూలే దీపకకలికాకారే ! విద్యాసారే ! భవసి పరా

      తస్మాదపసృతి-కలనావృద్ధే ! మణిపురమధ్యే  పశ్యంతీ  .

      స్వాంతే మధ్యమభావాకూతా, కంఠే వితతా వైఖరికా

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 4..

పశ్చాదావిర్భవదనవద్యే ! శ్రేయఃపద్యే !  యత్తదిదం

శబ్దబ్రహ్మతయా ఖలు గేయం, ఖమివామేయం కిమపి ఘనం   .

పంచాశల్లిపి-భేదవిచిత్రం వాఙ్మయమాత్రం త్వమసి పరే

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 5..

      భవభవవిభవ-పరాభవహేతో ! గిరికులకేతో ! భక్తహితే !

      నానావిధ-వృజినోత్కర-వారిణి ! కరుణాసారిణి ! శాంతతరే !  .

      సహసోత్సాదిత-సాధకవిఘ్నే ! శ్రద్ధానిఘ్నే ! సుఖకలికే !

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 6..

సిందూరద్రవ-చుంబితభాలే ! సేవితహాలే ! ప్రేమభరే !

మాతశ్చింతామణి-భవనాంతే ! నిర్భరకాంతే ! వితతతతం     .

సోత్కం గాయసి కిన్నరదారైః సాకముదారైః పతిచరితం

జయ జాలంధరపీఠ-విలాసిని ! దుఃఖవినాశిని ! భక్తివశే ! .. 7..

      క్లేశం భంజయ, రంజయ చిత్తం, విత్తం స్ఫారీకురు వరదే !

      శత్రుం మర్దయ, వర్ధయ శక్తిం , భక్తిం సాంద్రీకురు వరదే     .

      నాస్తి కృపానిధిరంబ ! త్వత్తో మత్తో మత్తతమో న శివే

      జయ జాలంధరపీఠ-విలాసిని ! దుఃఖవినాశిని ! భక్తివశే ! .. 8..

వజ్రాలంకరణాయాః వజ్రాతటినీ-విహారశీలాయాః  .

వజ్రేశ్యాః స్తవమేతం పఠతాం సంగచ్ఛతాం శ్రేయః .. 9..

ఇతి దుర్గాప్రసాదద్వివేదీవిరచితః జగదంబా జయవాదః సంపూర్ణః .

అభీష్టప్రార్థనాష్టకం

కదా గోష్ఠే గోష్ఠక్షితిపగృహదేవ్యా కిల తయా

     సబాష్పం కుర్వత్యా విలసతి సుతే లాలనవిధిం .

ముహుర్దృష్టం రోహిణ్యపీహితనివేశామవనతం

     నిషేవే తాంబూలైరహమపి విశాఖాప్రియసఖీం .. 1..

కదా గాంధర్వాయాం శుచి విరచయంత్యాం హరికృతే

     ముదా హారాన్వృందైః సహ సవయసామాత్మసదనే .

విచిత్య శ్రీహస్తే మణిమిహ ముహుః సంపుటచయా-

     దహో విన్యస్యంతీ సఫలయతి సేయం భుజలతాం .. 2..

కదా లీలారాజ్యే వ్రజవిపినరూపే విజయినీ

     నిజం భాగ్యం సాక్షాదిహ విదధతీ వల్లభతయా .

సమంతాద్క్రీడంతీ పికమధుపముఖ్యాభిరభితః

     ప్రజాభిః సంజుష్టా ప్రమదయతి సా మాం మదధిపా .. 3..

కదా కృష్ణాతీరే త్రిచతురసఖీభిః సమమహో

     ప్రసూనాం గుంఫంతీం రవిసఖసుతామానతతయా .

సమేత్య ప్రచ్ఛన్నం సపది పరిరిప్సోర్బకరిపో-

     ర్నిషేధే భ్రూభంగం భృశమనుభజేఽహం వ్యజనినీ .. 4..

కదా శుభ్రే తస్మిన్పులినవలయే రాసమహసా

     సువర్ణాగ్గీసంఘేష్టహమహమికామత్తమతిషు .

హరౌ యాతే నీలోత్పలనికసతాం జిత్వరగుణా-

     ద్గుణాదస్మాందివ్యద్రవిణమివ రాధా మదయతి .. 5..

కదా భాండీరస్య ప్రథితరుచిరోత్సంగనిలయే

     వరామధ్యాసీనం కుసుమమయతూలీమతులితం .

ప్రియే చిత్రం పత్రం లిఖతి నిహితస్వంగలతికాం

     విశాఖాప్రాణాలీం భజతి దిశతీ వర్ణకమసౌ .. 6..

కదా తుంగే తుంగే రహసి గిరిశృంగే వ్రతతిజా-

     న్ప్రియే పూర్వా లీలా నిగమయతి సంస్తవ్య నిలయాన్.

మదేనావిష్పష్టం సకలితపదం వ్రీడితతయా

     ద్రుతమౌత్క్యేనైషా విరచయతి పృచ్ఛాం మమ పురః .. 7..

గతిర్యన్మే నిత్యా యదఖిలమపి స్వం సవయసాం

     మదీశ్వర్యాః ప్రేష్ఠప్రణయకృతసౌభాగ్యవరిమా .

హరేర్యత్ప్రేమశ్రీర్నివసతిరముష్యస్తులనయా

     సదా తస్మిన్కుండే లసతు లలితాలీ మమ దృశీ .. 8..

ఇతి శ్రీరఘునాథదాసగోస్వామివిరచితస్తవావల్యాం

          అభీష్టప్రార్థనాష్టకం సంపూర్ణం .

ఛేదిన్యాఃస్తవః

అథ వక్ష్యే మహాదేవ్యాః ఛేదిన్యాః స్తవముత్తమం .

ఛేత్తా త్వం సర్వగ్రంథీనాం మత్ప్రసాదాద్ యతీశ్వరః .. 31-24..

యత్ప్రసాదాదనంతో హి యోగీ సంసారమండలే .. 31-25..

దేశానందా సకలగుణదా ఛేదినీ ఛేదనస్థా

హవ్యస్థా సా విభవనిరతా యా నిధిస్థా నిశాయాం .

సా మే నిత్యం కులకమలగా గోపనీయా విధిజ్ఞా

శ్రీవాగేశీ గగనవసనా సర్వయోగం ప్రపాయాత్ .. 31-26..

కామానందా మదననిరతా భావితా భావసింధౌ

కామానందోద్భవరసవతీ యోగియోగస్థధాత్రీ .

సా మే ధౌతం ప్రకురు వపుషో

ధర్మపుంజం ప్రపాయాత్ .. 31-27..

కాలాకాలం కమలకలికావాసినీ కాలికా మే

గ్రంథిచ్ఛేదం స్థిరగృహగతా గాత్రనాడీపథస్థా .

వక్త్రాంభోజే వచనమధురం ధారయంతీ జనానాం .

సా మే రంధ్రం మమ రుచిరతనోః పాతు పంచాననా యా .. 31-28..

యోగాంగస్థా స్థితిలయవిభవా లోమకూపాంబుజస్థా

మాతా గౌరీ గిరిపతిసుతా భాసురాస్త్రప్రదీప్తా .

సంపాయాన్మే హృదయవివరం ఛేదినీమూలపూరే

కైలాసస్థా మమమనుగిరిం పాతు రుద్రప్రసాదా .. 31-29..

నాదాంతఃస్థా మనగుణధరణాసన్నసిద్ధాంతపారా

భోగానందా భగనగబిలే కాశయంతీ జనానాం .

విద్యావిద్యా వివిధగగనా ఛేదినీ ఛన్నరూపా .

సా సర్వాంతఃకరణనిలయా లాకినీ ప్రేమభావా .. 31-30..

యోగం స్వర్గేఽర్పయసి మనసి ప్రేమభావం పరేశే

యా యా యాత్రా త్రివిధకరణా కారణా సర్వజంతోః .

మాతా జ్ఞాత్రీ గణేశే గృహిగణసదయా సర్వకర్త్రీ మనో మే

రక్షా రక్షాక్షరగతకలా కేవలా నిష్కలా యా .. 31-31..

సా యోగేంద్రా సమవతు ముదా మే గుదం కుండలిన్యాం

జహ్నోః కన్యా కమలనిలయా రాకిణీ ప్రేమభావాన్ .

మోక్షప్రాణాన్ తపనరహితా పాతు మే వేదవక్త్రా

సిద్ధా మూలాంబుజదలగతా పావనీ పాతు తుండం .. 31-32..

హేరంబాజ్ఞా ప్రలయఘటితా కాకినీ క్రోధరూపా .. 31-33..

యది భజతి కులీనః కామినీం క్రోధవిద్యాం

స భవతి పరయోగీ ఛేదినీస్తోత్రపాఠాత్ .

సకలదురితనాశః క్షాలనాదిప్రసిద్ధిః

సకలజనవశః స్యాత్ తస్య నిత్యం సురాజ్యం .. 31-34..

ఏతత్ స్తోత్రం పఠేద్విద్వాన్ మహాసంయమతత్పరః .

మూలే మనః స్థిరో యాతి సర్వానిష్టవినాశనః .. 31-35..

సర్వసిద్ధిః కరే తస్య యో భావం సముపాశ్రయేత్

శృణుష్వ పరమానంద రససాగరసంభవ .. 31-36..

ఇతి శ్రీరుద్రయామలే ఉత్తరతంత్రే మహాతంత్రోద్దీపనే షట్చక్రప్రకాశే

సిద్ధిమంత్రప్రకరణే భైరవభైరవీసంవాదే ఏకత్రింశః పటలే

ఛేదిన్యాః స్తవః సమాప్తః .. 31..

ఛిన్నమస్తాధ్యానం

 1. ప్రత్యాలీఢపదాం సదైవ దధతీం ఛిన్నం శిరః కర్త్రికాం

దిగ్వస్త్రాం స్వకబంధశోణితసుధాధారాం పిబంతీం ముదా .

నాగాబద్ధశిరోమణిం త్రినయనాం హృద్యుత్పలాలంకృతాం

రత్యాసక్తమనోభవోపరి దృఢాం వందే జపాసన్నిభాం .. 1..

 2. దక్షే చాతిసితా విముక్తచికురా కర్త్రీం తథా ఖర్పరం .

హస్తాభ్యాం దధతీ రజోగుణభవా నామ్నాపి సా వర్ణినీ ..

దేవ్యాశ్ఛిన్నకబంధతః పతదసృగ్ధారాం పిబంతీ ముదా .

నాగాబద్ధశిరోమణిర్మనువిదా ధ్యేయా సదా సా సురైః .. 2..

ప్రత్యాలీఢపదా కబంధవిగలద్రక్తం పిబంతీ ముదా .

సైషా యా ప్రలయే సమస్తభువనం భోక్తుం క్షమా తామసీ ..

శక్తిః సాపి పరాత్పరా భగవతీ నామ్నా పరా డాకినీ .

ధ్యేయా ధ్యానపరైః సదా సవినయం భక్తేష్టభూతిప్రదా .. 3..

 2. భాస్వన్మండలమధ్యగాం నిజశిరశ్ఛిన్నం వికీర్ణాలకం .

స్ఫారాస్యం ప్రపిబద్గలాత్స్వరుధిరం వామే కరే బిభ్రతీం ..

యాభాసక్తరతిస్మరోపరిగతాం సఖ్యౌ నిజే డాకినీ-

వర్ణిన్యౌ పరిదృశ్య మోదకలితాం శ్రీఛిన్నమస్తాం భజే .. 4..

 3. స్వనాభౌ నీరజం ధ్యాయామ్యర్ధం వికసితం సితం .

తత్పద్మకోశమధ్యే తు మండలం చండరోచిషః .. 5..

జపాకుసుమసంకాశం రక్తబంధూకసన్నిభం .

రజస్సత్వతమోరేఖా యోనిమండలమండితం .. 6..

తన్మధ్యే తాం మహాదేవీం సూర్యకోటిసమప్రభాం .

ఛిన్నమస్తాం కరే వామే ధారయంతీం స్వమస్తకం .. 7..

ప్రసారితముఖీం దేవీం లేలిహానాగ్రజిహ్వికాం .

పిబంతీం రౌధిరీం ధారాం నిజకంఠవినిర్గతాం .. 8..

వికీర్ణకేశపాశాం చ నానాపుష్పసమన్వితాం .

దక్షిణే చ కరే కర్త్రీం ముండమాలావిభూషితాం .. 9..

దిగంబరాం మహాఘోరాం ప్రత్యాలీఢపదే స్థితాం .

అస్థిమాలాధరాం దేవీం నాగయజ్ఞేపవీతినీం .. 10..

రతికామోపరిష్ఠాం చ సదా ధ్యాతాం చ మంత్రిభిః .

సదా షోడశవర్షీయాం పీనోన్నతపయోధరాం .. 11..

 4. విపరీతరతాసక్తౌ ధ్యాయామి రతిమన్మథౌ .

శాకినీవర్ణినీయుక్తాం వామదక్షిణయోగతః .. 12..

దేవీగలోచ్ఛలద్రక్తధారాపానం ప్రకుర్వతీం .

వర్ణినీం లోహితాం సౌమ్యాం ముక్తకేశీం దిగంబరాం .. 13..

కపాలకర్త్రికాహస్తాం వామదక్షిణయోగతః .

నాగయజ్ఞేపవీతాఢ్యాం జ్వలత్తేజోమయీమివ .. 14..

ప్రత్యాలీఢపదాం విద్యాం నానాలంకారభూషితాం .

సదా ద్వాదశవర్షీయాం అస్థిమాలావిభూషితాం .. 15..

డాకినీం వామపార్శ్వే తు కల్పసూర్యానలోపమాం .

విద్యుజ్జటాం త్రినయనాం దంతపంక్తిబలాకినీం .. 16..

దంష్ట్రాకరాలవదనాం పీనోన్నతపయోధరాం .

మహాదేవీం మహాఘోరాం ముక్తకేశీం దిగంబరాం .. 17..

లేలిహానమహాజిహ్వాం ముండమాలావిభూషితాం .

కపాలకర్త్రికాహస్తాం వామదక్షిణయోగతః .. 18..

దేవీగలోచ్ఛలద్రక్తధారాపానం ప్రకుర్వతీం .

కరస్థితకపాలేన భీషణేనాతిభీషణాం .

ఆభ్యాం నిషేవ్యమాణాం తాం కలయే జగదీశ్వరీం .. 19..

ఇతి ఛిన్నమస్తాధ్యానం ..

ఛిన్నమస్తాద్వాదశనామస్తోత్రం

ఛిన్నగ్రీవా ఛిన్నమస్తా ఛిన్నముండధరాఽక్షతా .

క్షోదక్షేమకరీ స్వక్షా క్షోణీశాచ్ఛాదనక్షమా .. 1..

వైరోచనీ వరారోహా బలిదానప్రహర్షితా .

బలిపూజితపాదాబ్జా వాసుదేవప్రపూజితా .. 2..

ఇతి ద్వాదశనామాని ఛిన్నమస్తాప్రియాణి యః .

స్మరేత్ప్రాతః సముత్థాయ తస్య నశ్యంతి శత్రవః .. 3..

ఇతి ఛిన్నమస్తాద్వాదశనామస్తోత్రం సంపూర్ణం .

ఛాయావింశతిః

గురూణాం విద్యాసౌ స్ఫురితకరుణోదన్వదుదిత-

     ప్రభావేందుజ్యోత్స్నా హృదయకుముదోద్భేదనపటుః .

యయా సూక్తిస్రోతఃస్రవదమృతయా ధ్వస్తతమసా

     ప్రకాశ్యంతే సర్వా అపి సపది శాస్త్రార్థకకుభః .. 1..

అనీశామీశానీం వదతి నిరయాణాం ప్రశమదో

     గురుః కల్యాణీం యామథ చ సకలాం పూర్వపరగాం .

సితా పీతా రాగోజ్జ్వలితతనురుద్ధారసహితా

     విచిత్రా ప్రోక్తా సా మనసి రమతాం మే భగవతీ .. 2..

మనోవాగ్దుఃస్పర్శే మురరిపువిధాత్రోరపి తవ

     స్వరూపే జాత్యంధః కథమివ కరోమి స్తుతిమహం .

దిశో లక్షీకృత్య ప్రహిత ఇవ బాణోఽయమథవా

     మదీయో వాగ్బంధస్త్వయి పతతి సర్వాత్మవపుషి .. 3..

శివం గుర్వాత్మానం గురుమపి శివాత్మానమసకృత్

     ప్రణమ్యాంతర్భక్త్యా స్రజమివ తదాజ్ఞాం చ శిరసా .

దృశావానందాస్రైః కుసుమనికరైరంజలిపుటం

     ప్రపూర్యాంతఃప్రేమ్ణా ప్రణతవరదాం నౌమి భవతీం .. 4..

రసార్ద్రా వా కామం రసవిరహితా వా స్తుతిరసా-

     వసాధ్వీ సాధ్వీ వా న ఖలు గుణదోషౌ భవతు నః .

యథాత్మానం దృష్టిర్ముకురపతితా పశ్యతి తథా

     గిరం త్వాం గీర్భిస్త్వం యన్ముఖగతా స్తౌషి వరదే .. 5.. (మమముఖగతా)

సముద్భూతా చోచ్చైఃస్థితిముపగతాత్ కేశవపదాత్

     స్థితా గౌరీశేన స్వపదపరిపూజాహితముదా .

శుచిశ్రీమత్తీర్థా శివగురుగిరిప్రాప్తమహిమా

     స్వరూపం తే విద్యా మమ భజతు గంగేవ జలధిం .. 6..

అయం తేజోవర్ణః కవిభిరుదితో వాగ్భవ ఇతి

     స్ఫురద్బిందుద్భేదస్త్రిగుణతనురాధారవితతః .

సముద్బుద్ధో యస్య వ్రజతి సహసా బ్రహ్మ సదనం

     స యోగీ చోద్బుద్ధో వ్రజతి సహసా బ్రహ్మసదనం .. 7..

విదుర్బ్రాహ్మీం కేచిత్ కిల విషమభిన్నాం తదితరే

     తథాప్యేకా సా తే తనురితి వయం నిశ్చినుమహే .

ప్రభేదో వాగ్వాణీ వచ ఇతి సమాఖ్యాసు బహుధా

     స్వయంవాచ్యే శబ్దే న భవతి పునః కాచన భిదా .. 8..

ద్వితీయః కామాత్మా స్ఫురతి తవ లీనో హృది సదా

     స బిందుః సన్నాదో భగవతి ముదాం బీజమివ యః .

స్మితే యస్మిన్ క్షుభ్యత్యఖిలమపి చంద్రోదయగళ-

     న్మహాంభోధిప్రఖ్యం భవనమబలాం కిం పునరమూం .. 9..

మనోరమ్యః సౌమ్యః ప్రశమితతమో యేన శిరసి

     స్మృతో బీజాత్మా తే భగవతి ముదాం బీజమివ యః .

వచోవీచీవేగోద్ధతివిధుతవిధ్వస్తగరిమ

     క్షిపేత్ క్షిప్రం వాదిప్లవకులమసావంబుధిరివ .. 10..

స్వమూర్ధ్ని ధ్యాతాయాస్తవ ధవలపీఠాబ్జగదితా

     సుధాంభోవృష్టిర్యా స్ఫుటపుళకసస్యాంకురసుహృత్ .

పునః సూక్తిచ్ఛద్మా శ్రుతిచుళుకపేయా ముఖశశి-

     ప్రణాళీవాంతా సా సరిదివ సరీసర్తి సరసా .. 11..

ప్రమోదేందుక్లిన్నం నయనశశికాంతాత్సముదితం

     యదంభస్త్వద్రూపం స్మృతిమయసుఖాస్వాదసుఖినః .

న తద్ బాష్పం మన్యే సముపనతలక్ష్మీకరపుట-

     త్రిలోకీరాజ్యాప్తే రుచితమభిషేకాంబు గళతి .. 12..

చిదాత్మా తే విద్యుత్కణరుచిరణోరప్యణుతరో

     నిరీక్ష్యో యో బిందుః క్షణమపి దృశా సూక్ష్మతరయా .

సశైలాబ్ధిద్వీపం సకలమపి స బ్రహ్మసదనం

     తదంతఃసంలీనం తత ఉదితమత్యద్భుతమిదం .. 13..

అజప్తా జప్తా వా స్వయమతిమహాంతోఽతిలఘవః

     సకీలా నిష్కీలా గురుభిరుపదిష్టా అపి న వా .

ప్రసన్నాయాం దేవి త్వయి సకలతంత్రాశ్చ ఫలదా-

     స్తరుర్మూలే సిక్తః ఫలతి ఖలు శాఖాశతమయః .. 14..

యశోవశ్యైశ్వర్యద్రవిణకవితాద్యైహికఫలం

     లఘు ప్రాప్తుం యస్త్వాం భజతి పరమానందఫలదాం .

సుమేరుం మాషార్ఘం సురభిమపి తక్రం సురతరుం

     సుజీర్ణం కౌపీనం సుజళమతిరభ్యర్థయతి సః .. 15..

తవ ధ్యాత్వా మూర్తిం జతురసజపాపుష్పసదృశీం

     నరస్తస్యాం యో నిక్షిపతి కుసుమాన్యర్చనవిధౌ .

ధ్రువం తైరేవాశు స్మరవిశిఖభూతైః స్వహృదయే

     విలాసిన్యో విద్ధా విదధతి తదంకే విలుఠనం .. 16..

నృముండైరాబద్ధాం స్రజమురసిజాభోగలుఠితాం

     దధానామారక్తాంశుకకిసలయాం కింశుకనిభాం .

చతుర్బాహు చంద్రావయవసుమనశ్శేఖరజటాం

     ప్రణౌమి త్వాం ప్రేతాసనముపగతాం భైరవవధూం .. 17..

శిరశ్చంద్రచ్ఛాయాప్రసరపునరుక్తస్మితరుచిం

     వపుర్లక్ష్మీలబ్ధాధికసితమహార్ఘాంబరధరాం .

వరోద్యుక్తాం సాక్షస్రజమభయదాం పుస్తకధరాం

     సకృద్ యస్త్వాం భక్త్యా ప్రణమతి నమామ్యంబ తమహం .. 18..

యజంతే యేఽష్టాభిర్దినమను విధానేన సుభగా

     భగాద్యాభిస్తాభిర్భగవతి శివే త్వాం పరివృతాం .

క్షమాభృతిరూపాతిద్యుతిమతిధృతిశ్రీసుభగతా-

     పరీతాః పూజ్యంతే స్వయమను జనైస్తే సుకృతినః .. 19..

యథోక్తం యైరిష్టో విధివిరచితాష్టాష్టకభిదా

     గణో మాతౄణాం తే గహనమహిమా భైరవసఖః .

స్ఫురద్విద్యాదీపద్యుతివితతిసందర్శితపదాః

     ప్రయాంతి త్వత్స్థానం పునరపునరావర్తనమమీ .. 20..

యథైకశ్చైకస్థః స్వయమపిహితాత్మా దినకరో

     విభాతి ఛాయావాన్ బహుషు జలకుంభేషు బహువత్ .

తథైవైకా బహ్వీ స్ఫురతి శబరీశౌరితనయా-

     రమావాణీకాళీరతిధృతిధరణ్యాదితనుభిః .. 21..

నరాత్మా నారీత్వే తరురపి లతాత్వే తవ మృగో

     మృగీత్వే లక్ష్మీత్వే హరిరపి శచీత్వే శతమఖః .

ఉమాత్వే రుద్రాత్మేత్యథ తదనురూపాకృతిరసౌ

     శివః సర్వత్రాపి స్వయమనుచరత్యంబ భవతీం .. 22..

స్త్రియో యాస్త్రైలోక్యే విదధతి చ యా సంసృతిరసం

     వినా యాభిః సృష్టిః క్వచిదపి న కాచిత్ ప్రసరతి .

వినా యాభిర్ముద్యత్యపి జయతి యాభిర్మనసిజః

     సమస్తాభ్యస్తాభ్యో భగవతి తనూభ్యస్తవ నమః .. 23..

శివే విద్యే దేవి త్రిభువనజనన్యంబ శబరి

     క్రియే శ్రద్ధే మేధే సతి గిరిసుతే వాణి పరమే .

మహామాయే నిత్యే మధుమతి మహాభైరవి రమే .

     భవాని శ్రీః శక్తే భగవతి నమస్తేఽహమకృషి .. 24..

శ్రియం పృష్ఠే కృత్వా హృది తవ పదాంభోజయుగళీం

     వయం వాణీపుష్పైః స్రజమరచయామ స్తుతిమయీం .

స్వయం గృహ్ణీష్వైనాం శరణమనుగృహ్ణాతు భవతీ

     త్వదీయా భూయాస్మ త్వయి భవతు భక్తిః స్థిరతరా .. 25..

సదా సూక్తిధ్యానామృతరసనిషేకోత్థపుళక-

     ప్రరోహాః స్వాంతే త్వత్పదకిసలయం దేవి దధతి .

స్ఫురంత్యేవాభీష్టాశ్చులుకపుటికాకోమలపుట-

     స్ఫురత్పూజాపుష్పాన్వయసముదితా భక్తిలలితాః .. 26..

(T

అభిరామిస్తోత్రం

నమస్తే లలితే దేవి శ్రీమత్సింహాసనేశ్వరి .

భక్తానామిష్టదే మాతః అభిరామి నమోఽస్తుతే .. 1..

చంద్రోదయం కృతవతీ తాటంకేన మహేశ్వరి .

ఆయుర్దేహి జగన్మాతః అభిరామి నమోఽస్తుతే .. 2..

సుధాఘటేశశ్రీకాంతే శరణాగతవత్సలే .

ఆరోగ్యం దేహి మే నిత్యమభిరామి నమోఽస్తుతే .. 3..

కల్యాణి మంగలం దేహి జగన్మంగలకారిణి .

ఐశ్వర్యం దేహి మే నిత్యమభిరామి నమోఽస్తుతే .. 4..

చంద్రమండలమధ్యస్థే మహాత్రిపురసుందరి .

శ్రీచక్రరాజనిలయే అభిరామి నమోఽస్తుతే .. 5..

రాజీవలోచనే పూర్ణే పూర్ణచంద్రవిధాయిని .

సౌభాగ్యం దేహి మే నిత్యమభిరామి నమోఽస్తుతే .. 6..

గణేశస్కందజనని వేదరూపే ధనేశ్వరి .

విద్యాం చ దేహి మే కీర్తిమభిరామి నమోఽస్తుతే .. 7..

సువాసినీప్రియే మాతః సౌమాంగల్యవివర్ధినీ .

మాంగల్యం దేహి మే నిత్యమభిరామి నమోఽస్తుతే .. 8..

మార్కండేయ మహాభక్త సుబ్రహ్మణ్య సుపూజితే .

శ్రీరాజరాజేశ్వరీ త్వం హ్యభిరామి నమోఽస్తుతే .. 9..

సాన్నిధ్యం కురు కల్యాణీ మమ పూజాగృహే శుభే .

బింబే దీపే తథా పుష్పే హరిద్రాకుంకుమే మమ .. 10..

అభిరామ్యా ఇదం స్తోత్రం యః పఠేచ్ఛక్తిసన్నిధౌ .

ఆయుర్బలం యశో వర్చో మంగలం చ భవేత్సుఖం .. 11..

ఇతి అభిరామిస్తోత్రం సంపూర్ణం .

అపీతకుచాంబాస్తవః

ఆనందసింధులహరీమమృతాంశుమౌలే-

        రాసేవినామమృత-నిర్మిత-వర్తిమక్ష్ణోః .

        ఆనందవల్లివితతేరమృతార్ద్రగుచ్ఛం

        అంబ స్మరామ్యహమపీతకుచే వపుస్తే .. 1..

        నిర్నిద్ర-కోకనద-కోమలకాంతమంబ-

        నిత్యం సుధానికరవర్షి పదం త్వదీయం .

        మూర్ఛాకరజ్వరరుజా మమ తాపితస్య

        మూర్ధ్ని క్షణం సకృదపీతకుచే నిధేహి .. 2..

        శీతాంశుకోటి సుషమాశిశిరైః కటాక్షైః

        అవ్యాజభూతకరుణారసపూరపూర్ణైః .

        కర్పూరధూలిమివ దిక్షు సమాకిరద్భిః

        అంబ క్షణం స్నపయ మామరుణాద్రిమాన్యే .. 3..

        ఆవిర్భవ క్షణమపీతకుచే పురస్తాత్

        అంబ జ్వరేణ మహతా మమ తాపితస్య .

        యేన త్వదంఘ్రిరుచిజాల-సుధాప్రవాహే

        మగ్నస్తదైవ తనుతాపమముం త్యజేయం .. 4..

        నానావిధైర్నలిన-జాతలిపిప్రకౢప్తైః

        ఆనీతమూర్ఛమధికం క్షుభితైర్జ్వరాద్యైః .

        ఆశ్వాసయ క్షణమపీతకుచే కరాగ్ర-

        క్రీడాకనత్కనకహల్లకసౌరభేణ .. 5..

        కంఠే విషం విషముచో భుజగాః కపర్దే

        పార్శ్వే చ భూతపతయః ప్రమథాశ్చ భీమాః .

        శోణాచలేశముపసృత్య భజేత కో వా

        న స్యాత్తవాంబ సవిధే యది సన్నిధానం .. 6 ..

        శక్తిర్జగజ్జననపాలన-భంజనేషు

        భోగేషు దివ్యమహిషీ తరుణేందుమౌలేః .

        సిద్ధిః కరప్రణయినీ తవ సన్నిధానం

        యన్నాసి తస్య తదపీతకుచే న జానే .. 7..

        త్వం సాక్షిణీ ప్రలయభైరవతాండవానాం

        త్వం శేషిణీ సహరిధాతృ చరాచరాణాం .

        త్వం మోచినీ సకలసంసృతిజాలకానాం

        త్వాం బ్రహ్మసంవిదమపీతకుచే నమామి .. 8..

        .. శ్రీ అప్పయ్యదీక్షితేంద్రైః కృతః

                      అపీతకుచాంబాస్తవః సంపూర్ణః ..

అపరాధక్షమాపణస్తోత్రం

ఓం అపరాధశతం కృత్వా జగదంబేతి చోచ్చరేత్ .

యాం గతిం సమవాప్నోతి న తాం బ్రహ్మాదయః సురాః  .. 1..

సాపరాధోఽస్మి శరణం ప్రాప్తస్త్వాం జగదంబికే .

ఇదానీమనుకంప్యోఽహం యథేచ్ఛసి తథా కురు  .. 2..

అజ్ఞానాద్విస్మృతేర్భ్రాంత్యా యన్న్యూనమధికం కృతం .

తత్సర్వం క్షమ్యతాం దేవి ప్రసీద పరమేశ్వరి  .. 3..

కామేశ్వరి జగన్మాతః సచ్చిదానందవిగ్రహే .

గృహాణార్చామిమాం ప్రీత్యా ప్రసీద పరమేశ్వరి  .. 4..

సర్వరూపమయీ దేవీ సర్వం దేవీమయం జగత్ .

అతోఽహం విశ్వరూపాం త్వాం నమామి పరమేశ్వరీం  .. 5..

యదక్షరం పరిభ్రష్టం మాత్రాహీనంచ యద్భవేత్ .

పూర్ణం భవతు తత్ సర్వం త్వత్ప్రసాదాన్మహేశ్వరి  .. 6..

యదత్ర పాఠే జగదంబికే మయా

     విసర్గబింద్వక్షరహీనమీరితం .

తదస్తు సంపూర్ణతమం ప్రసాదతః

     సంకల్పసిద్ధిశ్వ సదైవ జాయతాం  .. 7..

యన్మాత్రాబిందుబిందుద్వితయపదపదద్వంద్వవర్ణాదిహీనం

భక్త్యాభక్త్యానుపూర్వం  ప్రసభకృతివశాత్ వ్యక్త్తమవ్యక్త్తమంబ .

మోహాదజ్ఞానతో వా పఠితమపఠితం సాంప్రతం  తే స్తవేఽస్మిన్

తత్ సర్వం సాంగమాస్తాం భగవతి వరదే త్వత్ప్రసాదాత్ ప్రసీద  .. 8..

ప్రసీద భగవత్యంబ ప్రసీద భక్తవత్సలే .

ప్రసాదం కురు మే దేవి దుర్గే దేవి నమోఽస్తు తే  .. 9..

   .. ఇతి అపరాధక్షమాపణస్తోత్రం సమాప్తం..

అపరాజితాస్తోత్రం

శ్రీత్రైలోక్యవిజయా అపరాజితాస్తోత్రం .

ఓం నమోఽపరాజితాయై .

ఓం అస్యా వైష్ణవ్యాః పరాయా అజితాయా మహావిద్యాయాః

వామదేవ-బృహస్పతి-మార్కండేయా ఋషయః .

గాయత్ర్యుష్ణిగనుష్టుబ్బృహతీ ఛందాంసి .

లక్ష్మీనృసింహో దేవతా .

ఓం క్లీం శ్రీం హ్రీం బీజం .

హుం శక్తిః .

సకలకామనాసిద్ధ్యర్థం అపరాజితవిద్యామంత్రపాఠే వినియోగః .

ఓం నీలోత్పలదలశ్యామాం భుజంగాభరణాన్వితాం .

శుద్ధస్ఫటికసంకాశాం చంద్రకోటినిభాననాం .. 1..

శంఖచక్రధరాం దేవీ వైష్ణ్వీమపరాజితాం

బాలేందుశేఖరాం దేవీం వరదాభయదాయినీం .. 2..

నమస్కృత్య పపాఠైనాం మార్కండేయో మహాతపాః .. 3..

మార్కండేయ ఉవాచ -

శృణుష్వం మునయః సర్వే సర్వకామార్థసిద్ధిదాం .

అసిద్ధసాధనీం దేవీం వైష్ణవీమపరాజితాం .. 4..

ఓం నమో నారాయణాయ, నమో భగవతే వాసుదేవాయ,

నమోఽస్త్వనంతాయ సహస్రశీర్షాయణే, క్షీరోదార్ణవశాయినే,

శేషభోగపర్య్యంకాయ, గరుడవాహనాయ, అమోఘాయ

అజాయ అజితాయ పీతవాససే,

ఓం వాసుదేవ సంకర్షణ ప్రద్యుమ్న, అనిరుద్ధ,

హయగ్రీవ, మత్స్య కూర్మ్మ, వారాహ నృసింహ, అచ్యుత,

వామన, త్రివిక్రమ, శ్రీధర రామ రామ రామ .

వరద, వరద, వరదో భవ, నమోఽస్తు తే, నమోఽస్తుతే, స్వాహా,

ఓం అసుర-దైత్య-యక్ష-రాక్షస-భూత-ప్రేత-పిశాచ-కూష్మాండ-

సిద్ధ-యోగినీ-డాకినీ-శాకినీ-స్కందగ్రహాన్

ఉపగ్రహాన్నక్షత్రగ్రహాంశ్చాన్యా హన హన పచ పచ

మథ మథ విధ్వంసయ విధ్వంసయ విద్రావయ విద్రావయ

చూర్ణయ చూర్ణయ శంఖేన చక్రేణ వజ్రేణ శూలేన

గదయా ముసలేన హలేన భస్మీకురు కురు స్వాహా .

ఓం సహస్రబాహో సహస్రప్రహరణాయుధ,

జయ జయ, విజయ విజయ, అజిత, అమిత,

అపరాజిత, అప్రతిహత, సహస్రనేత్ర,

జ్వల జ్వల, ప్రజ్వల ప్రజ్వల,

విశ్వరూప బహురూప, మధుసూదన, మహావరాహ,

మహాపురుష, వైకుంఠ, నారాయణ,

పద్మనాభ, గోవింద, దామోదర, హృషీకేశ,

కేశవ, సర్వాసురోత్సాదన, సర్వభూతవశంకర,

సర్వదుఃస్వప్నప్రభేదన, సర్వయంత్రప్రభంజన,

సర్వనాగవిమర్దన, సర్వదేవమహేశ్వర,

సర్వబంధవిమోక్షణ,సర్వాహితప్రమర్దన,

సర్వజ్వరప్రణాశన, సర్వగ్రహనివారణ,

సర్వపాపప్రశమన, జనార్దన, నమోఽస్తుతే స్వాహా .

విష్ణోరియమనుప్రోక్తా సర్వకామఫలప్రదా .

సర్వసౌభాగ్యజననీ సర్వభీతివినాశినీ .. 5..

సర్వైంశ్చ పఠితాం సిద్ధైర్విష్ణోః పరమవల్లభా .

నానయా సదృశం కించిద్దుష్టానాం నాశనం పరం .. 6..

విద్యా రహస్యా కథితా వైష్ణవ్యేషాపరాజితా .

పఠనీయా ప్రశస్తా వా సాక్షాత్సత్త్వగుణాశ్రయా .. 7..

ఓం శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్సర్వవిఘ్నోపశాంతయే .. 8..

అథాతః సంప్రవక్ష్యామి హ్యభయామపరాజితాం .

యా శక్తిర్మామకీ వత్స రజోగుణమయీ మతా .. 9..

సర్వసత్త్వమయీ సాక్షాత్సర్వమంత్రమయీ చ యా .

యా స్మృతా పూజితా జప్తా న్యస్తా కర్మణి యోజితా .

సర్వకామదుఘా వత్స శృణుష్వైతాం బ్రవీమి తే .. 10..

య ఇమామపరాజితాం పరమవైష్ణవీమప్రతిహతాం

పఠతి సిద్ధాం స్మరతి సిద్ధాం మహావిద్యాం

జపతి పఠతి శృణోతి స్మరతి ధారయతి కీర్తయతి వా

న తస్యాగ్నివాయువజ్రోపలాశనివర్షభయం,

న సముద్రభయం, న గ్రహభయం, న చౌరభయం,

న శత్రుభయం, న శాపభయం వా భవేత్ .

క్వచిద్రాత్ర్యంధకారస్త్రీరాజకులవిద్వేషి-విషగరగరదవశీకరణ-

విద్వేషోచ్చాటనవధబంధనభయం వా న భవేత్ .

ఏతైర్మంత్రైరుదాహృతైః సిద్ధైః సంసిద్ధపూజితైః .

ఓం నమోఽస్తుతే .

అభయే, అనఘే, అజితే, అమితే, అమృతే, అపరే,

అపరాజితే, పఠతి, సిద్ధే జయతి సిద్ధే,

స్మరతి సిద్ధే, ఏకోనాశీతితమే, ఏకాకిని, నిశ్చేతసి,

సుద్రుమే, సుగంధే, ఏకాన్నశే, ఉమే ధ్రువే, అరుంధతి,

గాయత్రి, సావిత్రి, జాతవేదసి, మానస్తోకే, సరస్వతి,

ధరణి, ధారణి, సౌదామని, అదితి, దితి, వినతే,

గౌరి, గాంధారి, మాతంగీ కృష్ణే, యశోదే, సత్యవాదిని,

బ్రహ్మవాదిని, కాలి, కపాలిని, కరాలనేత్రే, భద్రే, నిద్రే,

సత్యోపయాచనకరి, స్థలగతం జలగతం అంతరిక్షగతం

వా మాం రక్ష సర్వోపద్రవేభ్యః స్వాహా .

యస్యాః ప్రణశ్యతే పుష్పం గర్భో వా పతతే యది .

మ్రియతే బాలకో యస్యాః కాకవంధ్యా చ యా భవేత్ .. 11..

ధారయేద్యా ఇమాం విద్యామేతైర్దోషైర్న లిప్యతే .

గర్భిణీ జీవవత్సా స్యాత్పుత్రిణీ స్యాన్న సంశయః .. 12..

భూర్జపత్రే త్విమాం విద్యాం లిఖిత్వా గంధచందనైః .

ఏతైర్దోషైర్న లిప్యేత సుభగా పుత్రిణీ భవేత్ .. 13..

రణే రాజకులే ద్యూతే నిత్యం తస్య జయో భవేత్ .

శస్త్రం వారయతే హ్యేషా సమరే కాండదారుణే .. 14..

గుల్మశూలాక్షిరోగాణాం క్షిప్రం నాశ్యతి చ వ్యథాం ..

శిరోరోగజ్వరాణాం న నాశినీ సర్వదేహినాం .. 15..

ఇత్యేషా కథితా విద్యా అభయాఖ్యాఽపరాజితా .

ఏతస్యాః స్మృతిమాత్రేణ భయం క్వాపి న జాయతే .. 16..

నోపసర్గా న రోగాశ్చ న యోధా నాపి తస్కరాః .

న రాజానో న సర్పాశ్చ న ద్వేష్టారో న శత్రవః ..17..

యక్షరాక్షసవేతాలా న శాకిన్యో న చ గ్రహాః .

అగ్నేర్భయం న వాతాచ్చ న స్ముద్రాన్న వై విషాత్ .. 18..

కార్మణం వా శత్రుకృతం వశీకరణమేవ చ .

ఉచ్చాటనం స్తంభనం చ విద్వేషణమథాపి వా .. 19..

న కించిత్ప్రభవేత్తత్ర యత్రైషా వర్తతేఽభయా .

పఠేద్ వా యది వా చిత్రే పుస్తకే వా ముఖేఽథవా .. 20..

హృది వా ద్వారదేశే వా వర్తతే హ్యభయః పుమాన్ .

హృదయే విన్యసేదేతాం ధ్యాయేద్దేవీం చతుర్భుజాం .. 21..

రక్తమాల్యాంబరధరాం పద్మరాగసమప్రభాం .

పాశాంకుశాభయవరైరలంకృతసువిగ్రహాం .. 22..

సాధకేభ్యః ప్రయచ్ఛంతీం మంత్రవర్ణామృతాన్యపి .

నాతః పరతరం కించిద్వశీకరణమనుత్తమం .. 23..

రక్షణం పావనం చాపి నాత్ర కార్యా విచారణా .

ప్రాతః కుమారికాః పూజ్యాః ఖాద్యైరాభరణైరపి .

తదిదం వాచనీయం స్యాత్తత్ప్రీత్యా ప్రీయతే తు మాం .. 24..

ఓం అథాతః సంప్రవక్ష్యామి విద్యామపి మహాబలాం .

సర్వదుష్టప్రశమనీం సర్వశత్రుక్షయంకరీం .. 25..

దారిద్ర్యదుఃఖశమనీం దౌర్భాగ్యవ్యాధినాశినీం .

భూతప్రేతపిశాచానాం యక్షగంధర్వరక్షసాం .. 26..

డాకినీ శాకినీ-స్కంద-కూష్మాండానాం చ నాశినీం .

మహారౌద్రిం మహాశక్తిం సద్యః ప్రత్యయకారిణీం .. 27..

గోపనీయం ప్రయత్నేన సర్వస్వం పార్వతీపతేః .

తామహం తే ప్రవక్ష్యామి సావధానమనాః శృణు .. 28..

ఏకాన్హికం ద్వ్యన్హికం చ చాతుర్థికార్ద్ధమాసికం .

ద్వైమాసికం త్రైమాసికం తథా చాతుర్మాసికం .. 29..

పాంచమాసికం షాఙ్మాసికం వాతిక పైత్తికజ్వరం .

శ్లైష్పికం సాత్రిపాతికం తథైవ సతతజ్వరం .. 30..

మౌహూర్తికం పైత్తికం శీతజ్వరం విషమజ్వరం .

ద్వ్యహిన్కం త్ర్యహ్నికం చైవ జ్వరమేకాహ్నికం తథా .

క్షిప్రం నాశయేతే నిత్యం స్మరణాదపరాజితా .. 31..

ఓం హౄం హన హన, కాలి శర శర, గౌరి ధం,

ధం, విద్యే ఆలే తాలే మాలే గంధే బంధే పచ పచ

విద్యే నాశయ నాశయ పాపం హర హర సంహారయ వా

దుఃఖస్వప్నవినాశిని కమలస్థితే వినాయకమాతః

రజని సంధ్యే, దుందుభినాదే, మానసవేగే, శంఖిని,

చక్రిణి గదిని వజ్రిణి శూలిని అపమృత్యువినాశిని

విశ్వేశ్వరి ద్రవిడి ద్రావిడి ద్రవిణి ద్రావిణి

కేశవదయితే పశుపతిసహితే దుందుభిదమని దుర్మ్మదదమని .

శబరి కిరాతి మాతంగి ఓం ద్రం ద్రం జ్రం జ్రం క్రం

క్రం తురు తురు ఓం ద్రం కురు కురు .

యే మాం ద్విషంతి ప్రత్యక్షం పరోక్షం వా తాన్ సర్వాన్

దమ దమ మర్దయ మర్దయ తాపయ తాపయ గోపయ గోపయ

పాతయ పాతయ శోషయ శోషయ ఉత్సాదయ ఉత్సాదయ

బ్రహ్మాణి వైష్ణవి మాహేశ్వరి కౌమారి వారాహి నారసింహి

ఐంద్రి చాముండే మహాలక్ష్మి వైనాయికి ఔపేంద్రి

ఆగ్నేయి చండి నైరృతి వాయవ్యే సౌమ్యే ఐశాని

ఊర్ధ్వమధోరక్ష ప్రచండవిద్యే ఇంద్రోపేంద్రభగిని .

ఓం నమో దేవి జయే విజయే శాంతి స్వస్తి-తుష్టి పుష్టి- వివర్ద్ధిని .

కామాంకుశే కామదుఘే సర్వకామవరప్రదే .

సర్వభూతేషు మాం ప్రియం కురు కురు స్వాహా .

ఆకర్షణి ఆవేశని-, జ్వాలామాలిని-, రమణి రామణి,

ధరణి ధారిణి, తపని తాపిని, మదని మాదిని, శోషణి సమ్మోహిని .

నీలపతాకే మహానీలే మహాగౌరి మహాశ్రియే .

మహాచాంద్రి మహాసౌరి మహామాయూరి ఆదిత్యరశ్మి జాహ్నవి .

యమఘంటే కిణి కిణి చింతామణి .

సుగంధే సురభే సురాసురోత్పన్నే సర్వకామదుఘే .

యద్యథా మనీషితం కార్యం తన్మమ సిద్ధ్యతు స్వాహా .

ఓం స్వాహా .

ఓం భూః స్వాహా .

ఓం భువః స్వాహా .

ఓం స్వః స్వహా .

ఓం మహః స్వహా .

ఓం జనః స్వహా .

ఓం తపః స్వాహా .

ఓం సత్యం స్వాహా .

ఓం భూర్భువః స్వః స్వాహా .

యత ఏవాగతం పాపం తత్రైవ ప్రతిగచ్ఛతు స్వాహేత్యోం .

అమోఘైషా మహావిద్యా వైష్ణవీ చాపరాజితా .. 32..

స్వయం విష్ణుప్రణీతా చ సిద్ధేయం పాఠతః సదా .

ఏషా మహాబలా నామ కథితా తేఽపరాజితా .. 33..

నానయా సదృశీ రక్షా త్రిషు లోకేషు విద్యతే .

తమోగుణమయీ సాక్షద్రౌద్రీ శక్తిరియం మతా .. 34..

కృతాంతోఽపి యతో భీతః పాదమూలే వ్యవస్థితః .

మూలాధారే న్యసేదేతాం రాత్రావేనం చ సంస్మరేత్ .. 35..

నీలజీమూతసంకాశాం తడిత్కపిలకేశికాం .

ఉద్యదాదిత్యసంకాశాం నేత్రత్రయవిరాజితాం .. 36..

శక్తిం త్రిశూలం శంఖం చ పానపాత్రం చ విభ్రతీం .

వ్యాఘ్రచర్మపరీధానాం కింకిణీజాలమండితాం .. 37..

ధావంతీం గగనస్యాంతః పాదుకాహితపాదకాం .

దంష్ట్రాకరాలవదనాం వ్యాలకుండలభూషితాం .. 38..

వ్యాత్తవక్త్రాం లలజ్జిహ్వాం భృకుటీకుటిలాలకాం .

స్వభక్తద్వేషిణాం రక్తం పిబంతీం పానపాత్రతః .. 39..

సప్తధాతూన్ శోషయంతీం క్రూరదృష్ట్యా విలోకనాత్ .

త్రిశూలేన చ తజ్జిహ్వాం కీలయంతీం ముహుర్ముహుః .. 40..

పాశేన బద్ధ్వా తం సాధమానవంతీం తదంతికే .

అర్ద్ధరాత్రస్య సమయే దేవీం ధాయేన్మహాబలాం .. 41..

యస్య యస్య వదేన్నామ జపేన్మంత్రం నిశాంతకే .

తస్య తస్య తథావస్థాం కురుతే సాపి యోగినీ .. 42..

ఓం బలే మహాబలే అసిద్ధసాధనీ స్వాహేతి .

అమోఘాం పఠతి సిద్ధాం శ్రీవైష్ణవీం .. 43..

శ్రీమదపరాజితావిద్యాం ధ్యాయేత్ .

దుఃస్వప్నే దురారిష్టే చ దుర్నిమిత్తే తథైవ చ .

వ్యవహారే భేవేత్సిద్ధిః పఠేద్విఘ్నోపశాంతయే .. 44..

యదత్ర పాఠే జగదంబికే మయా

విసర్గబింద్వఽక్షరహీనమీడితం .

తదస్తు సంపూర్ణతమం ప్రయాంతు మే

సంకల్పసిద్ధిస్తు సదైవ జాయతాం .. 45..

తవ తత్త్వం న జానామి కీదృశాసి మహేశ్వరి .

యాదృశాసి మహాదేవీ తాదృశాయై నమో నమః .. 46..

ఇస స్తోత్ర కా విధివత పాఠ కరనే సే సబ ప్రకార కే రోగ తథా

సబ ప్రకార కే శత్రు ఔర సబ బంధ్యా దోష నష్ట హోతా హై .

విశేష రూప సే ముకదమేం మేం సఫలతా ఔర రాజకీయ కార్యోం మేం

అపరాజిత రహనే కే లియే యహ పాఠ రామబాణ హై .