Sacred Stotras & Deities

తులస్యుపనిషత్

అధ తులస్యుపనిషదం వ్యాఖ్యాస్యామః . నారద ఋషిః .

అథర్వాంగిరాశ్ఛందః . అమృతా తులసీ దేవతా .

సుధాబీజం . వసుధా శక్తిః . నారాయణః కీలకం .

శ్యామాం శ్యామవపుర్ధరాం ఋక్స్వరూపాం యజుర్మనసం బ్రహ్మాథర్వప్రాణాం

కల్పహస్తాం పురాణపఠితాం అమృతోద్భవాం అమృతరసమంజరీం అనంతాం

అనంతరసభోగదాం వైష్ణవీం విష్ణువల్లభాం మృత్యుజన్మనిబర్హిణీం

దర్శనాత్పాపనాశినీం స్పర్శనాత్పావనీం అభివందనాద్ రోగనాశినీం సేవనాత్

మృత్యునాశినీం వైకుంఠార్చనాత్ విపద్ధంత్రీం, భక్షణాత్ వయునప్రదాం ,

ప్రాదక్షిణ్యాత్ దారిద్ర్యనాశినీం, మూలమృల్లేపనాత్ మహాపాపభంజినీం

ఘ్రాణతర్పణాత్ అంతర్మలనాశినీం య ఏవం వేద స వైష్ణవో భవతి .

వృథా న ఛింద్యాత్ . దృష్ట్వా ప్రదక్షిణం కుర్యాత్ .

ద్వాదశ్యాం న స్పృశేత్ . పర్వణి న విచిన్వేత్ .

యది విచన్వతి స విష్ణుహా భవతి . శ్రీ తులస్యై స్వాహా .

విష్ణుప్రియాయై స్వాహా . అమృతాయై స్వాహా .

శ్రీ తులస్యై విద్మహే విష్ణుప్రియాయై ధీమహి . తన్నో అమృతా ప్రచోదయాత్ .

అమృతేఽమృతరూపాఽసి అమృతత్వప్రదాయిని .

త్వం మాముద్ధర సంసారాత్ క్షీరసాగర కన్యకే .. 1

శ్రీసఖి త్వం సదానందే ముకుందస్య సదా ప్రియే .

వరదాభయహస్తాభ్యాం మాం విలోకయ దుర్లభే .. 2

అవృక్షవృక్షరూపాఽసి వృక్షత్చం మే వినాశయ .

తులస్యతులరూపాఽసి తులాకోటినిభేఽజరే .. 3

అతులే త్వత్తులాయాం హి హరిరేకోఽస్తి నాన్యథా .

త్వమేవ జగతాం ధాత్రీ త్వమేవ విష్ణువల్లభా .. 4

త్వమేవ సురసంసేవ్యా త్వమేవ మోక్షదాయినీ .

త్వచ్ఛాయాయాం వసేల్లక్ష్మీః త్చన్మూలే విష్ణురవ్యయః .

సమంతాద్ దేవతాః సర్వాః సిద్ధచారణపన్నగాః .. 5

యన్మూలే సర్వతీర్థాని యన్మధ్యే బ్రహ్మ దేవతాః .

యదయ్రే వేదశాస్రాణి తులసీం తాం నమామ్యహం .. 6

తులసి శ్రీసఖి శుభే పాపహారిణి పుణ్యదే .

నమస్తే నారదనుతే నారాయణమనః ప్రియే .. 7

బ్రహ్మానందాశ్రుసంజాతే వృందావననివాసిని .

సర్వావయసంపూర్ణే అమృతోపనిషద్రసే .. 8

త్వం మాముద్ధర కల్యాణి మహాపాపాబ్ధిదుస్తరాత్ .

సర్వేషామపి పాపానాం ప్రాయశ్చిత్తం త్వమేవ హి ..

దేవానాం చ ఋషీణాం చ పితౄణాం త్వం సదా ప్రియా .. 9

వినా శ్రీతులసీం విప్రా యేఽపి శ్రాద్ధం ప్రకుర్వతే .

వృథా భవతి తచ్ఛ్రాద్ధం పితౄణాం నోపగచ్ఛతి .. 10

తులసీపత్రముత్సృజ్య యది పూజాం కరోతి వై .

ఆసురీ సా భవేత్పూజా విష్ణుప్రీతికరీ న చ .. 11

యజ్ఞం దానం జపం తీర్థం శ్రాద్ధం వై దేవతార్చనం .

తర్పణం మార్జనం చాన్యన్న కుర్యాత్ తులసీం వినా .. 12

తులసీదారుమణిభిర్జపః సర్వార్థసాధకః .

ఏవం న వేద యః కశ్చిత్ స విప్రః శ్వపచాధమః .. 13

ఇత్యాహ భగవాన్ బ్రహ్మాణం నారాయణః ,బ్రహ్మా నారదసనకాదిభ్యః,

సనకాదయో వేదవ్యాసాయ, వేదవ్యాసః శుకాయ, శుకో వామదేవాయ, వామదేవో

మునిభ్యః , మునయో మనుభ్యః ప్రోచుః .

య ఏవం వేద, స స్రీహత్యాయాః ప్రముచ్యతే, స వీరహత్యాయాః ప్రముచ్యతే,

స బ్రహ్మహత్యాయాః ప్రముచ్యతే, స మహాభయాత్

ప్రముచ్యతే, స మహాదుఃఖాత్ప్రముచ్యతే, దేహాంతే వైకుంఠమవాప్నోతి

వైకుంఠమవాప్నోతి . ఇత్యుపనిషత్ .

(వైష్ణవ-ఉపనిషదః)

ఇతి తులస్యుపనిషత్ సమాప్తా .

తులస్యష్టోత్తరశతనామస్తోత్రం

ఓం తులసీ పావనీ పూజ్యా వృందావననివాసినీ .

జ్ఞానదాత్రీ జ్ఞానమయీ నిర్మలా సర్వపూజితా .. 1..

సతీ పతివ్రతా వృందా క్షీరాబ్ధిమథనోద్భవా .

కృష్ణవర్ణా రోగహంత్రీ త్రివర్ణా సర్వకామదా .. 2..

లక్ష్మీసఖీ నిత్యశుద్ధా సుదతీ భూమిపావనీ .

హరిద్రాన్నైకనిరతా హరిపాదకృతాలయా .. 3..

పవిత్రరూపిణీ ధన్యా సుగంధిన్యమృతోద్భవా .

సురూపాఽఽరోగ్యదా తుష్టా శక్తిత్రితయరూపిణీ .. 4..

దేవీ దేవర్షిసంస్తుత్యా కాంతా విష్ణుమనఃప్రియా.

భూతవేతాలభీతిఘ్నీ మహాపాతకనాశినీ .. 5..

మనోరథప్రదా మేధా కాంతిర్విజయదాయినీ .

శంఖచక్రగదాపద్మధారిణీ కామరూపిణీ .. 6..

అపవర్గప్రదా శ్యామా కృశమధ్యా సుకేశినీ .

వైకుంఠవాసినీ నందా బింబోష్ఠీ కోకిలస్వరా .. 7..

కపిలా నిమ్నగాజన్మభూమిరాయుష్యదాయినీ .

వనరూపా దుఃఖనాశిన్యవికారా చతుర్భుజా .. 8..

గరుత్మద్వాహనా శాంతా దాంతా విఘ్ననివారిణీ .

శ్రీవిష్ణుమూలికా పుష్టిస్త్రివర్గఫలదాయినీ .. 9..

మహాశక్తిర్మహామాయా లక్ష్మీవాణీసుపూజితా .

సుమంగల్యర్చనప్రీతా సౌమంగల్యవివర్ధినీ .. 10..

చాతుర్మాస్యోత్సవారాధ్యా విష్ణు సాన్నిధ్యదాయినీ .

ఉత్థానద్వాదశీపూజ్యా సర్వదేవప్రపూజితా .. 11..

గోపీరతిప్రదా నిత్యా నిర్గుణా పార్వతీప్రియా .

అపమృత్యుహరా రాధాప్రియా మృగవిలోచనా .. 12..

అమ్లానా హంసగమనా కమలాసనవందితా .

భూలోకవాసినీ శుద్ధా రామకృష్ణాదిపూజితా .. 13..

సీతాపూజ్యా రామమనఃప్రియా నందనసంస్థితా .

సర్వతీర్థమయీ ముక్తా లోకసృష్టివిధాయినీ .. 14..

ప్రాతర్దృశ్యా గ్లానిహంత్రీ వైష్ణవీ సర్వసిద్ధిదా .

నారాయణీ సంతతిదా మూలమృద్ధారిపావనీ .. 15..

అశోకవనికాసంస్థా సీతాధ్యాతా నిరాశ్రయా .

గోమతీసరయూతీరరోపితా కుటిలాలకా .. 16..

అపాత్రభక్ష్యపాపఘ్నీ దానతోయవిశుద్ధిదా

శ్రుతిధారణసుప్రీతా శుభా సర్వేష్టదాయినీ .. 17..

నామ్నాం శతం సాష్టకం తత్తులస్యాః సర్వమంగలం .

సౌమంగల్యప్రదం ప్రాతః పఠేద్భక్త్యా సుభాగ్యదం .

లక్ష్మీపతిప్రసాదేన సర్వవిద్యాప్రదం నృణాం .. 18..

ఇతి తులస్యష్టోత్తరశతనామస్తోత్రం సంపూర్ణం .

తులసీస్తోత్రం 2

శ్రీభగవానువాచ .

వృందారూపాశ్చ వృక్షాశ్చ యదైకత్ర భవంతి చ .

విదుర్బుధాస్తేన వృందాం మత్ప్రియాం తాం భజా మ్యహం .. 18..

పురా బభూవ యా దేవీ హ్యాదౌ వృందావనే వనే .

తేన వృందావనీ ఖ్యాతా తాం సౌభాగ్యాం భజామ్యహం .. 19..

అసంఖ్యేషు చ విశ్వేషు పూజితా యా నిరంతరం .

తేన విశ్వపూజితాఖ్యాం జగత్పూజ్యాం భజామ్యహం .. 20..

అసంఖ్యాని చ విశ్వాని పవిత్రాణి యయా సదా .

తాం విశ్వపావనీం దేవీం విరహేణ స్మరామ్యహం .. 21..

దేవా న తుష్టాః పుష్పాణాం సమూహేన యయా వినా .

తాం పుష్పసారాం శుద్ధాం చ ద్రష్టుమిచ్ఛామి శోకతః .. 22..

విశ్వే యత్ప్రాప్తిమాత్రేణ భక్త్యాఽఽనందో భవేద్ధ్రువం .

నందినీ తేన విఖ్యాతా సా ప్రీతా భవితా హి మే .. 23..

యస్యా దేవ్యా స్తులా నాస్తి విశ్వేషు నిఖిలేషు చ .

తులసీ తేన విఖ్యాతా తాం యామి శరణం ప్రియే .. 24..

కృష్ణజీవనరూపా యా శశ్వత్ప్రియతమా సతీ .

తేన కృష్ణజీవనీతి మమ రక్షతు జీవనం .. 25..

ఇత్యేవం స్తవనం కృత్వా తత్ర తస్థౌ రమాపతిః .

దదర్శ తులసీం సాక్షాత్పాద పద్మే నతాం సతీం .. 26..

రుదతీమభిమానేన మానినీం మానపూజితాం .

ప్రియాం దృష్ట్వా ప్రియః శీఘ్రం వాసయామాస వక్షసి .. 27..

వృందాం వృందావనీం విశ్వపావనీంవిశ్వపూజితాం .

పుష్పసారాం నందినీం చ తులసీం కృష్ణజీవనీం .. 32..

ఏతన్నామాష్టకం చైత త్స్తోత్రం నామార్థసంయుతం .

యః పఠేత్తాం చ సంపూజ్య సోఽశ్వమేధఫలం లభేత్ .. 33..

తులసీం పుష్పసారాం చ సతీం పూజ్యాం మనోహరాం .

కృత్స్నపాపేధ్మదాహాయ జ్వలదగ్నిశిఖోపమాం .. 41..

పుష్పేషు తులనాప్యస్యా నాసీద్దేవీషు వా మునే .

పవిత్రరూపా సర్వాసు తులసీ సా చ కీర్త్తితా .. 42..

శిరోధార్యా చ సర్వేషామీప్సితాం విశ్వపావనీం .

జీవన్ముక్తాం ముక్తిదాం చ భజ తాం హరిభక్తిదాం .. 43..

ఇతి బ్రహ్మవైవర్తపురాణే ప్రకృతిఖండే ద్వావింశాధ్యాయాంతర్గతం

         తులసీస్తోత్రం సమాప్తం .

బ్రహ్మవైవర్తపురాణ . ప్రకృతిఖండ . అధ్యాయ 22/18-25, 32-33, 41-43..

తులసీస్తుతిః

తులసి శ్రీసఖి శుభే పాపహారిణి పుణ్యదే .

నమస్తే నారదనుతే నారాయణమనఃప్రియే .. 1..

మనః ప్రసాదజనని సుఖసౌభాగ్యదాయిని .

ఆధివ్యాధిహరే దేవి తులసి త్వాం నమామ్యహం .. 2..

యన్మూలే సర్వతీర్థాని యన్మధ్యే సర్వదేవతాః .

యదగ్రే సర్వ వేదాశ్చ తులసి త్వాం నమామ్యహం .. 3..

అమృతాం సర్వకల్యాణీం శోకసంతాపనాశినీం .

ఆధివ్యాధిహరీం నౄణాం తులసి త్వాం నమ్రామ్యహం .. 4..

దేవైస్త్చం నిర్మితా పూర్వం అర్చితాసి మునీశ్వరైః .

నమో నమస్తే తులసి పాపం హర హరిప్రియే .. 5..

సౌభాగ్యం సంతతిం దేవి ధనం ధాన్యం చ సర్వదా .

ఆరోగ్యం శోకశమనం కురు మే మాధవప్రియే .. 6..

తులసీ పాతు మాం నిత్యం సర్వాపద్భయోఽపి సర్వదా .

కీర్తితాఽపి స్మృతా వాఽపి పవిత్రయతి మానవం .. 7..

యా దృష్టా నిఖిలాఘసంఘశమనీ స్పృష్టా వపుఃపావనీ

రోగాణామభివందితా నిరసనీ సిక్తాఽన్తకత్రాసినీ .

ప్రత్యాసత్తివిధాయినీ భగవతః కృష్ణస్య సంరోపితా

న్యస్తా తచ్చరణే విముక్తిఫలదా తస్యై తులస్యై నమః .. 8..

ఇతి తులసీస్తుతిః సమాప్తా .

తులసీస్తవరాజః

శౌనకః --

సూత సూత మహాప్రాజ్ఞ సర్వశాస్రవిశారద .

బ్రూహి మే స్తవరాజం తు తులస్యాః పుణ్యవర్ధనం .. 1..

శ్రీ సూతః --

సాధు సాధు మహాభాగ కృతః ప్రశ్నస్త్వయాఽనఘ .

తులస్యాః స్తవరాజం తు కో ను వర్ణయితుం క్షమః .. 2..

ఇహ లోకే పరత్రాపి బ్రహ్మణాఽపి న శక్యతే .

తులసీకాననం దృష్ట్వా యత్ర కుత్రాపి వై స్థలే .. 3..

స్మరణాత్కీర్తనాద్ ధ్యానాత్ సర్వపాపైః ప్రముచ్యతే .

కిముత స్తవరాజేన స్తువతో ముక్తిరస్య వై .. 4..

భవిశష్యతీతి సందేహో రౌరవం నరకం వ్రజేత్ .

తులసీస్తవరాజస్య ఛందోఽనుష్టుప్ ప్రకీర్తితం .

ఋషిర్నారాయణో దేవో దేవతా శ్రీరుదీరితా .. 5..

శ్రీరితి బీజం, తుమితి కీలకం, లమితి శక్తిః,

శ్రీమితి దిగ్బంధః . నమ ఇతి సర్వభూతోచ్వాటనం ..

అంగన్యాసః -

ఓం శ్రీ హృదయాయ నమః . ఓం తుం శిరసే స్వాహా .

ఓం లం శిఖాయై వషట్ . ఓం స్యైం కవచాయ హుం .

ఓం నం నేత్రత్రయాయ వౌషట్. ఓం మః అస్రాయ ఫట్ .

భూర్భువస్సువరోమితి దిగ్బంధః ..

ధ్యానం -

చతుర్బాహుయుతాం దేవీం శంఖపుస్తకధారిణీం .

పద్మాక్షమాలాం పుష్పం చ ధారిణీం పుణ్యదాయినీం .. 6..

అమృతాబ్ధిసముత్పన్నే సర్వశోకవినాశినీ .

సర్వసౌభాగ్యదాత్రీ(యీ ) త్వం తులసి (సీ) రక్షణం కురు .. 7..

దక్షిణే లోకవిఖ్యాతే విష్ణుధృతశరీరిణి .

విశ్వరూపీ విశ్వకర్త్రీ తులసీ రక్షణం కురు .. 8..

సర్వలోకమయే(యీ ) పూజ్యే సర్వసంపత్ప్రదాయిని .

సర్వతాపప్రశమని తులసీ రక్షణం కురు .. 9..

మహితా లోకపూజ్యా చ మహిషాసురభంజని .

కరవీరపురావాసే తులసీ రక్షణం కురు .. 10..

మాయావతీ భగవతీ మహిలా భద్రకాలికా .

మోహినీ సంగతా శౌరీ తులసీ రక్షణం కురు .. 11..

మహాలక్ష్మి మహాకాలీ సర్వత్ర విజయా జయా .

అశరీరీ శరీరీ చ తులసీ రక్షణం కురు .. 12..

బ్రహ్మాణీ శంకరీ సౌమ్యా వైష్ణవీ చ స్వధా తథా .

దేవసేనా మహారౌద్రీ తులసీ రక్షణం కురు .. 13..

చాముండా చంచలా భీమా రేణుకా మారికా తథా .

పద్మాక్షీ పఞ్మమాలా చ తులసీ రక్షణం కురు .. 14..

శుభాశుభప్రదాత్రీ త్వం వృషభాసురభంజనీ .

వంజులా జర్ఝరీ క్రూరా తులసీ రక్షణం కురు .. 15..

అతిగుహ్యతమం దివ్యం పుత్రపౌత్రప్రవర్ధనం .

నాస్తికాయ ప్రదేయం న నాభక్తాయ కదాచన .. 16..

శుశ్రూషవే చ భక్తాయ ప్రదేయం హితమిచ్ఛతా .

విష్ణుభక్తాయ పూజ్యాయ వైరాగ్య గుణశాలినే .. 17..

భృగువారే భౌమవారే ప్రదోషే చ విశేషతః .

ప్రభాతే సర్వదా జప్యం లిఖిత్వా పుస్తకం యది .. 18..

స్థాపితం పూజితం చేత్స్యాత్ సర్వరోగైః ప్రముచ్యతే .

మహాలక్ష్మీః సింధుతీరే విష్ణునా ప్రభవిష్ణునా .. 19..

సాఽపి విధయే ప్రోక్తవతీ తేనోక్తం నారదాయ వై .

నారదః ప్రోక్తవాన్మహ్యం తదేతత్ప్రోక్తవానహం .. 20..

ఏవం పరంపరాప్రాప్తం సర్వశాస్రార్థ సంగ్రహం .

తులసీకవచం పుణ్యం తస్మాత్స్తోత్రం మహాత్ఫలం .. 21..

తస్మాత్కోటిగుణం పుణ్యం తులసీస్తవరాజతః .

పుత్రార్థీ పుత్రమాప్నోతి రాజ్యార్థీ రాజ్యమాప్నుయాత్ .. 22..

కిం తేన బహునోక్తేన మోక్షార్థీ మోక్షామాప్నుయాత్త్ .

సప్తద్వీపవతీం పృథ్వీం దత్వా యత్ఫలమాప్నుయాత్ .

తత్ఫలం సమవాప్నోతి తులసీపత్రదానతః .. 23..

ఇతి బ్రహ్మపురాణాంతర్గతః తులసీస్తవరాజః సంపూర్ణః .

తులసీవివాహవిధిః

(ఇక్షుదండనిర్మితే పుష్పాద్యలంకృతే మంటపే వివాహః . తులసీ

హరిద్రాచందనకుంకుమపుష్పాద్యాలంకృతా స్వీయవేద్యాం ప్రథమం పూజ్యతే .

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే ..

పరమేశ్వరప్రీత్యర్థం శుభే శోభనే ముహూర్తే ... శుభతిథౌ

తులస్యాః విష్ణునా సహ వివాహోత్సవమాచరిష్యే . (అప ఉపస్పృశ్య)

విఘ్నేశ్వరపూజాం కలశపూజాం తులసీ పూజాం చ యథావిధి నిర్వర్త్య ...

విష్ణుం వివాహార్థే వరార్హ వస్రాలంకరణ పుష్పమాలాదిభిః అలంకృత్య

వాద్యధోషగీతపురస్సరం వివాహమంటపమానీయ కర్తా నారికేల-కదలీఫల -

తాంబూలాదిభిః ఉపసృత్య మండపే ఆసనే ప్రతిష్ఠాప్య ప్రార్థయేత్-

ఆగచ్ఛ భగవన్ దేవ అర్హయిష్యామి కేశవ .

తుభ్యం దదామి తులసీం ప్రతీచ్ఛన్ కామదో భవ ..

ఆసనమిదం, అలంక్రియతాం . పాద్యం సమర్పయామి .

అర్ఘ్యం సమర్పయామి, ఆచమనీయం సమర్పయామి .

మధుపర్కం సమర్పయామి . హరిద్రాలేప-మంగలవిధిం సమర్పయామి .

తైలాభ్యంగపూర్వకం మంగలస్నానం సమర్పయామి .

వస్రాలంకరణపుష్పమాలాః సమర్పయామి . గంధాంధారయామి . గంధోపరి

హరిద్రాకుంకమం సమర్పయామి . పుష్పై: పూజయామి . 12-24-108

నామభిరర్చయేత్ . (వధూవరౌ పరస్పరమభిముఖౌ స్థాపయిత్వా) ...

గోత్రోద్భవాం ... శర్మణః ప్రపౌత్రీం, ...

శర్మణః పౌత్రీం, శర్మణః పుత్రీం

తులసీనామ్నీం ఇమాం కన్యకాం అజాయ అనాదయే శ్రీ విష్ణవే వరాయ దదామి .

(త్రిరుక్త్వా)

అనాదిమధ్యనిధన త్రైలోక్య ప్రతిపాలక .

ఇమాం గృహాణ తులసీం వివాహ విధినేశ్వర .తులసీవివాహవిధి.ఇన్ఫ్

పార్వతీ బీజసంభూతాం బృందాభస్మని సంస్థితాం .

అనాదిమధ్యనిధనాం వల్లభాం తే దదామ్యహం ..

పయోఘృతైశ్చ సేవాభిః కన్యావద్వర్ధితాం మయా .

త్వత్ప్రియాం తులసీం తుభ్యం దదామి త్వం గృహాణ భోః ..

వాద్యఘోష - వేదస్వస్తివాచన - మంగలాశీర్భిః ఉభౌ మేలయిత్వా

గీతాదిభిః సంతోషయేత్ . సాయమపి పునః పూజాం కృత్వా స్రీధనం

యథాశక్తి దద్యాత్ .

వివాహోత్సవపూర్తౌ

వైకుంఠం గచ్ఛ భగవన్ తులస్యా సహితః ప్రభో .

మత్కృతం పూజనం గృహ్య సంతుష్టో భవ సర్వదా .

గచ్ఛ గచ్ఛ సురశ్రేష్ఠ స్వస్థానం పరమేశ్వర .

యత్ర బ్రహ్మాదయో దేవాః తత్ర గచ్ఛ జనార్దన .

ఇతి ఉభౌ అభ్యనుజ్ఞాపయేత్ మంగలారార్తికేన సహ .

తులసీం యథాపూర్వం రక్షేత్ .

తులసీమాహాత్మ్యస్తోత్రం

వాణ్యువాచ .

తులసీ రోపితా యేన గృహస్థేన మహాఫలా .

గృహే తస్య న దారిద్ర్యం జాయతే నాత్ర సంశయః .. 1..

తులస్యా దర్శనాదేవ పాపరాశిర్నివర్తతే .

శ్రియేఽమృతకణోత్పన్నా తులసీ హరివల్లభా .. 2..

పిబంత్యా రుచిరం పానం ప్రాణినాం పాపహారిణీ .

యస్యా రూపే వసేల్లక్ష్మీః స్కంధే సాగరసంభవా .. 3..

పత్రేషు సతతం శ్రీశ్చ శాఖాసు కమలా స్వయం .

ఇందిరా పుష్పగా నిత్యం ఫలే క్షీరాబ్ధిసంభవా .. 4..

తులసీ శుష్కకాష్ఠేషు యా రూపా విశ్వవ్యాపినీ .

మజ్జాయాం పద్మవాసా చ త్వచాసు చ హరిప్రియా .. 5..

సర్వరూపా చ సర్వేశా పరమానందదాయినీ .

తులసీప్రాశకో మర్త్యో యమలోకం న గచ్ఛతి .. 6..

శిరస్థా తులసీ యస్య న యామ్యైరనుభూయతే .

ముఖస్థా తులసీ యస్య నిర్వాణపదదాయినీ .. 7..

హస్తస్థాతులసీయస్య స తాపత్రయవర్జితః .

తులసీ హృదయస్థా చ ప్రాణినాం సర్వకామదా .. 8..

స్కంధస్థా తులసీ యస్య స పాపైర్న చ లిప్యతే .

కంఠగా తులసీ యస్య జీవన్ముక్తః సదా హి సః .. 9..

తులసీసంభవం పత్రం సదా వహతి యో నరః .

మనసా చింతితాం సిద్ధిం సంప్రాప్నోతి న సంశయః .. 10..

తులసీం సర్వకాయార్థసాధినీం దుష్టవారిణీం .

యో నరః ప్రత్యహం సించేన్న స యాతి యమాలయం .. 11..

చాతుర్మాస్యే విశేషేణ వందితాపి విముక్తిదా .

నారాయణం జలగతం జ్ఞాత్వా వృక్షగతం తథా .. 12..

ప్రాణినాం కృపయా లక్ష్మీస్తులసీవృక్షమాశ్రితా .

చాతుర్మాస్యే సమాయాతే తులసీ సేవితా యది .. 13..

తేషాం పాపసహస్రాణి యాంతి నిత్యం సహస్రధా .

గోవిందస్మరణం నిత్యం తులసీవనసేవనం .. 14..

తులసీసేచనం దుగ్ధైశ్చాతుర్మాస్యేఽతిదుర్లభం .

తులసీం వర్ద్ధయేద్యస్తు మానవో యది శ్రద్ధయా .. 15..

ఆలవాలాంబుదానైశ్చ పావితం సకలం కులం .

యథా శ్రీస్తులసీసంస్థా నిత్యమేవ హి వర్ద్ధతే .. 16..

తథా తథా గృహస్థస్య కామవృద్ధిః ప్రజాయతే .

బ్రహ్మచారీ గృహస్థశ్చ వానప్రస్థో యతిస్తథా .. 17..

తథా ప్రకృతయః సర్వాస్తులసీసేవనే రతాః .

శ్రద్ధయా యది జాయంతే న తాసాం దుఃఖదో హరిః .. 18..

ఏకో హరిః సకలవృక్షగతో విభాతి నానారసైస్తు పరిభావితమూర్తిరేవ .

వృక్షాధివాసమగమత్కమలా చ దేవీ దుఃఖాదినాశనకరీ సతతం స్మృతాఽపి .. 19..

ఇతి శ్రీస్కందపురాణే నాగరఖండే సప్తచత్వారింశాధికద్విశతతమాధ్యాయాంతర్గతం

         తులసీమహిమాస్తోత్రం సమాప్తం .

తులసీమహిమా - గ్రహణాదౌ నియమశ్చ

ప్రసీద మమ దేవేశి ప్రసీద హరివల్లభే .

తులసీమితి సంప్రార్థ్య అర్చయేద్ధరిమవ్యయం .. 1..

అస్రాత్వా తులసీం ఛిత్వా దేవార్చన పరాయణః .

తత్సర్వం నిష్ఫలం చైవ పంచగవ్యేన శుద్ధ్యతి .. 2..

పాపాని యాని రవిసూనుపటస్థితాని

      గోబ్రహ్మబాలపితృమాతృవధాదికాని .

నశ్యంతి తాని తులసీవనదర్శనేన

      గోకోటిదానసదృశం ఫలమాప్నువంతి .. 3..

తులసీకాననం యత్ర యత్ర పద్మవనాని చ .

వసంతి వైష్ణవా యత్ర తత్ర సన్నిహితో హరిః .. 4..

తులసీమంజరీ గ్రాహ్యా తదభావే దలం స్మృతం .

దలాభావే తు పత్రం స్యాత్పత్రాభావే తు కాష్ఠకం .. 5..

కాష్ఠాభావే తు మూలం స్యాత్ మూలాభావే తు మృత్తికా .

మృత్తికాయా అభావే తు తులసీ శబ్ద ఇష్యతే .. 6..

పంకజం పంచరాత్రం స్యాత్సప్తరాత్రం తు బిల్వకం .

తులసీ దశరాత్రం స్యాత్తతః పర్యుషితం భవేత్ .. 7..

సంక్రాంతౌ పక్షయోరంతే ద్వాదశ్యాం నిశి సంధ్యయోః .

చిన్వంతి తులసీం యే వై నికృణ్వంతి హరే: శిరః .. 8..

గ్రహణే చ వ్యతీపాతే భౌమభార్గవభానుషు .

నాహరేత్తులసీపత్రం న మధ్యాహ్నే తతః పరం .. 9..

మధ్యాహ్నకే పరే యస్తు హరిపూజాపరాయణః .

చినోతి యస్తు తులసీం అధో గచ్ఛతి నాన్యథా .. 10..

నిర్మాల్యమపి వై గ్రాహ్యం తులస్యా హేమపుష్పవత్ .

శంఖోదకేన ప్రక్షాల్య విష్ణవే చ నివేదయేత్ .. 11..

తులస్యాః కోమలైః పత్రైః శ్రీహరే: పాదపంకజం .

పూజనం యే ప్రకుర్వంతి కృతార్థాః స్యుర్న సంశయః .. 12..

ద్వాదశ్యాం జాగరే రాత్రౌ ప్రాశయేత్తులసీదలం .

ద్వావింశదపరాధాంశ్చ క్షమతే హరిరవ్యయః .. 13..

విష్ణోర్విమానం యః కుర్యాత్తులస్యాః కోమలైర్దలై: .

హంసయుక్తవిమానేన విష్ణులోకం స గచ్ఛతి .. 14..

పక్షద్వయే చ సంక్రాంతౌ ద్వాదశ్యాం సూతకద్వయే .

సంగ్రహో నైవ కర్తవ్యో నిషిద్ధదివసేష్వపి .. 15..

త్యజేత్పర్యుషితం పుష్పం త్యజేత్పర్యుషితం జలం .

న త్యజేత్తులసీపత్రం న త్యజేజ్జాహ్నవీజలం .. 16..

పుష్కరాద్యాని తీర్థాని గంగాద్యాః సరితస్తథా .

వాసుదేవాదయో దేవా వసంతి తులసీవనే .. 17..

తులసీగంధమాఘ్రాథ పితరస్తుష్టమానసాః .

ప్రయాంతి గరుడారూఢాః సహితాశ్చక్రపాణినా .. 18..

రోపణాత్పాలనాత్సేకాద్ దర్శనాత్స్పర్శనాన్నృణాం .

తులసీ దహతే పాపం వాఙ్మనఃకాయసంచితం .. 19..

అమృతాం సర్వకల్యాణీం శోకసంతాపనాశినీం .

ఆధివ్యాధిహరీం నౄణాం తులసి త్వాం నమామ్యహం .. 20..

ఆమ్రారోపసహస్రాణి పిప్పలాని శతాని చ .

తత్ఫలం సమమేకేన తులసీ విటపేన చ .. 21..

రాజద్వారే సభామధ్యే సంగ్రామే శత్రుపీడనే .

తులసీస్మరణం కుర్యాత్ సర్వంత్ర విజయీ భవేత్ .. 22..

కృష్యారంభే తథా పుష్యే వివాహే చార్థసంగ్రహే .

సర్వకార్యేషు సిద్ధ్యర్థం ప్రస్థానే తులసీం స్మరేత్ .. 23..

యః స్మరేత్తులసీం సీతాం రామం సౌమిత్రిణా సహ .

వినిర్జిత్య రిపూన్ సర్వాన్ పునరాయాతి కార్యకృత్ .. 24..

ఖాదన్మాంసం పిబన్మద్యం సంగచ్ఛన్నంత్యజాదిభిః .

సద్యో భవతి పూతాత్మా కర్ణయోస్తులసీం ధరన్ .. 25..

చతుష్కర్ణే ముఖే చైకం నాభావేకం తథైవ చ .

శిరస్యేకం తథా ప్రోక్తం తీర్థే త్రయముదాహృతం .. 26..

అన్నోపరి తథా పంచ భోజనాంతే దలత్రయం .

ఏవం శ్రీతులసీ గ్రాహ్యా అష్టాదశదలా సదా .. 27..

పూజనానంతరం విష్ణోః అర్పితం తులసీదలం .

భక్షయేత్ దేహ శుద్ధ్యర్థం చాంద్రాయణశతాధికం .. 28..

నైవేద్మమన్నం తులసీవిమిశ్రితం

      విశేషతః పాదజలేన విష్ణోః .

యోఽశ్నాతి నిత్యం పురతో మురారేః

      ప్రాప్నోతి యజ్ఞాయుత కోటిపుణ్యం .. 29..

ద్రవ్యాంతరయుతం తైలం న దుష్యేద్ గ్రహణం వినా .

తులసీదలసంయుక్తం గ్రహణేఽపి న దుష్యతి .. 30..

ఇతి గ్రహణాదౌ నియమశ్చ తులసీమహిమా సంపూర్ణా .

తులసీమహిమా

మహాదేవ ఉవాచ .

విష్ణుప్రీతిం కరోత్వేషా తరుర్భూత్వా మహీతలే .

శరీరమర్జ్యతామస్యాః శ్రీవిష్ణుప్రీతయే గణాః .. 1..

అస్యాః పత్రేణ వృందాయాః పూజితః స్యాత్ స్వయం హరిః .

నాన్యేనేతి సువిజ్ఞేయం మణిముక్తాదినాపి చ .. 2..

నామాస్యాస్తులసీత్యస్తు పవిత్రాయాః సుపావనం .

తకారో మరణం ప్రోక్తం తద్యోగః స్యాదుకారతః .. 3..

మృతా లసతి చేత్యేవం తులసీత్యేవ గీయతే .

స్థితః ప్రతిదలేష్వస్యా మంత్రో ద్వాదశవర్ణకః .. 4..

అధిష్ఠాత్రీ దేవతాస్యామావాం దేవీమహేశ్వరౌ .

నారాయణ ఉపాస్యోఽస్యాః ప్రియేయం వైష్ణవీ మతా .. 5..

(ద్వాదశవర్ణకః అథవా ద్వాదశాక్షరవిష్ణుమంత్రః

ఓం నమో భగవతే వాసుదేవాయ .)

.. ఇతి బృహద్ధర్మపురాణే సప్తమోఽధ్యాయే మహాదేవప్రోక్తం

తులసీ ప్రాదుర్భావసహితా తులసీమహిమా సంపూర్ణా ..

.. బృహద్ధర్మపురాణం . పూర్వఖండః . అధ్యాయః 7. 60.2-64..

తులసీపూజా 4

తులసీ లఘుపూజా 2

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే ..

పరమేశ్వరప్రీత్యర్థం శ్రీ తులసీదేవీప్రీత్యర్థం

దీర్ఘసౌమంగల్యప్రాప్యర్థం సత్సంతానసిద్ధ్యర్థం

సమస్తసంపత్ప్రాప్త్యర్థం సర్వాభీష్టసిద్ధ్యర్థం తులసీపూజాం కరిష్యే .

(అప ఉపస్పృశ్య)

అస్మిన్ తులసీక్షుపే తులసీం వృందాం ధ్యాయామి . ఆవాహయామి .

వృందావన్యై నమః - ఆసనం సమపర్యయామి . విశ్వపూజితాయై నమః -

పాద్యం సమర్పయామి . విశ్వపావన్యై నమః - అర్ఘ్యం సమర్పయామి .

పుష్పసారాయై నమః - ఆచమనీయం సమర్పయామి . నందిన్యై నమః -

స్నానం సమర్పయామి . తులస్యై నమః - వస్రం సమర్పయామి .

కృష్ణజీవన్యై నమః - గంధం సమర్పయామి . కుంకమం సమర్పయామి .

అర్చనా - వృందాయై నమః . గోలోకవాసిన్యై నమః . కృష్ణప్రియాయై

నమః . సర్వరోగహరాయై నమః . సంతతిప్రదాయై నమః . సౌమంగల్యదాయై

నమః . సౌభాగ్యప్రదాయై నమః . పతివ్రతాయై నమః . అతులాయై నమః .

వృందావన్యై నమః .

విశ్వపూజితాయై నమః - ధూపం దర్శయామి . దీపం దర్శయామి .

విశ్వపావన్యై నమః - నైవేద్యం సమర్పయామి . పుష్పసారాయై నమః -

కర్పూరనీరాజనం దర్శయామి . నందిన్యై నమః - పుష్పాంజలిం సమర్పయామి .

తులస్యై నమః . ప్రదక్షిణం కరోమి . కృష్ణజీవిన్యై నమః - నమస్కారం

సమర్పయామి .

ఓంకారపూర్వికే దేవి సర్వవేదస్వరూపిణి .

సర్వదేవమయే దేవి సౌమంగల్యం ప్రయచ్ఛ మే ..

వృందే మాం సర్వదా దేవి కృపాదృష్ట్యా విలోకయ .

పత్యురాయుశ్చ భాగ్యం చ సదా దేహి హరిప్రియే ..

ప్రసీద మమ దేవేశి ప్రసీద హరివల్లభే .

ఇతి ప్రార్థ్య ద్వాదశవారం నమస్కుర్యాత్ తులసీస్తుతిం పఠేత్ . పూజాం

తులసీచరణయోరర్పయేత్ .

తులసీపూజా 3
తులసీ లఘుపూజా 1

శుక్లాంబరధరం విష్ణుం శశివర్ణం చతుర్భుజం .
ప్రసన్నవదనం ధ్యాయేత్ సర్వవిఘ్నోపశాంతయే ..

శ్రీపరమేశ్వరప్రీత్యర్థం తులసీదేవీ ప్రీత్యర్థం
సర్వారిష్టశాంత్యర్థం సర్వమంగలప్రాప్త్యర్థం తులసీపూజాం కరిష్యే ..

(అప ఉపస్పృశ్య - పూర్వాంగపూజా)

ధ్యాయామి తులసీం దేర్వీం శ్యామాం కమలలోచనాం .
ప్రసన్నాం పద్మకల్హార వరాభయ చతుర్భుజాం ..

కిరీట హార కేయూర కుండలాదివిభూషితాం .
ధవలాంశుకసంయుక్తాం పద్మాసన నిషేదుషీం ..

తులసీం దేవీం ధ్యాయామి ..

అస్మిన్ తులసీ క్షుపే తులసీం దేవీం ఆవాహయామి .
విష్ణువల్లభాయై నమః - ఆసనం సమర్పయామి .
సర్వదేవమయాయై నమః - పాద్యం సమర్పయామి .
సర్వతీర్థమయాయై నమః - అర్ఘ్యం సమర్పయామి .
దైత్యాంతకృత్ప్రియాయై నమః - ఆచమనీయం సమర్పయామి .
సర్వలోకహితాయై నమః - స్నానం సమర్పయామి .
లక్ష్మీ సహోదర్యై నమః - వస్రయుగ్మం కంచుకం చ సమర్పయామి .
మహాదేవ్యై నమః - గంధం కుంకుమం సమర్పయామి .
రమావాసాయై నమః - అక్షతాన్ సమర్పయామి .
అభీష్టదాయై నమః - పుష్పాణి సమర్పయామి .
అర్చనా--
వృందాయై నమః . వృందావన్యై నమః . విశ్వపూజితాయై నమః .
విశ్వపావన్యై నమః . పుష్ప సారాయై నమః . నందిన్యై నమః . తులస్యై నమః .
కృష్ణజీవన్యై నమః . (షోడశశనామభిః, అష్టోత్తరశనతనామభిః
సహ్స్రనామభిర్వా)
పాపహారిణ్యై నమః - ధూపం సమర్పయామి .
భగవత్యై నమః - దీపం సమర్పయామి .
అమృతసంభూతాయై ననః - నైవేద్యం సమర్పయామి .

జగద్ధాత్ర్యై నమః - తాంబూలం ఫలాని చ సమర్పయామి .
సుదక్షిణాయై నమః - నీరాజనం సమర్పయామి .
పరమేశ్వర్యై నమః - పుష్పాంజలిం సమర్పయామి .
అభీష్టదాయై నమః - ప్రదక్షిణనమస్కారాన్ సమర్పయామి .
తులసీస్తోత్రాణి పఠేత్ . (పృ. 128- 140)
యాని కాని చ పాపాని జన్మాంతరకృతాని చ .
తాని తాని వినశ్యంతి ప్రదక్షిణపదే పదే .
తులసీ దేవ్యై నమః - సర్వోపచారాన్ సమర్పయామి .
కాయేన వాచా మనసేంద్రియైర్వా బుద్ధ్యాత్మనా వా ప్రకృతేః స్వభావాత్ .
కరోమి యద్యత్సకలం పరస్మై నారాయణాయేతి సమర్పయామి .

.. ఓం తత్సత్ - బ్రహ్మార్పణమస్తు .

తులసీపూజా 2

విఘ్నేశ్వరపూజా - (హరిద్రాబింబే)

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే ..

శ్రీపరమేశ్వరప్రీత్యర్థం

ఆదౌ విఘ్నేశ్వరపూజాం కరిష్యే . (హస్తౌ ప్రక్షాల్య) అస్మిన్ హరిద్రా బింబే

సుముఖం శ్రీవిఘ్నేశ్వరం ధ్యాయామి . ఆవాహయామి . ఆసనం సమర్పయామి .

పాదయోః పాద్యం సమర్పయామి . హస్తయోరర్ఘ్యం సమర్పయామి . ముఖే ఆచమనీయం

సమపర్యయామి . మధుపర్కం సమర్పయామి . స్నపయామి . స్నానానంతరం

ఆచమనీయం సమర్పయామి . వస్త్రోత్తరీయాభరణాని సమర్పయామి .

పుష్పైః పూజయామి . సుముఖాయ నమః . ఏకదంతాయ నమః . కపిలాయ

నమః . గజకర్ణకాయ నమః . లంబోదరాయ నమః . వికటాయ నమః .

విఘ్నరాజాయ నమః . గణాధిపాయ నమః . ధూమకేతవే నమః . గణాధ్యక్షాయ

నమః . భాలచంద్రాయ నమః . గజాననాయ నమః . వక్రతుండాయ నమః .

శూర్పకర్ణాయ నమః . హేరంబాయ నమః . స్కందపూర్వజాయ నమః . పుష్పాణి

సమర్పయామి . ధూపం సమర్పయామి . దీపం సమర్పయామి . నైవేద్యం సమర్పయామి .

కర్పూరనీరాజనం సమర్పయామి . ప్రదక్షిణనమస్కారాన్ సమర్పయామి .

వక్రతుండ మహాకాయ కోటిసూర్యసమప్రభ .

అవిఘ్నం కురు మే దేవ సర్వకార్యేషు సర్వదా ..

ఇతి ప్రార్థయేత్ తులసీ పూజా సంకల్పః -

శుక్లాంబరధరం విష్ణుం శశివర్ణం చతుర్భుజం .

ప్రసన్నవదనం ధ్యాయేత్ సర్వవిఘ్నోపశాంతయే ..

శ్రీపరమేశ్వర ప్రీత్యర్థం శ్రీ

తులసీ దేవీ ప్రీత్యర్థం దీర్ఘసౌమంగల్యప్రాప్త్యర్థం

సర్వాభీష్టసిద్ధ్యర్థం శ్రీ తులసీపూజాం కరిష్యే .

అప ఉపస్పృశ్య - సుముఖం విఘ్నేశ్వరం యథాస్థానం

ప్రతిష్ఠాపయామి . శోభనార్థే క్షేమాయ పునరాగమనాయ చ .

(విఘ్నేశ్వరం ప్రార్థ్య - ఉద్వాస్య - కలశం పూజయేత్)

గంగే చ యమునే చైవ గోదావరీ సరస్వతి .

నర్మదే సింధు కావేరి జలేఽస్మిన్ సన్నిధిం కురు ..

(ఇతి ప్రార్థ్య కలశజలేన పూజాద్రవ్యాణి ఆత్మానం చ ప్రోక్ష్య)

తులసీం ధ్యాయేత్-

ధ్యాయామి తులసీం దేవీం శ్యామాం కమలలోచనాం .

ప్రసన్నాం పద్మకల్హారవరాభయచతుర్భుజాం ..

కిరీటహారకేయూర్ కుండలాదయైర్విభూషితాం .

ధవలాంశుకసంవీతాం పద్మాసననిషేవితాం .

దేవీం త్రైలోక్య జననీం సర్వలోకైకపావనీం ..

అస్మిన్ క్షుపే శ్రీ తులసీం ధ్యాయామి .

సర్వదేవమయే దేవి సర్వదే విష్ణువల్లభై .

ఆగచ్ఛ మమ గేహేఽస్మిన్ నిత్యం సన్నిహితా భవ .

అస్మిన్ క్షుపే శ్రీ తులసీం ఆవాహయామి .

రత్నసింహాసనం చారు భుక్తిముక్తిఫలప్రదే .

మయా దత్తం మహాదేవి సంగృహాణ సురార్చితే ..

శ్రీ తులస్యై నమః . ఆసనం సమర్పయామి .

నానాగంధసుపుష్పైశ్చ వాసితం సురవందితే .

పాద్యం గృహాణ దేవి త్చం సర్వకామఫలప్రదే ..

శ్రీ తులస్యై నమః . పాద్యం సమర్పయామి .

గంగోదకం సమానీతం సువర్ణకలశస్థితం .

తులసి త్వం గృహాణేదం అర్ఘ్యమైశ్వర్యదాయకం ..

శ్రీ తులస్యై నమః . అర్ఘ్యం సమర్పయామి .

సర్వమంగలదేవేశి నవరత్నైర్విభూషితే .

మయా దత్తమిదం తోయం గృహాణాచమనీయకం .

శ్రీ తులస్యై నమః . ఆచమనీయం సమర్పయామి .

పూర్ణేందుబింబసదృశం దధిఖండఘృతం మధు .

మధుపర్కం మయాఽఽనీతం గృహాణ పరమేశ్వరి ..

శ్రీ తులస్యై నమః - మధుపర్కం సమర్పయామి .

గంగాయమునయోస్తోయం ఆనీతం నిర్మలం శుభం .

గంధోదకమిదం దేవి స్నానార్థం ప్రతిగృహ్యతాం ..

శ్రీ తులస్యై నమః . శుద్ధోదకస్నానం సమర్పయామి .

క్షౌమం కాంచనసంకాశం ఇదం శుభ్రం మనోహరం .

వస్త్రయుగ్మం శుభే దేవి స్వీకురుష్వాంబుజేక్షణే ..

శ్రీ తులస్యై నమః - వస్రయుగ్మం సమర్పయామి .

రాజతం బ్రహసూత్రం చ కాంచనం చోత్తరీయకం .

గృహాణ సర్వవరదే పద్మపత్రనిభేక్షణే .

శ్రీ తులస్యై నమః - ఉపవీతం సమర్పయామి .

కిరీటహారకటకాన్ కేయూరాన్కుండలాన్ శుభాన్ .

నూపురోదరబంధం చ భూషణాని సమర్పయే .

శ్రీ తులస్యై నమః - ఆభరణాని సమర్పయామి .

చందనాగరుకస్తూరీకర్పూరేణ చ సంయుతం .

విలేపనం దదామి త్వం గృహాణ తులసీశ్వరి ..

శ్రీ తులస్యై నమః - గంధం సమర్పయామి .

అక్షతాంధవలాందివ్యాన్ శాలీయాంతండులాన్ శుభాన్ .

సుధౌతానర్పయే దేవి వృందాస్థానోద్భవేశ్వరి ..

శ్రీ తులస్యై నమః - అక్షతాన్ సమర్పయామి .

మల్లికాకుందమందారజాతీవకులచంపకైః .

శతపత్రైశ్చ కల్హారైః పూజయామి మహేశ్వరి ..

శ్రీ తులస్యై నమః - పుష్పాణి సమర్పయామి .

అంగపూజా - తులసీదేవ్యై నమః -పాదౌ పూజయామి .

వృందావనస్థాయై నమః - గుల్ఫౌ పూజయామి .

పద్మపత్న నిభేక్షణాయై నమః - జంఘే పూజయామి .

పద్మకోటిసమప్రభాయై నమః - ఊరూ పూజయామి .

హరిప్రియాయై నమః - జానునీ పూజయామి .

కుంకుమాంకితగాత్రాయై నమః - కటిం పూజయామి .

సురవందితాయై నమః - నాభిం పూజయామి .

లోకానుగ్రహకారిణ్యై నమః - ఉదరం పూజయామి .

త్రైలోక్యజనన్యై నమః - హృదయం పూజయామి .

పద్మప్రియాయై నమః - హస్తాన్ పూజయామి .

ఇందిరాఖ్యాయై నమః - భుజాన్ పూజయామి .

కంబుకంఠ్యై నమః - కంఠం పూజయామి .

కల్మషఘ్న్యై నమః - కర్ణౌ పూజయామి .

వరప్రదాయై నమః - ముఖం పూజయామి .

ఆశ్రితరక్షికాయై నమః - శిరః పూజయామి .

అభీష్టదాయై నమః - సర్వాణ్యంగాని పూజయామి .

యథాశక్తి 8-16-108-1008 నామభిః కుంకుమేన పుష్పైర్వా అర్చయేత్ .

గుగ్గులం గోఘృతం చైవ దశాంగం సుమనోహరం .

ధూపం గృహాణ వరదే సర్వాభీష్టఫలప్రదే ..

శ్రీ తులస్యై నమః - ధూపమాఘ్రాపయామి .

సాజ్యం త్రివర్తిసంయుక్తం వహ్నినా యోజితం మయా .

దీపం గృహాణ దేవేశి త్రైలోక్యతిమిరాపహం ..

శ్రీ తులస్యై నమః - దీపం దర్శయామి .

నైవేద్యం షడ్ రసోపేతం ఫలసూపసమన్వితం .

సఘృతం సమధుక్షీరం గృహాణ తులసీశ్వరి ..

శ్రీ తులస్యై నమః - మహానైవేద్యం నివేదయామి .

పూగీఫలసమాయుక్తం నాగవల్లీదలైర్యుతం .

కర్పూరచుర్ణసంయుక్తం తాంబూలం ప్రతిగృహ్యతాం ..

శ్రీ తులస్యై నమః - తాంబూలం సమర్పయామి .

నీరాజనం సుమంగల్యం దివ్యజ్యోతిః సమన్వితం .

అజ్ఞానఘ్నే గృహాణ త్వం జ్ఞానమార్గప్రదాయిని .

శ్రీ తులస్యై నమః - కర్పూరనీరాజనం దర్శాయామి ..

ప్రకృష్టపాపనాశాయ ప్రకృష్టఫలసిద్ధయే .

ప్రదక్షిణం కరోమి త్వాం సర్వాభీష్టఫలప్రదే .

ఆయురారోగ్యమైశ్వర్యం విద్యాం జ్ఞానం యశః సుఖం .

దేహి దేహి మమాభీష్టం ప్రదక్షిణకృతః శుభే .

శ్రీ తులస్యై నమః - ప్రదక్షిణం సమర్పయామి .

నమస్తే తులసీదేవి సర్వాభీష్టఫలప్రదే .

నమస్తే త్రిజగద్వంద్యే నమస్తే లోకరక్షికే ..

శ్రీ తులస్యై నమః - నమస్కారాన్ సమర్పయామి .

వృందావనస్థితే దేవి దివ్యభోగప్రదే శుభే .

పుష్పాంజలిం ప్రదాస్యామి స్వీకురుష్వాంబుజేక్షణే .

శ్రీ తులస్యై నమః - పుష్పాంజలిం సమర్పయామి .

క్షీరార్ఘ్యప్రదానం-

తులస్యై తు నమస్తుభ్యాం నమస్తే ఫలదాయిని .

ఇదమర్ఘ్యం ప్రదాస్యామి సుప్రీతా భవ సర్వదా .

శ్రీ తులస్యై నమః - ఇదమర్ఘ్యం ఇదమర్ఘ్యం ఇదమర్ఘ్యం .

లక్ష్మీపతిప్రియే దేవి తులసీదివ్యరూపిణి .

ఇదమర్ఘ్యం ప్రదస్యామి సుప్రీతా వరదా భవ ..

శ్రీ తులస్యై నమః - ఇదమర్ఘ్యం ఇదమర్ఘ్యం ఇదమర్ఘ్యం .

సర్వపాపహరే దేవి ఆశ్రితాభీష్టదాయిని .

మయా దత్తం గృహాణార్ఘ్యం సుప్రీతా వరదా భవ .

శ్రీ తులస్యై నమః . ఇదమర్ఘ్యమిదమర్ఘ్యమిదమర్ఘ్యం .

దేహి మే విజయం దేవి విద్యాం దేహి మహేశ్వరి .

త్వమితి ప్రార్థయే నిత్యం శీఘ్రమేవ ఫలం కురు ..

ఇతి సంప్రార్థ్య తులసీస్తుతిం పఠిత్వా మంగలారార్తికం విధాయ .

శ్రీ తులసీదేవ్యర్పణమస్తు .

ఓం తత్సద్బ్రహ్మార్పణమస్తు ఇతి సాక్షతం జలం భూమౌ విసృజ్య ఆచామేత్ .