Sacred Stotras & Deities

గాయత్రీనామాష్టావింశతిస్తోత్రం

శ్రీగణేశాయ నమః ..

బ్రహ్మోవాచ .

శతాక్షరాత్మకం దేవ్యా నామాష్టావింశతిః శతం .

శృణు వక్ష్యాభి తత్సర్వమతిగుహ్యం సనాతనం .. 1..

భూతిదా భువనా వాణీ వసుధా సుమనా మహీ .

హరిణీ జననీ నందా సవిసర్గా తపస్వినీ .. 2..

పయస్వినీ సతీ త్యాగా చైందవీ సత్యవీరసా .

విశ్వా తుర్యా పరా రేచ్యా నిర్ఘృణీ యమినీ భవా .. 3..

గోవేద్యా చ జరిష్ఠా చ స్కందినీ ధీర్మతిర్హిమా .

భీషణా యోగినీ పక్షీ నదీ ప్రజ్ఞా చ చోదినీ .. 4..

ధనినీ యామినీ పద్మా రోహిణీ రమణీ ఋషిః .

సేనాముఖీ సామయీ చ బకులా దోషవర్జితా .. 5..

సర్వకామదుఘా సోమోద్భవాఽహంకారవర్జితా .

ద్విపదా చ చతుష్పాదా త్రిపదా చైవ షట్పదా .. 6..

అష్టాపదీ నవపదీ సా సహస్రాక్షరాత్మికా .

ఇదం యః పరమం గుహ్యం సావిత్రీమంత్రగర్భితం .. 7..

నామాష్టవింశతిశతం శృణుయాచ్ఛ్రావయేత్పఠేత్ .

మర్త్యానామమృతత్వాయ భీతానామభయాయ చ .. 8..

మోక్షాయ చ ముముక్షూణాం శ్రీకామాన్ ప్రాప్తయే శ్రియః .

విజయాయ యుయుత్సూనాం వ్యాధితానామరోగకృత్ .. 9..

వశ్యాయ వశ్యకామానాం విద్యాయై వేదకామినాం .

ద్రవిణాయ దరిద్రాణాం పాపినాం పాపశాంతయే .. 10..

వాదినాం వాదవిజయే కవీనాం కవితాప్రదం . వాదవిషయే

అన్నాయ క్షుధితానాం చ స్వర్గాయ నాకమిచ్ఛతాం .. 11.. స్వర్గార్థం

పశుభ్యః పశుకామానాం పుత్రేభ్యః పుత్రకాంక్షిణాం .

క్లేశినాం శోకశాంత్యర్థం నృణాం శత్రుభయాయ చ .. 12..

రాజవశ్యాయ ద్రష్టవ్యం పరమం నృపసేవినాం .

భక్త్యర్థం విష్ణుభక్తానాం విష్ణౌ సర్వాంతరాత్మని .. 13..

నాయకం విధిసృష్టానాం శాంతయే భవతి ధ్రువం .

నిఃస్పృహాణాం నృణాం ముక్తిః శాశ్వతీ భవతి ధ్రువం .. 14..

జప్యం త్రివర్గసంయుక్తం గృహస్థేన విశేషతః .

మునీనాం జ్ఞానసిద్ధ్యర్థం యతీనాం మోక్షసిద్ధయే .. 15..

ఉద్యతం చంద్రకిరణముపస్థాయ కృతాంజలిః .

కాననే వా స్వభవనే తిష్ఠన్ శుద్ధో జపేదిదం .. 16..

సర్వాన్ కామానవాప్నోతి తథైవ శివసన్నిధౌ .

మమ ప్రీతికరం దివ్యం విష్ణుభక్తివివర్ధనం .. 17..

జ్వరార్తానాం కుశాగ్రేణ మార్జయేత్కుష్ఠరోగిణాం .

అంగమంగం యథాలింగం కవచేన తు సాధకః .. 18..

మండలేన విశుధ్యేత సర్వరోగైర్న సంశయః .

మృతప్రజా చ యా నారీ జన్మవంధ్యా తథైవ చ .. 19..

కన్యాదివంధ్యా యా నారీ తాసామంగం ప్రమార్జయేత్ .

పుత్రా నరోగిణస్తాస్తు లభంతే దీర్ఘజీవినః .. 20..

తాస్తాః సంవత్సరాదర్వాక్ గర్భం తు దధిరే పునః .

పతివిద్వేషిణీ యా స్త్రీ అంగం తస్యాః ప్రమార్జయేత్ .. 21..

తమేవ భజతే సా స్త్రీ పతిం కామవశం నయేత్ .

అశ్వత్థే రాజవశ్యార్థం బిల్వమూలే స్వరూపభాక్ .. 22..

పాలాశమూలే విద్యార్థీ తేజసోఽభిముఖో రవౌ .

కన్యార్థీ చండికాగేహే జపేచ్ఛత్రుభయాయ చ .. 23..

శ్రీకామో విష్ణుగేహే చ ఉద్యానే శ్రీర్వశీభవేత్ .

ఆరోగ్యార్థే స్వగేహే చ మోక్షార్థీ శైలమస్తకే .. 24..

సర్వకామో విష్ణుగేహే మోక్షార్థీ యత్ర కుత్రచిత్ .

జపారంభే తు హృదయం జపాంతే కవచం పఠేత్ .. 25..

కిమత్ర బహునోక్తేన శృణు నారద తత్త్వతః .

యం యం చింతయతే నిత్యం తం తం ప్రాప్నోతి నిశ్చితం .. 26..

ఇతి శ్రీమద్వసిష్ఠసంహితాయాం బ్రహ్మనారదసంవాదే

గాయత్రీనామాష్టావింశతిస్తోత్రం సమాప్తం ..

గాయత్రీతత్త్వస్తోత్రం

శ్రీగణేశాయ నమః ..

శ్రీగాయత్ర్యై నమః .

శ్రీగాయత్రీతత్త్వమాలామంత్రస్య విశ్వామిత్ర ఋషిః, అనుష్టుప్ఛదః,

పరమాత్మా దేవతా, హలో బీజాని, స్వరాః శక్తయః, అవ్యక్తం కీలకం,

మమ సమస్తపాపక్షయార్థే గాయత్రీతత్త్వపాఠే వినియోగః .

చతుర్విశతితత్త్వానాం యదేకం తత్త్వముత్తమం .

అనుపాధి పరంబ్రహ్మ తత్పరంజ్యోతిరోమితి .. 1..

యో వేదాదౌ స్వరః  ప్రోక్తో వేదాంతే చ ప్రతిష్ఠితః .

తస్య ప్రకృతిలీనస్య తత్పరంజ్యోతిరోమితి .. 2..

తత్సదాదిపదైర్వాచ్యం పరమం పదమవ్యయం .

అభేదత్వం పదార్థస్య తత్పరంజ్యోతిరోమితి .. 3..

యస్య మాయాంశభాగేన జగదుత్పద్యతేఽఖిలం .

తస్య సర్వోత్తమం రూపమరూపస్యాభిధీమహి .. 4..

న పశ్యంతి పరమం పశ్యంతో హి దివౌకసః .

తం భూతానిలదేవం తు సుపర్ణముపధావతాం .. 5..

యదంశః ప్రేరితో జంతుః కర్మపాశనియంత్రితః .

ఆజన్మకృతపాపానామపహంతుం దివౌకసః .. 6..

ఇదం మహామునిప్రోక్తం గాయత్రీతత్త్వముత్తమం .

యః పఠేత్పరయా భక్త్యా స యాతి షరమాం గతిం .. 7..

సర్వవేదపురాణేషు సాంగోపాంగేషు యత్ఫలం .

సకృదస్య జపాదేవ తత్ఫలం ప్రాప్నుయాన్నరః .. 8..

అభక్ష్యభక్షణాత్పూతో భవతి .

అగమ్యాగమనాత్పూతో భవతి . సర్వపాపేభ్యః పూతో భవతి .

ప్రాతరధీయానో రాత్రికృతం పాపం నాశయతి .

సాయమధీయానో దివసకృతం పాపం నాశయతి .

మధ్యందినముపయుంజానోఽసత్ప్రతిగ్రహాదినా ముక్తో భవతి .. 9..

అనుప్లవం పురుషాః పురుషమభివదంతి యం యం కామమభిధ్యాయతి

తం తమేవాప్నోతీ పుత్రపౌత్రాన్ కీర్తిసౌభాగ్యాని చోపలభతే .

సర్వభూతాత్మమిత్రం దేహాంతే తద్విశిష్టో గాయత్రీపరమం పదమాప్నోతి .. 10..

ఇతి శ్రీవేదసారే గాయత్రీతత్త్వస్తోత్రం సంపూర్ణం ..

గాయత్రీ-గీతికా

ఓం భూర్భువః స్వః .

ధ్యేయా ధియో నః ప్రచోదయిత్రీ,

     సునుతా ధరణ్యా

     శక్తిః సుపుణ్యా

     సవితు-ర్వరేణ్యా,

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. (ధ్రువం)..

తామిస్రహా దీప్త-సహస్ర-హస్తా, ప్రజ్ఞావతీ ;

యస్యాం సమస్తా జడతా నిరస్తా, సా భారతీ .

జ్యోతిః-స్వరూపా ప్రకాశయిత్రీ,

     నిగమాగ్రగణ్యా

     శక్తిః సుపుణ్యా

     సవితు-ర్వరేణ్యా,

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. 1..

శోభామయీ శుభ్ర-విశుద్ధ-సత్త్వా, హంసాసనా ;

సంసార-శమనీ శివ-శర్మ-తత్త్వా, సోపాసనా .

సా వేద-మాతా ప్రమోదయిత్రీ,

     శ్రుతి-నాద-గుణ్యా

     శక్తిః సుపుణ్యా

     సవితు-ర్వరేణ్యా,

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. 2..

నిత్య-స్తుతా సత్య-పథానుకూలా, సా మంగలా ;

విశ్వ-ప్రసూతి-స్థితి-నాశ-మూలా, సాఽనర్గలా .

త్రైశ్వర్య-మూర్త్తేః ప్రవర్త్తయిత్రీ,

     మహతాం శరణ్యా

     శక్తిః సుపుణ్యా

     సవితు-ర్వరేణ్యా,

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. 3..

భర్గాత్మికా సా సుభగా నమస్యా, పద్మాననా ;

శుభదావకాశా భక్త్యా హి యస్యా, నీరాజనా .

ధర్మస్య ధాత్రీ వికాసయిత్రీ,

     ప్రణవైక-వర్ణ్యా

     శక్తిః సుపుణ్యా

     సవితు-ర్వరేణ్యా,

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. 4..

ఆరోగ్యదా లోక-రుజాపహంత్రీ, సంజీవనీ ;

ధ్వస్తాశివా స్వస్తిమతీ నియంత్రీ, సందీపనీ .

సర్వత్ర దివ్యా పవిత్రయిత్రీ,

     వరదా హిరణ్యా

     శక్తిః సుపుణ్యా

     సవితు-ర్వరేణ్యా

గాయత్రీ సరస్వతీ సావిత్రీ .

గాయత్రీ సరస్వతీ సావిత్రీ .. 5..

-- గీత-రచనా : డాె హరేకృష్ణ-మేహేరః

     (``మాతృగీతికాంజలిః'' - కావ్యతః)

గాయత్రీకవచం 4

ఓం అస్య శ్రీగాయత్రీకవచస్య, బ్రహ్మా ఋషిః, గాయత్రీ ఛందః,

గాయత్రీ దేవతా, భూః బీజం, భువః శక్తిః, స్వః కీలకం,

గాయత్రీ ప్రీత్యర్థం జపే వినియోగః .

అథ ధ్యానం

పంచవక్త్రాం దశభుజాం సూర్యకోటిసమప్రభాం .

సావిత్రీం బ్రహ్మ వరదాం చంద్రకోటిసుశీతలాం ..

త్రినేత్రాం సితవక్త్రాం చ ముక్తాహారవిరాజితాం .

వరాభయాంకుశకశాహేమపత్రాక్షమాలికాం ..

శంఖచక్రాబ్జయుగలం కరాభ్యాం దధతీం వరాం .

సితపంకజసంస్థాం చ హంసారూఢాం సుఖస్మితాం ..

ధ్యాత్వైవం మానసాంభోజే గాయత్రీకవచం జపేత్ ..

ఓం బ్రహ్మోవాచ .

విశ్వామిత్ర మహాప్రాజ్ఞ గాయత్రీకవచం శృణు .

యస్య విజ్ఞానమాత్రేణ త్రైలోక్యం వశయేత్క్షణాత్ .. 1..

సావిత్రీ మే శిరః పాతు శిఖాయామమృతేశ్వరీ .

లలాటం బ్రహ్మదైవత్యా భ్రువౌ మే పాతు వైష్ణవీ .. 2..

కర్ణౌ మే పాతు రుద్రాణీ సూర్యా సావిత్రికాఽమ్బికా .

గాయత్రీ వదనం పాతు శారదా దశనచ్ఛదౌ .. 3..

ద్విజాన్ యజ్ఞప్రియా పాతు రసనాయాం సరస్వతీ .

సాంఖ్యాయనీ నాసికాం మే కపోలౌ చంద్రహాసినీ .. 4..

చిబుకం వేదగర్భా చ కంఠం పాత్వఘనాశినీ .

స్తనౌ మే పాతు ఇంద్రాణీ హృదయం బ్రహ్మవాదినీ .. 5..

ఉదరం విశ్వభోక్త్రీ చ నాభౌ పాతు సురప్రియా .

జఘనం నారసింహీ చ పృష్ఠం బ్రహ్మాండధారిణీ .. 6..

పార్శ్వౌ మే పాతు పద్మాక్షీ గుహ్యం గోగోప్త్రికాఽవతు .

ఊర్వోరోంకారరూపా చ జాన్వోః సంధ్యాత్మికావతు .. 7..

జంఘయోః పాతు అక్షోభ్యా గుల్ఫయోర్బ్రహ్మశీర్షకా .

సూర్యా పదద్వయం పాతు చంద్రా పాదాంగులీషు చ .. 8..

సర్వాంగం వేదజననీ పాతు మే సర్వదానఘా .

ఇత్యేతత్కవచం బ్రహ్మన్ గాయత్ర్యాః సర్వపావనం .

పుణ్యం పవిత్రం పాపఘ్నం సర్వరోగనివారణం .. 9..

త్రిసంధ్యం యః పఠేద్విద్వాన్ సర్వాన్ కామానవవాప్నుయాత్ .

సర్వశాస్త్రార్థతత్తవజ్ఞః స భవేద్వేదవిత్తమః .. 10..

సర్వయజ్ఞఫలం ప్రాప్య బ్రహ్మాంతే సమవాప్నుయాత్ .

ప్రాప్నోతి జపమాత్రేణ పురుషార్థాంశ్చతుర్విధాన్ .. 11..

ఇతి శ్రీవిశ్వామిత్రసంహితోక్తం గాయత్రీకవచం సంపూర్ణం ..

గాయత్రీకవచం 3

శ్రీగణేశాయ నమః ..

శ్రీపార్వత్యువాచ .

దేవదేవ మహాదేవ సంసారార్ణవతారకం .

గాయత్రీకవచం దేవ కృపయా కథయ ప్రభో .. 1..

శ్రీమహాదేవ ఉవాచ .

మూలాధారే స్థితా నిత్యం కుండలీ తత్త్వరూపిణీ .

సూక్ష్మాతిసూక్ష్మపరమా బిసతంతుస్వరూపిణీ .. 2..

విద్యుత్పుంజప్రతీకాశా కుండలీ శ్రుతిసర్పిణీ .

పరస్య బ్రహ్మగ్రహణీ పంచాశద్వర్ణరూపిణీ .. 3..

శివస్య నర్తకీ నిత్యా పరబ్రహ్మప్రపూజితా .

బ్రాహ్మణస్యైవ గాయత్రీ చిదానందస్వరూపిణీ .. 4..

బ్రహ్మణ్యవర్త్మవాతేయం ప్రాణాత్మా నిత్యనూతనాత్ .

నిత్యం తిష్ఠతి సానందా కుండలీ తవ విగ్రహే .. 5..

అతిగోప్యం మహత్పుణ్యం త్రికోటీతీర్థసంయుతం .

సర్వజ్ఞానమయీ దేవీ సర్వదానమయీ సదా .. 6..

సర్వసిద్ధిమయీ దేవీ పార్వతీ ప్రాణవల్లభా .

ఓం ఓం ఓం ఓం భూః ఓం ఓం భువః ఓం ఓం స్వః ఓం ఓం త ఓం ఓం త్స

ఓం ఓం వి ఓం ఓం తు ఓం ఓం వ ఓం ఓం రే ఓం ఓం ణ్యం ఓం ఓం భ

ఓం ఓం ర్గో ఓం ఓం దే ఓం ఓం వ ఓం ఓం స్య ఓం ఓం ధీ ఓం ఓం మ

ఓం ఓం హి ఓం ఓం ధి ఓం ఓం యో ఓం ఓం యో ఓం ఓం నః ఓం ఓం ప్ర

ఓం ఓం చో ఓం ఓం ద ఓం ఓం యాత్ ఓం Oమ్ . ఓం భూః ఓం

పాతు మే మూలం చతుర్దలసమన్వితం .

ఓం భువః ఓం పాతు మే లింగం సజలం షడ్దలాత్మకం .. 7..

ఓం స్వః ఓం పాతు మే కంఠం సకాశాం దలషోడశం .

ఓం  త ఓం  పాతు మే రూపం బ్రహ్మాణం కారణం పరం .. 8..

ఓం త్స ఓం పాతు మే బ్రహ్మాణం పాతు సదా మమ .

ఓం వి ఓం పాతు మే గంధం సదా శిశిరసంయుతం .. 9..

ఓం తు ఓం పాతు మే స్పర్శం శరీరస్య చ కారణం .

ఓం ర్వ ఓం పాతు మే శబ్దం శబ్దవిగ్రహకారణం .. 10..

ఓం రే ఓం పాతు మే నిత్యం సదా తత్త్వశరీరకం .

ఓం ణ్యం ఓం పాతు మే హ్యక్షం సర్వతత్త్వైకకారణం .. 11..

ఓం భ ఓం పాతు మే శ్రోత్రం శ్రవణస్య చ కారణం .

ఓం ర్గో ఓం పాతు మే ఘ్రాణం గంధోపాదానకారణం .. 12..

ఓం దే ఓం పాతు మే వాస్యం సభాయాం శబ్దరూపిణీ .

ఓం వ ఓం పాతు మే బాహుయుగలం బ్రహ్మక్రారణం .. 13..

ఓం స్య ఓం పాతు మే లింగం షడ్దలం షడ్దలైర్యురతం .

ఓం ధీ ఓం పాతు మే నిత్యం ప్రకృతిం శబ్దకారణం .. 14..

ఓం మ ఓం పాతు మే నిత్యం మనోబ్రహ్మస్వరూపిణం .

ఓం హి ఓం పాతు మే బుద్ధిం పరబ్రహ్మమయం సదా .. 15..

ఓం ధియ ఓం పాతు మే నిత్యమహంకారం యథా తథా .

ఓం యో ఓం పాతు మే నిత్యం జలం సర్వత్ర సర్వదా .

ఓం నః ఓం పాతు మే నిత్యం తేజఃపుంజో యథా తథా .. 16..

ఓం ప్ర ఓం పాతు మే నిత్యమనిలం కార్యకారణం .

ఓం చో ఓం పాతు మే నిత్యమాకాశం శివసన్నిభం .. 17..

ఓం ద ఓం పాతు మే జిహ్వాం జపయజ్ఞస్య కారణం .

ఓం యాత్ ఓం మే నిత్యం శివజ్ఞానమయం సదా .. 18..

తత్త్వాని పాతు మే నిత్యం గాయత్రీ పరదైవతం .

కృష్ణా మే సతతం పాతు బ్రహ్మాణీ భూర్భువఃస్వరోం .. 19..

ఓం అస్య శ్రీగాయత్రీకవచస్య పరబ్రహ్మ ఋషిః

ఋగ్యజుఃసామాథర్వాణశ్ఛందాంసి, బ్రహ్మా దేవతా,

ధర్మార్థకామమోక్షార్థం జపే వినియోగః ..

ఓం భూర్భువఃస్వః తత్సవితుర్వరేణ్యం భర్గో దేవస్య ధీమహి .

ధియో యో నః ప్రచోదయాత్ .

కామక్రోధాదికం సర్వం స్మరణాద్యాతి దూరతః .

ఇదం కవచమజ్ఞాత్వా బ్రహ్మవిద్యాం జపేద్యది .. 20..

శతకోటిజపేనాపి న సిద్ధిర్జాయతే ప్రియే .

గాయత్రీకవచాత్సర్వం స్మరణాత్సిధ్యతి ధ్రువం .. 21..

పఠిత్వా కవచం విప్రో గాయత్రీం సకృదుచ్చరేత్ .

సర్వపాపవినిర్ముక్తో జీవన్ముక్తో భవేద్విజః .. 22..

ఇదం కవచమజ్ఞాత్వా త్వన్యద్యః కవచం పఠేత్ .

సర్వం తస్య వృథా దేవి త్రైలోక్యమంగలాదికం .. 23..

గాయత్రీ కవచం యస్య జిహ్వాయాం విద్యతే సదా .

తదాఽమృతమయీ జిహ్వా పవిత్రా జపపూజనే .. 24..

ఇదం కవచమజ్ఞాత్వా బ్రహ్మవిద్యాం జపేద్యది .

వ్యర్థం భవతి చార్వంగి తజ్జపో వనరోదనం .. 25..

బ్రహ్మహత్యా సురాపానం స్తేయం గుర్వంగనాగమః .

మహాంతి పాతకాన్యస్య స్మరణాద్యాంతి దూరతః .. 26..

నశ్వరం మాంసమేదోఽస్థిమజ్జాశుక్రవినిర్మితం .. 27..

వాతపిత్తకఫైర్యుక్తం స్థూలదేహం తదుచ్యతే .

సూక్ష్మం జ్యోతిర్మయం దేహం పంచభూతాత్మకం విదుః .. 28..

మహాపద్మవనాంతస్థం సర్వావయవసంయుతం .

ఆధారదేహసంబంధాద్గాయత్రీ బ్రహ్మణః స్వయం .. 29..

ఏతదేవ పరం బ్రహ్మ కథితే ఉభయాత్మకే .

బ్రాహ్మణస్యైవ జీవాత్మా గాయత్రీసహితో వపుః .. 30..

ఆత్మనాం హృదయాంభోజే ప్రదీపకలికోపమం .

నిర్ధూమం చ యథా జ్యోతిస్తైలాగ్నివర్తియోగతః .. 31..

తజ్జ్యోతిః పరమం బ్రహ్మ శుభదం నాత్ర సంశయః .

గాయత్రీకవచం న్యాసం మాతృకాస్థానసంధిషు .. 32..

స కృత్వా బ్రాహ్మణశ్రేష్ఠ చాన్యన్యాసం సమాచరేత్ .

అన్యన్యాసే తథా సిద్ధిరన్యథాయాఽరణ్యరోదనం .. 33..

గాయత్రీన్యాసమాత్రేణ పరబ్రహ్మమయో ద్విజః .

ఇదం కవచమజ్ఞాత్వా బ్రహ్మచర్యం కరోతి యః .. 34..

బ్రహ్మచర్యం భవేద్వ్యర్థం గాయత్రీకవచం వినా .

కవచస్య ప్రసాదేన బ్రాహ్మణో జ్వలదగ్నివత్ .. 35..

కవచం పరమేశాని సృష్టిస్థితిలయాత్మకం .

కవచం బ్రాహ్మణ ఇదం ప్రాతరుత్థాయ యః పఠేత్ .. 36..

గాయత్రీం స సకృత్స్మృత్వా జపలక్షఫలం భవేత్ .

గాయత్రీం దశధా జప్త్వా దశలక్షఫలం భవేత్ .. 37..

ఏవం క్రమేణ గాయత్రీం శతధా ప్రజపేద్యది .

శతలక్షఫలం ప్రాప్య విహరేద్దేవవద్భువి .. 38

సూర్యేందోర్గ్రహణే చేదం పఠిత్వా కవచం ద్విజః .

సకృద్యది జపేద్విద్యాం గాయత్రీం పరమాక్షరాం .. 39..

తత్క్షణాత్తు భవేత్సిద్ధో బ్రహ్మసాయుజ్యమాప్నుయాత్ .

ఇదం కవక్షమజ్ఞాత్వా గాయత్రీం ప్రజపేత్తు యః .. 40..

జప ఏవ వృథా తస్య నిస్తేజో న చ సిద్ధిదః .

యః పఠేత్కవచం దేవి సతతం శివసన్నిధౌ .. 41..

విష్ణుదేవస్య కవచం ప్రజపేచ్ఛక్తిసన్నిధౌ .

తేజఃపుంచమయో విప్రస్తత్క్షణాజ్జాయతే ధ్రువం .. 42..

ఇతి శ్రీరుద్రయామలే పార్వతీశ్వరసంవాదే గాయత్రీకవచం సంపూర్ణం ..

గాయత్రీ సంహితా

ఆది శక్తిరితి విష్ణోస్తామహం ప్రణమామి హి .

సర్గః స్థితిర్వినాశశ్చ జాయంతే జగతోఽనయా .. 1..

నాభి-పద్మ-భువా విష్ణోర్బ్రహ్మణా నిర్మితం జగత్ .

స్థావరం జంగమం శక్త్యా గాయత్ర్యా ఏవ వై ధ్రువం .. 2..

చంద్రశేఖర కేశేభ్యో నిర్గతా హి సురాపగా .

భగీరథం తతారైవ పరివారసమం యథా .. 3..

జగద్ధాత్రీ సముద్భూయ యా హృన్మానసరోవరే .

గాయత్రీ సకులం పారం తథా నయతి సాధకం .. 4..

సాస్తి గంగైవ జ్ఞానాఖ్యసునీరేణ సమాకులా .

జ్ఞాన గంగా తు తాం భక్త్యా వారం-వారం నమామ్యహం .. 5..

ఋషయో వేద-శాస్త్రాణి సర్వే చైవ మహర్షయః .

శ్రద్ధయా హృది గాయత్రీం ధారయంతి స్తువంతి చ .. 6..

హ్రీం శ్రీం క్లీం చేతి రూపైస్తు త్రిభిర్వా లోకపాలినీ .

భాసతే సతతం లోకే గాయత్రీ త్రిగుణాత్మికా .. 7..

గాయత్ర్యైవ మతా మాతా వేదానాం శాస్త్రసంపదాం .

చత్వారోఽపి సముత్పన్నా వేదాస్తస్యా అసంశయం .. 8..

పరమాత్మనస్తు యా లోకే బ్రహ్మ శక్తిర్విరాజతే .

సూక్ష్మా చ సాత్త్వికీ చైవ గాయత్రీత్యభిధీయతే .. 9..

ప్రభావాదేవ గాయత్ర్యా భూతానామభిజాయతే .

అంతఃకరణేషు దేవానాం తత్త్వానాం హి సముద్భవః .. 10..

గాయత్ర్యుపాసనాకరణాదాత్మశక్తిర్వివర్ధతే .

ప్రాప్యతే క్రమశోఽజస్య సామీప్యం పరమాత్మనః .. 11..

శౌచం శాంతిర్వివేకశ్చైతల్లాభ త్రయమాత్మికం .

పశ్చాదవాప్యతే నూనం సుస్థిరం తదుపాసకం .. 12..

కార్యేషు సాహసః స్థైర్యం కర్మనిష్ఠా తథైవ చ .

ఏతే లాభాశ్చ వై తస్మాజ్జాయంతే మానసాస్త్రయః .. 13..

పుష్కలం ధన-సంసిద్ధిః సహయోగశ్చ సర్వతః .

స్వాస్థ్యం వా త్రయ ఏతే స్యుస్తస్మాల్లాభాశ్చ లౌకికాః .. 14..

కాఠిన్యం వివిధం ఘోరం హ్యాపదాం సంహతిస్తథా .

శీఘ్రం వినాశతాం యాంతి వివిధా విఘ్నరాశయః .. 15..

వినాశాదుక్త శత్రూణామంతః శక్తిర్వివర్ధతే .

సంకటానామనాయాసం పారం యాతి తయా నరః .. 16..

గాయత్ర్యుపాసకస్వాంతే సత్కామా ఉద్భవంతి హి .

తత్పూర్తయేఽభిజాయంతే సహజం సాధనాన్యపి .. 17..

త్రుటయః సర్వథా దోషా విఘ్నా యాంతి యదాంతతాం .

మానవో నిర్భయం యాతి పూర్ణోన్నతి పథం తదా .. 18..

బాహ్యంచాభ్యంతరం త్వస్య నిత్యం సన్మార్గగామినః .

ఉన్నతేరుభయం ద్వారం యాత్యున్ముక్తకపాటతాం .. 19..

అతః స్వస్థేన చిత్తేన శ్రద్ధయా నిష్ఠయా తథా .

కర్తవ్యావిరతం కాలే గాయత్ర్యాః సముపాసనా .. 20..

దయాలుః శక్తి సంపన్నా మాతా బుద్ధిమతీ యథా .

కల్యాణం కురుతే హ్యేవ ప్రేమ్ణా బాలస్య చాత్మనః .. 21..

తథైవ మాతా లోకానాం గాయత్రీ భక్తవత్సలా .

విదధాతి హితం నిత్యం భక్తానాం ధ్రువమాత్మనః .. 22..

కుర్వన్నపి త్రుటీర్లోకే బాలకో మాతరం ప్రతి .

యథా భవతి కశ్చిన్న తస్యా అప్రీతిభాజనః .. 23..

కుర్వన్నపి త్రుటీర్భక్తః క్వచిత్ గాయత్ర్యుపాసనే .

న తథా ఫలమాప్నోతి విపరీతం కదాచన .. 24..

అక్షరాణాం తు గాయత్ర్యా గుంఫనం హ్యస్తి తద్విధం .

భవంతి జాగృతా యేన సర్వా గుహ్యాస్తు గ్రంథయః .. 25..

జాగృతా గ్రంథయస్త్వేతాః సూక్ష్మాః సాధకమానసే .

దివ్యశక్తిసముద్భూతిం క్షిప్రం కుర్వంత్యసంశయం .. 26..

జనయంతి కృతే పుంసామేతా వై దివ్యశక్తయః .

వివిధాన్ వై పరిణామాన్ భవ్యాన్ మంగలపూరితాన్ .. 27..

మంత్రస్యోచ్చారణం కార్యం శుద్ధమేవాప్రమాదతః .

తదశక్తో జపేన్నిత్యం సప్రణవాస్తు వ్యాహృతీః .. 28..

ఓమితి ప్రణవః పూర్వం భూర్భువః స్వస్తదుత్తరం .

ఏషోక్తా లఘు గాయత్రీ విద్వద్భిర్వేదపండితైః .. 29..

శుద్ధం పరిధానమాధాయ శుద్ధే వై వాయుమండలే .

శుద్ధ దేహమనోభ్యాం వై కార్యా గాయత్ర్యుపాసనా .. 30..

దీక్షామాదాయ గాయత్ర్యా బ్రహ్మనిష్ఠాగ్రజన్మనా .

ఆరభ్యతాం తతః సమ్యగ్విధినోపాసనా సతా .. 31..

గాయత్ర్యుపాసనాముక్త్వా నిత్యావశ్యకకర్మసు .

ఉక్తస్తత్ర ద్విజాతీనాం నానధ్యాయో విచక్షణైః .. 32..

ఆరాధయంతి గాయత్రీం న నిత్యం యే ద్విజన్మనః .

జాయంతే హి స్వకర్మభ్యస్తే చ్యుతా నాత్ర సంశయః .. 33..

శూద్రాస్తు జన్మనా సర్వే పశ్చాద్యాంతి ద్విజన్మతాం .

గాయత్ర్యైవ జనాః సాకం హ్యుపవీతస్య ధారణాత్ .. 34..

ఉచ్చతా పతితానాం చ పాపినాం పాపనాశనం .

జాయేతే కృపయైవాస్యాః వేదమాతురనంతయా .. 35..

గాయత్ర్యా యా యుతా సంధ్యా బ్రహ్మసంధ్యా తు సా మతా .

కీర్తితం సర్వతః శ్రేష్ఠం తస్యానుష్ఠానమాగమైః .. 36..

ఆచమనం శిఖాబంధః ప్రాణాయామోఽఘమర్షణం .

న్యాసశ్చోపాసనాయాం తు పంచ కోషా మతా బుధైః .. 37..

ధ్యానతస్తు తతః పశ్చాత్ సావధానేన చేతసా .

జప్యా సతతం తులసీ మాలయా చ ముహుర్ముహుః .. 38..

ఏక వారం ప్రతిదినం న్యూనతో న్యూనసంఖ్యకం .

ధీమాన్మంత్ర శతం నూనం నిత్యమష్టోత్తరం జపేత్ .. 39..

బ్రాహ్మే ముహూర్తే ప్రాఙ్ముఖో మేరుదండం ప్రతన్య హి .

పద్మాసనం సమాసీనః సంధ్యావందనమాచరేత్ .. 40..

దైన్యరుక్ శోక చింతానాం విరోధాక్రమణాపదాం .

కార్యం గాయత్ర్యనుష్ఠానం భయానం వారణాయ చ .. 41..

జాయతే సా స్థితిరస్మాన్మనోఽభిలాషయాన్వితా .

యతః సర్వేఽభిజాయంతే యథా కాలం హి పూర్ణతాం .. 42..

అనుష్ఠానాత్తు వై తస్మాద్గుప్తాధ్యాత్మిక-శక్తయః .

చమత్కారమయా లోకే ప్రాప్యంతేఽనేకధా బుధైః .. 43..

సపాదలక్షమంత్రాణాం గాయత్ర్యా జపనం తు వై .

ధ్యానేన విధినా చైవ హ్యనుష్ఠానం ప్రచక్షతే .. 44 .

పంచమ్యాం పూర్ణిమాయాం వా చైకాదశ్యాం తథైవ హి .

అనుష్ఠానస్య కర్తవ్యం ఆరంభః ఫల-ప్రాప్తయే .. 45..

మాసద్వయేఽవిరామం తు చత్వారింషట్ దినేషు వా .

పూరయేత్తదనుష్ఠానం తుల్యసంఖ్యాసు వై జపన్ .. 46..

తస్యాః ప్రతిమాం సుసంస్థాప్య ప్రేమ్ణా శోభన-ఆసనే .

గాయత్ర్యాస్తత్ర కర్తవ్యా సత్ప్రతిష్ఠా విధానతః .. 47

తద్విధాయ తతో దీప-ధూప-నైవేద్య-చందనైః .

నమస్కృత్యాక్షతేనాపి తస్యాః పూజనమాచరేత్ .. 48..

పూజనానంతరం విజ్ఞః భక్త్యా తజ్జపమారభేత్ .

జపకాలే తు మనః కార్యం శ్రద్ధాన్వితమచంచలం .. 49..

కార్యతో యది చోత్తిష్ఠేన్మధ్య ఏవ తతః పునః .

కర-ప్రక్షాలనం కృత్వా శుద్ధైరంగైరుపావిశేత్ .. 50..

ఆద్యశక్తిర్వేదమాతా గాయత్రీ తు మదంతరే .

శక్తికల్లోలసందోహాన్ జ్ఞానజ్యోతిశ్చ సంతతం .. 51..

ఉత్తరోత్తరమాకీర్య ప్రేరయంతి విరాజతే .

ఇత్యేవావిరతం ధ్యాయన్ ధ్యానమగ్నస్తు తాం జపేత్ .. 52..

చతుర్వింశతిలక్షాణాం సతతం తదుపాసకః .

గాయత్రీణామనుష్ఠానాద్గాయత్ర్యాః సిద్ధిమాప్నుతే .. 53

సాధనాయై తు గాయత్ర్యా నిశ్ఛలేన హి చేతసా .

వరణీయః సదాచార్యః సాధకేన సుభాజనః .. 54..

లఘ్వనుష్ఠానతో వాపి మహానుష్ఠానతోఽథవా .

సిద్ధిం విందతి వై నూనం సాధకః సానుపాతికాం .. 55..

ఏక ఏవ తు సంసిద్ధః గాయత్రీ మంత్ర ఆదిశత్ .

సమస్త-లోకమంత్రాణాం కార్యసిద్ధేస్తు పూరకః .. 56..

అనుష్ఠానావసానే తు అగ్నిహోత్రో విధీయతాం .

యథాశక్తి తతో దానం బ్రహ్మభోజస్తతః ఖలు .. 57..

మహామంత్రస్య చాప్యస్య స్థానే స్థానే పదే పదే .

గూఢానంతోపదేశానాం రహస్యం తత్ర వర్తతే .. 58..

యో దధాతి నరశ్చైతానుపదేశాంస్తు మానసే .

జాయతే హ్యుభయం తస్య లోకమానందసంకులం .. 59..

సమగ్రామపి సామగ్రీమనుష్ఠానస్య పూజితాం .

స్థానే పవిత్ర ఏవైతాం కుత్రచిద్ధి విసర్జయేత్ .. 60..

సత్పాత్రో యది వాచార్యో న చేత్సంస్థాపయేత్తదా .

నారికేలం శుచిం వృత్వాచార్యభావేన చాసనే .. 61..

ప్రాయశ్చిత్తం మతం శ్రేష్ఠం త్రుటీనాం పాపకర్మణాం .

తపశ్చర్యైవ గాయత్ర్యాః నాతోఽన్యద్దృశ్యతే క్వచిత్ .. 62..

సేవ్యాః స్వాత్మసముద్ధ్యర్థం పదార్థాః సాత్త్వికాః సదా .

రాజసాశ్చ ప్రయోక్తవ్యాః మనోవాంఛితపూర్తయే .. 63..

ప్రాదుర్భావస్తు భావానాం తామసానాం విజాయతే .

తమోగుణానామర్థానాం సేవనాదితి నిశ్చయః .. 64..

మాలాసన-సమిధ్యజ్ఞ-సామగ్ర్యర్చన-సంగ్రహః .

గుణత్రయానుసారం హి సర్వే వై దదతే ఫలం .. 65..

ప్రాదుర్భవంతి వై సూక్ష్మాశ్చతుర్వింశతి శక్తయః .

అక్షరేభ్యస్తు గాయత్ర్యా మానవానాం హి మానసే .. 66..

ముహూర్తా యోగదోషా వా యేఽప్యమంగలకారిణః .

భస్మతాం యాంతి తే సర్వే గాయత్ర్యాస్తీవ్రతేజసా .. 67..

ఏతస్మాత్తు జపాన్నూనం ధ్యానమగ్నేన చేతసా .

జాయతే క్రమశశ్చైవ షట్ చక్రాణాం తు జాగృతిః .. 68..

షట్ చక్రాణి యదైతాని జాగృతాని భవంతి హి .

షట్ సిద్ధయోఽభిజాయంతే చక్రైరేతైర్నరస్య వై .. 69..

అగ్నిహోత్రం తు గాయత్రీ మంత్రేణ విధివత్ కృతం .

సర్వేష్వవసరేష్వేవ శుభమేవ మతం బుధైః .. 70..

యదావస్థాసు స్యాల్లోకే విపన్నాసు తదా తు సః .

మౌనం మానసికం చైవ గాయత్రీ-జపమాచరేత్ .. 71..

తదనుష్ఠానకాలే తు స్వశక్తిం నియమేజ్జనః .

నిమ్నకర్మసు తాః ధీమాన్ న వ్యయేద్ధి కదాచన .. 72

నైవానావశ్యకం కార్యమాత్మోద్ధారస్థితేన చ .

ఆత్మశక్తేస్తు ప్రాప్తాయాః యత్ర తత్ర ప్రదర్శనం .. 73..

ఆహారే వ్యవహారే చ మస్తిష్కేఽపి తథైవ హి .

సాత్త్వికేన సదా భావ్యం సాధకేన మనీషిణా ..  74..

కర్తవ్యధర్మతః కర్మ విపరీతం తు యద్భవేత్ .

తత్సాధకస్తు ప్రజ్ఞావానాచరేన్న కదాచన .. 75..

పృష్ఠతోఽస్యాః సాధనాయా రాజతేఽతితరం సదా .

మనస్విసాధకానాం హి బహూనాం సాధనాబలం .. 76..

అల్పీయస్యా జగత్యేవం సాధనాయాస్తు సాధకః .

భగవత్యాశ్చ గాయత్ర్యాః కృపాం ప్రాప్నోత్యసంశయం .. 77..

ప్రాణాయామే జపన్ లోకః గాయత్రీం ధ్రువమాప్నుతే .

నిగ్రహం మనసశ్చైవ ఇంద్రియాణాం హి సంపదాం .. 78..

మంత్రం విభజ్య భాగేషు చతుర్షు సుబుధస్తదా .

రేచకం కుంభకం బాహ్యం పూరకం కుంభకం చరేత్ .. 79..

యథా పూర్వస్థితంచైవ న ద్రవ్యం కార్య-సాధకం .

మహాసాధనతోఽప్యస్మాన్నాజ్ఞో లాభం తథాప్నుతే .. 80..

సాధకః కురుతే యస్తు మంత్రశక్తేరపవ్యయః .

తం వినాశయతి సైవ సమూలం నాత్ర సంశయః .. 81..

సతతం సాధనాభిర్యో యాతి సాధకతాం నరః .

స్వప్నావస్థాసు జాయంతే తస్య దివ్యానుభూతయః .. 82..

సఫలః సాధకో లోకే ప్రాప్నుతేఽనుభవాన్ నవాన్ .

విచిత్రాన్ వివిధాఀశ్చైవ సాధనాసిద్ధ్యనంతరం .. 83..

భిన్నాభిర్విధిభిర్బుద్ధ్యా భిన్నాసు కార్యపంక్తిషు .

గాయత్ర్యాః సిద్ధమంత్రస్య ప్రయోగః క్రియతే బుధైః .. 84..

చతుర్వింశతివర్ణైర్యా గాయత్రీ గుంఫితా శ్రుతౌ .

రహస్యముక్తం తత్రాపి దివ్యైః రహస్యవాదిభిః .. 85..

రహస్యముపవీతస్య గుహ్యాద్గుహ్యతరం హి యత్ .

అంతర్హితం తు తత్సర్వం గాయత్ర్యాం విశ్వమాతరి .. 86..

అయమేవ గురోర్మంత్రః యః సర్వోపరి రాజతే .

బిందౌ సింధురివాస్మింస్తు జ్ఞానవిజ్ఞానమాశ్రితం .. 87..

ఆభ్యంతరే తు గాయత్ర్యా అనేకే యోగసంచయాః .

అంతర్హితా విరాజంతే కశ్చిదత్ర న సంశయః .. 88..

ధారయన్ హృది గాయత్రీం సాధకో ధౌతకిల్బిషః .

శక్తీరనుభవత్య్గ్రాః స్వస్మిన్నేవ హ్యలౌకికాః .. 89..

ఏతాదృశ్యస్తు వార్తా భాసంతేఽల్పప్రయాసతః .

యాస్తు సాధారణో లోకో జ్ఞాతుమర్హతి నైవ హి .. 90..

ఏతాదృశ్యస్తు జాయంతే తన్మనస్యనుభూతయః .

యాదృశ్యో న హి దృశ్యంతే మానవేషు కదాచన .. 91..

ప్రసాదం బ్రహ్మజ్ఞానస్య యేఽన్యేభ్యో వితరంత్యపి .

ఆసాదయంతి తే నూనం మానవాః పుణ్యమక్షయం .. 92..

గాయత్రీ సంహితా హ్యేషా పరమానందదాయినీ .

సర్వేషామేవ కష్టానాం వారణాయాస్త్యలం భువి .. 93..

శ్రద్ధయా యే పఠంత్యేనాం చింతయంతి చ చేతసా .

ఆచరంత్యానుకూల్యేన భవబాధాం తరంతి తే .. 94..

గాయత్రీ వందనా

ఓంకారరూపా త్రిపదా త్రయీ చ త్రిదేవవంద్యా త్రిదివాధిదేవీ .

త్రిలోకకర్త్రీ త్రితయస్య భర్త్రీ త్రైకాలికీ సంకలనావిధాత్రీ .. 1..

త్రైగుణ్యభేదాత్ త్రివిధస్వరూపా త్రైవిధ్యయుక్తస్య ఫలస్య దాత్రీ .

తథాపవర్గస్య విధాయినీ త్వం దయార్ద్రదృక్కోణవిలోకనేన .. 2..

త్వం వాఙ్మయీ విశ్వవదాన్యమూర్తిర్విశ్వస్వరూపాపి హి విశ్వగర్భా .

తత్త్వాత్మికా తత్త్వపరాత్పరా చ దృక్తారికా తారకశంకరస్య .. 3..

భూతం చ భవ్యం సకలం యదేతత్ త్వత్తః పరం కుత్ర న కించిదస్తి .

ఆద్యామనాద్యామనవద్యవంద్యాం పధ్యంతి విజ్ఞాః ప్రవదంతి చ త్వాం .. 4..

విశ్వాత్మికే విశ్వవిలాసభూతే విశ్వాశ్రయే విశ్వవికాశధామే .

విభూత్యధిష్ఠాత్రి విభూతిదాత్రి పదే త్వదీయే ప్రణతిర్మదీయా .. 5..

త్వం నిత్యసర్గస్య విసర్గభూతా దైనందినస్యాపి చ ప్రాకృతస్య .

విశ్వస్య యోనిర్హి మతా తథాపి సముద్రహైమాద్రివిరంచిజాతా .. 6..

భోగస్య భోక్త్రీ కరణస్య కర్త్రీ ధాత్వావ్యయప్రత్యయలింగశూన్యా .

జ్ఞేయా న వేదైర్న పురాణభేదైర్ధ్యేయా ధియా ధారణయాదిశక్తిః .. 7..

కించిద్యదేతత్తవమూర్తిరేషా తథాప్యదృశ్యాఖిలసాధనైశ్చ .

సాంతా నిరంతా సదసత్స్వరూపా స్ఫుటాస్ఫుటా స్ఫోటవికాశరూపా .. 8..

యస్మిన్ యతో యస్య చ యేన యచ్చ కస్మిన్కుతః కస్య చ కేన కించ .

ఇత్యాదిశబ్దైర్న విశోధనీయా కుతః కథం సా పరిబోధనీయా .. 9..

నిత్యా సదా సర్వగతాఽప్యలక్ష్యా విష్ణోర్విధేః శంకరతోఽప్యభిన్నా .

శక్తిస్వరూపా జగతోఽస్య శక్తిర్జ్ఞాతుం న శక్యా కరణాదిభిస్త్వం .. 10..

త్యక్తస్త్వయాత్యంతనిరస్తబుద్ధిర్నరో భవేద్ వైభవభాగ్యహీనః .

హిమాలయాదప్యధికోత్రతోఽపి జనైస్సమస్తైరపి లంఘనీయః .. 11..

శివే హరౌ బ్రహ్మణి భానుచంద్రయోశ్చరాచరే గోచరకేఽప్యగోచరే .

సూక్ష్మాతిసూక్ష్మే మహతో మహత్తమే కలా త్వదీయా విమలా విరాజతే .. 12..

సుధామరందం తవ పాదపద్మం స్వే మానసే ధారణయా నిధాయ .

బుద్ధిర్మిలిందీభవతాన్మదీయా నాతః పరం దేవి వరం సమీహే .. 13..

దీనేషు హీనేషు గతాదరేషు స్వాభావికీ తే కరుణా ప్రసిద్ధా .

అతః శరణ్యే శరణం ప్రపన్నం గృహాణ మాతః ప్రణయాంజలిం మే .. 14..

పఠతః శృణ్వతో వాపి సకృత్ప్రణమతస్తథా .

భవ్యాయ జగతో భూయాత్ ప్రణయస్యామంజలిః .. 15..

.. ఇతి గాయత్రీవందనా సమాప్తా ..

రచనా - పం ధ్యామనాథజీ శుక్ల, ``ద్విజశ్యామ''

గాయత్రీ లహరీ

అమందానందేనామరవరగృహే వాస నిరతాం-

నరం గాయంతం యా భువి భవభయాత్త్రాయత ఇహ .

సురేశైః సంపూజ్యాం మునిగణనుతాం తాం సుఖకరీం

నమామో గాయత్రీం నిఖిలమనుజాఘౌఘశమనీం .. 1..

అవామా సంయుక్తం సకలమనుజైర్జాప్యమభితో-

హ్యపాయాత్పాయాద్భూరథ భువి భువః స్వః పదమితి .

పదం తన్మే పాదావవతు సవితుశ్చైవ జఘనే-

వరేణ్యం శ్రోణిం మే సతతమవతాన్నాభిమపి చ .. 2..

పదం భర్గో దేవస్య మమ హృదయం ధీమహి తథా-

గలంపాయాన్నిత్యం ధియ ఇహ పదం చైవ రసనాం .

తథా నేత్రే యోఽవ్యాదలకమవతాన్నః పదమితి-

శిరోదేశం పాయాన్మమ తు పరితశ్చాంతిమపదం .. 3..

అయే దివ్యే దేవి త్రిదశనివహైర్వందితపదే

న శేకుస్త్వాం స్తోతుం భగవతి మహాంతోఽపి మునయః .

కథంకారం తర్హిస్తుతితతిరియం మే శుభతరా-

తథా పూర్ణా భూయాత్ త్రుటిపరియుతా భావరహితా .. 4..

భజంతం నిర్వ్యాజం తవ సుఖదమంత్రం విజయినం

జనం యావజ్జీవం జపతి జనని త్వం సుఖయసి .

న వా కామం కాచిత్ కలుషకణికాఽపి స్పృశతి తం

సంసారం సంసారం సరతి సహసా తస్య సతతం .. 5..

దధానాం హ్యాధానం సితకువలయాస్ఫాలనరుచాం

స్వయం విభ్రాజంతీం త్రిభువనజనాహ్లాదనకరీం .

అలం చాలం చాలం మమ చకితచిత్తం సుచపలం

చలచ్చంద్రాస్యే త్వద్వదనరుచమాచామయ చిరం .. 6..

లలామే భాలే తే బహుతర విశాలేఽతి విమలే

కలాచంచచ్చాంద్రీ రుచిరతిలకావేందుకలయా .

నితాంతం గోమాయా నివిడ తమసో నాశ వ్యసనా

తమో మే గాఢం హి హృదయసదనస్థం గ్లపయతు .. 7..

అయే మాతః కింతే చరణ-శరణం సంశ్రయవతాం-

జనానామంతస్థో వృజిన హుతభుక్ ప్రజ్వలతి యః .

తదస్యాశు సమ్యక్ ప్రశమనహితాయైవ విధృతం-

కరే పాత్రం పుణ్యం సలిలభరితం కాష్ఠరచితం .. 8..

అథాహోస్విన్మాతః సరిదధిపతేః సారమఖిలం

సుధారూపం కూపం లఘుతరమనూపం కలయతి .

స్వభక్తేభ్యో నిత్యం వితరసి జనోద్ధారిణి శుభే

విహీనే దీనే మయ్యపి కృపయ కించిత్ కరుణయా .. 9..

సదైవ త్వత్పాణౌ విధృతమరవిందం ద్యుతికరం

త్విదం దర్శం దర్శం రవిశశిసమం నేత్రయుగలం .

విచింత్య స్వాం వృత్తిం భ్రమవిషమజాలేఽస్తి పతిత-

మిదం మన్యే నోచేత్ కథమితి భవేదర్ధ-వికచం .. 10..

స్వయం మాతః కింవా త్వమసి జలజానామపి ఖని-

ర్యతస్తే సర్వాంగం కమలమయమేవాస్తి కిము నో .

తథా భీత్యా తస్మాచ్ఛరణముపయాతః కమలరాట్ -

ప్రయుంజానోఽశ్రాంతం భవతి తదిహైవాసనవిధౌ .. 11..

దివౌకోభిర్వంద్యే వికసిత సరోజాక్షి సుఖదే

కృపాదృష్టేర్వృష్టిః సునిపతతి యస్యోపరి తవ .

తదీయా వాంఛా కిం ద్రుతమను విధేయాస్తి సకలా

అతోమంతోస్తంతూన్ మమ సపది ఛిత్వాఽమ్బ సుఖయ .. 12..

కరేఽక్షాణాం మాలా ప్రవిలసతి యా తేఽతివిమలే

కిమర్థం సా కాన్ వా గణయసి జనాన్ భక్తి నిరతాన్ .

జపంతీ కం మంత్రం ప్రశమయసి దుఃఖం జనిజుషా

మయే కా వా వాంఛా తవ వరివృతి త్వత్ర వరదే .. 13..

న మన్యే ధన్యేఽహం త్వవితథమిదం లోకగదితం

మమాత్రోక్తిర్మత్వా కమలమివ ఫుల్లం తవ కరం .

విజృంభా సంయుక్త ద్యుతిమయమిదం కోకనదమి-

త్యరం జానానేయం మధుకరతతిః సంవిలసతి .. 14..

మహామోహాంభోధౌ మమ నిపతితా జీవనతరి-

ర్నిరాలంబా దోలా చలిత దురవస్థామధిగతా .

జలావర్త వ్యాలో గ్రసితుమభితో వాంఛతి చ తాం

కరాలంబం దత్వా భగవతి ద్రుతం తారయ శివే .. 15 .

దధానాసిత్వం యత్ స్వవపుషి పయోధారి-యుగల-

మితి శ్రుత్వా లోకైర్మమ మనసి చింతా సమభవత్ .

కథం స్యాత్ సా తస్మాదలక లతికా మస్తక భువి

శిరోద్యాం హృద్యేయం జలదపటలీ ఖేలతి కిల .. 16..

తథా తత్రైవోపస్థితిమపి నిశీథిన్యధిపతేః

ప్రపశ్యామి శ్యామే సహ సహచరైస్తారక గణైః .

అహోరాత్రః క్రీడా పరవశమితాస్తేఽపి చకితా-

శ్చిరం చిక్రీడంతే తదపి మహదాశ్చర్య-చరితం .. 17..

యదాహుస్తం ముక్తా పటల జటితం రత్న ముకుటం

న ధత్తే తేషాం సా వచనరచనా సాధుపదవీం .

నిశైషా కేశాస్తు నహి విగత వేశా ధ్రువమితి

ప్రసన్నాఽధ్యాసన్నా విధుపరిషదేషా విలసతి .. 18..

త్రిబీజే హే దేవి త్రి ప్రణవసహితే త్ర్యక్షరయుతే

త్రిమాత్రా రాజంతే భువనవిభవే హ్యోమితిపదే .

త్రికాలం సంసేవ్యే త్రిగుణవతి చ త్రిస్వరమయి

త్రిలోకేశైః పూజ్యే త్రిభువనభయాత్త్రాహి సతతతం .. 19..

న చంద్రో నైవేమే నభసి వితతా తారకగణాః

త్విషాం రాశీ రమ్యా తవ చరణయోరంబునిచయే .

పతిత్వా కల్లోలైః సహ పరిచయాద్విస్తృతిమితా

ప్రభా సైవాఽనంతా గగనముకురే దీవ్యతి సదా .. 20..

త్వమేవ బ్రహ్మాణీ త్వమసి కమలా త్వం నగసుతా

త్రిసంధ్యం సేవంతే చరణయుగలం యే తవ జనాః .

జగజ్జాలే తేషాం నిపతిత జనానామిహ శుభే

సముద్ధారార్థం కిం మతిమతి మతిస్తే న భవతి .. 21..

అనేకైః పాపౌఘైర్లులిత వపుషం శోక సహితం

లుఠంతం దీనం మాం విమల పదయో రేణుషు తవ .

గలద్బాష్పం శశ్వద్ జనని సహసాశ్వాసనవచో

బ్రువాణోత్తిష్ఠ త్వం అమృతకణికాం పాస్యసి కదా .. 22..

న వా మాదృక్ పాపీ నహి తవ సమా పాపహరణీ

న దుర్బుద్ధిర్మాదృక్ న చ తవ సమా ధీ వితరిణీ .

న మాదృగ్ గర్విష్ఠో నహి తవ సమా గర్వహరణీ

హృది స్మృత్వా హ్యేవం మామయి కురు యథేచ్ఛా తవ యథా .. 23..

దరీధర్తి స్వాంతేఽక్షర వర చతుర్వింశతిమితం

త్వదంతర్మంత్రం యత్త్వయి నిహిత చేతో హి మనుజః .

సమంతాద్ భాస్వంతం భవతి భువి సంజీవనవనం

భవాంభోధేః పారం వ్రజతి స నితాంతం సుఖయుతః .. 24..

భగవతి లహరీయం రుద్రదేవ ప్రణీతా

తవ చరణ సరోజే స్థాప్యతే భక్తిభావైః .

కుమతితిమిరపంకస్యాంకమగ్నం సశంకం

అయి ఖలు కురు దత్వా వీతశంకం స్వమంకం .. 25..

.. ఇతి శ్రీ రుద్రదేవ విరచిత గాయత్రీ లహరీ సమాప్తా ..

గాయత్రీ రామాయణ

(గాయత్రీమంత్ర అక్షరాణాం(వర్ణానాం) శ్రీమద్ వాల్మీకిరామాయణే ప్రదర్శితాః)

తపస్స్వాధ్యాయనిరతం తపస్వీ వాగ్విదాం వరం .

నారదం పరిపప్రచ్ఛ వాల్మీకిర్మునిపుంగవం .. బాలకాండ 1.01.001.. 1..

స హత్వా రాక్షసాన్సర్వాన్ యజ్ఞఘ్నాన్ రఘునందనః .

ఋషిభిః పూజితస్తత్ర యథేంద్రో విజయీ పురా .. బాలకాండ 1.030.024.. 2..

విశ్వామిత్రః సరామస్తు శ్రుత్వా జనకభాషితం .

వత్స రామ ధనుః పశ్య ఇతి రాఘవమబ్రవీత్ .. బాలకాండ 1.067.012.. 3..

తుష్టావాస్య తదా వంశం ప్రవిశ్య చ విశాంపతేః .

శయనీయం నరేంద్రస్య తదాసాద్య వ్యతిష్ఠత .. అయోధ్యాకాండ 2.015.020.. 4..

వనవాసం హి సంఖ్యాయ వాసాంస్యాభరణాని చ .

భర్తారమనుగచ్ఛంత్యై సీతాయై శ్వశురో దదౌ .. అయోధ్యాకాండ 2.040.014.. 5..

రాజా సత్యం చ ధర్మశ్చ రాజా కులవతాం కులం .

రాజా మాతా పితా చైవ రాజా హితకరో నృణాం .. అయోధ్యాకాండ 2.067.034.. 6..

నిరీక్ష్య స ముహూర్తం తు దదర్శ భరతో గురుం .

ఉటజే రామమాసీనం జటామండలధారిణం .. అయోధ్యాకాండ 2.099.025.. 7..

యది బుద్ధిః కృతా ద్రష్టుమగస్త్యం తం మహామునిం .

అద్యైవ గమనే బుద్ధిం రోచయస్వ మహామతే .. అరణ్యకాండ 3.011.043.. 8..

భరతస్యార్యపుత్రస్య శ్వశ్రూణాం మమ చ ప్రభో .

మృగరూపమిదం వ్యక్తం విస్మయం జనయిష్యతి .. అరణ్యకాండ 3.043.018.. 9..

గచ్ఛ శీఘ్రమితో రామ సుగ్రీవం తం మహాబలం .

వయస్యం తం కురు క్షిప్రమితో గత్వాఽద్య రాఘవ .. అరణ్యకాండ 3.072.017.. 10..

దేశకాలౌ భజస్వాద్య క్షమమాణః ప్రియాప్రియే .

సుఖదుఃఖసహః కాలే సుగ్రీవవశగో భవ .. కిష్కింధాకాండ 4.022.020.. 11..

వందితవ్యాస్తతః సిద్ధాస్తపసా వీతకల్మషాః .

ప్రష్టవ్యా చాపి సీతాయాః ప్రవృత్తిర్వినయాన్వితైః .. కిష్కింధాకాండ 4.043.033.. 12..

స నిర్జిత్య పురీం లంకాం శ్రేష్ఠాం తాం కామరూపిణీం .

విక్రమేణ మహాతేజా హనూమాన్ కపిసత్తమః .. సుందరకాండ 5.04.001.. 13..

ధన్యా దేవాః సగంధర్వాః సిద్ధాశ్చ పరమర్షయః .

మమ పశ్యంతి యే వీరం రామం రాజీవలోచనం .. సుందరకాండ 5.026.041.. 14..

మంగలాభిముఖీ తస్య సా తదాసీన్మహాకపేః .

ఉపతస్థే విశాలాక్షీ ప్రయతా హవ్యవాహనం .. సుందరకాండ 5.053.026.. 15..

హితం మహార్థం మృదు హేతుసంహితం వ్యతీతకాలాయతిసంప్రతిక్షమం .

నిశమ్య తద్వాక్యముపస్థితజ్వరః ప్రసంగవానుత్తరమేతదబ్రవీత్ .. 6.010.027.. 16..

ధర్మాత్మా రక్షసశ్రేష్ఠః సంప్రాప్తోఽయం విభీషణః .

లంకైశ్వర్యమిదం శ్రీమాన్శ్రువం ప్రాప్నోత్యకంటకం .. యుద్ధకాండ 6.041.068.. 17..

యో వజ్రపాతాశనిసన్నిపాతాన్న చుక్షుభే నాపి చచాల రాజా .

స రామబాణాభిహతో భృశార్తశ్చచాల చాపం చ ముమోచ వీరః .. యుద్ధకాండ 6.059.139.. 18..

యస్య విక్రమమాసాద్య రాక్షసా నిధనం గతాః .

తం మన్యే రాఘవం వీరం నారాయణమనామయం .. యుద్ధకాండ 6.072.011.. 19..

న తే దదృశిరే రామం దహంతమపివాహినీం .

మోహితాః పరమాస్త్రేణ గాంధర్వేణ మహాత్మనా .. యుద్ధకాండ 6.093.026.. 20..

ప్రణమ్య దేవతాభ్యశ్చ బ్రాహ్మణేభ్యశ్చ మైథిలీ .

బద్ధాంజలిపుటా చేదమువాచాగ్నిసమీపతః .. యుద్ధకాండ 6.116.024.. 21..

చలనాత్పర్వతస్యైవ గణా దేవాశ్చ కంపితాః .

చచాల పార్వతీ చాపి తదాశ్లిష్టా మహేశ్వరం .. ఉత్తరకాండ 7.016.026.. 22..

దారాః పుత్రాః పురం రాష్ట్రం భోగాచ్ఛాదనభోజనం .

సర్వమేవావిభక్తం నౌ భవిష్యతి హరీశ్వర .. ఉత్తరకాండ 7.034.041.. 23..

యామేవ రాత్రిం శత్రుఘ్నః పర్ణశాలాం సమావిశత్ .

తామేవ రాత్రిం సీతాపి ప్రసూతా దారకద్వయం .. ఉత్తరకాండ 7.066.001.. 24..

ఇదం రామాయణం కృత్స్నం గాయత్రీబీజసంయుతం .

త్రిసంధ్యం యః పఠేన్నిత్యం సర్వపాపైః ప్రముచ్యతే ..

ఇతి గాయత్రీరామాయణం సంపూర్ణం .

గాయత్రీ మంజరీ

ఏకదా తు మహాదేవం కైలాశగిరిసంస్థితం .

పప్రచ్ఛ దేవీ వంద్యా విబుధమండలైః .. 1..

కతమం యోగమాసీనో యోగేశ త్వముపాససే .

యేన హి పరమాం సిద్ధిం ప్రాప్నువాన్ జగదీశ్వర .. 2..

శ్రుత్వా తు పార్వతీ వాచం మధుసిక్తాం శ్రుతిప్రియాం .

సమువాచ మహాదేవో విశ్వకల్యాణకారకః .. 3..

మహద్రహస్యం తద్గుప్తం యత్తు పృష్టం త్వయా ప్రియే .

తథాపి కథయిష్యామి స్నేహాత్తత్త్వామహం సమం .. 4..

గాయత్రీ వేద మాతాస్తి సాద్యా శక్తిర్మతా భువి .

జగతాం జననీ చైవ తాముపాసేఽహమేవ హి .. 5..

యౌగికానాం సమస్తానాం సాధనానాం తు హే ప్రియే .

గాయత్ర్యేవ మతా లోకే మూలాధారో విదాంవరైః .. 6..

అతి రహస్యమయ్యేషా గాయత్రీ తు దశ భుజా .

లోకేఽతి రాజతే పంచ ధారయంతి ముఖాని తు .. 7..

అతి గూఢాని సంశ్రుత్య వచనాని శివస్య చ .

అతి సంవృద్ధ జిజ్ఞాసా శివమూచే తు పార్వతీ .. 8..

పంచాస్య దశబాహూనామేతేషాం ప్రాణవల్లభ .

కృత్వా కృపాం కృపాలో త్వం కిం రహస్యం తు మే వద .. 9..

శ్రుత్వా త్వేతన్మహాదేవః పార్వతీవచనం మృదు .

తస్యాః శంకామపాకుర్వన్ ప్రత్యువాచ నిజాం ప్రియాం .. 10..

గాయత్ర్యాస్తు మహాశక్తిర్విద్యతే యా హి భూతలే .

అనన్య భావతో హ్యస్మిన్నోతప్రోతోఽస్తి చాత్మని .. 11..

బిభర్తి పంచావరణాన్ జీవః కోశాస్తు తే మతాః .

ముఖాని పంచ గాయత్ర్యాస్తానేవ వేద పార్వతి .. 12..

విజ్ఞానమయాన్నమయ-ప్రాణమయ-మనోమయాః .

తథానందమయశ్చైవ పంచ కోశాః ప్రకీర్తితాః .. 13..

ఏష్వేవ కోశకోశేషు హ్యనంతా ఋద్ధి సిద్ధయః .

గుప్తా ఆసాద్య యా జీవో ధన్యత్వమధిగచ్ఛతి .. 14..

యస్తు యోగీశ్వరో హ్యేతాన్ పంచ కోశాన్ను వేధతే .

స భవసాగరం తీర్త్వా బంధనేభ్యో విముచ్యతే .. 15..

గుప్తం రహస్యమేతేషాం కోషాణాం యోఽవగచ్ఛతి .

పరమాం గతిమాప్నోతి స ఏవ నాత్ర సంశయః .. 16..

లోకానాం తు శరీరాణి హ్యన్నాదేవ భవంతి ను .

ఉపత్యకాసు స్వాస్థ్యం చ నిర్భరం వర్తతే సదా .. 17..

ఆసనేనోపవాసేన తత్త్వ శుద్ధ్యా తపస్యయా .

చైవాన్నమయకోశస్య సంశుద్ధిరభిజాయతే .. 18..

ఐశ్వర్యం పురుషార్థశ్చ తేజ ఓజో యశస్తథా .

ప్రాణశక్త్యా తు వర్ధంతే లోకానామిత్యసంశయం .. 19..

పంచభిస్తు మహాప్రాణైర్లఘుప్రాణైశ్చ పంచభిః .

ఏతైః ప్రాణమయః కోశో జాతో దశభిరుత్తమః .. 20..

బంధేన ముద్రయా చైవ ప్రాణాయామేన చైవ హి .

ఏష ప్రాణమయః కోశో యతమానం తు సిద్ధ్యతి .. 21..

చేతనాయా హి కేంద్రంతు మనుష్యాణాం మనోమతం .

జాయతే మహతీత్వంతః శక్తిస్తస్మిన్ వశంగతే .. 22..

ధ్యాన-త్రాటక-తన్మాత్రా జపానాం సాధనైర్నను .

భవత్యుజ్జ్వలః కోశః పార్వత్యేష మనోమయః .. 23..

యథావత్ పూర్ణతో జ్ఞానం సంసారస్య చ స్వస్య చ .

నూనమిత్యేవ విజ్ఞానం ప్రోక్తం విజ్ఞానవేత్తృభిః .. 24..

సాధనా సోఽహమిత్యేషా తథా వాత్మానుభూతయః .

స్వరాణాం సంయమశ్చైవ గ్రంథిభేదస్తథైవ చ .. 25..

ఏషాం సంసిద్ధిభిర్నూనం యతమానస్య హ్యాత్మని .

ను విజ్ఞానమయః కోశః ప్రియే యాతి ప్రబుద్ధతాం .. 26..

ఆనందావరణోన్నత్యాత్యంతశాంతి-ప్రదాయికా .

తురీయావస్థితిర్లోకే సాధకం త్వధిగచ్ఛతి .. 27..

నాద బిందు కలానాం తు పూర్ణ సాధనయా ఖలు .

నన్వానందమయః కోశః సాధకే హి ప్రబుద్ధ్యతే .. 28..

భూలోకస్యాస్య గాయత్రీ కామధేనుర్మతా బుధైః .

లోక ఆశ్రయణేనామూం సర్వమేవాధిగచ్ఛతి .. 29..

పంచాస్యా యాస్తు గాయత్ర్యాః విద్యాం యస్త్వవగచ్ఛతి .

పంచతత్త్వ ప్రపంచాత్తు స నూనం హి ప్రముచ్యతే .. 30..

దశభుజాస్తు గాయత్ర్యాః ప్రసిద్ధా భువనేషు యాః .

పంచ శూల మహాశూలాన్యేతాః సంకేతయంతి హి .. 31..

దశభుజాన్నామేతాసాం యో రహస్యం తు వేత్తి యం సః .

త్రాసం శూలమహాశూలానాం నా నైవావగచ్ఛతి .. 32..

దృష్టిస్తు దోషసంయుక్తా పరేషామవలంబనం .

భయం చ క్షుద్రతాఽసావధానతా స్వార్థయుక్తతా .. 33..

అవివేకస్తథావేశస్తృష్ణాలస్యం తథైవ చ

ఏతాని దశ శూలాని శూలదాని భవంతి హి .. 34..

నిజైర్దశభుజైర్నూనం  శూలాన్యేతాని తు దశ .

సంహరతే హి గాయత్రీ లోకకల్యాణకారిణీ .. 35..

కలౌ యుగే మనుష్యాణాం శరీరాణీతి పార్వతి .

పృథ్వీ తత్త్వ ప్రధానాని జానాస్యేవ భవంతి హి .. 36..

సూక్ష్మతత్త్వ ప్రధానాన్యయుగోద్భూత నృణామతః .

సిద్ధీనాం తపసామేతే న భవంత్యధికారిణః .. 37..

పంచాంగ యోగ సంసిద్ధ్యా గాయత్ర్యాస్తు తథాపి తే .

తద్యుగానాం సర్వశ్రేష్ఠాం సిద్ధిం సంప్రాప్నువంతి హి .. 38..

గాయత్ర్యా వామమార్గీయం జ్ఞేయమత్యుచ్చసాధకైః .

ఉగ్రం ప్రచండమత్యంతం వర్తతే తంత్ర సాధనం .. 39..

అత ఏవ తు తద్గుప్తం రక్షితం హి విచక్షణైః .

స్యాద్యతో దురుపయోగో న కుపాత్రైః కథంచన .. 40..

గురుణైవ ప్రియే విద్యా తత్త్వం హృది ప్రకాశ్యతే .

గురుం వినా తు సా విద్యా సర్వథా నిష్ఫలా భవేత్ .. 41..

గాయత్రీ తు పరావిద్యా తత్ఫలావాప్తయే గురుః .

సాధకేన విధాతవ్యో గాయత్రీ-తత్త్వ పండితః .. 42..

గాయత్రీం యో విజానాతి సర్వం జానాతి స నను .

జానాతీమాం న యస్తస్య సర్వా విద్యాస్తు నిష్ఫలాః .. 43..

గాయత్ర్యేవతపో యోగః సాధనం ధ్యానముచ్యతే .

సిద్ధీనాం సా మతా మాతా నాతః కించిత్ బృహత్తరం .. 44..

గాయత్రీ సాధనా లోకే న కస్యాపి కదాపి హి .

యాతి నిష్ఫలతామేతత్ ధ్రువం సత్యం హి భూతలే .. 45..

గుప్తముక్తం రహస్యం యత్ పార్వతి త్వాం పతివ్రతాం .

ప్రాప్స్యంతి పరమాం సిద్ధిం జ్ఞాస్యంత్యేతత్ తు యే జనాః .. 46..

.. ఇతి ..

గాయత్రీ ఆరతీ

జయతి జయ గాయత్రీ మాతా, జయతి జయ గాయత్రీ మాతా .

ఆది శక్తి తుమ, అలఖ నిరంజన, జగ పాలన కర్త్రీ .

దుఃఖ శోక భయ, క్లేశ కలహ, దారిద్ర్య దైన్య హర్త్రీ ..

బ్రహ్మ రూపిణీ, ప్రణతపాలినీ, జగతధాతృ అంబే .

భవభయహారీ, జనహితకారీ, సుఖదా జగదంబే ..

భయ హారిణీ, భవ తారిణీ అనఘే, అజ ఆనంద రాశీ .

అవికారీ, అఘహరీ, అవిచలిత, అమలే, అవినాశీ ..

కామధేను సతచిత ఆనందా, జయ గంగా గీతా .

సవితా కీ శాశ్వతీ శక్తి తుమ, సావిత్రీ సీతా ..

ఋగ్, యజు, సామ, అథర్వ ప్రణయినీ, ప్రణవ మహామహిమే .

కుండలినీ సహస్రార, సుషుమ్నా శోభా గుణ గరిమే ..

స్వాహా, స్వధా, శచీ, బ్రహ్మాణీ, రాధా, రుద్రాణీ .

జయ సతరూపా వాణీ, విద్యా, కమలా కల్యాణీ ..

జననీ హమ హైం దీన హీన, దుఃఖ దారిద కే ఘేరే .

యదపి కుటిల కపటీ కపూత, తౌ బాలక హైం తేరే ..

స్నేహ సనీ కరుణామయి మాతా, చరణ శరణ దీజై .

బిలఖ రహే హమ శిశు సుత తేరే, దయా దృష్టి కీజై ..

కామ క్రోధ, మద లోభ దంభ,దుర్భావ ద్వేష హరియే . 

శుద్ధ బుద్ధి, నిష్పాప హృదయ, మన కో పవిత్ర కరియే ..

తుమ సమర్థ సబ భౌతి తారిణీ, తుష్టి పుష్టి త్రాతా .

సత మారగ పర హమేం చలాఓ జో హై సుఖదాతా ..

జయతి జయ గాయత్రీ మాతా . జయతి జయ గాయత్రీ మాతా ..

గాయత్రీ అష్టకం వా స్తోత్రం

గాయత్ర్యష్టకం

సుకల్యాణీం వాణీం సురమునివరైః పూజితపదాం

     శివామాద్యాం వంద్యాం త్రిభువనమయీం వేదజననీం .

పరం శక్తిం స్రష్టుం వివిధవిధ రూపాం గుణమయీం

     భజేఽమ్బాం గాయత్రీం పరమసుభగానందజననీం .. 1..

విశుద్ధాం సత్త్వస్థామఖిల దురవస్థాదిహరణీం

     నిరాకారాం సారాం సువిమల తపో మూర్తిమతులాం .

జగజ్జ్యేష్ఠాం శ్రేష్ఠామసురసురపూజ్యాం శ్రుతినుతాం

     భజేఽమ్బాం గాయత్రీం పరమసుభగానందజననీం .. 2..

తపో నిష్ఠాభీష్టాంస్వజనమనసంతాపశమనీం

     దయామూర్తిం స్ఫూర్తిం యతితతి ప్రసాదైకసులభాం .

వరేణ్యాం పుణ్యాం తాం నిఖిల భవ బంధాపహరణీం

     భజేఽమ్బాం గాయత్రీం పరమసుభగానందజననీం .. 3..

సదారాధ్యాం సాధ్యాం సుమతి మతి విస్తారకరణీం

     విశోకామాలోకాం హృదయగత మోహాంధహరణీం .

పరాం దివ్యాం భవ్యామగమభవసింధ్వేక తరణీం

     భజేఽమ్బాం గాయత్రీం పరమసుభగానందజననీం .. 4..

అజాం ద్వైతాం త్రైతాం వివిధగుణరూపాం సువిమలాం

     తమో హంత్రీం-తంత్రీం శ్రుతి మధురనాదాం రసమయీం .

మహామాన్యాం ధన్యాం సతతకరుణాశీల విభవాం

     భజేఽమ్బాం గాయత్రీం పరమసుభగానందజననీం .. 5..

జగద్ధాత్రీం పాత్రీం సకల భవ సంహారకరణీం

     సువీరాం ధీరాం తాం సువిమల తపో రాశి సరణీం .

అనేకామేకాం వై త్రిజగసదధిష్ఠానపదవీం

     భజేఽమ్బాం గాయత్రీం పరమసుభగానందజననీం .. 6..

ప్రబుద్ధాం బుద్ధాం తాం స్వజనమతి జాడ్యాపహరణాం

     హిరణ్యాం గుణ్యాం తాం సుకవిజన గీతాం సునిపుణీం .

సువిద్యాం నిరవద్యామమల గుణగాథాం భగవతీం

     భజేఽమ్బాం గాయత్రీం పరమసుభగానందజననీం .. 7..

అనంతాం శాంతాం యాం భజతి బుధ వృందః శ్రుతిమయీం

     సుగేయాం ధ్యేయాం యాం స్మరతి హృది నిత్యం సురపతిః .

సదా భక్త్యా శక్త్యా ప్రణతమతిభిః ప్రీతివశగాం

     భజేఽమ్బాం గాయత్రీం పరమసుభగానందజననీం .. 8..

శుద్ధ చిత్తః పఠేద్యస్తు గాయత్ర్యా అష్టకం శుభం .

అహో భాగ్యో భవేల్లోకే తస్మిన్ మాతా ప్రసీదతి .. 9..

ఇతి గాయత్ర్యష్టకం అథవా స్తోత్రం సంపూర్ణం .