Sacred Stotras & Deities

శ్రీసరస్వతీగీతిః

శ్రీ గణేశాయ నమః .

ఏహి లసత్సితశతదలవాసిని భారతి మామకమాస్యం .

దేహి చ మే త్వదమరనికరార్చితపాదతలే నిజదాస్యం .. ధ్రువం .. .. 1..

జగదఘహారిణి మధురిపుజాయే హిమగిరిజిత్వరసితతమకాయే .

శ్రుతితతిసంస్కృతపదకమలాదృతమిహ భువి నాన్యదుపాస్యం .

భారతి మామకమాస్యం .. 2..

జడతరజీవనమహహ మదీయం శ్రుతివిరహాన్న హి నృషు గణనీయం .

నిరవధి కృపాం కురుష్వ దయామయి వ్యపగచ్ఛేన్మమ దాస్యం .

భారతి మామకమాస్యం .. 3..

వికసితనీలజలజకులవాసే విహితబృహస్పతిసమనిజదాసే .

జనని కృశోదరి మమ రసనోపరి విరచయ శాశ్వతహాస్యం .

భారతి మామకమాస్యం .. 4..

భవముఖభావితభవదవదానం రచయతు మానసమవిరతగానం .

నిపతతు తే మయి దృగయి దయామయి కిమపరమాత్మజభాష్యం .

భారతి మామకమాస్యం .. 5..

.. ఇతి శ్రీసరస్వతీగీతిః సంపూర్ణం ..

శ్రీసరస్వతీకవచం

భైరవ ఉవాచ -

శృణు దేవి! ప్రవక్ష్యామి వాణీకవచముత్తమం .

త్రైలోక్యమోహనం నామ దివ్యం భోగాపవర్గదం .. 1..

మూలమంత్రమయం సాధ్యమష్టసిద్ధిప్రదాయకం .

సర్వైశ్వర్యప్రదం లోకే సర్వాంగమవినిశ్చితం .. 2..

పఠనాచ్ఛ్రవణాత్ దేవి! మహాపాతకనాశనం .

మహోత్పాతప్రశమనం మూలవిద్యామనోహరం .. 3..

యద్ధృత్వా కవచం బ్రహ్మా విష్ణురీశః శచీపతిః .

యమోఽపి వరుణశ్చైవ కుబేరోఽపి దిగీశ్వరాః .. 4..

బ్రహ్మా సృజతి విశ్వం చ విష్ణుర్దైత్యనిసూదనః .

శివః సంహరతే విశ్వ జిష్ణుః సుమనసాం పతిః .. 5..

దిగీశ్వరాశ్చ దిక్పాలా యథావదనుభూతయే .

త్రైలోక్యమోహనం వక్ష్యే భోగమోక్షైకసాధనం .. 6..

సర్వవిద్యామయం బ్రహ్మవిద్యానిధిమనుత్తమం .

త్రైలోక్యమోహనస్యాస్య కవచస్య ప్రకీర్తితః .. 7..

వినియోగః -

ఋషిః కణ్వో విరాట్ ఛందో దేవీ సరస్వతీ శుభా .

అస్య శ్రీసరస్వతీ దేవతా, హ్రీం బీజం, ఓం శక్తిః, ఐం కీలకం,

త్రివర్గఫలసాధనే వినియోగః .

ఋష్యాదిన్యాసః -

కణ్వఋషయే నమః శిరసి . విరాట్ ఛందసే నమః ముఖే .

దేవీసరస్వత్యై నమః హృది . హ్రీం బీజాయ నమః గుహ్యే .

ఓం శక్తయే నమః నాభౌ . ఐం కీలకాయ నమః పాదయోః .

త్రివర్గఫలసాధనే వినియోగాయ నమః సర్వాంగే..

ఓం ఐం హ్రీం హ్రీం పాతు వాణీ శిరో మే సర్వదా సతీ .

ఓం హ్రీం సరస్వతీ దేవీ భాలం పాతు సదా మమ .. 8..

ఓం హ్రీం భ్రువౌ పాతు దుర్గా దైత్యానాం భయదాయినీ .

ఓం ఐం హ్రీం పాతు నేత్రే సర్వమంగలమంగలా .. 9..

ఓం హ్రీం పాతు శ్రోత్రయుగ్మం జగదభయకారిణీ .

ఓం ఐం నాసా పాతు నిత్యం విద్యా విద్యావరప్రదా .. 10..

ఓం హ్రీం ఐం పాతు వక్త్రం వాగ్దేవీ భయనాశినీ .

అం ఆం ఇం ఈం పాతు దంతాన్ త్రిదంతేశ్వర పూజితాః .. 11..

ఉం ఊం ఋం ౠం ఌం ౡం ఏం ఐం పాతు ఓష్ఠౌ చ భారతీ .

ఓం ఔం అం అః పాతు కంఠం నీలకంఠాంకవాసినీ .. 12..

కం ఖం గం ఘం ఙం పాయాన్మే చాంసౌ దేవేశపూజితా .

చం ఛం జం ఝం ఞం మే పాతు వక్షో వక్షఃస్థలాశ్రయా .. 13..

టం ఠం డం ఢం ణం పాయాన్మే పార్శ్వౌ పార్శ్వనివాసినీ .

తం థం దం ధం నం మే పాతు మధ్యే లోకేశపూజితా .. 14..

పం ఫం బం భం మం పాయాన్మే నాభిం బ్రహ్మేశసేవితా .

యం రం లం వం పాతు గుహ్య నితంబప్రియవాదినీ .. 15..

శం షం సం హం కటిం పాతు దేవీ శ్రీవగలాముఖీ .

ఊరూ ళం క్షం సదా పాతు సర్వావిద్యాప్రదా శివా .. 16..

సరస్వతీ పాతు జంఘే రమేశ్వరప్రపూజితా .

ఓం హ్రీం ఐం హ్రీం పాతు పాదౌ పాదపీఠనివాసినీ .. 17..

విస్మారితం చ యత్ స్థానం యద్దేశో నామ వర్జితః .

తత్సర్వం పాతు వాగేశీ మూలవిద్యామయీ పరా .. 18..

పూర్వే మాం పాతు వాగ్దేవీ వాగేశీ వహ్నికే చ మాం .

సరస్వతీ దక్షిణే చ నైరృత్యే చానలప్రియా .. 19..

పశ్చిమే పాతు వాగీశా వాయౌ వేణాముఖీ తథా .

ఉత్తరే పాతు విద్యా చైశాన్యాం విద్యాధరీ తథా .. 20..

అసితాంగో జలాత్ పాతు పయసో రురుభైరవః .

చండశ్చ పాతు వాతాన్మే క్రోధేశః పాతు ధావతః .. 21..

ఉన్మత్తస్తిష్ఠతః పాతు భీషణశ్చాగ్రతోఽవతు .

కపాలీ మార్గమధ్యే చ సంహారశ్చ ప్రవేశతః .. 22..

పాదాదిమూర్ధపర్యంతం వపుః సర్వత్ర మేఽవతు .

శిరసః పాదపర్యంతం దేవీ సరస్వతీ మమ .. 23..

ఇతీదం కవచం వాణీ మంత్రగర్భం జయావహం .

త్రైలోక్యమోహనం నామ దారిద్ర్యభయనాశనం .. 24..

సర్వరోగహరం సాక్షాత్ సిద్ధిదం పాపనాశనం .

విద్యాప్రదం సాధకానాం మూలవిద్యామయం పరం .. 25..

పరమార్థప్రదం నిత్యం భోగమోక్షైకకారణం .

యః పఠేత్ కవచం దేవి! వివాదే శత్రుసంకటే .. 26..

వాదిముఖం స్తంభయిత్వా విజయీ గృహమేష్యతి .

పఠనాత్ కవచస్యాస్య రాజ్యకోపః ప్రశామ్యతి .. 27..

త్రివారం యః పఠేద్ రాత్రో శ్మశానే సిద్ధిమాప్నుయాత్ .

రసైర్భూజే లిఖేద్ వర్మ రవివారే మహేశ్వరి! .. 28..

అష్టగంధేర్లాక్షయా చ ధూపదీపాదితర్పణైః .

సువర్ణగుటికాం తత్స్థాం పూజయేత్ యంత్రరాజవత్ .. 29..

గుటికైషా మహారూపా శుభా సరస్వతీప్రదా .

సర్వార్థసాధనీ లోకే యథాఽభీష్టఫలప్రదా .. 30..

గుటికేయం శుభా దేవ్యా న దేయా యస్య కస్యచిత్ .

ఇదం కవచమీశాని మూలవిద్యామయం ధ్రువం .. 31..

విద్యాప్రదం శ్రీపదం చ పుత్రపౌత్రవివర్ధనం .

ఆయుష్యకరం పుష్టికరం శ్రీకరం చ యశః ప్రదం .. 32..

ఇతీదం కవచం దేవి! త్రైలోక్యమోహనాభిధమ .

కవచం మంత్రగర్భం తు త్రైలోక్య మోహనాభిధం .. 33..

.. ఇతి శ్రీరుద్రయామలే తంత్రే దశవిద్యారహస్యే సరస్వతీ కవచం ..

శ్రీసరస్వతిస్తోత్రం

          (శిఖరిణీవృత్తం)

లసే దేవి! స్తోతుం తవ వివిధవైచిత్ర్యసుకృతిం

      పరం త్వేషా బుద్ధిస్తవ విమలశక్త్యా న కలితా .

సువాగ్ధీధాత్రీ! త్వద్ఘటితసుకృపాపాంగనిరతా

      యది స్యాద్ధే మాతః! స్తుతిరితి తదానీం ఘటయతి .. 1..

మతిర్మే వాణీ వా భగవతి! తవాంశౌ సువిమలే!

      మహాబ్ధిస్తారంగైః స్ఫుటమసి తథా త్వంచ సకలైః .

భవత్ప్రజ్ఞైకత్వం స్ఫుటతరవికాస వితనుతే

      యదా బుద్ధౌ దేవి! స్తుతిరితి తదానీం ఘటయతి .. 2..

అవిద్యాయాః కార్యం కలుషయతి మద్బుద్ధిమభయే!

      న తస్యాం హే దేవి! స్ఫుటతరవిభానం తవ ఖలు .

అపాకృత్య త్వం హే జనని! యది తాం భాసి విమలా

      యదా నైవాజ్ఞానం స్తుతిరితి తదానీం ఘటయతి .. 3..

అవిద్యాయా చైవం మమ తనురియం వా తనురహం

      అనేకాకారైర్వా జగదిదమహో మోహయతి మాం .

మనఃకాలుష్యం హే జనని! న చ శక్యం కథయితుం

      యదా శుద్ధో బుద్ధః స్తుతిరితి తదానీం ఘటయతి .. 4..

భయం చింతా దుఃఖం మమ మతిమతిర్భ్రామయతి యత్

      ద్రుతం త్వం ప్రీత్యా హే జనని! తవ దివ్యామృతకరైః .

నిజం మామాలింగ్య త్వయి సుఖనిధౌ స్థాపయసి చే-

      దహం స్వాంతః శాంతః స్తుతిరితి తదానీం ఘటయతి .. 5..

అయి! త్వద్వాణ్యా మాం భగవతి! దయాపూర్ణనయనే!

      కిల త్వం బ్రహ్మాసి త్వయి కిమపి నో భేదభరితం .

యదైవం హే దేవి! హ్యుపదిశసి మామర్భకధియా

      యదాహం ముక్తః స్యాం స్తుతిరితి తదానీం ఘటయతి .. 6..

భవాదుద్ధర్త్రీం త్వాం శరణమహమేవం గత ఇతో

      భవాబ్ధేః పారం మాం యది నయసి వాత్సల్యభరితే! .

కృతం యుక్తం మన్యే తదిహ ఖలు చిహ్నం తవ శుభే! (తవ శివే!)

      యదా త్వత్త్రాతోఽహం స్తుతిరితి తదానీం ఘటయతి .. 7..

జనన్యాం ప్రీతిర్యా భవతి కిల బాలస్య తు యథా

      న జానాసి త్వం హే జనని! తవ మాతా నహి యతః .

అహో క్రోశంతం మాం ప్రియనిజతనూజం న వహసే

      యదా శాంతో మాతః! స్తుతిరితి తదానీం ఘటయతి .. 8..

పృథివ్యాం యా మాతా వసతి శిశుభిర్యా పరివృతా

      రుషా పశ్యంత్యేనాన్ రుదత ఇతి సా నైతి వహతి .

తథా త్వం నైవాసి! హ్యమితకరుణాపాంగనిభృతా

      యదా జానే మాతః! స్తుతిరితి తదానీం ఘటయతి .. 9..

మదుక్తైర్దుర్వాక్యైరపి తు ఘనదోషైర్మునినుతే

      ప్రమాదాత్త్వం క్రుద్ధా యది న దయయా లాలయసి మాం .

అహం బాలస్తావన్మదనుసరణం న త్వయి తథా

      యదా జ్ఞాస్యే మాతః! స్తుతిరితి తదానీం ఘటయతి .. 10..

సమాధాతుం మాం త్వం యది న చ విజానాసి శుభదే!

      బ్రువేఽహం త్వాం మాతః! శ్రవణసులభోపాయముచితం .

గృహీత్వా త్వద్వీణాం హ్యతిమధురకంఠేన సదయే

      సమాధేహ్యంతర్మాం స్తుతిరితి తదానీం ఘటయతి .. 11..

జగన్మాతః స్తోతుం భవతి కిల కో వా మతియుతః (భవతి ఖలు)

      కృపాపాంగో న స్యాద్యది మయి తతస్త్వం కురు కృపాం .

అహం యాచే మాతర్మదభిలషితా పూరితధియా

      యదా సర్వజ్ఞోఽస్మి స్తుతిరితి తదానీం ఘటయతి .. 12..

జగత్సత్యం నో వా భవతి న చ కో వాఽస్య విషయః

      ఇమౌ కౌ జీవేశౌ జగదిదమనీశం కిల న వా .

ఇయం మాయా కస్మాత్ప్రభవతి చ భిన్నోత న చ వా

      న జానే హే మాతః! స్తుతిరితి తదానీం ఘటయతి .. 13.. (న జానే మాం శాధి)

ముముక్షూణాం ముక్త్యై త్వమిహ ఖలు నాన్యోఽస్త్యఘహరే!

      ప్రసిద్ధం తద్యస్మాజ్జనని! వద కం యామి శరణం .

అసౌ కోఽపి బ్రహ్మా హరిరపి శివాద్యాః సురగణాః

      నిజబ్రహ్మైక్యార్థం జనని! తవ భక్తిం విదధతే .. 14..

             (శార్దూలవిక్రీడితవృత్తం)

అజ్ఞానాం ప్రతిభాసి హే శ్రుతినుతే! మాయేతి మోహప్రదా

      సుజ్ఞానాం ప్రతిభాసి సుష్టు చరతాం బ్రహ్మేతి మోక్షప్రదా .

బ్రహ్మైకం తవ దివ్యరూపమమలం స్వానందమాత్రం శివం

      మన్యే నిత్యమపారసంసృతిభయాత్పరం నయస్వాధునా .. 15..

             (మాలినీవృత్తం)

జయతు జయతు నిత్యం శారదా వేదమాతా

      జయతు జయతు దేవీ జ్ఞానదా మోక్షదా చ .

జయతు జయతు యా శ్రీస్సర్వదేవైరుపాస్యా

      జయతు జయతు నిత్యం భారతీ చిత్స్వరూపా .. 16..

య ఇదం పఠతి స్తోత్రం నిత్యం భక్త్యానుపావనం .

సరస్వతీప్రసాదేన విద్యావాన్ సంభవేద్ధ్రువం ..

ఇతి శ్రీసమర్థరామదాసానుగృహితరామపదకంజభృంగాయమాన

శ్రీమత్పరమహంసపరివ్రాజకాచార్య సద్గురు భగవాన్

శ్రీధరస్వామినా విరచితం శ్రీసరస్వతీస్తోత్రం సంపూర్ణం .

శారదా నవరాత్రీ - రచనాస్థానం - సిరసి సంవత్సరః - 1942