Sacred Stotras & Deities

శ్రీమీనాక్షీ సుందరేశ్వరస్తోత్రం

సువర్ణపద్మినీతటాంతదివ్యహర్మ్యవాసినే

సుపర్ణవాహనప్రియాయ సూర్యకోటితేజసే .

అపర్ణయా విహారిణే ఫణాధరేంద్రధారిణే

సదా నమశ్శివాయ తే సదాశివాయ శంభవే .. 1 ..

సుతుంగభంగజాన్హుజాసుధాంశుఖండమౌలయే

పతంగపంకజాసుహృత్కృపీటయోనిచక్షుషే .

భుజంగరాజకుండలాయ పుణ్యశాలిబంధవే

సదా నమశ్శివాయ తే సదాశివాయ శంభవే .. 2 ..

చతుర్ముఖాననారవిందవేదగీతమూర్తయే

చతుర్భుజానుజాశరీరశోభమానమూర్తయే .

చతుర్విధార్థదానశౌండతాండవస్వరూపినే

సదా నమశ్శివాయ తే సదాశివాయ శంభవే .. 3 ..

శరన్నిశాకరప్రకాశమందహాసమంజులా-

ధరప్రవాలభాసమానవక్త్రమండలశ్రియే .

కరస్ఫురత్కపాలముక్తవిష్ణురక్తపాయినే

సదా నమశ్శివాయ తే సదాశివాయ శంభవే .. 4 ..

సహస్రపుండరీకపూజనైకశూన్యదర్శనా

సహస్వనేత్రకల్పితార్చనాచ్యుతాయ భక్తితః .

సహస్రభానుమండలప్రకాశచక్రదాయినే

సదా నమశ్శివాయ తే సదాశివాయ శంభవే .. 5 ..

రసారథాయ రమ్యపత్రభృద్రథాంగపాణయే

రసాధరేంద్రచాపశింజినీకృతానిలాశినే .

స్వసారథీకృతాజనున్నవేదరూపవాజినే

సదా నమశ్శివాయ తే సదాశివాయ శంభవే .. 6 ..

అతిప్రగల్భవీరభద్రసింహనాదగర్జిత

శ్రుతిప్రభీతదక్షయాగభోగినాకసద్మనాం .

గతిప్రదాయ గర్జితాఖిలప్రపంచసాక్షిణే

సదా నమశ్శివాయ తే సదా శివాయ శంభవే .. 7 ..

మృకండుసూనురక్షణావధూతదండపాణయే

సుగండమండలస్ఫురత్ప్రభాజితామృతాంశవే .

అఖండభోగసంపదర్థిలోకభావితాత్మనే

సదా నమశ్శివాయ తే సదా శివాయ శంభవే .. 8 ..

మధురిపువిధిశక్రముఖ్యదేవైరపి నియమార్చితపాదపంకజాయ .

కనకగిరిశరాసనాయ తుభ్యం రజతసభాపతయే నమః శివాయ .. 9 ..

హాలాస్యనాథాయ మహేశ్వరాయ హాలాహలాలంకృతకంధరాయ .

మీనేక్షనాయాః పతయే శివాయ నమో నమః సుందరతాండవాయ .. 10 ..

త్వయా కృతమిదం స్తోత్రం యః పఠేద్భక్తిసంయుతః .

తస్యాఽఽయుర్దీర్ఘమారోగ్యం సంపదశ్చ దదామ్యహం .. 11 ..

శ్రీమీనాక్షీ పంచదశీ స్తోత్రం

శ్రీగణేశాయ నమః .

కస్మాత్పర్వతరాజరాజతనయే త్వత్పాదపద్మే న తం

      దీనం మాం సముపేక్షసే మమ దృశోః భానం కుతో లుప్యతే .

కో వా త్వత్చ్చరణారవిందభజనం కుర్వన్ కృతీ భూతలే

      దారిద్ర్యం లభతే కథం చ జననీ దృష్ట్యా విహీనో భవేత్ .. 1..

ఏవం పాండ్యనృపాత్మజేతి భువనే కో వా జగన్మాత రం

      స్తోతుం త్వాం నిపుణో మహేశ్వరీ శివే నాహం సమర్థస్తతః .

ఏతన్న్యాయ్యమితి త్వమేవ మనసా నిశ్చిత్య సంగృహ్య మాం

      చక్షుష్మంతమథాఢ్యమాశుకురుషే యద్యంబ మాతా మమ .. 2..

ఈశాత్వం సకలార్థ దాన నిపుణా కర్మానుసారాన్నృణాం

      పూర్వం త్వం బహుపాప కర్మ కృతవాన్ ఏతత్ఫలం భుజ్యతాం .

ఈశిత్రీతి తవాంబికే భగవతి నామార్థశూన్యం భవేత్

      త్వద్భక్తైః కృతకార్యమత్ర సకలం నోచేత్తవారాధనం .. 3..

లక్ష్మీం క్షీరసముద్రరాజతనయాం త్వద్భక్తగేహే స్థిరాం

      కర్తుం శక్తిరహో తవాస్తి జనని గేహే పరం మే కుతః .

లక్ష్మీస్థాపన ముఖ్యకార్య విముకా త్వం భాసి సర్వేశ్వరీ

      లక్ష్మీం స్థాపయ శీఘ్రమేవ భవతీ చక్షూచ్చ సందేహి మే .. 4..

హ్రీంకారార్ణవ కౌస్తుభాం భగవతీం శ్రీపాండ్యరాజాత్మజాం

      భక్తత్రాణ పరాయణాం హరిహరబ్రహ్మాదివంద్యాం శివాం .

హ్రీమ్మధ్యాం త్రిదశేశ్వరీం త్రినయనశ్రీతుల్య సౌభాగ్యదాం

      వందేఽహం మమ దృష్టిదోష తమసాం భేత్రీం పరామంబికాం .. 5..

హత్వా శుంభనిశుంభముఖ్యదితిజాన్ దేవేప్సితార్థప్రద

      దుర్గా మామకచక్షుషః తిమిరమప్యద్యాఽశు విధ్వంసయేత్ .

హత్వా చాక్షుషదోషమద్యజననీ మాం పాలయేత్ బాలకం

      తాం నిత్యం ప్రణతోస్మ్యహం వినయతః సేవే జగత్పాలినీం .. 6..

సర్వేశీం నిజభక్తకల్పలతికాం కామేశ్వరీం కామదాం

      సర్వజ్ఞాం సదసద్విలక్షణ జగత్సత్తాప్రదాం శాశ్వతీం .

సత్యజ్ఞాన సుఖాత్మికాం భగవతీం మాయామయీం మోహినీం

      వందేఽహం మధురేశ్వరీం నయనయోః దివ్యప్రకాశాప్తయే .. 7..

కస్త్వం కిం ఫలమిచ్ఛసీతి జననీప్రశ్నే నకశ్చిచ్ఛివే

      వక్తుం త్వాం నిపుణః త్వమేవ చతురా జ్ఞాతుం స్వరూపం మమ .

కోఽహం బ్రూహి మహేశ్వరోహం ఇతి వా త్వం వాహమేవాంబికే

      కో భేదఃశివయోః తథైవ శివదే జీవేశయోర్వా కథం .. 8..

హంసీత్వం భువనేతి శంకరగురోః వాక్యేన జానామ్యహం

      త్వామేవాంబ మమాపిదోషమఖిలం కృత్వా గుణం పాలయ .

హంసస్సోహమితీహ మంత్ర జపతః ప్రత్యక్షతో దర్శనం

      త్వద్రూపస్య మమాఽపి దేహి శివదే శ్రీరాజరాజేశ్వరి .. 9..

లక్ష్మీం దేహి సదా మమాఽపి కృపయా శ్రీపాండ్యరాజాత్మజే

      దోషం చాక్షుషమప్యసహ్యమేవ నితరాం దూరీకురుత్వం శివే .

లక్ష్మీ వాఙ్ముఖదేవతాభిరనిశం సంస్తూయమానాం పరాం

      త్వామేవాత్ర సమాశ్రయే నహి పరా దేవీ త్రిలోక్యాం ఖలు .. 10..

హ్రీం బీజైః త్రివిధైః శిఖాసు ఘటితాః ఖండాః త్రయః శంకరి

      యస్మిన్ మంత్రవరే సచాపి మనురాట్ యస్యాః స్వరూపం శివే .

హ్రీం మాయేతి చ కథ్యతే బుధవరైః యా శక్తిరాద్యాపరా

      సా త్వం దేవి నమస్కరోమి భవతీం దేహ్యాత్మచక్షుః పరే .. 11..

సర్వే విష్ణుముఖాః సురాశ్చ జనని త్వచ్ఛాసనే సంస్థితాః

      తస్మాద్దేవి నవగ్రహాః తవ మతే స్థిత్వైవ సౌఖ్యప్రదాః .

సత్యేవం మమ దుఃఖమేవ బహుధా కుర్వంతి సూర్యోదయః

      దేవాః త్వత్పదపద్మమేవ శరణం ప్రాప్తోఽస్మి మాం పాలయ .. 12..

కష్టం త్వద్భజనే నివర్త్తత ఇతి శ్రుత్వా భజామ్యంబికే

      త్వామేవాద్య తథాఽపి మే నహి సుఖం తత్కారణం బ్రూహి మే .

కష్టాత్కష్టపరంపరా మమ గృహే సంవర్ధతే మానదే

      మాతుస్తే శిశుపాలనాత్ విముఖతా నైవోచితా శాంభవీ .. 13..

లాభోయం పరమః మహేశ్వరి శివే త్వత్పూజనే యన్మనః

      నిత్యం వర్తత ఇత్యహో భగవతి తత్ర స్థిరం కుర్విదం .

లక్ష్మీం వా హరినాభిపద్మజసఖీం నిత్యం వశే మే కురు

      ముఖ్యం మే నయనస్య పాటవమపి త్వం దేహి మాతః పరే .. 14..

హ్రీంబీజాక్షరవాసిని శశికలే శ్రీచక్ర రూపేశివే

      మీనాక్షి మలయధ్వజాధిపసుతే శ్రీసుందరేశప్రియే .

హ్రీం హ్రీం హ్రీమితి మంత్రరాజమనిశం జప్త్వాఽమ్బికాం త్వామహం

      దృష్టుం దేహి మమాద్య చక్షురమలం త్వాం పూజయామ్యన్వహం .. 15..

ఇతి శ్రీమీనాక్షీ పంచదశీ స్తోత్రం సంపూర్ణం .