శ్రీసరస్వతీదశశ్లోకీస్తోత్రం

శ్రీసరస్వతీదశశ్లోకీస్తోత్రం

ఋషయ ఊచుః-

కథం సారస్వతప్రాప్తిః కేన ధ్యానేన సువ్రత .

మహాసరస్వతీ యేన తుష్టా భవతి తద్వద .. 1..

ఆశ్వలాయన ఉవాచ-

శృణ్వంతు ఋషయః సర్వే గుహ్యాద్గుహ్యతమం మహత్ .

దశశ్లోకీస్తుతిమిమాం వదామి ధ్యానపూర్వకం .. 2..

అంకుశం చాక్షసూత్రం చ పాశం పుస్తం చ ధారిణీం .

ముక్తాహారైః సమాయుక్తాం దేవీం ధ్యాయేచ్చతుర్భుజాం .. 3..

సితేన దర్పణాభేన వక్త్రేణ పరిభూషితాం .

సుస్తనీం వేదిమధ్యాం తాం చంద్రార్ధకృతశేఖరాం .. 4..

జటాకలాపసంయుక్తాం పూర్ణచంద్రనిభాననాం .

త్రిలోచనీం మహాదేవీం స్వర్ణనూపురధారిణీం .. 5..

కటకస్వర్ణరత్నాఢ్యమహావలయభూషితాం .

కంబుకంఠీం సుతామ్రోష్టీం సర్వాభరణభూషితాం .. 6..

కేయూరైర్మేఖలాద్యైశ్చ ద్యోతయంతీం జగత్త్రయం .

శబ్దబ్రహ్మారణిం ధ్యాయేద్ధ్యానకామః సమాహితః .. 7..

వక్ష్యే సారస్వతం స్తోత్రం వాక్ప్రవృత్తికరం శుభం .

లక్ష్మీవివర్ధనం చైవ వివాదే విజయప్రదం .. 8..

పరబ్రహ్మాత్మికాం దేవీం భుక్తిముక్తిఫలప్రదాం .

ప్రణమ్య స్తౌమి తామేవ జ్ఞానశక్తిం సరస్వతీం .. 9..

యా వేదాంతోక్తతత్త్వైకస్వరూపా పరమార్థతః .

నామరూపాత్మికా వ్యక్తా సా మాం పాతు సరస్వతీ .. 10..

యా సాంగోపాంగవేదేషు చతుర్ష్వేకైవ గీయతే .

అద్వైతా బ్రహ్మణః శక్తిః సా మాం పాతు సరస్వతీ .. 11..

యా వర్ణపదవాక్యార్థస్వరూపేణైవ వర్తతే .

అనాదినిధనానంతా సా మాం పాతు సరస్వతీ .. 12..

అధ్యాత్మమధిదేవం చ దేవానాం సమ్యగీశ్వరీ .

ప్రత్యగాత్మేవ సంతీ యా సా మాం పాతు సరస్వతీ .. 13..

అంతర్యామ్యాత్మనా విశ్వం త్రైలోక్యం యా నియచ్ఛతి .

రూద్రాదిత్యాదిరూపస్థా సా మాం పాతు సరస్వతీ .. 14..

యా ప్రత్యగ్దృష్టిభిర్జ్ఞానైర్వ్యజ్యమానానుభూయతే .

వ్యాపినీ జ్ఞప్తిరూపైకా సా మాం పాతు సరస్వతీ .. 15..

నామజాత్యాదిభిర్భేదైరష్టధా యా వికల్పితా .

నిర్వికల్పాత్మికా చైవ సా మాం పాతు సరస్వతీ .. 16..

వ్యక్తావ్యక్తగిరః సర్వే దేవాద్యా వ్యాహరంతి యాం .

సర్వకామదుధా ధేనుః సా మాం పాతు సరస్వతీ .. 17..

యాం విదిత్వాఖిలం బంధం నిర్మథ్యామలవర్మనా .

యోగీ యాతి పరం స్థానం సా మాం పాతు సరస్వతీ .. 18..

నామజాత్యాదికం సర్వం యస్యామావిశ్య తాం పునః .

ధ్యాయంతీ బ్రహ్మరూపైకా సా మాం పాతు సరస్వతీ ? .. 19..

యః కవిత్వం నిరాతంకం భుక్తిం ముక్తిం చ వాంఛతి .

సోఽభ్యర్చ్యైనాం దశశ్లోక్యా భక్త్యా స్తౌతు సరస్వతీం .. 20..

తస్యైవం స్తువతో నిత్యం సమభ్యర్చ్య సరస్వతీం .

భక్తిశ్రద్ధాభియుక్తస్య షణ్మాసాత్ ప్రత్యయో భవేత్ .. 21..

తతః ప్రవర్తతే వాణీ స్వేచ్ఛయా లలితాక్షరా .

గద్యపద్యాత్మికా విద్యా ప్రమేయైశ్చ వివర్తతే .. 22..

అశ్రుతో బుధ్యతే గ్రంథః ప్రాయః సారస్వతః కవిః .

శ్రుతం చ ధారయేదాశు స్ఖలద్వాక్ స్పష్టవాగ్భవేత్ .. 23..

ప్రఖ్యాతః సర్వలోకేషు వాగ్మీ భవతి పూజితః .

అజితః ప్రతిపక్షాణాం స్వయం జేతాఽధిజాయతే .. 24..

అయోధ్యైర్వేదబాహ్యైర్వా వివాదే ప్రస్తుతే సతి .

అహం వాచస్పతిర్విష్ణుః శివో వాస్మీతి భావయేత్ .. 25..

ఏవం భావయతా తేన బృహస్పతిరపి స్వయం .

న శక్నోతి పరం వక్తుం నరేష్వన్యేషు కా కథా .. 26..

న కాంచన స్త్రియం నిందేత్ న దేవాన్నాపి చ ద్విజాన .

అనార్యైర్నాభిభాషేత సర్వత్రైవ క్షమీ భవేత్ .. 27..

సర్వత్రైవ ప్రియం బ్రూయాత్ (యథేచ్ఛాలబ్ధ) మాత్మనః .

శ్లోకైరేవ తిరస్కృత్య ద్విషంద ప్రతివాదినం .. 28..

ప్రతివాదిగజానాం తు సింహో భవతి తద్వచః .

యద్వాగితిదవ్యృచేనైవ దేవీం యోఽర్చతి సువ్రతః .. 29..

      తస్య నాసంస్కృతా వాణీ ముఖాదుచ్చారితా క్వచిత్ .

ప్రథమం భారతీ నామ ద్వితీయం చ సరస్వతీ .

      తృతీయం శారదా దేవీ చతుర్థం కంసమర్దనీ .. 30..

పంచమం తు జగన్మాతా షష్ఠం చైవ తు పార్వతీ .

సప్తమం చైవ కామక్షీ హ్యష్టమం బ్రహ్మచారిణీ .. 31..

నవమం చైవ వారాహీ దశమం బ్రహ్మపుత్రికా .

ఏకాదశం చ వాగ్దేవీ ద్వాదశం వరదాంబికా .. 32..

ద్వాదశైతాని నామాని త్రిసంధ్యం యః పఠేన్నరః .

తస్య సారస్వతం చైవ షణ్మాసేనైవ సిధ్యతి .. 33..

యస్యాః స్మరణమాత్రేణ వాగ్విభూతిర్విజృంభతే .

సా భారతీ ప్రసన్నాక్షీ రమతాం మన్ముఖాంబుజే .. 34..

ఇత్యాశ్వలాయనమునిర్నిజగాద దేవ్యాః

      స్తోత్రం సమస్తఫలభోగనిధానభూతం .

ఏతత్ పఠన్ ద్విజవరః శుచితాముపైతి

      సంధ్యాసు వాంఛితముపైతిన సంశయోఽత్ర .. 35..

ఇతి శ్రీసరస్వతీదశశ్లోకీస్తోత్రం సంపూర్ణం .