శ్రీపద్మావతీస్తోత్రం

శ్రీపద్మావతీస్తోత్రం

శ్రీః ..

అస్తు పద్మసరోమధ్యాదావిర్భూతం పరం మహః .

వశే యస్య పరం ధామ తద్వృషాచల మాస్థితం .. 1..

అనన్యాధీనవిభవమద్భుతం దైవతం శ్రయే .

మాతరం జగతాం లక్ష్మీం జగన్మాతుః పరాం ప్రియాం .. 2..

సఖీభిశ్శ్రుతిభిర్నిత్యం యాం యథావత్ పనాయితాం .

ఆకర్ణ్య హృదయే న్యస్యన్ లబ్ధాత్మా శ్రీనిధిః పరః .. 3..

మాతుస్తే నామధేయం తత్ దేబతేతి హరిర్ధ్రువం .

పద్మదేవ్యుచ్యతే తేన నిత్యశ్లిష్టతయా త్వయా .. 4..

ప్రజాః పతిప్రియాః కృత్వా భోగసామ్యవిధిత్సయా .

స్వచ్ఛాయాశ్రయణం తాసు తనోషి కృపయా రమే .. 5..

సరోజసౌరభాఽఽధాయి దివ్యం లావణ్యవర్షి తే .

వశీకృతవృషాద్రీశం రూపం పాపం వ్యపోహతు .. 6..

అభయే కృపయా దేవి ప్రతిజ్ఞాతే త్వయా హరిః .

వ్యాజభంగభియా వక్తి ప్రపత్తిం పాణిముద్రయా .. 7..

యయా ఖలు పరిష్వక్తో దేవో దేవత్వమశ్నుతే .

శ్రద్ధయా సర్వలోకైకహితాం త్వాం మాతరం శ్రయే .. 8..

అంబుజనివాసరసికామంబుజనేత్రస్య వల్లభాం దేవీం .

అనవద్యగుణగరిమ్నా శ్రియం పరాం నిస్సమాం వందే .. 9..

ఆశ్రయతు మానసం సుఖమాసీనామంబుజే జగజ్జననీం .

ఆశ్రితరక్షణహేతోరాదృతపద్మావతీరూపాం .. 10..

ప్రణమయతి సవ్యకరతో దక్షిణతో యా దదాతి చాప్యభయం .

స్వాధీనలోకవృత్తిం సరోజవాసాం పరాం వందే .. 11..

పరయా మయా త్వయా ఖలు పరమోఽభూత్పురుష ఏష దేవి తథా .

అపరమతాఽఽపత్తిభియాఽనపాయినీమురసి ధత్తే త్వాం .. 12..

నిగ్రహనితాంతదూరామాగ్రహరహితైః ప్రబుద్ధవిభవాం త్వాం .

ప్రాప్యాం ప్రాపకభూతాం పరమాం విష్ణోః ప్రియాం వందే .. 13..

నిఖిలవిభూతినియంతా యత్పదలాక్షాంకలక్షితోరస్కః .

అత్యంతసౌమ్యమూర్తిం మాతరమనఘాం శ్రియం వందే .. 14..

దుష్కృతకర్తృబహిష్కృతిబద్ధశ్రద్ధే పరే హరౌ పుంసి .

ప్రాదుష్కృతవచనసుధాం శ్రియం ప్రపద్యే శుభం దదతీం .. 15..

అఖిలైరాశ్రితహ్రుద్యైర్గుణైః పరాం త్వాం నిరీక్ష్య సవ్రీడం .

విష్ణుం శ్రుతీర్ధ్రువం శ్రీః సఖీస్త్వమాదిష్టవత్యసి స్తోతుం .. 16..

పాపాని వర్ధయతి నః పరో రణం తైశ్చికీర్షురతివేలం .

రక్షోవధాంత ఇవ తే పరిరంభం మాతరద్భుతం లిప్సుః .. 17..

అనఘైరంబుజవాసిని కటాక్షితైస్సహజశీతలైర్దివ్యైః .

అచ్యుతరూపోల్లాసిభిరస్మాక భవుకమత్ర దేహి త్వం .. 18..

శుకపురమధ్యశోభిశుభసద్మసముజ్జ్వలయా

వృషగిరిశృంగవాసిపురుషోత్తమసంశ్రితయా .

అఖిలజగద్ధితైకపరయా కృపయా పరయా

మమ శుభమస్తు నిత్యమనయాఽనఘయా రమయా .. 19..

కమలకుహర దీవ్యద్దివ్యరూపాం శ్రయంతః

పునరపి పురుహూతోఽన్యే చ యాం ప్రాప్తసత్తాః .

వృషగిరివరవాసీ యద్వశే విశ్రుతోఽసౌ

సవినయమయమస్యై సాధు బద్ధోఽఞ్జలిర్మే .. 20..

త్రాయస్వ మామఖిలరక్షణజాగరూకే

నారాయణస్య హృదయే విహితాధివాసే .

పాథోజవాసరసికే పదపంకజం తే

కారుణ్యదుగ్ధజలధే శరణం భజామి .. 21..

శ్రీస్త్వం శ్రితా శరణమీప్సుభిరమార్తరావం

శ్రుత్వా శ్రితా వృషగిరీశభుజాంతరాలం .

తం శ్రావయస్యథ శృణాసి సమస్తమేనః

శ్రీణాసి సర్వమపి శేషజనోచితం నః .. 22..

మధ్యే సమస్తజగదీశితురబ్జగేహే

మాతశ్చితశ్చ భవతీ ప్రణవే విభాంతీ .

సత్యం వ్యనక్తి ఘటనాం సరసైర్వచోభిః

శేషాద్రిగస్య చరణే శరణార్థినాం న: .. 23..

శుకపత్తనవాసతత్పరాం జగతాం భాగ్యమనుగ్రహాత్మికాం .

సరసీరుహవాసినీమిమాం శరణం యాభ్యహమన్వహం శ్రియం .. 24..

అతిశాయ్యనురూపదివ్యరూపా సతతం త్వం శ్రితరక్షకస్థ శౌరేః .

దయయా వృషశైలమాశ్రితేఽస్మిన్ కమలేఽధః కమలే యదావిరాసీః .. 25..

వృషపర్వతతుంగశృంగభాజా

నిహితా మాదృశనీచరక్షణార్థే .

యగ్రీవకటశకావ్యకలాపం

కమలే కరుణారసైకసాంద్రా

స్వకసంవీక్షణసంహతిర్ధ్రువం త్వమ .. 26..

నికటేఽత్ర గిరౌ సమాగతోఽసౌ

తనయాః! మైవభితో విధత్త పాపం .

ఇతి దుఃఖనిరాచికీర్షురస్మ-

త్ప్రతిబోధార్థమిహైత్య భాసి మాతః .. 27..

పతిరేష పరం పదం విహాయ

ప్రథితం వేంకటశైలమాశ్రితస్సన్ .

ఉపతిష్ఠతి మే గుణీభవస్తత్

న భయం వః శ్రయతేతి వక్షి మాతః .. 28..

నానారూపాణ్యధిగతవతీ నాథమేనం శ్రయంతీ

నాకిత్వం త్వం జనని తనుషే నారకిష్వప్యరం యత్ .

తత్కిం చిత్రం జగతి హతకాః కష్టగత్యా తవేదం

ప్రాప్తాః పాదాంబుజమిహ లసంత్యేవ లబ్ధేష్టవర్గాః .. 29..

(టిప్పణీ -అరం - భృశం, రేఫశూన్యమిత్యప్యర్థః .

నారకిణాం రేఫశూన్యత్వే నాకిత్వం .

హతకాః హతకకారా ఇత్యర్థాంతరం . ఇదం ఇకారదం

కష్టగతౌ కకారహానౌ ఇకారే సతి ఇష్టగతిర్భవతి)

త్వదాశ్లిష్టోరస్కే స్వకచరణయుగ్మం ప్రణయతః

ప్రపత్తవ్యం దేవే ప్రకటయతి నారాయణ ఇహ .

త్వమంబ శ్రీః స్వస్మిన్ శ్రుతిమితముపాయత్వమభయ-

స్ఫుటీకృత్యా పత్యా తులితమనుకంప్య ప్రథయసి .. 30..

తపసా శ్రీనివాసేన ప్రాప్తాం శుకపురే పురా .

శ్రియం పద్మావతీమిత్థం ప్రణతో వీరరాఘవః .. 31..

ఇతి తర్కార్ణవశ్చ పండితరత్న వాత్స్య

శ్రీవీరరాఘవవిరచితం పద్మావతీస్తోత్రం సంపూర్ణం ..