Sacred Stotras & Deities

దుర్గాష్టకం

దుర్గే పరేశి శుభదేశి పరాత్పరేశి

      వంద్యే మహేశదయితే కరుణార్ణవేశి .

స్తుత్యే స్వధే సకలతాపహరే సురేశి

      కృష్ణస్తుతే కురు కృపాం లలితేఽఖిలేశి .. 1..

దివ్యే నుతే శ్రుతిశతైర్విమలే భవేశి

      కందర్పదారాశతసుందరి మాధవేశి .

మేధే గిరీశతనయే నియతే శివేశి

      కృష్ణస్తుతే కురు కృపాం లలితేఽఖిలేశి .. 2..

రాసేశ్వరి ప్రణతతాపహరే కులేశి

      ధర్మప్రియే భయహరే వరదాగ్రగేశి .

వాగ్దేవతే విధినుతే కమలాసనేశి

      కృష్ణస్తుతేకురు కృపాం లలితేఽఖిలేశి .. 3..

పూజ్యే మహావృషభవాహిని మంగలేశి

      పద్మే దిగంబరి మహేశ్వరి కాననేశి .

రమ్యేధరే సకలదేవనుతే గయేశి

      కృష్ణస్తుతే కురు కృపాం లలితేఽఖిలేశి .. 4..

శ్రద్ధే సురాఽసురనుతే సకలే జలేశి

      గంగే గిరీశదయితే గణనాయకేశి .

దక్షే స్మశాననిలయే సురనాయకేశి

      కృష్ణస్తుతే కురు కృపాం లలితేఽఖిలేశి .. 5..

తారే కృపార్ద్రనయనే మధుకైటభేశి

      విద్యేశ్వరేశ్వరి యమే నిఖలాక్షరేశి .

ఊర్జే చతుఃస్తని సనాతని ముక్తకేశి

      కృష్ణస్తుతే కురు కృపాం లలితఽఖిలేశి .. 6..

మోక్షేఽస్థిరే త్రిపురసుందరిపాటలేశి

      మాహేశ్వరి త్రినయనే ప్రబలే మఖేశి .

తృష్ణే తరంగిణి బలే గతిదే ధ్రువేశి

      కృష్ణస్తుతే కురు కృపాం లలితేఽఖిలేశి .. 7..

విశ్వంభరే సకలదే విదితే జయేశి

      వింధ్యస్థితే శశిముఖి క్షణదే దయేశి .

మాతః సరోజనయనే రసికే స్మరేశి

      కృష్ణస్తుతే కురు కృపాం లలితేఽఖిలేశి .. 8..

దుర్గాష్టకం పఠతి యః ప్రయతః ప్రభాతే

      సర్వార్థదం హరిహరాదినుతాం వరేణ్యాం .

దుర్గాం సుపూజ్య మహితాం వివిధోపచారైః

      ప్రాప్నోతి వాంఛితఫలం న చిరాన్మనుష్యః .. 9..

.. ఇతి శ్రీ మత్పరమహంసపరివ్రాజకాచార్య

శ్రీమదుత్తరాంనాయజ్యోతిష్పీఠాధీశ్వరజగద్గురూ-శంకరాచార్య-స్వామి-

శ్రీశాంతానంద సరస్వతీ శిష్య-స్వామి శ్రీమదనంతానంద-సరస్వతి

విరచితం శ్రీ దుర్గాష్టకం సంపూర్ణం..

దుర్గార్చనాగీతిః

జగదంబ దేవి జయ జయ! జగదంబ దేవి! జయ జయ .. ధ్రువం..

సురసంఘ-పూజనీయా త్రైలోక్య-మాననీయా .

దుఃఖౌఘనాశకర్త్రీ, జననీ జనార్తిహర్త్రీ .

దుర్గేం దయాం ప్రదర్శయ . జగదంబ దేవి! జయ జయ .. 1..

ప్రథమాఽసి ``శైలపుత్రీ'' త్వం ``బ్రహ్మచారిణీ'' ద్వితీయా .

త్వం చారు ``చంద్రఘంటా'' సంరాజితా తృతీయా .

సన్మార్గమిహ ప్రదర్శయ . జగదంబ దేవి! జయ జయ .. 2..

``కూష్మాండజా'' ప్రణమ్యా, బ్రహ్మాదితోఽప్యగమ్యా .

శ్రీ ``స్కంద-మాతృ''రూపా, యా శక్తిశివస్వరూపా .

దుర్దైంవమాశు భంజయ, జగదంబ దేవి! జయ జయ .. 3..

``కాత్యాయనీ'' భవిత్రీ, దనుజావలీసవిత్రీ .

త్వం ``కాలరాత్రి''రేషా, దుద్ధర్ష-భీమ-వేషా .

నిజ-భక్త-భీరూతాం జయ . జగదంబ దేవి! జయ జయ .. 4..

``గౌరీం'' మహాప్రసిద్ధాం, ప్రణమంతి యాం సుసిద్ధాః.

సా ``సిద్ధిదాత్ర్యవిత్రీ'', కుశలేష్వలం భవిత్రీ .

ఆశాం చ మేఽత్ర పూరయ . జగదంబ దేవి! జయ జయ .. 5..

కాలీ కరాలినీ త్వం, జనలోకపాలినీ త్వం .

లక్ష్మీసమా గిరా త్వం భక్తేష్వనుగ్రహా త్వం .

లోకానశేషమీరయ . జగదంబ దేవి! జయ జయ .. 6..

దుర్గాసి దుర్గహంత్రీ క్లేశాద్యవిఘ్నహంత్రీ .

త్వం హే మహాసరస్వతి, సంగృహ్యతాం స్తవోఽయం .

సౌభాగ్యమత్ర కల్పయ . జగదంబ దేవి! జయ జయ .. 7..

జనని! ``ద్విజేంద్ర''-బాలః, శరణాగతోఽనవద్యః .

నీరాజనాం ప్రణామాన్, చాంగీకురుష్వ సద్యః .

విజయం విధీయతాం జయ . జగదంబ దేవి! జయ జయ .. 8..

               - శ్రీసరయూప్రసాదశాస్త్రీ ``ద్విజేంద్రః''

శ్రీదుర్గాంబాస్తోత్రం

జ్ఞానమాత్రావశేషాయా నిష్పప్రపంచా నిరంకుశా .

చిదానందఘనాత్యచ్ఛా దుర్గాంబాం తాం ఉపాస్మహే .. 1..

మంత్రాణాం మాతృకా దేవి జ్ఞానానాం జ్ఞానరూపిణీ .

జ్ఞానానాం చిన్మయాతీతా శూన్యానాం శూన్యసాక్షిణీ .. 2..

యస్యాః పరతరం నాస్తి సైషా దుర్గా ప్రకీర్తితా .

దుర్గాత్సంత్రాయతే యస్మాత్ దేవీ దుర్గేతి కథ్యతే .. 3..

ప్రపద్యే శరణం దేవి దురాచారవిధాతినీం .

నమామి భవభీతోఽహం సంసారార్ణవతారిణీం .. 4..

ఇతి శ్రీసమర్థరామదాసానుగ్రహిత శ్రీరామపదపంకజభృంగాయమాన

శ్రీమత్పరమహంసపరివ్రాజకాచార్యవరభగవతాశ్రీశ్రీధరస్వామినా

విరచితం శ్రీదుర్గాంబాస్తోత్రం సంపూర్ణం ..

శ్రీదుర్గామానస పూజా

శ్రీ గణేశాయ నమః .

ఉద్యచ్చందనకుంకుమారుణపయోధారాభిరాప్లావితాం

నానానర్ఘ్యమణిప్రవాలఘటితాం దత్తాం గృహాణాంబికే .

ఆమృష్టాం సురసుందరీభిరభితో హస్తాంబుజైర్భక్తితో

మాతః సుందరి భక్తకల్పలతికే శ్రీపాదుకామాదరాత్ .. 1..

దేవేంద్రాదిభిరర్చితం సురగణైరాదాయ సింహాసనం

చంచత్కాంచనసంచయాభిరచితం చారుప్రభాభాస్వరం .

ఏతచ్చంపకకేతకీపరిమలం తైలం మహానిర్మలం

గంధోద్వర్తనమాదరేణ తరుణీదత్తం గృహాణాంబికే .. 2..

పశ్చాద్దేవి గృహాణ శంభుగృహిణి శ్రీసుందరి ప్రాయశో

గంధద్రవ్యసమూహనిర్భరతరం ధాత్రీఫలం నిర్మలం .

తత్కేశాన్ పరిశోధ్య కంకతికయా మందాకినీస్రోతసి

స్నాత్వా ప్రోజ్జ్వలగంధకం భవతు హే శ్రీసుందరి త్వన్ముదే .. 3..

సురాధిపతికామినీకరసరోజనాలీధృతాం

సచందనసకుంకుమాగురుభరేణ విభ్రాజితాం .

మహాపరిమలోజ్జ్వలాం సరసశుద్ధకస్తూరికాం

గృహాణ వరదాయిని త్రిపురసుందరి శ్రీప్రదే .. 4..

గంధర్వామరకిన్నరప్రియతమాసంతానహస్తాంబుజ-

ప్రస్తారైర్ధ్రియమాణముత్తమతరం కాశ్మీరజాపింజరం .

మాతర్భాస్వరభానుమండలలసత్కాంతిప్రదానోజ్జ్వలం

చైతన్నిర్మలమాతనోతు వసనం శ్రీసుందరి త్వన్ముదం .. 5..

స్వర్ణాకల్పితకుండలే శ్రుతియుగే హస్తాంబుజే ముద్రికా

మధ్యే సారసనా నితంబఫలకే మంజీరమంఘ్రిద్వయే .

హారో వక్షసి కంకణౌ క్వణరణత్కారౌ కరద్వంద్వకే

విన్యస్తం ముకుటం శిరస్యనుదినం దత్తోన్మదం స్తూయతాం .. 6..

గ్రీవాయాం ధృతకాంతికాంతపటలం గ్రైవేయకం సుందరం

సిందూరం విలసల్లలాటఫలకే సౌందర్యముద్రాధరం .

రాజత్కజ్జలముజ్జ్వలోత్పలదలశ్రీమోచనే లోచనే

తద్దివ్యౌషధినిర్మితం రచయతు శ్రీశాంభవి శ్రీప్రదే .. 7..

అమందతరమందరోన్మథితదుగ్ధసింధూద్భవం

నిశాకరకరోపమం త్రిపురసుందరి శ్రీప్రదే .

గృహాణ ముఖమీక్షతుం ముకురబింబమావిద్రుమై-

ర్వినిర్మితమధచ్ఛిదే రతికరాంబుజస్థాయినం .. 8..

కస్తూరీద్రవచందనాగురుసుధాధారాభిరాప్లావితం

చంచచ్చంపకపాటలాదిసురభిర్ద్రవ్యైః సుగంధీకృతం .

దేవస్త్రీగణమస్తకస్థితమహారత్నాదికుంభవ్రజై-

రంభఃశాంభవి సంభ్రమేణ విమలం దత్తం గృహాణాంబికే .. 9..

కహ్లారోత్పలనాగకేసరసరోజాఖ్యావలీమాలతీ-

మల్లీకైరవకేతకాదికుసుమై రక్తాశ్వమారాదిభిః .

పుష్పైర్మాల్యభరేణ వై సురభిణా నానారసస్రోతసా

తామ్రాంభోజనివాసినీం భగవతీం శ్రీచండికాం పూజయే .. 10..

మాంసీగుగ్గులచందనాగురురజః కర్పూరశైలేయజై-

ర్మాధ్వీకైః సహకుంకుమైః సురచితైః సర్పిభిరామిశ్రితైః .

సౌరభ్యస్థితిమందిరే మణిమయే పాత్రే భవేత్ ప్రీతయే

ధూపోఽయం సురకామినీవిరచితః శ్రీచండికే త్వన్ముదే .. 11..

ఘృతద్రవపరిస్ఫురద్రుచిరరత్నయష్ట్యాన్వితో

మహాతిమిరనాశనః సురనితంబినీనిర్మితః .

సువర్ణచషకస్థితః సఘనసారవర్త్యాన్విత-

స్తవ త్రిపురసుందరి స్ఫురతి దేవి దీపో ముదే .. 12..

జాతీసౌరభనిర్భరం రుచికరం శాల్యోదనం నిర్మలం

యుక్తం హింగుమరీచజీరసురభిర్ద్రవ్యాన్వితైర్వ్యంజనైః .

పక్వాన్నేన సపాయసేన మధునా దధ్యాజ్యసమ్మిశ్రితం

నైవేద్యం సురకామినీవిరచితం శ్రీచండికే త్వన్ముదే .. 13..

లవంగకలికోజ్జ్వలం బహులనాగవల్లీదలం

సజాతిఫలకోమలం సఘనసారపూగీఫలం .

సుధామధురమాకులం రుచిరరత్నపాత్రస్థితం

గృహాణ ముఖపంకజే స్ఫురితమంబ తాంబూలకం .. 14..

శరత్ప్రభవచంద్రమః స్ఫురితచంద్రికాసుందరం

గలత్సురతరంగిణీలలితమౌక్తికాడంబరం .

గృహాణ నవకాంచనప్రభవదండఖండోజ్జ్వలం

మహాత్రిపురసుందరి ప్రకటమాతపత్రం మహత్ .. 15..

మాతస్త్వన్ముదమాతనోతు సుభగస్త్రీభిః సదాఽఽన్దోలితం

శుభ్రం చామరమిందుకుందసదృశం ప్రస్వేదదుఃఖాపహం .

సద్యోఽగస్త్యవసిష్ఠనారదశుకవ్యాసాదివాల్మీకిభిః

స్వే చిత్తే క్రియమాణ ఏవ కురుతాం శర్మాణి వేదధ్వనిః .. 16..

స్వర్గాంగణే వేణుమృదంగశంఖభేరీనినాదైరూపగీయమానా .

కోలాహలైరాకలితాతవాస్తు విద్యాధరీనృత్యకలాసుఖాయ .. 17..

దేవి భక్తిరసభావితవృత్తే ప్రీయతాం యది కుతోఽపి లభ్యతే .

తత్ర లౌల్యమపి సత్ఫలమేకంజన్మకోటిభిరపీహ న లభ్యం .. 18..

ఏతైః షోడశభిః పద్యైరూపచారోపకల్పితైః .

యః పరాం దేవతాం స్తౌతి స తేషాం ఫలమాప్నుయాత్ .. 19..

.. ఇతి దుర్గాతంత్రే దుర్గామానసపూజా సమాప్తా ..

శ్రీదుర్గాప్రాతఃస్మరణస్తోత్రం

ప్రాతః స్మరన్నిదమహం గిరిరాజకన్యా-

     మార్త్తార్త్తిమోచనచణస్మరణాం వినీతః .

ఆవేదయామి కరుణామృతపూరవర్షై-

     రాప్లావయాశు జనమార్త్తమిమం ప్రపన్నం .. 1..

ప్రాతర్నమన్నిదమహం వినివేదయామి

     శ్రీమేనకేక్షణచకోరసుధాంశులేఖాం .

శిష్టాన్యహాని మమ సంతు పవిత్రితాని

     త్వత్పాదచింతనసమాహితహృద్విలాసైః .. 2..

ప్రాతర్భజన్నహమవాప్తసమస్తకామాం

     కామాంతకారిమహిలాం మహితాం హితాయ .

మాతర్జహీహి మమ వాంఛితసంవిధానే-

     ఽవజ్ఞాం కృతాంజలిరిదం వినివేదయామి .. 3..

శ్లోకత్రయం విరచితం యమినా ప్రబోధా-

     నందేన నందయతు శశ్వదిదం ప్రసన్నం .

శ్రీమన్మహేశనయనోన్మదభృంగమాలా

     లాస్యాస్పదాంబుజముఖీకరుణైకపాత్రాన్ .. 4..

ఇతి శ్రీమత్పరమహంసపరివ్రాజకాచార్యస్వామిప్రకాశానందపురీవిరచితం

     దుర్గాప్రాతఃస్మరణస్తోత్రం సంపూర్ణం ..

దుర్గాప్రసాదాష్టకం

వందే నిర్బాధకరుణామరూణాం శరణావనీం .

కామపూర్ణజకారాద్యశ్రీపీఠాంతర్నివాసినీం .. 1..

        ప్రసిద్ధాం పరమేశానీం నానాతనుషు జాగ్రతీం .

        అద్వయానందసందోహమాలినీం శ్రేయసే శ్రయే .. 2..

జాగ్రత్స్వప్నసుషుప్త్యాదౌ ప్రతివ్యక్తి విలక్షణాం .

సేవే సైరిభసమ్మర్దరక్షణేషు కృతక్షణాం .. 3..

        తత్తత్కాలసముద్భూతరామకృష్ణాదిసేవితాం .

        ఏకధా దశధా క్వాపి బహుధా శక్తిమాశ్రయే .. 4..

స్తవీమి పరమేశానీం మహేశ్వరకుటుంబినీం .

సుదక్షిణామన్నపూర్ణాం లంబోదరపయస్వినీం .. 5..

        మేధా-సామ్రాజ్యదీక్షాదివీక్షారోహస్వరూపికాం .

        తామాలంబే శివాలంబాం ప్రసాదరూపికాం .. 6..

అవామా వామభాగేషు దక్షిణేష్వపి దక్షిణా .

అద్వయాపి ద్వయాకారా హృదయాంభోజగావతాత్ .. 7..

        మంత్ర భావనయా దీప్తామవర్ణాం వర్ణరూపిణీం .

        పరాం కందలికాం ధ్యాయన్ ప్రసాదమధిగచ్ఛతి .. 8..

ఇతి శ్రీదుర్గాప్రసాదద్వివేదీవిరచితం దుర్గాప్రసాదాష్టకం సంపూర్ణం .

శ్రీదుర్గా పంజరస్తోత్రం

వినియోగః-

ఓం అస్య శ్రీదుర్గా పంజరస్తోత్రస్య సూర్య ఋషిః, త్రిష్టుప్ఛందః,

ఛాయా దేవతా, శ్రీదుర్గా పంజరస్తోత్ర పాఠే వినియోగః .

ధ్యానం .

ఓం హేమ ప్రఖ్యామిందు ఖండాత్తమౌలిం శంఖాభీష్టా భీతి హస్తాం త్రినేత్రాం .

హేమాబ్జస్థాం పీన వస్త్రాం ప్రసన్నాం దేవీం దుర్గాం దివ్యరూపాం నమామి .

అపరాధ శతం కృత్వా జగదంబేతి చోచ్చరేత్ .

యాం గతిం సమవాప్నోతి నతాం బ్రహ్మాదయః సురాః .

సాపరాధోఽస్మి శరణం ప్రాప్తస్త్వాం జగదంబికే .. 1..

మార్కండేయ ఉవాచ -

దుర్గే దుర్గప్రదేశేషు దుర్వారరిపుమర్దినీ .

మర్దయిత్రీ రిపుశ్రీణాం రక్షాం కురు నమోఽస్తుతే .. 1..

పథి దేవాలయే దుర్గే అరణ్యే పర్వతే జలే .

సర్వత్రోఽపగతే దుర్గే దుర్గే రక్ష నమోఽస్తుతే .. 2..

దుఃస్వప్నే దర్శనే ఘోరే ఘోరే నిష్పన్న బంధనే .

మహోత్పాతే చ నరకే దుర్గేరక్ష నమోఽస్తుతే .. 3..

వ్యాఘ్రోరగ వరాహాని నిర్హాదిజన సంకటే .

బ్రహ్మా విష్ణు స్తుతే దుర్గే దుర్గే రక్ష నమోఽస్తుతే .. 4..

ఖేచరా మాతరః సర్వం భూచరాశ్చా తిరోహితాః .

యే త్వాం సమాశ్రితా స్తాంస్త్వం దుర్గే రక్ష నమోఽస్తుతే .. 5..

కంసాసుర పురే ఘోరే కృష్ణ రక్షణకారిణీ .

రక్ష రక్ష సదా దుర్గే దుర్గే రక్ష నమోఽస్తుతే .. 6..

అనిరుద్ధస్య రుద్ధస్య దుర్గే బాణపురే పురా .

వరదే త్వం మహాఘోరే దుర్గే రక్ష నమోఽస్తుతే .. 7..

దేవ ద్వారే నదీ తీరే రాజద్వారే చ సంకటే .

పర్వతా రోహణే దుర్గే దుర్గే రక్ష నమోఽస్తుతే .. 8..

దుర్గా పంజర మేతత్తు దుర్గా సార సమాహితం .

పఠనస్తారయేద్ దుర్గా నాత్ర కార్యా విచారణ .. 9..

రుద్రబాలా మహాదేవీ క్షమా చ పరమేశ్వరీ .

అనంతా విజయా నిత్యా మాతస్త్వమపరాజితా .. 10..

ఇతి శ్రీ మార్కండేయపురాణే దేవీమహాత్మ్యే రుద్రయామలే దేవ్యాః పంజరస్తోత్రం .

దుర్గా పంచరత్నం

తే ధ్యానయోగానుగతాః అపశ్యన్

     త్వామేవ దేవీం స్వగుణైర్నిగూఢాం .  var  దేవాత్మశక్తిం

త్వమేవ శక్తిః పరమేశ్వరస్య

     మాం పాహి సర్వేశ్వరి మోక్షదాత్రి .. 1..

దేవాత్మశక్తిః శ్రుతివాక్యగీతా

     మహర్షిలోకస్య పురః ప్రసన్నా .

గుహా పరం వ్యోమ సతః ప్రతిష్ఠా

     మాం పాహి సర్వేశ్వరి మోక్షదాత్రి .. 2..

పరాస్య శక్తిః వివిధైవ శ్రూయసే

     శ్వేతాశ్వవాక్యోదితదేవి దుర్గే .

స్వాభావికీ జ్ఞానబలక్రియా తే

     మాం పాహి సర్వేశ్వరి మోక్షదాత్రి .. 3..

దేవాత్మశబ్దేన శివాత్మభూతా

     యత్కూర్మవాయవ్యవచోవివృత్యా .

త్వం పాశవిచ్ఛేదకరీ ప్రసిద్ధా

     మాం పాహి సర్వేశ్వరి మోక్షదాత్రి .. 4..

త్వం బ్రహ్మపుచ్ఛా వివిధా మయూరీ

     బ్రహ్మప్రతిష్ఠాస్యుపదిష్టగీతా .

జ్ఞానస్వరూపాత్మతయాఖిలానాం

     మాం పాహి సర్వేశ్వరి మోక్షదాత్రి .. 5..

ఇతి పరమపూజ్య శ్రీ చంద్రశేఖరేంద్ర సరస్వతీ

స్వామీగలకృతం దుర్గా పంచరత్నం సంపూర్ణం ..

శ్రీదుర్గాపంచకం

మాతర్నమస్తే  జగదంబికే శివే !

      దుర్గా సదా దుర్గతినాశినీశ్వరీ .

త్వమాదిశక్తిర్భువనేషు కీర్త్తితా

      బ్రాహ్మీ భవానీ చ విభాసి వైష్ణవీ .. 1..

సంహారణం త్వం  కురు సింహవాహనా

      హింసాపరాణాం  మహిషాది-రక్షసాం .

సంసార-సన్మార్గ-విధౌ కృపామయీ

      కాలీ సమేషాం దహ పాప-కల్మషం .. 2..

ఆయాహి దుర్గే ! వరదా మహాయుధా

      హే దుష్ట-విధ్వంసిని ! ధర్మధారిణీ .

గంగాధరార్ధాడ్గి ! నిధేహి మంగలం

      తవానుకంపా  హృదయం పునాతు నః .. 3..

అస్మాకమంతఃకరణ-ప్రదూషణం

      భస్మీకురు త్వం  తమసాం నిరాసినీ .

శర్వాణి ! సర్వాణి  పవిత్రయ స్వయం

      ప్రసార్య పర్యావరణం సునిర్మలం .. 4..

త్వం సర్వభూతే జననీ విరాజితా

      జైత్రీ సుగాత్రీ  గిరిరాజ-నందినీ .

స్వాంతే జనానాం  భవ శాంతి-సౌఖ్యదా

      పాదారవిందే తవ నః సువందనం .. 5..

    -- రచయితా : డాె హరేకృష్ణ-మేహేరః

శ్రీదుర్గానీరాజనపంచకం

కర్పూరేణ వరేణ పావకశిఖా శాఖాయతే తేజసా

     వాసస్తేన సుకంపతే ప్రతిపలం ఘ్రాణం ముహుర్మోదతే .

నేత్రాహ్లాదకరం సుపాత్రలసితం సర్వాంగశోభాకరం

     దుర్గే ! ప్రీతమనా భవ తవ కృతే కుర్వే సునీరాజనం .. 1..

ఆదౌ దేవి ! దదే చతుస్తవ పదే త్వం జ్యోతిషా భాససే

     దృష్ట్వైతన్ మమ మానసే బహువిధా స్వాశా జరీజృంభతే .

ప్రారబ్ధాని కృతాని యాని నితరాం పాపాని మే నాశయ

     దుర్గే ! ప్రీతమనా భవ తవ కృతే కుర్వే సునీరాజనం .. 2..

నాభౌ ద్విః ప్రదదే నగేశతనయే ! త్వద్భా బహు భ్రాజతే

     తేన ప్రీతమనా నమామి సుతరాం యాచేపి మే కామనాం .

శాంతిర్భూతితతిర్విభాతు సదనే నిఃశేషసౌఖ్యం సదా

     దుర్గే ! ప్రీతమనా భవ తవ కృతే కుర్వే సునీరాజనం .. 3..

ఆస్యే తేఽపి సకృద్ దదే ద్యుతిధరే ! చంద్రాననం దీప్యతే

     దృష్ట్వా మే హృదయే విరాజతి మహా-భక్తిర్దయాసాగరే ! .

నత్వా త్వచ్చరణౌ రణాంగనమనః ! శక్తిం సుఖం కామయే

     దుర్గే ! ప్రీతమనా భవ తవ కృతే కుర్వే సునీరాజనం .. 4..

మాతో మంగలసాధికే ! శుభతనౌ తే సప్తకృత్వో దదే

     తస్మాత్ తేన ముహుర్జగద్ధితకరం సంజాయతే సన్మహః .

తద్భాసా విపదః ప్రయాంతు దురితం దుఃఖాని సర్వాణి మే

     దుర్గే ! ప్రీతమనా భవ తవ కృతే కుర్వే సునీరాజనం .. 5..

ఇతి శ్రీవ్రజకిశోరః త్రిపాఠీవిరచితం శ్రీదుర్గానీరాజనపంచకం సంపూర్ణం .

శ్రీదుర్గానామషోడశీ

దుర్గా నారాయణీశానా విష్ణుమాయా శివా సతీ .

నిత్యా సత్యా భగవతీ శర్వాణీ సర్వమంగళా .

అంబికా వైష్ణవీ గౌరీ పార్వతీ చ సనాతనీ ..

ఏషా నామ్నాం షోడశికా శ్రీదుర్గాయాః ప్రియంకరీ .

కీర్తనాదాశు సుఖదా సర్వోపద్రవనాశినీ .

ఓం దుర్గాయై నమః . నారాయణ్యై నమః . ఈశానాయై నమః . విష్ణుమాయాయై

నమః . శివాయై నమః . సత్యై నమః . నిత్యాయై నమః . సత్యాయై నమః .

భగవత్యై నమః . శర్వాణ్యై నమః . సర్వమంగళాయై నమః . అంబికాయై

నమః . వైష్ణవ్యై నమః . గౌర్యై నమః . పార్వత్యై నమః . సనాతన్యై నమః .

ఇతి శ్రీదుర్గానామషోడశీ సమాప్తా .

శ్రీదుర్గా నక్షత్రమాలికాస్తుతిః అథవా యుధిష్ఠిరకృతం దుర్గాస్తవం

  .. అథ  శ్రీదుర్గా నక్షత్రమాలికా స్తుతిః ..

     .. ఓం శ్రీ గణేశాయ నమః ..

విరాటనగరం రమ్యం గచ్ఛమానో యుధిష్ఠిరః .

అస్తువన్ మనసా దేవీం దుర్గాం త్రిభువనేశ్వరీం .. 1..

యశోదాగర్భసంభూతాం నారాయణవరప్రియాం .

నందగోపకులేజాతాం మంగళ్యాం కులవర్ధనీం .. 2..

కంసవిద్రావణకరీమసురాణాం క్షయం కరీం .

శిలాతటవినిక్షిప్తామాకాశం ప్రతిగామినీం .. 3..

వాసుదేవస్య భగినీం దివ్యమాల్య విభూషితాం .

దివ్యాంబరధరాం దేవీం ఖద్గఖేటకధారిణీం .. 4..

భారావతరణే పుణ్యే యే స్మరంతి సదాశివాం .

తాన్వై తారయసే పాపాత్ పంకేగామివ దుర్బలాం .. 5..

స్తోతుం ప్రచక్రమే భూయః వివిధైః స్తోత్రసంభవైః .

ఆమంత్ర్య దర్శనాకాంక్షీ రాజా దేవీం సహానుజః .. 6..

నమోఽస్తు వరదే కృష్ణే కుమారి బ్రహ్మచారిణి .

బాలార్క సదృశాకారే పూర్ణచంద్రనిభాననే .. 7..

చతుర్భుజే చతుర్వక్త్రే పీనశ్రోణిపయోధరే .

మయూరపింఛవలయే కేయూరాంగదధారిణి .. 8..

భాసి దేవి యథా పద్మా నారాయణపరిగ్రహః .

స్వరూపం బ్రహ్మచర్యం చ విశదం తవ ఖేచరి .. 9..

కృష్ణచ్ఛవిసమా కృష్ణా సంకర్షణసమాననా .

బిభ్రతీ విపులౌ బాహు శక్రధ్వజసముఛ్రయౌ .. 10..

పాత్రీ చ పంకజీ కంఠీ స్త్రీ విశుద్ధా చ యా భువి .

పాశం ధనుర్మహాచక్రం వివిధాన్యాయుధాని చ .. 11..

కుండలాభ్యాం సుపూర్ణాభ్యాం కర్ణాభ్యాం చ విభూషితా .

చంద్రవిస్పార్ధినా దేవి ముకేన త్వం విరాజసే .. 12..

ముకుటేన విచిత్రేణ కేశబంధేన శోభినా .

భుజంగాఽభోగవాసేన శ్రోణిసూత్రేణ రాజతా .. 13..

విభ్రాజసే చ బద్ధేన భోగేనేవేహ మంథరః .

ధ్వజేన శిఖిపింఛానాముఛ్రితేన విరాజసే .. 14..

కౌమారం వ్రతమాస్థాయ త్రిదివం పావితం త్వయా .

తేన త్వం స్తూయసే దేవి త్రిదశైః పూజ్యసేఽపి చ .. 15..

త్రైలోక్య రక్షణార్థాయ మహిషాసుర ఘాతిని .

ప్రసన్నా మే సురశ్రేష్ఠే దయాం కురు శివా భవ .. 16..

జయా త్వం విజయా చైవ సంగ్రామే చ జయప్రదా .

మమాపి విజయం దేహి వరదా త్వం చ సాంప్రతం .. 17..

వింధ్యే చైవ నగశ్రేష్ఠే తవస్థానం హి శాశ్వతం .

కాలి కాలి మహాకాలి శీధుమాంస పశుప్రియే .. 18..

కృతానుయాత్రా భూతైస్త్వం వరదా కామచారిణి .

భారావతారే యే చ త్వాం సంస్మరిష్యంతి మానవాః .. 19..

ప్రణమంతి చ యే త్వాం హి ప్రయాణే తు నరా భువి .

న తేషాం దుర్లభం కించిత్ పుత్రతో ధనతోఽపి వా .. 20..

దుర్గాత్తారయసే దుర్గే తత్త్వం దుర్గా స్మృతా జనైః .

కాంతారేష్వ-వసన్నానాం మగ్నానాం చ మహార్ణవే .. 21..

(దస్యుభిర్వా నిరుద్ధానాం త్వం గతిః పరమా నృణాం .)

జలప్రతరణే చైవ కాంతారేషు అవటేషు చ .

యే స్మరంతి మహాదేవీం న చ సీదంతి తే నరాః .. 22..

త్వం కీర్తిః శ్రీః ధృతిః సిద్ధిః హ్రీః విద్యా సంతతిర్మతిః .

సంధ్యా రాత్రిః ప్రభా నిద్రా జ్యోత్స్నా కాంతిః క్షమా దయా .. 23..

నృణాం చ బంధనం మోహం పుత్రనాశం ధనక్షయం .

వ్యాధిం మృత్యుం భయం చైవ పూజితా నాశయిష్యసి .. 24..

సోఽహం రాజ్యాత్పరిభ్రష్టః శరణం త్వాం ప్రపన్నవాన్ .

ప్రణతశ్చ యథా మూర్ధ్నా తవ దేవి సురేశ్వరి .. 25..

త్రాహి మాం పద్మపత్రాక్షి సత్యే సత్యా భవస్వ నః .

శరణం భవ మే దుర్గే శరణ్యే భక్తవత్సలే .. 26..

ఏవం స్తుతా హి సా దేవీ దర్శయామాస పాండవం .

ఉపగమ్య తు రాజానమిదం వచనమబ్రవీత్ .. 27..

శృణు రాజన్ మహాబాహో మదీయం వచనం ప్రభో .

భవిష్యతి అచిరాదేవ సంగ్రామే విజయస్తవ .. 28..

మమ ప్రసాదాత్ నిర్జిత్య హత్వా కౌరవ వాహినీం .

రాజ్యం నిష్కంటకం కృత్వా భోక్ష్యసే మేదినీం పునః .. 29..

భ్రాతృభిః సహితో రాజన్ ప్రీతిం యాస్యసి పుష్కలాం .

మత్ప్రసాదాచ్చ తే సౌఖ్యమారోగ్యం చ భవిష్యతి .. 30..

యే చ సంకీర్తయిష్యంతి లోకే విగతకల్మషాః .

తేషాం తుష్టా ప్రదాస్యామి రాజ్యమాయుః వపుః సుతం .. 31..

ప్రవాసే నగరే వాపి సంగ్రామే శతృసంకటే .

అటవ్యాం దుర్గకాంతారే సాగరే గహనే గిరౌ .. 32..

యే స్మరిష్యంతి మాం రాజన్ యథాహం భవతా స్మృతా .

న తేషాం దుర్లభం కించిత్ అస్మిన్ లోకే భవిష్యతి .. 33..

ఇదం స్తోత్రవరం భక్త్యా శృణుయాత్ వా ఫఠేత వా .

తస్య సర్వాణి కార్యాణి సిద్ధిం యాస్యంతి పాండవాః .. 34..

మత్ప్రసాదాచ్చ వస్సర్వాన్ విరాటనగరే స్థితాన్ .

న ప్రజ్ఞాస్యంతి కురవః నరా వా తన్నివాసినః .. 35..

ఇత్యుక్త్వా వరదా దేవీ యుధిష్ఠిరమరిందమం .

రక్షాం కృత్వా చ పాండూనాం తత్రైవాంతరధీయత .. 36..

ఇతి శ్రీదుర్గా నక్షత్రమాలికాస్తుతిః సమాప్తా .

ఏవం

ఇతి శ్రీమన్మహాభారతే విరాటపర్వణి పాండవప్రవేశపర్వణి

అష్టమోఽధ్యాయాంతర్గతం యుధిష్ఠిరకృతం శ్రీదుర్గాస్తవం సంపూర్ణం .

                .. ఓం తత్సత్..