Sacred Stotras & Deities

గంగాతిలకః

లలాటే కేశవం విద్యాద్ నారాయణం యథోదరే .

హృదయే మాధవం విద్యాద్ గోవిందముత్తుపకే .. 1..

విష్ణుశ్చ దక్షిణే కుక్షౌ తద్భుజే మధుసూదనం .

త్రివిక్రమం కర్ణదేశే వామే కుక్షౌ చ వామనం .. 2..

శ్రీధరం చ కరే. వామే హృషికేశం తు కర్ణికా .

పద్మనాభస్తతః పృష్టే కకుద్ దామోదరం స్మరేత్ .. 3..

ఇతి గంగాతిలకః సపూర్ణః .

గంగాతరంగః

.. శ్రీగణేశాయ నమః ..

శ్రీగంగే భాగీరథి శ్రీశంకరమౌలిమాలతీమాలే .

కరుణావతి జయ భగవతి పాహి కృపాపాంగతః శివసదయే .. 1..

పంక్తావుపవిష్టానాం సర్వేషాం తర్పణం సమం న్యాయ్యం .

మమ తు శ్రోత్రం తృప్తం గంగే ! రీతిః కథం త్వదీయేయం .. 2..

సర్వేంద్రియసౌహిత్యం యథా భవిష్యతి తథా లఘు విధేయం .

అద్యావధి యజ్జాతం జాతం గంగే ! త్వయా దయా కార్యా .. 3..

దయనీయోఽయం గంగే సర్వైధర్మాదిభిః పరిత్యక్తః .

యామి శరణం కమధునా త్వయా వినా వ్రాత్యరాజోఽహం .. 4..

పూర్వం సముద్ధృతః కతి సంప్రత్యుద్ధర్తుమనలసాసి త్వం .

అగ్రే సముద్ధరిష్యసి తన్మధ్యే మాదృశో నైవ .. 5..

పూర్వం న చైవ మాదృఙ్ నోచేదానీం పురః కుతో భవితా .

ఇతి సంఖ్యాతుమనలసా భవ భవతి జాహ్నవి త్రిపథగే త్వం .. 6..

పాపిన ఉద్ధర్తు త్వం బద్ధపరికరా శ్రుతం మనీషిభ్యః .

ఇత్థం సతి మద్విషయే గంగే కేయం ప్రమీలా త్వం .. 7..

ప్రాక్కర్మ పచేలిమతామాప్తమిదానీంతనే జనుషి .

ఇతి విదితమహో గంగే ప్రోత్కా యత్సేవనాయ ధిషణేయం .. 8..

తవ భవతు నమస్కారో మద్విషయే దేవి ! భో నమస్తుభ్యం .

కరుణావతి జయ గంగే పాహి కృపాపాంగదృష్టిపాతైః .. 9..

కతిచిద్ బ్రువంతి విందుం నితంబమాత్రం చ జానుదఘ్నం చ .

కేచిద్ గుల్ఫద్వయసంభవసింధుం దేవతాంతరాశ్రయణాత్ .. 10..

తవ సంశ్రయాద్ధి గంగే భవసింధోరస్తితాం న మన్యేఽహం .

అథవా మన్యే భ్రమం ఖేనగరః శశవిషాణమంశుజలం .. 11..

శరదాం పంచసహస్రీ తవస్థితేర్మానమితి విదామాజ్ఞా .

గంగే యదవధి విదితా తదవధి మాం పీడ్యత్యధీరత్వం .. 12..

యస్మిన్కస్మిన్ హి భవే తిర్యశ్చిత్వం సముద్ధరిష్యసి మాం .

ఇతి సత్యమథాప్యస్మిఀశ్చరమభవే పాసి చేచ్చమత్కారః .. 13..

వీచీపతితం సర్వా నద్యః సంతారయంతి కిం చిత్రం .

త్వమవీచీపతితమపి హి గంగే సంతారయస్యహో చిత్రం .. 14..

వంశానుత్పాదయసి త్వం వర్ద్ధయసే తథైవ జీవయసి .

రక్షసి విస్తారయసి స్వస్మిన్పతితం హి తారయసి .. 15..

సద్వంశభవే వంశోద్ధారిణి గంగే నమస్కరోమి త్వాం .

వంశ్యమపి దీనం ద్విజం కిం త్వం నాద్యాపి తారయసి .. 16..

నో తారయసి హి మాం చేన్మా తారయ దేవి భోః స్వతంత్రా త్వం .

మజ్జయసి తర్హి మజ్జయ గంగే స్వస్మిన్సుగండశైలమివ .. 17..

మా మాస్తు మదుద్ధారో నైవ త్వామర్థయే కదాచిదపి .

క్షుద్రం యాదోజాతం విధాయ మాం స్థాపయాశు నిజజఠరే .. 18..

యద్యపి యాదః క్షుద్రం చరతి మహచ్చేత్తథాపి మదనుమతిః .

కిం తవ గతమత్ర పరం మజ్జయ నామాశు మా విధేహి చిరం .. 19..

భవసింధౌ మజ్జాయా విభ్యతి తాభ్యః సువిద్వాంసః .

నాహం విభేమి మాతర్భవసింధౌ త్వయి మమాస్తు మజ్జైవః .. 20..

లక్ష్మీనాథం త్యక్త్వా మత్వా శ్లాఘ్యం కపర్దిసంబంధం .

గంగే భూమౌ విచరస్యతః కపర్ద్యస్మి దృగ్విషయః .. 21..

గోమూర్త్యశ్వత్థాదీనితరత్ర త్వం కురుష్వ మా మాంభోః .

కృమిమశకవేతసాదీన్ ప్రవిధాయ స్థాపయాశు నిజజఠరే .. 22..

సగరానుద్ధర్తుమనా భూరంధ్రప్లావనం కృతవతీ త్వం .

సగరోఽస్మి బహులరంధ్రః ప్లావయసి న మాం సురాపగే కిమితి .. 23..

సురసంగాత్సురధునితా ప్రాప్తా యాతా తథాపి నోక్షరతా .

భూసురసంగాదధికైకాక్షరతాప్తిః కథం న సా వ్రియతే .. 24..

త్వన్మజ్జనమేవ పరం శ్లాఘ్యం మాన్యం శ్రుతేర్వచోఽస్మాకం .

నాన్యత్రామరముక్తావలినీరాజితపదం పదం శాక్రం .. 25..

అచ్యుతపదచ్యుతాపి హి దాతుం నైనం పదం స్వతంత్రా త్వం .

కాఽన్యేదృశీ ద్వితీయా స్వపదభ్రష్టా సతీ తదర్పయితుం .. 26..

దోషత్రయాపనుత్యై త్రివిధా మర్త్యాస్త్వయి ప్రమజ్జంతి .

ద్విచతుర్దశదోషాఢ్యాంస్తాంస్త్వం కురుషే కథం త్వేతత్ .. 27..

కశ్చిత్కంచిచ్ఛ్రయతేత్యాధిక్యం లబ్ధుమితి జనస్థిత్యాం .

భూతం చతుర్విధం త్వం త్రివిధం కురుషే కథం గంగే ! .. 28..

అంబ ! త్వద్దర్శనతో ముక్తిర్న స్నానజం ఫలం జానే .

ఇతి యద్వదతి విపశ్చిత్తదలీకః స్నానతస్త్రిమూర్తిత్వం .. 29..

త్రిగుణాంశం పంకమార్ష్టిం కర్తుం మర్త్యాస్త్వయి ప్రమజ్జంతి .

తానవిశేషేణ త్వం కరోషి నిజలీలయా త్రిగుణమూర్తీన్ .. 30..

గంగే నశ్యతి జననం త్వన్మజ్జనతో వదంతి తదలీకం .

జంతునివహో నిమజ్జఀస్త్వయి భవతి హి శంకరో విధిర్విష్ణుః .. 31..

స్వర్గాదధః పతంతీ స్వోర్ధ్వం గంగే నిమజ్జతో నయసి .

సోఢ్వాఽపి విపద్గణమథ సంతః పరకార్యసాధనే వ్యగ్రాః .. 32..

గంగాప్రార్థనాతరంగో గంగాచరణే సమర్పితః శిశునా .

సగుణో విగుణో వా స్తాం శ్రావ్యం కలభాషణం హి శిశోః .. 33..

ఇతి శ్రీమదార్యాచార్యమయూరపండితానుజసూనబాలకవిరచితో

గంగార్థనాతరంగః శివాయ భూయాత్ ..

గంగాకవచం

నారద ఉవాచ -

బ్రహ్మన్ ! కేన విధానేన సర్వపాపక్షయో భవేత్ .

కథం రక్షేత్సురశ్రేష్ఠ సాధకానాం సురాపగా .. 1..

బ్రహ్మోవాచ -

సాధు సాధు త్వయా పుత్ర ! సాధు కర్మ ప్రకాశితం .

కవచం జహ్నుకన్యాయా త్రిషు లోకేషు దుర్లభం .. 2..

అప్రకాశ్యం చ యద్గోప్యమతస్తత్త్వవధార్యతాం .

అస్య శ్రీ గంగాకవచమంత్రస్య నారాయణఋషిరనుష్టుప్ఛందః

సర్వతీర్థోత్తమా గంగాదేవతా గం బీజం గాః శక్తిః అవ్యక్తం కీలకం

శ్రీగంగాప్రసాదసిద్ధ్యర్థే జపే వినియోగః .

అథ ధ్యానం -

శుభ్రాంభోజశశిప్రభాం శశిముఖీం స్వక్షాంబుజాక్షీం పరాం

     ముక్తాహారలసత్కుచాం మణిమయైరాభూషితాం భూషణైః .

కంజస్వర్ణఘటీవరాభయకరాం శ్వేతాంబరాడంబరాం

     పద్మోత్పీఠగతాం సుధాసముదితాం శ్రీదేవభూషాం భజే .. 1..

వందే దేవతరంగిణీం ప్రతిదినం బ్రహ్మాండమాఖండినీం

     శంభోర్మస్తకమండినీం మురరిపోరంఘ్య్మ్బుజాసేవినీం .

కల్యాణోత్సవకారిణీం కలిమలోన్మూలత్వనిర్మూలినీ

     మోక్షద్వారకపాటపాటనకరీం నిత్యం చిదానందినీ .. 2..

అథ కవచం -

శిరో మే పాతు సా గంగా దివ్యాచ్యుతాంఘ్రిచ్యుతా .

భాలం భాగీరథీ పాతు నేత్రే చ జహ్నునందినీ .. 3..

శ్రుతీ మే జాహ్నవీ పాతు ఘ్రాణయుగ్మం సురాపగా .

రసనాం పాతు మే నిత్యం గంగా పాపప్రణాశినీ .. 4..

వదనం సకలం పాతు సదా మందాకినీ మమ .

స్కంధౌ పాతు చ మే బాహూ గంగా సాగరగామినీ .. 5..

కరౌ రక్షతు సా గంగా శంభుమస్తకమండినీ .

హృదయం నాభిమధ్యం చ పాతు దేవనదీ మమ .. 6..

కటిద్వయం సదా పాతు బ్రహ్మాండఖండినీ మమ .

జానునీ జహ్నుజా పాతు పాయాదూరూం త్రిమార్గగా .. 7..

గుల్ఫయుగ్మం సదా పాతు సా మే శర్మప్రదాయినీ .

ప్రపదం పాతు మే నిత్యం కలికల్మషనాశినీ .. 8..

కాశీతలగతా యా చ కాలిందీసంగమా చ యా .

సా పాతు మమ సర్వాంగం గంగా గగనమేఖలా .. 9..

నిర్జరైర్వందితా యా చ చతుర్వర్గఫలప్రదా .

తస్యా ఇదం చ గంగాయాః కవచం పరమాద్భుతం .. 10..

అథ ఫలశ్రుతిః -

అనంతవ్యాధివిధ్వంసి కీర్తిబుద్ధిప్రవర్ద్ధనం .

శోకదుఃఖప్రశమనం సర్వరక్షాకరం నృణాం .. 11..

శత్రోర్వినాశనం శశ్వత్సుఖసంపత్ప్రవర్ధనం .

యోఽధీయాత్ కవచం చైతన్ముక్తపాపో భవేచ్చ సః .. 12..

ఏకకాలం ద్వికాలం చ త్రికాలం చ పఠేత్తు యః .

పఠేద్యో వై శతావృత్త్యా మాసమేకం నిరంతరం .. 13..

ధృత్వేదం కవచం కంఠే గచ్ఛేద్యో యత్ర కుత్రచిత్ .

స్వప్నే మూర్తిమయీం గంగాం వరదాం సోఽపి పశ్యతి .. 14..

ధనధాన్యసమాయుక్తః పుత్రపౌత్రసమన్వితః .

త్రిషు లోకేషు పూజ్యః స్యాదస్య పాఠాన్న సంశయః .. 15..

శృణుయాత్పరయా భక్త్యా వాచ్యమానం నరోత్తమః .

సోఽప్యఘౌఘవినిర్ముక్తో జీవన్ముక్తో భవేచ్చ యః .. 16..

దుర్భిక్షే దుర్గబంధే విషమజలచయే కాననే దుష్టచౌరైః

దీప్తే వహ్నిప్రదాహే ప్రబలరిపుభయే రాజ్యదుఃఖే ప్రవృత్తే .

స్మృత్వా దేవీం చ గంగాం త్రిభువనజననీం వా పఠేద్ యో హి చైతత్

తైస్తైర్దుఖైర్విముక్తో సపది స మనుజో జాయతే సత్యమేతత్ .. 17..

కులీనాయ చ దాతవ్యం గంగాభక్తిపరాయ చ .

విష్ణుభక్తాయ శాంతాయ శ్రద్దధానాయ సర్వదా .. 18..

కుశిష్యాయ న దాతవ్యం దుష్టాయ చ విశేషతః .

దత్వాఽభక్తాయ పుత్రాయ నేదం ఫలప్రదం భవేత్ .. 19..

సాధకాయ చ శాంతాయ గురోరాజ్ఞానువర్తినే .

దాతవ్యం చ త్వయా తాత దత్వాఽనంతఫలం భవేత్ .. 20..

ఇతి శ్రీబ్రహ్మాండపురాణే బ్రహ్మనారదసమ్వాదే

శ్రీగంగాకవచం సంపూర్ణం ..

గంగాకవచం దివ్యమంగలాఖ్యం

.. శ్రీగణేశాయ నమః ..

ఋషయ ఊచుః --

భగవన్! సర్వధర్మజ్ఞ! సర్వశాస్త్రవిశారద! .

శ్రీగంగాయాస్తు కవచం బ్రూహి నో వదతాం వర! .. 1..

గుప్తం సహస్రనామాఖ్యం స్తోత్రం పరమపావనం .

ఇదానీం శ్రోతుమిచ్ఛామి గంగాయాః కవచం శుభం .. 2..

యస్య శ్రవణమాత్రేణ గంగాదేవీ ప్రసీదతి .

పాపాని చ విలీయంతే వర్ధంతే ధనసంపదః .. 3..

సనత్కుమార ఉవాచ --

శృణుధ్వం మునయః సర్వే గుహ్యాద్గుహ్యతరం పరం .

జాహ్నవ్యా దివ్యకవచం భుక్తిముక్తిఫలప్రదం .. 4..

ఓం అస్య శ్రీగంగాకవచమంత్రస్య శ్రీసదాశివ ఋషిరనుష్టుప్ ఛందః

సంసారతారిణీ శ్రీగంగా దేవతా శ్రీ బీజం గం శక్తిః గామితి కీలకం

మమ సకలపాపక్షయపూర్వకం మోక్షసాధనే జపే వినయోగః ..

అథ ధ్యానం ప్రవక్ష్యామి గంగాయాః సురదుర్లభం .

యత్ కృత్వా మునయః సమ్యక్ పరాం సిద్ధిమితో గతాః .. 6..

నేత్రత్రయోద్భాసితచారుదేహాం శ్వేతాంబరాం చంద్రకలాత్మికాం చ .

మాణిక్యముక్తాఫలభూషితాంగీ శ్వేతాతపత్రాం కరుణారసార్ద్రాం .. 7..

సూర్యేందుకోటిద్యుతిమంగనాభిః సచామరాభిః పరివీజ్యమానాం .

చతుర్భుజాం హస్తచతుష్టయేన వరాభయే పద్మయుగం దధానాం .. 8..

దివ్యానులేపేన విభూషితాంగీ దివ్యాం దధానాం స్రజమాదిశక్తిం .

సురైరనేకైరృషిభిశ్చ దివ్యైర్నిషేవ్యమానాముపచారయోగైః .. 9..

నానావిధాన్పాతకినః ప్రపత్రాన్ సంతారయంతీ కరుణాదృశార్ద్రాం .

ధ్యాయేదిమాం పూర్ణశశాంంకశుభ్రాం నదైర్నదీభిః పరిసేవ్యమానాం .. 10..

ఏవం ధ్యాత్వా మహాదేవీ గంగాం త్రిభువనేశ్వరీం .

జపేన్మంత్రం మహాదేవ్యాస్తస్యోద్ధారో నిరూప్యతే .. 11..

ప్రణవో వాగ్భవం మాయా కామబీజం నమః పదం .

భగవత్యంబికే అంబాలికే పదమథోద్ధరేత్ .. 12..

మహామాలిని తస్యాంత ఏహ్యోహి పదముద్ధరేత్ .

అశేషతీర్థాలవాలే మాయాలక్ష్మీర్మనోభవః .. 13..

తతః శివజటాజూటాధిరూఢే పదముద్ధరేత్ .

గంగే గంగాంబికే స్వాహా మనుర్ద్వికరణాక్షరః .. 14..

సర్వసంపత్ప్రదః సర్వపాతకౌఘవినాశనః .

సర్వకల్యాణనిలయో గంగాసాన్నిధ్యకారకః .. 15..

ఏతస్య మంత్రరాజస్య మహాదేవ ఋషిః స్వయం .

విరాట్ ఛందః స్మృతం దేవీ జాహ్నవీ దేవతా స్వయం .. 16..

తారో బీజం వాగ్భవం చ శక్తిర్మాయా చ కీలకం .

తారకం కామబీజం చ ముక్తౌ చ వినియోగకః .. 17..

కుర్యాత్ షడంంగ మంత్రం స్వమాయయా ప్రణవాద్యయా .

షడ్దీర్ఘభినయాత్పశ్చాజ్జపేన్మన్న్త్రం శతాష్టకం .. 18..

తతస్తు కవచం దేవ్యాః పఠేత్ సర్వార్థసిద్ధయే .

తదహం సంప్రవక్ష్యామి శృణుధ్వం మునిపుంగవాః .. 19..

ప్రాచ్యాం శ్రీజాహ్నవీ పాతు యామ్యాం గంగా సదాఽవతు .

భీష్మసూః పశ్చిమాయాం మే ఉదీచ్యాం సురనిమ్నగా .. 20..

భాగీరథ్యగ్నికోణే మాం త్రిస్రోతాః పాతు నైరృతే .

వాయవ్యే మాం శ్వేతవాసా ఈశానే త్రిపథస్థితా .. 21..

బ్రహ్మగంగా చోర్ధ్ద్వదేశమధః పాతాలజాహ్నవీ .

దిగ్విదిక్ప్రాంతరాలే మాం గంగా స్వర్గగతాఽవతు .. 22..

హృదస్తే పాతు మే కేశానభయం మే శిరోఽవతు .

భాలం మే కమలం పాతు ధ్రువౌ చంద్రకలాఽవతు ..

నేత్రే పాతు జగద్ధాత్రీ మమోష్ఠం విజయాఽవతు .

విష్ణుః పద్మధరం పాతు శ్రోత్రే పాతు సుదర్శనా .. 23..

మందాకినీ దంతపంక్తిం స్వర్గగాగండయుగ్మకం .

సుధాజలా పాతు జిహ్వాం వాణీ పాతు ముఖం మమ .. 24..

తోతలా తాలుదేశం మే చిబుకం సర్వమంగలా .

మందాకినీ వక్త్రవృత్తం వ్యోమ-గంగాజలం మమ .. 25..

కృకోటికాం కల్మషఘ్నీ స్కంధయోః సురనిమ్నగా .

కౌర్మీ పాతు భుజద్వంద్వం పాణ్యోః ఫలకమీశ్వరీ .. 26..

కరాంగులీః పాతు చాంద్రీ నఖానాకాశచంద్రికా .

సూర్యమండలగా పాతు కక్షాం సాగరతారిణీ .. 27..

వక్షఃస్థలం పాతు నిత్యం దేవీ మేఽలకనందికా .

హృదయం పాతు చక్షుమేం సీతా పాతూదరం మమ .. 28..

పార్శ్వయోః పర్వతద్రావా స్తనౌ సోమేశ్వరీ తథా .

జగదుద్ధారిణీ నాభిం పృష్టం మకరవాహనా .. 29..

విష్ణుశక్తిః కటిం పాతు స్ఫిచౌ పాతు దయాంబుధిః .

విష్ణు పాదాబ్జసంభూతా గుహ్యం మే పరిరక్షతు .. 30..

కృపాకోమలగాత్రీ సా మూలాధారం మమావతు .

స్వాధిష్ఠానం పాతు నిత్యం పాపాదథ దవానలా .. 31..

పాయాన్మే మణిపూరం సా శాంతనోః సుఖవర్ధినీ .

అనాహతం సదా పాయాద్ భగీరథనిషేవితా .. 32..

విశుద్ధచక్రం మే పాతు వశిష్ఠోపాసితాంబికా .

ఆజ్ఞాచక్రం మమ ప్రీత్యా విశ్వామిత్రార్చితాఽవతు .. 33..

బ్రహ్మరంధ్రం సదా పాతు స్రవత్పీయూషమందిరం .

స్వయంభూలింగినీ లింగం కుండలీ పరదేవతా .. 34..

పతితోద్ధారిణీ పాతు జఠరం శంకరప్రియా .

జటాలంకారిణీ శంభోరురూయుగ్మం మమావతు .. 35..

జానూ మృడానీ మే పాతు జంఘే పాతు జగత్ప్రసూః .

లావణ్యశేవధిః పాతు గుల్ఫో గగనమేఖలా .. 36..

మత్స్యకక్షపహంసాలిరాజితా పాతు పాదయోః .

పాదాంంగులీః పాతు నిత్యం నిశ్రేణీ సమనోహరే .. 37..

రసాసృఙ్మాంసమేదాంసి పాతు మే భవతారిణీ .

మనోబుద్ధిమహంతాం మే పాతు నారాయణీ సదా .. 38..

ఆయుః కల్యాణదా పాతు వయో రక్షతు వైష్ణవీ .

భార్యాం వృద్ధికరీ పాతు పుత్రాన్ వంశకరీ మమ .. 39..

గృహం రక్షతు లక్ష్మీ మేం పాతు క్షేత్రం శివప్రియా .

ధర్మకర్త్రీ యశః పాతు ధర్మం పాతు మనఃస్వినీ .. 40..

కులం కులేశీ మే పాతు సద్గతిం పాతు సద్గతిః .

జలే స్థలేఽనలేఽరణ్యే పాతాలే రణసంకటే .. 41..

దుర్గే గృహే జగన్నాథా పాతు సర్వనదీశ్వరీ .

అగ్రతః పాతు గంగోర్ధ్వం పాతు గంగా చ పార్శ్వయోః .. 42..

గంగైవ పృష్ఠతః పాతు తథాధః పాతు మే వపుః .

ఇతీదం కవచం దివ్యం గంగాయాః పరమాద్భుతం .. 43..

ఋషయః కథితం సాక్షాన్మహాపాతకనాశనం .

ఏకకాలం ద్వికాలం వా త్రికాలం యః సదా పఠేత్ .. 44..

గంగాయాః శ్రావయేద్వాపి తస్య పాపం ప్రణశ్యతి .

వర్ధంతే సంపదః సర్వాః సంపద్యంతే మనోరథాః .. 45..

జాయతే సిద్ధయోఽష్టౌ చ నశ్యంతి విపదః క్షణాత్ .

కుష్ఠాత్ ప్రముచ్యతే కుష్ఠీ వ్యాధిభ్యశ్చాపి ముచ్యతే .. 46..

నిర్మలం స్యాన్మనస్తస్య విశుద్ధం స్ఫటికోపమం .

యస్య యస్య చ దేవస్య క్రియతే పూజనం జపః .. 47..

తస్య తస్య ప్రసాదం సా గంగాదేవీ ప్రయచ్ఛతి .

పాతకానామనేకానాం ప్రాయశ్చిత్తం చికీర్షుణా .. 48..

పఠనీయం తు గంగాయాః కవచం పాతకాపహం .

గంగామాహాత్మ్యవిణ్మంత్రీ గంగా-కవచమభ్యసేత్ .. 49..

స స్నాతః సర్వతీర్థేషు సర్వయజ్ఞేషు దీక్షితః .

సర్వాణి తేన దానాని దత్తాని మునిపుంగవాః .. 50..

శ్రీవిష్ణుస్తోషితస్తేన తోషితస్తేన శంకరః .

అర్ఘ్యదానేన సంతుష్టః కృతస్తేన దివాకరః .. 52..

తస్య పాపాని నశ్యంతి మహాంత్యపి న సంశయః .

నాభిమాత్రే జలే స్థిత్వా యో గంగాకవచం పఠేత్ .. 53..

స స్వప్నే పశ్యతి క్షిప్రం జాహ్నవీ పురతః స్థితాం .

ఇదం కవచమజ్ఞాత్వా గంగామంత్రం జపేన్నరః .. 54..

సర్వవిఘ్నైః స బాధ్యః స్యాద్వ్యాఘ్రైర్మృగంశిశుర్యథా .

గంగా గంగేతి యో బ్రూయాద్ యోజనానాం శతైరపి .

ముచ్యతే సర్వపాపేభ్యో హరిసాయుజ్యమాప్నుయాత్ .. 55..

ఇదం గంగాజలే స్థిత్వా కవచం యః సకృజ్జపేత్ .

భూతప్రేతపిశాచాదిబాధాభ్యో ముచ్యతే క్షణాత్ .. 56..

పితరస్తృప్తిమాయాంతి కవచస్యాస్య పాఠతః .

శ్రాద్ధకాలే పఠేన్మర్త్యో నయేత్స్వర్గం పితామహాన్ .. 57..

భూర్జే లిఖిత్వా కవచం మస్తకే ధారయేద్యది .

యత్ర తత్ర విపన్నోఽపి వారాణస్యాం మృతో భవేత్ .. 58..

మునిభిః కథితం దేవ్యాః జాహ్నవ్యాః కవచోత్తమం .

యూయం పఠధ్వం సతతం సద్గతిం సమవాప్స్యథ .. 59..

.. ఇతి శ్రీబ్రహ్మాండపురాణే ఋషిసనత్కుమారసంవాదే

గంగాయా దివ్యమంగలం నామ కవచం సంపూర్ణం ..

శుభమస్తు .

శుభమస్తు సర్వజగతః .

.. శ్రీగంగాయై నమః ..

గంగా మహిమా అథవా గంగాయాత్రా విధి

గంగాయాత్రాం చరేన్మర్త్యో మన ఉత్కంఠతే యదా .

స్నాత్వా దేవానృషీంశ్చైవ పితౄంశ్చైవ యమర్చ్చయేత్ .. 1..

పిధాయ వాససీ శుక్లే ప్రాణాయామం సమాచరేత్ .

మైథునం కలహం హింసాం వర్జయేద్గాంగయాత్రయా .. 2..

వాసశ్చ మలినం నైవ గృహ్ణీయాద్గాంగయాత్రికః .

గురుం గణేశం విష్ణుంచ శివం దుర్గాం సరస్వతీం .. 3..

గోబ్రాహ్మణసతీశ్చైవ ప్రణమేద్గాంగయాత్రికః .

గురవః పితరో దేవా దిక్పాలాశ్చ గ్రహాస్తథా .. 4..

ఋషయశ్చారణాః సిద్ధాః గంధర్వాః కిన్నరాస్తథా .

సర్వా దేవ్యశ్చ దేవానాం ప్రణమ్యంతే మయాధునా .. 5..

గంగాస్నానార్థచాత్రాయా భవంతు మమ సాధకాః .

ఇత్యేవం మంత్రముచ్చార్య్య గంగాయాత్రాం సమాచరేత్ .. 6..

గంగే దేవి లోకమాతర్విఘ్నోత్సారిణి తే నమః .

త్వద్దర్శనాయ సద్యాత్రాం కరోమ్యత్రానుమోదయ .. 7..

ఇత్యేవం మంత్రముచ్చార్య్య గంగాయాత్రాం సమాచరేత్ .

విల్వంచ తులసీంచైవ ప్రణమ్య భక్తిసంయుతః .. 8..

విల్వపత్రముపాఘ్నాయ గంగాయాత్రాం సమాచరేత్ .

శయనే భోజనే దానే పథి రాత్రౌ దివా తథా .. 9..

గంగా గంగేతి సంస్మృత్య కాలం సంయాపయేన్నరః .

గంగాయాత్రాం సమాసాద్య పథి చేన్మ్రియతే జనః .. 10..

గంగామృత్యుఫలం తస్య భవత్యేవ న సంశయః .

గంగాయా దర్శనే దేవా ఆచరంతి విరోధనం .. 11..

యేనాసావవగాహ్యైనాం నాస్మాభిః సమతామియాత్ .

కృతగంగార్థయాత్రస్య శరీరే పాపసంచయాః .. 12..

భవంతి వికలాః సర్వే తమాంసీవ క్షపాత్యయే .

తే పి విఘ్నానాచరంతి యేనాసౌ నైవ గచ్ఛతు .. 13..

గంగాయా వాయుసంసర్గం ప్రాప్య పాపైర్విముచ్యతే .

తదా విరోధం వై దేవా ఆచరంత్యస్య గచ్ఛతః .. 14..

గంగావాయోస్తు సంసర్గే పఠేత్స్తవమిమం నరః .

సర్వదేవేశ్వరో యేన పరితుష్యతి కేశవః .. 15..

స్వే మహిమ్ని స్థితం దేవమప్రమేయమజం విముం .

శోకమోహవినిర్ముక్తం ధ్యాయే విష్ణుం సనాతనం .. 16..

ఆసనాద్యైరసంస్పృష్టం సేవితం యోగిభిః సదా .

నిర్గుణం సర్వగం శాంతం ధ్యాయే విష్ణుం సనాతనం .. 17..

సర్వదోషవినిర్ముక్తం సుప్రభావం సునిర్మలం .

నిష్కలం శాశ్వతం దేవం ధ్యాయే విష్ణుం సనాతనం .. 18..

అతులం సుఖధర్మాణాం వ్యోమదేహం సనాతనం .

ధర్మాధర్మసమాయుక్తం ధ్యాయే విష్ణుం సనాతనం .. 19..

క్షరాక్షరవినిర్ముక్తం జన్మమృత్యువివర్జనం .

అభయం సత్యసంకల్పం ధ్యాయే విష్ణుం సనాతనం .

అమృతం సాధనం సాధ్యం యం పశ్యంతి మనీషిణః .. 20..

జ్ఞేయాఖ్యం పరమాత్మానం ధ్యాయే విష్ణుం సనాతనం .

వ్యాసాద్యైరృషిభిః సర్వైర్ధ్యానయోగపరాయణైః .. 21..

అర్చ్చితం భావకుసుమైర్ధ్యాయే విష్ణుం సనాతనం .

విష్ణ్వష్టకమిదం పుణ్యం యోగీనాం హర్షదాయకం .. 22..

యః పఠేత్పరయా భక్త్యా స విష్ణుతుల్యతామియాత్ .

విష్ణుతుల్యస్తదా భూత్వా గంగాం పశ్యేదనన్యథా .. 23..

దృష్ట్వా గంగాం మహాపుణ్యాం ప్రణమేద్దండవన్ముదా .

గంగే దేవి జగన్మాతః శివశీర్షకృతాలయే .. 24..

జన్మైతత్సఫలమ్మేఽస్తు భవతీం ప్రణమామ్యహం .

ఏతేన ఖలు మంత్రేణ హ్యష్టాంగైః ప్రణమేచ్ఛివాం .. 25..

స్మృతాసి గంగే దృష్టాసి స్పృశామి త్వాం మహేశ్వరీం .

విష్ణుదేహద్రవాకారే ప్రసీద జగదంబికే .. 26..

ఏతేన ఖలు మంత్రేణ స్పృశేద్దేవీం సనాతనీం .

తతో ద్వివాసాః స్నాయాచ్చ ఇష్టదేవప్రియార్థకః .. 27..

మజ్జంతి యేఽస్మిన్కిల దేహభాజో న తే నిమజ్జంతి పునర్భవాబ్ధౌ .

సోఽయం పురస్తాత్పయసాం ప్రభావో గంగేతి యం గాయతి వేదవర్గః .. 28..

ఆవాహనంచ తీర్థానాం నాపేక్ష్యం జాహ్నవీజలే .

నిఃసంకల్పోఽపియః స్నాయాత్స చ పాపైర్విముచ్యతే .. 29..

దేవర్షిపితృలోకానాం తర్పణం విధితశ్చరేత్ .

సంపూజయేదిష్టదేవం చింతాంతరపరాఙ్ముఖః .. 30..

గంగాతీరే వసేన్మర్త్యస్త్రిరాత్రమపి నాన్యథా .

యం క్షణం తత్ర వసతి స ఏవ సార్థకః క్షణః .. 31..

గమనే ప్రార్థయేద్దేవీం పునర్దర్శనకామ్యయా .

మాత్రా పిత్రా దుహిత్రా వా భార్య్యాపుత్రధనాదిభిః .. 32..

త్యక్తస్య న తథా దుఃఖం యథా గంగావియోగజం .

నైవ స స్యాత్క్షణో బ్రహ్మన్యత్ర గంగా న విద్యతే .. 33..

న గమ్యతే చ దేశోఽసౌ యత్ర గంగా న విద్యతే .

ఏకపాదస్థితో యస్తు తపత్యయుతవత్సరాన్ .. 34..

దండమాత్రంతు గంగాయాం వసేత్స తు విశిష్యతే .

ఏవంతు దండసంఖ్యాభిర్మాసపక్షాదివాసతః .. 35..

ఫలం దత్తే భగవతీ గంగావాసిజనాయ వై .

యాన్కాలాన్స్వర్ధూనీతీరే వసేన్మర్త్యః సమాహితః .. 36..

తావదేవాస్య పితరో దేవాశ్చ పరితోషితాః .

తావత్తు బ్రహ్మచర్య్యేణ కాలం సంయాపయేద్విజ .. 37..

తావదేవ పరస్యాన్నం న భుంజీత కదాచన .

తైర్దత్తంచ న గృహ్ణీయాత్పరనిందాం న చాచరేత్ .. 38..

గంగాతీరస్థితో యస్తు పరనిందాం సమాచరేత్ .

సర్వభూతమయో విష్ణుస్తస్మై క్రుద్ధేఽత్ పరాఙ్ముఖః .. 39..

గంగాస్నానార్థమాగత్య యో గృహ్ణాతి గృహీజనః .

తండులం వా సువర్ణం వా వస్త్రాదిం వా కదాచన .. 40..

న తస్య ఫలసిద్ధిః స్యాత్సమ్యగ్గంగా ప్రయోజనం .

స పంగుః స సదా కాణః స ఏవ పాపరాశిమాన్ .. 41..

యో గంగానికటం ప్రాప్య గంగాస్నానముపేక్షతే .

సాయం ప్రాతశ్చ మధ్యాహ్నే ద్రష్టవ్యా తీరవాసిభిః .. 42..

గంగాతీరాద్గతో దూరం న స్నాత్వా యస్తు జాహ్నవీం .

బ్రహ్మహయాదిభిః పాపైస్తత్క్షణాత్ స ప్రలిప్యతే .. 43..

గంగాస్నానరతం మర్త్యం గంగాతీరనివాసినం .

పూజయిత్వా యథాన్యాయమశ్వమేధఫలం లభేత్ .. 44..

అగంగదేశవాసీ యో భగ్నరాగో ద్విజర్షభ .

న గంగామాశ్రయేద్దేవీం పరః స విధివంచితః .. 45..

గ్రామజనపదాః శైలా ఆశ్రమాః శుచయో హితే .

యేషాం భాగీరథీ గంగా మధ్యే యాతి సరిద్వరా .. 46..

మానుష్యం దుర్లభం ప్రాప్య విద్యుత్సంపాతచంచలం .

గంగాం యః సేవతే సోఽత్ర బుద్ధేః పారం పరం గతః .. 47..

కృతపుణ్యా మహాత్మానో దేవలోకప్రపూజితాః .

సహస్రసూర్య్యప్రతిమాం గంగాం పశ్యంతి తే భువి .. 48..

సాధారణజలాపూర్ణాం సాధారణనదీమివ .

పశ్యంతి నాస్తికా గంగాం పాపోపహతలోచనాః .. 49..

అగంగవాసం సంత్యజ్య యో గంగావాసమావ్రజేత్ .

స హి బుద్ధిమతాం శ్రేష్ఠో దేవైరపి సుదుర్లభః .. 50..

పైతృకీ వసతిర్యస్య గంగాతీరే ద్విజర్షభ .

మనుష్యచర్మ్మణా నద్ధః స శివో నాత్ర సంశయః .. 51..

గంగాతీరనివాసాయ కన్యాం దత్తే తు యః శుభాం .

ప్రత్యహం పితరస్తస్య గయాశ్రాద్ధస్య భోగినః .. 52..

గంగాతీరనివాసాయ యో భూమిం ప్రదదాతి వై .

స్వర్గరాజ్యం స భుంక్తే వై యావదింద్రాశ్చతుర్ద్దశ .. 53..

కృతాపరాధంచ నరం గంగాతీరనివాసినం .

యస్తాడయేద్వచోదండైస్తస్య పాపఫలం శృణు .. 54..

విముఖాస్తస్య వై దేవాః పితరశ్చాప్యుపోషితాః .

గంగా పరిత్యజేత్తం వై సోఽగతిశ్చిరనారకీ .. 55..

గంగాతీరాలయం మర్త్యం సూర్య్యతుల్యం య ఈక్షతే .

తస్యైవ విమలం చక్షుర్దేవదర్శనసాధనం .. 56..

గంగాతీరాలయాన్లోకాన్గంగాలోకాన్వదేత యః .

స ఏవానుగృహీతః స్యాద్గంగయా ద్విజపుంగవ .. 57..

గంగాతీరాలయాన్మర్త్యాందేవైరర్యాన్కుధీర్జనః .

మనుష్యబుద్ధ్యా పాపిన్యా జైమినే హ్యవమన్యతే .. 58..

దేవా మనుష్యరూపేణ గంగాతీరే చరంతి వై .

తస్మాత్తాన్నావమన్యేత శ్రేయోర్థీ న కదాచన .. 59..

గంగాతీరద్వయే విప్ర పిశాచాశ్చ శివాజ్ఞయా .

కోటయః పంచలక్షాణి తిష్ఠంతి వాయురూపిణః .. 60..

శృణు తేషాంచ కర్మ్మాణి యదర్థే తే నిరూపితాః .

యే తత్ర పాపకర్మ్మాణో గంగాతీరే ద్విజర్షభ .. 61..

త్యజంతి విష్ఠామూత్రాణి శ్లేష్మకేశనఖాది చ .

తత్రైవ తాంస్తే సర్వాణి భోజయంత్యనురూపతః .. 62..

యే మిథ్యావాదినో దుష్టా గురుసేవాపరాఙ్ముఖాః .

వృథా హింసారతాః క్రూరా విశ్వాసఘాతినస్తథా .. 63..

తాంస్తే గంగాపిశాచా వై ముమూర్షూన్గాంగరోధసి .

క్షేత్రాన్నారాయణాన్నీత్వా స్థాపయంతి నభఃస్థలే .. 64..

శూన్యే సంత్యజ్య ప్రాణాంస్తే యాంతి దుర్గతిముత్తమాం .

తన్న పశ్యంతి పాపిష్ఠాః పశ్యంతి దివ్యచక్షుషః .. 65..

జైమినే వర్ణయామ్యస్య లక్షణాని నిబోధ మే .

శనిమంగలవారే వా నిశీథే లుప్తబోధనః .. 66..

విష్ఠామూత్రం త్యజన్భూరి చిరరోగీ బహూనపి .

వాసరాన్లుప్తసంగశ్చ సదాఘూర్ణితలోచనః .. 67..

ఊద్ధర్వశ్వాసో హృష్టదేహో గతసర్వేంద్రియాశయః .

యో మ్రియేత స ఏవాయం పిశాచైర్యస్తు క్షిప్యతే .. 68..

గంగాభైరవనామనః సంత్యన్యే శివకింకరాః .

తే రక్షంతి సదా గంగాం నానారూపవిహారిణః .. 69..

తే తు కుర్వంతి కర్మ్మాణి తాని విప్ర నిబోధ మే .

యాన్యదత్తాని పుష్పాణి నైవేద్యాదీని యాని చ .. 70..

గంగాప్రవాహస్పృష్టాని గృహీత్వా తాని తే శివాం .

పూజయంతి మహాభాగ శివవిష్ణ్వాదికానపి .. 71..

వస్త్రనిష్పీడైతం వారి త్యక్తం చాధోఽంశుకం జలే .

గృహ్ణంతి శిరమా తే వై గంగాపాతాభిశంకయా .. 72..

మదమాత్సర్య్యహింసాదియుక్తాందుష్టధియో జనాన్ .

దూరీకుర్వంతి తే దేవా యత్తే స్యురన్యతో మృతాః .. 73..

.. ఇతి గంగాజ్ఞానం ..

.. బృహద్ధర్మపురాణం . మధ్యఖండః . అధ్యాయః 55 - గంగాధర్మః ..