శ్రీ కృష్ణ సహస్రనామ స్తోత్రం
శ్రీమద్రుక్మిమహీపాలవంశరక్షామణిః స్థిరః |
రాజా హరిహరః క్షోణీం రక్షత్యంబుధిమేఖలాం || 1 ||
స రాజా సర్వతంత్రజ్ఞః సమభ్యర్చ్య వరప్రదం |
దేవం శ్రియః పతిం స్తుత్యా సమస్తౌద్వేదవేదితం || 2 ||
తస్య హృష్టాశయః స్తుత్యా విష్ణుర్గోపాంగనావృతః |
స పింఛశ్యామలం రూపం పింఛోత్తంసమదర్శయత్ || 3 ||
స పునః స్వాత్మవిన్యస్తచిత్తం హరిహరం నృపం |
అభిషిచ్య కృపావర్షైరభాషత కృతాంజలిం || 4 ||
శ్రీభగవానువాచ |
మామవేహి మహాభాగ కృష్ణం కృత్యవిదాం వర |
పురః స్థితోఽస్మి త్వద్భక్త్యా పూర్ణాః సంతు మనోరథాః || 5 ||
సంరక్షణాయ శిష్టానాం దుష్టానాం శిక్షణాయ చ |
సమృద్ధ్యై వేదధర్మాణాం మమాంశస్త్వమిహోదితః || 6 ||
రాజన్నామసహస్రేణ రామో నాంనాం స్తుతస్త్వయా |
సోఽహం సర్వవిదస్తస్మాత్ ప్రసన్నోఽస్మి విశేషతః || 7 ||
మామపి త్వం మహాభాగ మదీయచరితాత్మనా |
సంప్రీణయ సహస్రేణ నాంనాం సర్వార్థదాయినాం || 8 ||
పరాశరేణ మునినా వ్యాసేనాంనాయదర్శినా |
స్వాత్మభాజా శుకేనాపి సూక్తేఽప్యేతద్విభావితం || 9 ||
తం హి త్వమనుసంధేహి సహస్రశిరసం ప్రభుం |
దత్తాస్యేషు మయా న్యస్తం సహస్రం రక్షయిష్యతి || 10 ||
ఇదం విశ్వహితార్థాయ రసనారంగగోచరం |
ప్రకాశయ త్వం మేదిన్యాం పరమాగమసంమతం || 11 ||
ఇదం శఠాయ మూర్ఖాయ నాస్తికాయ వికీర్ణినే |
అసూయినేఽహితాయాపి న ప్రకాశ్యం కదాచన || 12 ||
వివేకినే విశుద్ధాయ వేదమార్గానుసారిణే |
ఆస్తికాయాత్మనిష్ఠాయ స్వాత్మన్యనుసృతోదయం |
కృష్ణనామసహస్రం వై కృతధీరేతదీరయేత్ || 13 ||
అస్య శ్రీకృష్ణ సహస్రనామ స్తోత్రమంత్రస్య పరాశర ఋషిః, అనుష్టుప్ ఛందః, శ్రీకృష్ణః పరమాత్మా దేవతా, శ్రీకృష్ణేతి బీజం, శ్రీవల్లభేతి శక్తిః, శార్ఙ్గీతి కీలకం, శ్రీకృష్ణప్రీత్యర్థే జపే వినియోగః ||
ధ్యానం –
కేషాం చిత్ప్రేమ పుంసాం విగళితమనసాం బాలలీలావిలాసం
కేషాం గోపాలలీలాంకితరసికతనుర్వేణువాద్యేన దేవం |
కేషాం వామాసమాజే జనితమనసిజో దైత్యదర్పాపహైవం
జ్ఞాత్వా భిన్నాభిలాషం స జయతి జగతామీశ్వరస్తాదృశోఽభూత్ || 1 ||
క్షీరాబ్ధౌ కృతసంస్తవః సురగణైర్బ్రహ్మాదిభిః పండితైః
ప్రోద్భూతో వసుదేవసద్మని ముదా చిక్రీడ యో గోకులే |
కంసధ్వంసకృతే జగామ మధురాం సారామసద్వారకాం
గోపాలోఽఖిలగోపికాజనసఖః పాయాదపాయాత్ స నః || 2 ||
ఫుల్లేందీవరకాంతిమిందువదనం బర్హావతంసప్రియం
శ్రీవత్సాంకముదారకౌస్తుభధరం పీతాంబరం సుందరం |
గోపీనాం నయనోత్పలార్చితతనుం గోగోపసంఘావృతం
గోవిందం కలవేణువాదనరతం దివ్యాంగభూషం భజే || 3 ||
ఓం | కృష్ణః శ్రీవల్లభః శార్ఙ్గీ విష్వక్సేనః స్వసిద్ధిదః |
క్షీరోదధామా వ్యూహేశః శేషశాయీ జగన్మయః || 1 ||
భక్తిగంయస్త్రయీమూర్తిర్భారార్తవసుధాస్తుతః |
దేవదేవో దయాసింధుర్దేవో దేవశిఖామణిః || 2 ||
సుఖభావః సుఖాధారో ముకుందో ముదితాశయః |
అవిక్రియః క్రియామూర్తిరధ్యాత్మస్వస్వరూపవాన్ || 3 ||
శిష్టాభిలక్ష్యో భూతాత్మా ధర్మత్రాణార్థచేష్టితః |
అంతర్యామీ కాలరూపః కాలావయవసాక్షికః || 4 ||
వసుధాయాసహరణో నారదప్రేరణోన్ముఖః |
ప్రభూష్ణుర్నారదోద్గీతో లోకరక్షాపరాయణః || 5 ||
రౌహిణేయకృతానందో యోగజ్ఞాననియోజకః |
మహాగుహాంతర్నిక్షిప్తః పురాణవపురాత్మవాన్ || 6 ||
శూరవంశైకధీః శౌరిః కంసశంకావిషాదకృత్ |
వసుదేవోల్లసచ్ఛక్తిర్దేవక్యష్టమగర్భగః || 7 ||
వసుదేవసుతః శ్రీమాన్ దేవకీనందనో హరిః |
ఆశ్చర్యబాలః శ్రీవత్సలక్ష్మవక్షాశ్చతుర్భుజః || 8 ||
స్వభావోత్కృష్టసద్భావః కృష్ణాష్టంయంతసంభవః |
ప్రాజాపత్యర్క్షసంభూతో నిశీథసమయోదితః || 9 ||
శంఖచక్రగదాపద్మపాణిః పద్మనిభేక్షణః |
కిరీటీ కౌస్తుభోరస్కః స్ఫురన్మకరకుండలః || 10 ||
పీతవాసా ఘనశ్యామః కుంచితాంచితకుంతలః |
సువ్యక్తవ్యక్తాభరణః సూతికాగృహభూషణః || 11 ||
కారాగారాంధకారఘ్నః పితృప్రాగ్జన్మసూచకః |
వసుదేవస్తుతః స్తోత్రం తాపత్రయనివారణః || 12 ||
నిరవద్యః క్రియామూర్తిర్న్యాయవాక్యనియోజకః |
అదృష్టచేష్టః కూటస్థో ధృతలౌకికవిగ్రహః || 13 ||
మహర్షిమానసోల్లాసో మహీమంగళదాయకః |
సంతోషితసురవ్రాతః సాధుచిత్తప్రసాదకః || 14 ||
జనకోపాయనిర్దేష్టా దేవకీనయనోత్సవః |
పితృపాణిపరిష్కారో మోహితాగారరక్షకః || 15 ||
స్వశక్త్యుద్ఘాటితాశేషకపాటః పితృవాహకః |
శేషోరగఫణాచ్ఛత్రః శేషోక్తాఖ్యాసహస్రకః || 16 ||
యమునాపూరవిధ్వంసీ స్వభాసోద్భాసితవ్రజః |
కృతాత్మవిద్యావిన్యాసో యోగమాయాగ్రసంభవః || 17 ||
దుర్గానివేదితోద్భావో యశోదాతల్పశాయకః |
నందగోపోత్సవస్ఫూర్తిర్వ్రజానందకరోదయః || 18 ||
సుజాతజాతకర్మశ్రీర్గోపీభద్రోక్తినిర్వృతః |
అలీకనిద్రోపగమః పూతనాస్తనపీడనః || 19 ||
స్తన్యాత్తపూతనాప్రాణః పూతనాక్రోశకారకః |
విన్యస్తరక్షాగోధూళిర్యశోదాకరలాలితః || 20 ||
నందాఘ్రాతశిరోమధ్యః పూతనాసుగతిప్రదః |
బాలః పర్యంకనిద్రాళుర్ముఖార్పితపదాంగుళిః || 21 ||
అంజనస్నిగ్ధనయనః పర్యాయాంకురితస్మితః |
లీలాక్షస్తరళాలోకః శకటాసురభంజనః || 22 ||
ద్విజోదితస్వస్త్యయనో మంత్రపూతజలాప్లుతః |
యశోదోత్సంగపర్యంకో యశోదాముఖవీక్షకః || 23 ||
యశోదాస్తన్యముదితస్తృణావర్తాదిదుస్సహః |
తృణావర్తాసురధ్వంసీ మాతృవిస్మయకారకః || 24 ||
ప్రశస్తనామకరణో జానుచంక్రమణోత్సుకః |
వ్యాలంబిచూలికారత్నో ఘోషగోపప్రహర్షణః || 25 ||
స్వముఖప్రతిబింబార్థీ గ్రీవావ్యాఘ్రనఖోజ్జ్వలః |
పంకానులేపరుచిరో మాంసలోరుకటీతటః || 26 ||
ఘృష్టజానుకరద్వంద్వః ప్రతిబింబానుకారకృత్ |
అవ్యక్తవర్ణవాగ్వృత్తిః స్మితలక్ష్యరదోద్గమః || 27 ||
ధాత్రీకరసమాలంబీ ప్రస్ఖలచ్చిత్రచంక్రమః |
అనురూపవయస్యాఢ్యశ్చారుకౌమారచాపలః || 28 ||
వత్సపుచ్ఛసమాకృష్టో వత్సపుచ్ఛవికర్షణః |
విస్మారితాన్యవ్యాపారో గోపగోపీముదావహః || 29 ||
అకాలవత్సనిర్మోక్తా వ్రజవ్యాక్రోశసుస్మితః |
నవనీతమహాచోరో దారకాహారదాయకః || 30 ||
పీఠోలూఖలసోపానః క్షీరభాండవిభేదనః |
శిక్యభాండసమాకర్షీ ధ్వాంతాగారప్రవేశకృత్ || 31 ||
భూషారత్నప్రకాశాఢ్యో గోప్యుపాలంభభర్త్సితః |
పరాగధూసరాకారో మృద్భక్షణకృతేక్షణః || 32 ||
బాలోక్తమృత్కథారంభో మిత్రాంతర్గూఢవిగ్రహః |
కృతసంత్రాసలోలాక్షో జననీప్రత్యయావహః || 33||
మాతృదృశ్యాత్తవదనో వక్త్రలక్ష్యచరాచరః |
యశోదాలాలితస్వాత్మా స్వయం స్వాచ్ఛంద్యమోహనః || 34 ||
సవిత్రీస్నేహసంశ్లిష్టః సవిత్రీస్తనలోలుపః |
నవనీతార్థనాప్రహ్వో నవనీతమహాశనః || 35 ||
మృషాకోపప్రకంపోష్ఠో గోష్ఠాంగణవిలోకనః |
దధిమంథఘటీభేత్తా కింకిణీక్వాణసూచితః || 36 ||
హైయంగవీనరసికో మృషాశ్రుశ్చౌర్యశంకితః |
జననీశ్రమవిజ్ఞాతా దామబంధనియంత్రితః || 37 ||
దామాకల్పశ్చలాపాంగో గాఢోలూఖలబంధనః |
ఆకృష్టోలూఖలోఽనంతః కుబేరసుతశాపవిత్ || 38 ||
నారదోక్తిపరామర్శీ యమళార్జునభంజనః |
ధనదాత్మజసంఘుష్టో నందమోచితబంధనః || 39 ||
బాలకోద్గీతనిరతో బాహుక్షేపోదితప్రియః |
ఆత్మజ్ఞో మిత్రవశగో గోపీగీతగుణోదయః || 40 ||
ప్రస్థానశకటారూఢో బృందావనకృతాలయః |
గోవత్సపాలనైకాగ్రో నానాక్రీడాపరిచ్ఛదః || 41 ||
క్షేపణీక్షేపణప్రీతో వేణువాద్యవిశారదః |
వృషవత్సానుకరణో వృషధ్వానవిడంబనః || 42 ||
నియుద్ధలీలాసంహృష్టః కూజానుకృతకోకిలః |
ఉపాత్తహంసగమనః సర్వజంతురుతానుకృత్ || 43 ||
భృంగానుకారీ దధ్యన్నచోరో వత్సపురస్సరః |
బలీ బకాసురగ్రాహీ బకతాలుప్రదాహకః || 44 ||
భీతగోపార్భకాహూతో బకచంచువిదారణః |
బకాసురారిర్గోపాలో బాలో బాలాద్భుతావహః || 45 ||
బలభద్రసమాశ్లిష్టః కృతక్రీడానిలాయనః |
క్రీడాసేతునిధానజ్ఞః ప్లవంగోత్ప్లవనోఽద్భుతః || 46 ||
కందుకక్రీడనో లుప్తనందాదిభవవేదనః |
సుమనోఽలంకృతశిరాః స్వాదుస్నిగ్ధాన్నశిక్యభృత్ || 47 ||
గుంజాప్రాలంబనచ్ఛన్నః పింఛైరలకవేషకృత్ |
వన్యాశనప్రియః శృంగరవాకారితవత్సకః || 48 ||
మనోజ్ఞపల్లవోత్తంసపుష్పస్వేచ్ఛాత్తషట్పదః |
మంజుశింజితమంజీరచరణః కరకంకణః || 49 ||
అన్యోన్యశాసనః క్రీడాపటుః పరమకైతవః |
ప్రతిధ్వానప్రముదితః శాఖాచతురచంక్రమః || 50 ||
అఘదానవసంహర్తా వ్రజవిఘ్నవినాశనః |
వ్రజసంజీవనః శ్రేయోనిధిర్దానవముక్తిదః || 51 ||
కాళిందీపులినాసీనః సహభుక్తవ్రజార్భకః |
కక్షాజఠరవిన్యస్తవేణుర్వల్లవచేష్టితః || 52 ||
భుజసంధ్యంతరన్యస్తశృంగవేత్రః శుచిస్మితః |
వామపాణిస్థదధ్యన్నకబళః కలభాషణః || 53 ||
అంగుళ్యంతరవిన్యస్తఫలః పరమపావనః |
అదృశ్యతర్ణకాన్వేషీ వల్లవార్భకభీతిహా || 54 ||
అదృష్టవత్సపవ్రాతో బ్రహ్మవిజ్ఞాతవైభవః |
గోవత్సవత్సపాన్వేషీ విరాట్పురుషవిగ్రహః || 55 ||
స్వసంకల్పానురూపార్థవత్సవత్సపరూపధృత్ |
యథావత్సక్రియారూపో యథాస్థాననివేశనః || 56 ||
యథావ్రజార్భకాకారో గోగోపీస్తన్యపః సుఖీ |
చిరాద్బలోహితో దాంతో బ్రహ్మవిజ్ఞాతవైభవః || 57 ||
విచిత్రశక్తిర్వ్యాలీనసృష్టగోవత్సవత్సపః |
బ్రహ్మత్రపాకరో ధాతృస్తుతః సర్వార్థసాధకః || 58 ||
బ్రహ్మ బ్రహ్మమయోఽవ్యక్తస్తేజోరూపః సుఖాత్మకః |
నిరుక్తం వ్యాకృతిర్వ్యక్తో నిరాలంబనభావనః || 59 ||
ప్రభవిష్ణురతంత్రీకో దేవపక్షార్థరూపధృత్ |
అకామః సర్వవేదాదిరణీయః స్థూలరూపవాన్ || 60 ||
వ్యాపీ వ్యాప్యః కృపాకర్తా విచిత్రాచారసంమతః |
ఛందోమయః ప్రధానాత్మా మూర్తామూర్తద్వయాకృతిః || 61 ||
అనేకమూర్తిరక్రోధః పరః ప్రకృతిరక్రమః |
సకలావరణోపేతః సర్వదేవో మహేశ్వరః || 62 ||
మహాప్రభావనః పూర్వవత్సవత్సపదర్శకః |
కృష్ణయాదవగోపాలో గోపాలోకనహర్షితః || 63 ||
స్మితేక్షాహర్షితబ్రహ్మా భక్తవత్సలవాక్ప్రియః |
బ్రహ్మానందాశ్రుధౌతాంఘ్రిర్లీలావైచిత్ర్యకోవిదః || 64 ||
బలభద్రైకహృదయో నామాకారితగోకులః |
గోపాలబాలకో భవ్యో రజ్జుయజ్ఞోపవీతవాన్ || 65 ||
వృక్షచ్ఛాయాహతాశాంతిర్గోపోత్సంగోపబర్హణః |
గోపసంవాహితపదో గోపవ్యజనవీజితః || 66|
గోపగానసుఖోన్నిద్రః శ్రీదామార్జితసౌహృదః |
సునందసుహృదేకాత్మా సుబలప్రాణరంజనః || 67 ||
తాలీవనకృతక్రీడో బలపాతితధేనుకః |
గోపీసౌభాగ్యసంభావ్యో గోధూళిచ్ఛురితాలకః || 68 ||
గోపీవిరహసంతప్తో గోపికాకృతమజ్జనః |
ప్రలంబబాహురుత్ఫుల్లపుండరీకావతంసకః || 69 ||
విలాసలలితస్మేరగర్భలీలావలోకనః |
స్రగ్భూషణానులేపాఢ్యో జనన్యుపహృతాన్నభుక్ || 70 ||
వరశయ్యాశయో రాధాప్రేమసల్లాపనిర్వృతః |
యమునాతటసంచారీ విషార్తవ్రజహర్షదః || 71 ||
కాళియక్రోధజనకః వృద్ధాహికులవేష్టితః |
కాళియాహిఫణారంగనటః కాళియమర్దనః || 72 ||
నాగపత్నీస్తుతిప్రీతో నానావేషసమృద్ధికృత్ |
అవిష్వక్తదృగాత్మేశః స్వదృగాత్మస్తుతిప్రియః || 73 ||
సర్వేశ్వరః సర్వగుణః ప్రసిద్ధః సర్వసాత్వతః |
అకుంఠధామా చంద్రార్కదృష్టిరాకాశనిర్మలః || 74 ||
అనిర్దేశ్యగతిర్నాగవనితాపతిభైక్షదః |
స్వాంఘ్రిముద్రాంకనాగేంద్రమూర్ధా కాళియసంస్తుతః || 75 ||
అభయో విశ్వతశ్చక్షుః స్తుతోత్తమగుణః ప్రభుః |
అహమాత్మా మరుత్ప్రాణః పరమాత్మా ద్యుశీర్షవాన్ || 76 ||
నాగోపాయనహృష్టాత్మా హ్రదోత్సారితకాళియః |
బలభద్రసుఖాలాపో గోపాలింగననిర్వృతః || 77 ||
దావాగ్నిభీతగోపాలగోప్తా దావాగ్నినాశనః |
నయనాచ్ఛాదనక్రీడాలంపటో నృపచేష్టితః || 78 ||
కాకపక్షధరః సౌంయో బలవాహకకేళిమాన్ |
బలఘాతితదుర్ధర్షప్రలంబో బలవత్సలః || 79 ||
ముంజాటవ్యగ్నిశమనః ప్రావృట్కాలవినోదవాన్ |
శిలాన్యస్తాన్నభృద్దైత్యసంహర్తా శాద్వలాసనః || 80 ||
సదాప్తగోపికోద్గీతః కర్ణికారావతంసకః |
నటవేషధరః పద్మమాలాంకో గోపికావృతః || 81 ||
గోపీమనోహరాపాంగో వేణువాదనతత్పరః |
విన్యస్తవదనాంభోజశ్చారుశబ్దకృతాననః || 82 ||
బింబాధరార్పితోదారవేణుర్విశ్వవిమోహనః |
వ్రజసంవర్ణితః శ్రావ్యవేణునాదః శ్రుతిప్రియః || 83 ||
గోగోపగోపీజన్మేప్సుబ్రహ్మేంద్రాద్యభివందితః |
గీతస్రుతిసరిత్పూరో నాదనర్తితబర్హిణః || 84 ||
రాగపల్లవితస్థాణుర్గీతానమితపాదపః |
విస్మారితతృణగ్రాసమృగో మృగవిలోభితః || 85 ||
వ్యాఘ్రాదిహింస్రసహజవైరహర్తా సుగాయనః |
గాఢోదీరితగోబృందప్రేమోత్కర్ణితతర్ణకః || 86 ||
నిష్పందయానబ్రహ్మాదివీక్షితో విశ్వవందితః |
శాఖోత్కర్ణశకుంతౌఘశ్ఛత్రాయితబలాహకః || 87 ||
ప్రసన్నః పరమానందశ్చిత్రాయితచరాచరః |
గోపికామదనో గోపీకుచకుంకుమముద్రితః || 88 ||
గోపకన్యాజలక్రీడాహృష్టో గోప్యంశుకాపహృత్ |
స్కంధారోపితగోపస్త్రీవాసాః కుందనిభస్మితః || 89 ||
గోపీనేత్రోత్పలశశీ గోపికాయాచితాంశుకః |
గోపీనమస్క్రియాదేష్టా గోప్యేకకరవందితః || 90 ||
గోప్యంజలివిశేషార్థీ గోపక్రీడావిలోభితః |
శాంతవాసస్ఫురద్గోపీకృతాంజలిరఘాపహః || 91 ||
గోపీకేళివిలాసార్థీ గోపీసంపూర్ణకామదః |
గోపస్త్రీవస్త్రదో గోపీచిత్తచోరః కుతూహలీ || 92 ||
బృందావనప్రియో గోపబంధుర్యజ్వాన్నయాచితా |
యజ్ఞేశో యజ్ఞభావజ్ఞో యజ్ఞపత్న్యభివాంఛితః || 93 ||
మునిపత్నీవితీర్ణాన్నతృప్తో మునివధూప్రియః |
ద్విజపత్న్యభిభావజ్ఞో ద్విజపత్నీవరప్రదః || 94 ||
ప్రతిరుద్ధసతీమోక్షప్రదో ద్విజవిమోహితా |
మునిజ్ఞానప్రదో యజ్వస్తుతో వాసవయాగవిత్ || 95 ||
పితృప్రోక్తక్రియారూపశక్రయాగనివారణః |
శక్రాఽమర్షకరః శక్రవృష్టిప్రశమనోన్ముఖః || 96 ||
గోవర్ధనధరో గోపగోబృందత్రాణతత్పరః |
గోవర్ధనగిరిచ్ఛత్రచండదండభుజార్గళః || 97 ||
సప్తాహవిధృతాద్రీంద్రో మేఘవాహనగర్వహా |
భుజాగ్రోపరివిన్యస్తక్ష్మాధరక్ష్మాభృదచ్యుతః || 98 ||
స్వస్థానస్థాపితగిరిర్గోపీదధ్యక్షతార్చితః |
సుమనః సుమనోవృష్టిహృష్టో వాసవవందితః || 99 ||
కామధేనుపయఃపూరాభిషిక్తః సురభిస్తుతః |
ధరాంఘ్రిరోషధీరోమా ధర్మగోప్తా మనోమయః || 100 ||
జ్ఞానయజ్ఞప్రియః శాస్త్రనేత్రః సర్వార్థసారథిః |
ఐరావతకరానీతవియద్గంగాప్లుతో విభుః || 101 ||
బ్రహ్మాభిషిక్తో గోగోప్తా సర్వలోకశుభంకరః |
సర్వవేదమయో మగ్ననందాన్వేషీ పితృప్రియః || 102 ||
వరుణోదీరితాత్మేక్షాకౌతుకో వరుణార్చితః |
వరుణానీతజనకో గోపజ్ఞాతాత్మవైభవః || 103 ||
స్వర్లోకాలోకసంహృష్టగోపవర్గస్త్రివర్గదః |
బ్రహ్మహృద్గోపితో గోపద్రష్టా బ్రహ్మపదప్రదః || 104 ||
శరచ్చంద్రవిహారోత్కః శ్రీపతిర్వశకః క్షమః |
భయాపహో భర్తృరుద్ధగోపికాధ్యానగోచరః || 105 ||
గోపికానయనాస్వాద్యో గోపీనర్మోక్తినిర్వృతః |
గోపికామానహరణో గోపికాశతయూథపః || 106 ||
వైజయంతీస్రగాకల్పో గోపికామానవర్ధనః |
గోపకాంతాసునిర్దేష్టా కాంతో మన్మథమన్మథః || 107 ||
స్వాత్మాస్యదత్తతాంబూలః ఫలితోత్కృష్టయౌవనః |
వల్లవీస్తనసక్తాక్షో వల్లవీప్రేమచాలితః || 108 ||
గోపీచేలాంచలాసీనో గోపీనేత్రాబ్జషట్పదః |
రాసక్రీడాసమాసక్తో గోపీమండలమండనః || 109 ||
గోపీహేమమణిశ్రేణిమధ్యేంద్రమణిరుజ్జ్వలః |
విద్యాధరేందుశాపఘ్నః శంఖచూడశిరోహరః || 110 ||
శంఖచూడశిరోరత్నసంప్రీణితబలోఽనఘః |
అరిష్టారిష్టకృద్దుష్టకేశిదైత్యనిషూదనః || 111 ||
సరసః సస్మితముఖః సుస్థిరో విరహాకులః |
సంకర్షణార్పితప్రీతిరక్రూరధ్యానగోచరః || 112 ||
అక్రూరసంస్తుతో గూఢో గుణవృత్త్యుపలక్షితః |
ప్రమాణగంయస్తన్మాత్రావయవీ బుద్ధితత్పరః || 113 ||
సర్వప్రమాణప్రమథీ సర్వప్రత్యయసాధకః |
పురుషశ్చ ప్రధానాత్మా విపర్యాసవిలోచనః || 114 ||
మధురాజనసంవీక్ష్యో రజకప్రతిఘాతకః |
విచిత్రాంబరసంవీతో మాలాకారవరప్రదః || 115 ||
కుబ్జావక్రత్వనిర్మోక్తా కుబ్జాయౌవనదాయకః |
కుబ్జాంగరాగసురభిః కంసకోదండఖండనః || 116 ||
ధీరః కువలయాపీడమర్దనః కంసభీతికృత్ |
దంతిదంతాయుధో రంగత్రాసకో మల్లయుద్ధవిత్ || 117 ||
చాణూరహంతా కంసారిర్దేవకీహర్షదాయకః |
వసుదేవపదానంరః పితృబంధవిమోచనః || 118 ||
ఉర్వీభయాపహో భూప ఉగ్రసేనాధిపత్యదః |
ఆజ్ఞాస్థితశచీనాథః సుధర్మానయనక్షమః || 119 ||
ఆద్యో ద్విజాతిసత్కర్తా శిష్టాచారప్రదర్శకః |
సాందీపనికృతాభ్యస్తవిద్యాభ్యాసైకధీస్సుధీః || 120 ||
గుర్వభీష్టక్రియాదక్షః పశ్చిమోదధిపూజితః |
హతపంచజనప్రాప్తపాంచజన్యో యమార్చితః || 121 ||
ధర్మరాజజయానీతగురుపుత్ర ఉరుక్రమః |
గురుపుత్రప్రదః శాస్తా మధురాజనమానదః || 122 ||
జామదగ్న్యసమభ్యర్చ్యో గోమంతగిరిసంచరః |
గోమంతదావశమనో గరుడానీతభూషణః || 123 ||
చక్రాద్యాయుధసంశోభీ జరాసంధమదాపహః |
సృగాలావనిపాలఘ్నః సృగాలాత్మజరాజ్యదః || 124 ||
విధ్వస్తకాలయవనో ముచుకుందవరప్రదః |
ఆజ్ఞాపితమహాంభోధిర్ద్వారకాపురకల్పనః || 125 ||
ద్వారకానిలయో రుక్మిమానహంతా యదూద్వహః |
రుచిరో రుక్మిణీజానిః ప్రద్యుంనజనకః ప్రభుః || 126 ||
అపాకృతత్రిలోకార్తిరనిరుద్ధపితామహః |
అనిరుద్ధపదాన్వేషీ చక్రీ గరుడవాహనః || 127 ||
బాణాసురపురీరోద్ధా రక్షాజ్వలనయంత్రజిత్ |
ధూతప్రమథసంరంభో జితమాహేశ్వరజ్వరః || 128 ||
షట్చక్రశక్తినిర్జేతా భూతభేతాళమోహకృత్ |
శంభుత్రిశూలజిచ్ఛంభుజృంభణః శంభుసంస్తుతః || 129 ||
ఇంద్రియాత్మేందుహృదయః సర్వయోగేశ్వరేశ్వరః |
హిరణ్యగర్భహృదయో మోహావర్తనివర్తనః || 130 ||
ఆత్మజ్ఞాననిధిర్మేధాకోశస్తన్మాత్రరూపవాన్ |
ఇంద్రోఽగ్నివదనః కాలనాభః సర్వాగమాధ్వగః || 131 ||
తురీయసర్వధీసాక్షీ ద్వంద్వారామాత్మదూరగః |
అజ్ఞాతపారో వశ్యశ్రీరవ్యాకృతవిహారవాన్ || 132 ||
ఆత్మప్రదీపో విజ్ఞానమాత్రాత్మా శ్రీనికేతనః |
బాణబాహువనచ్ఛేత్తా మహేంద్రప్రీతివర్ధనః || 133 ||
అనిరుద్ధనిరోధజ్ఞో జలేశాహృతగోకులః |
జలేశవిజయీ వీరః సత్రాజిద్రత్నయాచకః || 134 ||
ప్రసేనాన్వేషణోద్యుక్తో జాంబవద్ధృతరత్నదః |
జితర్క్షరాజతనయాహర్తా జాంబవతీప్రియః || 135 ||
సత్యభామాప్రియః కామః శతధన్వశిరోహరః |
కాళిందీపతిరక్రూరబంధురక్రూరరత్నదః || 136 ||
కైకేయీరమణో భద్రాభర్తా నాగ్నజితీధవః |
మాద్రీమనోహరః శైబ్యాప్రాణబంధురురుక్రమః || 137 ||
సుశీలాదయితో మిత్రవిందానేత్రమహోత్సవః |
లక్ష్మణావల్లభో రుద్ధప్రాగ్జ్యోతిషమహాపురః || 138 ||
సురపాశావృతిచ్ఛేదీ మురారిః క్రూరయుద్ధవిత్ |
హయగ్రీవశిరోహర్తా సర్వాత్మా సర్వదర్శనః || 139 ||
నరకాసురవిచ్ఛేత్తా నరకాత్మజరాజ్యదః |
పృథ్వీస్తుతః ప్రకాశాత్మా హృద్యో యజ్ఞఫలప్రదః || 140 ||
గుణగ్రాహీ గుణద్రష్టా గూఢస్వాత్మా విభూతిమాన్ |
కవిర్జగదుపద్రష్టా పరమాక్షరవిగ్రహః || 141 ||
ప్రపన్నపాలనో మాలీ మహద్బ్రహ్మవివర్ధనః |
వాచ్యవాచకశక్త్యర్థః సర్వవ్యాకృతసిద్ధిదః || 142 ||
స్వయంప్రభురనిర్వేద్యః స్వప్రకాశశ్చిరంతనః |
నాదాత్మా మంత్రకోటీశో నానావాదనిరోధకః || 143 ||
కందర్పకోటిలావణ్యః పరార్థైకప్రయోజకః |
అమరీకృతదేవౌఘః కన్యకాబంధమోచనః || 144 ||
షోడశస్త్రీసహస్రేశః కాంతః కాంతామనోభవః |
క్రీడారత్నాచలాహర్తా వరుణచ్ఛత్రశోభితః || 145 ||
శక్రాభివందితః శక్రజననీకుండలప్రదః |
అదితిప్రస్తుతస్తోత్రో బ్రాహ్మణోద్ఘుష్టచేష్టనః || 146 ||
పురాణస్సంయమీ జన్మాలిప్తః షడ్వింశకోఽర్థదః |
యశస్యనీతిరాద్యంతరహితః సత్కథాప్రియః || 147 ||
బ్రహ్మబోధః పరానందః పారిజాతాపహారకః |
పౌండ్రకప్రాణహరణః కాశిరాజనిషూదనః || 148 ||
కృత్యాగర్వప్రశమనో విచక్రవధదీక్షితః |
కంసవిధ్వంసనః సాంబజనకో డింభకార్దనః || 149 ||
మునిర్గోప్తా పితృవరప్రదః సవనదీక్షితః |
రథీ సారథ్యనిర్దేష్టా ఫాల్గునః ఫాల్గునిప్రియః || 150 ||
సప్తాబ్ధిస్తంభనోద్భూతో హరిః సప్తాబ్ధిభేదనః |
ఆత్మప్రకాశః పూర్ణశ్రీరాదినారాయణేక్షితః || 151 ||
విప్రపుత్రప్రదశ్చైవ సర్వమాతృసుతప్రదః |
పార్థవిస్మయకృత్పార్థప్రణవార్థప్రబోధనః || 152 ||
కైలాసయాత్రాసుముఖో బదర్యాశ్రమభూషణః |
ఘంటాకర్ణక్రియామౌఢ్యాత్తోషితో భక్తవత్సలః || 153 ||
మునిబృందాదిభిర్ధ్యేయో ఘంటాకర్ణవరప్రదః |
తపశ్చర్యాపరశ్చీరవాసాః పింగజటాధరః || 154 ||
ప్రత్యక్షీకృతభూతేశః శివస్తోతా శివస్తుతః |
కృష్ణాస్వయంవరాలోకకౌతుకీ సర్వసంమతః || 155 ||
బలసంరంభశమనో బలదర్శితపాండవః |
యతివేషార్జునాభీష్టదాయీ సర్వాత్మగోచరః || 156 ||
సుభద్రాఫాల్గునోద్వాహకర్తా ప్రీణితఫాల్గునః |
ఖాండవప్రీణితార్చిష్మాన్మయదానవమోచనః || 157 ||
సులభో రాజసూయార్హయుధిష్ఠిరనియోజకః |
భీమార్దితజరాసంధో మాగధాత్మజరాజ్యదః || 158 ||
రాజబంధననిర్మోక్తా రాజసూయాగ్రపూజనః |
చైద్యాద్యసహనో భీష్మస్తుతః సాత్వతపూర్వజః || 159 ||
సర్వాత్మార్థసమాహర్తా మందరాచలధారకః |
యజ్ఞావతారః ప్రహ్లాదప్రతిజ్ఞాప్రతిపాలకః || 160 ||
బలియజ్ఞసభాధ్వంసీ దృప్తక్షత్రకులాంతకః |
దశగ్రీవాంతకో జేతా రేవతీప్రేమవల్లభః || 161 ||
సర్వావతారాధిష్ఠాతా వేదబాహ్యవిమోహనః |
కలిదోషనిరాకర్తా దశనామా దృఢవ్రతః || 162 ||
అమేయాత్మా జగత్స్వామీ వాగ్మీ చైద్యశిరోహరః |
ద్రౌపదీరచితస్తోత్రః కేశవః పురుషోత్తమః || 163 ||
నారాయణో మధుపతిర్మాధవో దోషవర్జితః |
గోవిందః పుండరీకాక్షో విష్ణుశ్చ మధుసూదనః || 164 ||
త్రివిక్రమస్త్రిలోకేశో వామనః శ్రీధరః పుమాన్ |
హృషీకేశో వాసుదేవః పద్మనాభో మహాహ్రదః || 165 ||
దామోదరశ్చతుర్వ్యూహః పాంచాలీమానరక్షణః |
సాల్వఘ్నస్సమరశ్లాఘీ దంతవక్త్రనిబర్హణః || 166 ||
దామోదరప్రియసఖః పృథుకాస్వాదనప్రియః |
ఘృణీ దామోదరః శ్రీదో గోపీపునరవేక్షకః || 167 ||
గోపికాముక్తిదో యోగీ దుర్వాసస్తృప్తికారకః |
అవిజ్ఞాతవ్రజాకీర్ణపాండవాలోకనో జయీ || 168 ||
పార్థసారథ్యనిరతః ప్రాజ్ఞః పాండవదౌత్యకృత్ |
విదురాతిథ్యసంతుష్టః కుంతీసంతోషదాయకః || 169 ||
సుయోధనతిరస్కర్తా దుర్యోధనవికారవిత్ |
విదురాభిష్ఠుతో నిత్యో వార్ష్ణేయో మంగళాత్మకః || 170 ||
పంచవింశతితత్త్వేశశ్చతుర్వింశతిదేహభాక్ |
సర్వానుగ్రాహకః సర్వదాశార్హసతతార్చితః || 171 ||
అచింత్యో మధురాలాపః సాధుదర్శీ దురాసదః |
మనుష్యధర్మానుగతః కౌరవేంద్రక్షయేక్షితా || 172 ||
ఉపేంద్రో దానవారాతిరురుగీతో మహాద్యుతిః |
బ్రహ్మణ్యదేవః శ్రుతిమాన్ గోబ్రాహ్మణహితాశయః || 173 ||
వరశీలః శివారంభః సువిజ్ఞానవిమూర్తిమాన్ |
స్వభావశుద్ధః సన్మిత్రః సుశరణ్యః సులక్షణః || 174 ||
ధృతరాష్ట్రగతో దృష్టిప్రదః కర్ణవిభేదనః |
ప్రతోదధృద్విశ్వరూపవిస్మారితధనంజయః || 175 ||
సామగానప్రియో ధర్మధేనుర్వర్ణోత్తమోఽవ్యయః |
చతుర్యుగక్రియాకర్తా విశ్వరూపప్రదర్శకః || 176 ||
బ్రహ్మబోధపరిత్రాతపార్థో భీష్మార్థచక్రభృత్ |
అర్జునాయాసవిధ్వంసీ కాలదంష్ట్రావిభూషణః || 177 ||
సుజాతానంతమహిమా స్వప్నవ్యాపారితార్జునః |
అకాలసంధ్యాఘటనశ్చక్రాంతరితభాస్కరః || 178 ||
దుష్టప్రమథనః పార్థప్రతిజ్ఞాపరిపాలకః |
సింధురాజశిరఃపాతస్థానవక్తా వివేకదృక్ || 179 ||
సుభద్రాశోకహరణో ద్రోణోత్సేకాదివిస్మితః |
పార్థమన్యునిరాకర్తా పాండవోత్సవదాయకః || 180 ||
అంగుష్ఠాక్రాంతకౌంతేయరథః శక్తోఽహిశీర్షజిత్ |
కాలకోపప్రశమనో భీమసేనజయప్రదః || 181 ||
అశ్వత్థామవధాయాసత్రాతపాండుసుతః కృతీ |
ఇషీకాస్త్రప్రశమనో ద్రౌణిరక్షావిచక్షణః || 182 ||
పార్థాపహారితద్రౌణిచూడామణిరభంగురః |
ధృతరాష్ట్రపరామృష్టభీమప్రతికృతిస్మయః || 183 ||
భీష్మబుద్ధిప్రదః శాంతః శరచ్చంద్రనిభాననః |
గదాగ్రజన్మా పాంచాలీప్రతిజ్ఞాపరిపాలకః || 184 ||
గాంధారీకోపదృగ్గుప్తధర్మసూనురనామయః |
ప్రపన్నార్తిభయచ్ఛేత్తా భీష్మశల్యవ్యథాపహః || 185 ||
శాంతః శాంతనవోదీర్ణసర్వధర్మసమాహితః |
స్మారితబ్రహ్మవిద్యార్థప్రీతపార్థో మహాస్త్రవిత్ || 186 ||
ప్రసాదపరమోదారో గాంగేయసుగతిప్రదః |
విపక్షపక్షక్షయకృత్పరీక్షిత్ప్రాణరక్షణః || 187 ||
జగద్గురుర్ధర్మసూనోర్వాజిమేధప్రవర్తకః |
విహితార్థాప్తసత్కారో మాసకాత్పరివర్తదః || 188 ||
ఉత్తంకహర్షదాత్మీయదివ్యరూపప్రదర్శకః |
జనకావగతస్వోక్తభారతః సర్వభావనః || 189 ||
అసోఢయాదవోద్రేకో విహితాప్తాదిపూజనః |
సముద్రస్థాపితాశ్చర్యముసలో వృష్ణివాహకః || 190 ||
మునిశాపాయుధః పద్మాసనాదిత్రిదశార్థితః |
సృష్టిప్రత్యవహారోత్కః స్వధామగమనోత్సుకః || 191 ||
ప్రభాసాలోకనోద్యుక్తో నానావిధనిమిత్తకృత్ |
సర్వయాదవసంసేవ్యః సర్వోత్కృష్టపరిచ్ఛదః || 192 ||
వేలాకాననసంచారీ వేలానిలహృతశ్రమః |
కాలాత్మా యాదవోఽనంతః స్తుతిసంతుష్టమానసః || 193 ||
ద్విజాలోకనసంతుష్టః పుణ్యతీర్థమహోత్సవః |
సత్కారాహ్లాదితాశేషభూసురః సురవల్లభః || 194 ||
పుణ్యతీర్థాప్లుతః పుణ్యః పుణ్యదస్తీర్థపావనః |
విప్రసాత్కృతగోకోటిః శతకోటిసువర్ణదః || 195 ||
స్వమాయామోహితాశేషవృష్ణివీరో విశేషవిత్ |
జలజాయుధనిర్దేష్టా స్వాత్మావేశితయాదవః || 196 ||
దేవతాభీష్టవరదః కృతకృత్యః ప్రసన్నధీః |
స్థిరశేషాయుతబలః సహస్రఫణివీక్షణః || 197 ||
బ్రహ్మవృక్షవరచ్ఛాయాసీనః పద్మాసనస్థితః |
ప్రత్యగాత్మా స్వభావార్థః ప్రణిధానపరాయణః || 198 ||
వ్యాధేషువిద్ధపూజ్యాంఘ్రిర్నిషాదభయమోచనః |
పులిందస్తుతిసంతుష్టః పులిందసుగతిప్రదః || 199 ||
దారుకార్పితపార్థాదికరణీయోక్తిరీశితా |
దివ్యదుందుభిసంయుక్తః పుష్పవృష్టిప్రపూజితః || 200 ||
పురాణః పరమేశానః పూర్ణభూమా పరిష్టుతః |
శుకవాగమృతాబ్ధీందుః గోవిందో యోగినాం పతిః || 201 ||
వసుదేవాత్మజః పుణ్యో లీలామానుషవిగ్రహః |
జగద్గురుర్జగన్నాథో గీతామృతమహోదధిః || 202 ||
పుణ్యశ్లోకస్తీర్థపాదో వేదవేద్యో దయానిధిః |
నారాయణో యజ్ఞమూర్తిః పన్నగాశనవాహనః |
పతిరాద్యః పరం బ్రహ్మ పరమాత్మా పరాత్పరః || 203 ||
శ్రీపరమాత్మా పరాత్పరః ఓం నమః ఇతి ||
ఇదం సహస్రం కృష్ణస్య నాంనాం సర్వార్థదాయకం |
అనంతరూపీ భగవాన్ వ్యాఖ్యాతాఽఽదౌ స్వయంభువే || 204 ||
తేన ప్రోక్తం వసిష్ఠాయ తతో లబ్ధా పరాశరః |
వ్యాసాయ తేన సంప్రోక్తం శుకో వ్యాసాదవాప్తవాన్ || 205 ||
తచ్ఛిష్యైర్బహుభిర్భూమౌ ఖ్యాపితం ద్వాపరే యుగే |
కృష్ణాజ్ఞయా హరిహరః కలౌ ప్రాఖ్యాపయద్విభుః || 206 ||
ఇదం పఠతి భక్త్యా యః శృణోతి చ సమాహితః |
స్వసిద్ధ్యై ప్రార్థయంత్యేనం తీర్థక్షేత్రాదిదేవతాః || 207 ||
ప్రాయశ్చిత్తాన్యశేషాణి నాలం యాని వ్యపోహితుం |
తాని పాపాని నశ్యంతి సకృదస్య ప్రశంసనాత్ || 208 ||
ఋణత్రయవిముక్తస్య శ్రౌతస్మార్తానువర్తినః |
ఋషేస్త్రిమూర్తిరూపస్య ఫలం విందేదిదం పఠన్ || 209 ||
ఇదం నామసహస్రం యః పఠత్యేతచ్ఛృణోతి చ |
శివలింగసహస్రస్య స ప్రతిష్ఠాఫలం లభేత్ || 210 ||
ఇదం కిరీటీ సంజప్య జయీ పాశుపతాస్త్రభాక్ |
కృష్ణస్య ప్రాణభూతః సన్ కృష్ణం సారథిమాప్తవాన్ || 211 ||
ద్రౌపద్యా దమయంత్యా చ సావిత్ర్యా చ సుశీలయా |
దురితాని జితాన్యేతజ్జపాదాప్తం చ వాంఛితం || 212 ||
కిమిదం బహునా శంసన్మానవో మోదనిర్భరః |
బ్రహ్మానందమవాప్యాంతే కృష్ణసాయూజ్యమాప్నుయాత్ || 213 ||
ఇతి శ్రీవిష్ణుధర్మోత్తర పురాణే శ్రీ కృష్ణ సహస్రనామ స్తోత్రం ||
.png){kind=avatar}
.png){kind=avatar}
.png){kind=avatar}
