Sacred Stotras & Deities

త్రిపురాతిలకం

శ్రీగణేశాయ నమః .

కల్పశాఖిగణసత్ప్రసూనమధుపానకేలికుతుకభ్రమత్

      షట్పదారవమనోహరే కనకభూధరే లలితమండపే .

అత్యుదారమణిపీఠమధ్యవినివాసినీమఖిలమోహినీం

      భక్తియోగసులభాం భజే భువనమాతరం త్రిపురసుందరీం .. 1..

ఏకకాలసముదీయమానతరుణార్కకోటిసదృశస్ఫుర-

      ద్దేహకాంతిభరధోరణీమిలనలోహితీకృతదిగంతరాం .

వాగధీతవిభవాం విపద్యభయదాయినీమఖిలమోహినీం

      ఆగమార్థమణిదీపికామనిశమాశ్రయే త్రిపురసుందరిం .. 2..

ఈషదున్మిషదమర్త్యశాఖికుసుమావలీవిమలతారకా-

      వృందసుందరసుధాంశుఖండసుభగీకృతాతిగురుకైశికాం .

నీలకుంచితఘనాలకాం నిటిలభుషణాయతవిలోచనాం

      నీలకంఠసుకృతోన్నతిం సతతమాశ్రయే త్రిపురసుందరీం .. 3..

లక్ష్మహీనవిధులక్షనిర్జితవిచక్షణాననసరోరుహాం

      ఇక్షుకార్ముకశరాసనోపమితచిల్లికాయుగమతల్లికాం .

లక్షయే మనసి సంతతం సకలదుష్కృతక్షయవిధాయినీం

      ఉక్షవాహనతపోవిభూతిమహదక్షరాం త్రిపురసుందరీం .. 4..

హ్రీమదప్రమదకామకౌతుకకృపాదిభావపిశునాయత-

      స్నిగ్ధముగ్ధవిశదత్రివర్ణవిమలాలసాలసవిలోచనాం .

సుందరాధరమణిప్రభామిలితమందహాసనవచంద్రికాం

      చంద్రశేఖరకుటుంబినీమనిశమాశ్రయే త్రిపురసుందరీం .. 5..

హస్తమృష్టమణిదర్పణోజ్జ్వలమనోజ్ఞదండఫలకద్వయే

      బింబితానుపమకుండలస్తబకమండితాననసరోరుహాం .

స్వర్ణపంకజదలాంతరుల్లసితకర్ణికాసదృశనాసికాం

      కర్ణవైరిసఖసోదరీమనిశమాశ్రయే త్రిపురసుందరీం .. 6..

సన్మరందరసమాధురీతులనకర్మఠాక్షరసముల్లస-

      న్నర్మపేశలవచోవిలాసపరిభూతనిర్మలసుధారసాం .

కమ్రవక్త్రపవనాగ్రహప్రచలదున్మిషద్భ్రమరమండలాం

      తుర్మహే మనసి శర్మదామనిశమంబికాం త్రిపురసుందరీం .. 7..

కమ్రకాంతిజితతారపూరమణిసూత్రమండలసముల్లసత్

      కంఠకాండకమనీయతాపహృతకంబురాజరుచిడంబరాం .

కించిదానతమనోహరాం సయుగచుంబిచారుమణికర్ణికాం

      పంచబాణపరిపంథిపుణ్యలహరీం భజే త్రిపురసుందరీం .. 8..

హస్తపద్మలసదిక్షుచాపసృణిపాశపుష్పవిశిఖోజ్జ్వలాం

      తప్తహేమరచితాభిరామకటకాంగులీయవలయాదికాం .

వృత్తనిస్తులనిరంతరాలకఠినోన్నతస్తనతృణీభవ-

      న్మత్తహస్తివరమస్తకాం మనసి చింతయే త్రిపురసుందరీం .. 9..

లక్షగాఢపరిరంభతుష్టహరహాసగౌరతరలోల్లసత్

      చారుహారనికరాభిరామకుచభారతాంతతనుమధ్యమాం .

రోమరాజిలలితోదరీమధికనిమ్ననాభిమవలోకయే

      కామరాజపరదేవతామనిశమాశ్రయే త్రిపురసుందరీం .. 10..

హీరమండలనిరంతరోల్లసితజాతరూపమయమేఖలా

      చారుకాంతిపరిరంభసుందరసుసూక్ష్మచీనవసనాంచితాం .

మారవీరరసచాతురీధృతధురీణతుంగజఘనస్థలాం

      ధారయే మనసి సంతతం త్రిదశవందితాం త్రిపురసుందరీం .. 11..

సప్తసప్తకిరణానభిజ్ఞపరివర్ధమానకదలీతను-

      స్పర్ధిముగ్ధమధురోరుదండయుగమందితేందుధరలోచనాం .

వృత్తజానుయుగవల్గుభావజితచిత్తసంభవసముద్గకాం

      నిత్యమేవ పరిశీలయే మనసి ముక్తిదాం త్రిపురసుందరీం .. 12..

కంఠకాండరుచికుండతాకరణలీలయా సకలకేకినాం

      జంఘయా తులితకేతకీముకులసంఘయా భృతముదంచితాం .

అంబుజోదరవిడంబిచారుపదపల్లవాం హృదయదర్పణే

      బింబితామివ విలోకయే సతతమంబికాం త్రిపురసుందరీం .. 13..

లభ్యమానకమలార్చనప్రణతితత్పరైరనిశమాస్థయా

      కల్పకోటిశతసంచితేన సుకృతేన కైశ్చన నరోత్తమైః .

కల్పశాఖిగణకల్ప్యమానకనకాభిషేకసుభగాకృతిం

      కల్పయామి హృది చిత్పయోజనవషట్పదీం త్రిపురసుందరీం .. 14..

హ్రీమితి ప్రథితమంత్రమూర్తిరచలాత్మజేత్యుదధికన్యకే-

      త్యంబుజాసనకుటుంబినీతి వివిధోపగీతమహిమోదయాం .

సేవకాభిమతకామధేనుమఖిలాగమావగమవైభవాం

      భావయామి హృది భావితాఖిలచరాచరాం త్రిపురసుందరీం .. 15..

స్తోత్రరాజమముమాత్తమోదమహరాగమే ప్రయతమానసో

      కీర్తయన్నిహ నరోత్తమో విజితవిత్తపో విపులసంపదాం .

ప్రార్థ్యమానపరిరంభకేలిరబలాజనైరపగతైషణో

      గాత్రమాత్రపతనావధావమృతమక్షరం పదమవాప్నుయాత్ ..

ఇతి త్రిపురాతిలకస్తోత్రం సమాప్తం ..

కల్పశాఖిస్తవః

త్రిపురా భారతీ లఘుస్తవః

   .. ఓం నమః త్రిపురాయై ..

ఐంద్రస్యేవ శరాసనస్య దధతీ మధ్యే లలాటం ప్రభాం

     శౌక్లీం కాంతిమనుష్ణగోరివ శిరస్యాతన్వతీ సర్వతః .

ఏషాఽసౌ త్రిపురా హృది ద్యుతిరివోష్ణాంశోః సదాహఃస్థితా

     ఛింద్యాన్నః సహసా పదైస్త్రిభిరఘం జ్యోతిర్మయీ వాఙ్మయీ .. 1..

యా మాత్రా త్రపుసీలతాతనులసత్తంతూత్థితిస్పర్ద్ధినీ

     వాగ్బీజే ప్రథమే స్థితా తవ సదా తాం మన్మహే తే వయం .

శక్తిః కుండలినీతి విశ్వజననవ్యాపారబద్ధోద్యమా

     జ్ఞాత్వేత్థం న పునః స్పృశంతి జననీగర్భేఽర్భకత్వం నరాః .. 2..

దృష్ట్వా సంభ్రమకారి వస్తు సహసా ఐ ఐ ఇతి వ్యాహృతం

     యేనాకూతవశాదపీహ వరదే ! బిందుం వినాఽప్యక్షరం .

తస్యాపి ధ్రువమేవ దేవి ! తరసా జాతే తవాఽనుగ్రహే

     వాచః సూక్తిసుధారసద్రవముచో నిర్యాంతి వక్త్రాంబుజాత్ .. 3..

యన్నిత్యే తవ కామరాజమపరం మంత్రాక్షరం నిష్కలం

     తత్ సారస్వతమిత్యవైతి విరలః కశ్చిద్ బుధశ్చేద్ భువి .

ఆఖ్యానం ప్రతిపర్వ సత్యతపసో యత్కీర్తయంతో ద్విజాః

     ప్రారంభే ప్రణవాస్పదం ప్రణయితాం నీత్వోచ్చరంతి స్ఫుటం .. 4..

యత్సద్యో వచసాం ప్రవృత్తికరణే దృష్టప్రభావం బుధై-

     స్తార్తీయీకమహం నమామి మనసా తద్బీజమిందుప్రభం .

అస్త్వౌర్వోఽపి సరస్వతీమనుగతో జాడ్యాంబువిచ్ఛిత్తయే

     గౌఃశబ్దో గిరి వర్తతే స నియతం యోగం వినా సిద్ధిదః .. 5..

ఏకైకం తవ దేవి ! బీజమనఘం సవ్యంజనావ్యంజనం

     కూటస్థం యది వా పృథక్క్రమగతం యద్వా స్థితం వ్యుత్క్రమాత్ .

యం యం కామమపేక్ష్య యేన విధినా కేనాపి వా చింతితం

     జప్తం వా సఫలీకరోతి తరసా తం తం సమస్తం నృణాం .. 6..

వామే పుస్తకధారిణీమభయదాం సాక్షస్రజం దక్షిణే

     భక్తేభ్యో వరదానపేశలకరాం కర్పూరకుందోజ్జ్వలాం .

ఉజ్జృంభాంబుజపత్రకాంతనయనస్నిగ్ధప్రభాలోకినీం

     యే త్వామంబ ! న శీలయంతి మనసా తేషాం కవిత్వం కుతః .. 7..

యే త్వాం పాండురపుండరీకపటలస్పష్టాభిరామప్రభాం

     సించంతీమమృతద్రవైరివ శిరో ధ్యాయంతి మూర్ధ్ని స్థితాం .

అశ్రాంతం వికటస్ఫుటాక్షరపదా నిర్యాతి వక్త్రాంబుజాత్

     తేషాం భారతి భారతీ సురసరిత్కల్లోలలోలోర్మ్మిభిః .. 8..

యే సిందూరపరాగపుంజపిహితాం త్వత్తేజసా ద్యామిమా-

     ముర్వీ చాపి విలీనయావకరసప్రస్తారమగ్నామివ .

పశ్యంతి క్షణమప్యనన్యమనసస్తేషామనంగజ్వర-

     క్లాంతాస్త్రస్తకురంగశావకదృశో వశ్యా భవంతి స్త్రియః .. 9..

చంచత్కాంచనకుండలాంగదధరామాబద్ధకాంచీస్రజం

     యే త్వాం చేతసి తద్గతే క్షణమపి ధ్యాయంతి కృత్వా స్థిరం .

తేషాం వేశ్మని విభ్రమాదహరహః స్ఫారీ భవంత్యశ్చిరాద్

     మాద్యత్కుంజరకర్ణతాలతరలాః స్థైర్యం భజంతే శ్రియః .. 10..

ఆర్భట్యా శశిఖండమండితజటాజూటాం నృముండస్రజం

     బంధూకప్రసవారుణాంబరధరాం ప్రేతాసనాధ్యాసినీం .

త్వాం ధ్యాయంతి చతుర్భుజాం త్రినయనామాపీనతుంగస్తనీం

     మధ్యే నిమ్నవలిత్రయాంకితతనుం త్వద్రూపసంపత్తయే .. 11..

జాతోఽప్యల్పపరిచ్ఛదే క్షితిభృతాం సామాన్యమాత్రే కులే

     నిఃశేషావనిచక్రవర్తిపదవీం లబ్ధ్వా ప్రతాపోన్నతః .

యద్విద్యాధరవృందవందితపదః శ్రీవత్సరాజోఽభవద్

     దేవి! త్వచ్చరణాంబుజప్రణతిజః సోఽయం ప్రసాదోదయః .. 12..

చండి ! త్వచ్చరణాంబుజార్చనకృతే బిల్వీదలోల్లుంటన-

     త్రుట్యత్కంటకకోటిభిః పరిచయం యేషాం న జగ్ముః కరాః .

తే దండాంకుశచక్రచాపకులిశశ్రీవత్సమత్స్యాంకితై-

     ర్జాయంతేపృథివీభుజః కథమివాంభోజప్రభైః పాణిభిః .. 13..

విప్రాః క్షోణిభుజో విశస్తదితరే క్షీరాజ్యమధ్వైక్షవై

     స్త్వాం దేవి ! త్రిపురే ! పరాపరకలాం సంతర్ప్య పూజావిధౌ .

యాం యాం ప్రార్థయతే మనః స్థిరధియాం తేషాం త ఏవ ధ్రువం

     తాం తాం సిద్ధిమవాప్నువంతి తరసా విఘ్నైరవిఘ్నీకృతా .. 14..

శబ్దానాం జననీ త్వమత్ర భువనే వాగ్వాదినీత్యుచ్యసే

     త్వత్తః కేశవవాసవప్రభృతయోఽప్యావిర్భవంతి ధ్రువం .

లీయంతే ఖలు యత్ర కల్పవిరతౌ బ్రహ్మాదయస్తేఽప్యమీ

     సా త్వం కాచిదచింత్యరూపమహిమా శక్తిః పరా గీయసే .. 15..

దేవానాం త్రితయం త్రయీ హుతభుజాం శక్తిత్రయం త్రిస్వరా

     స్త్రైలోక్యం త్రిపదీ త్రిపుష్కరమథ త్రిబ్రహ్మ వర్ణాస్త్రయః .

యత్కించిజ్జగతి త్రిధా నియమితం వస్తు త్రివర్గాదికం

     తత్సర్వం త్రిపురేతి నామ భగవత్యన్వేతి తే తత్త్వతః .. 16..

లక్ష్మీం రాజకులే జయాం రణముఖే క్షేమంకరీమధ్వని

     క్రవ్యాదద్విపసర్పభాజి శబరీం కాంతారదుర్గే గిరౌ .

భూతప్రేతపిశాచజృంభకభయే స్మృత్వా మహాభైరవీం

     వ్యామోహే త్రిపురాం తరంతి విపదస్తారాం చ తోయప్లవే .. 17..

మాయా కుండలినీ క్రియా మధుమతీ కాలీ కలామాలినీ

     మాతంగీ విజయా జయా భగవతీ దేవీ శివా శాంభవీ .

శక్తిః శంకరవల్లభా త్రినయనా వాగ్వాదినీ భైరవీ

     హ్రీంకారీ త్రిపురా పరాపరమయీ మాతా కుమారీత్యసి .. 18..

ఆ ఈ పల్లవితైః పరస్పరయుతైర్ద్వి-త్రిక్రమాద్యక్షరైః

     కాద్యైః క్షాంతగతైః స్వరాదిభిరథ క్షాంతైశ్చ తైః సస్వరైః .

నామాని త్రిపురే! భవంతి ఖలు యాన్యత్యంతగుహ్యాని తే

     తేభ్యో భైరవపత్ని వింశతిసహస్రేభ్యః పరేభ్యో నమః .. 19..

బోద్ధవ్యా నిపుణం బుధైస్తుతిరియం కృత్వా మనస్తద్గతం

     భారత్యాస్త్రిపురేత్యనన్యమనసో యత్రాద్యవృత్తే స్ఫుటం .

ఏక-ద్వి-త్రిపదక్రమేణ కథితస్తత్పాదసంఖ్యాక్షరై-

     ర్మంత్రోద్ధారవిధిర్విశేషసహితః సత్సంప్రదాయాన్వితః .. 20..

సావద్యం నిరవద్యమస్తు యది వా కింవాఽనయా చింతయా

     నూనం స్తోత్రమిదం పఠిష్యతి జనో యస్యాస్తి భక్తిస్త్వయి .

సంచింత్యాపి లఘుత్వమాత్మని దృఢం సంజాయమానం హఠాత్

     త్వద్భక్త్యా ముఖరీకృతేన రచితం యస్మాన్మయాపి ధ్రువం .. 21..

ఇతి శ్రీసోమతిలకసూరివిరచితః శ్రీత్రిపురా భారతీ లఘుస్తవః సమాప్తః .

త్రిపురసుందర్యష్టకం

అథ త్రిపురసుందరీ అష్టకం .

కదంబవనచారిణీం మునికదంబకాదంబినీం

నితంబజిత భూధరాం సురనితంబినీసేవితాం .

నవాంబురుహలోచనామభినవాంబుదశ్యామలాం

త్రిలోచనకుటుంబినీం త్రిపురసుందరీమాశ్రయే .. 1..

కదంబవనవాసినీం కనకవల్లకీధారిణీం

మహార్హమణిహారిణీం ముఖసముల్లసద్వారుణీం .

దయావిభవకారిణీం విశదలోచనీం చారిణీం

త్రిలోచనకుటుంబినీం త్రిపురసుందరీమాశ్రయే .. 2..

కదంబవనశాలయా కుచభరోల్లసన్మాలయా

కుచోపమితశైలయా గురుకృపాలసద్వేలయా .

మదారుణకపోలయా మధురగీతవాచాలయా

కయాఽపి ఘననీలయా కవచితా వయం లీలయా .. 3..

కదంబవనమధ్యగాం కనకమండలోపస్థితాం

షడంబురుహవాసినీం సతతసిద్ధసౌదామినీం .

విడంబితజపారుచిం వికచచంద్రచూడామణిం

త్రిలోచనకుటుంబినీం త్రిపురసుందరీమాశ్రయే .. 4..

కుచాంచితవిపంచికాం కుటిలకుంతలాలంకృతాం

కుశేశయనివాసినీం కుటిలచిత్తవిద్వేషిణీం .

మదారుణవిలోచనాం మనసిజారిసంమోహినీం

మతంగమునికన్యకాం మధురభాషిణీమాశ్రయే .. 5..

స్మరప్రథమపుష్పిణీం రుధిరబిందునీలాంబరాం

గృహీతమధుపాత్రికాం మదవిఘూర్ణనేత్రాంచలాం .

ఘనస్తనభరోన్నతాం గలితచూలికాం శ్యామలాం

త్రిలోచనకుటుంబినీం త్రిపురసుందరీమాశ్రయే .. 6..

సకుంకుమవిలేపనామలకచుంబికస్తూరికాం

సమందహసితేక్షణాం సశరచాపపాశాంకుశాం .

అశేషజనమోహినీమరుణమాల్య భూషాంబరాం

జపాకుసుమభాసురాం జపవిధౌ స్మరామ్యంబికాం .. 7..

పురందరపురంధ్రికా చికురబంధసైరంధ్రికాం

పితామహపతివ్రతా పుటపటీరచర్చారతాం .

ముకుందరమణీమణీలసదలంక్రియాకారిణీం

భజామి భువనాంబికాం సురవధూటికాచేటికాం .. 8..

.. ఇతి శ్రీమద్ శంకరాచార్యవిరచితం త్రిపురసుందర్యష్టకం సమాప్తం ..

కదంబవనవాసినీ స్తోత్రం చ

త్రిపురసుందరీషోడశోపచారపూజా

శ్రీగణేశాయ నమః .

కల్పలతాదిసురద్రుమవాటీకల్పితరత్నగృహాధినివాసాం .

కల్పశతార్జితపుణ్యవిశేషాచ్చేతసి భావనయాహముపాసే .. 1..

ఏణధరాశ్మకృతోన్నతధిష్ణ్యం హేమవినిర్మితపాదమనోజ్ఞం .

శోణశిలాఫలకం చ విశాలం దేవి సుఖాసనమద్య దదామి .. 2..

ఈశమనోహరరూపవిలాసే శీతలచందనకుంకుమమిశ్రం .

హృద్యసువర్ణఘటే పరిపూర్ణం పాద్యమిదం త్రిపురేశి గృహాణ .. 3..

లబ్ధభవత్కరుణోఽహమిదానీం రత్నసుమాక్షతయుక్తమనర్ధం .

రుక్మవినిర్మితపాత్రవిశేషేష్వర్ఘ్యమిదం త్రిపురేశి దదామి .. 4..

హ్రీమితి మంత్రజపేన సుగమ్యే హేమలతోజ్జ్వలదివ్యశరీరే .

యోగిమనఃసమశీతజలేన హ్యాచమనం త్రిపురేఽద్య విధేహి .. 5..

హస్తలసత్కటకాదిసుభూషా ఆదరతోఽమ్బ వరోప్య నిధాయ .

చందనవాసితమంత్రితతోయైః స్నానమయి త్రిపురేశి విధేహి .. 6..

సంచితమంబ మయా హ్యతిమూల్యం కుంకుమశోణమతీవ మృదుత్వం .

శంకరతుంగతరాంకనివాసే వస్త్రయుగం త్రిపురే పరిధేహి .. 7..

కందలదంశుకిరీటమనర్ఘం కంకణకుండలనూపురహారం .

అంగదమంగులిభూషణమంబ స్వీకురు దేవి పురాధినివాసే .. 8..

హస్తలసచ్చతురాయుధజాలే శస్తతరం మృగనాభిసమేతం .

సద్ధనసారసుకుంకుమమిశ్రం చందనపంకమిదం చ గృహాణ .. 9..

లబ్ధవికాసకదమ్వకజాతీచంపకపంకజకేతకయుక్తైః .

పుష్పచయైర్మనసావచితైస్త్వామంబ పురేశి భవాని భజామి .. 10..

హ్రీంపదశోభిమహామనురూపే ధూరసిమంత్రవరేణ మనోజ్ఞం .

అష్టసుగంధరజఃకృతమాద్యే ధూపమిమం త్రిపురేశి దదామి .. 11..

సంతమసాపహముజ్జ్వ్లపాత్రే గవ్యఘృతైః పరివర్ధితదేహం .

చంపకకుడ్మలవృందసమానం దీపగణం త్రిపురేఽద్య గృహాణ .. 12..

కల్పితమద్య ధియాఽమృతకల్పం దుగ్ధసితాయుతమన్నవిశేషం .

మాషవినిర్మిలపూపసహస్రం స్వీకురు దేవి నివేదనమాద్యే .. 13..

లంఘితకేతకవర్ణవిశేషైః శోధితకోమలనాగదలైశ్చ .

మౌక్తికచూర్ణయుతైః క్రముకాద్యైః పూర్ణతరాంబ పురస్తవ పాత్రీ .. 14..

హ్రీంత్రయపూరితమంత్రవిశేషం పంచదశీమపి షోడశరూపం .

సంచితపాపహరం చ జపిత్వా మంత్రసుమాంజలిమంబ దదామి .. 15..

శ్రీపదపూర్ణమహామనురూపే శ్రీశివకామమహేశ్వరజాయే .

శ్రీగుహవందితపాదపయోజే శ్రీలలితాపరమేశి నమస్తే .. 16..

ఇతి శ్రీత్రిపురసుందరీషోడశోపచారపూజా సంపూర్ణా ..

త్రిపురసుందరీవేదసారస్తవః

శ్రీగణేశాయ నమః .

కస్తూరీపంకభాస్వద్గలచలదమలస్థూలముక్తావలీకా

     జ్యోత్స్నాశుద్ధావదాతా శశిశిశుముకుటాలంకృతా బ్రహ్మపత్నీ .

సాహిత్యాంభోజభృంగీ కవికులవినుతా సాత్త్వికీం వాగ్విభూతిం

     దేయాన్మే శుభవస్త్రా కరచలవలయా వల్లకీం వాదయంతీ .. 1..

ఏకాంతే యోగివృందైః ప్రశమితకరణైః క్షుత్పిపాసావిముక్తైః

     సానందం ధ్యానయోగాద్విసగుణసద్దశీ దృశ్యతే చిత్తమధ్యే .

యా దేవీ హంసరూపా భవభయహరణం సాధకానాం విధత్తే

     సా నిత్యం నాదరూపా త్రిభువనజననీ మోదమావిష్కరోతు .. 2..

ఈక్షిత్రీ సృష్టికాలే త్రిభువనమథ యా తత్క్షణేఽనుప్రవిశ్య

     స్థేమానం ప్రాపయంతీ నిజగుణవిభవైః సర్వథా వ్యాప్య విశ్వం .

సంహర్త్రీ సర్వభాసాం విలయనసమయే స్వాత్మని స్వప్రకాశా

     సా దేవీ కర్మబంధం మమ భవకరణం నాశ్యత్వాదిశక్తిః .. 3..

లక్ష్యా యా చక్రరాజే నవపురలసితే యోగినీవృందగుప్తే

     సౌవర్ణే శైలశృంగే సురగణరచితే తత్త్వసోపానయుక్తే .

మంత్రిణ్యా మేచకాంగ్యా కుచభరనతయా కోలముఖ్యా చ సార్ధం

     సామ్రాజ్ఞీ సా మదీయా మదగజగమనా దీర్ఘమాయుస్తనోతు .. 4..

హ్రీంకారాంభోజభృంగీ హయముఖవినుతా హానివృద్ధ్యాదిహీనా

     హంసోఽహంమంత్రరాజ్ఞీ హరిహయవరదా హాదిమంత్రార్థరూపా .

హస్తే చిన్ముద్రికాఢ్యా హతబహుదనుజా హస్తికృత్తిప్రియా మే

     హార్దం శోకాతిరేకం శమయతు లలితాఘీశ్వరీ పాశహస్తా .. 5..

హస్తే పంకేరుహాభే సరససరసిజం బిభ్రతీ లోకమాతా

     క్షీరోదన్వత్సుకన్యా కరివరవినుతా నిత్యపుష్టాక్ష గేహా .

పద్మాక్షీ హేమవర్ణా మురరిపుదయితా శేవధిః సంపదాం యా

     సా మే దారిద్ర్యదోషం దమయతు కరుణాదృష్టిపాతైరజస్రం .. 6..

సచ్చిద్బ్రహ్మస్వరూపాం సకలగుణయుతాం నిర్గుణాం నిర్వికారాం

     రాగద్వేషాదిహంత్రీం రవిశశినయనాం రాజ్యదానప్రవీణాం .

చత్వారింశత్త్రికోణే చతురధికసమే చక్రరాజే లసంతీం

     కామాక్షీం కామితానాం వితరణచతురాం చేతసా భావయామి .. 7..

కందర్పే శాంతదర్పే త్రినయననయనజ్యోతిషా దేవవృందైః

     సాశంకం సాశ్రుపాతం సవినయకరుణం యాచితా కామపత్న్యా .

యా దేవీ దృష్టిపాతైః పునరపి మదనం జీవయామాస సద్యః

     సా నిత్యం రోగశాంత్యై ప్రభవతు లలితాధీశ్వరీ చిత్ప్రకాశా .. 8..

హవ్యైః కవ్యైశ్చ సర్వైః శ్రుతిచయవిహితైః కర్మభిః కర్మశీలా

     ధ్యానాద్యైరష్టభిశ్చ ప్రశమితకలుషా యోగినః పర్ణభక్షాః .

యామేవానేకరూపాం ప్రతిదినమవనౌ సంశ్రయంతే విధిజ్ఞాః

     సా మే మోహాంధకారం బహుభవజనితం నాశయత్వాదిమాతా .. 9..

లక్ష్యా మూలత్రికోణే గురువరకరుణాలేశతః కామపీఠే

     యస్యాః విశ్వం సమస్తం బహుతరవితతం జాయతే కుండలిన్యాః .

యస్యాః శక్తిప్రరోహాదవిరలమమృతం విందతే యోగివృందం

     తాం వందే నాదరూపాం ప్రణవపదమయీం ప్రాణినాం ప్రాణదాత్రీం .. 10..

హ్రీంకారాంభోధిలక్ష్మీం హిమగిరితనయామీశ్వరీమీశ్వరాణాం

     హ్రీంమంత్రారాధ్యదేవీం శ్రుతిశతశిఖరైర్మృగ్యమాణాం మృగాక్షీం .

హ్రీంమంత్రాంతైస్త్రికూటైః స్థిరతరమతిభిర్ధార్యమాణాం జ్వలంతీం

     హ్రీం హ్రీం హ్రీమిత్యజస్రం హృదయసరసిజే భావయేఽహం భవానీం .. 11..

సర్వేషాం ధ్యానమాత్రాత్సవితురుదరగా చోదయంతీ మనీషాం

     సావిత్రీ తత్పదార్థా శశియుతమకుటా పంచశీర్షా త్రినేత్రా

హస్తాగ్రైః శంఖచక్రాద్యఖిలజనపరిత్రాణదక్షాయుధానాం

     బిభ్రాణా వృందమంబా విశదయతు మతిం మామకీనాం మహేశీ .. 12..

కర్త్రీ లోకస్య లీలావిలసితవిధినా కారయిత్రీ క్రియాణాం

     భర్త్రీ స్వానుప్రవేశాద్వియదనిలముఖైః పంచభూతైః స్వసృష్టైః .

హర్త్రీ స్వేనైవ ధామ్నా పునరపి విలయే కాలరూపం దధానా

     హన్యాదామూలమస్మత్కలుషభరముమా భుక్తిముక్తిప్రదాత్రీ .. 13..

లక్ష్యా యా పుణ్యజాలైర్గురువరచరణాంభోజసేవావిశేషాద్-

     దృశ్యా స్వాంతే సుధీభిర్దరదలితమహాపద్మకోశేన తుల్యే .

లక్షం జస్వాపి యస్యా మనువరమణిమాసిద్ధిమంతో మహాంతః

     సా నిత్యం మామకీనే హృదయసరసిజే వాసమంగీకరోతు .. 14..

హ్రీంశ్రీర్మైంమంత్రరూపా హరిహరవినుతాఽగస్త్యపత్నీప్రదిష్టా

     హాదిః కాద్యర్ణతత్త్వా సురపతివరదా కామరాజప్రదిష్టా .

దుష్టానాం దానవానాం మదభరహరణా దుఃఖహంత్రీ బుధానాం

     సామ్రాజ్ఞీ చక్రరాజ్ఞీ ప్రదిశతు కుశలం మహ్యమోంకారరూపా .. 15..

శ్రీంమంత్రార్థస్వరూపా శ్రితజనదురితధ్వాంతహంత్రీ శరణ్యా

     శ్రౌతస్మార్తక్రియాణామవికలఫలదా భాలనేత్రస్య దారాః .

శ్రీచక్రాంతర్నిషణ్ణా గుహవరజననీ దుష్టహంత్రీ వరేణ్యా

     శ్రీమత్సింహాసనేశీ ప్రదిశతు విపులాం కీర్తిమానందరూపా .. 16..

శ్రీచక్రవరసామ్రాజ్ఞీ శ్రీమత్త్రిపురసుందరీ .

శ్రీగుహాన్వయసౌవర్ణదీపికా దిశతు శ్రియం .. 17..

ఇతి శ్రీమత్త్రిపురసుందరీవేదసారస్తవః సంపూర్ణః ..

త్రిపురసుందరీవేదపాదస్తోత్రం

వేదపాదస్తవం వక్ష్యే దేవ్యాః ప్రియచికీర్షయా .

యథామతి మతిం దేవస్తన్నో దంతిః ప్రచోదయాత్ .. 1..

అకించిత్కరకర్మభ్యః ప్రత్యాహృత్య కృపావశాత్ .

సుబ్రహ్మణ్యః స్తుతావస్యాం తన్నః షణ్ముఖః ప్రచోదయాత్ .. 2..

అకారాదిక్షకారాంతవర్ణావయవశాలినీ .

వీణాపుస్తకహస్తాఽవ్యాత్ ప్రణో దేవీ సరస్వతీ .. 3..

యా వర్ణపదవాక్యార్థగద్యపద్యస్వరూపిణీ .

వాచి నర్తయతు క్షిప్రం మేధాం దేవీ సరస్వతీ .. 4..

ఉపాస్యమానా విప్రేంద్రైః సంధ్యాసు చ తిసృష్వపి .

సద్యః ప్రసీద మే మాతః సంధ్యావిద్యే సరస్వతీ .. 5..

మందా నిందాలోలుపాఽహం స్వభావాత్

ఏతత్స్తోత్రం పూర్యతే కిం మయేతి .

మా తే భీతిర్హే మతే త్వాదృశానాం

ఏషా నేత్రీ రాధసా సూనృతానాం .. 6..

తరంగభృకుటీకోటిభంగ్యా తర్జయతే జరాం .

సుధామయాయ శుభ్రాయ సింధూనాం పతయే నమః .. 7..

తస్య మధ్యే మణిద్వీపః కల్పకారామభూషితః .

అస్తు మే లలితావాసః స్వస్తిదా అభయంకరః .. 8..

కదంబమంజరీనిర్యద్వారుణీపారణోన్మదైః .

ద్విరేఫైర్వర్ణనీయాయ వనానాం పతయే నమః .. 9..

తత్ర వప్రావలీలీలాగగనోల్లంఘిగోపురం .

మాతః కౌతూహలం దద్యాత్సుహార్యం నగరం తవ .. 10..

మకరందఝరీమజ్జన్మిలిందకులసంకులాం .

మహాపద్మాటవీం వందే యశసా సంపరీవృతాం .. 11..

తత్రైవ చింతామణిధోరణోఽర్చిభిర్-

వినిర్మితం రోపితరత్నశృంగం .

భజే భవానీ భవనావతంసం

ఆదిత్యవర్ణం తమసః పరస్తాత్ .. 12..

మునిభిః స్వాత్మలాభాయ యచ్చక్రం హృది సేవ్యతే .

తత్ర పశ్యామి బుధ్యా తదక్షరే పరమే వ్యోమన్ .. 13..

పంచబ్రహ్మమయో మంచస్తత్ర యో బిందుమధ్యగః .

తవ కామేశి వాసోఽయమాయుష్మంతం కరోతు మాం .. 14..

నానారత్నగులుచ్ఛాలీకాంతికిమ్మీలితోదరం .

విమృశామి వితానం తేఽతిశ్లక్ష్ణమతిలోమశం .. 15..

పర్యంకతల్పోపరి దర్శనీయం

సబాణచాపాంకుశపాశపాణిం .

అశేషభూషారమణీయమీడే

త్రిలోచనం నీలకంఠం ప్రశాంతం .. 16..

జటారుణం చంద్రకలాలలామం

ఉద్వేలలావణ్యకలాభిరామం .

కామేశ్వరం కామశరాసనాంకం

సమస్తసాక్షిం తమసః పరస్తాత్ .. 17..

తత్ర కామేశవామాంకే ఖేలంతీమలికుంతలాం .

సచ్చిదానందలహరీం మహాలక్ష్మీముపాస్మహే .. 18..

చారుగోరోచనాపంకజంబాలితఘనస్తనీం .

నమామి త్వామహం లోకమాతరం పద్మమాలినీం .. 19..

శివే నమన్నిర్జరకుంజరాసుర-

ప్రతోలికామౌలిమరీచివీచిభిః .

ఇదం తవ క్షాలనజాతసౌభగం

చరణం నో లోకే సుధితాం దధాతు .. 20..

కల్పస్యాదౌ కారణేశానపి త్రీన్

స్రష్టుం దేవి త్రీన్గుణానాదధానాం .

సేవే నిత్యం శ్రేయసే భూయసే త్వా-

మజామేకాం లోహితశుక్లకృష్ణాం .. 21..

కేశోద్భూతైరద్భుతామోదపూరై-

రాశావృందం సాంద్రమాపూరయంతీం .

త్వామానమ్య త్వత్ప్రసాదాత్స్వయంభూ-

రస్మాన్మాయీ సృజతే విశ్వమేతత్ .. 22..

అర్ధోన్మీలద్యౌవనోద్దామదర్పాం

దివ్యాకల్పైరర్పయంతీం మయూఖాన్ .

దేవి ధ్యాత్వా త్వాం పురా కైటభారి-

ర్విశ్వం బిభర్తి భువనస్య నాభిః .. 23..

కహ్లారశ్రీమంజరీపుంజరీతిం

ధిక్కుర్వంతీమంబ తే పాటలిమ్నా .

మూర్తిం ధ్యాత్వా శాశ్వతీం భూతిమాయ-

న్నింద్రో రాజా జగతో య ఈశే .. 24..

దేవతాంతరమంత్రౌఘజపశ్రీఫలభూతయా .

జాపకస్తవ దేవ్యంతే విద్యయా విందతేఽమృతం .. 25..

పుంస్కోకిలకలక్వాణకోమలాలాపశాలిని .

భద్రాణి కురు మే మాతర్దురితాని పరాసువ .. 26..

అంతేవాసిన్నస్తి చేత్తే ముముక్షా

వక్ష్యే యుక్తిం ముక్తసర్వైషణస్సన్ .

సద్భ్యః సాక్షాత్ సుందరీం జ్ఞప్తిరూపాం

శ్రద్ధాభక్తిజ్ఞానయోగాదవేహి .. 27..

షోఢాన్యాసాదిదేవైశ్చ సేవితా చక్రమధ్యగా .

కామేశమహిషీ భూయః షోడశీ శర్మ యచ్ఛతు .. 28..

శాంతో దాంతో దేశికేంద్రం ప్రణమ్య

తస్యాదేశాత్తారకం మంత్రతత్త్వం .

జానీతే చేదంబ ధన్యః సమానం

నాతః పరం వేదితవ్యం హి కించిత్ .. 29..

త్వమేవ కారణం కార్యం క్రియా జ్ఞానం త్వమేవ చ .

త్వామంబ న వినా కించిత్ త్వయి సర్వం ప్రతిష్ఠితం .. 30..

పరాగమద్రీంద్రసుతే తవాంఘ్రి-

సరోజయోరంబ దధామి మూర్ధ్నా .

అలంకృతం వేద(/దేవ)వధూశిరోభి-

ర్యతో జాతో భువనాని విశ్వా .. 31..

దుష్టాన్ దైత్యాన్ హంతుకామాం మహర్షీన్

శిష్టానన్యాన్ పాతుకామాం కరాబ్జైః .

అష్టాభిస్త్వాం సాయుధైర్భాసమానాం

దుర్గాం దేవీం శరణమహం ప్రపద్యే .. 32..

దేవి సర్వానవద్యాంగీం త్వామనాదృత్య యే క్రియాః .

కుర్వంతి నిష్ఫలాస్తేషామదుగ్ధా ఇవ ధేనవః .. 33..

నాహం మన్యే దైవతం మాన్యమన్య-

త్త్వత్పాదాబ్జాదంబికే కుంభజాద్యాః .

యే ధ్యాతారో భక్తిసంశుద్ధచిత్తాః

పరామృతాత్ పరిముచ్యంతి సర్వే .. 34..

కుర్వాణోఽపి దురారంభాం స్తవ నామాని శాంభవి .

ప్రజపన్నేతి మాయాంతమతిమృత్యుం తరామ్యహం .. 35..

కల్యాణి త్వం కుందహాసప్రకాశై-

రంతర్ధ్వాంతం నాశయంతీ క్షణేన .

హంతాస్మాకం ధ్యాయతాం త్వత్పదాబ్జ-

ముచ్చతిష్ఠ మహతే సౌభగాయ .. 36..

తితీర్షయా భవాంభోధేర్హయగ్రీవాదయః పురా .

అప్రమత్తా భవత్పూజాం సువిద్వాంసో వితేనిరే .. 37..

మద్వంశ్యా యే దురాచారా యే చ సన్మార్గగామినః .

భవత్యాః కృపయా సర్వే సువర్యంతు యజమానాః .. 38..

శ్రీచక్రస్థాం శాశ్వతైశ్వర్యదాత్రీం

పౌండ్రం చాపం పుష్పబాణాందధానాం .

బంధూకాభాం భావయామి త్రినేత్రాం

తామగ్నివర్ణాం తపసా జ్వలంతీం .. 39..

భవాని తవ పాదాబ్జనిర్ణేజనపవిత్రితాః

భవామయప్రశాంత్యై త్వామపో యాచామి భేషజం .. 40..

చిదానందసుధాంభోధేస్తవానందలవోఽస్తి యః

కారణేశైస్త్రిభిస్సాకం తద్విశ్వముపజీవతి .. 41..

నో వా యాగైర్నైవ పూర్తాదికృత్యై-

ర్నో వా జప్యైర్నో మహద్భిస్తపోభిః .

నో వా యోగైః క్లేశకృద్భిః సుమేధా

నిచాయ్యేమాం శాంతిమత్యంతమేతి .. 42..

ప్రాతః పాహి మహావిద్యే మధ్యాహ్నే తు మృడప్రియే .

సాయం పాహి జగద్వంద్యే పునర్నః పాహి విశ్వతః .. 43..

బంధూకాభైర్భానుభిర్భాసయంతీ

విశ్వం శశ్వత్తుంగపీనస్తనార్ధా .

లావణ్యాబ్ధేః సుందరి త్వం ప్రసాదా-

దాయుః ప్రజాం రయిమస్మాసు ధేహి .. 44..

కర్ణాకర్ణయ మే తత్త్వం యా చిచ్ఛక్తిరితీర్యతే .

త్రిర్వదామి ముముక్షూణాం సా కాష్ఠా సా పరగతిః .. 45..

వాగ్దేవీతి త్వాం వదంత్యంబ కేచి-

ల్లక్ష్మీర్గౌరీత్యేవమన్యే వదంతి .

శశ్వన్మాతః ప్రత్యగద్వైతరూపాం

శంసంతి కేచిన్నివిదో జనాః .. 46..

లలితేతి సుధాపూరమాధురీచోరమంబికే .

తవ నామాస్తి యత్తేన జిహ్వా మే మధుమత్తమా .. 47..

యే సంపన్నాః సాధనైస్తైశ్చత్తుర్భిః

శుశ్రూషాభిర్దేశికం ప్రీణయంతి .

సమ్యగ్విద్వాఞ్శుద్ధసత్త్వాంతరాణాం

తేషామేవైతాం బ్రహ్మవిద్యాం వదేత .. 48..

అభిచారాదిభిః కృత్యాం యః ప్రేరయతి మయ్యుమే .

తవ హుంకారసంత్రస్తా ప్రత్యక్కర్తారమృచ్ఛతు .. 49..

జగత్పవిత్రి మామికామపహరాశు దుర్జరాం .

ప్రసీద మే దయా ధునే ప్రశస్తిమంబ నస్కృధి .. 50..

కదంబారుణమంబాయా రూపం చింతయ చిత్త మే .

ముంచ పాపీయసీం నిష్ఠాం మా గృధః కస్య స్విద్ధనం .. 51..

భండభండనలీలాయాం రక్తచందనపంకిలః .

అంకుశస్తవ తం హన్యాద్యశ్చ నో ద్విషతే జనః .. 52..

రే రే చిత్త త్వం వృథా శోకసింధౌ

మజ్జస్యంతర్వచ్మ్యుపాయం విముక్త్యై .

దేవ్యాః పాదౌ పూజయైకాక్షరేణ

తత్తే పదం సంగ్రహేణ బ్రవీమ్యోం .. 53..

చంచద్బాలాతపజ్యోత్స్నాకలామండలశాలినే .

ఐక్షవాయ నమో మాతర్బాహుభ్యాం తవ ధన్వనే .. 54..

తామేవాద్యాం బ్రహ్మవిద్యాముపాసే

మూర్తైర్వేదైః స్తూయమానాం భవానీం .

హంత స్వాత్మత్త్వేన యాం ముక్తికామో

మత్వా ధీరో హర్షశోకౌ జహాతి .. 55..

శరణం కరవాణ్యంబ చరణం తవ సుందరి .

శేపే త్వత్పాదుకాభ్యాం మే నాన్యః పంథా అయనాయ .. 56..

రత్నచ్ఛత్రైశ్చామరైర్దర్పణాద్యై-

శ్చక్రేశానీం సర్వదోపచారయంత్యః .

యోగిన్యోఽన్యాః శక్తయశ్చాణిమాద్యా

యూయం పాత స్వస్తిభిః సదా నః .. 57..

దరిద్రం మాం విజానీహి సర్వజ్ఞాసి యతః శివే .

దూరీకృత్యాశు దురితమథ నో వర్ధయారయిం .. 58..

మహేశ్వరి మహామంత్రకూటత్రయకలేవరే .

కాదివిద్యాక్షరశ్రేణీముశంతస్త్వా హవామహే .. 59..

మూలాధారాదూర్ధ్వమంతశ్చరంతీం

భిత్త్వా గ్రంథీన్మూర్ధ్ని నిర్యత్సుధార్ద్రాం .

పశ్యంతస్త్వాం యే చ తృప్తిం లభంతే

తేషాం శాంతిః శాశ్వతీ నేతరేషాం .. 60..

మహ్యం ద్రుహ్యంతి యే మాతః త్వద్ధ్యానాసక్తచేతసే .

తానంబ సాయకైరేభిరవ బ్రహ్మద్విషో జహి .. 61..

త్వద్భక్తానామంబ శాంతైషణానాం

బ్రహ్మిష్ఠానాం దృష్టిపాతేన పూతః .

పాపీయానప్యావృతః స్వర్వధూభిః

శోకాతిగో మోదతే స్వర్గలోకే .. 62..

సంతు విద్యా జగత్యస్మిన్ సంసారభ్రమహేతవః .

భజేఽహం త్వాం యయా విద్వాన్ విద్యయాఽమృతమశ్నుతే .. 63..

విద్వన్ముఖ్యైర్విద్రుమాభం విశాల-

శ్రోణీశింజన్మేఖలాకింకిణీకం .

చంద్రోత్తంసం చిన్మయం వస్తు కించి-

ద్విద్ధి త్వమేతన్నిహితం గుహాయాం .. 64..

న విస్మరామి చిన్మూర్తిమిక్షుకోదండశాలినీం .

మునయః సనకప్రేష్ఠాస్తామాహుః పరమాం గతిం .. 65..

చక్షుఃప్రేంఖత్ప్రేమకారుణ్యధారాం

హంసజ్యోత్స్నాపూరహృష్యచ్చకోరాం .

యామాశ్లిష్యన్మోదతే దేవదేవః

సా నో దేవీ సుహవా శర్మ యచ్ఛతు .. 66..

ముంచ వంచకతాం చిత్త పామరం చాపి దైవతం .

గృహాణ పదమంబాయా ఏతదాలంబనం పరం .. 67..

కా మే భీతిః కా క్షతిః కిం దురాపం

కామేశాంకోత్తుంగపర్యంకసంస్థాం .

తత్త్వాతీతామచ్యుతానందదాత్రీం

దేవీమహం నిరృతిం వందమానః .. 68..

చింతామణిమయోత్తంసకాంతికంచుకితాననే .

లలితే త్వాం సకృన్నత్వా న బిభేతి కుతశ్చన .. 69..

తారుణ్యోత్తుంగితకుచే లావణ్యోల్లాసితేక్షణే .

తవాజ్ఞయైవ కామాద్యా మాస్మాన్ప్రాపన్నరాతయః .. 70..

ఆకర్ణాకృష్టకామాసస్త్రసంజాతం తాపమంబ మే .

ఆచామతు కటాక్షస్తే పర్జన్యో వృష్టిమానివ .. 71..

కుర్వే గర్వేణాపచారానపారా-

నద్యప్యంబ త్వత్పదాబ్జం తథాపి .

మన్యే ధన్యే దేవి విద్యావలంబం

మాతేవ పుత్రం బిభృతాస్వేనం .. 72..

యథోపాస్తిక్షతిర్నస్యాత్తవ చక్రస్య సుందరి .

కృపయా కురు కల్యాణి తథా మే స్వస్తిరాయుషి .. 73..

చక్రం సేవే తావకం సర్వసిద్ధ్యై

శ్రీమన్మాతః సిద్ధయశ్చాణిమాద్యాః .

నిత్యా ముద్రా శక్తయశ్చాంగదేవ్యో

యస్మిందేవా అధి విశ్వే నిషేదుః .. 74..

సుకుమారే సుఖాకారే సునేత్రే సూక్ష్మమధ్యమే .

సుప్రసన్నా భవ శివే సుమృడీకా సరస్వతీ .. 75..

విద్యుద్వల్లీకందలీం కల్పయంతీం

మూర్తిం స్ఫూర్త్యా పంకజం ధారయంతీం .

ధ్యాయన్ హి త్వాం జాయతే సార్వభౌమో

విశ్వా ఆశాః పృతనాః సంజయన్జయన్ .. 76..

అవిజ్ఞాయ పరాం శక్తిమాత్మభూతాం మహేశ్వరీం .

అహో పతంతి నిరయేషు యే కే చాత్మహనో జనాః .. 77..

సిందూరాభైస్సుందరైరంశువృందైః

లాక్షాలక్ష్మ్యాం మజ్జయంతీం జగంతి .

హేరంబాంబ త్వాం హృదా లంబతే య-

స్తస్మై విశః స్వయమేవానమంతే .. 78..

తవ తత్త్వం విమృశతాం ప్రత్యగద్వైతలక్షణం .

చిదానందఘనాదన్యన్నేహ నానాస్తి కించన .. 79..

కంఠాత్కుండలినీం నీత్వా సహస్రారం శివే తవ .

న పునర్జాయతే గర్భే సుమేధా అమృతోక్షితః .. 80..

త్వత్పాదుకానుసంధానప్రాప్తసర్వాత్మతాదృశి .

పూర్ణాహంకృతిమత్యస్మిన్న కర్మ లిప్యతే నరే .. 81..

తవానుగ్రహనిర్భిన్నహృదయగ్రంథిరద్రిజే .

స్వాత్మత్వేన జగన్మత్వా తతో న విజుగుప్సతే .. 82..

కదా వసుదలోపేతే త్రికోణనవకాన్వితే .

ఆవాహయామి చక్రే త్వాం సూర్యాభాం శ్రియమైశ్వరీం .. 83..

హ్రీమిత్యేకం తావకం వాచకార్ణం

యజ్జిహ్వాగ్రే దేవి జాగర్తి కించిత్ .

కో వాయం స్యాత్కామకామస్త్రిలోక్యాం

సర్వేఽస్మై దేవాః బలిమావహంతి .. 84..

నాకస్త్రీణాం కిన్నరీణాం నృపాణా-

ప్యాకర్షి చేతసా చింతనీయం .

త్వత్పాణిస్థం కుంకుమాభం శివే యం

ద్విష్మస్తస్మిన్ప్రతి ముంచామి పాశం .. 85..

నూనం సింహాసనేశ్వర్యాస్తవాజ్ఞాం శిరసా వహన్ .

భయేన పవమానోఽయం సర్వా దిశోఽనువిధావతి .. 86..

త్రికాలాఢ్యాం త్రిహృల్లేఖాం ద్విహంసస్వరభూషితాం .

యో జపత్యంబ తే విద్యాం సోఽక్షరః పరమః స్వరాట్ .. 87..

దారిద్ర్యాబ్ధౌ దేవి మగ్నోఽపి శశ్వ-

ద్వాచా యాచే నాహమంబ త్వదన్యం .

తస్మాదస్మద్వాంఛితం పూరయైత-

దుషా సా నక్తా సుదుఘేవ ధేనుః .. 88..

యో వా యద్యత్కామనాకృష్టచిత్తః

స్తుత్వోపాస్తే దేవి తే చక్రవిద్యాం .

కల్యాణానామాలయః కాలయోగాత్

తం తం లోకం జయతే తాంశ్చ కామాన్ .. 89..

సాధకస్సతతం కుర్యాదైక్యం శ్రీచక్రదేహయోః .

తథా దేవ్యాత్మనోరైక్యమేతావదనుశాసనం .. 90..

హస్తాంభోజప్రోల్లసచ్చామరాభ్యాం

శ్రీవాణీభ్యాం పార్శ్వయోర్వీజ్యమానాం .

శ్రీసామ్రాజ్ఞి త్వాం సదా లోకయేయం

సదా సద్భిః సేవ్యమానాం నిగూఢాం .. 91..

ఇష్టానిష్టప్రాప్తివిచ్ఛిత్తిహేతుః

స్తోతుం వాచాం కౢప్తిరిత్యేవ మన్యే .

త్వద్రూపం హి స్వానుభూత్యైకవేద్యం

న చక్షుషా గృహ్యతే నాపి వాచా .. 92..

హరస్వరైశ్చతుర్వర్గప్రదం మంత్రం సబిందుకం .

దేవ్యా జపత విప్రేంద్రా అన్యా వాచో విముంచథ .. 93..

యస్తే రాకాచంద్రబింబాసనస్థాం

పీయూషాబ్ధిం కల్పయంతీం మయూఖైః .

మూర్తిం భక్త్యా ధ్యాయతే హృత్సరోజే

న తస్య రోగో న జరా న మృత్యుః .. 94..

తుభ్యం మాతర్యోఽఞ్జలిం మూర్ధ్ని ధత్తే

మౌలిశ్రేణ్యా భూభుజస్తం నమంతి .

యః స్తౌతి త్వామంబ చిద్వల్లివాచా

తం ధీరాసః కవయ ఉన్నయంతి .. 95..

వైరించోఘైర్విష్ణురుద్రేంద్రవృందైః

దుర్గాకాలీభైరవీశక్తిసంంఘైః .

యత్రే(న్త్రే)శి త్వం వర్తతే(సే) స్తూయమానా

న తత్ర సూర్యో భాతి న చంద్రతారకం .. 96..

భూత్యై భవాని త్వాం వందే సురాః శతమఖాదయః .

త్వామానమ్య సమృద్ధాః స్యురాయో ధామాని దివ్యాని .. 97..

పుష్పవత్ఫుల్లతాటంకాం ప్రాతరాదిత్యపాటలాం .

యస్త్వామంతః స్మరత్యంబ తస్య దేవా అసన్వశే .. 98..

వశ్యే విద్రుమసంకాశాం విద్యాయాం విశదప్రభాం .

త్వామంబ భావయేద్భూత్యై సువర్ణాం హేమమాలినీం .. 99..

వామాంగస్థామీశితుర్దీప్యమానాం

భూషావృందైరిందురేఖావతంసాం .

యస్త్వాం పశ్యన్ సతతం నైవ తృప్తః

తస్మై చ దేవి వషడస్తు తుభ్యం .. 100..

నవనీపవనీవాసలాలసోత్తమమానసే .

శృంగారదేవతే మాతః శ్రియం వాసయ మే కులే .. 101..

భక్త్యాభక్త్యా వాపి పద్యావసాన-

శ్రుత్యా స్తుత్యా చైతయా స్తౌతి యస్త్వాం .

తస్య క్షిప్రం త్వత్ప్రసాదేన మాతః

సత్యాః సంతు యజమానస్య కామాః .. 102..

బాలిశేన మయా ప్రోక్తమపి వాత్సల్యశాలినోః .

ఆనందమాదిదంపత్యోరిమా వర్ధంతు వాంగిరః .. 103..

మాధురీసౌరభావాసచాపసాయకధారిణీం .

దేవీం ధ్యాయన్ పఠేదేతత్సర్వకామార్థసిద్ధయే .. 104..

స్తోత్రమేతత్ప్రజపతస్తవ త్రిపురసుందరి .

అనుద్వీక్ష్య భయాద్దూరం మృత్యుర్ధావతి పంచమః .. 105..

యః పఠతి స్తుతిమేతాం విద్యావంతం తమంబ ధనవంతం .

కురు దేవి యశస్వంతం వర్చస్వంతం మనుష్యేషు .. 106..

యే శృణ్వంతి స్తుతిమిమాం తవ దేవ్యనసూయకాః .

తేభ్యో దేహి శ్రియం విద్యాముద్వర్చ ఉత్తనూబలం .. 107..

త్వామేవాహం స్తౌమి నిత్యం ప్రణౌమి

శ్రీవిద్యేశాం వచ్మి సంచింతయామి .

అధ్యాస్తే యా విశ్వమాతా విరాజో

హృత్పుండరీకం విరజం విశుద్ధం .. 108..

శంకరేణ రచితం స్తవోత్తమం

యః పఠేజ్జగతి భక్తిమాన్నరః .

తస్య సిద్ధిరతులా భవేద్ధ్రువా

సుందరీ చ సతతం ప్రసీదతి .. 109..

యత్రైవ యత్రైవ మనో మదీయం

తత్రైవ తత్రైవ తవ స్వరూపం .

యత్రైవ యత్రైవ శిరో మదీయం

తత్రైవ తత్రైవ పదద్వయం తే .. 110..

.. ఇతి శ్రీమత్పరమహంసపరివ్రాజకాచార్యస్య

శ్రీగోవిందభగవత్పూజ్యపాదశిష్యస్య

శ్రీమచ్షంకరభగవతః కృతౌ త్రిపురసుందరీవేదపాదస్తోత్రం సంపూర్ణం ..

త్రిపురసుందరీమానసపూజాస్తోత్రం

శ్రీః .

మమ న భజనశక్తిః పాదయోస్తే న భక్తి-

       ర్న చ విషయవిరక్తిర్ధ్యానయోగే న సక్తిః .

ఇతి మనసి సదాహం చింతయన్నాద్యశక్తే

       రుచిరవచనపుష్పైరర్చనం సంచినోమి .. 1..

వ్యాప్తం హాటకవిగ్రహైర్జలచరైరారూఢదేవవ్రజైః

       పోతైరాకులితాంతరం మణిధరైర్భూమీధరైర్భూషితం .

ఆరక్తామృతసింధుముద్ధురచలద్విచీచయవ్యాకుల-

       వ్యోమానం పరిచింత్య సంతతమహో చేతః కృతార్థీభవ .. 2..

తస్మిన్నుజ్జ్వలరత్నజాలవిలసత్కాంతిచ్ఛటాభిః స్ఫుటం

       కుర్వాణం వియదింద్రచాపనిచయైరాచ్ఛాదితం సర్వతః .

ఉచ్చైఃశృంగనిషణ్ణదివ్యవనితావృందాననప్రోల్లస-

       ద్గీతాకర్ణననిశ్చలాఖిలమృగం ద్వీపం నమస్కుర్మహే .. 3..

జాతీచంపకపాటలాదిసుమనఃసౌరభ్యసంభావితం

       హ్రీంకారధ్వనికంఠకోకిలకుహూప్రోల్లాసిచూతద్రుమం .

ఆవిర్భూతసుగంధిచందనవనం దృష్టిప్రియం నందనం

చంచచ్చంచలచంచరికచటులం చేతశ్చిరం చింతయ .. 4..

పరిపతితపరాగైః పాటలక్షోణిభాగో

       వికసితకుసుమోచ్చైః పీతచంద్రార్కరశ్మిః .

అలిశుకపికరాజీకూజితైః శ్రోత్రహారీ

       స్ఫురతు హృది మదీయే నూనముద్యానరాజః .. 5..

రమ్యద్వారపురప్రచారతమసాం సంహారకారిప్రభ

       స్ఫూర్జత్తోరణభారహారకమహావిస్తారహారద్యుతే .

క్షోణీమండలహేమహారవిలసత్సంసారపారప్రద

       ప్రోద్యద్భక్తమనోవిహార కనకప్రాకార తుభ్యం నమః .. 6..

ఉద్యత్కాంతికలాపకల్పితనభఃస్ఫూర్జద్వితానప్రభ

       సత్కృష్ణాగరుధూపవాసితవియత్కాష్ఠాంతరే విశ్రుతః .

సేవాయాతసమస్తదైవతగణైరాసేవ్యమానోఽనిశం

       సోఽయం శ్రీమణిమండపోఽనవరతం మచ్చేతసి ద్యోతతాం .. 7..

క్వాపి ప్రోద్భటపద్మరాగకిరణవ్రాతేన సంధ్యాయితం

       కుత్రాపి స్ఫుటవిస్ఫురన్మరకతద్యుత్యా తమిస్రాయితం .

మధ్యాలంబివిశాలమౌక్తికరుచా జ్యోత్స్నాయితం కుత్రచి-

       న్మాతః శ్రీమణిమందిరం తవ సదా వందామహే సుందరం .. 8..

ఉత్తుంగాలయవిస్ఫురన్మరకతప్రోద్యత్ప్రభామండలా-

       న్యాలోక్యాంకురితోత్సవైర్నవతృణాకీర్ణస్థలీశంకయా .

నీతో వాజిభిరుత్పథం బత రథః సూతేన తిగ్మద్యుతే-

       ర్వల్గావల్గిగతహస్తమస్తశిఖరం కష్టైరితః ప్రాప్యతే .. 9..

మణిసదనసముద్యత్కాంతిధారానురక్తే

       వియతి చరమసంధ్యాశంకినో భానురథ్యాః .

శిథిలితగతకుప్యత్సూతహుంకారనాదైః

       కథమపి మణిగేహాదుచ్చకైరుచ్చలంతి .. 10..

భక్త్యా కిం ను సమర్పితాని బహుధా రత్నాని పాథోధినా

       కిం వా రోహణపర్వతేన సదనం యైర్విశ్వకర్మాకరోత్ .

ఆ జ్ఞాతం గిరిజే కటాక్షకలయా నూనం త్వయా తోషితే

       శంభౌ నృత్యతి నాగరాజఫణినా కీర్ణా మణిశ్రేణయః .. 11.. విదూరముక్తవాహనైర్వినమ్రమౌలిమండలై-

       ర్నిబద్ధహస్తసంపుటైః ప్రయత్నసంయతేంద్రియైః .

విరించివిష్ణుశంకరాదిభిర్ముదా తవాంబికే

       ప్రతీక్ష్యమాణనిర్గమో విభాతి రత్నమండపః .. 12..

ధ్వనన్మృదంగకాహలః ప్రగీతకింనరీగణః

       ప్రనృత్తదివ్యకన్యకః ప్రవృత్తమంగలక్రమః .

ప్రకృష్టసేవకవ్రజః ప్రహృష్టభక్తమండలో

       ముదే మమాస్తు సంతతం త్వదీయరత్నమండపః .. 13..

ప్రవేశనిర్గమాకులైః స్వకృత్యరక్తమానసై-

       ర్బహిస్థితామరావలీవిధీయమానభక్తిభిః .

విచిత్రవస్త్రభూషణైరుపేతమంగనాజనైః

       సదా కరోతు మంగలం మమేహ రత్నమండపః .. 14..

సువర్ణరత్నభూషితైర్విచిత్రవస్త్రధారిభి-

       ర్గృహీతహేమయష్టిభిర్నిరుద్ధసర్వదైవతైః .

అసంఖ్యసుందరీజనైః పురస్థితైరధిష్ఠితో

       మదీయమేతు మానసం త్వదీయతుంగతోరణః .. 15..

ఇంద్రాదీంశ్చ దిగీశ్వరాన్సహపరివారానథో సాయుధా-

       న్యోషిద్రూపధరాన్స్వదిక్షు నిహితాన్సంచింత్య హృత్పంకజే .

శంఖే శ్రీవసుధారయా వసుమతీయుక్తం చ పద్మం స్మర-

       న్కామం నౌమి రతిప్రియం సహచరం ప్రీత్యా వసంతం భజే .. 16..

గాయంతీః కలవీణయాతిమధురం హుంకారమాతన్వతీ-

       ర్ద్వారాభ్యాసకృతస్థితీరిహ సరస్వత్యాదికాః పూజయన్ .

ద్వారే నౌమి మదోన్మదం సురగణాధీశం మదేనోన్మదాం

       మాతంగీమసితాంబరాం పరిలసన్ముక్తావిభూషాం భజే .. 17..

కస్తూరికాశ్యామలకోమలాంగీం

       కాదంబరీపానమదాలసాంగీం .

వామస్తనాలింగితరత్నవీణాం

       మాతంగకన్యాం మనసా స్మరామి .. 18..

వికీర్ణచికురోత్కరే విగలితాంబరాడంబరే

       మదాకులితలోచనే విమలభూషణోద్భాసిని .

తిరస్కరిణి తావకం చరణపంకజం చింతయ-

       న్కరోమి పశుమండలీమలికమోహదుఘ్ధాశయాం .. 19..

ప్రమత్తవారుణీరసైర్విఘూర్ణమానలోచనాః

       ప్రచండదైత్యసూదనాః ప్రవిష్టభక్తమానసాః .

ఉపోఢకజ్జలచ్ఛవిచ్ఛటావిరాజివిగ్రహః

      కపాలశూలధారిణీః స్తువే త్వదీయదూతికాః .. 20..

స్ఫూర్జన్నవ్యయవాంకురోపలసితాభోగైః పురః స్థాపితై-

      ర్దీపోద్భాసిశరావశోభితముఖైః కుంభైర్నవైః శోభినా .

స్వర్ణాబద్ధవిచిత్రరత్నపటలీచంచత్కపాటశ్రియా

      యుక్తం ద్వారచతుష్టయేన గిరిజే వందే మణీ మందిరం .. 21..

ఆస్తీర్ణారుణకంబలాసనయుతం పుష్పోపహారాన్వితం

       దీప్తానేకమణిప్రదీపసుభగం రాజద్వితానోత్తమం .

ధూపోద్గారిసుగంధిసంభ్రమమిలద్భృంగావలీగుంజితం

       కల్యాణం వితనోతు మేఽనవరతం శ్రీమండపాభ్యంతరం .. 22..

కనకరచితే పంచప్రేతాసనేన విరాజితే

       మణిగణచితే రక్తశ్వేతాంబరాస్తరణోత్తమే .

కుసుమసురభౌ తల్పే దివ్యోపధానసుఖావహే

       హృదయకమలే ప్రాదుర్భూతాం భజే పరదేవతాం .. 23..

సర్వాంగస్థితిరమ్యరూపరుచిరాం ప్రాతః సమభ్యుత్థితాం

       జృంభామంజుముఖాంబుజాం మధుమదవ్యాఘూర్ణదక్షిత్రయాం .

సేవాయాతసమస్తసంనిధిసఖీః సంమానయంతీం దృశా

       సంపశ్యన్పరదేవతాం పరమహో మన్యే కృతార్థం జనుః .. 24..

ఉచ్చైస్తోరణవర్తివాద్యనివహధ్వానే సముజ్జృంభితే

       భక్తైర్భూమివిలగ్నమౌలిభిరలం దండప్రణామే కృతే .

నానారత్నసమూహనద్ధకథనస్థాలీసముద్భాసితాం

       ప్రాతస్తే పరికల్పయామి గిరిజే నీరాజనాముజ్జ్వలాం .. 25..

పాద్యం తే పరికల్పయామి పదయోరర్ఘ్యం తథా హస్తయోః

       సౌధీభిర్మధుపర్కమంబ మధురం ధారాభిరాస్వాదయ .

తోయేనాచమనం విధేహి శుచినా గాంగేన మత్కల్పితం

       సాష్టాంగం ప్రణిపాతమీశదయితే దృష్ట్యా కృతార్థీ కురు .. 26..

మాతః పశ్య ముఖాంబుజం సువిమలే దత్తే మయా దర్పణే

       దేవి స్వీకురు దంతధావనమిదం గంగాజలేనాన్వితం .

సుప్రక్షాలితమాననం విరచయన్స్నిగ్ధాంబరప్రోంఛనం

       ద్రాగంగీకురు తత్త్వమంబ మధురం తాంబూలమాస్వాదయ .. 27..

నిధేహి మణిపాదుకోపరి పదాంబుజం మజ్జనా-

       లయం వ్రజ శనైః సఖీకృతకరాంబుజాలంబనం .

మహేశి కరుణానిధే తవ దృగంతపాతోత్సుకా-

       న్విలోకయ మనాగమూనుభయసంస్థితాందైవతాన్ .. 28..

హేమరత్నవరణేన వేష్టితం

       విస్తృతారుణవితానశోభితం .

సజ్జసర్వపరిచారికాజనం

       పశ్య మజ్జనగృహం మనో మమ .. 29..

కనకకలశజాలస్ఫాటికస్నానపీఠా-

       ద్యుపకరణవిశాలం గంధమత్తాలిమాలం .

స్ఫురదరుణవితాం మంజుగంధర్వగానం

       పరమశివమహేలే మజ్జనాగారమేహి .. 30..

పీనోత్తుంగపయోధరాః పరిలసత్సంపూర్ణచంద్రాననా

       రత్నస్వర్ణవినిర్మితాః పరిలసత్సూక్ష్మాంబరప్రావృతాః .

హేమస్నానఘటీస్తథా మృదుపటిరుద్వర్తనం కౌసుమం

       తైలం కంకతికం కరేషు దధతీర్వందేఽమ్బ తే దాసికాః .. 31..

తత్ర స్ఫాటికపీఠమేత్య శనకైరుత్తారితాలంకృతి-

       ర్నీచైరుజ్ఝితకంచుకోపరిహితారక్తోత్తరీయాంబరా .

వేణీబంధమపాస్య కంకతికయా కేశప్రసాదం మనా-

       క్కుర్వాణా పరదేవతా భగవతీ చిత్తే మమ ద్యోతతాం .. 32..

అభ్యంగం గిరిజే గృహాణ మృదునా తైలేన సంపాదితం

       కాశ్మీరైరగరుద్రవైర్మలయజైరుద్వర్తనం కారయ .

గీతే కింనరకామినీభిరభితో వాద్యే ముదా వాదితే

       నృత్యంతీమిహ పశ్య దేవి పురతో దివ్యాంగనామండలీం .. 33..

కృతపరికరబంధాస్తుంగపీనస్తనాఢ్యా

       మణినివహనిబద్ధా హేమకుంభీర్దధానాః .

సురభిసలిలనిర్యద్గంధలుబ్ధాలిమాలాః

       సవినయముపతస్థుః సర్వతః స్నానదాస్యః .. 34..

ఉద్గంధైరగరుద్రవైః సురభిణా కస్తూరికావారిణా

       స్ఫూర్జత్సౌరభయక్షకర్దమజలైః కాశ్మీరనీరైరపి .

పుష్పాంభోభిరశేషతీర్థసలిలైః కర్పూరపాథోభరైః

       స్నానం తే పరికల్పయామి గిరిజే భక్త్యా తదంగీకురు .. 35..

ప్రత్యంగం పరిమార్జయామి శుచినా వస్త్రేణ సంప్రోంఛనం

       కుర్వే కేశకలాపమాయతతరం ధూపోత్తమైర్ధూపితం .

ఆలీవృందవినిర్మితాం యవనికామాస్థాప్యరత్నప్రభం

       భక్తత్రాణపరే మహేశగృహిణి స్నానాంబరం ముచ్యతాం .. 36..

పీతం తే పరికల్పయామి నిబిడం చండాతకం చండికే

       సూక్ష్మం స్నిగ్ధమురీకురుష్వ వసనం సిందూరపూరప్రభం .

ముక్తారత్నవిచిత్రహేమరచనాచారుప్రభాభాస్వరం

       నీలం కంచుకమర్పయామి గిరిశప్రాణప్రియే సుందరి .. 37..

విలులితచికురేణ చ్ఛాదితాంసప్రదేశే

       మణినికరవిరాజత్పాదుకాన్యస్తపాదే .

సులలితమవలంబ్య ద్రాక్సఖీమంసదేశే

       గిరిశగృహిణి భూషామంటపాయ ప్రయాహి .. 38..

లసత్కనకకుట్టిమస్ఫురదమందముక్తావలీ-

       సముల్లసితకాంతిభిః కలితశక్రచాపవ్రజే .

మహాభరణమండపే నిహితహేమసింహాసనం

       సఖీజనసమావృతం సమధితిష్ఠ కాత్యాయని .. 39..

స్నిగ్ధం కంకతికాముఖేన శనకైః సంశోధ్య కేశోత్కరం

       సీమంతం విరచయ్య చారు విమలం సిందూరరేఖాన్వితం .

ముక్తాభిర్గ్రథితాలకాం మణిచితైః సౌవర్ణసూత్రైః స్ఫుటం

       ప్రాంతే మౌక్తికగుచ్ఛకోపలతికాం గ్రథ్నామి వేణీమిమాం .. 40..

విలంబివేణీభుజగోత్తమాంగ-

       స్ఫురన్మణిభ్రాంతిముపానయంతం .

స్వరోచిషోల్లాసితకేశపాశం

       మహేశి చూడామణిమర్పయామి .. 41..

త్వామాశ్రయద్భిః కబరీతమిస్రై-

       ర్బందీకృతం ద్రాగివ భానుబింబం .

మృడాని చూడామణిమాదధానం

       వందామహే తావతముత్తమాంగం .. 42..

స్వమధ్యనద్ధహాటకస్ఫురన్మణిప్రభాకులం

       విలంబిమౌక్తికచ్ఛటావిరాజితం సమంతతః .

నిబద్ధలక్షచక్షుషా భవేన భూరి భావితం

       సమర్పయామి భాస్వరం భవాని ఫాలభూషణం .. 43..

మీనాంభోరుహఖంజరీటసుషమావిస్తారవిస్మారకే

       కుర్వాణే కిల కామవైరిమనసః కందర్పబాణప్రభాం .

మాధ్వీపానమదారుణేఽతిచపలే దీర్ఘే దృగంభోరుహే

       దేవి స్వర్ణశలాకయోర్జితమిదం దివ్యాంజనం దీయతాం .. 44..

మధ్యస్థారుణరత్నకాంతిరుచిరాం ముక్తాముగోద్భాసితాం

       దైవాద్భార్గవజీవమధ్యగరవేర్లక్ష్మీమధః కుర్వతీం .

ఉత్సిక్తాధరబింబకాంతివిసరైర్భౌమీభవన్మౌక్తికాం

       మద్దత్తమురరీకురుష్వ గిరిజే నాసావిభూషామిమాం .. 45..

ఉడుకృతపరివేషస్పర్ధయా శీతభానో-

       రివ విరచితదేహద్వంద్వమాదిత్యబింబం .

అరుణమణిసముద్యత్ప్రాంతవిభ్రాజిముక్తం

       శరవసి పరినిధేహి స్వర్ణతాటంకయుగ్మం .. 46..

మరకతవరపద్మరాగహీరో-

       త్థితగులికాత్రితయావనద్ధమధ్యం .

వితతవిమలమౌక్తికం చ

       కంఠాభరణమిదం గిరిజే సమర్పయామి .. 47..

నానాదేశసముత్త్థితైర్మణిగణప్రోద్యత్ప్రభామండల-

       వ్యాప్తైరాభరణైర్విరాజితగలాం ముక్తాచ్ఛటాలంకృతాం .

మధ్యస్థారుణరత్నకాంతిరుచిరాం ప్రాంతస్థముక్తాఫల-

       వ్రాతామంబ చతుష్కికాం పరశివే వక్షఃస్థలే స్థాపయ .. 48..

అన్యోన్యం ప్లావయంతీ సతతపరిచలత్కాంతికల్లోలజాలైః

       కుర్వాణా మజ్జదంతఃకరణవిమలతాం శోభితేవ త్రివేణీ .

ముక్తాభిః పద్మరాగైర్మరకతమణిభిర్నిర్మితా దీప్యమానై-

       ర్నిత్యం హారత్రయీ తే పరశివరసికే చేతసి ద్యోతతాం నః .. 49..

కరసరసిజనాలే విస్ఫురత్కాంతిజాలే

       విలసదమలశోభే చంచదీశాక్షిలోభే .

వివిధమణిమయూఖోద్భాసితం దేవి దుర్గే

       కనకకటకయుగ్మం బాహుయుగ్మే నిధేహి .. 50..

వ్యాలంబమానసితపట్టకగుచ్ఛశోభి

       స్ఫూర్జన్మణీఘటితహారవిరోచమానం .

మాతర్మహేశమహిలే తవ బాహుమూలే

       కేయూరకద్వయమిదం వినివేశయామి .. 51..

వితతనిజమయూఖైర్నిర్మితామింద్రనీలై-

       ర్విజితకమలనాలాలీనమత్తాలిమాలాం .

మణిగణఖచితాభ్యాం కంకణాభ్యాముపేతాం

       కలయ వలయరాజీం హస్తమూలే మహేశి .. 52..

నీలపట్టమృదుగుచ్ఛశోభితా-

       బద్ధనైకమణిజాలమంజులాం .

అర్పయామి వలయాత్పురఃసరే

       విస్ఫురత్కనకతైతృపాలికాం .. 53..

ఆలవాలమివ పుష్పధన్వనా

       బాలవిద్రుమలతాసు నిర్మితం .

అంగులీశు వినిధీయతాం శనై-

       రంగులీయకమిదం మదర్పితం .. 54..

విజితహరమనోభూమత్తమాతంగకుంభ-

       స్థలవిలులితకూజత్కింకిణీజాలతుల్యాం .

అవిరతకలనదైరీశచేతో హరంతీం

       వివిధమణినిబద్ధాం మేఖలామర్పయామి .. 55..

వ్యాలంబమానవరమౌక్తికగుచ్ఛశోభి

       విభ్రాజిహాటకపుటద్వయరోచమానం .

హేమ్నా వినిర్మితమనేకమణిప్రబంధం

       నీవీనిబంధనగుణం వినివేదయామి .. 56..

వినిహతనవలాక్షాపంకబాలాతపౌఘే

       మరకతమణిరాజీమంజుమంజీరఘోషే .

అరుణమణిసముద్యత్కాంతిధారావిచిత్ర-

       స్తవ చరణసరోజే హంసకః ప్రీతిమేతు .. 57..

నిబద్ధశితిపట్టకప్రవరగుచ్ఛసంశోభితాం

       కలక్వణితమంజులాం గిరిశచిత్తసంమోహనీం .

అమందమణిమండలీవిమలకాంతికిమ్మీరితాం

       నిధేహి పదపంకజే కనకఘుంఘురూమంబికే .. 58..

విస్ఫురత్సహజరాగరంజితే

       శింజితేన కలితాం సఖీజనైః .

పద్మరాగమణినూపురద్వయీ-

       మర్పయామి తవ పాదపంకజే .. 59..

పదాంబుజముపాసితుం పరిగతేన శీతాంశునా

       కృతాం తనుపరంపరామివ దినాంతరాగారుణాం .

మహేశి నవయావకద్రవభరేణ శోణీకృతాం

       నమామి నఖమండలీం చరణపంకజస్థాం తవ .. 60..

ఆరక్తశ్వేతపీతస్ఫురదురుకసుమైశ్చిత్రితాం పట్టసూత్రై-

       ర్దేవస్త్రీభిః ప్రయత్నాదగరుసముదితైర్ధూపితాం దివ్యధూపైః .

ఉద్యద్గంధాంధపుష్పంధయనివహసమారబ్ధఝాంకారగీతాం

       చంచత్కహ్లారమాలాం పరశివరసికే కంఠపీఠేఽర్పయామి .. 61..

గృహాణ పరమామృతం కనకపాత్రసంస్థాపితం

       సమర్పయ ముఖాంబుజే విమలవీటికామంబికే .

విలోకయ ముఖాంబుజం ముకురమండలే నిర్మలే

       నిధేహి మణిపాదుకోపరి పదాంబుజం సుందరి .. 62..

ఆలంబ్య స్వసఖీం కరేణ శనకైః సింహాసనాదుత్థితా

       కూజన్మందమరాలమంజులగతిప్రోల్లాసిభూషాంబర .

ఆనందప్రతిపాదకైరుపనిషద్వాక్యైః స్తుతా వేధసా

       మచ్చిత్తే స్థిరతాముపైతు గిరిజా యాంతీ సభామండపం .. 63..

చలంత్యామంబాయాం ప్రచలతి సమస్తే పరిజనే

       సవేగం సంయాతే కనకలతికాలంకృతిభరే .

సమతాదుత్తాలస్ఫురితపదసంపాతజనితై-

       ర్ఝణత్కారైస్తారైర్ఝణఝణితమాసీన్మణిగృహం .. 64..

చంచద్వేత్రకరాభిరంగవిలసద్భూషాంబరాభిః పురో-

       యంతీభిః పరిచారికాభిరమరవ్రాతే సముత్సారితే .

రుద్ధే నిర్జరసుందరీభిరభితః కక్షాంతరే నిర్గతం

       వందే నందితశంభు నిర్మలచిదానందైకరూపం మహః .. 65..

వేధాః పాదతలే పతత్యయమసౌ విష్ణుర్నమత్యగ్రతః

       శంభుర్దేహి దృగంచలం సురపతిం దూరస్థమాలోకయ .

ఇత్యేవం పరిచారికాభిరుదితే సంమాననాం కుర్వతీ

       దృగ్ద్వంద్వేన యథోచితం భగవతీ భూయాద్విభూత్యై మమ .. 66..

మందం చారణసుందరీభిరభితో యాంతీభిరుత్కంఠయా

       నామోచ్చారణపూర్వకం ప్రతిదిశం ప్రత్యేకమావేదితాత్ .

వేగాదక్షిపథం గతాన్సురగణానాలోకయంతీ శనై-

       ర్దిత్సంతీ చరణాంబుజం పథి జగత్పాయాన్మహేశప్రియా .. 67..

అగ్రే కేచన పార్శ్వయోః కతిపయే పృష్ఠే పరే ప్రస్థితా

       ఆకాశే సమవస్థితాః కతిపయే దిక్షు స్థితాశ్చాపరే .

సంమర్దం శనకైరపాస్య పురతో దండప్రణామాన్ముహుః

       కుర్వాణాః కతిచిత్సురా గిరిసుతే దృక్పాతమిచ్ఛంతి తే .. 68..

అగ్రే గాయతి కింనరీ కలపదం గంధర్వకాంతాః శనై-

       రాతోద్యాని చ వాదయంతి మధురం సవ్యాపసవ్యస్థితాః .

కూజన్నూపురనాద మంజు పురతో నృత్యంతి దివ్యాంగనా

       గచ్ఛంతః పరితః స్తువంతి నిగమస్తుత్యా విరించ్యాదయః .. 69..

కస్మైచిత్సుచిరాదుపాసితమహామంత్రౌఘసిద్ధిం క్రమా-

       దేకస్మై భవనిఃస్పృహాయ పరమానందస్వరూపాం గతిం .

అన్యస్మై విషయానురక్తమనసే దీనాయ దుఃఖాపహం

       ద్రవ్యం ద్వారసమాశ్రితాయ దదతీం వందామహే సుందరీం .. 70..

నమ్రీభూయ కృతాంజలిప్రకటితప్రేమప్రసన్నాననే

       మందం గచ్ఛతి సంనిధౌ సవినయాత్సోత్కంఠమోఘత్రయే .

నానామంత్రగణం తదర్థమఖిలం తత్సాధనం తత్ఫలం

       వ్యాచక్షాణముదగ్రకాంతి కలయే యత్కించిదాద్యం మహః .. 71..

తవ దహనసదృక్షైరీక్షణైరేవ చక్షు-

       ర్నిఖిలపశుజనానాం భీషయద్భీషణాస్యం .

కృతవసతి పరేశప్రేయసి ద్వారి నిత్యం

       శరభమిథునముచ్చైర్భక్తియుక్తో నతోఽస్మి .. 72..

కల్పాంతే సరసైకదాసముదితానేకార్కతుల్యప్రభాం

       రత్నస్తంభనిబద్ధకాంచనగుణస్ఫూర్జద్వితానోత్తమాం .

కర్పూరాగరుగర్భవర్తికలికాప్రాప్తప్రదీపావలీం

       శ్రీచక్రాకృతిముల్లసన్మణిగణాం వందామహే వేదికాం .. 73..

స్వస్థానస్థితదేవతాగణవృతే బిందౌ ముదా స్థాపితం

       నానారత్నవిరాజిహేమవిలసత్కాంతిచ్ఛటాదుర్దినం .

చంచత్కౌసుమతూలికాసనయుతం కామేశ్వరాధిష్ఠితం

       నిత్యానందనిదానమంబ సతతం వందే చ సింహాసనం .. 74..

వదద్భిరభితో ముదా జయ జయేతి వృందారకైః

       కృతాంజలిపరంపరా విదధతి కృతార్థా దృశా .

అమందమణిమండలీఖచితహేమసింహాసనం

       సఖీజనసమావృతం సమధితిష్ఠ దాక్షాయణి .. 75..

కర్పూరాదికవస్తుజాతమఖిలం సౌవర్ణభృంగారకం

       తాంబూలస్య కరండకం మణిమయం చైలాంచలం దర్పణం .

విస్ఫూర్జన్మణిపాదుకే చ దధతీః సింహాసనస్యాభిత-

       స్తిష్ఠంతీః పరిచారికాస్తవ సదా వందామహే సుందరి .. 76..

త్వదమలవపురుద్యత్కాంతికల్లోలజాలైః

       స్ఫుటమివ దధతీభిర్బాహువిక్షేపలీలాం .

ముహురపి చ విధూతే చామరగ్రాహిణీభిః

       సితకరకరశుభ్రే చామరే చాలయామి .. 77..

ప్రాంతస్ఫురద్విమలమౌక్తికగుచ్ఛజాలం

       చంచన్మహామణివిచిత్రితహేమదండం .

ఉద్యత్సహస్రకరమండలచారు హేమ-

       చ్ఛత్రం మహేశమహిలే వినివేశయామి .. 78..

ఉద్యత్తావకదేహకాంతిపటలీసిందూరపూరప్రభా-

       శోణీభూతముదగ్రలోహితమణిచ్ఛేదానుకారిచ్ఛవి .

దూరాదాదరనిర్మితాంజలిపుటైరాలోకమానం సుర-

       వ్యూహైః కాంచనమాతపత్రమతులం వందామహే సుందరం .. 79..

సంతుష్టాం పరమామృతేన విలసత్కామేశ్వరాంకస్థితాం

       పుష్పౌఘైరభిపూజితాం భగవతీం త్వాం వందమానా ముదా .

స్ఫూర్జత్తావకదేహరశ్మికలనాప్రాప్తస్వరూపాభిదాః

       శ్రీచక్రావరణస్థితాః సవినయం వందామహే దేవతాః .. 80..

ఆధారశక్త్యాదికమాకలయ్య

       మధ్యే సమస్తాధికయోగినీం చ .

మిత్రేశనాథాదికమత్ర నాథ-

       చతుష్టయం శైలసుతే నతోఽస్మి .. 81..

త్రిపురాసుధార్ణవాసన-

       మారభ్య త్రిపురమాలినీ యావత్ .

ఆవరణాష్టకసంస్థిత-

       మాసనషట్కం నమామి పరమేశి .. 82..

ఈశానే గణపం స్మరామి విచరద్విఘ్నాంధకారచ్ఛిదం

       వాయవ్యే వటుకం చ కజ్జలరుచిం వ్యాలోపవీతాన్వితం .

నైరృత్యే మహిషాసురప్రమథినీం దుర్గాం చ సంపూజయ-

       న్నాగ్నేయేఽఖిలభక్తరక్షణపరం క్షేత్రాధి నాథం భజే .. 83..

ఉడ్యానజాలంధరకామరూప-

       పీఠానిమాన్పూర్ణగిరిప్రసక్తాన్ .

త్రికోణదక్షాగ్రిమసవ్యభాగ-

       మధ్యస్థితాన్సిద్ధికరాన్నమామి .. 84..

లోకేశః పృథివీపతిర్నిగదితో విష్ణుర్జలానాం ప్రభు-

       స్తేజోనాథ ఉమాపతిశ్చ మరుతామీశస్తథా చేశ్వరః .

ఆకాశాధిపతిః సదాశివ ఇతి ప్రేతాభిధామాగతా-

       నేతాంశ్చక్రబహిఃస్థితాన్సురగణాన్వందామహే సాదరం .. 85..

తారానాథకలాప్రవేశనిగమవ్యాజాద్గతాసుప్రథం

       త్రైలోక్యే తిథిషు ప్రవర్తితకలాకాష్ఠాదికాలక్రమం .

రత్నాలంకృతిచిత్రవస్త్రలలితం కామేశ్వరీపూర్వకం

       నిత్యాషోడశకం నమామి లసితం చక్రాత్మనోరంతరే .. 86..

హృది భావితదైవతం ప్రయత్నా-

       భ్యుపదేశానుగృహీతభక్తసంఘం .

స్వగురుక్రమసంజ్ఞచక్రరాజ-

       స్థితమోఘత్రయమానతోఽస్మి మూర్ధ్నా .. 87..

హృదయమథ శిరః శిఖాఖిలాద్యే

       కవచమథో నయనత్రయం చ దేవి .

మునిజనపరిచింతిత తథాస్త్రం

       స్ఫురతు సదా హృదయే షడంగమేతత్ .. 88..

త్రైలోక్యమోహనమితి ప్రథితే తు చక్రే

       చంచద్విభూషణగణత్రిపురాధివాసే .

రేఖాత్రయే స్థితవతీరణిమాదిసిద్ధీ-

       ర్ముద్రా నమామి సతతం ప్రకటాభిధాస్తాః .. 89..

సర్వాశాపరిపూరకే వసుదలద్వంద్వేన విభ్రాజితే

       విస్ఫూర్జంత్రిపురేశ్వరీనివసతౌ చక్రే స్థితా నిత్యశః .

కామాకర్షణికాదయో మణిగణభ్రాజిష్ణుదివ్యాంబరా

       యోగిన్యః ప్రదిశంతు కాంక్షితఫలం విఖ్యాతగుప్తాభిధాః .. 90..

మహేశి వసుభిర్దలైర్లసతి సర్వసంక్షోభణే

       విభూషణగణస్ఫురంత్రిపురసుందరీసద్మని .

అనంగకుసుమాదయో వివిధభూషణోద్భాసితా

       దిశంతు మమ కాంక్షితం తనుతరాశ్చ గుప్తాభిధాః .. 91..

లసద్యుగదృశారకే స్ఫురతి సర్వసౌభాగ్యదే

       శుభాభరణభూషితత్రిపురవాసినీమందిరే .

స్థితా దధతు మంగలం సుభగసర్వసంక్షోభిణీ-

       ముఖాః సకలసిద్ధయో విదితసంప్రదాయాభిధాః .. 92..

బహిర్దశారే సర్వార్థసాధకే త్రిపురాశ్రయాః .

కులకౌలాభిధాః పాంతు సర్వసిద్ధిప్రదాయికాః .. 93..

అంతఃశోభిదశారకేఽతిలలితే సర్వాదిరక్షాకరే

       మాలిన్యా త్రిపురాద్యయా విరచితావాసే స్థితం నిత్యశః .

నానారత్నవిభూషణం మణిగణభ్రాజిష్ణు దివ్యాంబరం

       సర్వజ్ఞాదికశక్తివృందమనిశం వందే నిగర్భాభిధం .. 94..

సర్వరోగహరేఽష్టారే త్రిపురాసిద్ధయాన్వితే .

రహస్యయోగినీర్నిత్యం వశిన్యాద్యా నమామ్యహం .. 95..

చూతాశోకవికాసికేతకరజఃప్రోద్భాసినీలాంబుజ-

       ప్రస్ఫూర్జన్నవమల్లికాసముదితైః పుష్పైః శరాన్నిర్మితాన్ .

రమ్యం పుష్పశరాసనం సులలితం పాశం తథా చాంకుశం

       వందే తావకమాయుధం పరశివే చక్రాంతరాలేస్థితం .. 96..

త్రికోణ ఉదితప్రభే జగతి సర్వసిద్ధిప్రదే

       యుతే త్రిపురయాంబయా స్థితవతీ చ కామేశ్వరీ .

తనోతు మమ మంగలం సకలశర్మ వజ్రేశ్వరీ

       కరోతు భగమాలినీ స్ఫురతు మామకే చేతసి .. 97..

సర్వానందమయే సమస్తజగతామాకాంక్షితే బైందవే

       భైరవ్యా త్రిపురాద్యయా విరచితావాసే స్థితా సుందరీ .

ఆనందోల్లసితేక్షణా మణిగణభ్రాజిష్ణుభూషాంబరా

       విస్ఫూర్జద్వదనా పరాపరరహః స మాం పాతు యోగినీ .. 98..

ఉల్లసత్కనకకాంతిభాసురం

       సౌరభస్ఫురణవాసితాంబరం .

దూరతః పరిహృతం మధువ్రతై-

       రర్పయామి తవ దేవి చంపకం .. 99..

వైరముద్ధతమపాస్య శంభునా

       మస్తకే వినిహితం కలాచ్ఛలాత్ .

గంధలుబ్ధమధుపాశ్రితం సదా

       కేతకీకుసుమమర్పయామి తే .. 100..

చూర్ణీకృతం ద్రాగివ పద్మజేన

       త్వదాననస్పర్ధిసుధాంశుబింబం .

సమర్పయామి స్ఫుటమంజలిస్థం

       వికాసిజాతీకుసుమోత్కరం తే .. 101..

అగరుబహలధూపాజస్రసౌరభ్యరమ్యాం

       మరకతమణిరాజీరాజిహారిస్రగాభాం .

దిశి విదిశి విసరద్గంధలుబ్ధాలిమాలాం

       వకులకుసుమమాలాం కంఠపీఠేఽర్పయామి .. 102..

ఈంకారోర్ధ్వగబిందురాననమధోబిందుద్వయం చ స్తనౌ

       త్రైలోక్యే గురుగమ్యమేతదఖిలం హార్దం చ రేఖాత్మకం .

ఇత్థం కామకలాత్మికాం భగవతీమంతః సమారాధయ-

       న్నానందాంబుధిమజ్జనే ప్రలభతామానందథుం సజ్జనః .. 103..

ధూపం తేఽగరుసంభవం భగవతి ప్రోల్లాసిగంధోద్ధురం

       దీపం చైవ నివేదయామి మహసా హార్దాంధకారచ్ఛిదం .

రజస్వర్ణవినిర్మితేషు పరితః పాత్రేషు సంస్థాపితం

       నైవేద్యం వినివేదయామి పరమానందాత్మికే సుందరి .. 104..

జాతీకోరకతుల్యమోదనమిదం సౌవర్ణపాత్రే స్థితం

       శుద్ధాన్నం శుచి ముద్గమాషచణకోద్భూతాతథా సూపకాః .

ప్రాజ్యం మాహిషమాజ్యముత్తమమిదం హైవంగవీనం పృథ-

       క్పాత్రేషు ప్రతిపాదితం పరశివే తత్సర్వమంగీకురు .. 105..

శింబీసూరణశాకబింబబృహతీకూశ్మాండకోశాతకీ-

       వృంతాకాని పటోలకాని మృదునా సంసాధితాన్యగ్నినా .

సంపన్నాని చ వేసవారవిసరైర్దివ్యాని భక్త్యా కృతా-

       న్యగ్రే తే వినివేదయామి గిరిజే సౌవర్ణపాత్రవ్రజే .. 106..

నింబూకార్ద్రకచూతకందకదలీకౌశాతకీకర్కటీ-

       ధాత్రీబిల్వకరీరకైర్విరచితాన్యానందచిద్విగ్రహే .

రాజీభిః కటుతైలసైంధవహరిద్రాభిః స్థితాన్పాతయే

       సంధానాని నివేదయామి గిరిజే భూరిప్రకారాణి తే .. 107..

సితయాంచితలడ్డుకవ్రజా-

       న్మృదుపూపాన్మృదులాశ్చ పూరికాః .

పరమాన్నమిదం చ పార్వతి

       ప్రణయేన ప్రతిపాదయామి తే .. 108..

దిగ్ధమేతదనలే సుసాధితం

       చంద్రమండలనిభం తథా దధి .

ఫాణితం శిఖరిణీం సితాసితాం

       సర్వమంబ వినివేదయామి తే .. 109..

అగ్రే తే వినివేద్య సర్వమమితం నైవేద్యమంగీకృతం

       జ్ఞాత్వా తత్త్వచతుష్టయం ప్రథమతో మన్యే సుతృప్తాం తతః .

దేవీం త్వాం పరిశిష్టమంబ కనకామత్రేషు సంస్థాపితం

       శక్తిభ్యః సముపాహారామి సకలం దేవేశి శంభుప్రియే .. 110..

వామేన స్వర్ణపాత్రీమనుపమపరమాన్నేన పూర్ణాం దధానా-

       మన్యేన స్వర్ణదర్వీం నిజజనహృదయాభీష్టదాం ధారయంతీం .

సిందూరారక్తవస్త్రాం వివిధమణిలసద్భూషణాం మేచకాంగీం

       తిష్ఠంతీమగ్రతస్తే మధుమదముదితామన్నపూర్ణాం నమామి .. 111..

పంక్త్యోపవిష్టాన్పరితస్తు చక్రం

       శక్త్యా స్వయాలింగితవామభాగాన్ .

సర్వోపచారైః పరిపూజ్య భక్త్యా

       తవాంబికే పారిషదాన్నమామి .. 112..

పరమామృతమత్తసుందరీ-

       గణమధ్యస్థితమర్కభాసురం .

పరమామృతఘూర్ణితేక్షణం

       కిమపి జ్యోతిరుపాస్మహే పరం .. 113..

దృశ్యతే తవ ముఖాంబుజం శివే

       శ్రూయతే స్ఫుటమనాహతధ్వనిః .

అర్చనే తవ గిరామగోచరే

       న ప్రయాతి విషయాంతరం మనః .. 114..

త్వన్ముఖాంబుజవిలోకనోల్లస-

       త్ప్రేమనిశ్చలవిలోచనద్వయీం .

ఉన్మనీముపగతాం సభామిమాం

       భావయామి పరమేశి తావకీం .. 115..

చక్షుః పశ్యతు నేహ కించన పరం ఘ్రాణం న వా జిఘ్రతు

       శ్రోత్రం హంత శ్రుణోతు న త్వగపి న స్పర్శం సమాలంబతాం .

జిహ్వా వేత్తు న వా రసం మమ పరం యుష్మత్స్వరూపామృతే

       నిత్యానందవిఘూర్ణమాననయనే నిత్యం మనో మజ్జతు .. 116..

యస్త్వాం పశ్యతి పార్వతి ప్రతిదినం ధ్యానేన తేజోమయీం

       మన్యే సుందరి తత్త్వమేతదఖిలం వేదేషు నిష్ఠాం గతం .

యస్తస్మిన్సమయే తవార్చనవిధావానందసాంద్రాశయో

       యాతోఽహం తదభిన్నతాం పరశివే సోఽయం ప్రసాదస్తవ .. 117..

గణాధినాథం వటుకం చ యోగినీః

       క్షేత్రాధినాథం చ విదిక్చతుష్టయే .

సర్వోపచారైః పరిపూజ్య భక్తితో

       నివేదయామో బలిముక్తయుక్తిభిః .. 118..

వీణాముపాంతే ఖలు వాదయంత్యై

       నివేద్య శేషం ఖలు శేషికాయై .

సౌవర్ణభృంగారవినిర్గతేన

       జలేన శుద్ధాచమనం విధేహి .. 119..

తాంబూలం వినివేదయామి విలసత్కర్పూరకస్తూరికా-

       జాతీపూగలవంగచూర్ణఖదిరైర్భక్త్యా సముల్లాసితం .

స్ఫూర్జద్రత్నసముద్గకప్రణిహితం సౌవర్ణపాత్రే స్థితై-

       ర్దీపైరుజ్జ్వలమాన్నచూర్ణరచితైరారార్తికం గృహ్యతాం .. 120..

కాచిద్గాయతి కింనరీ కలపదం వాద్యం దధానోర్వశీ

       రంభా నృత్యతి కేలిమంజులపదం మాతః పురస్తాత్తవ .

కృత్యం ప్రోజ్ఝ్య సురస్త్రియో మధుమదవ్యాఘూర్ణమానేక్షణం

       నిత్యానందసుధాంబుధిం తవ ముఖం పశ్యంతి దృశ్యంతి చ .. 121..

తాంబూలోద్భాసివక్త్రైస్త్వదమలవదనాలోకనోల్లాసినేత్రై-

       శ్చక్రస్థైః శక్తిసంఘైః పరిహృతవిషయాసంగమాకర్ణ్యమానం .. 122..

అర్చావిధౌ జ్ఞానలవోఽపి దూరే

       దూరే తదాపాదకవస్తుజాతం .

ప్రదక్షిణీకృత్య తతోఽర్చనం తే

       పంచోపచారాత్మకమర్పయామి .. 123..

యథేప్సితమనోగతప్రకటితోపచారార్చితం

       నిజావరణదేవతాగణవృతాం సురేశస్థితాం .

కృతాంజలిపుటో ముహుః కలితభూమిరష్టాంగకై-

       ర్నమామి భగవత్యహం త్రిపురసుందరి త్రాహి మాం .. 124..

విజ్ఞప్తీరవధేహి మే సుమహతా యత్నేన తే సంనిధిం

       ప్రాప్తం మామిహ కాందిశీకమధునా మాతర్న దూరీకురు .

చిత్తం త్వత్పదభావనే వ్యభిచరేద్దృగ్వాక్చ మే జాతు చే-

       త్తత్సౌమ్యే స్వగుణైర్బధాన న యథా భూయో వినిర్గచ్ఛతి .. 125..

క్వాహం మందమతిః క్వ చేదమఖిలైరేకాంతభక్తైః స్తుతం

       ధ్యాతం దేవి తథాపి తే స్వమనసా శ్రీపాదుకాపూజనం .

కాదాచిత్కమదీయచింతనవిధౌ సంతుష్టయా శర్మదం

       స్తోత్రం దేవతయా తయా ప్రకటితం మన్యే మదీయాననే .. 126..

నిత్యార్చమిదం చిత్తే భావ్యమానం సదా మయా .

నిబద్ధం వివిధైః పద్యైరనుగృహ్ణాతు సుందరీ .. 127..

ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య

శ్రీమచ్ఛంకరభగవతః కృతౌ త్రిపురసుందరీమానసపూజాస్తోత్రం సంపూర్ణం .

త్రిపురసుందరీమానసపూజనస్తోత్రం

శ్రీగణేశాయ నమః ..

అమృతజలధిమధ్యోల్లాసిరత్నాంతరీప-

ప్రసృమరకిరణాలీకల్పితోద్యానశోభే .

సురతరునికురంబస్పృష్టవాతాయనాంత-

శ్చలదలిపటలీభిః కౢప్తధూపాదికృత్యే .. 1..

మణిమయభవనేఽన్తఃప్రౌఢమాణిక్యశాలా-

మధివసతి విశాలా కాపి తే రత్నవేదీ .

తదుపరికృతవాసం దత్తబాలార్కహాసం

దిశతు శుభమనంతే దేవి సింహాసనం తే .. 2..

తదుపరి ధృతనానాహేతిభూషాశ్మరశ్మి-

వ్యతికరపునరుక్తీభూతరమ్యోత్తరీయాం .

గలదమలదయాంభఃసిక్తభక్తప్రరోహాం

ప్రణవనలినభృంగీం భావయే జ్ఞానభంగీం .. 3..

ద్రుహిణహరిహరాణాం మౌలిసంచారశీలం

మణిఘటితవిభూషారశ్మినిర్ణేజితం చ .

నిజమతిదృషదాహం భక్తిగంగాపయోభిః

పదయుగమమలం తే దేవి నిర్ణేజయామి .. 4..

గరుడమణిమయూఖస్పర్ధిదూర్వాసనాథైః

కుశశిశుపరిజుష్టైః స్ఫీతసిద్ధార్థసార్థైః .

ఉపహితసితగంధైః సాక్షతైర్వారిభిస్తే

జనని చరణపద్మే పాద్యమాద్యం దదామి .. 5..

ఫలకుసుమసనాథం నూత్నరత్నప్రరోహం

మలయజరసదిగ్ధం స్నిగ్ధముగ్ధాక్షతం చ .

దరనియమితభక్తానీకవాంఛాప్రదానే

కరసరసిరుహేఽస్మిన్నర్ధ్యమర్ఘ్యే దదామి .. 6..

శిశిరకిరణజాతీపత్రదేవప్రసూన-

స్ఫుటితదలనవైలాక్రాంతకక్కోలగంధం .

శిశిరమమలమేతద్బద్ధపీయూవసఖ్యం

సలిలమఖిలమాతస్త్వం ప్రసన్నాఽఽచమేథాః .. 7..

నవమణిహయపీఠే ప్రేతపద్మస్థితాపి

ప్రపదతరలశోభాస్పృష్టసద్విష్టరశ్రి .

దధిమధుఘృతమిశ్రం త్రిర్విరాజోపనీతం

శశిముఖి మధుపర్కం త్వం ముఖాంతర్నయేథాః .. 8..

పునరాచమనం కార్యం జగజ్జనని సువ్రతే .

త్వచ్ఛిక్షితేన మార్గేణ యతో లోకః ప్రవర్తతే .. 9..

త్వరితసహచరీభిర్దత్తహస్తావలంబం

చరణనలినమేతత్పాదుకాస్థం విధాయ .

ప్రవిశ వివిధశాలం స్నానగేహాంతరాలం

పశుపతిసహితైవాభ్యంగమంగీకురుష్వ .. 10..

అపి రసికవిగీతం భక్తచిత్తానుమత్యై

సదయహృదయభావే స్నాహి పంచామృతేన .

శశిమృగమదముస్తాగారసిద్ధార్థచూర్ణైః

కుసుమజలవిమిశ్చైః స్వైరముద్వర్తయాంగం .. 11..

పరిజనపరిమృష్టే త్వచ్ఛరీరే న యావ-

చ్ఛిశిరసలిలధారాం కాపి చిక్షప తావత్ .

ఉదయిని జనమాతః సీత్కృతే బద్ధభావై-

స్త్రిపురమథనహాసైర్వ్రీడితం క్రీడితం తే .. 12..

అథ విమలితరత్నస్వర్ణదుర్వర్ణకుంభై-

స్త్రిభువనగతతీర్థానీతపానీయపూర్ణైః .

స్నపయతి సురనారీవృందమేతత్తథాపి

ప్రణయజలమిదం నః స్నానకృత్యం కరోతు .. 13..

విమలధవలచీనప్రచ్ఛదప్రావృతాంగ్యా-

స్తవ శిరసిరుహేభ్యో నిర్హరేఽమ్బాంబుబిందున్ .

అగరుశకలధూపైర్ధూప్యతాం చాంగమంగం

సహ పశుపతినా త్వం యాహి వాసోగృహాంతః .. 14..

నవవిమలవిచిత్రే వాససీ నూత్నరత్న-

ద్యుతికృతపునరుక్తాయామసంశోభినీ తే .

అథ కుచపరిణాహాచ్ఛాదినీం శుంభనేత్ర-

త్రితయభవదసూయాం కంచుకీమర్పయామి .. 15..

నహనమపి కచనాం కంకతీభిర్విధాయ

గ్రథితమణివిభూషాం దేవి వేణీం కరోమి .

నిహితనవకిరీటాలంబిముత్తబాలతాభి-

స్తతబహలమయూఖాం చంద్రలేఖా విదధ్యాం .. 16..

అలికతలవిలంబిస్ఫీతసీమంతముక్తా-

సరణిధటితహీరాస్పష్టచంద్రాత్తతంద్రే .

వివిధమణిగణాంకోత్తంససంశ్లిష్యదశ్మా

శ్రవణయుగవిభూషా దేవి తోషాయ భూయాత్ .. 17..

వివిధవిరచనాభిర్భిన్నభిన్నా విభూషా

జనయతు తవ కంఠే దేవి కామప్యభిఖ్యాం .

గుణినమపి గిరీశశ్లేపదత్తాంతరాయం

కఠినకుచయుగాగ్రే హారమారోపయామి .. 18..

దరతరలవిలంబిస్వర్ణసూత్రాంతగుచ్ఛే

జనని తవ దిశేతామంగదే శర్మకర్మ .

అథ వలయమణీనాం రశ్మిసంభిన్నముద్రాం

జనయతు పునరుక్తాం శృంఖలామంతరీణాం .. 19..

మణిమయరశనాధఃక్షుద్రఘంటానినాదా

మణితగుణనికానాం స్మారకాః స్యుః శివస్య .

మరకతమణిజాతం మంజుమంజీరయుగ్మం

రచయతు శశిమౌలే రంజనం సింజితేన .. 20..

అరుణమణికృతానామంగులీభూషణానాం

ప్రభవతు పదముస్రైర్లాక్షయా రంజితం తే .

మృగమదరచితాయాం పత్రభంగీలతాయా-

మనుభవతు దృగంతో బంధనం భూతభర్తుః .. 21..

భజ జనని హరిద్రాం దత్తహారిద్రముద్రాం

కుసుమసలిలతైలాక్రాంతకాశ్మీరకోశాం .

అథ నసి కురు ముక్తాం దంతవాసోఽనుషక్తాం

స్మితరుచిపునరుక్తాం నందితానేకభక్తాం .. 22..

సహజనలిననీలే ఖంజనే ఖంజనానాం

భవనిగడగతానాం మోచనే లోచనే తే .

జనని గిరిశచేతోరంజనే మందమందం

మసృణిమసృణితైస్తైరంజనైరంజనేయం .. 23..

ప్రణతిభిరుపనీతం దీప్తలాలాటనేత్ర-

ప్రతిభటమివ శంభోర్మృత్యుబాధావిరోధి .

శశిన ఇవ ముఖేందోర్భేదకః కోఽపి ధర్మో

జనయతు ముదముచ్చైః కుంకుమం రంకునేత్రే .. 24..

యుగపదుపగతేంద్రోపేంద్రరుద్రాదిమౌలి-

స్థలముకుటవిఘట్టచ్చండదండాభిఘాతైః .

కృతసరణిరజస్రక్రుద్ధదౌవారికైస్తే

జనని భవ విభూషా ప్రేతపద్మాసనస్య .. 25..

అహమహమికయాధః పాతుకానాం సురాణాం

ప్రపదమపి శరీరే దేవి సంయోజ్య శీఘ్రం .

కరుణరసమయీనాం లోచనాంతశ్ఛటానాం

కతిపయవలనాభిర్దేహి పూజావకాశం .. 26..

అగరుఘుసృణచోరీశీరగోరోచనాభిః

మలయజమృగనాభిస్ఫీతకర్పూరపూరైః .

కుసుమసలిలఘృష్టైః కల్పయిత్వాంగరాగం

పటుతరపటవాసైర్వాసయే తేఽఙ్గకాని .. 27..

కమలకుముదమల్లీమాలతీకుందజాతీ-

బకులకనకనీపాశోకచాంపేయకాద్యైః .

మరుబకతులసీభిః కేతకీబిల్వపత్రైః

దమనకశతపత్రైరర్చయే త్వత్పదాబ్జం .. 28..

హారశేఖరవతంసశాటికాప్రచ్ఛకాతులితకంచుకీముఖైః .

మండపైర్జవనికాభిరుచ్చకైః కౌసుమైస్తవ ముదం కదంబయే .. 29..

కనకమయహసంతీకోటిమధ్యస్థితానాం

మృదుపవనధుతానాం దీప్తవైశ్వానరాణాం .

అగరుముపరి హుత్వా గుగ్గులుం సర్జఖండాన్

ఘృతజతుపరిమిశ్రం త్వాం శివే ధూపయామి .. 30..

ధూపవర్తితరమంతరాంతరా గంధతైలపరిపూర్ణదీపికాః .

ఆవహంతు తవ పార్శ్వయోస్తరామంబికే జవనికాపటశ్రియం .. 31..

సురసురభిజసర్పిఃపూరితే రత్నపాత్రే

హిమకిరణరజోభిర్లోడితాం తూలవర్తీం .

తరుణదహనయుక్తామంబ కృత్వా దదేయం

నిరయనిరసనాయ ప్రస్ఫురంతం ప్రదీపం .. 32..

రజతకనకహీరాద్యశ్మపాత్రేషు మాతః

వివిధరససనాథైశ్చోష్యలేహ్యప్రపేయైః .

ఉపాహితబహుభక్ష్యైర్వ్యంజనైశ్చారుఖాద్యైః

జఠరదహనతృప్తిం నిత్యతృప్తే చరేథాః .. 33..

పరస్పరకుతూహలైః కవలదానరూపైః శివే

పురాణతరుణౌ యువాం చరతమత్ర లీలాశితం .

సుగంధి సలిలం తథా పిబతమేణనాభీరసైః

సకేసరనిశాకరై రచయతం కరోద్వర్తనం .. 34..

పనసకదలజంబూకర్కటీహారహూరామలక-

బదరనింబూదుంబరైర్బీజపూరైః .

అమృతలకుచబిల్వైర్దాడిమీనాలికేరై

రుచిరుచితఫలైస్తే వర్ధతాం బద్ధరాగా .. 35..

శశికరధవలానాం నాగవల్లీదలానాం

క్రముకకదరజాతీచంద్రసంయోగభాజాం .

మృగమదసురసూనుస్ఫీతచూర్ణావృతానాం

భజతు జనని రాగం త్వన్ముఖాంభోజమేతత్ .. 36..

కనకభరితపృథ్వీం మానుషానందమాహు-

స్తదుపరి శతకోటిక్రాముకానందమాహుః .

జనని తవ దదేయం దక్షిణాం కాం తథాపి

ప్రథయ మయి దృగంతం దక్షిణావీక్షణేన .. 37..

త్రిభువనకుహరేఽస్మిన్పూరితే వేణువీణా-

పటుపటహకఝిల్లీతాలఘంటానినాదైః .

ఉరగసురవధూభిర్గీయమానం సమంతాత్

జనయతు పదముచ్చైర్దేవి నీరాజనం తే .. 38..

ప్రాణేషు పంచసు నిధాయ షడాత్మవృత్తి-

వర్తీశ్చిదగ్నిపరిచుంబితజాతశోభాః .

నీరాజయామి భవతీం భవతీవ్రతాప-

నిర్వాపహేతుమధునా మధునాఽలసాక్షి .. 39..

ఉరగతురగహంసకేకిశాలూరభృంగీ-

మదకలకలవింకీశ్యేనపారావతానాం .

గతిభిరుపచితోఽయం మౌలితః పాదమూలం

హరతు దురితజాతం దేవి కర్పూరదీపః .. 40..

జయ దేవి జయ దేవి జయ విశ్వాధారే

దీనానాథోద్ధరణప్రవణే జనసారే .

త్వత్పదపద్మే పద్మే విధృతవ్యాపారే

మయి దీనే కురు కరుణాం కరుణామృతపారే .. 41..

అమృతోదధిమధ్యస్థితనవరత్నద్వీపే

విష్వగ్వికసితసురతరునవచంపకనీపే .

నానాకుసుమామోదిని విధుతాగరుధూపే

చింతామణిభవనేఽఙ్గనతిష్ఠత్సురభూపే .. 42..

మాణిక్యోజ్జ్వలచత్వరసింహాసనశోభే

శవపంచకమంచేఽఞ్చితజనలోచనలోభే .

సుశ్వేతాతపవారణచలచామరదంభే

ధ్యాయే భవతీమనిశం కృతజగదారంభే .. 43..

దలితజపాకుసుమోపమవసనచ్ఛన్నాంగీం

తరుణారుణకరుణప్రదకిరణావలిభంగీం .

దధతీం రచనాం నయనే యమునాతారంగీం

కలయంతీం కుచకోశే సుషమాం నారంగీం .. 44..

శరపంచకబాణాసనసృణిపాశోల్లసితాం

మలయానిలపరివాదదముఖపద్మశ్వసితాం .

బాలామృతకరమండితచూడాతటమీహతాం

జ్యోతిస్త్రితయాలంకృతనయనత్రయసహితాం .. 45..

పశుపతియంత్రణపటుతరరోమావలియూపాం

మన్మథతస్కరగుప్తిక్షమనాభీకూపాం .

ప్రపదాలంబిశిఖామణివృందారకభూపాం

కమలాసనహరిహరముఖచింత్యామితరూపాం .. 46..

కాలీ బగలా బాలా తారా భువనేశీ

వారాహీ మాతంగీ కమలా వచనేశీ .

ఛిన్నా దుర్గా గంగా కాశీ కామేశీ

త్వత్తో నాన్యత్కించిత్త్వం చిద్రసపేశీ .. 47..

త్వం భూమిస్త్వం సలిలం త్వం తేజః ప్రబలం

త్వం వాయుస్త్వం వ్యోమ త్వం చిత్తం విమలం .

త్వం జీవస్త్వం చేశస్త్వం బ్రహ్మాస్యమలం

సత్యానృతయోరన్యత్త్వత్తః కిం సకలం .. 48..

కులకుండే త్వం కురుషే శయనే ప్రస్వాపం

స్వాధిష్ఠానే మిహిరాయుతదీధితితాపం .

నీలా నాభౌ కంఠే శశిభా హృతపాపం

వర్షస్యమృతం బిందావానందావాపం .. 49..

త్వత్పదపద్మే చిత్తం త్రిపురే మే రమతాం

తత్రైవ ప్రతివేలం మౌలిర్మే నమతాం .

యాతాయాతక్లేశః సద్యః సంశమతాం

యాచే భూయో భూయో భవతా మే భవతాం .. 50..

నృత్యతి గాయతి సురసం సురనారీవృందే

కరతాలీదానోత్సుకసురవితతానందే .

నీరాజనకాలే తవ మునిజననుతవేదే

చరణానతసమ్రాజః పరిహృతభవఖేదే .. 51..

మిలదలిపటలీభిః కేవలం ఘ్రాతపూర్వః

స్ఫుటితకుసుమగర్భః స్వైరసంచారిణీభిః .

ఉపహితపటవాసః పుష్పధూలీకదంబైః

ప్రభవతు పదపాతీ దేవి పుష్పాంజలిస్తే .. 52..

సకృదపి వినతాంఘ్రిస్త్వాం పరిక్రమ్య మాతః

భవతి మఖఫలేషు క్షీణలోభం మనో నః .

సరసిజమకరందాస్వాదతృప్తో మిలిందః

క్వచిదపి పిచుమందే చిత్తవృత్తిం తనోతి .. 53..

జనని ఖలకపోతన్యాయతః పాతుకానా-

     మధిపదకమలం తే మందవృందారకాణాం .

భవతు నయనయోస్తే గోచరః క్వానతిర్మే

     న లసతి పునరుచ్చేః స్వైరముద్గ్రీవికా చేత్ .. 54..

విమలముకురబింబం పుండరీకాతపత్రం

     శిశిరకరసమానే చామరే చామరేశి .

కరితురగకదంబం శక్తిభిర్దిశ్యమానం

     జనయ సఫలమంచల్లోచనాలోచనాభిః .. 55..

అథ కృతపరివారాభ్యర్చనం తే సమర్ప్య

     స్తుతిభిరనుపమాభిః పావయే స్వాం రసజ్ఞాం .

యదపి న రవిరశ్మిః స్వోపకారం విధత్తే

     తదపి కమలమాలామ్లానహానిం తనోతి .. 56..

శ్రవసి విశతి యస్య త్వన్మనోరేకవర్ణః

     సకృదపి విధియోగాదంబికే మానవస్య .

లఘుతరఫలమేతద్యత్త్రివర్గాశ్రయత్వం

     పరిచరతి పురస్తాత్పూరుషార్థశ్చతుర్థః .. 57..

హృదయకమలమధ్యే త్వాం సమానీయ మాతః

     పవనభరితనాడీరంధ్రముద్రావిధిజ్ఞాః .

దధతి పరమధన్యాః కుండలీస్పర్శహృష్య-

     చ్ఛశిగలదమృతౌఘప్లావజన్యప్రమోదం .. 58..

వదతి విధికలత్రం త్వాం శివే కోఽపి కశ్చిత్

త్రిపురమథనపుణ్యం శ్రీపతేః కోఽపి భాగ్యం .

ప్రకృతిమితి పరేఽపి ప్రౌఢవిజ్ఞానమేకే

నిఖిలనిగమమూలం మన్మహే బోధమేవ .. 59..

కదా తవ పదాంబుజస్మరణజాతరోమోద్గమః

సదాశివమదాలసే జనని మాతరిత్యుద్గిరన్ .

నిలీనకరణక్రియస్త్రిదశగర్వసర్వంకషా-

మఖర్వపదవీం భజే హరిహరాదిభిర్భావితాం .. 60..

త్వదీయముఖచందిరే చలితలోచనేందిందిరే

ప్రసాదకులమందిరే స్థగితపద్మచందేందిరే .

ప్రభాపటలతంతురే లలితహావకేలీపురే

హృతస్మరహరాంతరే ధృతమతిర్భవం సంతరే .. 61..

త్వదీయం యద్రూపం జనజనని బిందుత్రయయుతం

స్మరన్నంతర్యోగాత్త్రిదివపతితామాప సురపః .

ఇదం కో జానీతే క్షణమపి హరార్ధం ప్రజపతాం

హసార్ధం వ్యాలంబ్య ప్రతిఫలతి హంసః పరిణతిః .. 62..

జనని నిభృతం యత్తే రూపం వదత్యతిశాశ్వతం

లసతు హృది నో దీపప్రాయః స కోఽపి హసాత్మకః .

స్మరణవిషయే యేన స్వైరం స్వరేణ విజృంభతా

త్రిపురమథనః ప్రాపేశత్వం తదాత్మకతాం గతః .. 63..

ఋచామాచార్యాసి స్తుతిశతజుషాం చాపి యజుషాం

మహాధామ్నాం సామ్నాం ప్రథితయశసోఽథర్వశిరసః .

హరిబ్రహ్మేశాద్యాః ప్రపదకిరణోత్తంసముకుటా-

స్తవాతస్త్వాం స్తోతుం జనజనని కో వా ప్రభవతు .. 64..

త్రస్యత్ఖంజనగంజనవ్యసనినీమున్మాథినీం మాద్యతో

జీవంజీవకులస్య భృంగపటలీన్యక్కారబద్ధవ్రతాం .

రంకూచ్ఛంకువిధాయినీం చ నలినశ్రీగర్వసర్వంకషాం

కారుణ్యామృతవర్షిణీం మయి శివే దృష్టిం మనాఙ్మోటయ .. 65..

రింగద్భృంగకదంబడంబరపరిష్వంగప్రసంగాకుల-

ప్రత్యూషస్ఫురమాణపంకజవనీసౌభాగ్యసర్వంకషః .

దృక్కోణః కరుణాంకురాంక్షితతనుః కోఽప్యద్రిజే మద్వపుః-

పాంథత్వే తరసా భవేత్పరికరీ ధన్యస్తదా స్యాం న కిం .. 66..

సముద్యన్మార్తండప్రసృమరకరాలీమసృణయా

పదద్వంద్వానందప్రణయిజనరింగత్కరుణయా .

లలల్లీలాభాజా పరశివపరిష్వంగపరయా

ధియా చేతః కాలం నయ గతనయ త్వం క్షణమపి .. 67..

వేదైరంఘ్రిభిరుజ్జ్వలోపనిషదాం వృందైరధఃకల్పితైః

శాస్త్రాద్యైరపి తిర్యగూర్ధ్వకలితైరోంకారమార్గేణ చ .

విష్వఙ్మాత్రనిబంధనైః పరిచితేఽస్మిన్వాఙ్మయే పంజరే

కీరీ కాచన చేతనైకవిభవా చిత్తే చకాస్తాచ్చిరం .. 68..

తరుణారుణప్రతిమరమ్యరుచిం కుసుమేషుచాపసృణిపాశకరాం .

త్రిగుణాత్పరాం త్రిగుణరూపమయీం భవతీమహర్నిశమహం కలయే .. 69..

ఇతి నిజమతివైభవానురూపామకృత కవిర్భువి సామరాజనామా .

సమయిజనముదేఽమ్బికాసపర్యామమృతసుఖాత్మకతావికాసపర్యాం .. 70..

ఇతి శ్రీసత్యానందనాథాపరనామధేయసామరాజదీక్షితవిరచితే

పూజారత్నవర్తి త్రిపురసుందరీమానసపూజనస్తోత్రం సంపూర్ణం .

త్రిపురసుందరీప్రాతఃస్మరణం

శ్రీగణేశాయ నమః .

కస్తూరికాకృతమనోజ్ఞలలామభాస్వ-

      దర్ధేందుముగ్ధనిటిలాంచలనీలకేశీం .

ప్రాలంబమాననవమౌక్తికహారభూషాం

      ప్రాతః స్మరామి లలితాం కమలాయతాక్షీం .. 1..

ఏణాంకచూడసముపార్జితపుణ్యరాశి-

      ముత్తప్తహేమతనుకాంతిఝరీపరీతాం .

ఏకాగ్రచిత్తమునిమానసరాజహంసీం

      ప్రాతః స్మరామి లలితాపరమేశ్వరీం తాం .. 2..

ఈషద్వికాసినయనాంతనిరీక్షణేన

      సామ్రాజ్యదానచతురాం చతురాననేడ్యాం .

ఈశాంకవాసరసికాం రససిద్ధిదాత్రీం

      ప్రాతః స్మరామి మనసా లలితాధినాథాం .. 3..

లక్ష్మీశపద్మభవనాదిపదైశ్చతుర్భిః

      సంశోభితే చ ఫలకేన సదాశివేన .

మంచే వితానసహితే ససుఖం నిషణ్ణాం

      ప్రాతః స్మరామి మనసా లలితాధినాథాం .. 4..

హ్రీంకారమంత్రజపతర్పణహోమతుష్టాం

      హ్రీంకారమంత్రజలజాతసురాజహంసీం .

హ్రీంకారహేమనవపంజరసారికాం తాం

      ప్రాతః స్మరామి మనసా లలితాధినాథాం .. 5..

హల్లీసలాస్యమృదుగీతిరసం పిబంతీ-

      మాకూణితాక్షమనవద్యగుణాంబురాశిం .

సుప్తోత్థితాం శ్రుతిమనోహరకీరవాగ్భిః

      ప్రాతః స్మరామి మనసా లలితాధినాథాం.. 6..

సచ్చిన్మయీం సకలలోకహితైషిణీ చ

      సంపత్కరీహయముఖీముఖదేవతేడ్యాం .

సర్వానవద్యసుకుమారశరీరరమ్యాం

      ప్రాతః స్మరామి మనసా లలితాధినాథాం .. 7..

కన్యాభిరర్ధశశిముగ్ధకిరీటభాస్వ-

      చ్చూడాభిరంకగతహృద్యవిపంచికాభిః .

సంస్తూయమానచరితాం సరసీరుహాక్షీం

      ప్రాతః స్మరామి మనసా లలితాధినాథాం .. 8..

హత్వాఽసురేంద్రమతిమాత్రబలావలిప్త-

      భండాసురం సమరచండమఘోరసైన్యం .

సంరక్షితార్తజనతాం తపనేందునేత్రాం

      ప్రాతః స్మరామి మనసా లలితాధినాథాం .. 9..

లజ్జావనమ్రరమణీయముఖేందుబింబాం

      లాక్షారుణాంఘ్రిసరసీరుహశోభమానాం .

రోలంబజాలసమనీలసుకుంతలాడ్యాం

      ప్రాతః స్మరామి మనసా లలితాధినాథాం .. 10..

హ్రీంకారిణీ హిమమహీధరపుణ్యరాశిం

      హ్రీంకారమంత్రమహనీయమనోజ్ఞరూపాం .

హ్రీంకారగర్భమనుసాధకసిద్ధిదాత్రీం

      ప్రాతః స్మరామి మనసా లలితాధినాథాం .. 11..

సంజాతజన్మమరణాదిభయేన దేవీం

      సంఫుల్లపద్మవిలయాం శరదిందుశుభ్రాం .

అర్ధేందుచూడవనితామణిమాదివంద్యాం

      ప్రాతః స్మరామి మనసా లలితాధినాథాం .. 12..

కల్యాణశైలశిఖరేషు విహారశీలాం

      కామేశ్వరాంకనిలయాం కమనీయరూపాం .

కాద్యర్ణమంత్రమహనీయమహానుభావాం

      ప్రాతః స్మరామి మనసా లలితాధినాథాం .. 13..

లంబోదరస్య జననీం తనురోమరాజీం

      బింబాధరాం చ శరదిందుముఖీం మృడానీం .

లావణ్యపూర్ణజలధిం జలజాతహస్తాం

      ప్రాతః స్మరామి మనసా లలీతాధినాథాం .. 14..

హ్రీంకారపూర్ణనిగమైః ప్రతిపాద్యమానాం

      హ్రీంకారపద్మనిలయాం హతదానవేంద్రాం .

హ్రీంకారగర్భమనురాజనిషేవ్యమాణాం

      ప్రాతః స్మరామి మనసా లలితాధినాథాం .. 15..

శ్రీచక్రరాజనిలయాం శ్రితకామధేనుం

      శ్రీకామరాజజననీం శివభాగధేయాం .

శ్రీమద్గుహస్య కుల్యమంగలదేవతాం తాం

      ప్రాతః స్మరామి మనసా లలితాధినాథాం .. 16..

ఇతి శ్రీత్రిపురసుందరీప్రాతఃస్మరణం సమాప్తం ..

త్రిపురసుందరీపుష్పాంజలిస్తవః

శ్రీగణేశాయ నమః .

కల్యాణదాత్రి కమనీయతనూలతే త్వాం

      కం చాపి కాలమనుచింత్య హృదాబ్జమధ్యే .

కామం ప్రహర్షభరితేన మయా తవాద్య

      పుష్పాంజలిశ్చరణయోరయమంబ కీర్ణః .. 1..

ఏతన్మదీయసుకృత్తం పరమం పురాణం

      యత్త్వామహం ప్రతిదినం మనసా భజామి .

సాక్షాత్కృతేన తవ రూపమనేన చాద్య

      పుష్పాంజలిశ్చరణయోరయమంబ కీర్ణః .. 2..

ఈశాదిదేవమహనీయమహానుభావే

      దీనం త్విమం భవభయేన పరిస్ఫురంతం .

దీనార్తిహర్త్రి దయయా పరిపాలయాశు

      పుష్పాంజలిశ్చరణయోరయమంబ కీర్ణః .. 3..

లజ్జాం విహాయ బహుధా బహవోఽపి దేవాః

      సంపూజితా జడధియా నతు కోఽపి దృష్టః .

లబ్ధం తవైవ రమణీయవపుర్దృశా మే

      పుష్పాంజలిశ్చరణయోరయమంబ కీర్ణః .. 4..

హ్రీంకారమంత్రనిలయే బహుశో భవాబ్ధౌ

      మగ్నః పరం తు న కదాపి గతోఽస్మి పారం .

తత్తారణే నిపుణయోస్త్రిపురే మయాద్య

      పుష్పాంజలిశ్చరణయోరయమంబ కీర్ణః .. 5..

హస్తేషు పాశమహనీయసితేక్షుచాపే

      పుష్పాస్త్రమంకుశవరం లలితం దధానే .

హేమాద్రితుంగతరశృంగనివాసశీలే

      పుష్పాంజలిశ్చరణయోరయమంబ కీర్ణః .. 6..

సర్వేషు దేవి సమయేషు గతిస్త్వమేవ

      నాన్యం కదాపి మనసా సమనుస్మరామి .

సర్వత్ర రూపమతులం తవ పశ్యతాద్య

      పుష్పాంజలిశ్చరణయోరయమంబ కీర్ణః .. 7..

కస్తే పురేశి విధివత్తు సమర్హణాయాం

      శక్తః సమస్తపరివర్హయుతోఽపి ధీమాన్ .

హృత్పంకజేన భవతీం భజతా మయాద్య

      పుష్పాంజలిశ్చరణయోరయమంబ కీర్ణః .. 8..

హంతాతిస్థభవపావకశోషితేన

      కుత్రాప్యలబ్ధశరణేన సరోజవక్త్రే .

అంతే మయాత్రభవతీం శరణం గతేన

      పుష్పాంజలిశ్చరణయోరయమంబ కీర్ణః .. 9..

లక్ష్యాసి దేవి బహుజన్మతపోబలేన

      లక్ష్మీశధాతృపరిపూజ్యపదాస్తుజాతే .

ఆలక్ష్య రూపమరుణం తవ విస్మితేన

      పుష్పాంజలిశ్చరణయోరయమంబ కీర్ణః .. 10..

హ్రీంకారమేవ శరణం జగతాం వదంతి

      హ్రీంకారమేవ పరమం భువనే రహస్యం .

హ్రీంకారమేవ సతతం స్మరతా మయాద్య

      పుష్పాంజలిశ్చరణయోరయమంబ కీర్ణః .. 11..

సర్వస్య దేవి భువనస్య నిదానభూతా

      త్వయ్యేవ సర్వమనఘే విలయం గతం స్యాత్ .

సంచింత్య చైతదధునా త్రిపురే మయా తే

      పుష్పాంజలిశ్చరణయోరమంబ కీర్ణః .. 12..

కశ్చిద్యదా భవనిహంత్రి విచింతయేత్త్వాం

      దీనం తదైవ హి కటాక్షయసే దృశా త్వం .

ఏవం విచింత్య భవతీం స్మరతా మయాద్య

      యుష్పాంజలిశ్చరణయోరమంబ కీర్ణః .. 13..

లబ్ధ్వా త్వదీయచరణాంధుజమంబ

      జంతుర్నావర్తతే పునరపి ప్రభవాయ లోకే .

వేదోక్తిమేవమసకృత్స్మరతా మయాద్య

      పుష్పాలిశ్చరణయోరయమంబ కీర్ణః .. 14..

హ్రీంకారమేవ జపతాం ప్రతివాసరం చ

      హ్రీంకారమేవ భజతాం సకలేష్టసిద్ధ్యై .

హ్రీంకారమేవ పరమం శరణం గతేన

      పుష్పాంజలిశ్చరణయోరయమప్య కీర్ణః .. 15..

శ్రీంకారమంత్రకనకాబ్జనివాసశీలే

      శ్రీరూపధారిణి శివో శ్రితకల్పవల్లి .

శ్రీమద్గుహస్తుతమహావిభవే పురేశి

      పుష్పాంజలిశ్చరణయోరయమంబ కీర్ణః .. 16..

ఇతి శ్రీత్రిపురసుందరీపుష్పాంజలిస్తవః సంపూర్ణః ..

త్రిపురసుందరీ పంచరత్నస్తోత్రం

నీలాలకాం శశిముఖీం నవపల్లవోష్ఠీం

     చాంపేయపుష్పసుషమోజ్జ్వలదివ్యనాసాం .

పద్మేక్షణాం ముకురసుందరగండభాగాం

     త్వాం సాంప్రతం త్రిపురసుందరి! దేవి! వందే .. 1..

శ్రీకుందకుడ్మలశిలోజ్జ్వలదంతవృందాం

     మందస్మితద్యుతితిరాహితచారువాణీం .

నానామణిస్థగితహారసుచారుకంఠీం

     త్వాం సాంప్రతం త్రిపురసుందరి! దేవి! వందే .. 2..

పీనస్తనీం ఘనభుజాం విపులాబ్జహస్తాం

     భృంగావలీజితసుశోభితరోమరాజిం .

మత్తేభకుంభకుచభారసునమ్రమద్ధ్యాం

     త్వాం సాంప్రతం త్రిపురసుందరి! దేవి! వందే .. 3..

రంభోజ్జ్వలోరుయుగలాం మృగరాజపత్రా-

     మింద్రాదిదేవమకుటోజ్జ్వలపాదపద్మాం .

హేమాంబరాం కరధృతాంచితఖడ్గవల్లీం

     త్వాం సాంప్రతం త్రిపురసుందరి! దేవి! వందే .. 4..

మత్తేభవక్త్రజననీం మృడదేహయుక్తాం

     శైలాగ్రమద్ధ్యనిలయాం వరసుందరాంగీం .

కోటీశ్వరాఖ్యహృదిసంస్థితపాదపద్మాం

     త్వాం సాంప్రతం త్రిపురసుందరి! దేవి! వందే .. 5..

బాలే! త్వత్పాదయుగలం ధ్యాత్వా సంప్రతి నిర్మితం .

నవీనం పంచరత్నం చ ధార్యతాం చరణద్వయే .. 6..

ఇతి శ్రీత్రిపురసుందరీపంచరత్నస్తోత్రం సంపూర్ణం .