SHANKARACHARYA Stotras & Hymns - Read Sacred Verses

శ్రీ జగద్గురు స్తుతిః

శ్రీ జగద్గురు స్తుతిః.

Telugu

శ్రీ జగద్గురు స్తుతిః

యశ్శిష్య హృత్తాప దవాగ్నిభయనివారిణే మహామేఘః
యశ్శిష్య రోగార్తి మహాహివిషవినాశనే సుపర్ణాత్మా |
యశ్శిష్య సందోహ విపక్షగిరి విభేదనే పవిస్సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 1 ||
యం శంకరార్యాపరరూప ఇతి తపోనిధిం భజంత్యార్యాః
యం భారతీపుంతనురూప ఇతి కళానిధిం స్తువంత్యన్యే |
యం సద్గుణాఢ్యం నిజదైవమితి నమంతి సంశ్రితాస్సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 2 ||
యేనాశ్రితం సజ్జనతుష్టికరమభీప్సితం చతుర్భద్రం
యేనాదృతం శిష్యసుధీసుజన శివంకరం కిరీటాద్యం |
యేనోద్ధృతా సంయమిలోకనుత మహానుభావ తా సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 3 ||
యస్మై నృపాద్యాబిరుదం దదతి విభూషణాదికం భక్త్యా
యస్మై ప్రయచ్ఛంతి ముదాభజక జనానృపోపచారాదీన్ |
యస్మై ప్రదత్తా గురుణా స్వకృత తపోవిభూతయస్సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 4 ||
యస్మాదభీష్టార్థచయాప్తిరిహ భవత్యమోఘమార్తానాం
యస్మాత్కటాక్షాస్సదయాః కుశలకరాస్సరంతి భక్తేషు |
యస్మాత్సదానందద సూక్త్యమృత ధునీ ప్రజాయతే సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 5 ||
యస్యాంగకే భాతి మహత్త్వగుణవిబోధకం మహాతేజః
యస్యోక్తిపూరే ఋతపూతహిత సదంబుభక్తపానీయం |
యస్యాంతరంగేహి శివోహమితి విభావనైకతా సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 6 ||
యస్మిన్ స్థితా శృంగగిరీడ్యయతి పరంపరాత్తదివ్యశ్రీః
యస్మిన్ చకాస్త్యుద్ధృతవాది జయకరీ యశఃకరీ విద్యా |
యస్మిన్ సువిజ్ఞానవిరక్తి శమదమాదిసంపదస్సోర్చ్యః
శ్రీసచ్చిదానంద శివాభినవ నృసింహభారతీ స్వామీ || 7 ||
యోర్చ్యో భజేయం శరణం భవుకయుతోస్మి యేన యస్మైగీః
దత్తా చ యస్మాత్సుఖమీప్సితముచితం హి యస్య దాసోఽహం |
యస్మిన్ మనస్సంతతభక్తియుతమభూత్స ఏవ పాహి త్వం
శ్రీసచ్చిదానంద శివాభినవ నృసింహభారతీ స్వామీ || 8 ||

శ్రీ చంద్రశేఖరేంద్ర సరస్వతీ స్తుతిః

శ్రీ చంద్రశేఖరేంద్ర సరస్వతీ స్తుతిః.

Telugu

Read Stotra

శ్రీ చంద్రశేఖరేంద్ర సరస్వతీ స్తుతిః

శృతిస్మృతిపురాణోక్త ధర్మమార్గరతం గురుం |
భక్తానాం హిత వక్తారం నమస్యే చిత్తశుద్ధయే || 1 ||
అద్వైతానందభరితం సాధూనాముపకారిణం |
సర్వశాస్త్రవిదం శాంతం నమస్యే చిత్తశుద్ధయే || 2 ||
ధర్మభక్తిజ్ఞానమార్గప్రచారే బద్ధకంకణం |
అనుగ్రహప్రదాతారం నమస్యే చిత్తశుద్ధయే || 3 ||
భగవత్పాదపాదాబ్జవినివేశిత చేతసః |
శ్రీచంద్రశేఖరగురోః ప్రసాదో మయిజాయతాం || 4 ||
క్షేత్రతీర్థకథాభిజ్ఞః సచ్చిదానందవిగ్రహః |
చంద్రశేఖర్యవర్యోమే సన్నిధత్తా సదాహృది || 5 ||
పోషణే వేదశాస్త్రాణాం దత్తచిత్తమహర్నిశం |
క్షేత్రయాత్రారతం వందే సద్గురుం చంద్రశేఖరం || 6 ||
వేదజ్ఞాన్ వేదభాష్యజ్ఞాన్ కర్తుం యస్య సముద్యమః |
గురుర్యస్య మహాదేవః తం వందే చంద్రశేఖరం || 7 ||
మణివాచక గోదాది భక్తి వాగమృతైర్బృశం |
బాలానాం భగవద్భక్తిం వర్ధయంతం గురుం భజే || 8 ||
లఘూపదేశైర్నాస్తిక్య భావమర్దన కోవిదం |
శివం స్మితముఖం శాంతం ప్రణతోఽస్మి జగద్గురుం || 9 ||
వినయేన ప్రార్థయేఽహం విద్యాం బోధయమే గురో |
మార్గమన్యం నజానేఽహం భవంతం శరణంగతః || 10 ||

శ్రీ శంకరభగవత్పాద షోడశోపచార పూజా

శ్రీ శంకరభగవత్పాద షోడశోపచార పూజా.

Telugu

Read Stotra

శ్రీ శంకరభగవత్పాద షోడశోపచార పూజా

పునః సంకల్పం –
పూర్వోక్త ఏవం గుణ విశేషణ విశిష్టాయాం శుభతిథౌ వైదికమార్గ ప్రతిష్ఠాపకానాం జగద్గురూణాం శ్రీశంకరభగవత్పాదపూజాం కరిష్యే |
ధ్యానం –
శ్రుతిస్మృతిపురాణానామాలయం కరుణాలయం |
నమామి భగవత్పాదశంకరం లోకశంకరం ||
అస్మిన్ బింబే శ్రీశంకరభగవత్పాదం ధ్యాయామి |
ఆవాహనం –
యమాశ్రితా గిరాం దేవీ నందయత్యాత్మసంశ్రితాన్ |
తమాశ్రయే శ్రియా జుష్టం శంకరం కరుణానిధిం ||
శ్రీశంకరభగవత్పాదమావాహయామి |
ఆసనం –
శ్రీగురుం భగవత్పాదం శరణ్యం భక్తవత్సలం |
శివం శివకరం శుద్ధమప్రమేయం నమాంయహం ||
శ్రీశంకరభగవత్పాదాయ నమః ఆసనం సమర్పయామి |
పూర్ణకుంభప్రదానం –
నిత్యం శుద్ధం నిరాకారం నిరాభాసం నిరంజనం |
నిత్యబోధం చిదానందం గురుం బ్రహ్మ నమాంయహం ||
శ్రీశంకరభగవత్పాదాయ నమః పూర్ణకుంభం సమర్పయామి |
పాద్యం –
సర్వతంత్రస్వతంత్రాయ సదాత్మాద్వైతరూపిణే |
శ్రీమతే శంకరార్యాయ వేదాంతగురవే నమః ||
శ్రీశంకరభగవత్పాదాయ నమః పాదయోః పాద్యం సమర్పయామి |
అర్ఘ్యం –
వేదాంతార్థాభిధానేన సర్వానుగ్రహకారిణం |
యతిరూపధరం వందే శంకరం లోకశంకరం ||
శ్రీశంకరభగవత్పాదాయ నమః హస్తయోః అర్ఘ్యం సమర్పయామి |
ఆచమనీయం –
సంసారాబ్ధినిషణ్ణాజ్ఞనికరప్రోద్దిధీర్షయా |
కృతసంహననం వందే భగవత్పాదశంకరం ||
శ్రీశంకరభగవత్పాదాయ నమః ఆచమనీయం సమర్పయామి |
స్నానం –
యత్పాదపంకజధ్యానాత్ తోటకాద్యా యతీశ్వరాః |
బభూవుస్తాదృశం వందే శంకరం షణ్మతేశ్వరం ||
శ్రీశంకరభగవత్పాదాయ నమః స్నాపయామి |
స్నానానంతరం ఆచమనీయం సమర్పయామి |
వస్త్రం –
నమః శ్రీశంకరాచార్యగురవే శంకరాత్మనే |
శరీరిణాం శంకరాయ శంకరజ్ఞానహేతవే ||
శ్రీశంకరభగవత్పాదాయ నమః వస్త్రం సమర్పయామి |
ఉపవీతం –
హరలీలావతారాయ శంకరాయ వరౌజసే |
కైవల్యకలనాకల్పతరవే గురవే నమః ||
శ్రీశంకరభగవత్పాదాయ నమః ఉపవీతం సమర్పయామి |
రుద్రాక్షమాలా (ఆభరణం) –
విచార్యం సర్వవేదాంతైః సంచార్యం హృదయాంబుజే |
ప్రచార్యం సర్వలోకేషు ఆచార్యం శంకరం భజే ||
శ్రీశంకరభగవత్పాదాయ నమః రుద్రాక్షమాలాం సమర్పయామి |
గంధం –
యాఽనుభూతిః స్వయంజ్యోతిరాదిత్యేశానవిగ్రహా |
శంకరాఖ్యా చ తన్నౌమి సురేశ్వరగురుం పరం ||
శ్రీశంకరభగవత్పాదాయ నమః గంధ భస్మాదికం సమర్పయామి |
దండం –
ఆనందఘనమద్వందం నిర్వికారం నిరంజనం |
భజేఽహం భగవత్పాదం భజతామభయప్రదం ||
శ్రీశంకరభగవత్పాదాయ నమః దండం సమర్పయామి |
అక్షతాన్ –
తం వందే శంకరాచార్యం లోకత్రితయశంకరం |
సత్తర్కనఖరోద్గీర్ణ వావదూకమతంగజం |
శ్రీశంకరభగవత్పాదాయ నమః అక్షతాన్ సమర్పయామి |
పుష్పమాలా –
నమామి శంకరాచార్యగురుపాదసరోరుహం |
యస్య ప్రసాదాన్మూఢోఽపి సర్వజ్ఞో భవతి స్వయం ||
శ్రీశంకరభగవత్పాదాయ నమః పుష్పమాలాం సమర్పయామి |
ధూపం –
సంసారసాగరం ఘోరం అనంతక్లేశభాజనం |
త్వామేవ శరణం ప్రాప్య నిస్తరంతి మనీషిణః ||
శ్రీశంకరభగవత్పాదాయ నమః ధూపమాఘ్రాపయామి |
దీపం –
నమస్తస్మై భగవతే శంకరాచార్యరూపిణే |
యేన వేదాంతవిద్యేయం ఉద్ధృతా వేదసాగరాత్ ||
శ్రీశంకరభగవత్పాదాయ నమః దీపం దర్శయామి |
నైవేద్యం –
భగవత్పాదపాదాబ్జపాంసవః సంతు సంతతం |
అపారాసార సంసారసాగరోత్తార సేతవః ||
శ్రీశంకరభగవత్పాదాయ నమః మహానైవేద్యం నివేదయామి |
నివేదనానంతరం ఆచమనీయం సమర్పయామి |
హస్తప్రక్షాళన పాదప్రక్షాళనాదికం సమర్పయామి |
తాంబూలం సమర్పయామి |
నీరాజనం –
అజ్ఞానతిమిరాంధస్య జ్ఞానాంజనశలాకయా |
చక్షురున్మీలితం యేన తస్మై శ్రీగురవే నమః ||
శ్రీశంకరభగవత్పాదాయ నమః కర్పూరనీరాజనం దర్శయామి |
నీరాజనానంతరం ఆచమనీయం సమర్పయామి |
ప్రదక్షిణ –
ఆచార్యాన్ భగవత్పాదాన్ షణ్మతస్థాపకాన్ హితాన్ |
పరహంసాన్నుమోఽద్వైతస్థాపకాన్ జగతో గురూన్ ||
శ్రీశంకరభగవత్పాదాయ నమః ప్రదక్షిణ నమస్కారాన్ సమర్పయామి |
ప్రార్థనా –
గురుర్బ్రహ్మా గురుర్విష్ణుర్గురుర్దేవో మహేశ్వరః |
గురురేవ పరం బ్రహ్మ తస్మై శ్రీగురవే నమః ||
అఖండమండలాకారం వ్యాప్తం యేన చరాచరం |
తత్పదం దర్శితం యేన తస్మై శ్రీగురవే నమః ||
అనేకజన్మ సంప్రాప్త కర్మబంధ విదాహినే |
ఆత్మజ్ఞాన ప్రదానేన తస్మై శ్రీగురవే నమః ||
విశుద్ధ విజ్ఞానఘనం శుచిహార్దం తమోనుదం |
దయాసింధుం లోకబంధుం శంకరం నౌమి సద్గురుం ||
దేహబుద్ధ్యా తు దాసోఽస్మి జీవబుద్ధ్యా త్వదంశకః |
ఆత్మబుద్ధ్యా త్వమేవాహమితి మే నిశ్చితా మతిః ||
ఏకః శాఖీ శంకరాఖ్యశ్చతుర్ధా
స్థానం భేజే తాపశాంత్యై జనానాం |
శిష్యస్కంధైః శిష్య శాఖైర్మహద్భిః
జ్ఞానం పుష్పం యత్ర మోక్షః ప్రసూతిః ||
గామాక్రంయ పదేఽధికాంచి నిబిడం స్కంధైశ్చతుర్భిస్తథా
వ్యావృణ్వన్ భువనాంతరం పరిహరంస్తాపం సమోహజ్వరం |
యః శాఖీ ద్విజసంస్తుతః ఫలతి తత్ స్వాద్యం రసాఖ్యం ఫలం
తస్మై శంకరపాదాయ మహతే తన్మః త్రిసంధ్యం నమః ||
గురుపాదోదకప్రాశనం –
అవిద్యామూలనాశాయ జన్మకర్మనివృత్తయే |
జ్ఞానవైరాగ్యసిద్ధ్యర్థం గురుపాదోదకం శుభం ||
గురుపాదోదకం ప్రాశయామి |
సమర్పణం –
కాయేన వాచా మనసేంద్రియైర్వా
బుద్ధ్యాత్మనా వా ప్రకృతేః స్వభావాత్ |
కరోమి యద్యత్ సకలం పరస్మై
నారాయణాయేతి సమర్పయామి ||
అనయా పూజయా సర్వదేవాత్మకః భగవాన్ శ్రీజగద్గురుః ప్రీయతాం ||

శ్రీ ఆదిశంకరాచార్య అష్టోత్తరశతనామ స్తోత్రం

శ్రీ ఆదిశంకరాచార్య అష్టోత్తరశతనామ స్తోత్రం.

Telugu

Read Stotra

శ్రీ ఆదిశంకరాచార్య అష్టోత్తరశతనామ స్తోత్రం

ధ్యానం |
కైలాసాచల మధ్యస్థం కామితాభీష్టదాయకం |
బ్రహ్మాది-ప్రార్థనా-ప్రాప్త-దివ్యమానుష-విగ్రహం ||
భక్తానుగ్రహణైకాన్త-శాంత-స్వాన్త-సముజ్జ్వలం |
సంయజ్ఞం సంయమీంద్రాణాం సార్వభౌమం జగద్గురుం ||
కింకరీభూతభక్తైనః పంకజాతవిశోషణం |
ధ్యాయామి శంకరాచార్యం సర్వలోకైకశంకరం ||
స్తోత్రం |
శ్రీశంకరాచార్యవర్యో బ్రహ్మానందప్రదాయకః |
అజ్ఞానతిమిరాదిత్యః సుజ్ఞానాంబుధిచంద్రమా || 1 ||
వర్ణాశ్రమప్రతిష్ఠాతా శ్రీమాన్ ముక్తిప్రదాయకః |
శిష్యోపదేశనిరతో భక్తాభీష్టప్రదాయకః || 2 ||
సూక్ష్మతత్త్వరహస్యజ్ఞః కార్యాకార్యప్రబోధకః |
జ్ఞానముద్రాంచితకరః శిష్యహృత్తాపహారకః || 3 ||
పరివ్రాజాశ్రమోద్ధర్తా సర్వతంత్రస్వతంత్రధీః |
అద్వైతస్థాపనాచార్యః సాక్షాచ్చంకరరూపధృక్ || 4 ||
షణ్మతస్థాపనాచార్యస్త్రయీమార్గప్రకాశకః |
వేదవేదాంతతత్త్వజ్ఞో దుర్వాదిమతఖండనః || 5 ||
వైరాగ్యనిరతః శాంతః సంసారార్ణవతారకః |
ప్రసన్నవదనాంభోజః పరమార్థప్రకాశకః || 6 ||
పురాణస్మృతిసారజ్ఞో నిత్యతృప్తో మహచ్చుచిః |
నిత్యానందో నిరాతంకో నిస్సంగో నిర్మలాత్మకః || 7 ||
నిర్మమో నిరహంకారో విశ్వవంద్యపదాంబుజః |
సత్త్వప్రధానః సద్భావః సంఖ్యాతీతగుణోజ్జ్వలః || 8 ||
అనఘః సారహృదయః సుధీః సారస్వతప్రదః |
సత్యాత్మా పుణ్యశీలశ్చ సాంఖ్యయోగవిచక్షణః || 9 ||
తపోరాశిర్మహాతేజా గుణత్రయవిభాగవిత్ |
కలిఘ్నః కాలకర్మజ్ఞస్తమోగుణనివారకః || 10 ||
భగవాన్ భారతీజేతా శారదాహ్వానపండితః |
ధర్మాధర్మవిభాగజ్ఞో లక్ష్యభేదప్రదర్శకః || 11 ||
నాదబిందుకలాభిజ్ఞో యోగిహృత్పద్మభాస్కరః |
అతీంద్రియజ్ఞాననిధిర్నిత్యానిత్యవివేకవాన్ || 12 ||
చిదానందశ్చిన్మయాత్మా పరకాయప్రవేశకృత్ |
అమానుషచరిత్రాఢ్యః క్షేమదాయీ క్షమాకరః || 13 ||
భవ్యో భద్రప్రదో భూరిమహిమా విశ్వరంజకః |
స్వప్రకాశః సదాధారో విశ్వబంధుః శుభోదయః || 14 ||
విశాలకీర్తిర్వాగీశః సర్వలోకహితోత్సుకః |
కైలాసయాత్రాసంప్రాప్తచంద్రమౌళిప్రపూజకః || 15 ||
కాంచ్యాం శ్రీచక్రరాజాఖ్యయంత్రస్థాపనదీక్షితః |
శ్రీచక్రాత్మకతాటంకతోషితాంబామనోరథః || 16 ||
శ్రీబ్రహ్మసూత్రోపనిషద్భాష్యాదిగ్రంథకల్పకః |
చతుర్దిక్చతురాంనాయప్రతిష్ఠాతా మహామతిః || 17 ||
ద్విసప్తతిమతోచ్చేత్తా సర్వదిగ్విజయప్రభుః |
కాషాయవసనోపేతో భస్మోద్ధూళితవిగ్రహః || 18 ||
జ్ఞానాత్మకైకదండాఢ్యః కమండలులసత్కరః |
గురుభూమండలాచార్యో భగవత్పాదసంజ్ఞకః || 19 ||
వ్యాససందర్శనప్రీతో ఋష్యశృంగపురేశ్వరః |
సౌందర్యలహరీముఖ్యబహుస్తోత్రవిధాయకః || 20 ||
చతుష్షష్టికలాభిజ్ఞో బ్రహ్మరాక్షసమోక్షదః |
శ్రీమన్మండనమిశ్రాఖ్యస్వయంభూజయసన్నుతః || 21 ||
తోటకాచార్యసంపూజ్యో పద్మపాదార్చితాంఘ్రికః |
హస్తామలకయోగీంద్రబ్రహ్మజ్ఞానప్రదాయకః || 22 ||
సురేశ్వరాఖ్యసచ్చిష్యసన్న్యాసాశ్రమదాయకః |
నృసింహభక్తః సద్రత్నగర్భహేరంబపూజకః || 23 ||
వ్యాఖ్యాసింహాసనాధీశో జగత్పూజ్యో జగద్గురుః || 24 ||
ఇతి శ్రీ శంకరాచార్యాష్టోత్తరశతనామస్తోత్రం సంపూర్ణం ||

శ్రీ ఆదిశంకరాచార్య అష్టోత్తరశతనామావళిః

శ్రీ ఆదిశంకరాచార్య అష్టోత్తరశతనామావళిః.

Telugu

Read Stotra

శ్రీ ఆదిశంకరాచార్య అష్టోత్తరశతనామావళిః

ధ్యానం |
కైలాసాచల మధ్యస్థం కామితాభీష్టదాయకం |
బ్రహ్మాదిప్రార్థనాప్రాప్తదివ్యమానుషవిగ్రహం ||
భక్తానుగ్రహణైకాన్తశాంతస్వాన్తసముజ్జ్వలం |
సంయజ్ఞం సంయమీంద్రాణాం సార్వభౌమం జగద్గురుం ||
కింకరీభూతభక్తైనః పంకజాతవిశోషణం |
ధ్యాయామి శంకరాచార్యం సర్వలోకైకశంకరం ||
ఓం శ్రీశంకరాచార్యవర్యాయ నమః |
ఓం బ్రహ్మానందప్రదాయకాయ నమః |
ఓం అజ్ఞానతిమిరాదిత్యాయ నమః |
ఓం సుజ్ఞానాంబుధిచంద్రమసే నమః |
ఓం వర్ణాశ్రమప్రతిష్ఠాత్రే నమః |
ఓం శ్రీమతే నమః |
ఓం ముక్తిప్రదాయకాయ నమః |
ఓం శిష్యోపదేశనిరతాయ నమః |
ఓం భక్తాభీష్టప్రదాయకాయ నమః | 9 |
ఓం సూక్ష్మతత్త్వరహస్యజ్ఞాయ నమః |
ఓం కార్యాకార్యప్రబోధకాయ నమః |
ఓం జ్ఞానముద్రాంచితకరాయ నమః |
ఓం శిష్యహృత్తాపహారకాయ నమః |
ఓం పరివ్రాజాశ్రమోద్ధర్త్రే నమః |
ఓం సర్వతంత్రస్వతంత్రధియే నమః |
ఓం అద్వైతస్థాపనాచార్యాయ నమః |
ఓం సాక్షాచ్ఛంకరరూపధృతే నమః |
ఓం షణ్మతస్థాపనాచార్యాయ నమః | 18 |
ఓం త్రయీమార్గప్రకాశకాయ నమః |
ఓం వేదవేదాంతతత్త్వజ్ఞాయ నమః |
ఓం దుర్వాదిమతఖండనాయ నమః |
ఓం వైరాగ్యనిరతాయ నమః |
ఓం శాంతాయ నమః |
ఓం సంసారార్ణవతారకాయ నమః |
ఓం ప్రసన్నవదనాంభోజాయ నమః |
ఓం పరమార్థప్రకాశకాయ నమః |
ఓం పురాణస్మృతిసారజ్ఞాయ నమః | 27 |
ఓం నిత్యతృప్తాయ నమః |
ఓం మహతే నమః |
ఓం శుచయే నమః |
ఓం నిత్యానందాయ నమః |
ఓం నిరాతంకాయ నమః |
ఓం నిస్సంగాయ నమః |
ఓం నిర్మలాత్మకాయ నమః |
ఓం నిర్మమాయ నమః |
ఓం నిరహంకారాయ నమః | 36 |
ఓం విశ్వవంద్యపదాంబుజాయ నమః |
ఓం సత్త్వప్రధానాయ నమః |
ఓం సద్భావాయ నమః |
ఓం సంఖ్యాతీతగుణోజ్వలాయ నమః |
ఓం అనఘాయ నమః |
ఓం సారహృదయాయ నమః |
ఓం సుధియే నమః |
ఓం సారస్వతప్రదాయ నమః |
ఓం సత్యాత్మనే నమః | 45 |
ఓం పుణ్యశీలాయ నమః |
ఓం సాంఖ్యయోగవిచక్షణాయ నమః |
ఓం తపోరాశయే నమః |
ఓం మహాతేజసే నమః |
ఓం గుణత్రయవిభాగవిదే నమః |
ఓం కలిఘ్నాయ నమః |
ఓం కాలకర్మజ్ఞాయ నమః |
ఓం తమోగుణనివారకాయ నమః |
ఓం భగవతే నమః | 54 |
ఓం భారతీజేత్రే నమః |
ఓం శారదాహ్వానపండితాయ నమః |
ఓం ధర్మాధర్మవిభాగజ్ఞాయ నమః |
ఓం లక్ష్యభేదప్రదర్శకాయ నమః |
ఓం నాదబిందుకలాభిజ్ఞాయ నమః |
ఓం యోగిహృత్పద్మభాస్కరాయ నమః |
ఓం అతీంద్రియజ్ఞాననిధయే నమః |
ఓం నిత్యానిత్యవివేకవతే నమః |
ఓం చిదానందాయ నమః | 63 |
ఓం చిన్మయాత్మనే నమః |
ఓం పరకాయప్రవేశకృతే నమః |
ఓం అమానుషచరిత్రాఢ్యాయ నమః |
ఓం క్షేమదాయినే నమః |
ఓం క్షమాకరాయ నమః |
ఓం భవ్యాయ నమః |
ఓం భద్రప్రదాయ నమః |
ఓం భూరిమహింనే నమః |
ఓం విశ్వరంజకాయ నమః | 72 |
ఓం స్వప్రకాశాయ నమః |
ఓం సదాధారాయ నమః |
ఓం విశ్వబంధవే నమః |
ఓం శుభోదయాయ నమః |
ఓం విశాలకీర్తయే నమః |
ఓం వాగీశాయ నమః |
ఓం సర్వలోకహితోత్సుకాయ నమః |
ఓం కైలాసయాత్రాసంప్రాప్తచంద్రమౌళిప్రపూజకాయ నమః |
ఓం కాంచ్యాం శ్రీచక్రరాజాఖ్యయంత్రస్థాపనదీక్షితాయ నమః | 81 |
ఓం శ్రీచక్రాత్మకతాటంకతోషితాంబామనోరథాయ నమః |
ఓం శ్రీబ్రహ్మసూత్రోపనిషద్భాష్యాదిగ్రంథకల్పకాయ నమః |
ఓం చతుర్దిక్చతురాంనాయ ప్రతిష్ఠాత్రే నమః |
ఓం మహామతయే నమః |
ఓం ద్విసప్తతిమతోచ్చేత్రే నమః |
ఓం సర్వదిగ్విజయప్రభవే నమః |
ఓం కాషాయవసనోపేతాయ నమః |
ఓం భస్మోద్ధూళితవిగ్రహాయ నమః |
ఓం జ్ఞానాత్మకైకదండాఢ్యాయ నమః | 90 |
ఓం కమండలులసత్కరాయ నమః |
ఓం గురుభూమండలాచార్యాయ నమః |
ఓం భగవత్పాదసంజ్ఞకాయ నమః |
ఓం వ్యాససందర్శనప్రీతాయ నమః |
ఓం ఋష్యశృంగపురేశ్వరాయ నమః |
ఓం సౌందర్యలహరీముఖ్యబహుస్తోత్రవిధాయకాయ నమః |
ఓం చతుష్షష్టికలాభిజ్ఞాయ నమః |
ఓం బ్రహ్మరాక్షసమోక్షదాయ నమః |
ఓం శ్రీమన్మండనమిశ్రాఖ్యస్వయంభూజయసన్నుతాయ నమః | 99 |
ఓం తోటకాచార్యసంపూజ్యాయ నమః |
ఓం పద్మపాదార్చితాంఘ్రికాయ నమః |
ఓం హస్తామలకయోగీంద్ర బ్రహ్మజ్ఞానప్రదాయకాయ నమః |
ఓం సురేశ్వరాఖ్యసచ్చిష్యసన్న్యాసాశ్రమదాయకాయ నమః |
ఓం నృసింహభక్తాయ నమః |
ఓం సద్రత్నగర్భహేరంబపూజకాయ నమః |
ఓం వ్యాఖ్యాసింహాసనాధీశాయ నమః |
ఓం జగత్పూజ్యాయ నమః |

శ్రీమచ్ఛంకరాచార్య స్తుత్యష్టకం

శ్రీమచ్ఛంకరాచార్య స్తుత్యష్టకం.

Telugu

Read Stotra

శ్రీమచ్ఛంకరాచార్య స్తుత్యష్టకం

(శ్రీమచ్ఛంకరభగవచ్చరణ స్తుత్యష్టకం)
శ్రుతీనామా క్రీడః ప్రథితపరహంసో చితగతి-
ర్నిజే సత్యే ధాంని త్రిజగదతి వర్తిన్యభిరతః |
అసౌ బ్రహ్మేవాస్మిన్న ఖలు విశయే కిం తు కలయే [**విషయే**] బృహేరర్థం సాక్షాదనుపచరితం కేవలతయా || 1 ||
మితం పాదేనైవ త్రిభువనమిహైకేన మహసా
విశుద్ధం తత్సత్వం స్థితిజనిలయేష్వప్యనుగతం |
దశాకారాతీతంస్వమహిమనినిర్వేదరమణం
తతస్తం తద్విష్ణోః పరమపదమాఖ్యాతినిగమః || 2 ||
న భూతేష్వాసంగః క్వచన నగవాచావిహరణం
న భూత్యా సంసర్గో న పరిచితతా భోగిభిరపి |
తదప్యాంనాయాంత-స్త్రిపురదహనాత్కేవలదశా
తురీయం నిర్ద్వంద్వం శివమతితరాం వర్ణయతి తం || 3 ||
న ధర్మస్సౌవర్ణో న పురుషఫలేషు ప్రవణతా
న చైవాహోరాత్ర స్ఫురదరియుతః పార్థివరథః |
అసాహాయే నైవం సతీ వితతపుర్యష్టకజయే
కథం తన్నబ్రూయాన్నిగమ నికురంబః పరశివం || 4 ||
దుఃఖసార దురంత దుష్కృతఘనాం దుస్సంసృతి ప్రావృషం
దుర్వారామిహ దారుణాం పరిహరన్దూరా దుదారాశయః |
ఉచ్చండప్రతిపక్షపండితయశో నాళీకనాళాంకుర-
గ్రాసో హంసకులావతంసపదభాక్సన్మానసే క్రీడతి || 5 ||
క్షీరం బ్రహ్మ జగచ్చ నీరముభయం తద్యోగమభ్యాగతం
దుర్భేదం త్వితరేతరం చిరతరం సంయగ్విభక్తీకృతం |
యేనాశేషవిశేషదోహలహరీ మాసేదుషీం శేముషీం
సోయం శీలవతాం పునాతి పరమో హంసోద్విజాత్యగ్రణీః || 6 ||
నీరక్షీరనయేన తథ్యవితథే సంపిండితే పండితై-
ర్దుర్బోధే సకలైర్వివేచయతి యః శ్రీశంకరాఖ్యోమునిః |
హంసోయం పరమోస్తు యే పునరిహా శక్తాస్సమస్తాస్స్థితా
జృంభాన్నింబఫలాశనైకరసికాన్ కాకానమూన్మన్మహే || 7 ||
దృష్టిం యం ప్రగుణీకరోతి తమసా బాహ్యేన మందీకృతాం
నాళికప్రియతాం ప్రయాతి భజతే మిత్రత్వమవ్యాహతం |
విశ్వస్యోపకృతే విలుంపతి సుహృచ్చక్రస్య చార్తిం ఘనాం
హంసస్సోయమభివ్యనక్తి మహతాం జిజ్ఞాస్యమర్థంముహుః || 8 ||
ఇతి శ్రీవిద్యారణ్యమునిరచితం శ్రీమచ్ఛంకరాచార్యస్తుత్యష్టకం |

శ్రీ శంకరభగవత్పాదాచార్య స్తుతిః

శ్రీ శంకరభగవత్పాదాచార్య స్తుతిః.

Telugu

Read Stotra

శ్రీ శంకరభగవత్పాదాచార్య స్తుతిః

ముదా కరేణ పుస్తకం దధానమీశరూపిణం
తథాఽపరేణ ముద్రికాం నమత్తమోవినాశినీం |
కుసుంభవాససావృతం విభూతిభాసిఫాలకం
నతాఽఘనాశనే రతం నమామి శంకరం గురుం || 1
పరాశరాత్మజప్రియం పవిత్రితక్షమాతలం
పురాణసారవేదినం సనందనాదిసేవితం |
ప్రసన్నవక్త్రపంకజం ప్రపన్నలోకరక్షకం
ప్రకాశితాద్వితీయతత్త్వమాశ్రయామి దేశికం || 2
సుధాంశుశేఖరార్చకం సుధీంద్రసేవ్యపాదుకం
సుతాదిమోహనాశకం సుశాంతిదాంతిదాయకం |
సమస్తవేదపారగం సహస్రసూర్యభాసురం
సమాహితాఖిలేంద్రియం సదా భజామి శంకరం || 3
యమీంద్రచక్రవర్తినం యమాదియోగవేదినం
యథార్థతత్త్వబోధకం యమాంతకాత్మజార్చకం |
యమేవ ముక్తికాంక్షయా సమాశ్రయంతి సజ్జనాః
నమాంయహం సదా గురుం తమేవ శంకరాభిధం || 4
స్వబాల్య ఏవ నిర్భరం య ఆత్మనో దయాలుతాం
దరిద్రవిప్రమందిరే సువర్ణవృష్టిమానయన్ |
ప్రదర్శ్య విస్మయాంబుధౌ న్యమజ్జయత్ సమాంజనాన్
స ఏవ శంకరస్సదా జగద్గురుర్గతిర్మమ || 5
యదీయపుణ్యజన్మనా ప్రసిద్ధిమాప కాలటీ
యదీయశిష్యతాం వ్రజన్ స తోటకోఽపి పప్రథే |
య ఏవ సర్వదేహినాం విముక్తిమార్గదర్శకః
నరాకృతిం సదాశివం తమాశ్రయామి సద్గురుం || 6
సనాతనస్య వర్త్మనః సదైవ పాలనాయ యః
చతుర్దిశాసు సన్మఠాన్ చకార లోకవిశ్రుతాన్ |
విభాండకాత్మజాశ్రమాదిసుస్థలేషు పావనాన్
తమేవ లోకశంకరం నమామి శంకరం గురుం || 7
యదీయహస్తవారిజాతసుప్రతిష్ఠితా సతీ
ప్రసిద్ధశృంగభూధరే సదా ప్రశాంతిభాసురే |
స్వభక్తపాలనవ్రతా విరాజతే హి శారదా
స శంకరః కృపానిధిః కరోతు మామనేనసం || 8
ఇమం స్తవం జగద్గురోర్గుణానువర్ణనాత్మకం
సమాదరేణ యః పఠేదనన్యభక్తిసంయుతః |
సమాప్నుయాత్సమీహితం మనోరథం నరోఽచిరా-
-ద్దయానిధేస్స శంకరస్య సద్గురోః ప్రసాదతః || 9
ఇతి శ్రీ శంకరభగవత్పాదాచార్య స్తుతిః |

శ్రీ శంకరాచార్య స్తవః (శ్రీశంకరాచార్యవర్యం)

శ్రీ శంకరాచార్య స్తవః (శ్రీశంకరాచార్యవర్యం).

Telugu

Read Stotra

శ్రీ శంకరాచార్య స్తవః (శ్రీశంకరాచార్యవర్యం)

శ్రీశంకరాచార్యవర్యం
సర్వలోకైకవంద్యం భజే దేశికేంద్రం |
ధర్మప్రచారేఽతిదక్షం
యోగిగోవిందపాదాప్తసన్యాసదీక్షం |
దుర్వాదిగర్వాపనోదం
పద్మపాదాదిశిష్యాలిసంసేవ్యపాదం || 1 ||
శంకాద్రిదంభోలిలీలం
కింకరాశేషశిష్యాలి సంత్రాణశీలం |
బాలార్కనీకాశచేలం
బోధితాశేషవేదాంత గూఢార్థజాలం || 2 ||
రుద్రాక్షమాలావిభూషం
చంద్రమౌలీశ్వరారాధనావాప్తతోషం |
విద్రావితాశేషదోషం
భద్రపూగప్రదం భక్తలోకస్య నిత్యం || 3 ||
పాపాటవీచిత్రభానుం
జ్ఞానదీపేన హార్దం తమో వారయంతం |
ద్వైపాయనప్రీతిభాజం
సర్వతాపాపహామోఘబోధప్రదం తం || 4 ||
రాజాధిరాజాభిపూజ్యం
రంయశృంగాద్రివాసైకలోలం యతీడ్యం |
రాకేందుసంకాశవక్త్రం
రత్నగర్భేభవక్త్రాంఘ్రిపూజానురక్తం || 5 ||
శ్రీభారతీతీర్థగీతం
శంకరార్యస్తవం యః పఠేద్భక్తియుక్తః |
సోఽవాప్నుయాత్సర్వమిష్టం
శంకరాచార్యవర్యప్రసాదేన తూర్ణం || 6 ||
ఇతి శ్రీశ్రీ భారతీతీర్థ మహాస్వామి కృత శ్రీ శంకరాచార్య స్తవః |

Sign In

OTP Verification

Sacred Stotras & Deities

శ్రీ జగద్గురు స్తుతిః

శ్రీ చంద్రశేఖరేంద్ర సరస్వతీ స్తుతిః

శ్రీ శంకరభగవత్పాద షోడశోపచార పూజా

శ్రీ ఆదిశంకరాచార్య అష్టోత్తరశతనామ స్తోత్రం

శ్రీ ఆదిశంకరాచార్య అష్టోత్తరశతనామావళిః

శ్రీమచ్ఛంకరాచార్య స్తుత్యష్టకం

శ్రీ శంకరభగవత్పాదాచార్య స్తుతిః

శ్రీ శంకరాచార్య స్తవః (శ్రీశంకరాచార్యవర్యం)

MENU

LINKS

Astrologer Section

Vendor Section

GET ADVICE ON

Download Our Apps