KAMALA Stotras & Hymns - Read Sacred Verses

శ్రీ కమలా కవచం

శ్రీ కమలా కవచం.

Telugu

శ్రీ కమలా కవచం

ఈశ్వర ఉవాచ |
అథ వక్ష్యే మహేశాని కవచం సర్వకామదం |
యస్య విజ్ఞానమాత్రేణ భవేత్సాక్షాత్సదాశివః || 1 ||
నార్చనం తస్య దేవేశి మంత్రమాత్రం జపేన్నరః |
స భవేత్పార్వతీపుత్రః సర్వశాస్త్రేషు పారగః |
విద్యార్థినా సదా సేవ్యా విశేషే విష్ణువల్లభా || 2 ||
అస్యాశ్చతురక్షరివిష్ణువనితారూపాయాః కవచస్య శ్రీభగవాన్ శివ ఋషిరనుష్టుప్ఛందో, వాగ్భవీ దేవతా, వాగ్భవం బీజం, లజ్జా శక్తిః, రమా కీలకం, కామబీజాత్మకం కవచం, మమ సుపాండిత్య కవిత్వ సర్వసిద్ధిసమృద్ధయే జపే వినియోగః ||
అథ కవచం |
ఐంకారీ మస్తకే పాతు వాగ్భవీ సర్వసిద్ధిదా |
హ్రీం పాతు చక్షుషోర్మధ్యే చక్షుర్యుగ్మే చ శాంకరీ || 1 ||
జిహ్వాయాం ముఖవృత్తే చ కర్ణయోర్గండయోర్నసి |
ఓష్ఠాధరే దంతపంక్తౌ తాలుమూలే హనౌ పునః || 2 ||
పాతు మాం విష్ణువనితా లక్ష్మీః శ్రీవర్ణరూపిణీ |
కర్ణయుగ్మే భుజద్వంద్వే స్తనద్వంద్వే చ పార్వతీ || 3 ||
హృదయే మణిబంధే చ గ్రీవాయాం పార్శ్వయోః పునః |
సర్వాంగే పాతు కామేశీ మహాదేవీ సమున్నతిః || 4 ||
వ్యుష్టిః పాతు మహామాయా ఉత్కృష్టిః సర్వదాఽవతు |
సంధిం పాతు సదా దేవీ సర్వత్ర శంభువల్లభా || 5 ||
వాగ్భవీ సర్వదా పాతు పాతు మాం హరిగేహినీ |
రమా పాతు సదా దేవీ పాతు మాయా స్వరాట్ స్వయం || 6 ||
సర్వాంగే పాతు మాం లక్ష్మీర్విష్ణుమాయా సురేశ్వరీ |
విజయా పాతు భవనే జయా పాతు సదా మమ || 7 ||
శివదూతీ సదా పాతు సుందరీ పాతు సర్వదా |
భైరవీ పాతు సర్వత్ర భైరుండా సర్వదాఽవతు || 8 ||
త్వరితా పాతు మాం నిత్యముగ్రతారా సదాఽవతు |
పాతు మాం కాలికా నిత్యం కాలరాత్రిః సదాఽవతు || 9 ||
నవదుర్గా సదా పాతు కామాఖ్యా సర్వదాఽవతు |
యోగిన్యః సర్వదా పాంతు ముద్రాః పాంతు సదా మమ || 10 ||
మాతరః పాంతు దేవ్యశ్చ చక్రస్థా యోగినీగణాః |
సర్వత్ర సర్వకార్యేషు సర్వకర్మసు సర్వదా || 11 ||
పాతు మాం దేవదేవీ చ లక్ష్మీః సర్వసమృద్ధిదా |
ఇతి తే కథితం దివ్యం కవచం సర్వసిద్ధయే || 12 ||
యత్ర తత్ర న వక్తవ్యం యదీచ్ఛేదాత్మనో హితం |
శఠాయ భక్తిహీనాయ నిందకాయ మహేశ్వరి || 13 ||
న్యూనాంగే అతిరిక్తాంగే దర్శయేన్న కదాచన |
న స్తవం దర్శయేద్దివ్యం సందర్శ్య శివహా భవేత్ || 14 ||
కులీనాయ మహోచ్ఛ్రాయ దుర్గాభక్తిపరాయ చ |
వైష్ణవాయ విశుద్ధాయ దద్యాత్కవచముత్తమం || 15 ||
నిజశిష్యాయ శాంతాయ ధనినే జ్ఞానినే తథా |
దద్యాత్కవచమిత్యుక్తం సర్వతంత్రసమన్వితం || 16 ||
విలిఖ్య కవచం దివ్యం స్వయంభుకుసుమైః శుభైః |
స్వశుక్రైః పరశుక్రైశ్చ నానాగంధసమన్వితైః || 17 ||
గోరోచనాకుంకుమేన రక్తచందనకేన వా |
సుతిథౌ శుభయోగే వా శ్రవణాయాం రవేర్దినే || 18 ||
అశ్విన్యాం కృత్తికాయాం వా ఫల్గున్యాం వా మఘాసు చ |
పూర్వభాద్రపదాయోగే స్వాత్యాం మంగళవాసరే || 19 ||
విలిఖేత్ ప్రపఠేత్ స్తోత్రం శుభయోగే సురాలయే |
ఆయుష్మత్ప్రీతియోగే చ బ్రహ్మయోగే విశేషతః || 20 ||
ఇంద్రయోగే శుభయోగే శుక్రయోగే తథైవ చ |
కౌలవే బాలవే చైవ వణిజే చైవ సత్తమః || 21 ||
శూన్యాగారే శ్మశానే వా విజనే చ విశేషతః |
కుమారీం పూజయిత్వాదౌ యజేద్దేవీం సనాతనీం || 22 ||
మత్స్యమాంసైః శాకసూపైః పూజయేత్పరదేవతాం |
ఘృతాద్యైః సోపకరణైః పూపసూపైర్విశేషతః || 23 ||
బ్రాహ్మణాన్భోజాయిత్వాదౌ ప్రీణయేత్పరమేశ్వరీం |
బహునా కిమిహోక్తేన కృతే త్వేవం దినత్రయం || 24 ||
తదాధరేన్మహారక్షాం శంకరేణాభిభాషితం |
మారణద్వేషణాదీని లభతే నాత్ర సంశయః || 25 ||
స భవేత్పార్వతీపుత్రః సర్వశాస్త్రవిశారదః |
గురుర్దేవో హరః సాక్షాత్పత్నీ తస్య హరప్రియా || 26 ||
అభేదేన భజేద్యస్తు తస్య సిద్ధిరదూరతః |
సర్వదేవమయీం దేవీం సర్వమంత్రమయీం తథా || 27 ||
సుభక్త్యా పూజయేద్యస్తు స భవేత్కమలాప్రియః |
రక్తపుష్పైస్తథా గంధైర్వస్త్రాలంకరణైస్తథా || 28 ||
భక్త్యా యః పూజయేద్దేవీం లభతే పరమాం గతిం |
నారీ వా పురుషో వాపి యః పఠేత్కవచం శుభం |
మంత్రసిద్ధిః కార్యసిద్ధిర్లభతే నాత్ర సంశయః || 29 ||
పఠతి య ఇహ మర్త్యో నిత్యమార్ద్రాంతరాత్మా
జపఫలమనుమేయం లప్స్యతే యద్విధేయం |
స భవతి పదముచ్చైః సంపదాం పాదనంరః
క్షితిపముకుటలక్ష్మీర్లక్షణానాం చిరాయ || 30 ||
ఇతి శ్రీవిశ్వసారతంత్రోక్తం చతురక్షరీ విష్ణువనితా కవచం నామ శ్రీ కమలా కవచం |

శ్రీ కమలా స్తోత్రం

శ్రీ కమలా స్తోత్రం.

Telugu

Read Stotra

శ్రీ కమలా స్తోత్రం

ఓంకారరూపిణీ దేవి విశుద్ధసత్త్వరూపిణీ |
దేవానాం జననీ త్వం హి ప్రసన్నా భవ సుందరి || 1 ||
తన్మాత్రం చైవ భూతాని తవ వక్షఃస్థలం స్మృతం |
త్వమేవ వేదగంయా తు ప్రసన్నా భవ సుందరి || 2 ||
దేవ దానవ గంధర్వ యక్ష రాక్షస కిన్నరైః |
స్తూయసే త్వం సదా లక్ష్మి ప్రసన్నా భవ సుందరి || 3 ||
లోకాతీతా ద్వైతాతీతా సమస్తభూతవేష్టితా |
విద్వజ్జనకీర్తితా చ ప్రసన్నా భవ సుందరి || 4 ||
పరిపూర్ణా సదా లక్ష్మి త్రాత్రీ తు శరణార్థిషు |
విశ్వాద్యా విశ్వకర్త్రీ చ ప్రసన్నా భవ సుందరి || 5 ||
బ్రహ్మరూపా చ సావిత్రీ త్వద్దీప్త్యా భాసతే జగత్ |
విశ్వరూపా వరేణ్యా చ ప్రసన్నా భవ సుందరి || 6 ||
క్షిత్యప్తేజోమరుద్వోమపంచభూతస్వరూపిణీ |
బంధాదేః కారణం త్వం హి ప్రసన్నా భవ సుందరి || 7 ||
మహేశే త్వం హైమవతీ కమలా కేశవేఽపి చ |
బ్రహ్మణః ప్రేయసీ త్వం హి ప్రసన్నా భవ సుందరి || 8 ||
చండీ దుర్గా కాళికా చ కౌశికీ సిద్ధిరూపిణీ |
యోగినీ యోగగంయా చ ప్రసన్నా భవ సుందరి || 9 ||
బాల్యే చ బాలికా త్వం హి యౌవనే యువతీతి చ |
స్థవిరే వృద్ధరూపా చ ప్రసన్నా భవ సుందరి || 10 ||
గుణమయీ గుణాతీతా ఆద్యా విద్యా సనాతనీ |
మహత్తత్త్వాదిసంయుక్తా ప్రసన్నా భవ సుందరి || 11 ||
తపస్వినీ తపః సిద్ధిః స్వర్గసిద్ధిస్తదర్థిషు |
చిన్మయీ ప్రకృతిస్త్వం తు ప్రసన్నా భవ సుందరి || 12 ||
త్వమాదిర్జగతాం దేవి త్వమేవ స్థితికారణం |
త్వమంతే నిధనస్థానం స్వేచ్ఛాచారా త్వమేవ హి || 13 ||
చరాచరాణాం భూతానాం బహిరంతస్త్వమేవ హి |
వ్యాప్యవ్యాపకరూపేణ త్వం భాసి భక్తవత్సలే || 14 ||
త్వన్మాయయా హృతజ్ఞానా నష్టాత్మానో విచేతసః |
గతాగతం ప్రపద్యంతే పాపపుణ్యవశాత్సదా || 15 ||
తావత్సత్యం జగద్భాతి శుక్తికారజతం యథా |
యావన్న జ్ఞాయతే జ్ఞానం చేతసా నాన్వగామినీ || 16 ||
త్వజ్జ్ఞానాత్తు సదా యుక్తః పుత్రదారగృహాదిషు |
రమంతే విషయాన్ సర్వానంతే దుఃఖప్రదాన్ ధ్రువం || 17 ||
త్వదాజ్ఞయా తు దేవేశి గగనే సూర్యమండలం |
చంద్రశ్చ భ్రమతే నిత్యం ప్రసన్నా భవ సుందరి || 18 ||
బ్రహ్మేశవిష్ణుజననీ బ్రహ్మాఖ్యా బ్రహ్మసంశ్రయా |
వ్యక్తాఽవ్యక్తా చ దేవేశి ప్రసన్నా భవ సుందరి || 19 ||
అచలా సర్వగా త్వం హి మాయాతీతా మహేశ్వరి |
శివాత్మా శాశ్వతా నిత్యా ప్రసన్నా భవ సుందరి || 20 ||
సర్వకార్యనియంత్రీ చ సర్వభూతేశ్వరేశ్వరీ |
అనంతా నిష్కాలా త్వం హి ప్రసన్నా భవసుందరి || 21 ||
సర్వేశ్వరీ సర్వవంద్యా అచింత్యా పరమాత్మికా |
భుక్తిముక్తిప్రదా త్వం హి ప్రసన్నా భవ సుందరి || 22 ||
బ్రహ్మాణీ బ్రహ్మలోకే త్వం వైకుంఠే సర్వమంగళా |
ఇంద్రాణీ అమరావత్యామంబికా వరుణాలయే || 23 ||
యమాలయే కాలరూపా కుబేరభవనే శుభా |
మహానందాగ్నికోణే చ ప్రసన్నా భవ సుందరి || 24 ||
నైరృత్యాం రక్తదంతా త్వం వాయవ్యాం మృగవాహినీ |
పాతాళే వైష్ణవీరూపా ప్రసన్నా భవ సుందరి || 25 ||
సురసా త్వం మణిద్వీపే ఐశాన్యాం శూలధారిణీ |
భద్రకాళీ చ లంకాయాం ప్రసన్నా భవ సుందరి || 26 ||
రామేశ్వరీ సేతుబంధే సింహలే దేవమోహినీ |
విమలా త్వం చ శ్రీక్షేత్రే ప్రసన్నా భవ సుందరి || 27 ||
కాళికా త్వం కాళిఘట్టే కామాఖ్యా నీలపర్వతే |
విరజా ఔడ్రదేశే త్వం ప్రసన్నా భవ సుందరి || 28 ||
వారాణస్యామన్నపూర్ణా అయోధ్యాయాం మహేశ్వరీ |
గయాసురీ గయాధాంని ప్రసన్నా భవ సుందరి || 29 ||
భద్రకాళీ కురుక్షేత్రే కృష్ణ కాత్యాయనీ వ్రజే |
మహామాయా ద్వారకాయాం ప్రసన్నా భవ సుందరి || 30 ||
క్షుధా త్వం సర్వజీవానాం వేలా చ సాగరస్య హి |
మహేశ్వరీ మథురాయాం ప్రసన్నా భవ సుందరి || 31 ||
రామస్య జానకీ త్వం చ శివస్య మనమోహినీ |
దక్షస్య దుహితా చైవ ప్రసన్నా భవ సుందరి || 32 ||
విష్ణుభక్తిప్రదా త్వం చ కంసాసుర వినాశినీ |
రావణనాశినీ చైవ ప్రసన్నా భవ సుందరి || 33 ||
లక్ష్మీస్తోత్రమిదం పుణ్యం యః పఠేద్భక్తిసంయుతః |
సర్వజ్వరభయం నశ్యేత్ సర్వవ్యాధినివారణం || 34 ||
ఇదం స్తోత్రం మహాపుణ్యమాపదుద్ధారకారణం |
త్రిసంధ్యమేకసంధ్యం వా యః పఠేత్ సతతం నరః || 35 ||
ముచ్యతే సర్వపాపేభ్యస్తథా తు సర్వసంకటాత్ |
ముచ్యతే నాత్ర సందేహో భువి స్వర్గే రసాతలే || 36 ||
సమస్తం చ తథా చైకం యః పఠేద్భక్తితత్పరః |
స సర్వదుష్కరం తీర్త్వా లభతే పరమాం గతిం || 37 ||
సుఖదం మోక్షదం స్తోత్రం యః పఠేద్భక్తిసంయుతః |
స తు కోటితీర్థఫలం ప్రాప్నోతి నాత్ర సంశయః || 38 ||
ఏకా దేవీ తు కమలా యస్మింస్తుష్టా భవేత్సదా |
తస్యాఽసాధ్యం తు దేవేశి నాస్తికించిజ్జగత్త్రయే || 39 ||
పఠనాదపి స్తోత్రస్య కిం న సిద్ధ్యతి భూతలే |
తస్మాత్ స్తోత్రవరం ప్రోక్తం సత్యం సత్యం హి పార్వతి || 40 ||

శ్రీ కమలా స్తోత్రం 2

శ్రీ కమలా స్తోత్రం 2.

Telugu

Read Stotra

శ్రీ కమలా స్తోత్రం 2

శ్రీశంకర ఉవాచ |
అథాతః సంప్రవక్ష్యామి లక్ష్మీస్తోత్రమనుత్తమం |
పఠనాచ్ఛ్రవణాద్యస్య నరో మోక్షమవాప్నుయాత్ || 1 ||
గుహ్యాద్గుహ్యతరం పుణ్యం సర్వదేవనమస్కృతం |
సర్వమంత్రమయం సాక్షాచ్ఛృణు పర్వతనందిని || 2 ||
అనంతరూపిణీ లక్ష్మీరపారగుణసాగరీ |
అణిమాదిసిద్ధిదాత్రీ శిరసా ప్రణమాంయహం || 3 ||
ఆపదుద్ధారిణీ త్వం హి ఆద్యా శక్తిః శుభా పరా |
ఆద్యా ఆనందదాత్రీ చ శిరసా ప్రణమాంయహం || 4 ||
ఇందుముఖీ ఇష్టదాత్రీ ఇష్టమంత్రస్వరూపిణీ |
ఇచ్ఛామయీ జగన్మాతః శిరసా ప్రణమాంయహం || 5 ||
ఉమా ఉమాపతేస్త్వంతు హ్యుత్కంఠాకులనాశినీ |
ఉర్వీశ్వరీ జగన్మాతర్లక్ష్మి దేవి నమోఽస్తు తే || 6 ||
ఐరావతపతిపూజ్యా ఐశ్వర్యాణాం ప్రదాయినీ |
ఔదార్యగుణసంపన్నా లక్ష్మి దేవి నమోఽస్తు తే || 7 ||
కృష్ణవక్షఃస్థితా దేవి కలికల్మషనాశినీ |
కృష్ణచిత్తహరా కర్త్రీ శిరసా ప్రణమాంయహం || 8 ||
కందర్పదమనా దేవి కల్యాణీ కమలాననా |
కరుణార్ణవసంపూర్ణా శిరసా ప్రణమాంయహం || 9 ||
ఖంజనాక్షీ ఖగనాసా దేవి ఖేదవినాశినీ |
ఖంజరీటగతిశ్చైవ శిరసా ప్రణమాంయహం || 10 ||
గోవిందవల్లభా దేవీ గంధర్వకులపావనీ |
గోలోకవాసినీ మాతః శిరసా ప్రణమాంయహం || 11 ||
జ్ఞానదా గుణదా దేవి గుణాధ్యక్షా గుణాకరీ |
గంధపుష్పధరా మాతః శిరసా ప్రణమాంయహం || 12 ||
ఘనశ్యామప్రియా దేవి ఘోరసంసారతారిణీ |
ఘోరపాపహరా చైవ శిరసా ప్రణమాంయహం || 13 ||
చతుర్వేదమయీ చింత్యా చిత్తచైతన్యదాయినీ |
చతురాననపూజ్యా చ శిరసా ప్రణమాంయహం || 14 ||
చైతన్యరూపిణీ దేవి చంద్రకోటిసమప్రభా |
చంద్రార్కనఖరజ్యోతిర్లక్ష్మి దేవి నమాంయహం || 15 ||
చపలా చతురాధ్యక్షీ చరమే గతిదాయినీ |
చరాచరేశ్వరీ లక్ష్మి శిరసా ప్రణమాంయహం || 16 ||
ఛత్రచామరయుక్తా చ ఛలచాతుర్యనాశినీ |
ఛిద్రౌఘహారిణీ మాతః శిరసా ప్రణమాంయహం || 17 ||
జగన్మాతా జగత్కర్త్రీ జగదాధారరూపిణీ |
జయప్రదా జానకీ చ శిరసా ప్రణమాంయహం || 18 ||
జానకీశప్రియా త్వం హి జనకోత్సవదాయినీ |
జీవాత్మనాం చ త్వం మాతః శిరసా ప్రణమాంయహం || 19 ||
ఝింజీరవస్వనా దేవి ఝంఝావాతనివారిణీ |
ఝర్ఝరప్రియవాద్యా చ శిరసా ప్రణమాంయహం || 20 ||
టంకకదాయినీ త్వం హి త్వం చ ఠక్కారరూపిణీ | [అర్థప్రదాయినీం] ఢక్కాదివాద్యప్రణయా డంఫవాద్యవినోదినీ |
డమరుప్రణయా మాతః శిరసా ప్రణమాంయహం || 21 ||
తప్తకాంచనవర్ణాభా త్రైలోక్యలోకతారిణీ |
త్రిలోకజననీ లక్ష్మి శిరసా ప్రణమాంయహం || 22 ||
త్రైలోక్యసుందరీ త్వం హి తాపత్రయనివారిణీ |
త్రిగుణధారిణీ మాతః శిరసా ప్రణమాంయహం || 23 ||
త్రైలోక్యమంగళా త్వం హి తీర్థమూలపదద్వయా |
త్రికాలజ్ఞా త్రాణకర్త్రీ శిరసా ప్రణమాంయహం || 24 ||
దుర్గతినాశినీ త్వం హి దారిద్ర్యాపద్వినాశినీ |
ద్వారకావాసినీ మాతః శిరసా ప్రణమాంయహం || 25 ||
దేవతానాం దురారాధ్యా దుఃఖశోకవినాశినీ |
దివ్యాభరణభూషాంగీ శిరసా ప్రణమాంయహం || 26 ||
దామోదరప్రియా త్వం హి దివ్యయోగప్రదర్శినీ |
దయామయీ దయాధ్యక్షీ శిరసా ప్రణమాంయహం || 27 ||
ధ్యానాతీతా ధరాధ్యక్షా ధనధాన్యప్రదాయినీ |
ధర్మదా ధైర్యదా మాతః శిరసా ప్రణమాంయహం || 28 ||
నవగోరోచనా గౌరీ నందనందనగేహినీ |
నవయౌవనచార్వంగీ శిరసా ప్రణమాంయహం || 29 ||
నానారత్నాదిభూషాఢ్యా నానారత్నప్రదాయినీ |
నితంబినీ నలినాక్షీ లక్ష్మి దేవి నమోఽస్తు తే || 30 ||
నిధువనప్రేమానందా నిరాశ్రయగతిప్రదా |
నిర్వికారా నిత్యరూపా లక్ష్మి దేవి నమోఽస్తు తే || 31 ||
పూర్ణానందమయీ త్వం హి పూర్ణబ్రహ్మసనాతనీ |
పరాశక్తిః పరాభక్తిర్లక్ష్మి దేవి నమోఽస్తు తే || 32 ||
పూర్ణచంద్రముఖీ త్వం హి పరానందప్రదాయినీ |
పరమార్థప్రదా లక్ష్మి శిరసా ప్రణమాంయహం || 33 ||
పుండరీకాక్షిణీ త్వం హి పుండరీకాక్షగేహినీ |
పద్మరాగధరా త్వం హి శిరసా ప్రణమాంయహం || 34 ||
పద్మా పద్మాసనా త్వం హి పద్మమాలావిధారిణీ |
ప్రణవరూపిణీ మాతః శిరసా ప్రణమాంయహం || 35 ||
ఫుల్లేందువదనా త్వం హి ఫణివేణి విమోహినీ |
ఫణిశాయిప్రియా మాతః శిరసా ప్రణమాంయహం || 36 ||
విశ్వకర్త్రీ విశ్వభర్త్రీ విశ్వత్రాత్రీ విశ్వేశ్వరీ |
విశ్వారాధ్యా విశ్వబాహ్యా లక్ష్మి దేవి నమోఽస్తు తే || 37 ||
విష్ణుప్రియా విష్ణుశక్తిర్బీజమంత్రస్వరూపిణీ |
వరదా వాక్యసిద్ధా చ శిరసా ప్రణమాంయహం || 38 ||
వేణువాద్యప్రియా త్వం హి వంశీవాద్యవినోదినీ |
విద్యుద్గౌరీ మహాదేవి లక్ష్మి దేవి నమోఽస్తు తే || 39 ||
భుక్తిముక్తిప్రదా త్వం హి భక్తానుగ్రహకారిణీ |
భవార్ణవత్రాణకర్త్రీ లక్ష్మి దేవి నమోఽస్తు తే || 40 ||
భక్తప్రియా భాగీరథీ భక్తమంగళదాయినీ |
భయదాఽభయదాత్రీ చ లక్ష్మి దేవి నమోఽస్తు తే || 41 ||
మనోఽభీష్టప్రదా త్వం హి మహామోహవినాశినీ |
మోక్షదా మానదాత్రీ చ లక్ష్మి దేవి నమోఽస్తు తే || 42 ||
మహాధన్యా మహామాన్యా మాధవమనమోహినీ |
ముఖరాప్రాణహంత్రీ చ లక్ష్మి దేవి నమోఽస్తు తే || 43 ||
యౌవనపూర్ణసౌందర్యా యోగమాయా యోగేశ్వరీ |
యుగ్మశ్రీఫలవృక్షా చ లక్ష్మి దేవి నమోఽస్తు తే || 44 ||
యుగ్మాంగదవిభూషాఢ్యా యువతీనాం శిరోమణిః |
యశోదాసుతపత్నీ చ లక్ష్మి దేవి నమోఽస్తు తే || 45 ||
రూపయౌవనసంపన్నా రత్నాలంకారధారిణీ |
రాకేందుకోటిసౌందర్యా లక్ష్మి దేవి నమోఽస్తు తే || 46 ||
రమా రామా రామపత్నీ రాజరాజేశ్వరీ తథా |
రాజ్యదా రాజ్యహంత్రీ చ లక్ష్మి దేవి నమోఽస్తు తే || 47 ||
లీలాలావణ్యసంపన్నా లోకానుగ్రహకారిణీ |
లలనా ప్రీతిదాత్రీ చ లక్ష్మి దేవి నమోఽస్తు తే || 48 ||
విద్యాధరీ తథా విద్యా వసుదా త్వం హి వందితా |
వింధ్యాచలవాసినీ చ లక్ష్మి దేవి నమోఽస్తు తే || 49 ||
శుభ్రకాంచనగౌరాంగీ శంఖకంకణధారిణీ |
శుభదా శీలసంపన్నా లక్ష్మి దేవి నమోఽస్తు తే || 50 ||
షట్చక్రభేదినీ త్వం హి షడైశ్వర్యప్రదాయినీ |
షోడశీ వయసా త్వం హి లక్ష్మి దేవి నమోఽస్తు తే || 51 ||
సదానందమయీ త్వం హి సర్వసంపత్తిదాయినీ |
సంసారతారిణీ దేవి శిరసా ప్రణమాంయహం || 52 ||
సుకేశీ సుఖదా దేవి సుందరీ సుమనోరమా |
సురేశ్వరీ సిద్ధిదాత్రీ శిరసా ప్రణమాంయహం || 53 ||
సర్వసంకటహంత్రీ త్వం సత్యసత్త్వగుణాన్వితా |
సీతాపతిప్రియా దేవి శిరసా ప్రణమాంయహం || 54 ||
హేమాంగినీ హాస్యముఖీ హరిచిత్తవిమోహినీ |
హరిపాదప్రియా దేవి శిరసా ప్రణమాంయహం || 55 ||
క్షేమంకరీ క్షమాదాత్రీ క్షౌమవాసవిధారిణీ |
క్షీణమధ్యా చ క్షేత్రాంగీ లక్ష్మి దేవి నమోఽస్తు తే || 56 ||
శ్రీశంకర ఉవాచ |
అకారాది క్షకారాంతం లక్ష్మీదేవ్యాః స్తవం శుభం |
పఠితవ్యం ప్రయత్నేన త్రిసంధ్యం చ దినే దినే || 57 ||
పూజనీయా ప్రయత్నేన కమలా కరుణామయీ |
వాంఛాకల్పలతా సాక్షాద్భుక్తిముక్తిప్రదాయినీ || 58 ||
ఇదం స్తోత్రం పఠేద్యస్తు శృణుయాచ్ఛ్రావయేదపి |
ఇష్టసిద్ధిర్భవేత్తస్య సత్యం సత్యం హి పార్వతి || 59 ||
ఇదం స్తోత్రం మహాపుణ్యం యః పఠేద్భక్తిసంయుతః |
తం చ దృష్ట్వా భవేన్మూకో వాదీ సత్యం న సంశయః || 60 ||
శృణుయాచ్ఛ్రావయేద్యస్తు పఠేద్వా పాఠయేదపి |
రాజానో వశమాయాంతి తం దృష్ట్వా గిరినందిని || 61 ||
తం దృష్ట్వా దుష్టసంఘాశ్చ పలాయంతే దిశో దశ |
భూతప్రేతగ్రహా యక్షా రాక్షసాః పన్నగాదయః |
విద్రవంతి భయార్తా వై స్తోత్రస్యాపి చ కీర్తనాత్ || 62 ||
సురాశ్చ అసురాశ్చైవ గంధర్వాః కిన్నరాదయః |
ప్రణమంతి సదా భక్త్యా తం దృష్ట్వా పాఠకం ముదా || 63 ||
ధనార్థీ లభతే చార్థం పుత్రార్థీ చ సుతం లభేత్ |
రాజ్యార్థీ లభతే రాజ్యం స్తవరాజస్య కీర్తనాత్ || 64 ||
బ్రహ్మహత్యా సురాపానం స్తేయం గుర్వంగనాగమః |
మహాపాపోపపాపం చ తరంతి స్తవకీర్తనాత్ || 65 ||
గద్యపద్యమయీ వాణీ ముఖాత్తస్య ప్రజాయతే |
అష్టసిద్ధిమవాప్నోతి లక్ష్మీస్తోత్రస్య కీర్తనాత్ || 66 ||
వంధ్యా చాపి లభేత్ పుత్రం గర్భిణీ ప్రసవేత్సుతం |
పఠనాత్ స్మరణాత్ సత్యం వచ్మి తే గిరినందిని || 67 ||
భూర్జపత్రే సమాలిఖ్య రోచనాకుంకుమేన తు |
భక్త్యా సంపూజయేద్యస్తు గంధపుష్పాక్షతైస్తథా || 68 ||
ధారయేద్దక్షిణే బాహౌ పురుషః సిద్ధికాంక్షయా |
యోషిద్వామభుజే ధృత్వా సర్వసౌఖ్యమయీ భవేత్ || 69 ||
విషం నిర్విషతాం యాతి అగ్నిర్యాతి చ శీతతాం |
శత్రవో మిత్రతాం యాంతి స్తవస్యాస్య ప్రసాదతః || 70 ||
బహునా కిమిహోక్తేన స్తవస్యాస్య ప్రసాదతః |
వైకుంఠే చ వసేన్నిత్యం సత్యం వచ్మి సురేశ్వరి || 71 ||
ఇతి రుద్రయామలే శివగౌరీసంవాదే అకారాదిక్షకారాంతవర్ణగ్రథితం శ్రీ కమలా స్తవః |

శ్రీ కమలాంబికా స్తోత్రం

శ్రీ కమలాంబికా స్తోత్రం.

Telugu

Read Stotra

శ్రీ కమలాంబికా స్తోత్రం

బంధూకద్యుతిమిందుబింబవదనాం బృందారకైర్వందితాం
మందారాది సమర్చితాం మధుమతీం మందస్మితాం సుందరీం |
బంధచ్ఛేదనకారిణీం త్రినయనాం భోగాపవర్గప్రదాం
వందేఽహం కమలాంబికామనుదినం వాంఛానుకూలాం శివాం || 1 ||
శ్రీకామేశ్వరపీఠమధ్యనిలయాం శ్రీరాజరాజేశ్వరీం
శ్రీవాణీపరిసేవితాంఘ్రియుగళాం శ్రీమత్కృపాసాగరాం |
శోకాపద్భయమోచినీం సుకవితానందైకసందాయినీం
వందేఽహం కమలాంబికామనుదినం వాంఛానుకూలాం శివాం || 2 ||
మాయా మోహవినాశినీం మునిగణైరారాధితాం తన్మయీం
శ్రేయఃసంచయదాయినీం గుణమయీం వాయ్వాది భూతాం సతాం |
ప్రాతఃకాలసమానశోభమకుటాం సామాది వేదైస్తుతాం
వందేఽహం కమలాంబికామనుదినం వాంఛానుకూలాం శివాం || 3 ||
బాలాం భక్తజనౌఘచిత్తనిలయాం బాలేందుచూడాంబరాం
సాలోక్యాది చతుర్విధార్థఫలదాం నీలోత్పలాక్షీమజాం |
కాలారిప్రియనాయికాం కలిమలప్రధ్వంసినీం కౌలినీం
వందేఽహం కమలాంబికామనుదినం వాంఛానుకూలాం శివాం || 4 ||
ఆనందామృతసింధుమధ్యనిలయామజ్ఞానమూలాపహాం
జ్ఞానానందవివర్ధినీం విజయదాం మీనేక్షణాం మోహినీం |
జ్ఞానానందపరాం గణేశజననీం గంధర్వసంపూజితాం
వందేఽహం కమలాంబికామనుదినం వాంఛానుకూలాం శివాం || 5 ||
షట్చక్రోపరి నాదబిందునిలయాం సర్వేశ్వరీం సర్వగాం
షట్శాస్త్రాగమవేదవేదితగుణాం షట్కోణసంవాసినీం |
షట్కాలేన సమర్చితాత్మవిభవాం షడ్వర్గసంఛేదినీం
వందేఽహం కమలాంబికామనుదినం వాంఛానుకూలాం శివాం || 6 ||
యోగానందకరీం జగత్సుఖకరీం యోగీంద్రచిత్తాలయాం
ఏకామీశసుఖప్రదాం ద్విజనుతామేకాంతసంచారిణీం |
వాగీశాం విధివిష్ణుశంభువరదాం విశ్వేశ్వరీం వైణికీం
వందేఽహం కమలాంబికామనుదినం వాంఛానుకూలాం శివాం || 7 ||
బోధానందమయీం బుధైరభినుతాం మోదప్రదామంబికాం
శ్రీమద్వేదపురీశదాసవినుతాం హ్రీంకారసంధాలయాం |
భేదాభేదవివర్జితాం బహువిధాం వేదాంతచూడామణిం
వందేఽహం కమలాంబికామనుదినం వాంఛానుకూలాం శివాం || 8 ||
ఇత్థం శ్రీకమలాంబికాప్రియకరం స్తోత్రం పఠేద్యః సదా
పుత్రశ్రీప్రదమష్టసిద్ధిఫలదం చింతావినాశాస్పదం |
ఏతి బ్రహ్మపదం నిజం నిరుపమం నిష్కల్మషం నిష్కలం
యోగీంద్రైరపి దుర్లభం పునరయం చింతావినాశం పరం || 9 ||

శ్రీ కమలా అష్టోత్తరశతనామ స్తోత్రం

శ్రీ కమలా అష్టోత్తరశతనామ స్తోత్రం.

Telugu

Read Stotra

శ్రీ కమలా అష్టోత్తరశతనామ స్తోత్రం

శ్రీ శివ ఉవాచ |
శతమష్టోత్తరం నాంనాం కమలాయా వరాననే |
ప్రవక్ష్యాంయతిగుహ్యం హి న కదాపి ప్రకాశయేత్ || 1 ||
ఓం మహామాయా మహాలక్ష్మీర్మహావాణీ మహేశ్వరీ |
మహాదేవీ మహారాత్రిర్మహిషాసురమర్దినీ || 2 ||
కాలరాత్రిః కుహూః పూర్ణానందాద్యా భద్రికా నిశా |
జయా రిక్తా మహాశక్తిర్దేవమాతా కృశోదరీ || 3 ||
శచీంద్రాణీ శక్రనుతా శంకరప్రియవల్లభా |
మహావరాహజననీ మదనోన్మథినీ మహీ || 4 ||
వైకుంఠనాథరమణీ విష్ణువక్షఃస్థలస్థితా |
విశ్వేశ్వరీ విశ్వమాతా వరదాఽభయదా శివా || 5 ||
శూలినీ చక్రిణీ మా చ పాశినీ శంఖధారిణీ |
గదినీ ముండమాలా చ కమలా కరుణాలయా || 6 ||
పద్మాక్షధారిణీ హ్యంబా మహావిష్ణుప్రియంకరీ |
గోలోకనాథరమణీ గోలోకేశ్వరపూజితా || 7 ||
గయా గంగా చ యమునా గోమతీ గరుడాసనా |
గండకీ సరయూస్తాపీ రేవా చైవ పయస్వినీ || 8 ||
నర్మదా చైవ కావేరీ కేదారస్థలవాసినీ |
కిశోరీ కేశవనుతా మహేంద్రపరివందితా || 9 ||
బ్రహ్మాదిదేవనిర్మాణకారిణీ వేదపూజితా |
కోటిబ్రహ్మాండమధ్యస్థా కోటిబ్రహ్మాండకారిణీ || 10 ||
శ్రుతిరూపా శ్రుతికరీ శ్రుతిస్మృతిపరాయణా |
ఇందిరా సింధుతనయా మాతంగీ లోకమాతృకా || 11 ||
త్రిలోకజననీ తంత్రా తంత్రమంత్రస్వరూపిణీ |
తరుణీ చ తమోహంత్రీ మంగళా మంగళాయనా || 12 ||
మధుకైటభమథనీ శుంభాసురవినాశినీ |
నిశుంభాదిహరా మాతా హరిశంకరపూజితా || 13 ||
సర్వదేవమయీ సర్వా శరణాగతపాలినీ |
శరణ్యా శంభువనితా సింధుతీరనివాసినీ || 14 ||
గంధర్వగానరసికా గీతా గోవిందవల్లభా |
త్రైలోక్యపాలినీ తత్త్వరూపా తారుణ్యపూరితా || 15 ||
చంద్రావలీ చంద్రముఖీ చంద్రికా చంద్రపూజితా |
చంద్రా శశాంకభగినీ గీతవాద్యపరాయణా || 16 ||
సృష్టిరూపా సృష్టికరీ సృష్టిసంహారకారిణీ |
ఇతి తే కథితం దేవి రమానామశతాష్టకం || 17 ||
త్రిసంధ్యం ప్రయతో భూత్వా పఠేదేతత్సమాహితః |
యం యం కామయతే కామం తం తం ప్రాప్నోత్యసంశయం || 18 ||
ఇమం స్తవం యః పఠతీహ మర్త్యో
వైకుంఠపత్న్యాః పరమాదరేణ |
ధనాధిపాద్యైః పరివందితః స్యాత్
ప్రయాస్యతి శ్రీపదమంతకాలే || 19 ||
ఇతి శ్రీ కమలాష్టోత్తరశతనామస్తోత్రం |

శ్రీ కమలాష్టోత్తరశతనామావళిః

శ్రీ కమలాష్టోత్తరశతనామావళిః.

Telugu

Read Stotra

శ్రీ కమలాష్టోత్తరశతనామావళిః

శ్రీ కమలా సహస్రనామ స్తోత్రం

శ్రీ కమలా సహస్రనామ స్తోత్రం.

Telugu

Read Stotra

శ్రీ కమలా సహస్రనామ స్తోత్రం

తామాహ్వయామి సుభగాం లక్ష్మీం త్రైలోక్యపూజితాం |
ఏహ్యేహి దేవి పద్మాక్షి పద్మాకరకృతాలయే || 1 ||
ఆగచ్ఛాగచ్ఛ వరదే పశ్య మాం స్వేన చక్షుషా |
ఆయాహ్యాయాహి ధర్మార్థకామమోక్షమయే శుభే || 2 ||
ఏవం విధైః స్తుతిపదైః సత్యైః సత్యార్థసంస్తుతా |
కనీయసీ మహాభాగా చంద్రేణ పరమాత్మనా || 3 ||
నిశాకరశ్చ సా దేవీ భ్రాతరౌ ద్వౌ పయోనిధేః |
ఉత్పన్నమాత్రౌ తావాస్తాం శివకేశవసంశ్రితౌ || 4 ||
సనత్కుమారస్తమృషిం సమాభాష్య పురాతనం |
ప్రోక్తవానితిహాసం తు లక్ష్ంయాః స్తోత్రమనుత్తమం || 5 ||
అథేదృశాన్మహాఘోరాద్దారిద్ర్యాన్నరకాత్కథం |
ముక్తిర్భవతి లోకేఽస్మిన్ దారిద్ర్యం యాతి భస్మతాం || 6 ||
సనత్కుమార ఉవాచ |
పూర్వం కృతయుగే బ్రహ్మా భగవాన్ సర్వలోకకృత్ |
సృష్టిం నానావిధాం కృత్వా పశ్చాచ్చింతాముపేయివాన్ || 7 ||
కిమాహారాః ప్రజాస్త్వేతాః సంభవిష్యంతి భూతలే |
తథైవ చాసాం దారిద్ర్యాత్కథముత్తరణం భవేత్ || 8 ||
దారిద్ర్యాన్మరణం శ్రేయస్త్వితి సంచింత్య చేతసి |
క్షీరోదస్యోత్తరే కూలే జగామ కమలోద్భవః || 9 ||
తత్ర తీవ్రం తపస్తప్త్వా కదాచిత్పరమేశ్వరం |
దదర్శ పుండరీకాక్షం వాసుదేవం జగద్గురుం || 10 ||
సర్వజ్ఞం సర్వశక్తీనాం సర్వావాసం సనాతనం |
సర్వేశ్వరం వాసుదేవం విష్ణుం లక్ష్మీపతిం ప్రభుం || 11 ||
సోమకోటిప్రతీకాశం క్షీరోదవిమలే జలే |
అనంతభోగశయనం విశ్రాంతం శ్రీనికేతనం || 12 ||
కోటిసూర్యప్రతీకాశం మహాయోగేశ్వరేశ్వరం |
యోగనిద్రారతం శ్రీశం సర్వావాసం సురేశ్వరం || 13 ||
జగదుత్పత్తిసంహారస్థితికారణకారణం |
లక్ష్ంయాదిశక్తికరణం జాతమండలమండితం || 14 ||
ఆయుధైర్దేహవద్భిశ్చ చక్రాద్యైః పరివారితం |
దుర్నిరీక్ష్యం సురైః సిద్ధైర్మహాయోనిశతైరపి || 15 ||
ఆధారం సర్వశక్తీనాం పరం తేజః సుదుస్సహం |
ప్రబుద్ధం దేవమీశానం దృష్ట్వా కమలసంభవః || 16 ||
శిరస్యంజలిమాధాయ స్తోత్రం పూర్వమువాచ హ |
మనోవాంఛితసిద్ధిం త్వం పూరయస్వ మహేశ్వర || 17 ||
జితం తే పుండరీక్ష నమస్తే విశ్వభావన |
నమస్తేఽస్తు హృషీకేశ మహాపురుషపూర్వజ || 18 ||
సర్వేశ్వర జయానంద సర్వావాస పరాత్పర |
ప్రసీద మమ భక్తస్య ఛింధి సందేహజం తమః || 19 ||
ఏవం స్తుతః స భగవాన్ బ్రహ్మణాఽవ్యక్తజన్మనా |
ప్రసాదాభిముఖః ప్రాహ హరిర్విశ్రాంతలోచనః || 20 ||
శ్రీభగవానువాచ |
హిరణ్యగర్భ తుష్టోఽస్మి బ్రూహి యత్తేఽభివాంఛితం |
తద్వక్ష్యామి న సందేహో భక్తోఽసి మమ సువ్రత || 21 ||
కేశవాద్వచనం శ్రుత్వా కరుణావిష్టచేతనః |
ప్రత్యువాచ మహాబుద్ధిర్భగవంతం జనార్దనం || 22 ||
చతుర్విధం భవస్యాస్య భూతసర్గస్య కేశవ |
పరిత్రాణాయ మే బ్రూహి రహస్యం పరమాద్భుతం || 23 ||
దారిద్ర్యశమనం ధన్యం మనోజ్ఞం పావనం పరం |
సర్వేశ్వర మహాబుద్ధే స్వరూపం భైరవం మహత్ || 24 ||
శ్రియః సర్వాతిశాయిన్యాస్తథా జ్ఞానం చ శాశ్వతం |
నామాని చైవ ముఖ్యాని యాని గౌణాని చాచ్యుత || 25 ||
త్వద్వక్త్రకమలోత్థాని శ్రోతుమిచ్ఛామి తత్త్వతః |
ఇతి తస్య వచః శ్రుత్వా ప్రతివాక్యమువాచ సః || 26 ||
శ్రీభగవానువాచ |
మహావిభూతిసంయుక్తా షాడ్గుణ్యవపుషః ప్రభో |
భగవద్వాసుదేవస్య నిత్యం చైషాఽనపాయినీ || 27 ||
ఏకైవ వర్తతేఽభిన్నా జ్యోత్స్నేవ హిమదీధితేః |
సర్వశక్త్యాత్మికా చైవ విశ్వం వ్యాప్య వ్యవస్థితా || 28 ||
సర్వైశ్వర్యగుణోపేతా నిత్యశుద్ధస్వరూపిణీ |
ప్రాణశక్తిః పరా హ్యేషా సర్వేషాం ప్రాణినాం భువి || 29 ||
శక్తీనాం చైవ సర్వాసాం యోనిభూతా పరా కలా |
అహం తస్యాః పరం నాంనాం సహస్రమిదముత్తమం || 30 ||
శృణుష్వావహితో భూత్వా పరమైశ్వర్యభూతిదం |
దేవ్యాఖ్యాస్మృతిమాత్రేణ దారిద్ర్యం యాతి భస్మతాం || 31 ||
ఓం శ్రీః పద్మా ప్రకృతిః సత్త్వా శాంతా చిచ్ఛక్తిరవ్యయా |
కేవలా నిష్కలా శుద్ధా వ్యాపినీ వ్యోమవిగ్రహా || 32 ||
వ్యోమపద్మకృతాధారా పరా వ్యోమా మతోద్భవా |
నిర్వ్యోమా వ్యోమమధ్యస్థా పంచవ్యోమపదాశ్రితా || 33 ||
అచ్యుతా వ్యోమనిలయా పరమానందరూపిణీ |
నిత్యశుద్ధా నిత్యతృప్తా నిర్వికారా నిరీక్షణా || 34 ||
జ్ఞానశక్తిః కర్తృశక్తిర్భోక్తృశక్తిః శిఖావహా |
స్నేహాభాసా నిరానందా విభూతిర్విమలా చలా || 35 ||
అనంతా వైష్ణవీ వ్యక్తా విశ్వానందా వికాశినీ |
శక్తిర్విభిన్నసర్వార్తిః సముద్రపరితోషిణీ || 36 ||
మూర్తిః సనాతనీ హార్దీ నిస్తరంగా నిరామయా |
జ్ఞానజ్ఞేయా జ్ఞానగంయా జ్ఞానజ్ఞేయవికాసినీ || 37 ||
స్వచ్ఛందశక్తిర్గహనా నిష్కంపార్చిః సునిర్మలా |
స్వరూపా సర్వగాఽపారా బృంహిణీ సుగుణోర్జితా || 38 ||
అకళంకా నిరాధారా నిస్సంకల్పా నిరాశ్రయా |
అసంకీర్ణా సుశాంతా చ శాశ్వతీ భాసురీ స్థిరా || 39 ||
అనౌపంయా నిర్వికల్పా నిర్యంత్రా యంత్రవాహినీ |
అభేద్యా భేదినీ భిన్నా భారతీ వైఖరీ ఖగా || 40 ||
అగ్రాహ్యా గ్రాహికా గూఢా గంభీరా విశ్వగోపినీ |
అనిర్దేశ్యాఽప్రతిహతా నిర్బీజా పావనీ పరా || 41 ||
అప్రతర్క్యాఽపరిమితా భవభ్రాంతివినాశినీ |
ఏకా ద్విరూపా త్రివిధా అసంఖ్యాతా సురేశ్వరీ || 42 ||
సుప్రతిష్ఠా మహాధాత్రీ స్థితిర్వృద్ధిర్ధ్రువా గతిః |
ఈశ్వరీ మహిమా ఋద్ధిః ప్రమోదా ఉజ్జ్వలోద్యమా || 43 ||
అక్షయా వర్ధమానా చ సుప్రకాశా విహంగమా |
నీరజా జననీ నిత్యా జయా రోచిష్మతీ శుభా || 44 ||
తపోనుదా చ జ్వాలా చ సుదీప్తిశ్చాంశుమాలినీ |
అప్రమేయా త్రిధా సూక్ష్మా పరా నిర్వాణదాయినీ || 45 ||
అవదాతా సుశుద్ధా చ అమోఘాఖ్యా పరంపరా |
సంధానకీ శుద్ధవిద్యా సర్వభూతమహేశ్వరీ || 46 ||
లక్ష్మీస్తుష్టిర్మహాధీరా శాంతిరాపూరణేనవా |
అనుగ్రహాశక్తిరాద్యా జగజ్జ్యేష్ఠా జగద్విధిః || 47 ||
సత్యా ప్రహ్వా క్రియాయోగ్యా హ్యపర్ణా హ్లాదినీ శివా |
సంపూర్ణాహ్లాదినీ శుద్ధా జ్యోతిష్మత్యమతావహా || 48 ||
రజోవత్యర్కప్రతిభాఽఽకర్షిణీ కర్షిణీ రసా |
పరా వసుమతీ దేవీ కాంతిః శాంతిర్మతిః కలా || 49 ||
కలా కలంకరహితా విశాలోద్దీపనీ రతిః |
సంబోధినీ హారిణీ చ ప్రభావా భవభూతిదా || 50 ||
అమృతస్యందినీ జీవా జననీ ఖండికా స్థిరా |
ధూమా కలావతీ పూర్ణా భాసురా సుమతీ రసా || 51 ||
శుద్ధా ధ్వనిః సృతిః సృష్టిర్వికృతిః కృష్టిరేవ చ |
ప్రాపణీ ప్రాణదా ప్రహ్వా విశ్వా పాండురవాసినీ || 52 ||
అవనిర్వజ్రనలికా చిత్రా బ్రహ్మాండవాసినీ |
అనంతరూపాఽనంతాత్మాఽనంతస్థాఽనంతసంభవా || 53 ||
మహాశక్తిః ప్రాణశక్తిః ప్రాణదాత్రీ రతింభరా |
మహాసమూహా నిఖిలా ఇచ్ఛాధారా సుఖావహా || 54 ||
ప్రత్యక్షలక్ష్మీర్నిష్కంపా ప్రరోహా బుద్ధిగోచరా |
నానాదేహా మహావర్తా బహుదేహవికాసినీ || 55 ||
సహస్రాణీ ప్రధానా చ న్యాయవస్తుప్రకాశికా |
సర్వాభిలాషపూర్ణేచ్ఛా సర్వా సర్వార్థభాషిణీ || 56 ||
నానాస్వరూపచిద్ధాత్రీ శబ్దపూర్వా పురాతనా |
వ్యక్తాఽవ్యక్తా జీవకేశా సర్వేచ్ఛాపరిపూరితా || 57 ||
సంకల్పసిద్ధా సాంఖ్యేయా తత్త్వగర్భా ధరావహా |
భూతరూపా చిత్స్వరూపా త్రిగుణా గుణగర్వితా || 58 ||
ప్రజాపతీశ్వరీ రౌద్రీ సర్వాధారా సుఖావహా |
కల్యాణవాహికా కల్యా కలికల్మషనాశినీ || 59 ||
నీరూపోద్భిన్నసంతానా సుయంత్రా త్రిగుణాలయా |
మహామాయా యోగమాయా మహాయోగేశ్వరీ ప్రియా || 60 ||
మహాస్త్రీ విమలా కీర్తిర్జయా లక్ష్మీర్నిరంజనా |
ప్రకృతిర్భగవన్మాయాశక్తిర్నిద్రా యశస్కరీ || 61 ||
చింతా బుద్ధిర్యశః ప్రజ్ఞా శాంతిరాప్రీతివర్ధినీ |
ప్రద్యుంనమాతా సాధ్వీ చ సుఖసౌభాగ్యసిద్ధిదా || 62 ||
కాష్ఠా నిష్ఠా ప్రతిష్ఠా చ జ్యేష్ఠా శ్రేష్ఠా జయావహా |
సర్వాతిశాయినీ ప్రీతిర్విశ్వశక్తిర్మహాబలా || 63 ||
వరిష్ఠా విజయా వీరా జయంతీ విజయప్రదా |
హృద్గృహా గోపినీ గుహ్యా గణగంధర్వసేవితా || 64 ||
యోగీశ్వరీ యోగమాయా యోగినీ యోగసిద్ధిదా |
మహాయోగేశ్వరవృతా యోగా యోగేశ్వరప్రియా || 65 ||
బ్రహ్మేంద్రరుద్రనమితా సురాసురవరప్రదా |
త్రివర్త్మగా త్రిలోకస్థా త్రివిక్రమపదోద్భవా || 66 ||
సుతారా తారిణీ తారా దుర్గా సంతారిణీ పరా |
సుతారిణీ తారయంతీ భూరితారేశ్వరప్రభా || 67 ||
గుహ్యవిద్యా యజ్ఞవిద్యా మహావిద్యా సుశోభితా |
అధ్యాత్మవిద్యా విఘ్నేశీ పద్మస్థా పరమేష్ఠినీ || 68 ||
ఆన్వీక్షికీ త్రయీ వార్తా దండనీతిర్నయాత్మికా |
గౌరీ వాగీశ్వరీ గోప్త్రీ గాయత్రీ కమలోద్భవా || 69 ||
విశ్వంభరా విశ్వరూపా విశ్వమాతా వసుప్రదా |
సిద్ధిః స్వాహా స్వధా స్వస్తిః సుధా సర్వార్థసాధినీ || 70 ||
ఇచ్ఛా సృష్టిర్ద్యుతిర్భూతిః కీర్తిః శ్రద్ధా దయా మతిః |
శ్రుతిర్మేధా ధృతిర్హ్రీః శ్రీర్విద్యా విబుధవందితా || 71 ||
అనసూయా ఘృణా నీతిర్నిర్వృతిః కామధుక్కరా |
ప్రతిజ్ఞా సంతతిర్భూతిర్ద్యౌః ప్రజ్ఞా విశ్వమానినీ || 72 ||
స్మృతిర్వాగ్విశ్వజననీ పశ్యంతీ మధ్యమా సమా |
సంధ్యా మేధా ప్రభా భీమా సర్వాకారా సరస్వతీ || 73 ||
కాంక్షా మాయా మహామాయా మోహినీ మాధవప్రియా |
సౌంయాభోగా మహాభోగా భోగినీ భోగదాయినీ || 74 ||
సుధౌతకనకప్రఖ్యా సువర్ణకమలాసనా |
హిరణ్యగర్భా సుశ్రోణీ హారిణీ రమణీ రమా || 75 ||
చంద్రా హిరణ్మయీ జ్యోత్స్నా రంయా శోభా శుభావహా |
త్రైలోక్యమండనా నారీనరేశ్వరవరార్చితా || 76 ||
త్రైలోక్యసుందరీ రామా మహావిభవవాహినీ |
పద్మస్థా పద్మనిలయా పద్మమాలావిభూషితా || 77 ||
పద్మయుగ్మధరా కాంతా దివ్యాభరణభూషితా |
విచిత్రరత్నముకుటా విచిత్రాంబరభూషణా || 78 ||
విచిత్రమాల్యగంధాఢ్యా విచిత్రాయుధవాహనా |
మహానారాయణీ దేవీ వైష్ణవీ వీరవందితా || 79 ||
కాలసంకర్షిణీ ఘోరా తత్త్వసంకర్షిణీ కలా |
జగత్సంపూరణీ విశ్వా మహావిభవభూషణా || 80 ||
వారుణీ వరదా వ్యాఖ్యా ఘంటాకర్ణవిరాజితా |
నృసింహీ భైరవీ బ్రాహ్మీ భాస్కరీ వ్యోమచారిణీ || 81 ||
ఐంద్రీ కామధనుః సృష్టిః కామయోనిర్మహాప్రభా |
దృష్టా కాంయా విశ్వశక్తిర్బీజగత్యాత్మదర్శనా || 82 ||
గరుడారూఢహృదయా చాంద్రీ శ్రీర్మధురాననా |
మహోగ్రరూపా వారాహీ నారసింహీ హతాసురా || 83 ||
యుగాంతహుతభుగ్జ్వాలా కరాలా పింగలా కలా |
త్రైలోక్యభూషణా భీమా శ్యామా త్రైలోక్యమోహినీ || 84 ||
మహోత్కటా మహారక్తా మహాచండా మహాసనా |
శంఖినీ లేఖినీ స్వస్థా లిఖితా ఖేచరేశ్వరీ || 85 ||
భద్రకాలీ చైకవీరా కౌమారీ భగమాలినీ |
కల్యాణీ కామధుగ్జ్వాలాముఖీ చోత్పలమాలికా || 86 ||
బాలికా ధనదా సూర్యా హృదయోత్పలమాలికా |
అజితా వర్షిణీ రీతిర్భేరుండా గరుడాసనా || 87 ||
వైశ్వానరీ మహామాయా మహాకాలీ విభీషణా |
మహామందారవిభవా శివానందా రతిప్రియా || 88 ||
ఉద్రీతిః పద్మమాలా చ ధర్మవేగా విభావనీ |
సత్క్రియా దేవసేనా చ హిరణ్యరజతాశ్రయా || 89 ||
సహసావర్తమానా చ హస్తినాదప్రబోధినీ |
హిరణ్యపద్మవర్ణా చ హరిభద్రా సుదుర్ధరా || 90 ||
సూర్యా హిరణ్యప్రకటసదృశీ హేమమాలినీ |
పద్మాననా నిత్యపుష్టా దేవమాతాఽమృతోద్భవా || 91 ||
మహాధనా చ యా శృంగీ కర్దమీ కంబుకంధరా |
ఆదిత్యవర్ణా చంద్రాభా గంధద్వారా దురాసదా || 92 ||
వరార్చితా వరారోహా వరేణ్యా విష్ణువల్లభా |
కల్యాణీ వరదా వామా వామేశీ వింధ్యవాసినీ || 93 ||
యోగనిద్రా యోగరతా దేవకీకామరూపిణీ |
కంసవిద్రావిణీ దుర్గా కౌమారీ కౌశికీ క్షమా || 94 ||
కాత్యాయనీ కాలరాత్రిర్నిశితృప్తా సుదుర్జయా |
విరూపాక్షీ విశాలాక్షీ భక్తానాం పరిరక్షిణీ || 95 ||
బహురూపా స్వరూపా చ విరూపా రూపవర్జితా |
ఘంటానినాదబహులా జీమూతధ్వనినిస్స్వనా || 96 ||
మహాదేవేంద్రమథినీ భ్రుకుటీకుటిలాననా |
సత్యోపయాచితా చైకా కౌబేరీ బ్రహ్మచారిణీ || 97 ||
ఆర్యా యశోదాసుతదా ధర్మకామార్థమోక్షదా |
దారిద్ర్యదుఃఖశమనీ ఘోరదుర్గార్తినాశినీ || 98 ||
భక్తార్తిశమనీ భవ్యా భవభర్గాపహారిణీ |
క్షీరాబ్ధితనయా పద్మా కమలా ధరణీధరా || 99 ||
రుక్మిణీ రోహిణీ సీతా సత్యభామా యశస్వినీ |
ప్రజ్ఞాధారాఽమితప్రజ్ఞా వేదమాతా యశోవతీ || 100 ||
సమాధిర్భావనా మైత్రీ కరుణా భక్తవత్సలా |
అంతర్వేదీ దక్షిణా చ బ్రహ్మచర్యపరాగతిః || 101 ||
దీక్షా వీక్షా పరీక్షా చ సమీక్షా వీరవత్సలా |
అంబికా సురభిః సిద్ధా సిద్ధవిద్యాధరార్చితా || 102 ||
సుదీప్తా లేలిహానా చ కరాలా విశ్వపూరకా |
విశ్వసంహారిణీ దీప్తిస్తాపనీ తాండవప్రియా || 103 ||
ఉద్భవా విరజా రాజ్ఞీ తాపనీ బిందుమాలినీ |
క్షీరధారాసుప్రభావా లోకమాతా సువర్చసా || 104 ||
హవ్యగర్భా చాజ్యగర్భా జుహ్వతో యజ్ఞసంభవా |
ఆప్యాయనీ పావనీ చ దహనీ దహనాశ్రయా || 105 ||
మాతృకా మాధవీ ముచ్యా మోక్షలక్ష్మీర్మహర్ధిదా |
సర్వకామప్రదా భద్రా సుభద్రా సర్వమంగళా || 106 ||
శ్వేతా సుశుక్లవసనా శుక్లమాల్యానులేపనా |
హంసా హీనకరీ హంసీ హృద్యా హృత్కమలాలయా || 107 ||
సితాతపత్రా సుశ్రోణీ పద్మపత్రాయతేక్షణా |
సావిత్రీ సత్యసంకల్పా కామదా కామకామినీ || 108 ||
దర్శనీయా దృశా దృశ్యా స్పృశ్యా సేవ్యా వరాంగనా |
భోగప్రియా భోగవతీ భోగీంద్రశయనాసనా || 109 ||
ఆర్ద్రా పుష్కరిణీ పుణ్యా పావనీ పాపసూదనీ |
శ్రీమతీ చ శుభాకారా పరమైశ్వర్యభూతిదా || 110 ||
అచింత్యానంతవిభవా భవభావవిభావనీ |
నిశ్రేణిః సర్వదేహస్థా సర్వభూతనమస్కృతా || 111 ||
బలా బలాధికా దేవీ గౌతమీ గోకులాలయా |
తోషిణీ పూర్ణచంద్రాభా ఏకానందా శతాననా || 112 ||
ఉద్యాననగరద్వారహర్ంయోపవనవాసినీ |
కూష్మాండీ దారుణా చండా కిరాతీ నందనాలయా || 113 ||
కాలాయనా కాలగంయా భయదా భయనాశినీ |
సౌదామినీ మేఘరవా దైత్యదానవమర్దినీ || 114 ||
జగన్మాతాఽభయకరీ భూతధాత్రీ సుదుర్లభా |
కాశ్యపీ శుభదానా చ వనమాలా శుభా వరా || 115 ||
ధన్యా ధన్యేశ్వరీ ధన్యా రత్నదా వసువర్ధినీ |
గాంధర్వీ రేవతీ గంగా శకునీ విమలాననా || 116 ||
ఇడా శాంతికరీ చైవ తామసీ కమలాలయా |
ఆజ్యపా వజ్రకౌమారీ సోమపా కుసుమాశ్రయా || 117 ||
జగత్ప్రియా చ సరథా దుర్జయా ఖగవాహనా |
మనోభవా కామచారా సిద్ధచారణసేవితా || 118 ||
వ్యోమలక్ష్మీర్మహాలక్ష్మీస్తేజోలక్ష్మీః సుజాజ్వలా |
రసలక్ష్మీర్జగద్యోనిర్గంధలక్ష్మీర్వనాశ్రయా || 119 ||
శ్రవణా శ్రావణీ నేత్రీ రసనాప్రాణచారిణీ |
విరించిమాతా విభవా వరవారిజవాహనా || 120 ||
వీర్యా వీరేశ్వరీ వంద్యా విశోకా వసువర్ధినీ |
అనాహతా కుండలినీ నలినీ వనవాసినీ || 121 ||
గాంధారిణీంద్రనమితా సురేంద్రనమితా సతీ |
సర్వమంగళ్యమాంగళ్యా సర్వకామసమృద్ధిదా || 122 ||
సర్వానందా మహానందా సత్కీర్తిః సిద్ధసేవితా |
సినీవాలీ కుహూ రాకా అమా చానుమతిర్ద్యుతిః || 123 ||
అరుంధతీ వసుమతీ భార్గవీ వాస్తుదేవతా |
మయూరీ వజ్రవేతాలీ వజ్రహస్తా వరాననా || 124 ||
అనఘా ధరణిర్ధీరా ధమనీ మణిభూషణా |
రాజశ్రీరూపసహితా బ్రహ్మశ్రీర్బ్రహ్మవందితా || 125 ||
జయశ్రీర్జయదా జ్ఞేయా సర్గశ్రీః స్వర్గతిః సతాం |
సుపుష్పా పుష్పనిలయా ఫలశ్రీర్నిష్కలప్రియా || 126 ||
ధనుర్లక్ష్మీస్త్వమిలితా పరక్రోధనివారిణీ |
కద్రూర్ధనాయుః కపిలా సురసా సురమోహినీ || 127 ||
మహాశ్వేతా మహానీలా మహామూర్తిర్విషాపహా |
సుప్రభా జ్వాలినీ దీప్తిస్తృప్తిర్వ్యాప్తిః ప్రభాకరీ || 128 ||
తేజోవతీ పద్మబోధా మదలేఖారుణావతీ |
రత్నా రత్నావలీభూతా శతధామా శతాపహా || 129 ||
త్రిగుణా ఘోషిణీ రక్ష్యా నర్దినీ ఘోషవర్జితా |
సాధ్యాఽదితిర్దితిర్దేవీ మృగవాహా మృగాంకగా || 130 ||
చిత్రనీలోత్పలగతా వృషరత్నకరాశ్రయా |
హిరణ్యరజతద్వంద్వా శంఖభద్రాసనస్థితా || 131 ||
గోమూత్రగోమయక్షీరదధిసర్పిర్జలాశ్రయా |
మరీచిశ్చీరవసనా పూర్ణచంద్రార్కవిష్టరా || 132 ||
సుసూక్ష్మా నిర్వృతిః స్థూలా నివృత్తారాతిరేవ చ |
మరీచిజ్వాలినీ ధూంరా హవ్యవాహా హిరణ్యదా || 133 ||
దాయినీ కాలినీ సిద్ధిః శోషిణీ సంప్రబోధినీ |
భాస్వరా సంహతిస్తీక్ష్ణా ప్రచండజ్వలనోజ్జ్వలా || 134 ||
సాంగా ప్రచండా దీప్తా చ వైద్యుతిః సుమహాద్యుతిః |
కపిలా నీలరక్తా చ సుషుంనా విస్ఫులింగినీ || 135 ||
అర్చిష్మతీ రిపుహరా దీర్ఘా ధూమావలీ జరా |
సంపూర్ణమండలా పూషా స్రంసినీ సుమనోహరా || 136 ||
జయా పుష్టికరీ ఛాయా మానసా హృదయోజ్జ్వలా |
సువర్ణకరణీ శ్రేష్ఠా మృతసంజీవనీ రణే || 137 ||
విశల్యకరణీ శుభ్రా సంధినీ పరమౌషధిః |
బ్రహ్మిష్ఠా బ్రహ్మసహితా ఐందవీ రత్నసంభవా || 138 ||
విద్యుత్ప్రభా బిందుమతీ త్రిస్వభావగుణాంబికా |
నిత్యోదితా నిత్యదృష్టా నిత్యకామకరీషిణీ || 139 ||
పద్మాంకా వజ్రచిహ్నా చ వక్రదండవిభాసినీ |
విదేహపూజితా కన్యా మాయా విజయవాహినీ || 140 ||
మానినీ మంగళా మాన్యా మానినీ మానదాయినీ |
విశ్వేశ్వరీ గణవతీ మండలా మండలేశ్వరీ || 141 ||
హరిప్రియా భౌమసుతా మనోజ్ఞా మతిదాయినీ |
ప్రత్యంగిరా సోమగుప్తా మనోఽభిజ్ఞా వదన్మతిః || 142 ||
యశోధరా రత్నమాలా కృష్ణా త్రైలోక్యబంధినీ |
అమృతా ధారిణీ హర్షా వినతా వల్లకీ శచీ || 143 ||
సంకల్పా భామినీ మిశ్రా కాదంబర్యమృతా ప్రభా |
ఆగతా నిర్గతా వజ్రా సుహితా సహితాఽక్షతా || 144 ||
సర్వార్థసాధనకరీ ధాతుర్ధారణికాఽమలా |
కరుణాధారసంభూతా కమలాక్షీ శశిప్రియా || 145 ||
సౌంయరూపా మహాదీప్తా మహాజ్వాలా వికాసినీ |
మాలా కాంచనమాలా చ సద్వజ్రా కనకప్రభా || 146 ||
ప్రక్రియా పరమా యోక్త్రీ క్షోభికా చ సుఖోదయా |
విజృంభణా చ వజ్రాఖ్యా శృంఖలా కమలేక్షణా || 147 ||
జయంకరీ మధుమతీ హరితా శశినీ శివా |
మూలప్రకృతిరీశానీ యోగమాతా మనోజవా || 148 ||
ధర్మోదయా భానుమతీ సర్వాభాసా సుఖావహా |
ధురంధరా చ బాలా చ ధర్మసేవ్యా తథాగతా || 149 ||
సుకుమారా సౌంయముఖీ సౌంయసంబోధనోత్తమా |
సుముఖీ సర్వతోభద్రా గుహ్యశక్తిర్గుహాలయా || 150 ||
హలాయుధా చ కావీరా సర్వశాస్త్రసుధారిణీ |
వ్యోమశక్తిర్మహాదేహా వ్యోమగా మధుమన్మయీ || 151 ||
గంగా వితస్తా యమునా చంద్రభాగా సరస్వతీ |
తిలోత్తమోర్వశీ రంభా స్వామినీ సురసుందరీ || 152 ||
బాణప్రహరణా బాలా బింబోష్ఠీ చారుహాసినీ |
కకుద్మినీ చారుపృష్ఠా దృష్టాదృష్టఫలప్రదా || 153 ||
కాంయచారీ చ కాంయా చ కామాచారవిహారిణీ |
హిమశైలేంద్రసంకాశా గజేంద్రవరవాహనా || 154 ||
అశేషసుఖసౌభాగ్యసంపదాం యోనిరుత్తమా |
సర్వోత్కృష్టా సర్వమయీ సర్వా సర్వేశ్వరప్రియా || 155 ||
సర్వాంగయోనిః సాఽవ్యక్తా సంప్రధానేశ్వరేశ్వరీ |
విష్ణువక్షఃస్థలగతా కిమతః పరముచ్యతే || 156 ||
పరా నిర్మహిమా దేవీ హరివక్షఃస్థలాశ్రయా |
సా దేవీ పాపహంత్రీ చ సాన్నిధ్యం కురుతాన్మమ || 157 ||
ఇతి నాంనాం సహస్రం తు లక్ష్ంయాః ప్రోక్తం శుభావహం |
పరావరేణ భేదేన ముఖ్యగౌణేన భాగతః || 158 ||
యశ్చైతత్కీర్తయేన్నిత్యం శృణుయాద్వాపి పద్మజ |
శుచిః సమాహితో భూత్వా భక్తిశ్రద్ధాసమన్వితః || 159 ||
శ్రీనివాసం సమభ్యర్చ్య పుష్పధూపానులేపనైః |
భోగైశ్చ మధుపర్కాద్యైర్యథాశక్తి జగద్గురుం || 160 ||
తత్పార్శ్వస్థాం శ్రియం దేవీం సంపూజ్య శ్రీధరప్రియాం |
తతో నామసహస్రేణ తోషయేత్పరమేశ్వరీం || 161 ||
నామరత్నావలీస్తోత్రమిదం యః సతతం పఠేత్ |
ప్రసాదాభిముఖీ లక్ష్మీః సర్వం తస్మై ప్రయచ్ఛతి || 162 ||
యస్యా లక్ష్ంయాశ్చ సంభూతాః శక్తయో విశ్వగాః సదా |
కారణత్వం న తిష్ఠంతి జగత్యస్మింశ్చరాచరే || 163 ||
తస్మాత్ప్రీతా జగన్మాతా శ్రీర్యస్యాచ్యుతవల్లభా |
సుప్రీతాః శక్తయస్తస్య సిద్ధిమిష్టాం దిశంతి హి || 164 ||
ఏక ఏవ జగత్స్వామీ శక్తిమానచ్యుతః ప్రభుః |
తదంశశక్తిమంతోఽన్యే బ్రహ్మేశానాదయో యథా || 168 ||
తథైవైకా పరా శక్తిః శ్రీస్తస్య కరుణాశ్రయా |
జ్ఞానాదిషాడ్గుణ్యమయీ యా ప్రోక్తా ప్రకృతిః పరా || 166 ||
ఏకైకశక్తిః శ్రీస్తస్యా ద్వితీయాత్మని వర్తతే |
పరా పరేశీ సర్వేశీ సర్వాకారా సనాతనీ || 167 ||
అనంతనామధేయా చ శక్తిచక్రస్య నాయికా |
జగచ్చరాచరమిదం సర్వం వ్యాప్య వ్యవస్థితా || 168 ||
తస్మాదేకైవ పరమా శ్రీర్జ్ఞేయా విశ్వరూపిణీ |
సౌంయా సౌంయేన రూపేణ సంస్థితా నటజీవవత్ || 169 ||
యో యో జగతి పుంభావః స విష్ణురితి నిశ్చయః |
యా యా తు నారీభావస్థా తత్ర లక్ష్మీర్వ్యవస్థితా || 170 ||
ప్రకృతేః పురుషాచ్చాన్యస్తృతీయో నైవ విద్యతే |
అథ కిం బహునోక్తేన నరనారీమయో హరిః || 171 ||
అనేకభేదభిన్నస్తు క్రియతే పరమేశ్వరః |
మహావిభూతిం దయితాం యే స్తువంత్యచ్యుతప్రియాం || 172 ||
తే ప్రాప్నువంతి పరమాం లక్ష్మీం సంశుద్ధచేతసః |
పద్మయోనిరిదం ప్రాప్య పఠన్ స్తోత్రమిదం క్రమాత్ || 173 ||
దివ్యమష్టగుణైశ్వర్యం తత్ప్రసాదాచ్చ లబ్ధవాన్ |
సకామానాం చ ఫలదామకామానాం చ మోక్షదాం || 174 ||
పుస్తకాఖ్యాం భయత్రాత్రీం సితవస్త్రాం త్రిలోచనాం |
మహాపద్మనిషణ్ణాం తాం లక్ష్మీమజరతాం నమః || 175 ||
కరయుగళగృహీతం పూర్ణకుంభం దధానా
క్వచిదమలగతస్థా శంఖపద్మాక్షపాణిః |
క్వచిదపి దయితాంగే చామరవ్యగ్రహస్తా
క్వచిదపి సృణిపాశం బిభ్రతీ హేమకాంతిః || 176 ||
ఇతి పద్మపురాణే కాశ్మీరవర్ణనే హిరణ్యగర్భహృదయే సర్వకామప్రదాయకం పురుషోత్తమప్రోక్తం శ్రీ లక్ష్మీ సహస్రనామ స్తోత్రం ||

శ్రీ కమలా సహస్రనామావళిః

శ్రీ కమలా సహస్రనామావళిః.

Telugu

Read Stotra

శ్రీ కమలా సహస్రనామావళిః

Sign In

OTP Verification

Sacred Stotras & Deities

శ్రీ కమలా కవచం

శ్రీ కమలా స్తోత్రం

శ్రీ కమలా స్తోత్రం 2

శ్రీ కమలాంబికా స్తోత్రం

శ్రీ కమలా అష్టోత్తరశతనామ స్తోత్రం

శ్రీ కమలాష్టోత్తరశతనామావళిః

శ్రీ కమలా సహస్రనామ స్తోత్రం

శ్రీ కమలా సహస్రనామావళిః

MENU

LINKS

Astrologer Section

Vendor Section

GET ADVICE ON

Download Our Apps