Sacred Stotras & Deities

శ్రీ ఆద్యా స్తోత్రం

బ్రహ్మోవాచ |
శృణు వత్స ప్రవక్ష్యామి ఆద్యాస్తోత్రం మహాఫలం |
యః పఠేత్ సతతం భక్త్యా స ఏవ విష్ణువల్లభః || 1 ||
మృత్యుర్వ్యాధిభయం తస్య నాస్తి కించిత్ కలౌ యుగే |
అపుత్రా లభతే పుత్రం త్రిపక్షం శ్రవణం యది || 2 ||
ద్వౌ మాసౌ బంధనాన్ముక్తి విప్రవక్త్రాత్ శ్రుతం యది |
మృతవత్సా జీవవత్సా షణ్మాసం శ్రవణం యది || 3 ||
నౌకాయాం సంకటే యుద్ధే పఠనాజ్జయమాప్నుయాత్ |
లిఖిత్వా స్థాపయేద్గేహే నాగ్నిచౌరభయం క్వచిత్ || 4 ||
రాజస్థానే జయీ నిత్యం ప్రసన్నాః సర్వదేవతా |
ఓం హ్రీం |
బ్రహ్మాణీ బ్రహ్మలోకే చ వైకుంఠే సర్వమంగళా || 5 ||
ఇంద్రాణీ అమరావత్యామంబికా వరుణాలయే |
యమాలయే కాలరూపా కుబేరభవనే శుభా || 6 ||
మహానందాగ్నికోణే చ వాయవ్యాం మృగవాహినీ |
నైరృత్యాం రక్తదంతా చ ఐశాన్యాం శూలధారిణీ || 7 ||
పాతాళే వైష్ణవీరూపా సింహలే దేవమోహినీ |
సురసా చ మణిద్విపే లంకాయాం భద్రకాళికా || 8 ||
రామేశ్వరీ సేతుబంధే విమలా పురుషోత్తమే |
విరజా ఔడ్రదేశే చ కామాక్ష్యా నీలపర్వతే || 9 ||
కాళికా వంగదేశే చ అయోధ్యాయాం మహేశ్వరీ |
వారాణస్యామన్నపూర్ణా గయాక్షేత్రే గయేశ్వరీ || 10 ||
కురుక్షేత్రే భద్రకాళీ వ్రజే కాత్యాయనీ పరా |
ద్వారకాయాం మహామాయా మథురాయాం మహేశ్వరీ || 11 ||
క్షుధా త్వం సర్వభూతానాం వేలా త్వం సాగరస్య చ |
నవమీ శుక్లపక్షస్య కృష్ణస్యైకాదశీ పరా || 12 ||
దక్షసా దుహితా దేవీ దక్షయజ్ఞవినాశినీ |
రామస్య జానకీ త్వం హి రావణధ్వంసకారిణీ || 13 ||
చండముండవధే దేవీ రక్తబీజవినాశినీ |
నిశుంభశుంభమథినీ మధుకైటభఘాతినీ || 14 ||
విష్ణుభక్తిప్రదా దుర్గా సుఖదా మోక్షదా సదా |
ఆద్యాస్తవమిమం పుణ్యం యః పఠేత్ సతతం నరః || 15 ||
సర్వజ్వరభయం న స్యాత్ సర్వవ్యాధివినాశనం |
కోటితీర్థఫలం తస్య లభతే నాత్ర సంశయః || 16 ||
జయా మే చాగ్రతః పాతు విజయా పాతు పృష్ఠతః |
నారాయణీ శీర్షదేశే సర్వాంగే సింహవాహినీ || 17 ||
శివదూతీ ఉగ్రచండా ప్రత్యంగే పరమేశ్వరీ |
విశాలాక్షీ మహామాయా కౌమారీ శంఖినీ శివా || 18 ||
చక్రిణీ జయదాత్రీ చ రణమత్తా రణప్రియా |
దుర్గా జయంతీ కాళీ చ భద్రకాళీ మహోదరీ || 19 ||
నారసింహీ చ వారాహీ సిద్ధిదాత్రీ సుఖప్రదా |
భయంకరీ మహారౌద్రీ మహాభయవినాశినీ || 20 ||
ఇతి శ్రీబ్రహ్మయామలే బ్రహ్మనారదసంవాదే శ్రీ ఆద్యా స్తోత్రం ||

అభిరామి స్తోత్రం

నమస్తే లలితే దేవి శ్రీమత్సింహాసనేశ్వరి |
భక్తానామిష్టదే మాతః అభిరామి నమోఽస్తు తే || 1 ||
చంద్రోదయం కృతవతీ తాటంకేన మహేశ్వరి |
ఆయుర్దేహి జగన్మాతః అభిరామి నమోఽస్తు తే || 2 ||
సుధాఘటేశశ్రీకాంతే శరణాగతవత్సలే |
ఆరోగ్యం దేహి మే నిత్యం అభిరామి నమోఽస్తు తే || 3 ||
కళ్యాణి మంగళం దేహి జగన్మంగళకారిణి |
ఐశ్వర్యం దేహి మే నిత్యం అభిరామి నమోఽస్తు తే || 4 ||
చంద్రమండలమధ్యస్థే మహాత్రిపురసుందరి |
శ్రీచక్రరాజనిలయే అభిరామి నమోఽస్తు తే || 5 ||
రాజీవలోచనే పూర్ణే పూర్ణచంద్రవిధాయిని |
సౌభాగ్యం దేహి మే నిత్యం అభిరామి నమోఽస్తు తే || 6 ||
గణేశస్కందజనని వేదరూపే ధనేశ్వరి |
విద్యాం చ దేహి మే కీర్తిం అభిరామి నమోఽస్తు తే || 7 ||
సువాసినీప్రియే మాతః సౌమాంగళ్యవివర్ధినీ |
మాంగళ్యం దేహి మే నిత్యం అభిరామి నమోఽస్తు తే || 8 ||
మార్కండేయ మహాభక్త సుబ్రహ్మణ్య సుపూజితే |
శ్రీరాజరాజేశ్వరీ త్వం హ్యభిరామి నమోఽస్తు తే || 9 ||
సాన్నిధ్యం కురు కళ్యాణీ మమ పూజాగృహే శుభే |
బింబే దీపే తథా పుష్పే హరిద్రా కుంకుమే మమ || 10 ||
అభిరాంయా ఇదం స్తోత్రం యః పఠేచ్ఛక్తిసన్నిధౌ |
ఆయుర్బలం యశో వర్చో మంగళం చ భవేత్సుఖం || 11 ||
ఇతి శ్రీఅభిరామిభట్టార్ కృత శ్రీ అభిరామి స్తోత్రం |

 దేవీ అశ్వధాటి స్తోత్రం

చేటీ భవన్నిఖిలఖేటీ కదంబవనవాటీషు నాకిపటలీ
కోటీర చారుతర కోటీ మణీకిరణ కోటీ కరంబిత పదా |
పాటీర గంధి కుచశాటీ కవిత్వ పరిపాటీమగాధిపసుతా
ఘోటీఖురాదధికధాటీముదార ముఖ వీటీరసేన తనుతాం || 1 ||
ద్వైపాయన ప్రభృతి శాపాయుధ త్రిదివ సోపాన ధూళి చరణా
పాపాపహ స్వమను జాపానులీన జన తాపాపనోద నిపుణా |
నీపాలయా సురభి ధూపాలకా దురితకూపాదుదంచయతు మాం
రూపాధికా శిఖరి భూపాల వంశమణి దీపాయితా భగవతీ || 2 ||
యాఽఽళీభిరాత్మ తనుతాఽఽలీనకృత్ప్రియక పాళీషు ఖేలతి భవా
వ్యాళీ నకుల్యసిత చూళీ భరా చరణ ధూళీ లసన్ముణిగణా |
యాఽఽళీ భృతి శ్రవసి తాళీ దళం వహతి యాఽఽళీక శోభి తిలకా
సాఽఽళీ కరోతు మమ కాళీ మనః స్వపద నాళీక సేవన విధౌ || 3 ||
బాలామృతాంశు నిభ ఫాలా మనాగరుణ చేలా నితంబ ఫలకే
కోలాహల క్షపిత కాలాఽమరాఽకుశల కీలాల శోషణ రవిః |
స్థులాకుచే జలదనీలా కచే కలిత లీలా కదంబ విపినే
శూలాయుధ ప్రణత శీలా దధాతు హృది శైలాధిరాజతనయా || 4 ||
కంబావతీవ సవిడంబా గళేన నవతుంబాఽఽభ వీణ సవిధా
బింబాధరా వినత శంబాయుధాది నికురుంబా కదంబ విపినే |
అంబా కురంగమద జంబాల రోచిరిహ లంబాలకా దిశతు మే
శం బాహులేయ శశి బింబాభిరామ ముఖ సంబాధిత స్తనభరా || 5 ||
దాసాయమాన సుమహాసా కదంబవన వాసా కుసుంభ సుమనో-
-వాసా విపంచికృత రాసా విధూత మధుమాసాఽరవింద మధురా |
కాసార సూనతతి భాసాఽభిరామ తనురాఽఽసార శీత కరుణా
నాసామణి ప్రవర భాసా శివా తిమిరమాసాదయేదుపరతిం || 6 ||
న్యంకాకరే వపుషి కంకాళ రక్త పుషి కంకాదిపక్షి విషయే
త్వం కామనామయసి కిం కారణం హృదయ పంకారిమేహి గిరిజాం |
శంకాశిలా నిశిత టంకాయమాన పద సంకాశమాన సుమనో
ఝంకారి భృంగతతిమంకానుపేత శశిసంకాశ వక్త్రకమలాం || 7 ||
జంభారి కుంభి పృథు కుంభాఽపహాసి కుచ సంభావ్య హార లతికా
రంభా కరీంద్ర కర దంభాఽపహోరుగతి డింభాఽనురంజిత పదా |
శంభావుదార పరిరంభాంకురత్పులక దంభాఽనురాగ పిశునా
శం భాసురాఽఽభరణ గుంఫా సదా దిశతు శుంభాసుర ప్రహరణా || 8 ||
దాక్షాయణీ దనుజశిక్షా విధౌ వికృత దీక్షా మనోహర గుణా
భిక్షాశినో నటన వీక్షా వినోదముఖి దక్షాధ్వర ప్రహరణా |
వీక్షాం విధేహి మయి దక్షా స్వకీయజన పక్షా విపక్ష విముఖీ
యక్షేశ సేవిత నిరాక్షేప శక్తి జయలక్ష్ంయాఽవధాన కలనా || 9 ||
వందారు లోక వర సందాయినీ విమల కుందావదాత రదనా
బృందారబృంద మణిబృందాఽరవింద మకరందాభిషిక్త చరణా |
మందానిలాఽఽకలిత మందారదామభిరమందాభిరామ మకుటా
మందాకినీ జవన భిందాన వాచమరవిందాసనా దిశతు మే || 10 ||
యత్రాశయో లగతి తత్రాగజా వసతు కుత్రాపి నిస్తుల శుకా
సుత్రామ కాల ముఖ సత్రాసక ప్రకర సుత్రాణకారి చరణా |
ఛత్రానిలాతిరయ పత్రాభిరామ గుణ మిత్రామరీ సమ వధూః
కుత్రాసహీన మణిచిత్రాకృతి స్ఫురిత పుత్రాది దాన నిపుణా || 11 ||
కూలాతిగామి భయతూలాఽఽవళి జ్వలన కీలా నిజస్తుతి విధా
కోలాహలక్షపిత కాలామరీ కుశల కీలాల పోషణ నభా |
స్థూలాకుచే జలద నీలాకచే కలిత లీలా కదంబ విపినే
శూలాయుధ ప్రణతిశీలా విభాతు హృది శైలాధిరాజతనయా || 12 ||
ఇంధాన కీర మణిబంధా భవే హృదయబంధావతీవ రసికా
సంధావతీ భువన సంధారణేప్యమృత సింధావుదారనిలయా |
గంధాఽనుభావ ముహురంధాఽళి పీత కచబంధా సమర్పయతు మే
శం ధామ భానుమపి రుంధానమాశు పదసంధానమప్యనుగతా || 13 ||
ఇతి మహాకవి కాళిదాస కృత దేవీ అశ్వధాటి స్తోత్రం |

ఆనందలహరీ

భవాని స్తోతుం త్వాం ప్రభవతి చతుర్భిర్న వదనైః
ప్రజానామీశానస్త్రిపురమథనః పంచభిరపి |
న షడ్భిః సేనానీర్దశశతముఖైరప్యహిపతి-
-స్తదాన్యేషాం కేషాం కథయ కథమస్మిన్నవసరః || 1 ||
ఘృతక్షీరద్రాక్షామధుమధురిమా కైరపి పదై-
-ర్విశిష్యానాఖ్యేయో భవతి రసనామాత్రవిషయః |
తథా తే సౌందర్యం పరమశివదృఙ్మాత్రవిషయః
కథంకారం బ్రూమః సకలనిగమాగోచరగుణే || 2 ||
ముఖే తే తాంబూలం నయనయుగళే కజ్జలకలా
లలాటే కాశ్మీరం విలసతి గళే మౌక్తికలతా |
స్ఫురత్కాంచీ శాటీ పృథుకటితటే హాటకమయీ
భజామి త్వాం గౌరీం నగపతికిశోరీమవిరతం || 3 ||
విరాజన్మందారద్రుమకుసుమహారస్తనతటీ-
-నదద్వీణానాదశ్రవణవిలసత్కుండలగుణా |
నతాంగీ మాతంగీ రుచిరగతిభంగీ భగవతీ
సతీ శంభోరంభోరుహచటులచక్షుర్విజయతే || 4 ||
నవీనార్కభ్రాజన్మణికనకభూషాపరికరై-
-ర్వృతాంగీ సారంగీరుచిరనయనాంగీకృతశివా |
తటిత్పీతా పీతాంబరలలితమంజీరసుభగా
మమాపర్ణా పూర్ణా నిరవధిసుఖైరస్తు సుముఖీ || 5 ||
హిమాద్రేః సంభూతా సులలితకరైః పల్లవయుతా
సుపుష్పా ముక్తాభిర్భ్రమరకలితా చాలకభరైః |
కృతస్థాణుస్థానా కుచఫలనతా సూక్తిసరసా
రుజాం హంత్రీ గంత్రీ విలసతి చిదానందలతికా || 6 ||
సపర్ణామాకీర్ణాం కతిపయగుణైః సాదరమిహ
శ్రయంత్యన్యే వల్లీం మమ తు మతిరేవం విలసతి |
అపర్ణైకా సేవ్యా జగతి సకలైర్యత్పరివృతః
పురాణోఽపి స్థాణుః ఫలతి కిల కైవల్యపదవీం || 7 ||
విధాత్రీ ధర్మాణాం త్వమసి సకలాంనాయజననీ
త్వమర్థానాం మూలం ధనదనమనీయాంఘ్రికమలే |
త్వమాదిః కామానాం జనని కృతకందర్పవిజయే
సతాం ముక్తేర్బీజం త్వమసి పరమబ్రహ్మమహిషీ || 8 ||
ప్రభూతా భక్తిస్తే యదపి న మమాలోలమనస-
-స్త్వయా తు శ్రీమత్యా సదయమవలోక్యోఽహమధునా |
పయోదః పానీయం దిశతి మధురం చాతకముఖే
భృశం శంకే కైర్వా విధిభిరనునీతా మమ మతిః || 9 ||
కృపాపాంగాలోకం వితర తరసా సాధుచరితే
న తే యుక్తోపేక్షా మయి శరణదీక్షాముపగతే |
న చేదిష్టం దద్యాదనుపదమహో కల్పలతికా
విశేషః సామాన్యైః కథమితరవల్లీపరికరైః || 10 ||
మహాంతం విశ్వాసం తవ చరణపంకేరుహయుగే
నిధాయాన్యన్నైవాశ్రితమిహ మయా దైవతముమే |
తథాపి త్వచ్చేతో యది మయి న జాయేత సదయం
నిరాలంబో లంబోదరజనని కం యామి శరణం || 11 ||
అయః స్పర్శే లగ్నం సపది లభతే హేమపదవీం
యథా రథ్యాపాథః శుచి భవతి గంగౌఘమిలితం |
తథా తత్తత్పాపైరతిమలినమంతర్మమ యది
త్వయి ప్రేంణా సక్తం కథమివ న జాయేత విమలం || 12 ||
త్వదన్యస్మాదిచ్ఛావిషయఫలలాభే న నియమ-
-స్త్వమజ్ఞానామిచ్ఛాధికమపి సమర్థా వితరణే |
ఇతి ప్రాహుః ప్రాంచః కమలభవనాద్యాస్త్వయి మన-
-స్త్వదాసక్తం నక్తందివముచితమీశాని కురు తత్ || 13 ||
స్ఫురన్నానారత్నస్ఫటికమయభిత్తిప్రతిఫల-
-త్త్వదాకారం చంచచ్ఛశధరకలాసౌధశిఖరం |
ముకుందబ్రహ్మేంద్రప్రభృతిపరివారం విజయతే
తవాగారం రంయం త్రిభువనమహారాజగృహిణి || 14 ||
నివాసః కైలాసే విధిశతమఖాద్యాః స్తుతికరాః
కుటుంబం త్రైలోక్యం కృతకరపుటః సిద్ధినికరః |
మహేశః ప్రాణేశస్తదవనిధరాధీశతనయే
న తే సౌభాగ్యస్య క్వచిదపి మనాగస్తి తులనా || 15 ||
వృషో వృద్ధో యానం విషమశనమాశా నివసనం
శ్మశానం క్రీడాభూర్భుజగనివహో భూషణవిధిః |
సమగ్రా సామగ్రీ జగతి విదితైవ స్మరరిపో-
-ర్యదేతస్యైశ్వర్యం తవ జనని సౌభాగ్యమహిమా || 16 ||
అశేషబ్రహ్మాండప్రలయవిధినైసర్గికమతిః
శ్మశానేష్వాసీనః కృతభసితలేపః పశుపతిః |
దధౌ కంఠే హాలాహలమఖిలభూగోలకృపయా
భవత్యాః సంగత్యాః ఫలమితి చ కల్యాణి కలయే || 17 ||
త్వదీయం సౌందర్యం నిరతిశయమాలోక్య పరయా
భియైవాసీద్గంగా జలమయతనుః శైలతనయే |
తదేతస్యాస్తస్మాద్వదనకమలం వీక్ష్య కృపయా
ప్రతిష్ఠామాతన్వన్నిజశిరసి వాసేన గిరిశః || 18 ||
విశాలశ్రీఖండద్రవమృగమదాకీర్ణఘుసృణ-
-ప్రసూనవ్యామిశ్రం భగవతి తవాభ్యంగసలిలం |
సమాదాయ స్రష్టా చలితపదపాంసూన్నిజకరైః
సమాధత్తే సృష్టిం విబుధపురపంకేరుహదృశాం || 19 ||
వసంతే సానందే కుసుమితలతాభిః పరివృతే
స్ఫురన్నానాపద్మే సరసి కలహంసాలిసుభగే |
సఖీభిః ఖేలంతీం మలయపవనాందోలితజలే
స్మరేద్యస్త్వాం తస్య జ్వరజనితపీడాపసరతి || 20 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ ఆనందలహరీ |

శ్రీ అంబా పంచరత్న స్తోత్రం

అంబాశంబరవైరితాతభగినీ శ్రీచంద్రబింబాననా
బింబోష్ఠీ స్మితభాషిణీ శుభకరీ కాదంబవాట్యాశ్రితా |
హ్రీంకారాక్షరమంత్రమధ్యసుభగా శ్రోణీనితంబాంకితా
మామంబాపురవాసినీ భగవతీ హేరంబమాతావతు || 1 ||
కల్యాణీ కమనీయసుందరవపుః కాత్యాయనీ కాలికా
కాలా శ్యామలమేచకద్యుతిమతీ కాదిత్రిపంచాక్షరీ |
కామాక్షీ కరుణానిధిః కలిమలారణ్యాతిదావానలా
మామంబాపురవాసినీ భగవతీ హేరంబమాతావతు || 2 ||
కాంచీకంకణహారకుండలవతీ కోటీకిరీటాన్వితా
కందర్పద్యుతికోటికోటిసదనా పీయూషకుంభస్తనా |
కౌసుంభారుణకాంచనాంబరవృతా కైలాసవాసప్రియా
మామంబాపురవాసినీ భగవతీ హేరంబమాతావతు || 3 ||
యా సా శుంభనిశుంభదైత్యశమనీ యా రక్తబీజాశనీ
యా శ్రీ విష్ణుసరోజనేత్రభవనా యా బ్రహ్మవిద్యాఽఽసనీ |
యా దేవీ మధుకైటభాసురరిపుర్యా మాహిషధ్వంసినీ
మామంబాపురవాసినీ భగవతీ హేరంబమాతావతు || 4 ||
శ్రీవిద్యా పరదేవతాఽఽదిజననీ దుర్గా జయా చండికా
బాలా శ్రీత్రిపురేశ్వరీ శివసతీ శ్రీరాజరాజేశ్వరీ |
శ్రీరాజ్ఞీ శివదూతికా శ్రుతినుతా శృంగారచూడామణిః
మామంబాపురవాసినీ భగవతీ హేరంబమాతావతు || 5 ||
అంబాపంచకమద్భుతం పఠతి చేద్యో వా ప్రభాతేఽనిశం
దివ్యైశ్వర్యశతాయురుత్తమమతిం విద్యాం శ్రియం శాశ్వతం |
లబ్ధ్వా భూమితలే స్వధర్మనిరతాం శ్రీసుందరీం భామినీం
అంతే స్వర్గఫలం లభేత్స విబుధైః సంస్తూయమానో నరః || 6 ||

శ్రీ అంబా భుజంగపంచరత్న స్తోత్రం

వధూరోజగోత్రోధరాగ్రే చరంతం
లుఠంతం ప్లవంతం నటం తపతంతం
పదం తే భజంతం మనోమర్కటంతం
కటాక్షాళిపాశైస్సుబద్ధం కురు త్వం || 1 ||
గజాస్యష్షడాస్యో యథా తే తథాహం
కుతో మాం న పశ్యస్యహో కిం బ్రవీమి
సదా నేత్రయుగ్మస్య తే కార్యమస్తి
తృతీయేన నేత్రేణ వా పశ్య మాం త్వం || 2 ||
త్వయీత్థం కృతం చేత్తవ స్వాంతమంబ
ప్రశీతం ప్రశీతం ప్రశీతం కిమాసీత్
ఇతోఽన్యత్కిమాస్తే యశస్తే కుతస్స్యాత్
మమేదం మతం చాపి సత్యం బ్రవీమి || 3 ||
ఇయద్దీనముక్త్వాపి తేఽన్నర్త శీతం
తతశ్శీతలాద్రేః మృషా జన్మతే భూత్
కియంతం సమాలంబకాలం వృథాస్మి
ప్రపశ్యామి తేఽచ్ఛస్వరూపం కదాహం || 4 ||
జగత్సర్వసర్గస్థితిధ్వంసహేతు
స్త్వమేవాసి సత్యం త్వమేవాసి నిత్యం
త్వదన్యేషు దేవేష్వనిత్యత్వముక్తం
త్వదంఘ్రిద్వయాసక్తచిత్తోహమంబ || 5 ||
ఇతి శ్రీమత్కామాచార్యరచితమంబాభుజంగస్తోత్ర పంచరత్నం ||

శ్రీ కామాఖ్యా స్తోత్రం

జయ కామేశి చాముండే జయ భూతాపహారిణి |
జయ సర్వగతే దేవి కామేశ్వరి నమోఽస్తు తే || 1 ||
విశ్వమూర్తే శుభే శుద్ధే విరూపాక్షి త్రిలోచనే |
భీమరూపే శివే విద్యే కామేశ్వరి నమోఽస్తు తే || 2 ||
మాలాజయే జయే జంభే భూతాక్షి క్షుభితేఽక్షయే |
మహామాయే మహేశాని కామేశ్వరి నమోఽస్తు తే || 3 ||
భీమాక్షి భీషణే దేవి సర్వభూతక్షయంకరి |
కాలి చ వికరాలి చ కామేశ్వరి నమోఽస్తు తే || 3 ||
కాలి కరాలవిక్రాంతే కామేశ్వరి హరప్రియే |
సర్వశాస్త్రసారభూతే కామేశ్వరి నమోఽస్తు తే || 4 ||
కామరూపప్రదీపే చ నీలకూటనివాసిని |
నిశుంభశుంభమథని కామేశ్వరి నమోఽస్తు తే || 5 ||
కామాఖ్యే కామరూపస్థే కామేశ్వరి హరిప్రియే |
కామనాం దేహి మే నిత్యం కామేశ్వరి నమోఽస్తు తే || 6 ||
వపానాఢ్యమహావక్త్రే తథా త్రిభువనేశ్వరి |
మహిషాసురవధే దేవి కామేశ్వరి నమోఽస్తు తే || 7 ||
ఛాగతుష్టే మహాభీమే కామాఖ్యే సురవందితే |
జయ కామప్రదే తుష్టే కామేశ్వరి నమోఽస్తు తే || 8 ||
భ్రష్టరాజ్యో యదా రాజా నవంయాం నియతః శుచిః |
అష్టంయాం చ చతుర్దశ్యాముపవాసీ నరోత్తమః || 9 ||
సంవత్సరేణ లభతే రాజ్యం నిష్కంటకం పునః |
య ఇదం శృణుయాద్భక్త్యా తవ దేవి సముద్భవం |
సర్వపాపవినిర్ముక్తః పరం నిర్వాణమృచ్ఛతి || 10 ||
శ్రీకామరూపేశ్వరి భాస్కరప్రభే
ప్రకాశితాంభోజనిభాయతాననే |
సురారిరక్షఃస్తుతిపాతనోత్సుకే
త్రయీమయే దేవనుతే నమామి || 11 ||
సితాసితే రక్తపిశంగవిగ్రహే
రూపాణి యస్యాః ప్రతిభాంతి తాని |
వికారరూపా చ వికల్పితాని
శుభాశుభానామపి తాం నమామి || 12 ||
కామరూపసముద్భూతే కామపీఠావతంసకే |
విశ్వాధారే మహామాయే కామేశ్వరి నమోఽస్తు తే || 13 ||
అవ్యక్తవిగ్రహే శాంతే సంతతే కామరూపిణి |
కాలగంయే పరే శాంతే కామేశ్వరి నమోఽస్తు తే || 14 ||
యా సుషుంనాంతరాలస్థా చింత్యతే జ్యోతిరూపిణీ |
ప్రణతోఽస్మి పరాం వీరాం కామేశ్వరి నమోఽస్తు తే || 15 ||
దంష్ట్రాకరాలవదనే ముండమాలోపశోభితే |
సర్వతః సర్వగే దేవి కామేశ్వరి నమోఽస్తు తే || 16 ||
చాముండే చ మహాకాలి కాలి కపాలహారిణీ |
పాశహస్తే దండహస్తే కామేశ్వరి నమోఽస్తు తే || 17 ||
చాముండే కులమాలాస్యే తీక్ష్ణదంష్ట్రే మహాబలే |
శవయానస్థితే దేవి కామేశ్వరి నమోఽస్తు తే || 18 ||

శ్రీ గర్భరక్షాంబికా స్తోత్రం

శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
వాపీతటే వామభాగే
వామదేవస్య దేవస్య దేవి స్థితా త్వం |
మాన్యా వరేణ్యా వదాన్యా
పాహి గర్భస్థజంతూన్ తథా భక్తలోకాన్ || 1 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
శ్రీగర్భరక్షాపురే యా
దివ్యసౌందర్యయుక్తా సుమాంగళ్యగాత్రీ |
ధాత్రీ జనిత్రీ జనానాం
దివ్యరూపాం దయార్ద్రాం మనోజ్ఞాం భజే త్వాం || 2 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
ఆషాఢమాసే సుపుణ్యే
శుక్రవారే సుగంధేన గంధేన లిప్తా |
దివ్యాంబరాకల్పవేషా
వాజపేయాదియాగస్థభక్తైః సుదృష్టా || 3 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
కల్యాణదాత్రీం నమస్యే
వేదికాఢ్యస్త్రియా గర్భరక్షాకరీం త్వాం |
బాలైస్సదా సేవితాంఘ్రిం
గర్భరక్షార్థమారాదుపేతైరుపేతాం || 4 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
బ్రహ్మోత్సవే విప్రవీథ్యాం
వాద్యఘోషేణ తుష్టాం రథే సన్నివిష్టాం |
సర్వార్థదాత్రీం భజేఽహం
దేవవృందైరపీడ్యాం జగన్మాతరం త్వాం || 5 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
ఏతత్ కృతం స్తోత్రరత్నం
దీక్షితానంతరామేణ దేవ్యాశ్చ తుష్ట్యై |
నిత్యం పఠేద్యస్తు భక్త్యా
పుత్రపౌత్రాది భాగ్యం భవేత్తస్య నిత్యం || 6 ||
శ్రీమాధవీ కాననస్థే గర్భరక్షాంబికే పాహి భక్తాం స్తువంతీం ||
ఇతి శ్రీఅనంతరామదీక్షితవర్య విరచితం గర్భరక్షాంబికా స్తోత్రం ||

శ్రీ గౌరీ దశకం

లీలాలబ్ధస్థాపితలుప్తాఖిలలోకాం
లోకాతీతైర్యోగిభిరంతశ్చిరమృగ్యాం |
బాలాదిత్యశ్రేణిసమానద్యుతిపుంజాం
గౌరీమంబామంబురుహాక్షీమహమీడే || 1 ||
ప్రత్యాహారధ్యానసమాధిస్థితిభాజాం
నిత్యం చిత్తే నిర్వృతికాష్ఠాం కలయంతీం |
సత్యజ్ఞానానందమయీం తాం తనురూపాం
గౌరీమంబామంబురుహాక్షీమహమీడే || 2 ||
చంద్రాపీడానందితమందస్మితవక్త్రాం
చంద్రాపీడాలంకృతనీలాలకభారాం |
ఇంద్రోపేంద్రాద్యర్చితపాదాంబుజయుగ్మాం
గౌరీమంబామంబురుహాక్షీమహమీడే || 3 ||
ఆదిక్షాంతామక్షరమూర్త్యా విలసంతీం
భూతే భూతే భూతకదంబప్రసవిత్రీం |
శబ్దబ్రహ్మానందమయీం తాం తటిదాభాం
గౌరీమంబామంబురుహాక్షీమహమీడే || 4 ||
మూలాధారాదుత్థితవీథ్యా విధిరంధ్రం
సౌరం చాంద్రం వ్యాప్య విహారజ్వలితాంగీం |
యేయం సూక్ష్మాత్సూక్ష్మతనుస్తాం సుఖరూపాం
గౌరీమంబామంబురుహాక్షీమహమీడే || 5 ||
నిత్యః శుద్ధో నిష్కల ఏకో జగదీశః
సాక్షీ యస్యాః సర్గవిధౌ సంహరణే చ |
విశ్వత్రాణక్రీడనలోలాం శివపత్నీం
గౌరీమంబామంబురుహాక్షీమహమీడే || 6 ||
యస్యాః కుక్షౌ లీనమఖండం జగదండం
భూయో భూయః ప్రాదురభూదుత్థితమేవ |
పత్యా సార్ధం తాం రజతాద్రౌ విహరంతీం
గౌరీమంబామంబురుహాక్షీమహమీడే || 7 ||
యస్యామోతం ప్రోతమశేషం మణిమాలా-
-సూత్రే యద్వత్కాపి చరం చాప్యచరం చ |
తామధ్యాత్మజ్ఞానపదవ్యా గమనీయాం
గౌరీమంబామంబురుహాక్షీమహమీడే || 8 ||
నానాకారైః శక్తికదంబైర్భువనాని
వ్యాప్య స్వైరం క్రీడతి యేయం స్వయమేకా |
కల్యాణీం తాం కల్పలతామానతిభాజాం
గౌరీమంబామంబురుహాక్షీమహమీడే || 9 ||
ఆశాపాశక్లేశవినాశం విదధానాం
పాదాంభోజధ్యానపరాణాం పురుషాణాం |
ఈశామీశార్ధాంగహరాం తామభిరామాం
గౌరీమంబామంబురుహాక్షీమహమీడే || 10 ||
ప్రాతఃకాలే భావవిశుద్ధః ప్రణిధానా-
-ద్భక్త్యా నిత్యం జల్పతి గౌరీదశకం యః |
వాచాం సిద్ధిం సంపదమగ్ర్యాం శివభక్తిం
తస్యావశ్యం పర్వతపుత్రీ విదధాతి || 11 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ గౌరీ దశకం |

శ్రీ మంగళగౌరీ స్తోత్రం

దేవి త్వదీయచరణాంబుజరేణు గౌరీం
భాలస్థలీం వహతి యః ప్రణతిప్రవీణః |
జన్మాంతరేఽపి రజనీకరచారులేఖా
తాం గౌరయత్యతితరాం కిల తస్య పుంసః || 1 ||
శ్రీమంగళే సకలమంగళజన్మభూమే
శ్రీమంగళే సకలకల్మషతూలవహ్నే |
శ్రీమంగళే సకలదానవదర్పహంత్రి
శ్రీమంగళేఽఖిలమిదం పరిపాహి విశ్వం || 2 ||
విశ్వేశ్వరి త్వమసి విశ్వజనస్య కర్త్రీ
త్వం పాలయిత్ర్యసి తథా ప్రళయేఽపి హంత్రీ |
త్వన్నామకీర్తనసముల్లసదచ్ఛపుణ్యా
స్రోతస్వినీ హరతి పాతకకూలవృక్షాన్ || 3 ||
మాతర్భవాని భవతీ భవతీవ్రదుఃఖ-
-సంభారహారిణి శరణ్యమిహాస్తి నాన్యా |
ధన్యాస్త ఏవ భువనేషు త ఏవ మాన్యా
యేషు స్ఫురేత్తవశుభః కరుణాకటాక్షః || 4 ||
యే త్వా స్మరంతి సతతం సహజప్రకాశాం
కాశీపురీస్థితిమతీం నతమోక్షలక్ష్మీం |
తాం సంస్మరేత్స్మరహరో ధృతశుద్ధబుద్ధీ-
-న్నిర్వాణరక్షణవిచక్షణపాత్రభూతాన్ || 5 ||
మాతస్తవాంఘ్రియుగళం విమలం హృదిస్థం
యస్యాస్తి తస్య భువనం సకలం కరస్థం |
యో నామతేజ ఏతి మంగళగౌరి నిత్యం
సిద్ధ్యష్టకం న పరిముంచతి తస్య గేహం || 6 ||
త్వం దేవి వేదజననీ ప్రణవస్వరూపా
గాయత్ర్యసి త్వమసి వై ద్విజకామధేనుః |
త్వం వ్యాహృతిత్రయమిహాఽఖిలకర్మసిద్ధ్యై
స్వాహాస్వధాసి సుమనః పితృతృప్తిహేతుః || 7 ||
గౌరి త్వమేవ శశిమౌళిని వేధసి త్వం
సావిత్ర్యసి త్వమసి చక్రిణి చారులక్ష్మీః |
కాశ్యాం త్వమస్యమలరూపిణి మోక్షలక్ష్మీః
త్వం మే శరణ్యమిహ మంగళగౌరి మాతః || 8 ||
స్తుత్వేతి తాం స్మరహరార్ధశరీరశోభాం
శ్రీమంగళాష్టక మహాస్తవనేన భానుః |
దేవీం చ దేవమసకృత్పరితః ప్రణంయ
తూష్ణీం బభూవ సవితా శివయోః పురస్తాత్ || 9 ||
ఇతి శ్రీస్కాందపురాణే కాశీఖండే రవికృత శ్రీమంగళగౌరీ స్తోత్రం |

చతుఃషష్టి యోగినీ నామ స్తోత్రం 1

చతుఃషష్టి యోగినీ నామ స్తోత్రం అనేది 64 శక్తి రూపాల్ని స్తుతించే ఒక స్తోత్రం. దీనిని చదవటం వాళ్ళ జీవితంలో తెలిసో తెలియకో చేసిన పాపాలు నాశనం అవుతాయని భక్తుల విశ్వాసం.

గజాస్యా సింహవక్త్రా చ గృధ్రాస్యా కాకతుండికా |
ఉష్ట్రాస్యాఽశ్వఖరగ్రీవా వారాహాస్యా శివాననా || 1 ||

ఉలూకాక్షీ ఘోరరవా మాయూరీ శరభాననా |
కోటరాక్షీ చాష్టవక్త్రా కుబ్జా చ వికటాననా || 2 ||

శుష్కోదరీ లలజ్జిహ్వా శ్వదంష్ట్రా వానరాననా |
ఋక్షాక్షీ కేకరాక్షీ చ బృహత్తుండా సురాప్రియా || 3 ||

కపాలహస్తా రక్తాక్షీ శుకీ శ్యేనీ కపోతికా |
పాశహస్తా దండహస్తా ప్రచండా చండవిక్రమా || 4 ||

శిశుఘ్నీ పాశహంత్రీ చ కాలీ రుధిరపాయినీ |
వసాపానా గర్భభక్షా శవహస్తాఽఽంత్రమాలికా || 5 ||

ఋక్షకేశీ మహాకుక్షిర్నాగాస్యా ప్రేతపృష్ఠకా |
దగ్ధశూకధరా క్రౌంచీ మృగశృంగా వృషాననా || 6 ||

ఫాటితాస్యా ధూంరశ్వాసా వ్యోమపాదోర్ధ్వదృష్టికా |
తాపినీ శోషిణీ స్థూలఘోణోష్ఠా కోటరీ తథా || 7 ||

విద్యుల్లోలా బలాకాస్యా మార్జారీ కటపూతనా |
అట్టహాస్యా చ కామాక్షీ మృగాక్షీ చేతి తా మతాః || 8 ||

ఫలశ్రుతిః –
చతుఃషష్టిస్తు యోగిన్యః పూజితా నవరాత్రకే |
దుష్టబాధాం నాశయంతి గర్భబాలాదిరక్షికాః || 9 ||

న డాకిన్యో న శాకిన్యో న కూష్మాండా న రాక్షసాః |
తస్య పీడాం ప్రకుర్వంతి నామాన్యేతాని యః పఠేత్ || 10 ||

రణే రాజకులే వాపి వివాదే జయదాన్యపి |
బలిపూజోపహారైశ్చ ధూపదీపసమర్పణైః |
క్షిప్రం ప్రసన్నా యోగిన్యో ప్రయచ్ఛేయుర్మనోరథాన్ || 11 ||

చతుఃషష్టి యోగినీ నామ స్తోత్రం 2

చతుఃషష్టి యోగినీ నామ స్తోత్రం అనేది 64 శక్తి రూపాల్ని స్తుతించే ఒక స్తోత్రం. దీనిని చదవటం వాళ్ళ జీవితంలో తెలిసో తెలియకో చేసిన పాపాలు నాశనం అవుతాయని భక్తుల నమ్మకం.

దివ్యయోగీ మహాయోగీ సిద్ధయోగీ గణేశ్వరీ |
ప్రేతాక్షీ డాకినీ కాలీ కాలరాత్రీ నిశాచరీ || 1 ||

హుంకారీ రుద్రవైతాలీ ఖర్పరీ భూతయామినీ |
ఊర్ధ్వకేశీ విరూపాక్షీ శుష్కాంగీ మాంసభోజినీ || 2 ||

ఫేత్కారీ వీరభద్రాక్షీ ధూంరాక్షీ కలహప్రియా |
రక్తా చ ఘోరరక్తాక్షీ విరూపాక్షీ భయంకరీ || 3 ||

చౌరికా మారికా చండీ వారాహీ ముండధారిణీ |
భైరవీ చక్రిణీ క్రోధా దుర్ముఖీ ప్రేతవాహినీ || 4 ||

కంటకీ దీర్ఘలంబోష్ఠీ మాలినీ మంత్రయోగినీ |
కాలాగ్ని మోహినీ చక్రీ కంకాలీ భువనేశ్వరీ || 5 ||

కుండలా తాలకీ లక్ష్మీ యమదూతీ కరాలినీ |
కౌశికీ భక్షిణీ యక్షీ కౌమారీ యంత్రవాహినీ || 6 ||

విశాలా కాముకీ వ్యాఘ్రీ యక్షిణీ ప్రేతభూషణీ |
ధూర్జటా వికటీ ఘోరా కపాలీ విషలాంగలీ || 7 ||

చతుష్షష్టిః సమాఖ్యాతా యోగిన్యో హి వరప్రదాః |
త్రైలోక్యపూజితా నిత్యం దేవమానుషయోగిభిః || 8 ||

ఇతి చతుష్షష్టియోగినీ నామ స్తోత్రం |