KRISHNA Stotras & Hymns - Read Sacred Verses

శ్రీ కృష్ణచంద్రాష్టకం

శ్రీ కృష్ణచంద్రాష్టకం.

Telugu

శ్రీ కృష్ణచంద్రాష్టకం

మహానీలమేఘాతిభవ్యం సుహాసం
శివబ్రహ్మదేవాదిభిః సంస్తుతం చ |
రమామందిరం దేవనందాపదాహం
భజే రాధికావల్లభం కృష్ణచంద్రం || 1 ||
రసం వేదవేదాంతవేద్యం దురాపం
సుగంయం తదీయాదిభిర్దానవఘ్నం |
చలత్కుండలం సోమవంశప్రదీపం
భజే రాధికావల్లభం కృష్ణచంద్రం || 2 ||
యశోదాదిసంలాలితం పూర్ణకామం
దృశో రంజనం ప్రాకృతస్థస్వరూపం |
దినాంతే సమాయాంతమేకాంతభక్తై-
-ర్భజే రాధికావల్లభం కృష్ణచంద్రం || 3 ||
కృపాదృష్టిసంపాతసిక్తస్వకుంజం
తదంతఃస్థితస్వీయసంయగ్దశాదం |
పునస్తత్ర తైః సత్కృతైకాంతలీలం
భజే రాధికావల్లభం కృష్ణచంద్రం || 4 ||
గృహే గోపికాభిర్ధృతే చౌర్యకాలే
తదక్ష్ణోశ్చ నిక్షిప్య దుగ్ధం చలంతం |
తదా తద్వియోగాదిసంపత్తికారం
భజే రాధికావల్లభం కృష్ణచంద్రం || 5 ||
చలత్కౌస్తుభవ్యాప్తవక్షఃప్రదేశం
మహావైజయంతీలసత్పాదయుగ్మం |
సుకస్తూరికాదీప్తభాలప్రదేశం
భజే రాధికావల్లభం కృష్ణచంద్రం || 6 ||
గవాం దోహనే దృష్టరాధాముఖాబ్జం
తదానీం చ తన్మేలనవ్యగ్రచిత్తం |
సముత్పన్నతన్మానసైకాంతభావం
భజే రాధికావల్లభం కృష్ణచంద్రం || 7 ||
అదః కృష్ణచంద్రాష్టకం ప్రేమయుక్తః
పఠేత్కృష్ణసాన్నిధ్యమాప్నోతి నిత్యం |
కలౌ యః స సంసారదుఃఖాతిరిక్తం
ప్రయాత్యేవ విష్ణోః పదం నిర్భయం తత్ || 8 ||
ఇతి శ్రీరఘునాథప్రభు విరచితం శ్రీ కృష్ణచంద్రాష్టకం ||

శ్రీ కృష్ణలహరీ స్తోత్రం

శ్రీ కృష్ణలహరీ స్తోత్రం.

Telugu

Read Stotra

శ్రీ కృష్ణలహరీ స్తోత్రం

కదా వృందారణ్యే విపులయమునాతీరపులినే
చరంతం గోవిందం హలధరసుదామాదిసహితం |
అహో కృష్ణ స్వామిన్ మధురమురళీమోహన విభో
ప్రసీదేతి క్రోశన్నిమిషమివ నేష్యామి దివసాన్ || 1 ||
కదా కాళిందీయైర్హరిచరణముద్రాంకితతటైః
స్మరన్ గోపీనాథం కమలనయనం సస్మితముఖం |
అహో పూర్ణానందాంబుజవదన భక్తైకలలన
ప్రసీదేతి క్రోశన్నిమిషమివ నేష్యామి దివసాన్ || 2 ||
కదాచిత్ఖేలంతం వ్రజపరిసరే గోపతనయైః
కుతశ్చిత్సంప్రాప్తం కిమపి లసితం గోపలలనం |
అయే రాధే కిం వా హరసి రసికే కంచుకయుగం
ప్రసీదేతి క్రోశన్నిమిషమివ నేష్యామి దివసాన్ || 3 ||
కదాచిద్గోపీనాం హసితచకితస్నిగ్ధనయనం
స్థితం గోపీవృందే నటమివ నటంతం సులలితం |
సురాధీశైః సర్వైః స్తుతపదమిదం శ్రీహరిమితి
ప్రసీదేతి క్రోశన్నిమిషమివ నేష్యామి దివసాన్ || 4 ||
కదాచిత్సచ్ఛాయాశ్రితమభిమహాంతం యదుపతిం
సమాధిస్వచ్ఛాయాంచల ఇవ విలోలైకమకరం |
అయే భక్తోదారాంబుజవదన నందస్య తనయ
ప్రసీదేతి క్రోశన్నిమిషమివ నేష్యామి దివసాన్ || 5 ||
కదాచిత్కాళింద్యాస్తటతరుకదంబే స్థితమముం
స్మయంతం సాకూతం హృతవసనగోపీసుతపదం |
అహో శక్రానందాంబుజవదన గోవర్ధనధర
ప్రసీదేతి క్రోశన్నిమిషమివ నేష్యామి దివసాన్ || 6 ||
కదాచిత్కాంతారే విజయసఖమిష్టం నృపసుతం
వదంతం పార్థేతి నృపసుత సఖే బంధురితి చ |
భ్రమంతం విశ్రాంతం శ్రితమురళిమాస్యం హరిమమీ
ప్రసీదేతి క్రోశన్నిమిషమివ నేష్యామి దివసాన్ || 7 ||
కదా ద్రక్ష్యే పూర్ణం పురుషమమలం పంకజదృశం
అహో విష్ణో యోగిన్ రసికమురళీమోహన విభో |
దయాం కర్తుం దీనే పరమకరుణాబ్ధే సముచితం
ప్రసీదేతి క్రోశన్నిమిషమివ నేష్యామి దివసాన్ || 8 ||
ఇతి శ్రీవాసుదేవానందసరస్వతీ కృత శ్రీ కృష్ణ లహరీ స్తోత్రం ||

శ్రీ కృష్ణ శరణాష్టకం

శ్రీ కృష్ణ శరణాష్టకం.

Telugu

Read Stotra

శ్రీ కృష్ణ శరణాష్టకం

సర్వసాధనహీనస్య పరాధీనస్య సర్వతః |
పాపపీనస్య దీనస్య శ్రీకృష్ణః శరణం మమ || 1 ||
సంసారసుఖసంప్రాప్తిసన్ముఖస్య విశేషతః |
బహిర్ముఖస్య సతతం శ్రీకృష్ణః శరణం మమ || 2 ||
సదా విషయకామస్య దేహారామస్య సర్వథా |
దుష్టస్వభావవామస్య శ్రీకృష్ణః శరణం మమ || 3 ||
సంసారసర్పదష్టస్య ధర్మభ్రష్టస్య దుర్మతేః |
లౌకికప్రాప్తికష్టస్య శ్రీకృష్ణః శరణం మమ || 4 ||
విస్మృతస్వీయధర్మస్య కర్మమోహితచేతసః |
స్వరూపజ్ఞానశూన్యస్య శ్రీకృష్ణః శరణం మమ || 5 ||
సంసారసింధుమగ్నస్య భగ్నభావస్య దుష్కృతేః |
దుర్భావలగ్నమనసః శ్రీకృష్ణః శరణం మమ || 6 ||
వివేకధైర్యభక్త్యాదిరహితస్య నిరంతరం |
విరుద్ధకరణాసక్తేః శ్రీకృష్ణః శరణం మమ || 7 ||
విషయాక్రాంతదేహస్య వైముఖ్యహృతసన్మతేః |
ఇంద్రియాన్వగృహీతస్య శ్రీకృష్ణః శరణం మమ || 8 ||
ఏతదష్టకపాఠేన హ్యేతదుక్తార్థభావనాత్ |
నిజాచార్యపదాంభోజసేవకోఽదైన్యమాప్నుయాత్ || 9 ||
ఇతి శ్రీహరిరాయాచార్య విరచితం శ్రీ కృష్ణ శరణాష్టకం |

శ్రీ కృష్ణ స్తవరాజః –2 (కృష్ణదాస కృతం)

శ్రీ కృష్ణ స్తవరాజః –2 (కృష్ణదాస కృతం).

Telugu

Read Stotra

శ్రీ కృష్ణ స్తవరాజః –2 (కృష్ణదాస కృతం)

అనంతకందర్పకలావిలాసం
కిశోరచంద్రం రసికేంద్రశేఖరం |
శ్యామం మహాసుందరతానిధానం
శ్రీకృష్ణచంద్రం శరణం గతోఽస్మి || 1 ||
అనంతవిద్యుద్ద్యుతిచారుపీతం
కౌశేయసంవీతనితంబబింబం |
అనంతమేఘచ్ఛవిదివ్యమూర్తిం
శ్రీకృష్ణచంద్రం శరణం గతోఽస్మి || 2 ||
మహేంద్రచాపచ్ఛవిపిచ్ఛచూఢం
కస్తూరికాచిత్రకశోభిమాలం |
మందాదరోద్ఘూర్ణవిశాలనేత్రం
శ్రీకృష్ణచంద్రం శరణం గతోఽస్మి || 3 ||
భ్రాజిష్ణుగల్లం మకరాంకితేన
విచిత్రరత్నోజ్జ్వలకుండలేన |
కోటీందులావణ్యముఖారవిందం
శ్రీకృష్ణచంద్రం శరణం గతోఽస్మి || 4 ||
వృందాటవీమంజులకుంజవాద్యం
శ్రీరాధయా సార్థముదారకేళిం |
ఆనందపుంజం లలితాదిదృశ్యం
శ్రీకృష్ణచంద్రం శరణం గతోఽస్మి || 5 ||
మహార్హకేయూరకకంకణశ్రీ-
-గ్రైవేయహారావళిముద్రికాభిః |
విభూషితం కింకిణినూపురాభ్యాం
శ్రీకృష్ణచంద్రం శరణం గతోఽస్మి || 6 ||
విచిత్రరత్నోజ్జ్వలదివ్యవాసా-
-ప్రగీతరామాగుణరూపలీలం |
ముహుర్ముహుః ప్రోదితరోమహర్షం
శ్రీకృష్ణచంద్రం శరణం గతోఽస్మి || 7 ||
శ్రీరాధికేయాధరసేవనేన
మాద్యంతముచ్చై రతికేళిలోలం |
స్మరోన్మదాంధం రసికేంద్రమౌళిం
శ్రీకృష్ణచంద్రం శరణం గతోఽస్మి || 8 ||
అంకే నిధాయ ప్రణయేన రాధాం
ముహుర్ముహుశ్చుంబితతన్ముఖేందుం |
విచిత్రవేషైః కృతతద్విభూషణం
శ్రీకృష్ణచంద్రం శరణం గతోఽస్మి || 9 ||
ఇతి శ్రీకృష్ణదాస కృత శ్రీ కృష్ణ స్తవరాజః |

శ్రీ కృష్ణ స్తవరాజః (నారద కృతం)

శ్రీ కృష్ణ స్తవరాజః (నారద కృతం).

Telugu

Read Stotra

శ్రీ కృష్ణ స్తవరాజః (నారద కృతం)

ప్రసీద భగవన్ మహ్యమజ్ఞానాత్కుంఠితాత్మనే |
తవాంఘ్రిపంకజరజోరాగిణీం భక్తిముత్తమాం || 1 ||
అజ ప్రసీద భగవన్నమితద్యుతిపంజర |
అప్రమేయ ప్రసీదాస్మద్దుఃఖహన్ పురుషోత్తమ || 2 ||
స్వసంవేద్య ప్రసీదాస్మదానందాత్మన్ననామయ |
అచింత్యసార విశ్వాత్మన్ ప్రసీద పరమేశ్వర || 3 ||
ప్రసీద తుంగ తుంగానాం ప్రసీద శివ శోభన |
ప్రసీద గుణగంభీర గంభీరాణాం మహాద్యుతే || 4 ||
ప్రసీద వ్యక్త విస్తీర్ణ విస్తీర్ణానామగోచర |
ప్రసీదార్ద్రార్ద్రజాతీనాం ప్రసీదాంతాంతదాయినాం || 5 ||
గురోర్గరీయః సర్వేశ ప్రసీదానంత దేహినాం |
జయ మాధవ మాయాత్మన్ జయ శాశ్వత శంఖభృత్ || 6 ||
జయ శంఖధర శ్రీమన్ జయ నందకనందన |
జయ చక్రగదాపాణే జయ దేవ జనార్దన || 7 ||
జయ రత్నవరాబద్ధకిరీటాక్రాంతమస్తక |
జయ పక్షిపతిచ్ఛాయానిరుద్ధార్కకరారుణ || 8 ||
నమస్తే నరకారాతే నమస్తే మధుసూదన |
నమస్తే లలితాపాంగ నమస్తే నరకాంతక || 9 ||
నమః పాపహరేశాన నమః సర్వభయాపహ |
నమః సంభూతసర్వాత్మన్ నమః సంభృతకౌస్తుభ || 10 ||
నమస్తే నయనాతీత నమస్తే భయహారక |
నమో విభిన్నవేషాయ నమః శ్రుతిపథాతిగ || 11 ||
నమస్త్రిమూర్తిభేదేన సర్గస్థిత్యంతహేతవే |
విష్ణవే త్రిదశారాతిజిష్ణవే పరమాత్మనే || 12 ||
చక్రభిన్నారిచక్రాయ చక్రిణే చక్రవల్లభ |
విశ్వాయ విశ్వవంద్యాయ విశ్వభూతానువర్తినే || 13 ||
నమోఽస్తు యోగిధ్యేయాత్మన్ నమోఽస్త్వధ్యాత్మరూపిణే |
భక్తిప్రదాయ భక్తానాం నమస్తే భక్తిదాయినే || 14 ||
పూజనం హవనం చేజ్యా ధ్యానం పశ్చాన్నమస్క్రియా |
దేవేశ కర్మ సర్వం మే భవేదారాధనం తవ || 15 ||
ఇతి హవనజపార్చాభేదతో విష్ణుపూజా-
-నియతహృదయకర్మా యస్తు మంత్రీ చిరాయ |
స ఖలు సకలకామాన్ ప్రాప్య కృష్ణాంతరాత్మా
జననమృతివిముక్తోఽప్యుత్తమాం భక్తిమేతి || 16 ||
గోగోపగోపికావీతం గోపాలం గోషు గోప్రదం |
గోపైరీడ్యం గోసహస్రైర్నౌమి గోకులనాయకం || 17 ||
ప్రీణయేదనయా స్తుత్యా జగన్నాథం జగన్మయం |
ధర్మార్థకామమోక్షాణామాప్తయే పురుషోత్తమం || 18 ||
ఇతి శ్రీనారదపాంచరాత్రే జ్ఞానామృతసారే నారద కృత శ్రీ కృష్ణ స్తవరాజః ||

శ్రీ బాలకృష్ణాష్టకం –2

శ్రీ బాలకృష్ణాష్టకం –2.

Telugu

Read Stotra

శ్రీ బాలకృష్ణాష్టకం –2

శ్రీమన్నందయశోదాహృదయస్థితభావతత్పరో భగవాన్ |
పుత్రీకృతనిజరూపః స జయతి పురతః కృపాళుర్బాలకృష్ణః || 1 ||
కథమపి రింగణమకరోదంగణగతజానుఘర్షణోద్యుక్తః |
కటితటకింకిణిజాలస్వనశంకితమానసః సదా హ్యాస్తే || 2 ||
వికసితపంకజనయనః ప్రకటితహర్షః సదైవ ధూసరాంగః |
పరిగచ్ఛతి కటిభంగప్రసరీకృతపాణియుగ్మాభ్యాం || 3 ||
ఉపలక్షితదధిభాండః స్ఫురితబ్రహ్మాండవిగ్రహో భుంక్తే |
ముష్టీకృతనవనీతః పరమపునీతో ముగ్ధభావాత్మా || 4 ||
నంరీకృతవిధువదనః ప్రకటీకృతచౌర్యగోపనాయాసః |
స్వాంబోత్సంగవిలాసః క్షుధితః సంప్రతి దృశ్యతే స్తనార్థీ || 5 ||
సింహనఖాకృతిభూషణభూషితహృదయః సుశోభతే నిత్యం |
కుండలమండితగండః సాంజననయనో నిరంజనః శేతే || 6 ||
కార్యాసక్తయశోదాగృహకర్మావరోధకః సదాస్తే |
తస్యాః స్వాంతనివిష్టప్రణయప్రభాజనో యతోఽయం || 7 ||
ఇత్థం వ్రజపతితరుణీ నమనీయం బ్రహ్మరుద్రాద్యైః |
కమనీయం నిజసూనుం లాలయతి స్మ ప్రత్యహం ప్రీత్యా || 8 ||
శ్రీమద్వల్లభకృపయా విశదీకృతమేతదష్టకం పఠేద్యః |
తస్య దయానిధికృష్ణో భక్తిః ప్రేమైకలక్షణా శీఘ్రం || 9 ||
ఇతి శ్రీకృష్ణదాస కృతం శ్రీ బాలకృష్ణాష్టకం |

శ్రీ కృష్ణాష్టకం 4

శ్రీ కృష్ణాష్టకం 4.

Telugu

Read Stotra

శ్రీ కృష్ణాష్టకం 4

భజే వ్రజైకమండనం సమస్తపాపఖండనం
స్వభక్తచిత్తరంజనం సదైవ నందనందనం |
సుపిచ్ఛగుచ్ఛమస్తకం సునాదవేణుహస్తకం
అనంగరంగసాగరం నమామి కృష్ణనాగరం || 1 ||
మనోజగర్వమోచనం విశాలలోలలోచనం
విధూతగోపశోచనం నమామి పద్మలోచనం |
కరారవిందభూధరం స్మితావలోకసుందరం
మహేంద్రమానదారణం నమామి కృష్ణవారణం || 2 ||
కదంబసూనకుండలం సుచారుగండమండలం
వ్రజాంగనైకవల్లభం నమామి కృష్ణదుర్లభం |
యశోదయా సమోదయా సగోపయా సనందయా
యుతం సుఖైకదాయకం నమామి గోపనాయకం || 3 ||
సదైవ పాదపంకజం మదీయ మానసే నిజం
దధానముక్తమాలకం నమామి నందబాలకం |
సమస్తదోషశోషణం సమస్తలోకపోషణం
సమస్తగోపమానసం నమామి నందలాలసం || 4 ||
భువో భరావతారకం భవాబ్ధికర్ణధారకం
యశోమతీకిశోరకం నమామి చిత్తచోరకం |
దృగంతకాంతభంగినం సదా సదాలసంగినం
దినే దినే నవం నవం నమామి నందసంభవం || 5 ||
గుణాకరం సుఖాకరం కృపాకరం కృపాపరం
సురద్విషన్నికందనం నమామి గోపనందనం |
నవీనగోపనాగరం నవీనకేలిలంపటం
నమామి మేఘసుందరం తడిత్ప్రభాలసత్పటం || 6 ||
సమస్తగోపనందనం హృదంబుజైకమోదనం
నమామి కుంజమధ్యగం ప్రసన్నభానుశోభనం |
నికామకామదాయకం దృగంతచారుసాయకం
రసాలవేణుగాయకం నమామి కుంజనాయకం || 7 ||
విదగ్ధగోపికామనోమనోజ్ఞతల్పశాయినం
నమామి కుంజకాననే ప్రవృద్ధవహ్నిపాయినం |
కిశోరకాంతిరంజితం దృగంజనం సుశోభితం
గజేంద్రమోక్షకారిణం నమామి శ్రీవిహారిణం || 8 ||
యదా తదా యథా తథా తథైవ కృష్ణసత్కథా
మయా సదైవ గీయతాం తథా కృపా విధీయతాం |
ప్రమాణికాష్టకద్వయం జపత్యధీత్య యః పుమాన్
భవేత్ స నందనందనే భవే భవే సుభక్తిమాన్ || 9 ||
ఇతి శ్రీమచ్ఛంకరాచార్యకృతం శ్రీ కృష్ణాష్టకం ||

శ్రీ కృష్ణాష్టకం 3

శ్రీ కృష్ణాష్టకం 3.

Telugu

Read Stotra

శ్రీ కృష్ణాష్టకం 3

శ్రీగోపగోకులవివర్ధననందసూనో
రాధాపతే వ్రజజనార్తిహరావతార |
మిత్రాత్మజాతటవిహారణదీనబంధో
దామోదరాచ్యుత విభో మమ దేహి దాస్యం || 1 ||
శ్రీరాధికారమణ మాధవ గోకులేంద్ర-
-సూనో యదూత్తమ రమార్చితపాదపద్మ |
శ్రీశ్రీనివాస పురుషోత్తమ విశ్వమూర్తే
గోవింద యాదవపతే మమ దేహి దాస్యం || 2 ||
గోవర్ధనోద్ధరణ గోకులవల్లభాద్య-
-వంశోద్భటాలయ హరేఽఖిలలోకనాథ |
శ్రీవాసుదేవ మధుసూదన విశ్వనాథ
విశ్వేశ గోకులపతే మమ దేహి దాస్యం || 3 ||
రాసోత్సవప్రియబలానుజ సత్త్వరాశే
భక్తానుకంపితభవార్తిహరాధినాథ |
విజ్ఞానధామ గుణధామ కిశోరమూర్తే
సర్వేశ మంగళతనో మమ దేహి దాస్యం || 4 ||
సద్ధర్మపాల గరుడాసన యాదవేంద్ర
బ్రహ్మణ్యదేవ యదునందన భక్తిదాన |
సంకర్షణప్రియ కృపాలయ దేవ విష్ణో
సత్యప్రతిజ్ఞ భగవన్ మమ దేహి దాస్యం || 5 ||
గోపీజనప్రియతమ క్రియయైకలభ్య
రాధావరప్రియ వరేణ్య శరణ్యనాథ |
ఆశ్చర్యబాల వరదేశ్వర పూర్ణకామ
విద్వత్తమాశ్రయ ప్రభో మమ దేహి దాస్యం || 6 ||
కందర్పకోటిమదహారణ తీర్థకీర్తే
విశ్వైకవంద్య కరుణార్ణవతీర్థపాద |
సర్వజ్ఞ సర్వవరదాశ్రయకల్పవృక్ష
నారాయణాఖిలగురో మమ దేహి దాస్యం || 7 ||
వృందావనేశ్వర ముకుంద మనోజ్ఞవేష
వంశీవిభూషితకరాంబుజ పద్మనేత్ర |
విశ్వేశ కేశవ వ్రజోత్సవ భక్తివశ్య
దేవేశ పాండవపతే మమ దేహి దాస్యం || 8 ||
శ్రీకృష్ణస్తవరత్నమష్టకమిదం సర్వార్థదం శృణ్వతాం
భక్తానాం చ ప్రియం హరేశ్చ నితరాం యో వై పఠేత్పావనం |
తస్యాసౌ వ్రజరాజసూనురతులాం భక్తిం స్వపాదాంబుజే
సత్సేవ్యే ప్రదదాతి గోకులపతిః శ్రీరాధికావల్లభః || 9 ||
ఇతి శ్రీమద్వల్లభాచార్య విరచితం శ్రీ కృష్ణాష్టకం ||

శ్రీ కృష్ణాష్టకం 2

శ్రీ కృష్ణాష్టకం 2.

Telugu

Read Stotra

శ్రీ కృష్ణాష్టకం 2

శ్రియాశ్లిష్టో విష్ణుః స్థిరచరగురుర్వేదవిషయో
ధియాం సాక్షీ శుద్ధో హరిరసురహంతాబ్జనయనః |
గదీ శంఖీ చక్రీ విమలవనమాలీ స్థిరరుచిః
శరణ్యో లోకేశో మమ భవతు కృష్ణోఽక్షివిషయః || 1 ||
యతః సర్వం జాతం వియదనిలముఖ్యం జగదిదం
స్థితౌ నిఃశేషం యోఽవతి నిజసుఖాంశేన మధుహా |
లయే సర్వం స్వస్మిన్హరతి కలయా యస్తు స విభుః
శరణ్యో లోకేశో మమ భవతు కృష్ణోఽక్షివిషయః || 2 ||
అసూనాయంయాదౌ యమనియమముఖ్యైః సుకరణై-
-ర్నిరుద్ధ్యేదం చిత్తం హృది విలయమానీయ సకలం |
యమీడ్యం పశ్యంతి ప్రవరమతయో మాయినమసౌ
శరణ్యో లోకేశో మమ భవతు కృష్ణోఽక్షివిషయః || 3 ||
పృథివ్యాం తిష్ఠన్యో యమయతి మహీం వేద న ధరా
యమిత్యాదౌ వేదో వదతి జగతామీశమమలం |
నియంతారం ధ్యేయం మునిసురనృణాం మోక్షదమసౌ
శరణ్యో లోకేశో మమ భవతు కృష్ణోఽక్షివిషయః || 4 ||
మహేంద్రాదిర్దేవో జయతి దితిజాన్యస్య బలతో
న కస్య స్వాతంత్ర్యం క్వచిదపి కృతౌ యత్కృతిమృతే |
బలారాతేర్గర్వం పరిహరతి యోఽసౌ విజయినః
శరణ్యో లోకేశో మమ భవతు కృష్ణోఽక్షివిషయః || 5 ||
వినా యస్య ధ్యానం వ్రజతి పశుతాం సూకరముఖాం
వినా యస్య జ్ఞానం జనిమృతిభయం యాతి జనతా |
వినా యస్య స్మృత్యా కృమిశతజనిం యాతి స విభుః
శరణ్యో లోకేశో మమ భవతు కృష్ణోఽక్షివిషయః || 6 ||
నరాతంకోట్టంకః శరణశరణో భ్రాంతిహరణో
ఘనశ్యామో వామో వ్రజశిశువయస్యోఽర్జునసఖః |
స్వయంభూర్భూతానాం జనక ఉచితాచారసుఖదః
శరణ్యో లోకేశో మమ భవతు కృష్ణోఽక్షివిషయః || 7 ||
యథా ధర్మగ్లానిర్భవతి జగతాం క్షోభకరణీ
తదా లోకస్వామీ ప్రకటితవపుః సేతుధృదజః |
సతాం ధాతా స్వచ్ఛో నిగమగణగీతో వ్రజపతిః
శరణ్యో లోకేశో మమ భవతు కృష్ణోఽక్షివిషయః || 8 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీ కృష్ణాష్టకం |

శ్రీ కృష్ణాష్టకం

శ్రీ కృష్ణాష్టకం.

Telugu

Read Stotra

శ్రీ కృష్ణాష్టకం

వసుదేవసుతం దేవం కంసచాణూరమర్దనం |
దేవకీపరమానందం కృష్ణం వందే జగద్గురుం || 1 ||
అతసీపుష్పసంకాశం హారనూపురశోభితం |
రత్నకంకణకేయూరం కృష్ణం వందే జగద్గురుం || 2 ||
కుటిలాలకసంయుక్తం పూర్ణచంద్రనిభాననం |
విలసత్కుండలధరం కృష్ణం వందే జగద్గురుం || 3 ||
మందారగంధసంయుక్తం చారుహాసం చతుర్భుజం |
బర్హిపింఛావచూడాంగం కృష్ణం వందే జగద్గురుం || 4 ||
ఉత్ఫుల్లపద్మపత్రాక్షం నీలజీమూతసన్నిభం |
యాదవానాం శిరోరత్నం కృష్ణం వందే జగద్గురుం || 5 ||
రుక్మిణీకేళిసంయుక్తం పీతాంబరసుశోభితం |
అవాప్తతులసీగంధం కృష్ణం వందే జగద్గురుం || 6 ||
గోపికానాం కుచద్వంద్వకుంకుమాంకితవక్షసం |
శ్రీనికేతం మహేష్వాసం కృష్ణం వందే జగద్గురుం || 7 ||
శ్రీవత్సాంకం మహోరస్కం వనమాలావిరాజితం |
శంఖచక్రధరం దేవం కృష్ణం వందే జగద్గురుం || 8 ||
కృష్ణాష్టకమిదం పుణ్యం ప్రాతరుత్థాయ యః పఠేత్ |
కోటిజన్మకృతం పాపం స్మరణేన వినశ్యతి || 9 ||

శ్రీ కృష్ణ జన్మ శ్లోకాః (శ్రీమద్భాగవతే)

శ్రీ కృష్ణ జన్మ శ్లోకాః (శ్రీమద్భాగవతే).

Telugu

Read Stotra

శ్రీ కృష్ణ జన్మ శ్లోకాః (శ్రీమద్భాగవతే)

శ్రీశుక ఉవాచ |
అథ సర్వగుణోపేతః కాలః పరమశోభనః |
యర్హ్యేవాజనజన్మర్క్షం శాంతర్క్షగ్రహతారకం || 1 ||
దిశః ప్రసేదుర్గగనం నిర్మలోడుగణోదయం |
మహీ మంగళభూయిష్ఠపురగ్రామవ్రజాకరా || 2 ||
నద్యః ప్రసన్నసలిలా హ్రదా జలరుహశ్రియః |
ద్విజాలికులసన్నాదస్తబకా వనరాజయః || 3 ||
వవౌ వాయుః సుఖస్పర్శః పుణ్యగంధవహః శుచిః |
అగ్నయశ్చ ద్విజాతీనాం శాంతాస్తత్ర సమింధత || 4 ||
మనాంస్యాసన్ ప్రసన్నాని సాధూనామసురద్రుహాం |
జాయమానేఽజనే తస్మిన్ నేదుర్దుందుభయో దివి || 5 ||
జగుః కిన్నరగంధర్వాస్తుష్టువుః సిద్ధచారణాః |
విద్యాధర్యశ్చ ననృతురప్సరోభిః సమం తదా || 6 ||
ముముచుర్మునయో దేవాః సుమనాంసి ముదాన్వితాః |
మందం మందం జలధరా జగర్జురనుసాగరం || 7 ||
నిశీథే తమ ఉద్భూతే జాయమానే జనర్దనే |
దేవక్యాం దేవరూపిణ్యాం విష్ణుః సర్వగుహాశయః |
ఆవిరాసీద్యథా ప్రాచ్యాం దిశీందురివ పుష్కలః || 8 ||
తమద్భుతం బాలకమంబుజేక్షణం
చతుర్భుజం శంఖగదార్యుదాయుధం |
శ్రీవత్సలక్షం గలశోభికౌస్తుభం
పీతాంబరం సాంద్రపయోదసౌభగం || 9 ||
మహార్హవైదూర్యకిరీటకుండల-
-త్విషా పరిష్వక్తసహస్రకుంతలం |
ఉద్దామకాంచ్యంగదకంకాణాదిభి-
-ర్విరోచమానం వసుదేవ ఐక్షత || 10 ||
స విస్మయోత్ఫుల్లవిలోచనో హరిం
సుతం విలోక్యానకదుందుభిస్తదా |
కృష్ణావతారోత్సవసంభ్రమోఽస్పృశన్
ముదా ద్విజేభ్యోఽయుతమాప్లుతో గవాం || 11 ||
అథైనమస్తౌదవధార్య పూరుషం
పరం నతాంగః కృతధీః కృతాంజలిః |
సర్వోచిషా భారత సూతికాగృహం
విరోచయంతం గతభీః ప్రభావవిత్ || 12 ||
వసుదేవ ఉవాచ |
విదితోఽసి భవాన్ సాక్షాత్ పురుషః ప్రకృతేః పరః |
కేవలానుభవానందస్వరూపః సర్వబుద్ధిదృక్ || 13 ||
స ఏవ స్వప్రకృత్యేదం సృష్ట్వాగ్రే త్రిగుణాత్మకం |
తదను త్వం హ్యప్రవిష్టః ప్రవిష్ట ఇవ భావ్యసే || 14 ||
యథేమేఽవికృతా భావాస్తథా తే వికృతైః సహ |
నానావీర్యాః పృథగ్భూతా విరాజం జనయంతి హి || 15 ||
సన్నిపత్య సముత్పాద్య దృశ్యంతేఽనుగతా ఇవ |
ప్రాగేవ విద్యమానత్వాన్న తేషామిహ సంభవః || 16 ||
ఏవం భవాన్ బుద్ధ్యనుమేయలక్షణై-
-ర్గ్రాహ్యైర్గుణైః సన్నపి తద్గుణాగ్రహః |
అనావృతత్వాద్బహిరంతరం న తే
సర్వస్య సర్వాత్మన ఆత్మవస్తునః || 17 ||
య ఆత్మనో దృశ్యగుణేషు సన్నితి
వ్యవస్యతే స్వవ్యతిరేకతోఽబుధః |
వినానువాదం న చ తన్మనీషితం
సంయగ్యతస్త్యక్తముపాదదత్ పుమాన్ || 18 ||
త్వత్తోఽస్య జన్మస్థితిసంయమాన్ విభో
వదంత్యనీహాదగుణాదవిక్రియాత్ |
త్వయీశ్వరే బ్రహ్మణి నో విరుధ్యతే
త్వదాశ్రయత్వాదుపచర్యతే గుణైః || 19 ||
స త్వం త్రిలోకస్థితయే స్వమాయయా
బిభర్షి శుక్లం ఖలు వర్ణమాత్మనః |
సర్గాయ రక్తం రజసోపబృంహితం
కృష్ణం చ వర్ణం తమసా జనాత్యయే || 20 ||
త్వమస్య లోకస్య విభో రిరక్షిషు-
-ర్గృహేఽవతీర్ణోఽసి మమాఖిలేశ్వర |
రాజన్యసంజ్ఞాసురకోటియూథపై-
-ర్నిర్వ్యూహ్యమానా నిహనిష్యసే చమూః || 21 ||
అయం త్వసభ్యస్తవ జన్మ నౌ గృహే
శ్రుత్వాగ్రజాంస్తే న్యవధీత్ సురేశ్వర |
స తేఽవతారం పురుషైః సమర్పితం
శ్రుత్వాధునైవాభిసరత్యుదాయుధః || 22 ||
శ్రీశుక ఉవాచ |
అథైనమాత్మజం వీక్ష్య మహాపురుషలక్షణం |
దేవకీ తముపాధావత్ కంసాద్భీతా శుచిస్మితా || 23 ||
దేవక్యువాచ |
రూపం యత్ తత్ ప్రాహురవ్యక్తమాద్యం
బ్రహ్మ జ్యోతిర్నిర్గుణం నిర్వికారం |
సత్తామాత్రం నిర్విశేషం నిరీహం
స త్వం సాక్షాద్విష్ణురధ్యాత్మదీపః || 24 ||
నష్టే లోకే ద్విపరార్ధావసానే
మహాభూతేష్వాదిభూతం గతేషు |
వ్యక్తేఽవ్యక్తం కాలవేగేన యాతే
భవానేకః శిష్యతే శేషసంజ్ఞః || 25 ||
యోఽయం కాలస్తస్య తేఽవ్యక్తబంధో
చేష్టామాహుశ్చేష్టతే యేన విశ్వం |
నిమేషాదిర్వత్సరాంతో మహీయాం-
-స్తం త్వేశానం క్షేమధామ ప్రపద్యే || 26 ||
మర్త్యో మృత్యువ్యాలభీతః పలాయన్
లోకాన్ సర్వాన్నిర్భయం నాధ్యగచ్ఛత్ |
త్వత్పాదాబ్జం ప్రాప్య యదృచ్ఛయాద్య
స్వస్థః శేతే మృత్యురస్మాదపైతి || 27 ||
స త్వం ఘోరాదుగ్రసేనాత్మజాన్న-
-స్త్రాహి త్రస్తాన్ భృత్యవిత్రాసహాసి |
రూపం చేదం పౌరుషం ధ్యానధిష్ణ్యం
మా ప్రత్యక్షం మాంసదృశాం కృషీష్ఠాః || 28 ||
జన్మ తే మయ్యసౌ పాపో మా విద్యాన్మధుసూదన |
సముద్విజే భవద్ధేతోః కంసాదహమధీరధీః || 29 ||
ఉపసంహర విశ్వాత్మన్నదో రూపమలౌకికం |
శంఖచక్రగదాపద్మశ్రియా జుష్టం చతుర్భుజం || 30 ||
విశ్వం యదేతత్ స్వతనౌ నిశాంతే
యథావకాశం పురుషః పరో భవాన్ |
బిభర్తి సోఽయం మమ గర్భగోఽభూ-
-దహో నృలోకస్య విడంబనం హి తత్ || 31 ||
శ్రీభగవానువాచ |
త్వమేవ పూర్వసర్గేఽభూః పృశ్నిః స్వాయంభువే సతి |
తదాయం సుతపా నామ ప్రజాపతిరకల్మషః || 32 ||
యువాం వై బ్రహ్మణాఽఽదిష్టౌ ప్రజాసర్గే యదా తతః |
సన్నియంయేంద్రియగ్రామం తేపాథే పరమం తపః || 33 ||
వర్షవాతాతపహిమఘర్మకాలగుణానను |
సహమానౌ శ్వాసరోధవినిర్ధూతమనోమలౌ || 34 ||
శీర్ణపర్ణానిలాహారావుపశాంతేన చేతసా |
మత్తః కామానభీప్సంతౌ మదారాధనమీహతుః || 35 ||
ఏవం వాం తప్యతోస్తీవ్రం తపః పరమదుష్కరం |
దివ్యవర్షసహస్రాణి ద్వాదశేయుర్మదాత్మనోః || 36 ||
తదా వాం పరితుష్టోఽహమమునా వపుషానఘే |
తపసా శ్రద్ధయా నిత్యం భక్త్యా చ హృది భావితః || 37 ||
ప్రాదురాసం వరదరాడ్యువయోః కామదిత్సయా |
వ్రియతాం వర ఇత్యుక్తే మాదృశో వాం వృతః సుతః || 38 ||
అజుష్టగ్రాంయవిషయావనపత్యౌ చ దంపతీ |
న వవ్రాథేఽపవర్గం మే మోహితౌ మమ మాయయా || 39 ||
గతే మయి యువాం లబ్ధ్వా వరం మత్సదృశం సుతం |
గ్రాంయాన్ భోగానభుంజాథాం యువాం ప్రాప్తమనోరథౌ || 40 ||
అదృష్ట్వాన్యతమం లోకే శీలౌదార్యగుణైః సమం |
అహం సుతో వామభవం పృశ్నిగర్భ ఇతి శ్రుతః || 41 ||
తయోర్వాం పునరేవాహమదిత్యామాస కశ్యపాత్ |
ఉపేంద్ర ఇతి విఖ్యాతో వామనత్వాచ్చ వామనః || 42 ||
తృతీయేఽస్మిన్ భవేఽహం వై తేనైవ వపుషాథ వాం |
జాతో భూయస్తయోరేవ సత్యం మే వ్యాహృతం సతి || 43 ||
ఏతద్వాం దర్శితం రూపం ప్రాగ్జన్మస్మరణాయ మే |
నాన్యథా మద్భవం జ్ఞానం మర్త్యలింగేన జాయతే || 44 ||
యువాం మాం పుత్రభావేన బ్రహ్మభావేన చాసకృత్ |
చింతయంతౌ కృతస్నేహౌ యాస్యేథే మద్గతిం పరాం || 45 ||
శ్రీశుక ఉవాచ |
ఇత్యుక్త్వాఽఽసీద్ధరిస్తూష్ణీం భగవానాత్మమాయయా |
పిత్రోః సంపశ్యతోః సద్యో బభూవ ప్రాకృతః శిశుః || 46 ||
తతశ్చ శౌరిర్భగవత్ప్రచోదితః
సుతం సమాదాయ స సూతికాగృహాత్ |
యదా బహిర్గంతుమియేష తర్హ్యజా
యా యోగమాయాజని నందజాయయా || 47 ||
తయా హృతప్రత్యయసర్వవృత్తిషు
ద్వాఃస్థేషు పౌరేష్వపి శాయితేష్వథ |
ద్వారస్తు సర్వాః పిహితా దురత్యయా
బృహత్కపాటాయసకీలశృంఖలైః || 48 ||
తాః కృష్ణవాహే వసుదేవ ఆగతే
స్వయం వ్యవర్యంత యథా తమో రవేః |
వవర్ష పర్జన్య ఉపాంశుగర్జితః
శేషోఽన్వగాద్వారి నివారయన్ ఫణైః || 49 ||
మఘోని వర్షత్యసకృద్యమానుజా
గంభీరతోయౌఘజవోర్మిఫేనిలా |
భయానకావర్తశతాకులా నదీ
మార్గం దదౌ సింధురివ శ్రియః పతేః || 50 ||
నందవ్రజం శౌరిరుపేత్య తత్ర తాన్
గోపాన్ ప్రసుప్తానుపలభ్య నిద్రయా |
సుతం యశోదాశయనే నిధాయ తత్
సుతాముపాదాయ పునర్గృహానగాత్ || 51 ||
దేవక్యాః శయనే న్యస్య వసుదేవోఽథ దారికాం |
ప్రతిముచ్య పదోర్లోహమాస్తే పూర్వవదావృతః || 52 ||
యశోదా నందపత్నీ చ జాతం పరమబుధ్యత |
న తల్లింగం పరిశ్రాంతా నిద్రయాపగతస్మృతిః || 53 ||
ఇతి శ్రీమద్భాగవతే మహాపురాణే దశమస్కంధే పూర్వార్ధే తృతీయోఽధ్యాయే శ్రీ కృష్ణ జన్మ శ్లోకాః ||

శ్రీ కృష్ణ కవచం (త్రైలోక్యవిజయం)

శ్రీ కృష్ణ కవచం (త్రైలోక్యవిజయం).

Telugu

Read Stotra

శ్రీ కృష్ణ కవచం (త్రైలోక్యవిజయం)

మహాదేవ ఉవాచ |
త్రైలోక్యవిజయస్యాస్య కవచస్య ప్రజాపతిః |
ఋషిశ్ఛందశ్చ గాయత్రీ దేవో రాసేశ్వరః స్వయం || 1 ||
త్రైలోక్యవిజయప్రాప్తౌ వినియోగః ప్రకీర్తితః |
పరాత్పరం చ కవచం త్రిషు లోకేషు దుర్లభం || 2 ||
ఓం | ప్రణవో మే శిరః పాతు శ్రీకృష్ణాయ నమః సదా |
పాయాత్కపాలం కృష్ణాయ స్వాహా పంచాక్షరః స్మృతః || 3 ||
కృష్ణేతి పాతు నేత్రే చ కృష్ణ స్వాహేతి తారకం |
హరయే నమ ఇత్యేవం భ్రూలతాం పాతు మే సదా || 4 ||
ఓం గోవిందాయ స్వాహేతి నాసికాం పాతు సంతతం |
గోపాలాయ నమో గండౌ పాతు మే సర్వతః సదా || 5 ||
ఓం నమో గోపాంగనేశాయ కర్ణౌ పాతు సదా మమ |
ఓం కృష్ణాయ నమః శశ్వత్ పాతు మేఽధరయుగ్మకం || 6 ||
ఓం గోవిందాయ స్వాహేతి దంతౌఘం మే సదాఽవతు |
పాతు కృష్ణాయ దంతాధో దంతోర్ధ్వం క్లీం సదాఽవతు || 7 ||
ఓం శ్రీకృష్ణాయ స్వాహేతి జిహ్వికాం పాతు మే సదా |
రాసేశ్వరాయ స్వాహేతి తాలుకం పాతు మే సదా || 8 ||
రాధికేశాయ స్వాహేతి కంఠం పాతు సదా మమ |
నమో గోపాంగనేశాయ వక్షః పాతు సదా మమ || 9 ||
ఓం గోపేశాయ స్వాహేతి స్కంధం పాతు సదా మమ |
నమః కిశోరవేషాయ స్వాహా పృష్ఠం సదాఽవతు || 10 ||
ఉదరం పాతు మే నిత్యం ముకుందాయ నమః సదా |
ఓం హ్రీం క్లీం కృష్ణాయ స్వాహేతి కరౌ పాతు సదా మమ || 11 ||
ఓం విష్ణవే నమో బాహుయుగ్మం పాతు సదా మమ |
ఓం హ్రీం భగవతే స్వాహా నఖరం పాతు మే సదా || 12 ||
ఓం నమో నారాయణాయేతి నఖరంధ్రం సదాఽవతు |
ఓం హ్రీం హ్రీం పద్మనాభాయ నాభిం పాతు సదా మమ || 13 ||
ఓం సర్వేశాయ స్వాహేతి కంకాలం పాతు మే సదా |
ఓం గోపీరమణాయ స్వాహా నితంబం పాతు మే సదా || 14 ||
ఓం గోపీరమణనాథాయ పాదౌ పాతు సదా మమ |
ఓం హ్రీం శ్రీం రసికేశాయ స్వాహా సర్వం సదాఽవతు || 15 ||
ఓం కేశవాయ స్వాహేతి మమ కేశాన్ సదాఽవతు |
నమః కృష్ణాయ స్వాహేతి బ్రహ్మరంధ్రం సదాఽవతు || 16 ||
ఓం మాధవాయ స్వాహేతి మే లోమాని సదాఽవతు |
ఓం హ్రీం శ్రీం రసికేశాయ స్వాహా సర్వం సదాఽవతు || 17 ||
పరిపూర్ణతమః కృష్ణః ప్రాచ్యాం మాం సర్వదాఽవతు |
స్వయం గోలోకనాథో మామాగ్నేయాం దిశి రక్షతు || 18 ||
పూర్ణబ్రహ్మస్వరూపశ్చ దక్షిణే మాం సదాఽవతు |
నైరృత్యాం పాతు మాం కృష్ణః పశ్చిమే పాతు మాం హరిః || 19 ||
గోవిందః పాతు మాం శశ్వద్వాయవ్యాం దిశి నిత్యశః |
ఉత్తరే మాం సదా పాతు రసికానాం శిరోమణిః || 20 ||
ఐశాన్యాం మాం సదా పాతు వృందావనవిహారకృత్ |
వృందావనీప్రాణనాథః పాతు మామూర్ధ్వదేశతః || 21 ||
సదైవ మాధవః పాతు బలిహారీ మహాబలః |
జలే స్థలే చాంతరిక్షే నృసింహః పాతు మాం సదా || 22 ||
స్వప్నే జాగరణే శశ్వత్ పాతు మాం మాధవః సదా |
సర్వాంతరాత్మా నిర్లిప్తః పాతు మాం సర్వతో విభుః || 23 ||
ఇతి తే కథితం వత్స సర్వమంత్రౌఘవిగ్రహం |
త్రైలోక్యవిజయం నామ కవచం పరమాద్భుతం || 24 ||
ఇతి శ్రీబ్రహ్మవైవర్తే మహాపురాణే గణపతిఖండే ఏకత్రింశత్తమోఽధ్యయే శ్రీ కృష్ణ కవచం ||

Sign In

OTP Verification

Sacred Stotras & Deities

శ్రీ కృష్ణచంద్రాష్టకం

శ్రీ కృష్ణలహరీ స్తోత్రం

శ్రీ కృష్ణ శరణాష్టకం

శ్రీ కృష్ణ స్తవరాజః –2 (కృష్ణదాస కృతం)

శ్రీ కృష్ణ స్తవరాజః (నారద కృతం)

శ్రీ బాలకృష్ణాష్టకం –2

శ్రీ కృష్ణాష్టకం 4

శ్రీ కృష్ణాష్టకం 3

శ్రీ కృష్ణాష్టకం 2

శ్రీ కృష్ణాష్టకం

శ్రీ కృష్ణ జన్మ శ్లోకాః (శ్రీమద్భాగవతే)

శ్రీ కృష్ణ కవచం (త్రైలోక్యవిజయం)

MENU

LINKS

Astrologer Section

Vendor Section

GET ADVICE ON

Download Our Apps