KRISHNA Stotras & Hymns - Read Sacred Verses

శ్రీ కృష్ణ స్తోత్రం (శ్రీమద్భాగవతే – జ్వరస్తుతిః)

శ్రీ కృష్ణ స్తోత్రం (శ్రీమద్భాగవతే – జ్వరస్తుతిః).

Telugu

శ్రీ కృష్ణ స్తోత్రం (శ్రీమద్భాగవతే – జ్వరస్తుతిః)

జ్వర ఉవాచ |
నమామి త్వానంతశక్తిం పరేశం
సర్వాత్మానం కేవలం జ్ఞప్తిమాత్రం |
విశ్వోత్పత్తిస్థానసంరోధహేతుం
యత్తద్బ్రహ్మ బ్రహ్మలింగం ప్రశాంతం || 1 ||
కాలో దైవం కర్మ జీవః స్వభావో
ద్రవ్యం క్షేత్రం ప్రాణ ఆత్మా వికారః |
తత్సంఘాతో బీజరోహప్రవాహ-
-స్త్వన్మాయైషా తన్నిషేధం ప్రపద్యే || 2 ||
నానాభావైర్లీలయైవోపపన్నై-
-ర్దేవాన్ సాధూన్ లోకసేతూన్ బిభర్షి |
హంస్యున్మార్గాన్ హింసయా వర్తమానాన్
జన్మైతత్తే భారహారాయ భూమేః || 3 ||
తప్తోఽహం తే తేజసా దుఃసహేన
శాంతోగ్రేణాత్యుల్బణేన జ్వరేణ |
తావత్తాపో దేహినాం తేఽంఘ్రిమూలం
నో సేవేరన్ యావదాశానుబద్ధాః || 4 ||
శ్రీభగవానువాచ |
త్రిశిరస్తే ప్రసన్నోఽస్మి వ్యేతు తే మజ్జ్వరాద్భయం |
యో నౌ స్మరతి సంవాదం తస్య త్వన్న భవేద్భయం || 5 ||
ఇతి శ్రీమద్భాగవతే దశమస్కంధే త్రిషష్టితమోఽధ్యాయే జ్వరస్తుతిర్నామ శ్రీ కృష్ణ స్తోత్రం |

ముకుందమాలా స్తోత్రం

ముకుందమాలా స్తోత్రం.

Telugu

Read Stotra

ముకుందమాలా స్తోత్రం

ఘుష్యతే యస్య నగరే రంగయాత్రా దినే దినే |
తమహం శిరసా వందే రాజానం కులశేఖరం ||
శ్రీవల్లభేతి వరదేతి దయాపరేతి
భక్తప్రియేతి భవలుంఠనకోవిదేతి |
నాథేతి నాగశయనేతి జగన్నివాసే-
-త్యాలాపనం ప్రతిపదం కురు మే ముకుంద || 1 ||
జయతు జయతు దేవో దేవకీనందనోఽయం
జయతు జయతు కృష్ణో వృష్ణివంశప్రదీపః |
జయతు జయతు మేఘశ్యామలః కోమలాంగో
జయతు జయతు పృథ్వీభారనాశో ముకుందః || 2 ||
ముకుంద మూర్ధ్నా ప్రణిపత్య యాచే
భవంతమేకాంతమియంతమర్థం |
అవిస్మృతిస్త్వచ్చరణారవిందే
భవే భవే మేఽస్తు భవత్ప్రసాదాత్ || 3 ||
నాహం వందే తవ చరణయోర్ద్వంద్వమద్వంద్వహేతోః
కుంభీపాకం గురుమపి హరే నారకం నాపనేతుం |
రంయా రామా మృదుతనులతా నందనే నాపి రంతుం
భావే భావే హృదయభవనే భావయేయం భవంతం || 4 ||
నాస్థా ధర్మే న వసునిచయే నైవ కామోపభోగే
యద్యద్భవ్యం భవతు భగవన్ పూర్వకర్మానురూపం |
ఏతత్ ప్రార్థ్యం మమ బహుమతం జన్మజన్మాంతరేఽపి
త్వత్పాదాంభోరుహయుగగతా నిశ్చలా భక్తిరస్తు || 5 ||
దివి వా భువి వా మమాస్తు వాసో
నరకే వా నరకాంతక ప్రకామం |
అవధీరిత శారదారవిందౌ
చరణౌ తే మరణేఽపి చింతయామి || 6 ||
కృష్ణ త్వదీయ పదపంకజ పంజరాంత-
-మద్యైవ మే విశతు మానస రాజహంసః |
ప్రాణప్రయాణసమయే కఫవాతపిత్తైః
కంఠావరోధనవిధౌ స్మరణం కుతస్తే || 7 ||
చింతయామి హరిమేవ సంతతం
మందమంద హసితాననాంబుజం |
నందగోప తనయం పరాత్పరం
నారదాది మునిబృంద వందితం || 8 ||
కరచరణసరోజే కాంతిమన్నేత్రమీనే
శ్రమముషి భుజవీచివ్యాకులేఽగాధమార్గే |
హరిసరసి విగాహ్యాపీయ తేజోజలౌఘం
భవమరుపరిఖిన్నః ఖేదమద్య త్యజామి || 9 ||
సరసిజనయనే సశంఖచక్రే
మురభిది మా విరమ స్వచిత్త రంతుం |
సుఖతరమపరం న జాతు జానే
హరిచరణ స్మరణామృతేన తుల్యం || 10 ||
మా భీర్మందమనో విచింత్య బహుధా యామీశ్చిరం యాతనాః
నామీ నః ప్రభవంతి పాపరిపవః స్వామీ నను శ్రీధరః |
ఆలస్యం వ్యపనీయ భక్తిసులభం ధ్యాయస్వ నారాయణం
లోకస్య వ్యసనాపనోదనకరో దాసస్య కిం న క్షమః || 11 ||
భవజలధిగతానాం ద్వంద్వవాతాహతానాం
సుత దుహితృ కళత్ర త్రాణ భారార్దితానాం |
విషమవిషయతోయే మజ్జతామప్లవానాం
భవతు శరణమేకో విష్ణుపోతో నరాణాం || 12 ||
భవజలధిమగాధం దుస్తరం నిస్తరేయం
కథమహమితి చేతో మా స్మ గాః కాతరత్వం |
సరసిజదృశి దేవే తావకీ భక్తిరేకా
నరకభిది నిషణ్ణా తారయిష్యత్యవశ్యం || 13 ||
తృష్ణాతోయే మదనపవనోద్ధూత మోహోర్మిమాలే
దారావర్తే తనయసహజగ్రాహసంఘాకులే చ |
సంసారాఖ్యే మహతి జలధౌ మజ్జతాం నస్త్రిధామన్
పాదాంభోజే వరద భవతో భక్తినావం ప్రయచ్ఛ || 14 ||
మాద్రాక్షం క్షీణపుణ్యాన్ క్షణమపి భవతో భక్తిహీనాన్ పదాబ్జే
మాశ్రౌషం శ్రావ్యబంధం తవ చరితమపాస్యాన్యదాఖ్యానజాతం |
మాస్మార్షం మాధవ త్వామపి భువనపతే చేతసాపహ్నువానా-
-న్మాభూవం త్వత్సపర్యా వ్యతికర రహితో జన్మజన్మాంతరేఽపి || 15 ||
జిహ్వే కీర్తయ కేశవం మురరిపుం చేతో భజ శ్రీధరం
పాణిద్వంద్వ సమర్చయాచ్యుత కథాః శ్రోత్రద్వయ త్వం శృణు |
కృష్ణం లోకయ లోచనద్వయ హరేర్గచ్ఛాంఘ్రియుగ్మాలయం
జిఘ్ర ఘ్రాణ ముకుందపాదతులసీం మూర్ధన్నమాధోక్షజం || 16 ||
హే లోకాః శృణుత ప్రసూతి మరణవ్యాధేశ్చికిత్సామిమాం
యోగజ్ఞాః సముదాహరంతి మునయో యాం యాజ్ఞవల్క్యాదయః |
అంతర్జ్యోతిరమేయమేకమమృతం కృష్ణాఖ్యమాపీయతాం
తత్పీతం పరమౌషధం వితనుతే నిర్వాణమాత్యంతికం || 17 |
హే మర్త్యాః పరమం హితం శృణుత వో వక్ష్యామి సంక్షేపతః
సంసారార్ణవమాపదూర్మిబహుళం సంయక్ప్రవిశ్య స్థితాః |
నానాజ్ఞానమపాస్య చేతసి నమో నారాయణాయేత్యముం
మంత్రం సప్రణవం ప్రణామసహితం ప్రావర్తయధ్వం ముహుః || 18 ||
పృథ్వీ రేణు రణుః పయాంసి కణికాః ఫల్గు స్ఫులింగోఽలఘు-
-స్తేజో నిఃశ్వసనం మరుత్తనుతరం రంధ్రం సుసూక్ష్మం నభః |
క్షుద్రా రుద్రపితామహప్రభృతయః కీటాః సమస్తాః సురాః
దృష్టే యత్ర స తావకో విజయతే భూమావధూతావధిః || 19 ||
బద్ధేనాంజలినా నతేన శిరసా గాత్రైః సరోమోద్గమైః
కంఠేన స్వరగద్గదేన నయనేనోద్గీర్ణ బాష్పాంబునా |
నిత్యం త్వచ్చరణారవిందయుగళ ధ్యానామృతాస్వాదినా-
-మస్మాకం సరసీరుహాక్ష సతతం సంపద్యతాం జీవితం || 20 ||
హే గోపాలక హే కృపాజలనిధే హే సింధుకన్యాపతే
హే కంసాంతక హే గజేంద్రకరుణాపారీణ హే మాధవ |
హే రామానుజ హే జగత్త్రయగురో హే పుండరీకాక్ష మాం
హే గోపీజననాథ పాలయ పరం జానామి న త్వాం వినా || 21 ||
భక్తాపాయభుజంగగారుడమణిస్త్రైలోక్యరక్షామణిః
గోపీలోచనచాతకాంబుదమణిః సౌందర్యముద్రామణిః |
యః కాంతామణి రుక్మిణీ ఘనకుచద్వంద్వైకభూషామణిః
శ్రేయో దేవశిఖామణిర్దిశతు నో గోపాలచూడామణిః || 22 ||
శత్రుచ్ఛేదైకమంత్రం సకలముపనిషద్వాక్యసంపూజ్యమంత్రం
సంసారోత్తారమంత్రం సముపచితతమః సంఘనిర్యాణమంత్రం |
సర్వైశ్వర్యైకమంత్రం వ్యసనభుజగ సందష్ట సంత్రాణమంత్రం
జిహ్వే శ్రీకృష్ణమంత్రం జప జప సతతం జన్మసాఫల్యమంత్రం || 23 ||
వ్యామోహ ప్రశమౌషధం మునిమనోవృత్తి ప్రవృత్త్యౌషధం
దైత్యేంద్రార్తికరౌషధం త్రిజగతాం సంజీవనైకౌషధం | [త్రిభువనీ] భక్తాత్యంతహితౌషధం భవభయప్రధ్వంసనైకౌషధం
శ్రేయః ప్రాప్తికరౌషధం పిబ మనః శ్రీకృష్ణదివ్యౌషధం || 24 ||
ఆంనాయాభ్యసనాన్యరణ్యరుదితం వేదవ్రతాన్యన్వహం
మేదశ్ఛేదఫలాని పూర్తవిధయః సర్వే హుతం భస్మని |
తీర్థానామవగాహనాని చ గజస్నానం వినా యత్పద-
-ద్వంద్వాంభోరుహసంస్మృతిర్విజయతే దేవః స నారాయణః || 25 ||
శ్రీమన్నామ ప్రోచ్య నారాయణాఖ్యం
కే న ప్రాపుర్వాంఛితం పాపినోఽపి |
హా నః పూర్వం వాక్ప్రవృత్తా న తస్మిన్
తేన ప్రాప్తం గర్భవాసాదిదుఃఖం || 26 ||
మజ్జన్మనః ఫలమిదం మధుకైటభారే
మత్ప్రార్థనీయ మదనుగ్రహ ఏష ఏవ |
త్వద్భృత్య భృత్య పరిచారక భృత్యభృత్య
భృత్యస్య భృత్య ఇతి మాం స్మర లోకనాథ || 27 ||
నాథే నః పురుషోత్తమే త్రిజగతామేకాధిపే చేతసా
సేవ్యే స్వస్య పదస్య దాతరి సురే నారాయణే తిష్ఠతి |
యం కంచిత్పురుషాధమం కతిపయగ్రామేశమల్పార్థదం
సేవాయై మృగయామహే నరమహో మూకా వరాకా వయం || 28 ||
మదన పరిహర స్థితిం మదీయే
మనసి ముకుందపదారవిందధాంని |
హరనయన కృశానునా కృశోఽసి
స్మరసి న చక్రపరాక్రమం మురారేః || 29 ||
తత్త్వం బ్రువాణాని పరం పరస్మా-
-న్మధు క్షరంతీవ సతాం ఫలాని |
ప్రావర్తయ ప్రాంజలిరస్మి జిహ్వే
నామాని నారాయణ గోచరాణి || 30 ||
ఇదం శరీరం పరిణామపేశలం
పతత్యవశ్యం శ్లథసంధిజర్జరం |
కిమౌషధైః క్లిశ్యసి మూఢ దుర్మతే
నిరామయం కృష్ణరసాయనం పిబ || 31 ||
దారా వారాకరవరసుతా తే తనూజో విరించిః
స్తోతా వేదస్తవ సురగణో భృత్యవర్గః ప్రసాదః |
ముక్తిర్మాయా జగదవికలం తావకీ దేవకీ తే
మాతా మిత్రం బలరిపుసుతస్త్వయ్యతోఽన్యన్న జానే || 32 ||
కృష్ణో రక్షతు నో జగత్త్రయగురుః కృష్ణం నమస్యాంయహం
కృష్ణేనామరశత్రవో వినిహతాః కృష్ణాయ తస్మై నమః |
కృష్ణాదేవ సముత్థితం జగదిదం కృష్ణస్య దాసోఽస్ంయహం
కృష్ణే తిష్ఠతి సర్వమేతదఖిలం హే కృష్ణ రక్షస్వ మాం || 33 ||
తత్త్వం ప్రసీద భగవన్ కురు మయ్యనాథే
విష్ణో కృపాం పరమకారుణికః కిల త్వం |
సంసారసాగరనిమగ్నమనంతదీన-
-ముద్ధర్తుమర్హసి హరే పురుషోత్తమోఽసి || 34 ||
నమామి నారాయణ పాదపంకజం
కరోమి నారాయణ పూజనం సదా |
వదామి నారాయణ నామ నిర్మలం
స్మరామి నారాయణ తత్త్వమవ్యయం || 35 ||
శ్రీనాథ నారాయణ వాసుదేవ
శ్రీకృష్ణ భక్తప్రియ చక్రపాణే |
శ్రీపద్మనాభాచ్యుత కైటభారే
శ్రీరామ పద్మాక్ష హరే మురారే || 36 ||
అనంత వైకుంఠ ముకుంద కృష్ణ
గోవింద దామోదర మాధవేతి |
వక్తుం సమర్థోఽపి న వక్తి కశ్చి-
-దహో జనానాం వ్యసనాభిముఖ్యం || 37 ||
ధ్యాయంతి యే విష్ణుమనంతమవ్యయం
హృత్పద్మమధ్యే సతతం వ్యవస్థితం |
సమాహితానాం సతతాభయప్రదం
తే యాంతి సిద్ధిం పరమాం చ వైష్ణవీం || 38 ||
క్షీరసాగరతరంగశీకరా-
-ఽఽసారతారకిత చారుమూర్తయే |
భోగిభోగ శయనీయశాయినే
మాధవాయ మధువిద్విషే నమః || 39 ||
యస్య ప్రియౌ శ్రుతిధరౌ కవిలోకవీరౌ
మిత్రే ద్విజన్మవరపద్మ శరావభూతాం |
తేనాంబుజాక్ష చరణాంబుజ షట్పదేన
రాజ్ఞా కృతా కృతిరియం కులశేఖరేణ || 40 ||
ఇతి శ్రీకులశేఖర ప్రణీతం ముకుందమాలా |

శ్రీ గోకులేశాష్టకం

శ్రీ గోకులేశాష్టకం.

Telugu

Read Stotra

శ్రీ గోకులేశాష్టకం

నందగోపభూపవంశభూషణం విదూషణం
భూమిభూతిభూరిభాగ్యభాజనం భయాపహం |
ధేనుధర్మరక్షణావతీర్ణపూర్ణవిగ్రహం
నీలవారివాహకాంతి గోకులేశమాశ్రయే || 1 ||
గోపబాలసుందరీగణావృతం కళానిధిం
రాసమండలీవిహారకారికామసుందరం |
పద్మయోనిశంకరాదిదేవబృందవందితం
నీలవారివాహకాంతి గోకులేశమాశ్రయే || 2 ||
గోపరాజరత్నరాజిమందిరానురింగణం
గోపబాలబాలికాకలానురుద్ధగాయనం |
సుందరీమనోజభావభాజనాంబుజాననం
నీలవారివాహకాంతి గోకులేశమాశ్రయే || 3 ||
కంసకేశికుంజరాజదుష్టదైత్యదారణం
ఇంద్రసృష్టవృష్టివారివారణోద్ధృతాచలం |
కామధేనుకారితాభిధానగానశోభితం
నీలవారివాహకాంతి గోకులేశమాశ్రయే || 4 ||
గోపికాగృహాంతగుప్తగవ్యచౌర్యచంచలం
దుగ్ధభాండభేదభీతలజ్జితాస్యపంకజం |
ధేనుధూళిధూసరాంగశోభిహారనూపురం
నీలవారివాహకాంతి గోకులేశమాశ్రయే || 5 ||
వత్సధేనుగోపబాలభీషణాస్యవహ్నిపం
కేకిపింఛకల్పితావతంసశోభితాననం |
వేణువాదమత్తఘోషసుందరీమనోహరం
నీలవారివాహకాంతి గోకులేశమాశ్రయే || 6 ||
గర్వితామరేంద్రకల్పకల్పితాన్నభోజనం
శారదారవిందబృందశోభిహంసజారతం |
దివ్యగంధలుబ్ధభృంగపారిజాతమాలినం
నీలవారివాహకాంతి గోకులేశమాశ్రయే || 7 ||
వాసరావసానగోష్ఠగామిగోగణానుగం
ధేనుదోహదేహగేహమోహవిస్మయక్రియం |
స్వీయగోకులేశదానదత్తభక్తరక్షణం
నీలవారివాహకాంతి గోకులేశమాశ్రయే || 8 ||
ఇతి శ్రీరఘునాథాచార్య విరచితం శ్రీ గోకులేశాష్టకం ||

శ్రీ మురారి పంచరత్నం

శ్రీ మురారి పంచరత్నం.

Telugu

Read Stotra

శ్రీ మురారి పంచరత్నం

యత్సేవనేన పితృమాతృసహోదరాణాం
చిత్తం న మోహమహిమా మలినం కరోతి |
ఇత్థం సమీక్ష్య తవ భక్తజనాన్ మురారే
మూకోఽస్మి తేఽంఘ్రికమలం తదతీవ ధన్యం || 1 ||
యే యే విలగ్నమనసః సుఖమాప్తుకామాః
తే తే భవంతి జగదుద్భవమోహశూన్యాః |
దృష్ట్వా వినష్టధనధాన్యగృహాన్ మురారే
మూకోఽస్మి తేఽంఘ్రికమలం తదతీవ ధన్యం || 2 ||
వస్త్రాణి దిగ్వలయమావసతిః శ్మశానే
పాత్రం కపాలమపి ముండవిభూషణాని |
రుద్రే ప్రసాదమచలం తవ వీక్ష్య శౌరే
మూకోఽస్మి తేఽంఘ్రికమలం తదతీవ ధన్యం || 3 ||
యత్కీర్తిగాయనపరస్య విధాతృసూనోః
కౌపీనమైణమజినం విపులాం విభూతిం |
స్వస్యార్థ దిగ్భ్రమణమీక్ష్య తు సార్వకాలం
మూకోఽస్మి తేఽంఘ్రికమలం తదతీవ ధన్యం || 4 ||
యద్వీక్షణే ధృతధియామశనం ఫలాది
వాసోఽపి నిర్జినవనే గిరికందరాసు |
వాసాంసి వల్కలమయాని విలోక్య చైవం
మూకోఽస్మి తేఽంఘ్రికమలం తదతీవ ధన్యం || 5 ||
స్తోత్రం పాదాంబుజస్యైతచ్ఛ్రీశస్య విజితేంద్రియః |
పఠిత్వా తత్పదం యాతి శ్లోకార్థజ్ఞస్తు యో నరః || 6 ||

శ్రీ గోవర్ధనాష్టకం

శ్రీ గోవర్ధనాష్టకం.

Telugu

Read Stotra

శ్రీ గోవర్ధనాష్టకం

గుణాతీతం పరంబ్రహ్మ వ్యాపకం భూధరేశ్వరం |
గోకులానందదాతారం వందే గోవర్ధనం గిరిం || 1 ||
గోలోకాధిపతిం కృష్ణ విగ్రహం పరమేశ్వరం |
చతుష్పదార్థదం నిత్యం వందే గోవర్ధనం గిరిం || 2 ||
నానాజన్మకృతం పాపం దహేత్ తూలం హుతాశనః |
కృష్ణభక్తిప్రదం శశ్వద్వందే గోవర్ధనం గిరిం || 3 ||
సదానందం సదావంద్యం సదా సర్వార్థసాధనం |
సాక్షిణం సకలాధారం వందే గోవర్ధనం గిరిం || 4 ||
సురూపం స్వస్తికాసీనం సునాసాగ్రం కృతేక్షణం |
ధ్యాయంతం కృష్ణ కృష్ణేతి వందే గోవర్ధనం గిరిం || 5 ||
విశ్వరూపం ప్రజాధీశం వల్లవీవల్లభప్రియం |
విహ్వలప్రియమాత్మానం వందే గోవర్ధనం గిరిం || 6 ||
ఆనందకృత్సురాశీశకృతసంభారభోజనం |
మహేంద్రమదహంతారం వందే గోవర్ధనం గిరిం || 7 ||
కృష్ణలీలారసావిష్టం కృష్ణాత్మానం కృపాకరం |
కృష్ణానందప్రదం సాక్షాద్వందే గోవర్ధనం గిరిం || 8 ||
గోవర్ధనాష్టకమిదం యః పఠేద్భక్తిసంయుతః |
తన్నేత్రగోచరో యాతి కృష్ణో గోవర్ధనేశ్వరః || 9 ||
ఇదం శ్రీమద్ఘనశ్యామనందనస్య మహాత్మనః |
జ్ఞానినో జ్ఞానిరామస్య కృతిర్విజయతేతరాం || 10 ||

శ్రీ నందనందనాష్టకం

శ్రీ నందనందనాష్టకం.

Telugu

Read Stotra

శ్రీ నందనందనాష్టకం

సుచారువక్త్రమండలం సుకర్ణరత్నకుండలం |
సుచర్చితాంగచందనం నమామి నందనందనం || 1 ||
సుదీర్ఘనేత్రపంకజం శిఖీశిఖండమూర్ధజం |
అనంతకోటిమోహనం నమామి నందనందనం || 2 ||
సునాసికాగ్రమౌక్తికం స్వచ్ఛదంతపంక్తికం |
నవాంబుదాంగచిక్కణం నమామి నందనందనం || 3 ||
కరేణవేణురంజితం గతిః కరీంద్రగంజితం |
దుకూలపీతశోభనం నమామి నందనందనం || 4 ||
త్రిభంగదేహసుందరం నఖద్యుతిః సుధాకరం |
అమూల్యరత్నభూషణం నమామి నందనందనం || 5 ||
సుగంధ అంగసౌరభం ఉరో విరాజి కౌస్తుభం |
స్ఫురత్ శ్రీవత్సలాంఛనం నమామి నందనందనం || 6 ||
వృందావనసునాగరం విలాసానుగవాససం |
సురేంద్రగర్వమోచనం నమామి నందనందనం || 7 ||
వ్రజాంగనాసునాయకం సదా సుఖప్రదాయకం |
జగన్మనఃప్రలోభనం నమామి నందనందనం || 8 ||
శ్రీనందనందనాష్టకం పఠేద్యః శ్రద్ధయాన్వితః |
తరేద్భవాబ్ధిదుస్తరం లభేత్తదంఘ్రియుక్తకం || 9 ||

శ్రీ గోవర్ధనధరాష్టకం

శ్రీ గోవర్ధనధరాష్టకం.

Telugu

Read Stotra

శ్రీ గోవర్ధనధరాష్టకం

గోపనారీ ముఖాంభోజభాస్కరం వేణువాద్యకం |
రాధికారసభోక్తారం గోవర్ధనధరం భజే || 1 ||
ఆభీరనగరీప్రాణప్రియం సత్యపరాక్రమం |
స్వభృత్యభయభేత్తారం గోవర్ధనధరం భజే || 2 ||
వ్రజస్త్రీ విప్రయోగాగ్ని నివారకమహర్నిశం |
మహామరకతశ్యామం గోవర్ధనధరం భజే || 3 ||
నవకంజనిభాక్షం చ గోపీజనమనోహరం |
వనమాలాధరం శశ్వద్గోవర్ధనధరం భజే || 4 ||
భక్తవాంఛాకల్పవృక్షం నవనీతపయోముఖం |
యశోదామాతృసానందం గోవర్ధనధరం భజే || 5 ||
అనన్యకృతహృద్భావపూరకం పీతవాససం |
రాసమండలమధ్యస్థం గోవర్ధనధరం భజే || 6 ||
ధ్వజవజ్రాదిసచ్చిహ్న రాజచ్చరణపంకజం |
శృంగారరసమర్మజ్ఞం గోవర్ధనధరం భజే || 7 ||
పురుహూతమహావృష్టీర్నాశకం గోగణావృతం |
భక్తనేత్రచకోరేందుం గోవర్ధనధరం భజే || 8 ||
గోవర్ధనధరాష్టకమిదం యః ప్రపఠేత్ సుధీః |
సర్వదాఽనన్యభావేన స కృష్ణో రతిమాప్నుయాత్ || 9 ||
రచితం భక్తిలాభాయ ధారకానాం సనాతనం |
ముక్తిదం సర్వజంతూనాం గోవర్ధనధరాష్టకం || 10 ||
ఇతి శ్రీగోకులచంద్ర కృతం గోవర్ధనధరాష్టకం ||

శ్రీ నందకుమారాష్టకం

శ్రీ నందకుమారాష్టకం.

Telugu

Read Stotra

శ్రీ నందకుమారాష్టకం

సుందరగోపాలం ఉరవనమాలం నయనవిశాలం దుఃఖహరం
వృందావనచంద్రం ఆనందకందం పరమానందం ధరణిధరం |
వల్లభఘనశ్యామం పూర్ణకామం ఆత్యభిరామం ప్రీతికరం
భజ నందకుమారం సర్వసుఖసారం తత్త్వవిచారం బ్రహ్మపరం || 1 ||
సుందరవారిజవదనం నిర్జితమదనం ఆనందసదనం ముకుటధరం
గుంజాకృతిహారం విపినవిహారం పరమోదారం చీరహరం |
వల్లభపటపీతం కృతముపవీతం కరనవనీతం విబుధవరం
భజ నందకుమారం సర్వసుఖసారం తత్త్వవిచారం బ్రహ్మపరం || 2 ||
శోభితముఖధూలం యమునాకూలం నిపట అతూలం సుఖదతరం
ముఖమండితరేణుం చారితధేనుం వాదితవేణుం మధురసురం |
వల్లభమతివిమలం శుభపదకమలం నఖరుచి అమలం తిమిరహరం
భజ నందకుమారం సర్వసుఖసారం తత్త్వవిచారం బ్రహ్మపరం || 3 ||
శిరముకుటసుదేశం కుంచితకేశం నటవరవేషం కామవరం
మాయాకృతమనుజం హలధర అనుజం ప్రతిహతదనుజం భారహరం |
వల్లభవ్రజపాలం సుభగసుచాలం హితమనుకాలం భావవరం
భజ నందకుమారం సర్వసుఖసారం తత్త్వవిచారం బ్రహ్మపరం || 4 ||
ఇందీవరభాసం ప్రకటసరాసం కుసుమవికాసం వంశధరం
జితమన్మథమానం రూపనిధానం కృతకలగానం చిత్తహరం |
వల్లభమృదుహాసం కుంజనివాసం వివిధవిలాసం కేళికరం
భజ నందకుమారం సర్వసుఖసారం తత్త్వవిచారం బ్రహ్మపరం || 5 ||
అతిపరమప్రవీణం పాలితదీనం భక్తాధీనం కర్మకరం
మోహనమతిధీరం ఫణిబలవీరం హతపరవీరం తరళతరం |
వల్లభవ్రజరమణం వారిజవదనం హలధరశమనం శైలధరం
భజ నందకుమారం సర్వసుఖసారం తత్త్వవిచారం బ్రహ్మపరం || 6 ||
జలధరద్యుతి అంగం లలితత్రిభంగం బహుకృతిరంగం రసికవరం
గోకులపరివారం మదనాకారం కుంజవిహారం గూఢతరం |
వల్లభవ్రజచంద్రం సుభగసుఛందం కృత ఆనందం భ్రాంతిహరం
భజ నందకుమారం సర్వసుఖసారం తత్త్వవిచారం బ్రహ్మపరం || 7 ||
వందితయుగచరణం పావనకరణం జగదుద్ధరణం విమలధరం
కాళియశిరగమనం కృతఫణినమనం ఘాతితయమనం మృదులతరం |
వల్లభదుఃఖహరణం నిర్మలచరణం అశరణశరణం ముక్తికరం
భజ నందకుమారం సర్వసుఖసారం తత్త్వవిచారం బ్రహ్మపరం || 8 ||
ఇతి శ్రీమద్వల్లభాచార్యవిరచితం శ్రీ నందకుమారాష్టకం ||

శ్రీ గిరిరాజధార్యష్టకం

శ్రీ గిరిరాజధార్యష్టకం.

Telugu

Read Stotra

శ్రీ గిరిరాజధార్యష్టకం

భక్తాభిలాషాచరితానుసారీ
దుగ్ధాదిచౌర్యేణ యశోవిసారీ |
కుమారతానందితఘోషనారీ
మమ ప్రభుః శ్రీగిరిరాజధారీ || 1 ||
వ్రజాంగనావృందసదావిహారీ
అంగైర్గుహాంగారతమోఽపహారీ |
క్రీడారసావేశతమోభిసారీ
మమ ప్రభుః శ్రీగిరిరాజధారీ || 2 ||
వేణుస్వనానందితపన్నగారీ
రసాతలానృత్యపదప్రచారీ |
క్రీడన్ వయస్యాకృతిదైత్యమారీ
మమ ప్రభుః శ్రీగిరిరాజధారీ || 3 ||
పులిందదారాహితశంబరారీ
రమాసదోదారదయాప్రకారీ |
గోవర్ధనే కందఫలోపహారీ
మమ ప్రభుః శ్రీగిరిరాజధారీ || 4 ||
కలిందజాకూలదుకూలహారీ
కుమారికాకామకలావితారీ |
వృందావనే గోధనవృందచారీ
మమ ప్రభుః శ్రీగిరిరాజధారీ || 5 ||
వ్రజేంద్రసర్వాధికశర్మకారీ
మహేంద్రగర్వాధికగర్వహారీ |
వృందావనే కందఫలోపహారీ
మమ ప్రభుః శ్రీగిరిరాజధారీ || 6 ||
మనఃకళానాథతమోవిదారీ
వంశీరవాకారితతత్కుమారిః |
రాసోత్సవోద్వేల్లరసాబ్ధిసారీ
మమ ప్రభుః శ్రీగిరిరాజధారీ || 7 ||
మత్తద్విపోద్దామగతానుకారీ
లుఠత్ప్రసూనాప్రపదీనహారీ |
రామారసస్పర్శకరప్రసారీ
మమ ప్రభుః శ్రీగిరిరాజధారీ || 8 ||
ఇతి శ్రీవల్లభాచార్య విరచితం శ్రీ గిరిరాజధార్యష్టకం |

శ్రీ గిరిధార్యష్టకం

శ్రీ గిరిధార్యష్టకం.

Telugu

Read Stotra

శ్రీ గిరిధార్యష్టకం

త్ర్యైలోక్యలక్ష్మీమదభృత్సురేశ్వరో
యదా ఘనైరంతకరైర్వవర్షహ |
తదాఽకరోద్యః స్వబలేన రక్షణం
తం గోపబాలం గిరిధారిణం భజే || 1 ||
యః పాయయంతీమధిరుహ్య పూతనాం
స్తన్యం పపౌ ప్రాణపరాయణః శిశుః |
జఘాన వాతాయితదైత్యపుంగవం
తం గోపబాలం గిరిధారిణం భజే || 2 ||
నందవ్రజం యః స్వరుచేందిరాలయం
చక్రే దిగీశాన్ దివి మోహవృద్ధయే |
గోగోపగోపీజనసర్వసౌఖ్యకృత్
తం గోపబాలం గిరిధారిణం భజే || 3 ||
యం కామదోగ్ధ్రీ గగనాహృతైర్జలైః
స్వజ్ఞాతిరాజ్యే ముదితాభ్యషించత |
గోవిందనామోత్సవకృద్వ్రజౌకసాం
తం గోపబాలం గిరిధారిణం భజే || 4 ||
యస్యాననాబ్జం వ్రజసుందరీజనా
దినక్షయే లోచనషట్పదైర్ముదా |
పిబంత్యధీరా విరహాతురా భృశం
తం గోపబాలం గిరిధారిణం భజే || 5 ||
బృందావనే నిర్జరబృందవందితే
గాశ్చారయన్యః కలవేణునిఃస్వనః |
గోపాంగనాచిత్తవిమోహమన్మథ-
-స్తం గోపబాలం గిరిధారిణం భజే || 6 ||
యః స్వాత్మలీలారసదిత్సయా సతా-
-మావిశ్యకారాఽగ్నికుమారవిగ్రహం |
శ్రీవల్లభాధ్వానుసృతైకపాలక-
-స్తం గోపబాలం గిరిధారిణం భజే || 7 ||
గోపేంద్రసూనోర్గిరిధారిణోఽష్టకం
పఠేదిదం యస్తదనన్యమానసః |
స ముచ్యతే దుఃఖమహార్ణవాద్భృశం
ప్రాప్నోతి దాస్యం గిరిధారిణో ధ్రువం || 8 ||
ప్రణంయ సంప్రార్థయతే తవాగ్రత-
-స్త్వదంఘ్రిరేణుం రఘునాథనామకః |
శ్రీవిఠ్ఠలానుగ్రహలబ్ధసన్మతి-
-స్తత్పూరయైతస్య మనోరథార్ణవం || 9 ||
ఇతి శ్రీరఘునాథప్రభు కృత శ్రీ గిరిధార్యష్టకం ||

శ్రీ విఠ్ఠల కవచం

శ్రీ విఠ్ఠల కవచం.

Telugu

Read Stotra

శ్రీ విఠ్ఠల కవచం

సూత ఉవాచ |
శిరో మే విఠ్ఠలః పాతు కపోలౌ ముద్గరప్రియః |
నేత్రయోర్విష్ణురూపీ చ వైకుంఠో ఘ్రాణమేవ చ || 1 ||
మునిసేవ్యో ముఖం పాతు దంతపంక్తిం సురేశ్వరః |
విద్యాధీశస్తు మే జిహ్వాం కంఠం విశ్వేశవందితః || 2 ||
వ్యాపకో హృదయం పాతు స్కంధౌ పాతు సుఖప్రదః |
భుజౌ మే నృహరిః పాతు కరౌ చ సురనాయకః || 3 ||
మధ్యం పాతు సురాధీశో నాభిం పాతు సురాలయః |
సురవంద్యః కటిం పాతు జానునీ కమలాసనః || 4 ||
జంఘే పాతు హృషీకేశః పాదౌ పాతు త్రివిక్రమః |
అఖిలం చ శరీరం మే పాతాం గోవిందమాధవౌ || 5 ||
అకారో వ్యాపకో విష్ణురక్షరాత్మక ఏవ చ |
పావకః సర్వపాపానామకారాయ నమో నమః || 6 ||
తారకః సర్వభూతానాం ధర్మశాస్త్రేషు గీయతే |
పునాతు విశ్వభువనం త్వోంకారాయ నమో నమః || 7 ||
మూలప్రకృతిరూపా యా మహామాయా చ వైష్ణవీ |
తస్యా బీజేన సంయుక్తో యకారాయ నమో నమః || 8 ||
వైకుంఠాధిపతిః సాక్షాద్వైకుంఠపదదాయకః |
వైజయంతీసమాయుక్తో వికారాయ నమో నమః || 9 ||
స్నాతః సర్వేషు తీర్థేషు పూతో యజ్ఞాదికర్మసు |
పావనో ద్విజపంక్తీనాం ఠకారాయ నమో నమః || 10 ||
వాహనం గరుడో యస్య భుజంగః శయనం తథా |
వామభాగే చ లక్ష్మీశ్చ లకారాయ నమో నమః || 11 ||
నారదాదిసమాయుక్తం వైష్ణవం పరమం పదం |
లభతే మానవో నిత్యం వైష్ణవం ధర్మమాశ్రితః || 12 ||
వ్యాధయో విలయం యాంతి పూర్వకర్మసముద్భవాః |
భూతాని చ పలాయంతే మంత్రోపాసకదర్శనాత్ || 13 ||
ఇదం షడక్షరం స్తోత్రం యో జపేచ్ఛ్రద్ధయాన్వితః |
విష్ణుసాయుజ్యమాప్నోతి సత్యం సత్యం న సంశయః || 14 ||
ఇతి శ్రీపద్మపురాణే సూతశౌనకసంవాదే శ్రీ విఠ్ఠల కవచం |

శ్రీ విఠ్ఠల స్తవరాజః

శ్రీ విఠ్ఠల స్తవరాజః.

Telugu

Read Stotra

శ్రీ విఠ్ఠల స్తవరాజః

అస్య శ్రీవిఠ్ఠలస్తవరాజస్తోత్రమహామంత్రస్య భగవాన్ వేదవ్యాస ఋషిః అతిజగతీ ఛందః శ్రీవిఠ్ఠలః పరమాత్మా దేవతా త్రిమూర్త్యాత్మకా ఇతి బీజం సృష్టిసంరక్షణార్థేతి శక్తిః వరదాభయహస్తేతి కీలకం మమ సర్వాభీష్టఫలసిద్ధ్యర్థే జపే వినియోగః |
అథ న్యాసః-
ఓం నమో భగవతే విఠ్ఠలాయ అంగుష్ఠాభ్యాం నమః |
ఓం తత్త్వప్రకాశాత్మనే తర్జనీభ్యాం నమః |
ఓం శంఖచక్రగదాధరాత్మనే మధ్యమాభ్యాం నమః |
ఓం సృష్టిసంరక్షణార్థాయ అనామికాభ్యాం నమః |
ఓం త్రిమూర్త్యాత్మకాయ కనిష్ఠికాభ్యాం నమః |
ఓం వరదాభయహస్తాయ కరతలకరపృష్ఠాభ్యాం నమః |
ఏవం హృదయాదిన్యాసః | భూర్భువస్సువరోమితి దిగ్బంధః |
ధ్యానం –
శ్రీగురుం విఠ్ఠలానందం పరాత్పరజగత్ప్రభుం |
త్రైలోక్యవ్యాపకం దేవం శుద్ధమత్యంతనిర్మలం || 1 ||
నాసాగ్రేఽవస్థితం దేవమాబ్రహ్మస్తంబసంయుతం |
ఊర్ణతంతునిభాకారం సూత్రజ్ఞం విఠ్ఠలం స్వయం || 2 ||
గంగాయమునయోర్మధ్యే త్రికూటం రంగమందిరం |
జ్ఞానం భీమరథీతీరం స్వదేవం పండరీపురం || 3 ||
రుక్మణీశక్తిహస్తేన క్రీడంతం చలలోచనం |
ఆజ్ఞాబ్రహ్మబిలాంతఃస్థ జ్యోతిర్మయస్వరూపకం || 4 ||
సహస్రదళపద్మస్థం సర్వాభరణభూషితం |
సర్వదేవసముత్పన్నం ఓమితిజ్యోతిరూపకం || 5 ||
సమపర్వత ఊర్ధ్వస్థం శ్రోణిత్రయసహస్రకం |
స్తంభో మధ్యం యథా స్థానం కలౌ వేంకటనాయకం || 6 ||
పీతవస్త్రపరీధానం తులసీవనమాలినం |
శంఖచక్రధరం దేవం వరదాభయహస్తకం || 7 ||
ఊర్ధ్వపుండ్రమయం దేవం చిత్రాభరణభూషితం |
రత్నసింహాసనం దేవం సువర్ణముకుటోజ్జ్వలం || 8 ||
రత్నకింకిణికేయూరం రత్నమంటపశోభితం |
పౌండ్రం చ పాలినం రంగం యదూనాం కులదీపకం || 9 ||
దేవారిదైత్యదర్పఘ్నం సర్వలోకైకనాయకం |
ఓం నమః శాంతిరూపాయ సర్వలోకైకసిద్ధయే || 10 ||
సర్వదేవస్వరూపాయ సర్వయంత్రస్వరూపిణే |
సర్వతంత్రస్వరూపాయ విఠ్ఠలాయ నమో నమః || 11 ||
పరమంత్రప్రణాశాయ పరయంత్రనివారిణే |
పరతంత్రవినాశాయ విఠ్ఠలాయ నమో నమః || 12 ||
పరాత్పరస్వరూపాయ పరమాత్మస్వరూపిణే |
పరబ్రహ్మస్వరూపాయ విఠ్ఠలాయ నమో నమః || 13 ||
విశ్వరూపస్వరూపాయ విశ్వవ్యాపిస్వరూపిణే |
విశ్వంభరస్వమిత్రాయ విఠ్ఠలాయ నమో నమః || 14 ||
పరమహంసస్వరూపాయ సోఽహం హంసస్వరూపిణే |
హంసమంత్రస్వరూపాయ విఠ్ఠలాయ నమో నమః || 15 ||
అనిర్వాచ్యస్వరూపాయ అఖండబ్రహ్మరూపిణే |
ఆత్మతత్త్వప్రకాశాయ విఠ్ఠలాయ నమో నమః || 16 ||
క్షరాక్షరస్వరూపాయ అక్షరాయ స్వరూపిణే |
ఓంకారవాచ్యరూపాయ విఠ్ఠలాయ నమో నమః || 17 ||
బిందునాదకళాతీతభిన్నదేహసమప్రభ |
అభిన్నాయైవ విశ్వాయ విఠ్ఠలాయ నమో నమః || 18 ||
భీమాతీరనివాసాయ పండరీపురవాసినే |
పాండురంగప్రకాశాయ విఠ్ఠలాయ నమో నమః || 19 ||
సర్వయోగార్థతత్త్వజ్ఞ సర్వభూతహితేరత |
సర్వలోకహితార్థాయ విఠ్ఠలాయ నమో నమః || 20 ||
య ఇదం పఠతే నిత్యం త్రిసంధ్యం స్తౌతి మాధవం |
సర్వయోగప్రదం నిత్యం దీర్ఘమాయుష్యవర్ధనం || 21 ||
సర్వే జ్వరా వినశ్యంతి ముచ్యతే సర్వబంధనాత్ |
ఆవర్తనసహస్రాత్తు లభతే వాంఛితం ఫలం || 22 ||
య ఇదం పరమం గుహ్యం సర్వత్ర న ప్రకాశయేత్ |
స బ్రహ్మజ్ఞానమాప్నోతి భుక్తిం ముక్తిం చ విందతి || 23 ||
సర్వభూతప్రశమనం సర్వదుఃఖనివారణం |
సర్వాపమృత్యుశమనం సర్వరాజవశీకరం || 24 ||
అలక్ష్మీనాశనం చైవ సులక్ష్మీసుఖదాయకం |
త్రిసంధ్యం పఠతే భక్త్యా నిర్భయో భవతి ధ్రువం || 25 ||
సంగ్రామే సంకటే చైవ వివాదే శత్రుమధ్యగే |
శృంఖలాబంధనే చైవ ముచ్యతే సర్వకిల్బిషాత్ || 26 ||
రాజద్వారే సభాస్థానే సింహవ్యాఘ్రభయేషు చ |
సాధకః స్తంభనే చైవ సర్వత్ర విజయీ భవేత్ || 27 ||
ఇతి శ్రీరుద్రపురాణే వామకేశ్వరతంత్రే నారదవసిష్ఠసంవాదే శ్రీ విఠ్ఠల స్తవరాజః |

Sign In

OTP Verification

Sacred Stotras & Deities

శ్రీ కృష్ణ స్తోత్రం (శ్రీమద్భాగవతే – జ్వరస్తుతిః)

ముకుందమాలా స్తోత్రం

శ్రీ గోకులేశాష్టకం

శ్రీ మురారి పంచరత్నం

శ్రీ గోవర్ధనాష్టకం

శ్రీ నందనందనాష్టకం

శ్రీ గోవర్ధనధరాష్టకం

శ్రీ నందకుమారాష్టకం

శ్రీ గిరిరాజధార్యష్టకం

శ్రీ గిరిధార్యష్టకం

శ్రీ విఠ్ఠల కవచం

శ్రీ విఠ్ఠల స్తవరాజః

MENU

LINKS

Astrologer Section

Vendor Section

GET ADVICE ON

Download Our Apps