Sacred Stotras & Deities

పంచస్తవి –2. చర్చాస్తవః

సౌందర్యవిభ్రమభువో భువనాధిపత్య-
-సంకల్పకల్పతరవస్త్రిపురే జయంతి |
ఏతే కవిత్వకుమదప్రకరావబోధ-
-పూర్ణేందవస్త్వయి జగజ్జనని ప్రణామాః || 1 ||
దేవి స్తుతివ్యతికరే కృతబుద్ధయస్తే
వాచస్పతి ప్రభృతయోఽపి జడీ భవంతి |
తస్మాన్నిసర్గజడిమా కతమోఽహమత్ర
స్తోత్రం తవ త్రిపురతాపనపత్ని కర్తుం || 2 ||
మాతస్తథాపి భవతీం భవతీవ్రతాప-
-విచ్ఛిత్తయే స్తుతిమహార్ణవ కర్ణధారః |
స్తోతుం భవాని స భవచ్చరణారవింద-
-భక్తిగ్రహః కిమపి మాం ముఖరీ కరోతి || 3 ||
సూతే జగంతి భవతీ భవతీ బిభర్తి
జాగర్తి తత్క్షయకృతే భవతీ భవాని |
మోహం భినత్తి భవతీ భవతీ రుణద్ధి
లీలాయితం జయతి చిత్రమిదం భవత్యాః || 4 ||
యస్మిన్మనాగపి నవాంబుజపత్రగౌరీం
గౌరీం ప్రసాదమధురాం దృశమాదధాసి |
తస్మిన్నిరంతరమనంగశరావకీర్ణ-
-సీమంతినీనయనసంతతయః పతంతి || 5 ||
పృథ్వీభుజోఽప్యుదయనప్రభవస్య తస్య
విద్యాధర ప్రణతి చుంబిత పాదపీఠః |
తచ్చక్రవర్తిపదవీప్రణయః స ఏషః
త్వత్పాదపంకజరజః కణజః ప్రసాదః || 6 ||
త్వత్పాదపంకజరజ ప్రణిపాతపూర్వైః
పుణ్యైరనల్పమతిభిః కృతిభిః కవీంద్రైః |
క్షీరక్షపాకరదుకూలహిమావదాతా
కైరప్యవాపి భువనత్రితయేఽపి కీర్తిః || 7 ||
కల్పద్రుమప్రసవకల్పితచిత్రపూజాం
ఉద్దీపిత ప్రియతమామదరక్తగీతిం |
నిత్యం భవాని భవతీముపవీణయంతి
విద్యాధరాః కనకశైలగుహాగృహేషు || 8 ||
లక్ష్మీవశీకరణకర్మణి కామినీనాం
ఆకర్షణవ్యతికరేషు చ సిద్ధమంత్రః |
నీరంధ్రమోహతిమిరచ్ఛిదురప్రదీపో
దేవి త్వదంఘ్రిజనితో జయతి ప్రసాదః || 9 ||
దేవి త్వదంఘ్రినఖరత్నభువో మయూఖాః
ప్రత్యగ్రమౌక్తికరుచో ముదముద్వహంతి |
సేవానతివ్యతికరే సురసుందరీణాం
సీమంతసీంని కుసుమస్తబకాయితం యైః || 10 ||
మూర్ధ్ని స్ఫురత్తుహినదీధితిదీప్తిదీప్తం
మధ్యే లలాటమమరాయుధరశ్మిచిత్రం |
హృచ్చక్రచుంబి హుతభుక్కణికానుకారి
జ్యోతిర్యదేతదిదమంబ తవ స్వరూపం || 11 ||
రూపం తవ స్ఫురితచంద్రమరీచిగౌరం
ఆలోకతే శిరసి వాగధిదైవతం యః |
నిఃసీమసూక్తిరచనామృతనిర్ఝరస్య
తస్య ప్రసాదమధురాః ప్రసరంతి వాచః || 12 ||
సిందూరపాంసుపటలచ్ఛురితామివ ద్యాం
త్వత్తేజసా జతురసస్నపితామివోర్వీం |
యః పశ్యతి క్షణమపి త్రిపురే విహాయ
వ్రీడాం మృడాని సుదృశస్తమనుద్రవంతి || 13 ||
మాతర్ముహూర్తమపి యః స్మరతి స్వరూపం
లాక్షారసప్రసరతంతునిభం భవత్యాః |
ధ్యాయంత్యనన్యమనసస్తమనంగతప్తాః
ప్రద్యుంనసీంని సుభగత్వగుణం తరుణ్యః || 14 ||
యోఽయం చకాస్తి గగనార్ణవరత్నమిందుః
యోఽయం సురాసురగురుః పురుషః పురాణః |
యద్వామమర్ధమిదమంధకసూదనస్య
దేవి త్వమేవ తదితి ప్రతిపాదయంతి || 15 ||
ఇచ్ఛానురూపమనురూపగుణప్రకర్ష
సంకర్షిణి త్వమభిమృశ్య యదా బిభర్షి |
జాయేత స త్రిభువనైక గురుస్తదానీం
దేవః శివోఽపి భువనత్రయసూత్రధారః || 16 ||
ధ్యాతాసి హైమవతి యేన హిమాంశురశ్మి-
-మాలామలద్యుతిరకల్మషమానసేన |
తస్యావిలంబమనవద్యమనంతకల్పం
అల్పైర్దినైః సృజసి సుందరి వాగ్విలాసం || 17 ||
ఆధారమారుతనిరోధవశేన యేషాం
సిందూరరంజితసరోజగుణానుకారి |
దీప్తం హృది స్ఫురతి దేవి వపుస్త్వదీయం
ధ్యాయంతి తానిహ సమీహితసిద్ధిసార్థాః || 18 ||
యే చింతయంత్యరుణమండలమధ్యవర్తి
రూపం తవాంబ నవయావకపంకపింగం |
తేషాం సదైవ కుసుమాయుధబాణభిన్న-
-వక్షఃస్థలా మృగదృశో వశగా భవంతి || 19 ||
త్వామైందవీమివ కలామనుఫాలదేశం
ఉద్భాసితాంబరతలామవలోకయంతః |
సద్యో భవాని సుధియః కవయో భవంతి
త్వం భావనాహితధియాం కులకామధేనుః || 20 ||
శర్వాణి సర్వజనవందితపాదపద్మే
పద్మచ్ఛదద్యుతివిడంబితనేత్రలక్ష్మి |
నిష్పాపమూర్తిజనమానసరాజహంసి
హంసి త్వమాపదమనేకవిధాం జనస్య || 21 ||
ఉత్తప్తహేమరుచిరే త్రిపురే పునీహి
చేతశ్చిరంతనమఘౌఘవనం లునీహి |
కారాగృహే నిగలబంధనయంత్రితస్య
త్వత్సంస్మృతౌ ఝటితి మే నిగలాస్త్రుటంతి || 22 ||
త్వాం వ్యాపినీతి సుమనా ఇతి కుండలీతి
త్వాం కామినీతి కమలేతి కలావతీతి |
త్వాం మాలినీతి లలితేత్యపరాజితేతి
దేవి స్తువంతి విజయేతి జయేత్యుమేతి || 23 ||
ఉద్దామకామపరమార్థసరోజఖండ-
చండద్యుతిద్యుతిమపాసితషడ్వికారాం |
మోహద్విపేంద్రకదనోద్యతబోధసింహ-
-లీలాగుహాం భగవతీం త్రిపురాం నమామి || 24 ||
గణేశవటుకస్తుతా రతిసహాయకామాన్వితా
స్మరారివరవిష్టరా కుసుమబాణబాణైర్యుతా |
అనంగకుసుమాదిభిః పరివృతా చ సిద్ధైస్త్రిభిః
కదంబవనమధ్యగా త్రిపురసుందరీ పాతు నః || 25 ||
రుద్రాణి విద్రుమమయీం ప్రతిమామివ త్వాం
యే చింతయంత్యరుణకాంతిమనన్యరూపాం |
తానేత్య పక్ష్మలదృశః ప్రసభం భజంతే
కంఠావసక్తమృదుబాహులతాస్తరుణ్యః || 26 ||
త్వద్రూపైకనిరూపణప్రణయితాబంధో దృశోస్త్వద్గుణ-
-గ్రామాకర్ణనరాగితా శ్రవణయోస్త్వత్సంస్మృతిశ్చేతసి |
త్వత్పాదార్చనచాతురీ కరయుగే త్వత్కీర్తితం వాచి మే
కుత్రాపి త్వదుపాసనవ్యసనితా మే దేవి మా శాంయతు || 27 ||
త్వద్రూపముల్లసితదాడిమపుష్పరక్తం
ఉద్భావయేన్మదనదైవతమక్షరం యః |
తం రూపహీనమపి మన్మథనిర్విశేషం
ఆలోకయంత్యురునితంబతటాస్తరుణ్యః || 28 ||
బ్రహ్మేంద్రరుద్రహరిచంద్రసహస్రరశ్మి-
-స్కందద్విపాననహుతాశనవందితాయై |
వాగీశ్వరి త్రిభువనేశ్వరి విశ్వమాతః
అంతర్బహిశ్చ కృతసంస్థితయే నమస్తే || 29 ||
కస్తోత్రమేతదనువాసరమీశ్వరాయాః
శ్రేయస్కరం పఠతి వా యది వా శృణోతి |
తస్యేప్సితం ఫలతి రాజభిరీడ్యతేఽసౌ
జాయేత స ప్రియతమో మదిరేక్షణానాం || 30 ||
ఇతి శ్రీకాళిదాస విరచిత పంచస్తవ్యాం ద్వితీయః చర్చాస్తవః |

పంచస్తవి –3. ఘటస్తవః

ఆనందమంథరపురందరముక్తమాల్యం
మౌలౌ హఠేన నిహితం మహిషాసురస్య |
పాదాంబుజం భవతు మే విజయాయ మంజు-
-మంజీరశింజితమనోహరమంబికాయాః || 1 ||
దేవి త్ర్యంబకపత్ని పార్వతి సతి త్రైలోక్యమాతః శివే
శర్వాణి త్రిపురే మృడాని వరదే రుద్రాణి కాత్యాయని |
భీమే భైరవి చండి శర్వరికలే కాలక్షయే శూలిని
త్వత్పాదప్రణతాననన్యమనసః పర్యాకులాన్పాహి నః || 2 ||
దేవి త్వాం సకృదేవ యః ప్రణమతి క్షోణీభృతస్తం నమ-
-న్త్యాజన్మస్ఫురదంఘ్రిపీఠవిలుఠత్కోటీరకోటిచ్ఛటాః |
యస్త్వామర్చతి సోఽర్చ్యతే సురగణైర్యః స్తౌతి స స్తూయతే
యస్త్వాం ధ్యాయతి తం స్మరార్తివిధురా ధ్యాయంతి వామభ్రువః || 3 ||
ఉన్మత్తా ఇవ సగ్రహా ఇవ విషవ్యాసక్తమూర్ఛా ఇవ
ప్రాప్తప్రౌఢమదా ఇవార్తివిరహగ్రస్తా ఇవార్తా ఇవ |
యే ధ్యాయంతి హి శైలరాజతనయాం ధన్యాస్త ఏవాగ్రతః
త్యక్తోపాధివివృద్ధరాగమనసో ధ్యాయంతి తాన్సుభ్రువః || 4 ||
ధ్యాయంతి యే క్షణమపి త్రిపురే హృది త్వాం
లావణ్యయౌవనధనైరపి విప్రయుక్తాః |
తే విస్ఫురంతి లలితాయతలోచనానాం
చిత్తైకభిత్తిలిఖితప్రతిమాః పుమాంసః || 5 ||
ఏతం కిం ను దృశా పిబాంయుత విశాంయస్యాంగమంగైర్నిజైః
కిం వాఽముం నిగరాంయనేన సహసా కిం వైకతామాశ్రయే |
యస్యేత్థం వివశో వికల్పలలితాకూతేన యోషిజ్జనః
కిం తద్యన్న కరోతి దేవి హృదయే యస్య త్వమావర్తసే || 6 ||
విశ్వవ్యాపిని యద్వదీశ్వర ఇతి స్థాణావనన్యాశ్రయః
శబ్దః శక్తిరితి త్రిలోకజనని త్వయ్యేవ తథ్యస్థితిః |
ఇత్థం సత్యపి శక్నువంతి యదిమాః క్షుద్రా రుజో బాధితుం
త్వద్భక్తానపి న క్షిణోషి చ రుషా తద్దేవి చిత్రం మహత్ || 7 ||
ఇందోర్మధ్యగతాం మృగాంకసదృశచ్ఛాయాం మనోహారిణీం
పాండూత్ఫుల్లసరోరుహాసనగతా స్నిగ్ధప్రదీపచ్ఛవిం |
వర్షంతీమమృతం భవాని భవతీం ధ్యాయంతి యే దేహినః
తే నిర్ముక్తరుజో భవంతి రిపవః ప్రోజ్ఝంతి తాన్దూరతః || 8 ||
పూర్ణేందోః శకలైరివాతిబహలైః పీయూషపూరైరివ
క్షీరాబ్ధేర్లహరీభరైరివ సుధాపంకస్య పిండైరివ |
ప్రాలేయైరివ నిర్మితం తవ వపుర్ధ్యాయంతి యే శ్రద్ధయా
చిత్తాంతర్నిహితార్తితాపవిపదస్తే సంపదం బిభ్రతి || 9 ||
యే సంస్మరంతి తరలాం సహసోల్లసంతీం
త్వాం గ్రంథిపంచకభిదం తరుణార్కశోణాం |
రాగార్ణవే బహలరాగిణి మజ్జయంతీం
కృత్స్నం జగద్దధతి చేతసి తాన్మృగాక్ష్యః || 10 ||
లాక్షారసస్నపితపంకజతంతుతన్వీం
అంతః స్మరత్యనుదినం భవతీం భవాని |
యస్తం స్మరప్రతిమమప్రతిమస్వరూపాః
నేత్రోత్పలైర్మృగదృశో భృశమర్చయంతి || 11 ||
స్తుమస్త్వాం వాచమవ్యక్తాం హిమకుందేందురోచిషం |
కదంబమాలాం బిభ్రాణామాపాదతలలంబినీం || 12 ||
మూర్ధ్నీందోః సితపంకజాసనగతాం ప్రాలేయపాండుత్విషం
వర్షంతీమమృతం సరోరుహభువో వక్త్రేఽపి రంధ్రేఽపి చ |
అచ్ఛిన్నా చ మనోహరా చ లలితా చాతిప్రసన్నాపి చ
త్వామేవం స్మరతః స్మరారిదయితే వాక్సర్వతో వల్గతి || 13 ||
దదాతీష్టాన్భోగాన్ క్షపయతి రిపూన్హంతి విపదో
దహత్యాధీన్వ్యాధీన్ శమయతి సుఖాని ప్రతనుతే |
హఠాదంతర్దుఃఖం దలయతి పినష్టీష్టవిరహం
సకృద్ధ్యాతా దేవీ కిమివ నిరవద్యం న కురుతే || 14 ||
యస్త్వాం ధ్యాయతి వేత్తి విందతి జపత్యాలోకతే చింతయ-
-త్యన్వేతి ప్రతిపద్యతే కలయతి స్తౌత్యాశ్రయత్యర్చతి |
యశ్చ త్ర్యంబకవల్లభే తవ గుణానాకర్ణయత్యాదరాత్
తస్య శ్రీర్న గృహాదపైతి విజయస్తస్యాగ్రతో ధావతి || 15 ||
కిం కిం దుఃఖం దనుజదలిని క్షీయతే న స్మృతాయాం
కా కా కీర్తిః కులకమలిని ఖ్యాప్యతే న స్తుతాయాం |
కా కా సిద్ధిః సురవరనుతే ప్రాప్యతే నార్చితాయాం
కం కం యోగం త్వయి న చినుతే చిత్తమాలంబితాయాం || 16 ||
యే దేవి దుర్ధరకృతాంతముఖాంతరస్థాః
యే కాలి కాలఘనపాశనితాంతబద్ధాః |
యే చండి చండగురుకల్మషసింధుమగ్నాః
తాన్పాసి మోచయసి తారయసి స్మృతైవ || 17 ||
లక్ష్మీవశీకరణచూర్ణసహోదరాణి
త్వత్పాదపంకజరజాంసి చిరం జయంతి |
యాని ప్రణామమిలితాని నృణాం లలాటే
లుంపంతి దైవలిఖితాని దురక్షరాణి || 18 ||
రే మూఢాః కిమయం వృథైవ తపసా కాయః పరిక్లిశ్యతే
యజ్ఞైర్వా బహుదక్షిణైః కిమితరే రిక్తీక్రియంతే గృహాః |
భక్తిశ్చేదవినాశినీ భగవతీపాదద్వయీ సేవ్యతాం
ఉన్నిద్రాంబురుహాతపత్రసుభగా లక్ష్మీః పురో ధావతి || 19 ||
యాచే న కంచన న కంచన వంచయామి
సేవే న కంచన నిరస్తసమస్తదైన్యః |
శ్లక్ష్ణం వసే మధురమద్మి భజే వరస్త్రీః
దేవీ హృది స్ఫురతి మే కులకామధేనుః || 20 ||
నమామి యామినీనాథలేఖాలంకృతకుంతలాం |
భవానీం భవసంతాపనిర్వాపణసుధానదీం || 21 ||
ఇతి శ్రీకాళిదాస విరచిత పంచస్తవ్యాం తృతీయః ఘటస్తవః |

పంచస్తవి –4. అంబాస్తవః

యామామనంతి మునయః ప్రకృతిం పురాణీం
విద్యేతి యాం శ్రుతిరహస్యవిదో వదంతి |
తామర్ధపల్లవితశంకరరూపముద్రాం
దేవీమనన్యశరణః శరణం ప్రపద్యే || 1 ||
అంబ స్తవేషు తవ తావదకర్తృకాణి
కుంఠీభవంతి వచసామపి గుంభనాని |
డింభస్య మే స్తుతిరసావసమంజసాపి
వాత్సల్యనిఘ్నహృదయాం భవతీం ధినోతు || 2 ||
వ్యోమేతి బిందురితి నాద ఇతీందులేఖా-
-రూపేతి వాగ్భవతనూరితి మాతృకేతి |
నిఃస్యందమానసుఖబోధసుధాస్వరూపా
విద్యోతసే మనసి భాగ్యవతాం జనానాం || 3 ||
ఆవిర్భవత్పులకసంతతిభిః శరీరై-
-ర్నిఃస్యందమానసలిలైర్నయనైశ్చ నిత్యం |
వాగ్భిశ్చ గద్గదపదాభిరుపాసతే యే
పాదౌ తవాంబ భువనేషు త ఏవ ధన్యాః || 4 ||
వక్త్రం యదుద్యతమభిష్టుతయే భవత్యా-
-స్తుభ్యం నమో యదపి దేవి శిరః కరోతి |
చేతశ్చ యత్త్వయి పరాయణమంబ తాని
కస్యాపి కైరపి భవంతి తపోవిశేషైః || 5 ||
మూలాలవాలకుహరాదుదితా భవాని
నిర్భిద్య షట్సరసిజాని తటిల్లతేవ |
భూయోఽపి తత్ర విశసి ధ్రువమండలేందు-
-నిఃస్యందమానపరమామృతతోయరూపా || 6 ||
దగ్ధం యదా మదనమేకమనేకధా తే
ముగ్ధః కటాక్షవిధిరంకురయాంచకార |
ధత్తే తదాప్రభృతి దేవి లలాటనేత్రం
సత్యం హ్రియైవ ముకులీకృతమిందుమౌలేః || 7 ||
అజ్ఞాతసంభవమనాకలితాన్వవాయం
భిక్షుం కపాలినమవాససమద్వితీయం |
పూర్వం కరగ్రహణమంగలతో భవత్యాః
శంభుం క ఏవ బుబుధే గిరిరాజకన్యే || 8 ||
చర్మాంబరం చ శవభస్మవిలేపనం చ
భిక్షాటనం చ నటనం చ పరేతభూమౌ |
వేతాలసంహతిపరిగ్రహతా చ శంభోః
శోభాం బిభర్తి గిరిజే తవ సాహచర్యాత్ || 9 ||
కల్పోపసంహరణకేలిషు పండితాని
చండాని ఖండపరశోరపి తాండవాని |
ఆలోకనేన తవ కోమలితాని మాత-
-ర్లాస్యాత్మనా పరిణమంతి జగద్విభూత్యై || 10 ||
జంతోరపశ్చిమతనోః సతి కర్మసాంయే
నిఃశేషపాశపటలచ్ఛిదురా నిమేషాత్ |
కల్యాణి దేశికకటాక్షసమాశ్రయేణ
కారుణ్యతో భవతి శాంభవవేదదీక్షా || 11 ||
ముక్తావిభూషణవతీ నవవిద్రుమాభా
యచ్చేతసి స్ఫురసి తారకితేవ సంధ్యా |
ఏకః స ఏవ భువనత్రయసుందరీణాం
కందర్పతాం వ్రజతి పంచశరీం వినాపి || 12 ||
యే భావయంత్యమృతవాహిభిరంశుజాలై-
-రాప్యాయమానభువనామమృతేశ్వరీం త్వాం |
తే లంఘయంతి నను మాతరలంఘనీయాం
బ్రహ్మాదిభిః సురవరైరపి కాలకక్షాం || 13 ||
యః స్ఫాటికాక్షగుణపుస్తకకుండికాఢ్యాం
వ్యాఖ్యాసముద్యతకరాం శరదిందుశుభ్రాం |
పద్మాసనాం చ హృదయే భవతీముపాస్తే
మాతః స విశ్వకవితార్కికచక్రవర్తీ || 14 ||
బర్హావతంసయుతబర్బరకేశపాశాం
గుంజావలీకృతఘనస్తనహారశోభాం |
శ్యామాం ప్రవాలవదనాం సుకుమారహస్తాం
త్వామేవ నౌమి శబరీం శబరస్య జాయాం || 15 ||
అర్ధేన కిం నవలతాలలితేన ముగ్ధే
క్రీతం విభోః పరుషమర్ధమిదం త్వయేతి |
ఆలీజనస్య పరిహాసవచాంసి మన్యే
మందస్మితేన తవ దేవి జడీ భవంతి || 16 ||
బ్రహ్మాండ బుద్బుదకదంబకసంకులోఽయం
మాయోదధిర్వివిధదుఃఖతరంగమాలః |
ఆశ్చర్యమంబ ఝటితి ప్రలయం ప్రయాతి
త్వద్ధ్యానసంతతిమహాబడబాముఖాగ్నౌ || 17 ||
దాక్షాయణీతి కుటిలేతి కుహారిణీతి
కాత్యాయనీతి కమలేతి కలావతీతి |
ఏకా సతీ భగవతీ పరమార్థతోఽపి
సందృశ్యసే బహువిధా నను నర్తకీవ || 18 ||
ఆనందలక్షణమనాహతనాంని దేశే
నాదాత్మనా పరిణతం తవ రూపమీశే |
ప్రత్యఙ్ముఖేన మనసా పరిచీయమానం
శంసంతి నేత్రసలిలైః పులకైశ్చ ధన్యాః || 19 ||
త్వం చంద్రికా శశిని తిగ్మరుచౌ రుచిస్త్వం
త్వం చేతనాసి పురుషే పవనే బలం త్వం |
త్వం స్వాదుతాసి సలిలే శిఖిని త్వమూష్మా
నిఃసారమేవ నిఖిలం త్వదృతే యది స్యాత్ || 20 ||
జ్యోతీంషి యద్దివి చరంతి యదంతరిక్షం
సూతే పయాంసి యదహిర్ధరణీం చ ధత్తే |
యద్వాతి వాయురనలో యదుదర్చిరాస్తే
తత్సర్వమంబ తవ కేవలమాజ్ఞయైవ || 21 ||
సంకోచమిచ్ఛసి యదా గిరిజే తదానీం
వాక్తర్కయోస్త్వమసి భూమిరనామరూపా |
యద్వా వికాసముపయాసి యదా తదానీం
త్వన్నామరూపగణనాః సుకరా భవంతి || 22 ||
భోగాయ దేవి భవతీం కృతినః ప్రణంయ
భ్రూకింకరీకృతసరోజగృహాః సహస్రం |
చింతామణిప్రచయకల్పితకేలిశైలే
కల్పద్రుమోపవన ఏవ చిరం రమంతే || 23 ||
హర్తుం త్వమేవ భవసి త్వదధీనమీశే
సంసారతాపమఖిలం దయయా పశూనాం |
వైకర్తనీ కిరణసంహతిరేవ శక్తా
ధర్మం నిజం శమయితుం నిజయైవ వృష్ట్యా || 24 ||
శక్తిః శరీరమధిదైవతమంతరాత్మా
జ్ఞానం క్రియా కరణమాసనజాలమిచ్ఛా |
ఐశ్వర్యమాయతనమావరణాని చ త్వం
కిం తన్న యద్భవసి దేవి శశాంకమౌలేః || 25 ||
భూమౌ నివృత్తిరుదితా పయసి ప్రతిష్ఠా
విద్యాఽనలే మరుతి శాంతిరతీవకాంతిః |
వ్యోంనీతి యాః కిల కలాః కలయంతి విశ్వం
తాసాం హి దూరతరమంబ పదం త్వదీయం || 26 ||
యావత్పదం పదసరోజయుగం త్వదీయం
నాంగీకరోతి హృదయేషు జగచ్ఛరణ్యే |
తావద్వికల్పజటిలాః కుటిలప్రకారా-
-స్తర్కగ్రహాః సమయినాం ప్రలయం న యాంతి || 27 ||
నిర్దేవయానపితృయానవిహారమేకే
కృత్వా మనః కరణమండలసార్వభౌమం |
ధ్యానే నివేశ్య తవ కారణపంచకస్య
పర్వాణి పార్వతి నయంతి నిజాసనత్వం || 28 ||
స్థూలాసు మూర్తిషు మహీప్రముఖాసు మూర్తేః
కస్యాశ్చనాపి తవ వైభవమంబ యస్యాః |
పత్యా గిరామపి న శక్యత ఏవ వక్తుం
సాపి స్తుతా కిల మయేతి తితిక్షితవ్యం || 29 ||
కాలాగ్నికోటిరుచిమంబ షడధ్వశుద్ధౌ
ఆప్లావనేషు భవతీమమృతౌఘవృష్టిం |
శ్యామాం ఘనస్తనతటాం శకలీకృతాఘాం
ధ్యాయంత ఏవ జగతాం గురవో భవంతి || 30 ||
విద్యాం పరాం కతిచిదంబరమంబ కేచి-
-దానందమేవ కతిచిత్కతిచిచ్చ మాయాం |
త్వాం విశ్వమాహురపరే వయమామనామః
సాక్షాదపారకరుణాం గురుమూర్తిమేవ || 31 ||
కువలయదలనీలం బర్బరస్నిగ్ధకేశం
పృథుతరకుచభారాక్రాంతకాంతావలగ్నం |
కిమిహ బహుభిరుక్తైస్త్వత్స్వరూపం పరం నః
సకలజనని మాతః సంతతం సన్నిధత్తాం || 32 ||
ఇతి శ్రీకాళిదాస విరచిత పంచస్తవ్యాం చతుర్థః అంబాస్తవః |

పంచస్తవి –5. సకలజననీస్తవః

అజానంతో యాంతి క్షయమవశమన్యోన్యకలహై-
-రమీ మాయాగ్రంథౌ తవ పరిలుఠంతః సమయినః |
జగన్మాతర్జన్మజ్వరభయతమః కౌముది వయం
నమస్తే కుర్వాణాః శరణముపయామో భగవతీం || 1 ||
వచస్తర్కాగంయస్వరసపరమానందవిభవ-
-ప్రబోధాకారాయ ద్యుతితులితనీలోత్పలరుచే |
శివాద్యారాధ్యాయ స్తనభరవినంరాయ సతతం
నమస్తస్మై కస్మైచన భవతు ముగ్ధాయ మహసే || 2 ||
అనాద్యంతాభేదప్రణయరసికాపి ప్రణయినీ
శివస్యాసీర్యత్త్వం పరిణయవిధౌ దేవి గృహిణీ |
సవిత్రీ భూతానామపి యదుదభూః శైలతనయా
తదేతత్సంసారప్రణయనమహానాటకముఖం || 3 ||
బ్రువంత్యేకే తత్త్వం భగవతి సదన్యే విదురస-
-త్పరే మాతః ప్రాహుస్తవ సదసదన్యే సుకవయః |
పరే నైతత్సర్వం సమభిదధతే దేవి సుధియ-
-స్తదేతత్త్వన్మాయావిలసితమశేషం నను శివే || 4 ||
లుఠద్గుంజాహారస్తనభరనమన్మధ్యలతికా-
-ముదంచద్ధర్మాంభః కణగుణితవక్త్రాంబుజరుచం |
శివం పార్థత్రాణప్రవణమృగయాకారగుణితం
శివామన్వగ్యాంతీం శరణమహమన్వేమి శబరీం || 5 ||
మిథః కేశాకేశిప్రథననిధనాస్తర్కఘటనాః
బహుశ్రద్ధాభక్తిప్రణతివిషయాః శాస్త్రవిధయః |
ప్రసీద ప్రత్యక్షీభవ గిరిసుతే దేహి శరణం
నిరాలంబం చేతః పరిలుఠతి పారిప్లవమిదం || 6 ||
శునాం వా వహ్నేర్వా ఖగపరిషదో వా యదశనం
కదా కేన క్వేతి క్వచిదపి న కశ్చిత్కలయతి |
అముష్మిన్విశ్వాసం విజహిహి మమాహ్నాయ వపుషి
ప్రపద్యేథాశ్చేతః సకలజననీమేవ శరణం || 7 ||
తటిత్కోటిజ్యోతిర్ద్యుతిదలితషడ్గ్రంథిగహనం
ప్రవిష్టం స్వాధారం పునరపి సుధావృష్టివపుషా |
కిమప్యష్టావింశత్కిరణసకలీభూతమనిశం
భజే ధామ శ్యామం కుచభరనతం బర్బరకచం || 8 ||
చతుష్పత్రాంతః షడ్దలపుటభగాంతస్త్రివలయ-
-స్ఫురద్విద్యుద్వహ్నిద్యుమణినియుతాభద్యుతిలతే |
షడశ్రం భిత్త్వాదౌ దశదలమథ ద్వాదశదలం
కలాశ్రం చ ద్వ్యశ్రం గతవతి నమస్తే గిరిసుతే || 9 ||
కులం కేచిత్ప్రాహుర్వపురకులమన్యే తవ బుధాః
పరే తత్సంభేదం సమభిదధతే కౌలమపరే |
చతుర్ణామప్యేషాముపరి కిమపి ప్రాహురపరే
మహామాయే తత్త్వం తవ కథమమీ నిశ్చినుమహే || 10 ||
షడధ్వారణ్యానీం ప్రలయరవికోటిప్రతిరుచా
రుచా భస్మీకృత్య స్వపదకమలప్రహ్వశిరసాం |
వితన్వానః శైవం కిమపి వపురిందీవరరుచిః
కుచాభ్యామానంరస్తవ పురుషకారో విజయతే || 11 ||
ప్రకాశానందాభ్యామవిదితచరీం మధ్యపదవీం
ప్రవిశ్యైతద్ద్వంద్వం రవిశశిసమాఖ్యం కబలయన్ |
ప్రపద్యోర్ధ్వం నాదం లయదహనభస్మీకృతకులః
ప్రసాదాత్తే జంతుః శివమకులమంబ ప్రవిశతి || 12 ||
మనుష్యాస్తిర్యంచో మరుత ఇతి లోకత్రయమిదం
భవాంభోధౌ మగ్నం త్రిగుణలహరీకోటిలుఠితం |
కటాక్షశ్చేద్యత్ర క్వచన తవ మాతః కరుణయా
శరీరీ సద్యోఽయం వ్రజతి పరమానందతనుతాం || 13 ||
ప్రియంగుశ్యామాంగీమరుణతరవాసం కిసలయాం
సమున్మీలన్ముక్తాఫలవహలనేపథ్యసుభగాం |
స్తనద్వంద్వస్ఫారస్తబకనమితాం కల్పలతికాం
సకృద్ధ్యాయంతస్త్వాం దధతి శివచింతామణిపదం || 14 ||
షడాధారావర్తైరపరిమితమంత్రోర్మిపటలైః
లసన్ముద్రాఫేనైర్బహువిధలసద్దైవతఝషైః |
క్రమస్రోతోభిస్త్వం వహసి పరనాదామృతనదీ
భవాని ప్రత్యగ్రా శివచిదమృతాబ్ధిప్రణయినీ || 15 ||
మహీపాథోవహ్నిశ్వసనవియదాత్మేందురవిభి-
-ర్వపుర్భిగ్రస్తాశైరపి తవ కియానంబ మహిమా |
అమూన్యాలోక్యంతే భగవతి న కుత్రాప్యణుతమా-
-మవస్థాం ప్రాప్తాని త్వయి తు పరమవ్యోమవపుషి || 16 ||
కలామాజ్ఞాం ప్రజ్ఞాం సమయమనుభూతిం సమరసం
గురుం పారంపర్యం వినయముపదేశం శివపదం |
ప్రమాణం నిర్వాణం ప్రకృతిమభిభూతిం పరగుహాం
విధిం విద్యామాహుః సకలజననీమేవ మునయః || 17 ||
ప్రలీనే శబ్దౌఘే తదను విరతే బిందువిభవే
తతస్తత్త్వే చాష్టధ్వనిభిరనపాయిన్యధిగతే |
శ్రితే శాక్తే పర్వణ్యనుకలితచిన్మాత్ర గహనాం
స్వసంవిత్తిం యోగీ రసయతి శివాఖ్యాం భగవతీం || 18 ||
పరానందాకారాం నిరవధిశివైశ్వర్యవపుషం
నిరాకారాం జ్ఞానప్రకృతిమపరిచ్ఛిన్నకరుణాం |
సవిత్రీం లోకానాం నిరతిశయధామాస్పదపదాం
భవో వా మోక్షో వా భవతు భవతీమేవ భజతాం || 19 ||
జగత్కాయే కృత్వా తదపి హృదయే తచ్చ పురుషే
పుమాంసం బిందుస్థం తదపి వియదాఖ్యే చ గహనే |
తదేతద్జ్ఞానాఖ్యే తదపి పరమానందగహనే
మహావ్యోమాకారే త్వదనుభవశీలో విజయతే || 20 ||
విధే వేద్యే విద్యే వివిధసమయే వేదగులికే
విచిత్రే విశ్వాద్యే వినయసులభే వేదజనని |
శివజ్ఞే శూలస్థే శివపదవదాన్యే శివనిధే
శివే మాతర్మహ్యం త్వయి వితర భక్తిం నిరుపమాం || 21 ||
విధేర్ముండం హృత్వా యదకురుత పాత్రం కరతలే
హరిం శూలప్రోతం యదగమయదంసాభరణతాం |
అలంచక్రే కంఠం యదపి గరలేనాంబ గిరిశః
శివస్థాయాః శక్తేస్తదిదమఖిలం తే విలసితం || 22 ||
విరించ్యాఖ్యా మాతః సృజసి హరిసంజ్ఞా త్వమవసి
త్రిలోకీం రుద్రాఖ్యా హరసి విదధాసీశ్వరదశాం |
భవంతీ నాదాఖ్యా విహరసి చ పాశౌఘదలనీ
త్వమేవైకాఽనేకా భవసి కృతిభేదైర్గిరిసుతే || 23 ||
మునీనాం చేతోభిః ప్రమృదితకషాయైరపి మనా-
-గశక్యం సంస్ప్రష్టుం చకితచకితైరంబ సతతం |
శ్రుతీనాం మూర్ధానః ప్రకృతికఠినాః కోమలతరే
కథం తే విందంతే పదకిసలయే పార్వతి పదం || 24 ||
తటిద్వల్లీం నిత్యామమృతసరితం పారరహితాం
మలోత్తీర్ణాం జ్యోత్స్నాం ప్రకృతిమగుణగ్రంథిగహనాం |
గిరాం దూరాం విద్యామవినతకుచాం విశ్వజననీ-
-మపర్యంతాం లక్ష్మీమభిదధతి సంతో భగవతీం || 25 ||
శరీరం క్షిత్యంభః ప్రభృతిరచితం కేవలమచిత్
సుఖం దుఃఖం చాయం కలయతి పుమాంశ్చేతన ఇతి |
స్ఫుటం జానానోఽపి ప్రభవతి న దేహీ రహయితుం
శరీరాహంకారం తవ సమయబాహ్యో గిరిసుతే || 26 ||
పితా మాతా భ్రాతా సుహృదనుచరః సద్మ గృహిణీ
వపుః క్షేత్రం మిత్రం ధనమపి యదా మాం విజహతి |
తదా మే భిందానా సపది భయమోహాంధతమసం
మహాజ్యోత్స్నే మాతర్భవ కరుణయా సన్నిధికరీ || 27 ||
సుతా దక్షస్యాదౌ కిల సకలమాతస్త్వముదభూః
సదోషం తం హిత్వా తదను గిరిరాజస్య దుహితా |
అనాద్యంతా శంభోరపృథగపి శక్తిర్భగవతీ
వివాహాజ్జాయాసీత్యహహ చరితం వేత్తి తవ కః || 28 ||
కణాస్త్వద్దీప్తీనాం రవిశశికృశానుప్రభృతయః
పరం బ్రహ్మ క్షుద్రం తవ నియతమానందకణికా |
శివాది క్షిత్యంతం త్రివలయతనోః సర్వముదరే
తవాస్తే భక్తస్య స్ఫురసి హృది చిత్రం భగవతి || 29 ||
పురః పశ్చాదంతర్బహిరపరిమేయం పరిమితం
పరం స్థూలం సూక్ష్మం సకలమకులం గుహ్యమగుహం |
దవీయో నేదీయః సదసదితి విశ్వం భగవతీ
సదా పశ్యంత్యాఖ్యాం వహసి భువనక్షోభజననీం || 30 ||
ప్రవిశ్య త్వన్మార్గం సహజదయయా దేశికదృశా
షడధ్వధ్వాంతౌఘచ్ఛిదురగణనాతీతకరుణాం |
పరామాజ్ఞాకారాం సపది శివయంతీం శివతనుం
స్వమాత్మానం ధన్యాశ్చిరముపలభంతే భగవతీం || 31 ||
మయూఖాః పూష్ణీవ జ్వలన ఇవ తద్దీప్తికణికాః
పయోధౌ కల్లోలాః ప్రతిహతమహింనీవ పృషతః |
ఉదేత్యోదేత్యాంబ త్వయి సహ నిజైః సాత్త్వికగుణై-
-ర్భజంతే తత్త్వౌఘాః ప్రశమమనుకల్పం పరవశాః || 32 ||
విధుర్విష్ణుర్బ్రహ్మా ప్రకృతిరణురాత్మా దినకరః
స్వభావో జైనేంద్రః సుగతమునిరాకాశమలినః |
శివః శక్తిశ్చేతి శ్రుతివిషయతాం తాముపగతాం
వికల్పైరేభిస్త్వామభిదధతి సంతో భగవతీం || 33 ||
శివస్త్వం శక్తిస్త్వం త్వమసి సమయా త్వం సమయినీ
త్వమాత్మా త్వం దీక్షా త్వమయమణిమాదిర్గుణగణః |
అవిద్యా త్వం విద్యా త్వమసి నిఖిలం త్వం కిమపరం
పృథక్తత్త్వం త్వత్తో భగవతి న వీక్షామహ ఇమే || 34 ||
త్వయాసౌ జానీతే రచయతి భవత్యైవ సతతం
త్వయైవేచ్ఛత్యంబ త్వమసి నిఖిలా యస్య తనవః |
జగత్సాంయం శంభోర్వహసి పరమవ్యోమవపుషః
తథాప్యర్ధం భూత్వా విహరసి శివస్యేతి కిమిదం || 35 ||
అసంఖ్యైః ప్రాచీనైర్జనని జననైః కర్మవిలయా-
-త్సకృజ్జన్మన్యంతే గురువపుషమాసాద్య గిరిశం |
అవాప్యాజ్ఞాం శైవీం శివతనుమపి త్వాం విదితవా-
-న్నయేయం త్వత్పూజాస్తుతివిరచనేనైవ దివసాన్ || 36 ||
యత్షట్పత్రం కమలముదితం తస్య యా కర్ణికాఖ్యా
యోనిస్తస్యాః ప్రథితముదరే యత్తదోంకారపీఠం |
తస్యాప్యంతః కుచభరనతాం కుండలీతి ప్రసిద్ధాం
శ్యామాకారాం సకలజననీం సంతతం భావయామి || 37 ||
భువి పయసి కృశానౌ మారుతే ఖే శశాంకే
సవితరి యజమానేఽప్యష్టధా శక్తిరేకా |
వహసి కుచభరాభ్యాం యావనంరాపి విశ్వం
సకలజనని సా త్వం పాహి మామిత్యవాచ్యం || 38 ||
ఇతి శ్రీకాళిదాస విరచిత పంచస్తవ్యాం పంచమః సకలజననీస్తవః |

శ్రీ భవాన్యష్టకం

న తాతో న మాతా న బంధుర్న దాతా
న పుత్రో న పుత్రీ న భృత్యో న భర్తా |
న జాయా న విద్యా న వృత్తిర్మమైవ
గతిస్త్వం గతిస్త్వం త్వమేకా భవాని || 1 ||
భవాబ్ధావపారే మహాదుఃఖభీరు
పపాత ప్రకామీ ప్రలోభీ ప్రమత్తః |
కుసంసారపాశప్రబద్ధః సదాహం
గతిస్త్వం గతిస్త్వం త్వమేకా భవాని || 2 ||
న జానామి దానం న చ ధ్యానయోగం
న జానామి తంత్రం న చ స్తోత్రమంత్రం |
న జానామి పూజాం న చ న్యాసయోగం
గతిస్త్వం గతిస్త్వం త్వమేకా భవాని || 3 ||
న జానామి పుణ్యం న జానామి తీర్థం
న జానామి ముక్తిం లయం వా కదాచిత్ |
న జానామి భక్తిం వ్రతం వాపి మాత-
-ర్గతిస్త్వం గతిస్త్వం త్వమేకా భవాని || 4 ||
కుకర్మీ కుసంగీ కుబుద్ధిః కుదాసః
కులాచారహీనః కదాచారలీనః |
కుదృష్టిః కువాక్యప్రబంధః సదాహం
గతిస్త్వం గతిస్త్వం త్వమేకా భవాని || 5 ||
ప్రజేశం రమేశం మహేశం సురేశం
దినేశం నిశీథేశ్వరం వా కదాచిత్ |
న జానామి చాన్యత్ సదాహం శరణ్యే
గతిస్త్వం గతిస్త్వం త్వమేకా భవాని || 6 ||
వివాదే విషాదే ప్రమాదే ప్రవాసే
జలే చానలే పర్వతే శత్రుమధ్యే |
అరణ్యే శరణ్యే సదా మాం ప్రపాహి
గతిస్త్వం గతిస్త్వం త్వమేకా భవాని || 7 ||
అనాథో దరిద్రో జరారోగయుక్తో
మహాక్షీణదీనః సదా జాడ్యవక్త్రః |
విపత్తౌ ప్రవిష్టః ప్రనష్టః సదాహం
గతిస్త్వం గతిస్త్వం త్వమేకా భవాని || 8 ||

శ్రీ భవానీ భుజంగ స్తుతిః

షడాధారపంకేరుహాంతర్విరాజ-
-త్సుషుంనాంతరాలేఽతితేజోల్లసంతీం |
సుధామండలం ద్రావయంతీం పిబంతీం
సుధామూర్తిమీడే చిదానందరూపాం || 1 ||
జ్వలత్కోటిబాలార్కభాసారుణాంగీం
సులావణ్యశృంగారశోభాభిరామాం |
మహాపద్మకింజల్కమధ్యే విరాజ-
-త్త్రికోణే నిషణ్ణాం భజే శ్రీభవానీం || 2 ||
క్వణత్కింకిణీనూపురోద్భాసిరత్న-
-ప్రభాలీఢలాక్షార్ద్రపాదాబ్జయుగ్మం |
అజేశాచ్యుతాద్యైః సురైః సేవ్యమానం
మహాదేవి మన్మూర్ధ్ని తే భావయామి || 3 ||
సుశోణాంబరాబద్ధనీవీవిరాజ-
-న్మహారత్నకాంచీకలాపం నితంబం |
స్ఫురద్దక్షిణావర్తనాభిం చ తిస్రో
వలీరంబ తే రోమరాజిం భజేఽహం || 4 ||
లసద్వృత్తముత్తుంగమాణిక్యకుంభో-
-పమశ్రి స్తనద్వంద్వమంబాంబుజాక్షి |
భజే దుగ్ధపూర్ణాభిరామం తవేదం
మహాహారదీప్తం సదా ప్రస్నుతాస్యం || 5 ||
శిరీషప్రసూనోల్లసద్బాహుదండై-
-ర్జ్వలద్బాణకోదండపాశాంకుశైశ్చ |
చలత్కంకణోదారకేయూరభూషో-
-జ్జ్వలద్భిర్లసంతీం భజే శ్రీభవానీం || 6 ||
శరత్పూర్ణచంద్రప్రభాపూర్ణబింబా-
-ధరస్మేరవక్త్రారవిందాం సుశాంతాం |
సురత్నావళీహారతాటంకశోభాం
మహాసుప్రసన్నాం భజే శ్రీభవానీం || 7 ||
సునాసాపుటం సుందరభ్రూలలాటం
తవౌష్ఠశ్రియం దానదక్షం కటాక్షం |
లలాటే లసద్గంధకస్తూరిభూషం
స్ఫురచ్ఛ్రీముఖాంభోజమీడేఽహమంబ || 8 ||
చలత్కుంతలాంతర్భ్రమద్భృంగబృందం
ఘనస్నిగ్ధధంమిల్లభూషోజ్జ్వలం తే |
స్ఫురన్మౌళిమాణిక్యబద్ధేందురేఖా-
-విలాసోల్లసద్దివ్యమూర్ధానమీడే || 9 ||
ఇతి శ్రీభవాని స్వరూపం తవేదం
ప్రపంచాత్పరం చాతిసూక్ష్మం ప్రసన్నం |
స్ఫురత్వంబ డింభస్య మే హృత్సరోజే
సదా వాఙ్మయం సర్వతేజోమయం చ || 10 ||
గణేశాభిముఖ్యాఖిలైః శక్తిబృందై-
-ర్వృతాం వై స్ఫురచ్చక్రరాజోల్లసంతీం |
పరాం రాజరాజేశ్వరి త్రైపురి త్వాం
శివాంకోపరిస్థాం శివాం భావయామి || 11 ||
త్వమర్కస్త్వమిందుస్త్వమగ్నిస్త్వమాప-
-స్త్వమాకాశభూవాయవస్త్వం మహత్త్వం |
త్వదన్యో న కశ్చిత్ ప్రపంచోఽస్తి సర్వం
సదానందసంవిత్స్వరూపం భజేఽహం || 12 ||
శ్రుతీనామగంయే సువేదాగమజ్ఞా
మహింనో న జానంతి పారం తవాంబ |
స్తుతిం కర్తుమిచ్ఛామి తే త్వం భవాని
క్షమస్వేదమత్ర ప్రముగ్ధః కిలాహం || 13 ||
గురుస్త్వం శివస్త్వం చ శక్తిస్త్వమేవ
త్వమేవాసి మాతా పితా చ త్వమేవ |
త్వమేవాసి విద్యా త్వమేవాసి బంధు-
-ర్గతిర్మే మతిర్దేవి సర్వం త్వమేవ || 14 ||
శరణ్యే వరేణ్యే సుకారుణ్యమూర్తే
హిరణ్యోదరాద్యైరగణ్యే సుపుణ్యే |
భవారణ్యభీతేశ్చ మాం పాహి భద్రే
నమస్తే నమస్తే నమస్తే భవాని || 15 ||
ఇతీమాం మహచ్ఛ్రీభవానీభుజంగం
స్తుతిం యః పఠేద్భక్తియుక్తశ్చ తస్మై |
స్వకీయం పదం శాశ్వతం వేదసారం
శ్రియం చాష్టసిద్ధిం భవానీ దదాతి || 16 ||
భవానీ భవానీ భవానీ త్రివారం
ఉదారం ముదా సర్వదా యే జపంతి |
న శోకం న మోహం న పాపం న భీతిః
కదాచిత్కథంచిత్కుతశ్చిజ్జనానాం || 17 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ భవానీ భుజంగం సంపూర్ణం |

మాతృకావర్ణ స్తోత్రం

గణేశ గ్రహ నక్షత్ర యోగినీ రాశి రూపిణీం |
దేవీం మంత్రమయీం నౌమి మాతృకాపీఠ రూపిణీం || 1 ||
ప్రణమామి మహాదేవీం మాతృకాం పరమేశ్వరీం |
కాలహల్లోహలోల్లోల కలనాశమకారిణీం || 2 ||
యదక్షరైకమాత్రేఽపి సంసిద్ధే స్పర్ధతే నరః |
రవితార్క్ష్యేందు కందర్ప శంకరానల విష్ణుభిః || 3 ||
యదక్షర శశిజ్యోత్స్నామండితం భువనత్రయం |
వందే సర్వేశ్వరీం దేవీం మహాశ్రీసిద్ధమాతృకాం || 4 ||
యదక్షర మహాసూత్ర ప్రోతమేతజ్జగత్రయం |
బ్రహ్మాండాది కటాహాంతం తాం వందే సిద్ధమాతృకాం || 5 ||
యదేకాదశమాధారం బీజం కోణత్రయోద్భవం |
బ్రహ్మాండాది కటాహాంతం జగదద్యాపి దృశ్యతే || 6 ||
అకచాదిటతోన్నద్ధపయశాక్షర వర్గిణీం |
జ్యేష్ఠాంగ బాహుపాదాగ్ర మధ్యస్వాంత నివాసినీం || 7 ||
తామీకారాక్షరోద్ధారాం సారాత్సారాం పరాత్పరాం |
ప్రణమామి మహాదేవీం పరమానంద రూపిణీం || 8 ||
అద్యాపి యస్యా జానంతి న మనాగపి దేవతాః |
కేయం కస్మాత్ క్వ కేనేతి సరూపారూప భావనాం || 9 ||
వందే తామహమక్షయ్యామకారాక్షర రూపిణీం |
దేవీం కులకలోల్లాస ప్రోల్లసంతీం పరాం శివాం || 10 ||
వర్గానుక్రమయోగేన యస్యాం మాత్రాష్టకం స్థితం |
వందే తామష్టవర్గోత్థ మహాసిద్ధ్యష్టకేశ్వరీం || 11 ||
కామపూర్ణజకారాఖ్య శ్రీపీఠాంతర్నివాసినీం |
చతురాజ్ఞా కోశభూతాం నౌమి శ్రీత్రిపురామహం || 12 ||
ఇతి ద్వాదశభిః శ్లోకైః స్తవనం సర్వసిద్ధికృత్ |
దేవ్యాస్త్వఖండరూపాయాః స్తవనం తవ తద్యతః || 13 ||
భూమౌ స్ఖలిత పాదానాం భూమిరేవావలంబనం |
త్వయి జాతాపరాధానాం త్వమేవ శరణం శివే || 14 ||

 శ్రీ మీనాక్షీ నవరత్నమాలా

గౌరీం కాంచనపద్మినీతటగృహాం శ్రీసుందరేశప్రియాం
నీపారణ్యసువర్ణకంతుకపరిక్రీడావిలోలాముమాం |
శ్రీమత్పాండ్య కులాచలాగ్రవిలసద్రత్నప్రదీపాయితాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 1 ||
గౌరీం వేదకదంబకాననశుకీం శాస్త్రాటవీకేకినీం
వేదాంతాఖిలధర్మహేమనళినీహంసీం శివాం శాంభవీం |
ఓంకారాబుజనీలమత్తమధుపాం మంత్రాంరశాఖాపికాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 2 ||
గౌరీం నూపురశోభితాంఘ్రికమలాం తూణోల్లసజ్జంఘికాం
దంతాదర్శసమానజానుయుగళాం రంభానిభోరూజ్జ్వలాం |
కాంచీబద్ధమనోజ్ఞపీన జఘనామావర్తనాభీహృదాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 3 ||
గౌరీం వ్యోమసమానమధ్యమధృతాముత్తుంగవక్షోరుహాం
వీణామంజుళశారికాన్వితకరాం శంఖాభకంఠోజ్జ్వలాం |
రాకాచంద్రసమానచారువదనాం లోలంబనీలాలకాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 4 ||
గౌరీం కుంకుమపంకలేపితలసద్వక్షోజకుంభోజ్జ్వలాం
కస్తూరీతిలకాళికామలయజోల్లేపోల్లసత్కంధరాం |
లాక్షాకర్దమ శోభిపాదయుగళాం సిందూరసీమంతినీం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 5 ||
గౌరీం మంజుళమీననేత్రయుగళాం కోదండసుభ్రూలతాం
బింబోష్ఠీం జితకుందదంతరుచిరాం చాంపేయనాసోజ్జ్వలాం |
అర్ధేందుప్రతిబింబఫాలరుచిరామాదర్శగండస్థలాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 6 ||
గౌరీం కాంచనకంకణాంగదధరాం నాసోల్లసన్మౌక్తికాం
కాంచీహారకిరీటకుండలశిరోమాణిక్యభూషోజ్జ్వలాం |
మంజీరాంగుళిముద్రికాంఘ్రికటకగ్రైవేయకాలంకృతాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 7 ||
గౌరీం చంపకమల్లికాదికుసుమాం పున్నాగసౌగంధికాం
ద్రోణేందీవరకుందజాతివకుళైరాబద్ధచూళీయుతాం |
మందారారుణపుష్పకైతకదళైః శ్రేణీలసద్వేణికాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 8 ||
గౌరీం దాడిమపుష్పవర్ణవిలసద్దివ్యాంబరాలంకృతాం
చంద్రాంశోపమచారుచామరకరాం శ్రీభారతీసేవితాం |
నానారత్నసువర్ణదండవిలసన్ముక్తాతపత్రోజ్జ్వలాం
మీనాక్షీం మధురేశ్వరీం శుకధరాం శ్రీపాండ్యబాలాం భజే || 9 ||
వాచా వా మనసాపి వా గిరిసుతే కాయేన వా సంతతం
మీనాక్షీతి కదాచిదంబ కురుతేత్వన్నామసంకీర్తనం |
లక్ష్మీః తస్య గృహే వసత్యనుదినం వాణీ చ వక్త్రాంబుజే
ధర్మాద్యష్టచతుష్టయం కరతలే ప్రాప్తం భవేన్నిశ్చయః || 10 ||

శ్రీ రేణుకా కవచం

జమదగ్నిప్రియాం దేవీం రేణుకామేకమాతరం
సర్వారంభే ప్రసీద త్వం నమామి కులదేవతాం |
అశక్తానాం ప్రకారో వై కథ్యతాం మమ శంకర
పురశ్చరణకాలేషు కా వా కార్యా క్రియాపరా ||
శ్రీ శంకర ఉవాచ |
వినా జపం వినా దానం వినా హోమం మహేశ్వరి |
రేణుకా మంత్రసిద్ధి స్యాన్నిత్యం కవచ పాఠతః ||
త్రైలోక్యవిజయం నామ కవచం పరమాద్భుతం |
సర్వసిద్ధికరం లోకే సర్వరాజవశంకరం ||
డాకినీభూతవేతాలబ్రహ్మరాక్షసనాశనం |
పురా దేవాసురే యుద్ధే మాహిషే లోకే విగ్రహే ||
బ్రహ్మణా నిర్మితా రక్షా సాధకానాం సుఖాయ చ |
మంత్రవీర్యం సమోపేతం భూతాపస్మారనాశనం ||
దేవైర్దేవస్య విజయే సిద్ధేః ఖేచరసిద్ధయే |
దివా రాత్రమధీతం స్యాత్ రేణుకా కవచం ప్రియే ||
వనే రాజగృహే యుద్ధే బ్రహ్మరాక్షససంకులే |
బంధనే గమనే చైవ కర్మణి రాజసంకటే ||
కవచ స్మరణాదేవ సర్వం కల్యాణమశ్నుతే |
రేణుకాయాః మహాదేవ్యాః కవచం శృణు పార్వతి ||
యస్య స్మరణమాత్రేణ ధర్మకామార్థభాజనం |
రేణుకాకవచస్యాస్య ఋషిర్బ్రహ్మా విధీయతే ||
ఛందశ్చిత్రాహ్వయం ప్రోక్తం దేవతా రేణుకా స్మృతా |
పృథ్వీ బీజం రమా శక్తిః పురుషార్థచతుష్టయం ||
వినియోగో మహేశాని తదా కాలే ప్రకీర్తితః |
ధ్యాత్వా దేవీం మహామాయాం జగన్మాతరమంబికాం ||
పూర్ణకుంభసమాయుక్తాం ముక్తాహారవిరాజితాం |
స్వర్ణాలంకారసంయుక్తాం స్వర్ణసింహాసనస్థితాం ||
మస్తకే గురుపాదాబ్జం ప్రణంయ కవచం పఠేత్ |
ఇంద్రో మాం రక్షతు ప్రాచ్యాం వహ్నౌ వహ్నిః సురేశ్వరి ||
యాంయాం యమః సదా పాతు నైరృత్యాం నిరృతిస్తథా |
పశ్చిమే వరుణః పాతు వాయవ్యే వాయుదేవతా ||
ధనశ్చోత్తరే పాతు ఈశాన్యామీశ్వరో విభుః |
ఊర్ధ్వం బ్రహ్మా సదా పాతు అనంతోఽధః సదాఽవతు ||
పంచాంతకో మహేంద్రశ్చ వామకర్ణేందుభూషితః |
ప్రణవం పుటితం కృత్వా తత్కృత్వా ప్రణవం పునః ||
సముచ్చార్య తతో దేవీ కవచం ప్రపఠే తథా |
బ్రహ్మాణీ మే శిరః పాతు నేత్రే పాతు మహేశ్వరీ ||
వైష్ణవీ నాసికాయుగ్మం కర్ణయోః కర్ణవాసినీ |
కంఠం మాతు మహాలక్ష్మీర్హృదయం చండభైరవీ ||
బాహూ మే బగలా పాతు కరౌ మహిషమర్దినీ |
కరాంగులీషు కేశేషు నాభిం మే చర్చికాఽవతు ||
గుహ్యం గుహ్యేశ్వరీ పాతు ఊరూ పాతు మహామతిః |
జానునీ జననీ రామా గుల్ఫయోర్నారసింహికా ||
వసుంధరా సదా పాదౌ పాయాత్పాదాంగులీషు చ |
రోమకూపే మేదమజ్జా రక్తమాంసాస్థిఖండికే ||
రేణుకా జననీ పాతు మహాపురనివాసినీ |
రక్షాహీనం తు యత్ స్థానం వర్జితం కవచేన తు ||
పూర్వం బీజం సముచ్చార్య సంపుటక్రమయోగతః |
ముద్రాం వధ్వా మహేశాని గోలం న్యాసం సమాచరేత్ ||
అస్య శ్రీరేణుకా కవచమంత్రస్య బ్రహ్మా ఋషిః అనుష్టుప్ ఛందః రేణుకా దేవతా లం బీజం రేణుకా ప్రీత్యర్థే గోలన్యాసే వినియోగః |
ఓం రాం అంగుష్ఠాభ్యాం నమః |
ఓం రీం తర్జనీభ్యాం నమః |
ఓం రూం మధ్యమాభ్యాం నమః |
ఓం రైం అనామికాభ్యాం నమః |
ఓం రౌం కనిష్ఠికాభ్యాం నమః |
ఓం రః కరతలకరపృష్ఠాభ్యాం నమః |
ఓం పం నమః మూర్ధ్ని |
ఓం ఫం నమః దక్షిణనేత్రే |
ఓం బం నమః వామనేత్రే |
ఓం భం నమః దక్షిణనాసాపుటే |
ఓం మం నమః వామనాసాపుటే |
ఓం యం నమః దక్షిణకర్ణే |
ఓం రం నమః వామకర్ణే |
ఓం లం నమః ముఖే |
ఓం వం నమః గుదే |
కవచం |
బ్రహ్మాణీ బ్రహ్మభాగే చ శిరో ధరణిధారిణీ |
రక్ష రక్ష మహేశాని సదా మాం పాహి పార్వతీ ||
భైరవీ త్రిపురా బాలా వజ్రా మే తారిణీ పరా |
రక్ష రక్ష మహేశాని సదా మాం పాహి పార్వతీ ||
ఏషా మేఽంగం సదా పాతు పార్వతీ హరవల్లభా |
మహిషాసురసంహర్త్రీ విధాతృవరదాయినీ ||
మస్తకే పాతు మే నిత్యం మహాకాలీ ప్రసీదతు |
ఆకాశే తాడకా పాతు పాతాలే వహ్నివాసినీ ||
వామదక్షిణయోశ్చాపి కాలికా చ కరాలికా |
ధనుర్బాణధరా చైవ ఖడ్గఖట్వాంగధారిణీ ||
సర్వాంగం మే సదా పాతు రేణుకా వరదాయినీ |
రాం రాం రాం రేణుకే మాతర్భార్గవోద్ధారకారిణీ ||
రాజరాజకులోద్భూతే సంగ్రామే శత్రుసంకటే |
జలాప్నావ్యే వ్యాఘ్రభయే తథా రాజభయేఽపి చ |
శ్మశానే సంకటే ఘోరే పాహి మాం పరమేశ్వరి ||
రూపం దేహి యశో దేహి ద్విషతాం నాశమేవ చ |
ప్రసాదః స్యాచ్ఛుభో మాతర్వరదా రేణుకే భవ ||
ఐం మహేశి మహేశ్వరి చండికే మే
భుజంగధారిణి శంఖకపాలికే |
కనకకుండలమండలభాజనే
వపురిదం చ పునీహి మహేశ్వరి ||
ఇదం శ్రీకవచం దేవ్యాః రేణుకాయా మహేశ్వరి |
త్రికాలం యః పఠేన్నిత్యం తస్య సిద్ధిః ప్రజాయతే ||
గ్రహణేఽర్కస్య చంద్రస్య శుచిః పూర్వముపోషితః |
శతత్రయావృత్తిపాఠాద్మంత్రసిద్ధిః ప్రజాయతే ||
నదీసంగమమాసాద్య నాభిమాత్రోదకస్థితః |
రవిమండలముద్వీక్ష్య జలే తత్ర స్థితాం శివాం ||
విచింత్య మండలే దేవీ కార్యే సిద్ధిర్భవేద్ధ్రువం |
ఘటం తవ ప్రతిష్ఠాప్య విభూతిస్తత్ర వేశయేత్ |
దీపం సర్షపతైలేన కవచం త్రిః పఠేత్తదా ||
భూతప్రేతపిశాచాశ్చ డాకిన్యో యాతుధానికా |
సర్వ తే నాశమాయాంతి కవచస్మరణాత్ప్రియే ||
ధనం ధాన్యం యశో మేధాం యత్కించిన్మనసేప్సితం |
కవచస్మరణాదేవ సర్వమాప్నోతి నిత్యశః ||
ఇతి శ్రీ భైరవరుద్రయామలే రేణుకా కవచం |
 

శ్రీ వాసవీకన్యకాష్టకం

నమో దేవ్యై సుభద్రాయై కన్యకాయై నమో నమః |
శుభం కురు మహాదేవి వాసవ్యైచ నమో నమః || 1 ||
జయాయై చంద్రరూపాయై చండికాయై నమో నమః |
శాంతిమావహనోదేవి వాసవ్యై తే నమో నమః || 2 ||
నందాయైతే నమస్తేస్తు గౌర్యై దేవ్యై నమో నమః |
పాహినః పుత్రదారాంశ్చ వాసవ్యై తే నమో నమః || 3 ||
అపర్ణాయై నమస్తేస్తు కౌసుంభ్యై తే నమో నమః |
నమః కమలహస్తాయై వాసవ్యై తే నమో నమః || 4 ||
చతుర్భుజాయై శర్వాణ్యై శుకపాణ్యై నమో నమః |
సుముఖాయై నమస్తేస్తు వాసవ్యై తే నమో నమః || 5 ||
కమలాయై నమస్తేస్తు విష్ణునేత్ర కులాలయే |
మృడాన్యైతే నమస్తేస్తు వాసవ్యై తే నమో నమః || 6 ||
నమశ్శీతలపాదాయై నమస్తే పరమేశ్వరీ |
శ్రియం నోదేహి మాతస్త్వం వాసవ్యై తే నమో నమః || 7 ||
త్వత్పాదపద్మవిన్యాసం చంద్రమండల శీతలం |
గృహేషు సర్వదాఽస్మాకం దేహి శ్రీ పరమేశ్వరి || 8 ||

శ్రీ వాసవీ స్తోత్రం

కైలాసాచలసన్నిభే గిరిపురే సౌవర్ణశృంగే మహ-
స్తంభోద్యన్ మణిమంటపే సురుచిర ప్రాంతే చ సింహాసనే |
ఆసీనం సకలాఽమరార్చితపదాం భక్తార్తి విధ్వంసినీం
వందే వాసవి కన్యకాం స్మితముఖీం సర్వార్థదామంబికాం ||
నమస్తే వాసవీ దేవీ నమస్తే విశ్వపావని |
నమస్తే వ్రతసంబద్ధా కౌమాత్రే తే నమో నమః ||
నమస్తే భయసంహారీ నమస్తే భవనాశినీ |
నమస్తే భాగ్యదా దేవీ వాసవీ తే నమో నమః ||
నమస్తే అద్భుతసంధానా నమస్తే భద్రరూపిణీ |
నమస్తే పద్మపత్రాక్షీ సుందరాంగీ నమో నమః ||
నమస్తే విబుధానందా నమస్తే భక్తరంజనీ |
నమస్తే యోగసంయుక్తా వాణిక్యాన్యా* నమో నమః ||
నమస్తే బుధసంసేవ్యా నమస్తే మంగళప్రదే |
నమస్తే శీతలాపాంగీ శాంకరీ తే నమో నమః |
నమస్తే జగన్మాతా నమస్తే కామదాయినీ |
నమస్తే భక్తనిలయా వరదే తే నమో నమః ||
నమస్తే సిద్ధసంసేవ్యా నమస్తే చారుహాసినీ |
నమస్తే అద్భుతకళ్యాణీ శర్వాణీ తే నమో నమః ||
నమస్తే భక్తసంరక్ష-దీక్షాసంబద్ధకంకణా |
నమస్తే సర్వకాంయార్థ వరదే తే నమో నమః ||
దేవీం ప్రణంయ సద్భక్త్యా సర్వకాంయార్థ సంపదాన్ |
లభతే నాఽత్ర సందేహో దేహాంతే ముక్తిమాన్ భవేత్ ||
శ్రీమాతా కన్యకా పరమేశ్వరీ దేవ్యై నమః |

శ్రీ వాసవీకన్యకాపరమేశ్వరీ అష్టోత్తరశతనామావళిః

ఓం శ్రీవాసవాంబాయై నమః |
ఓం శ్రీకన్యకాయై నమః |
ఓం జగన్మాత్రే నమః |
ఓం ఆదిశక్త్యై నమః |
ఓం దేవ్యై నమః |
ఓం కరుణాయై నమః |
ఓం ప్రకృతిస్వరూపిణ్యై నమః |
ఓం విద్యాయై నమః |
ఓం శుభాయై నమః | 9
ఓం ధర్మస్వరూపిణ్యై నమః |
ఓం వైశ్యకులోద్భవాయై నమః |
ఓం సర్వస్యై నమః |
ఓం సర్వజ్ఞాయై నమః |
ఓం నిత్యాయై నమః |
ఓం త్యాగస్వరూపిణ్యై నమః |
ఓం భద్రాయై నమః |
ఓం వేదవేద్యాయై నమః |
ఓం సర్వపూజితాయై నమః | 18
ఓం కుసుమపుత్రికాయై నమః |
ఓం కుసుమదంతీవత్సలాయై నమః |
ఓం శాంతాయై నమః |
ఓం గంభీరాయై నమః |
ఓం శుభాయై నమః |
ఓం సౌందర్యనిలయాయై నమః |
ఓం సర్వహితాయై నమః |
ఓం శుభప్రదాయై నమః |
ఓం నిత్యముక్తాయై నమః | 27
ఓం సర్వసౌఖ్యప్రదాయై నమః |
ఓం సకలధర్మోపదేశకారిణ్యై నమః |
ఓం పాపహరిణ్యై నమః |
ఓం విమలాయై నమః |
ఓం ఉదారాయై నమః |
ఓం అగ్నిప్రవిష్టాయై నమః |
ఓం ఆదర్శవీరమాత్రే నమః |
ఓం అహింసాస్వరూపిణ్యై నమః |
ఓం ఆర్యవైశ్యపూజితాయై నమః | 36
ఓం భక్తరక్షణతత్పరాయై నమః |
ఓం దుష్టనిగ్రహాయై నమః |
ఓం నిష్కళాయై నమః |
ఓం సర్వసంపత్ప్రదాయై నమః |
ఓం దారిద్ర్యధ్వంసిన్యై నమః |
ఓం త్రికాలజ్ఞానసంపన్నాయై నమః |
ఓం లీలామానుషవిగ్రహాయై నమః |
ఓం విష్ణువర్ధనసంహారికాయై నమః |
ఓం సుగుణరత్నాయై నమః | 45
ఓం సాహసౌందర్యసంపన్నాయై నమః |
ఓం సచ్చిదానందస్వరూపాయై నమః |
ఓం విశ్వరూపప్రదర్శిన్యై నమః |
ఓం నిగమవేద్యాయై నమః |
ఓం నిష్కామాయై నమః |
ఓం సర్వసౌభాగ్యదాయిన్యై నమః |
ఓం ధర్మసంస్థాపనాయై నమః |
ఓం నిత్యసేవితాయై నమః |
ఓం నిత్యమంగళాయై నమః | 54
ఓం నిత్యవైభవాయై నమః |
ఓం సర్వోపాధివినిర్ముక్తాయై నమః |
ఓం రాజరాజేశ్వర్యై నమః |
ఓం ఉమాయై నమః |
ఓం శివపూజాతత్పరాయై నమః |
ఓం పరాశక్త్యై నమః |
ఓం భక్తకల్పకాయై నమః |
ఓం జ్ఞాననిలయాయై నమః |
ఓం బ్రహ్మవిష్ణుశివాత్మికాయై నమః | 63
ఓం శివాయై నమః |
ఓం భక్తిగంయాయై నమః |
ఓం భక్తివశ్యాయై నమః |
ఓం నాదబిందుకళాతీతాయై నమః |
ఓం సర్వోపద్రవవారిణ్యై నమః |
ఓం సర్వసరూపాయై నమః |
ఓం సర్వశక్తిమయ్యై నమః |
ఓం మహాబుద్ధ్యై నమః |
ఓం మహాసిద్ధ్యై నమః | 72
ఓం సద్గతిదాయిన్యై నమః |
ఓం అమృతాయై నమః |
ఓం అనుగ్రహప్రదాయై నమః |
ఓం ఆర్యాయై నమః |
ఓం వసుప్రదాయై నమః |
ఓం కళావత్యై నమః |
ఓం కీర్తివర్ధిన్యై నమః |
ఓం కీర్తితగుణాయై నమః |
ఓం చిదానందాయై నమః | 81
ఓం చిదాధారాయై నమః |
ఓం చిదాకారాయై నమః |
ఓం చిదాలయాయై నమః |
ఓం చైతన్యరూపిణ్యై నమః |
ఓం చైతన్యవర్ధిన్యై నమః |
ఓం యజ్ఞరూపాయై నమః |
ఓం యజ్ఞఫలదాయై నమః |
ఓం తాపత్రయవినాశిన్యై నమః |
ఓం గుణాతీతాయై నమః | 90
ఓం విష్ణువర్ధనమర్దిన్యై నమః |
ఓం తీర్థరూపాయై నమః |
ఓం దీనవత్సలాయై నమః |
ఓం దయాపూర్ణాయై నమః |
ఓం తపోనిష్ఠాయై నమః |
ఓం శ్రేష్ఠాయై నమః |
ఓం శ్రీయుతాయై నమః |
ఓం ప్రమోదదాయిన్యై నమః |
ఓం భవబంధవినాశిన్యై నమః | 99
ఓం భగవత్యై నమః |
ఓం ఇహపరసౌఖ్యదాయై నమః |
ఓం ఆశ్రితవత్సలాయై నమః |
ఓం మహావ్రతాయై నమః |
ఓం మనోరమాయై నమః |
ఓం సకలాభీష్టప్రదాయై నమః |
ఓం నిత్యమంగళరూపిణ్యై నమః |
ఓం నిత్యోత్సవాయై నమః |
ఓం శ్రీకన్యకాపరమేశ్వర్యై నమః | 108
ఇతి శ్రీవాసవీకన్యకాపరమేశ్వరీ అష్టోత్తరశతనామావళిః |