Sacred Stotras & Deities

శ్రీ రేణుకా హృదయం

స్కంద ఉవాచ |
భగవన్ దేవదేవేశ పరమేశ శివాపతే |
రేణుకాహృదయం గుహ్యం కథయస్వ ప్రసాదతః || 1 ||
శివ ఉవాచ |
శృణు షణ్ముఖ వక్ష్యామి రేణుకహృదయం పరం |
జపేద్యో హృదయం నిత్యం తస్య సిద్ధిః పదే పదే || 2 ||
రేణుకాహృదయస్యాస్య ఋషిరానందభైరవః |
ఛందోభృద్విరాట్ ప్రోక్తం దేవతా రేణుకా పరా || 3 ||
క్లీం బీజం కామదా శక్తిర్మహామాయేతి కీలకం |
సర్వాభీష్ట ఫలప్రాప్త్యై వినియోగ ఉదాహృతః || 4 ||
ఓం క్లీమిత్యంగుష్ఠాది హృదయాదిన్యాసం కృత్వా |
ధ్యానం |
ధ్యాయేన్నిత్యమపూర్వవేశలలితాం కందర్పలావణ్యదాం
దేవీం దేవగణైరుపాస్యచరణాం కారుణ్యరత్నాకరాం |
లీలావిగ్రహణీం విరాజితభుజాం సచ్చంద్రహాసదిభి-
-ర్భక్తానందవిధాయినీం ప్రముదితాం నిత్యోత్సవాం రేణుకాం ||
ఆనందభైరవ ఉవాచ |
ఓం నమో రేణుకాయై సర్వభూతిదాయై సర్వకర్త్ర్యై సర్వహంత్ర్యై సర్వపాలిన్యై సర్వార్థదాత్ర్యై సచ్చిదానందరూపిణ్యై ఏకలాయై కామాక్ష్యై కామదాయిన్యై భర్గాయై భర్గరూపిణ్యై భగవత్యై సర్వేశ్వర్యై ఏకవీరాయై వీరవందితాయై వీరశక్త్యై వీరమోహిన్యై వీరసువేశ్యై హ్రీంకారాయై క్లీంకారాయై వాగ్భవాయై ఐంకారాయై ఓంకారాయై శ్రీంకారాయై దశార్ణాయై ద్వాదశార్ణాయై షోడశార్ణాయై త్రిబీజకాయై త్రిపురాయై త్రిపురహరవల్లభాయై కాత్యాయిన్యై యోగినీగణసేవితాయై చాముండాయై ముండమాలిన్యై భైరవసేవితాయై భీతిహరాయై భవహారిణ్యై కల్యాణ్యై
కల్యాణదాయై నమస్తే నమస్తే || 5 ||
నమో నమః కాముక కామదాయై
నమో నమో భక్తదయాఘనాయై |
నమో నమః కేవలకేవలాయై
నమో నమో మోహినీ మోహదాయై || 6 ||
నమో నమః కారణకారణాయై
నమో నమో శాంతిరసాన్వితాయై |
నమో నమః మంగళ మంగళాయై
నమో నమో మంగళభూతిదాయై || 7 ||
నమో నమః సద్గుణవైభవాయై
నమో నమః జ్ఞానసుఖప్రదాయై | [విశుద్ధవిజ్ఞాన] నమో నమః శోభనశోభితాయై
నమో నమః శక్తిసమావృతాయై || 8 ||
నమః శివాయై శాంతాయై నమో మంగళమూర్తయే |
సర్వసిద్ధిప్రదాయై తే రేణుకాయై నమో నమః || 9 ||
లలితాయై నమస్తుభ్యం పద్మావత్యై నమో నమః |
హిమాచలసుతాయై తే రేణుకాయై నమో నమః || 10 ||
విష్ణువక్షఃస్థలావాసే శివవామాంకసంస్థితే |
బ్రహ్మాణ్యై బ్రహ్మమాత్రే తే రేణుకాయై నమోఽస్తు తే || 11 ||
రామమాత్రే నమస్తుభ్యం జగదానందకారిణీ |
జమదగ్నిప్రియాయై తే రేణుకాయై నమో నమః || 12 ||
నమో భైరవరూపాయై భీతిహంత్ర్యై నమో నమః |
నమః పరశురామస్యజనన్యై తే నమో నమః || 13 ||
కమలాయై నమస్తుభ్యం తులజాయై నమో నమః |
షట్చక్రదేవతాయై తే రేణుకాయై నమో నమః || 14 ||
అహిల్యాయై నమస్తుభ్యం కావేర్యై తే నమో నమః |
సర్వార్థిపూజనీయాయై రేణుకాయై నమో నమః || 15 ||
నర్మదాయై నమస్తుభ్యం మందోదర్యై నమో నమః |
అద్రిసంస్థానాయై తే రేణుకాయై నమో నమః || 16 ||
త్వరితాయై నమస్తుభ్యం మందాకిన్యై నమో నమః |
సర్వమంత్రాధిదేవ్యై తే రేణుకాయై నమో నమః || 17 ||
విశోకాయై నమస్తుభ్యం కాలశక్త్యై నమో నమః |
మధుపానోద్ధతాయై తే రేణుకాయై నమో నమః || 18 ||
తోతులాయై నమస్తుభ్యం నారాయణ్యై నమో నమః |
ప్రధానగుహరూపిణ్యై రేణుకాయై నమో నమః || 19 ||
సింహగాయై నమస్తుభ్యం కృపాసిద్ధ్యై నమో నమః |
దారిద్ర్యవనదాహిన్యే రేణుకాయై నమో నమః || 20 ||
స్తన్యదాయై నమస్తుభ్యం వినాశఘ్న్యై నమో నమః |
మధుకైటభహంత్ర్యై తే రేణుకాయై నమో నమః || 21 ||
త్రిపురాయై నమస్తుభ్యం పుణ్యకీర్త్యై నమో నమః |
మహిషాసురనాశాయై రేణుకాయై నమో నమః || 22 ||
చేతనాయై నమస్తుభ్యం వీరలక్ష్ంయై నమో నమః |
కైలాసనిలయాయై తే రేణుకాయై నమో నమః || 23 ||
బగలాయై నమస్తుభ్యం బ్రహ్మశక్త్యై నమో నమః |
కర్మఫలప్రదాయై తే రేణుకాయై నమో నమః || 24 ||
శీతలాయై నమస్తుభ్యం భద్రకాల్యై నమో నమః |
శుంభదర్పహరాయై తే రేణుకాయై నమో నమః || 25 ||
ఏలాంబాయై నమస్తుభ్యం మహాదేవ్యై నమో నమః |
పీతాంబరప్రభాయై తే రేణుకాయై నమో నమః || 26 ||
నమస్త్రిగాయై రుక్మాయై నమస్తే ధర్మశక్తయే |
అజ్ఞానకల్పితాయై తే రేణుకాయై నమో నమః || 27 ||
కపర్దాయై నమస్తుభ్యం కృపాశక్త్యై నమో నమః |
వానప్రస్థాశ్రమస్థాయై రేణుకాయై నమో నమః || 28 ||
విజయాయై నమస్తుభ్యం జ్వాలాముఖ్యై నమో నమః |
మహాస్మృతిర్జ్యోత్స్నాయై రేణుకాయై నమో నమః || 29 ||
నమః తృష్ణాయై ధూంరాయై నమస్తే ధర్మసిద్ధయే |
అర్ధమాత్రాఽక్షరాయై తే రేణుకాయై నమో నమః || 30 ||
నమః శ్రద్ధాయై వార్తాయై నమస్తే మేధాశక్తయే |
మంత్రాధిదేవతాయై తే రేణుకాయై నమో నమః || 31 ||
జయదాయై నమస్తుభ్యం శూలేశ్వర్యై నమో నమః |
అలకాపురసంస్థాయై రేణుకాయై నమో నమః || 32 ||
నమః పరాయై ధ్రౌవ్యాయై నమస్తేఽశేషశక్తయే |
ధ్రువమయై హృద్రూపాయై రేణుకాయై నమో నమః || 33 ||
నమో నమః శక్తిసమన్వితాయై
నమో నమః తుష్టివరప్రదాయై |
నమో నమః మండనమండితాయై
నమో నమః మంజులమోక్షదాయై || 34 ||
శ్రీశివ ఉవాచ |
ఇత్యేవం కథితం దివ్యం రేణుకాహృదయం పరం |
యః పఠేత్సతతం విద్వాన్ తస్య సిద్ధిః పదే పదే || 35 ||
రాజద్వారే శ్మశానే చ సంకటే దురతిక్రమే |
స్మరణాద్ధృదయస్యాస్య సర్వసిద్ధిః ప్రజాయతే || 36 ||
దుర్లభం త్రిషులోకేషు తస్య ప్రాప్తిర్భవేద్ధ్రువం |
విత్తార్థీ విత్తమాప్నోతి సర్వార్థీ సర్వమాప్నుయాత్ || 37 ||
ఇత్యాగమసారే శివషణ్ముఖసంవాదే ఆనందభైరవోక్తం రేణుకాహృదయం |

శ్రీ రేణుకా అష్టోత్తరశతనామ స్తోత్రం

ధ్యానం |
ధ్యాయేన్నిత్యమపూర్వవేషలలితాం కందర్పలావణ్యదాం
దేవీం దేవగణైరుపాస్యచరణాం కారుణ్యరత్నాకరాం |
లీలావిగ్రహిణీం విరాజితభుజాం సచ్చంద్రహాసాదిభి-
-ర్భక్తానందవిధాయినీం ప్రముదితాం నిత్యోత్సవాం రేణుకాం ||
స్తోత్రం |
జగదంబా జగద్వంద్యా మహాశక్తిర్మహేశ్వరీ |
మహాదేవీ మహాకాలీ మహాలక్ష్మీః సరస్వతీ ||
మహావీరా మహారాత్రిః కాలరాత్రిశ్చ కాలికా |
సిద్ధవిద్యా రామమాతా శివా శాంతా ఋషిప్రియా ||
నారాయణీ జగన్మాతా జగద్బీజా జగత్ప్రభా |
చంద్రికా చంద్రచూడా చ చంద్రాయుధధరా శుభా ||
భ్రమరాంబా తథానందా రేణుకా మృత్యునాశినీ |
దుర్గమా దుర్లభా గౌరీ దుర్గా భర్గకుటుంబినీ ||
కాత్యాయనీ మహామాతా రుద్రాణీ చాంబికా సతీ |
కల్పవృక్షా కామధేనుః చింతామణిరూపధారిణీ ||
సిద్ధాచలవాసినీ చ సిద్ధబృందసుశోభినీ |
జ్వాలాముఖీ జ్వలత్కాంతా జ్వాలా ప్రజ్వలరూపిణీ ||
అజా పినాకినీ భద్రా విజయా విజయోత్సవా |
కుష్ఠరోగహరా దీప్తా దుష్టాసురగర్వమర్దినీ ||
సిద్ధిదా బుద్ధిదా శుద్ధా నిత్యానిత్యా తపఃప్రియా |
నిరాధారా నిరాకారా నిర్మాయా చ శుభప్రదా ||
అపర్ణా చాఽన్నపూర్ణా చ పూర్ణచంద్రనిభాననా |
కృపాకరా ఖడ్గహస్తా ఛిన్నహస్తా చిదంబరా ||
చాముండీ చండికాఽనంతా రత్నాభరణభూషితా |
విశాలాక్షీ చ కామాక్షీ మీనాక్షీ మోక్షదాయినీ ||
సావిత్రీ చైవ సౌమిత్రీ సుధా సద్భక్తరక్షిణీ |
శాంతిశ్చ శాంత్యతీతా చ శాంతాతీతతరా తథా ||
జమదగ్నితమోహంత్రీ ధర్మార్థకామమోక్షదా |
కామదా కామజననీ మాతృకా సూర్యకాంతినీ ||
మంత్రసిద్ధిర్మహాతేజా మాతృమండలవల్లభా |
లోకప్రియా రేణుతనయా భవానీ రౌద్రరూపిణీ ||
తుష్టిదా పుష్టిదా చైవ శాంభవీ సర్వమంగలా |
ఏతదష్టోత్తరశతనామస్తోత్రం పఠేత్సదా ||
సర్వసంపత్కరం దివ్యం సర్వాభీష్టఫలప్రదం |
అష్టసిద్ధియుతం చైవ సర్వపాపనివారణం ||
ఇతి శ్రీశాండిల్యమహర్షివిరచితా శ్రీరేణుకాదేవ్యష్టోత్తరశతనామావళిః |

శ్రీ రేణుకా అష్టోత్తరశతనామావళిః

ఓం జగదంబాయై నమః |
ఓం జగద్వంద్యాయై నమః |
ఓం మహాశక్త్యై నమః |
ఓం మహేశ్వర్యై నమః |
ఓం మహాదేవ్యై నమః |
ఓం మహాకాల్యై నమః |
ఓం మహాలక్ష్ంయై నమః |
ఓం సరస్వత్యై నమః |
ఓం మహావీరాయై నమః | 9
ఓం మహారాత్ర్యై నమః |
ఓం కాలరాత్ర్యై నమః |
ఓం కాలికాయై నమః |
ఓం సిద్ధవిద్యాయై నమః |
ఓం రామమాతాయై నమః |
ఓం శివాయై నమః |
ఓం శాంతాయై నమః |
ఓం ఋషిప్రియాయై నమః |
ఓం నారాయణ్యై నమః | 18
ఓం జగన్మాతాయై నమః |
ఓం జగద్బీజాయై నమః |
ఓం జగత్ప్రభాయై నమః |
ఓం చంద్రికాయై నమః |
ఓం చంద్రచూడాయై నమః |
ఓం చంద్రాయుధధరాయై నమః |
ఓం శుభాయై నమః |
ఓం భ్రమరాంబాయై నమః |
ఓం ఆనందాయై నమః | 27
ఓం రేణుకాయై నమః |
ఓం మృత్యునాశిన్యై నమః |
ఓం దుర్గమాయై నమః |
ఓం దుర్లభాయై నమః |
ఓం గౌర్యై నమః |
ఓం దుర్గాయై నమః |
ఓం భర్గకుటుంబిన్యై నమః |
ఓం కాత్యాయన్యై నమః |
ఓం మహామాతాయై నమః | 36
ఓం రుద్రాణ్యై నమః |
ఓం అంబికాయై నమః |
ఓం సత్యై నమః |
ఓం కల్పవృక్షాయై నమః |
ఓం కామధేనవే నమః |
ఓం చింతామణిరూపధారిణ్యై నమః |
ఓం సిద్ధాచలవాసిన్యై నమః |
ఓం సిద్ధబృందసుశోభిన్యై నమః |
ఓం జ్వాలాముఖ్యై నమః | 45
ఓం జ్వలత్కాంతాయై నమః |
ఓం జ్వాలాయై నమః |
ఓం ప్రజ్వలరూపిణ్యై నమః |
ఓం అజాయై నమః |
ఓం పినాకిన్యై నమః |
ఓం భద్రాయై నమః |
ఓం విజయాయై నమః |
ఓం విజయోత్సవాయై నమః |
ఓం కుష్ఠరోగహరాయై నమః | 54
ఓం దీప్తాయై నమః |
ఓం దుష్టాసురగర్వమర్దిన్యై నమః |
ఓం సిద్ధిదాయై నమః |
ఓం బుద్ధిదాయై నమః |
ఓం శుద్ధాయై నమః |
ఓం నిత్యాయై నమః |
ఓం అనిత్యాయై నమః |
ఓం తపఃప్రియాయై నమః |
ఓం నిరాధారాయై నమః | 63
ఓం నిరాకారాయై నమః |
ఓం నిర్మాయాయై నమః |
ఓం శుభప్రదాయై నమః |
ఓం అపర్ణాయై నమః |
ఓం అన్నపూర్ణాయై నమః |
ఓం పూర్ణచంద్రనిభాననాయై నమః |
ఓం కృపాకరాయై నమః |
ఓం ఖడ్గహస్తాయై నమః |
ఓం ఛిన్నహస్తాయై నమః | 72
ఓం చిదంబరాయై నమః |
ఓం చాముండ్యై నమః |
ఓం చండికాయై నమః |
ఓం అనంతాయై నమః |
ఓం రత్నాభరణభూషితాయై నమః |
ఓం విశాలాక్ష్యై నమః |
ఓం కామాక్ష్యై నమః |
ఓం మీనాక్ష్యై నమః |
ఓం మోక్షదాయిన్యై నమః | 81
ఓం సావిత్ర్యై నమః |
ఓం సౌమిత్ర్యై నమః |
ఓం సుధాయై నమః |
ఓం సద్భక్తరక్షిణ్యై నమః |
ఓం శాంత్యై నమః |
ఓం శాంత్యతీతాయై నమః |
ఓం శాంతాతీతతరాయై నమః |
ఓం జమదగ్నితమోహంత్ర్యై నమః |
ఓం ధర్మదాయై నమః | 90
ఓం అర్థదాయై నమః |
ఓం కామదాయై నమః |
ఓం మోక్షదాయై నమః |
ఓం కామదాయై నమః |
ఓం కామజనన్యై నమః |
ఓం మాతృకాయై నమః |
ఓం సూర్యకాంతిన్యై నమః |
ఓం మంత్రసిద్ధ్యై నమః |
ఓం మహాతేజాయై నమః | 99
ఓం మాతృమండలవల్లభాయై నమః |
ఓం లోకప్రియాయై నమః |
ఓం రేణుతనయాయై నమః |
ఓం భవాన్యై నమః |
ఓం రౌద్రరూపిణ్యై నమః |
ఓం తుష్టిదాయై నమః |
ఓం పుష్టిదాయై నమః |
ఓం శాంభవ్యై నమః |
ఓం సర్వమంగలాయై నమః | 108

రేణుకాస్తోత్రం

 శ్రీగణేశాయ నమః .

పాకామృతాంశుమకుటాభరణా భవానీ

     శోకాపహా నతజనస్య శుభాఖిలాంగీ .

కోకాకృతిస్తనభరా కుశలాని నిత్యం

     మూకాంబికా మమ తనోతు మునీంద్రవంద్యా ..

శ్లోకస్యాద్యంతయోర్వాగ్భవముచ్చార్య పఠేదితి సంప్రదాయః .. ఓం ..

కాలాగ్న్యాది శివావసానమఖిలం తే గుల్ఫదఘ్నం శివే

     మూర్తిం కీర్తయితుం న కస్య రసనా లజ్జాంబుధౌ మజ్జతి .

తస్మాత్ త్వచ్చరణైకదేశనఖరజ్యోతిఃస్ఫులింగా ఇవ

     స్ఫూర్జంతి ప్రభవిష్ణవశ్చ సతతం తే పద్మనాభాదయః .. 1..

కల్పః కోఽపి స శాంభవో విజయతే మాతస్త్వయా కల్పితో

     యత్రానల్పవికల్పజాలవిముఖః కశ్చిద్విపశ్చిత్ పరః .

సా త్వం సత్త్వవతామపీహ సులభా నైవాసి కిం స్తూయసే

     స్వచ్ఛందం శిశవో యథా తవ పునః క్రీడంతి వేదా ఇమే .. 2..

లీలాచామరధారిణీసహచరీగత్యా మహాసిద్ధయో

     నూనం వంచయితుం స్ఫురంతి భవతీకారుణ్యశూన్యం జనం .

అంబ త్వన్నయనాంచలం కరుణయా యస్మిన్ పరిక్రీడతే

     తస్య ద్వారి నివారితోఽపి కురుతే సేవాం సురాణాం గణః .. 3..

ఆ పాతాలతలాత్ ఫణీశ్వరశిరోరత్నాంశునీరాజితా-

     దా సర్వజ్ఞనికేతనాదపి శిఖాయౌతాంశుధౌతాంకణాత్ .

ఏకచ్ఛత్రమవాప్య వైభవమహో దీవ్యంతి తే సంతతం

     యే సంధ్యాచలనిశ్చలం తవ పదం ధ్యాయంతి గాయంతి చ .. 4..

యే త్వామంబ పలాశబిల్వకుసుమైరుల్లాసిభిర్మల్లికా-

     పుష్పైర్వా వనమల్లికావిరచితైరుద్దామభిర్దామభిః .

ముగ్ధోన్మీలితమాలతీభిరభితః సంపూజయంత్యాదరాత్

     తేషాముద్ధృతసౌరభా ప్రతిదినం వ్యాజృంభతే భారతీ .. 5..

త్వాం సహ్యాచలమౌలిసుస్థితపదాం శ్రీ-ఏకవీరాంబికే

     యే లింపంతి సచంద్రచందనరసైస్తేషాం సుధాస్రావిణీ .

వాణీవిస్మయవర్ణ్యమానగిరిశవ్యాలోలగంగాజల-

     స్వచ్ఛందోర్మిపరంపరావిజయినీ వాణీ నరీనృత్యతి .. 6..

యే త్వాం బ్రాహ్మముహూర్తనిర్మలధియస్త్వాధారతశ్చింతయ-

     న్త్యూర్ధ్వం మూర్ధ్ని సరోరుహేఽతిధవలే పీయూషధారావృతే .

తే మృత్యుం సహసా విజిత్య రచయంత్యుచ్చైర్గతిం నిత్యశః

     ప్రత్యాదిష్టపురఃసుధాకరసుధాహంభావసంభావితాః .. 7..

యస్త్వాం పశ్యతి తస్య నశ్యతి మహాపాపాంధకారః క్షణాత్

     కిం చార్ధాదపరే పురాణపురుషప్రాణప్రియే పార్వతి .

మూర్ధ్నస్తస్య తతో భవేత్ కృతధియః శ్రీ-ఏకవీరాంబికే

     దృశ్యంతే న మనాగపీహ యదియం ప్రత్యక్షముద్యోతసే .. 8..

కిం యోగేన కిమర్చనేన కిమథ జ్ఞానేన కిం కర్మణా

     కిం ధ్యానేన కిమిజ్యయా కిమథవా దానేన కిం దీక్షయా .

దృశ్యంతే యది సహ్యశైలశిఖరశ్రీగర్వితాః సర్వదా

     మాతః పార్వతి రేణుకే తవ పదాంభోజప్రభావిభ్రమాః .. 9..

హే సహ్యాచలనిత్యకేలిరసికే కర్పూరకస్తూరికా-

     విన్యస్తాగరుకుంకుమైర్మలయజైస్త్వం చర్చితాభ్యర్చితా .

తే దీవ్యంతి సురేంద్రముఖ్యవిబుధశ్రేణీకిరీటస్ఫుర-

     న్మాణిక్యప్రతిబింబితారుణపదస్థాః సంప్రదాః సంపదాం .. 10..

హే సహ్యాద్రివినిద్రలింగవపుషి శ్రీ-ఏకవీరాంబికే

     త్వాం కృష్ణాగరుగుగ్గులుప్రభృతిభిర్యే ధూపయంత్యాదరాత్ .

తే కైలాసనివాసినీభిరభితః సంచారితైశ్చారుభి-

     ర్లీలాచామరమారుతైశ్చిరతరం నందంతి రుద్రా ఇవ .. 11..

మాతః శాంభవి జృంభితామృతశిలాలింగాత్మికే రేణుకే

     త్వాం సహ్యాద్రిశిరోవిహారసులభాం నీరాజయంత్యాదరాత్ .

తే వృందారకవృందవందితపదాశ్చంద్రార్కచూడామణి-

     జ్యోతిర్మేదురమందిరాంకణభువో భూతిం లభంతేఽద్భుతాం .. 12..

దూరాదంగణరంగసంగతరజోరాజీవిరాజద్వపు-

     స్తుభ్యం యః ప్రణిపత్తిమంబ కురుతే కశ్చిత్ కదాచిత్ క్వచిత్ .

సంప్రాప్య శ్రియమిందుసుందరయశఃసందోహనిష్యందినీ-

     మంతే నిర్విషయం స్వయం ప్రవిశతి శ్రీశాంభవం వైభవం .. 13..

త్వాముద్దిశ్య కదాపి కోఽపి కిమపి క్వాపి ప్రపద్యన్ నరో

     భక్త్యావేశవశీకృతో జపతి వా యో యజ్జుహోత్యాదరాత్ .

తత్ తస్యాక్షయమేవ దేవి భవతి స్వర్గాపవర్గప్రదం

     త్వన్నామస్మరణం గతో విజయతే సర్వోఽపి శర్వో జనః .. 14..

మాతస్త్వచ్చరణేన యాస్యతి చిరం రుద్రోఽపి భద్రాశయ-

     శ్చూడాచంద్రకలామరీచినిచయైరాచాంతరత్నాసనైః .

తత్త్వానాముపరి స్థితో విజయతే వామాదిభిర్నామభిః

     శ్రీకామేశ్వరి దక్షపుత్రి గిరిజే త్వం రేణుకే రక్ష మాం .. 15..

మాతర్భైరవి భర్గపత్ని గిరిజే గాయత్రి గోత్రాత్మికే

     దుర్గే గౌరి సరస్వతి త్రిణయనే శ్రీసిద్ధలక్ష్మీ ధృతే .

నిత్యే మృత్యువికారహారిణి శివే శ్రీ-ఏకవీరాంబికే

     సోఽహం తే శరణాగతః కరుణయా త్వం రేణుకే రక్ష మాం .. 16..

     ఇతి శ్రీరేణుకాస్తోత్రం సమాప్తః ..

పాకామృతాంశుమకుటాభరణా భవానీ

     శోకాపహా నతజనస్య శుభాఖిలాంగీ .

కోకాకృతిస్తనభరా కుశలాని నిత్యం

     మూకాంబికా మమ తనోతు మునీంద్రవంద్యా ..

శ్లోకస్యాద్యంతయోర్వాగ్భవముచ్చార్య పఠేదితి సంప్రదాయః .. ఓం..

రేణుకాస్తోత్రం శ్రీవినాయకశాస్త్రికృతం

శ్రీగణేశాయ నమః .

త్వదీయపదరేణుకే శిరసి మామకే రేణుకే

నిధాయ వరదం కరం ననుదరం మమాఽనీనశః .

స్వవత్సలతయాఽనుదోర్నయనలాలనచ్ఛద్మనా

ప్రమోదభర-దృగ్ఝర-స్తుతమదశ్రుభిర్ధావయే ..

ప్రణమ్య సుషమామిషద్ దృగ్నిమేషశీర్సోల్లసత్-

కిరీటకులసంకులం పరిమలాఽలమంఘ్ర్యుత్పలం .

మనోలిరయముమదః సపది తేఽనుజిఘ్రన్మనాక్

తదన్యసుమనస్సు కిం వ్రజతి నాధునా తత్స్మరన్ ..

భజంతు విషయాన్ సజూర్విషయిణో విషాణీవతే

రసారసికమౌలినా మమ మనోఽలినాన్యక్కృతాః .

శ్రుతం తదవలోకితం భవతు తత్స్పృశన్ జిఘ్రతా

రసాలపదపంకజం జనని తే సదా స్వాద్యతాం ..

విజిత్య హృదుపస్థితో ముహురుపస్థితానందకం

విశుద్ధిముపసంహరన్  విరమతాభవద్భక్తిషు .

గిరా భజతు నామ తే కరఘృతార్చనోపస్కరం

ప్రయాతు తవ మందిరం విసృజతు త్వదన్యాదరం ..

ముమోచ కిల మాం ప్రసూః రథవిదగ్రణీరగ్రజా

పితాఽపి దయితోఽగ్రజః పర ఇహాశ్రయో యస్య మే .

శ్రయేఽహమధునేహకం   వ్రజిన (బ్రజిన) పుఙ్జవాక్యాహతః

ప్రయామి దిశమంబికే నిదిశ కాందిశికోఽద్యకాం ..

యథాయథమనుష్ఠితాః స్తుతికథాః కథంచిన్నమతే

స్మరామి చ కృతం న తే తేఽర్చనమకించనః కించనః .

తపోమనుజపోఽప్యుపోషణకారి న త్వత్కృతే-

ఽపరాద్ధమముమంబికే ! వద కిముద్ధరిష్యస్యతః ..

విధిర్హరిహరాదయో యదవధీరితా నాంతికే

పురందరపురోగమా న పుర  ఆసితుం శక్నుయుః .

నిగృహ్య కృపయాఽమికే ! గుణగణైః స్వకీయైర్దృఢం

బధాన న యథా పునః శ్రయతి హృత్పశుః శోచ్యతాం ..

అగాధ వదపారద్రుమ-మదాదియదో యుతా

వివేకముఖమత్సఖాఽప్యుదధివీచిమగ్నాః పరం .

నిధాయ చరణౌ పురో నియమయాఽఽశు తృష్ణా నదీ

వినశ్యతి యథాఽమ్బికే! న పరమార్థ-మార్గో మమ ..

స్తవీమి జమదగ్నిసద్గృహిణి నామ పృథ్వీగతాం

గృణన్ పరశురామ-సజ్జనని  ! జల్పితాప్తర్థయే .

తదంబ  ! కౄపయాఽఽప్స్యతేఽద్య వయసో న పంచాశతాః

మయాపద్ధతి కోఽపి చేత్సఫలమాప్నుయాత్తాదృశం ..

ఇతి శ్రీమత్పూజ్యపాదవినాయకశాస్త్రివేతాలవిరచితం

                    శ్రీరేణుకాస్తోత్రం సంపూర్ణం ..

 రేణుకాస్తోత్రం శ్రీవాయుపురాణే శ్రీపరశురామకృతం

            శ్రీగణేశాయ నమః .

           శ్రీసరస్వత్యై నమః .

              శ్రీగురుభ్యో నమః .

            శ్రీరేణుకాంబాయై  నమః .

ఓం నమః పరమానందే సర్వదేవమయీ శుభే .

అకారాది-క్షకారాంతం మాతృకా మంత్రమాలినీ .. 1..

ఏకవీరే ఏకరూపే మహారూపే అరూపిణి .

అవ్యక్తే వ్యక్తిమాపన్నే గుణాతీతే గుణాత్మికే .. 2..

కమలే కమలాభాసే హృత్సచ్చిత్తరణికాలయే .

నాభిచక్రస్థితే దేవి కుండలీ తంతురూపిణి .. 3..

వీరమాతా వీరబంధా యోగినీ సమరప్రియే .

వేదమాతా వేదగర్భే విశ్వగర్భే నమోఽస్తు తే .. 4 ..

రామమాతర్నమస్తుభ్యం నమస్త్రైలోక్యరూపిణి .

మహ్యాదికే పంచభూతా జమదగ్నిప్రియే శుభే .. 5 ..

యైస్తు భక్త్యా స్తుతా ధ్యాతా అర్చయిత్వాఽర్పితే శుభే .

భోగమోక్షప్రదే దేవి కామేశ్వరి నమోఽస్తు తే .. 6..

నమోఽస్తు తే నిరాలంబే పరమానందవిగ్రహే .

పంచభూతాత్మికే దేవి భూతభావివర్జితే .. 7..

మహారౌద్రే మహాకాయే సృష్టిసంహారకారిణి .

బ్రహ్మాండగోలకాకారే విశ్వరూపే నమోఽస్తు తే .. 8..

చతుర్భుజే ఖడ్గహస్తే మహాడమరుధారిణి .

శిరఃపాత్రధరే దేవి ఏకవీరే నమోఽస్తు తే .. 9..

నీలాంబరే నీలవర్ణే మయూరపిచ్ఛధారిణి .

వనభిల్లధనుర్వామే దక్షిణే బాణధారిణి .. 10..

రౌద్రకాయే మహాకాయే సహస్రార్జునభంజని .

ఏకం శిరః పురా స్థిత్వా రక్తపాత్రే చ పూరితం .. 11..

మృతధారా పిబందేవి రుధిరం దైత్యదేహజం .

రక్తవర్ణే రక్తదంతే ఖడ్గలాంగలధారిణి .. 12..

వామహస్తే చ ఖట్వాంగం డమరుం చైవ దక్షిణే .

ప్రేతవాహనకే దేవి-ఋషిపత్నీ చ దేవతే .. 13..

ఏకవీరే మహారౌద్రే మాలినీ విశ్వభైరవి .

యోగినీ యోగయుక్తా చ మహాదేవీ మహేశ్వరీ .. 14..

కామాక్షీ భద్రకాలీ చ హుంకారీ త్రిపురేశ్వరీ .

రక్తవస్త్రే రక్తనేత్రే మహాత్రిపురసుందరి .. 15..

రేణుకా సూనుయోగీ చ భక్తానామభయంకరీ .

భోగలక్ష్మీర్యోగలక్ష్మీర్దివ్యలక్ష్మీశ్చ సర్వదా .. 16..

కాలరాత్రి మహారాత్రి మద్యమాంసశివప్రియే .

భక్తానాం శ్రీపదే దేవి లోకత్రయవిమోహిని .. 17..

క్లీంకారీ కామపీఠే చ హ్రీంకారీ చ ప్రబోధ్యతా .

శ్రీంకారీ చ శ్రియా దేవి సిద్ధలక్ష్మీశ్చ సుప్రభా .. 18..

మహాలక్ష్మీశ్చ కౌమారీ కౌబేరీ సింహవాహినీ .

సింహప్రేతాసనే దేవి రౌద్రి క్రూరావతారిణి .. 19..

దైత్యా నారీ కుమారీ చ రౌద్రదైత్యనిపాతినీ .

త్రినేత్రా శ్వేతరూపా చ సూర్యకోటిసమప్రభా .. 20..

ఖడ్గినీ బాణహస్తా చారూఢా మహిషవాహినీ .

మహాకుండలినీ సాక్షాత్ కంకాలీ భువనేశ్వరీ .. 21..

కృత్తివాసా విష్ణురూపా హృదయా దేవతామయా .

దేవమారుతమాతా చ భక్తమాతా చ శంకరీ .. 22..

చతుర్భుజే చతుర్వక్త్రే స్వస్తిపద్మాసనస్థితే .

పంచవక్త్రా మహాగంగా గౌరీ శంకరవల్లభా .. 23..

కపాలినీ దేవమాతా కామధేనుస్త్రయోగుణీ .

విద్యా ఏకమహావిద్యా శ్మశానప్రేతవాసినీ .. 24..

దేవత్రిగుణత్రైలోక్యా జగత్త్రయవిలోకినీ .

రౌద్రా వైతాలి కంకాలీ భవానీ భవవల్లభా .. 25..

కాలీ కపాలినీ క్రోధా మాతంగీ వేణుధారిణీ .

రుద్రస్య న పరాభూతా రుద్రదేహార్ద్ధధారిణీ .. 26..

జయా చ విజయా చైవ అజయా చాపరాజితా .

రేణుకాయై నమస్తేఽస్తు సిద్ధదేవ్యై నమో నమః .. 27..

శ్రియై దేవ్యై నమస్తేఽస్తు దీననాథే నమో నమః .

జయ త్వం దేవదేవేశి సర్వదేవి నమోఽస్తు తే .. 28..

దేవదేవస్య జనని పంచప్రాణప్రపూరితే .

త్వత్ప్రసాదాయ దేవేశి దేవాః క్రందంతి విష్ణవే .. 29..

మహాబలే మహారౌద్రే సర్వదైత్యనిపాతిని .

ఆధారా బుద్ధిదా శక్తిః కుండలీ తంతురూపిణీ .. 30..

షట్చక్రమణే దేవి యోగిని దివ్యరూపిణి .

కామికా కామరక్తా చ లోకత్రయవిలోకినీ .. 31..

మహానిద్రా మద్యనిద్రా మధుకైటభభంజినీ .

భద్రకాలీ త్రిసంధ్యా చ మహాకాలీ కపాలినీ .. 32..

రక్షితా సర్వభూతానాం దైత్యానాం చ క్షయంకరీ .

శరణ్యం సర్వసత్త్వానాం రక్ష త్వం పరమేశ్వరి .. 33..

త్వామారాధయతే  లోకే తేషాం రాజ్యం చ భూతలే .

ఆషాఢే కార్తికే చైవ పూర్ణే పూర్ణచతుర్దశీ  .. 34..

ఆశ్వినే పౌషమాసే చ కృత్వా పూజాం ప్రయత్నతః .

గంధపుష్పైశ్చ నైవేద్యైస్తోషితాం పంచభిః సహ .. 35..

యం యం ప్రార్థయతే నిత్యం తం తం ప్రాప్నోతి నిశ్చితం .

తత్త్వం మే వరదే దేవి రక్ష మాం పరమేశ్వరి .. 36..

తవ వామాంకితం దేవి రక్ష మే సకలేశ్వరి .

సర్వభూతోదయే దేవి ప్రసాద వరదే శివే .. 37..

           శ్రీదేవ్యువాచ

వరం బ్రూహి మహాభాగ రాజ్యం కురు మహీతలే .

మామారాధ్యతే లోకే భయం క్వాపి న విద్యతే .. 38..

మమ మార్గే చ ఆయాంతీ భీర్దేవీ మమ సన్నిధౌ .

అభార్యో లభతే భార్యాం నిర్ధనో లభతే ధనం .. 39..

విద్యాం పుత్రమవాప్నోతి శత్రునాశం చ విందతి .

అపుత్రో లభతే పుత్రాన్ బద్ధో ముచ్యేత బంధనాత్ .. 40..

కామార్థీ లభతే కామం రోగీ ఆరోగ్యమాప్నుయాత్ .

మమ ఆరాధనం నిత్యం రాజ్యం ప్రాప్నోతి భూతలే .. 41..

సర్వకార్యాణి సిధ్యంతి ప్రసాదాన్మే న సంశయః .

సర్వకార్యాణ్యవాప్నోతి దీర్ఘాయుశ్చ లభేత్సుఖీ .. 42..

       శ్రీపరశురామ ఉవాచ

అత్ర స్థానేషు భవతాం అభయం కురు సర్వదా .

యం యం ప్రార్థయతే నిత్యం తం తం ప్రాప్నోతి నిశ్చితం .. 43..

ప్రయాగే పుష్కరే చైవ గంగాసాగరసంగమే .

స్నానం చ కురుతే నిత్యం నిత్యం చ చరణోదకే .. 44..

ఇదం స్తోత్రం పఠేన్నిత్యం త్రిసంధ్యం శ్రద్ధయాన్వితః .

సర్వాన్ కామానవాప్నోతి ప్రాప్యతే పరమం పదం .. 45..

ఇతి శ్రీవాయుపురాణే పరశురామకృతం శ్రీరేణుకాస్తోత్రం సంపూర్ణం ..

            .. శ్రీరేణుకార్పణమస్తు ..

రేణుకాస్తోత్రం శ్రీధరస్వామికృతం

శ్రీగణేశాయ నమః .

శివాం శాంతరూపాం మనోవాగతీతాం

నిజానందపూర్ణాం సదాఽద్వైతరూపాం .

పరాం వేదగమ్యాం పరబ్రహ్మరూపాం

భజే రేణుకాం సర్వలౌకైకవేద్యాం  .. 1..

సదాచారసద్భక్తిబోధాదిభిర్యా

గురోరంఘ్రిశుశ్రూషయాం ముఖ్యవృత్త్యా .

సువేద్యా సులభ్యా పరానందపూర్ణా

భజే రేణుకాం తాం విమోహప్రశాంత్యై .. 2..

శ్రుతిర్నేతినేతీతి సర్వం నిరస్య

వదత్యేకమాద్యం విభుం చిత్సుఖం యత్ .

తదేవావశిష్టం స్వరూపం విశుద్ధం

భజే రేణుకాం తాం సదా మృత్యుహీనాం .. 3..

యదానందసింధౌ నిమగ్నో న పశ్యేద్-

అహో కర్మజాలం ఫలం వా తదీయం .

న జైవం న శైవం జగన్నైవ మాయాం

చిదేకస్వరూపాం భజే రేణుకాం తాం .. 4..

అనేకాంతికాం సర్వభేదాతిరూపాం

తమోఽజ్ఞానదుఃఖాతిగాం శుద్ధరూపాం .

సదాఽధ్యాత్మవిద్యాప్రదానైకశీలం

భజే రేణుకాం ముక్తిసౌఖ్యాధిదేవీం .. 5..

త్రితాపప్రశంత్యై సమారాధ్యమానాం

సదా జీవలోకే స్వసౌఖ్యప్రదాత్రీం .

భవోంబోధిసేతుం చిదానందకందాం

భజే రేణుకాం జ్ఞానముద్రైకలక్ష్యాం .. 6..

సదా భక్తహృత్కౌముదీం భద్రభద్రాం

సదోంకారవాచ్యాం వరేణ్యాం శరణ్యాం .

స్వభక్తార్తినాశాం శుభాంగాం గుణాఢ్యాం

భజే రేణుకాం భక్తసౌఖ్యాబ్ధిరూపాం .. 7..

సదా భక్తవాత్సల్యపూర్ణాం సురమ్యాం

సురేంద్రాదిభిః స్తూయమానాం సుషూక్తైః .

సదా భక్తవృందైశ్చ సంసేవ్యమానాం

భజే రేణుకాం భక్తభాగ్యాం భవానీం .. 8..

పఠేద్యః సదా భక్తియుతో విశుద్ధః

స్వవర్ణాశ్రమాచారతో నిత్యయుక్తః .

స ముక్తః కృతీ రేణుకాయాః ప్రసాదాత్

సదా రాజతే రాజతే లోకపూజ్యా .. 9..

ఇతి శ్రీమత్పరమహంసపరివ్రాజకాచార్యసద్గురుభగవతా శ్రీధరస్వామినా

విరచితం శ్రీరేణుకాస్తోత్రం సంపూర్ణం ..

రేణుకాస్తోత్రం ముచుకుందకృతం

శ్రీగణేశాయ నమః .

           ముచుకుంద ఉవాచ

అనాథమకృతప్రజ్ఞం అజ్ఞానతిమిరావృతం .

మోహపంకనిమగ్నంచ మాముద్ధర సురేశ్వరి ..

త్వాం రేణుకేతి వరదేతి చ సుందరీతి

   వాగీశ్వరీతి సకలేతి చ పార్వతీతి .

సిద్ధేశ్వరీతి సుభగేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

అంబేతి విశ్వజననీతి జగద్ధితేతి

   విద్యేతి ధర్మనిరతేతి పరాత్పరేతి .

ఆద్యేతి వేదజననీతి చ యే వదంతి

   తాన్ దేవి నిత్యమనధాన్ పరిపాలయ త్వం ..

త్వాం వేదశాస్త్రమితిహాసవినోదినీతి

   బ్రహ్మేతి బ్రహ్మగమకేతి శుభావహేతి .

విశ్వేశ్వరీతి కమలేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

ఆనందభూతనిలయేత్యనలోద్భవేతి

   గూఢేతి భావగమకేతి శుభావహేతి .

విశ్వేశ్వరీతి కమలేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

నిత్యేతి దివ్యచరణేతి మహావ్రతేతి

   హృద్యేతి భక్తజనదుఃఖవినాశినీతి .

శ్రద్ధేతి రామజననీతి చ యే వదంతి

   తాన్ దేవి నిత్యమనధాన్ పరిపాలయ త్వం ..

త్వాం పుణ్యదేతి జమదగ్ని-ఋషిప్రియేతి

   గంగేతి తత్త్వవిహితేతి పరాపరేతి .

సుద్ధేతి పాతకకదంబకుఠారకేతి

   తాన్ దేవి నిత్యమనధాన్ పరిపాలయ త్వం ..

త్వాం రాజనీతి పరమామృతభోజనేతి

   శృంగారముఖ్యనవషట్ చ రసప్రియేతి .

లక్ష్మీప్రదేతి సుముఖేతి చ యే వదంతి

   తాన్ దేవి నిత్యమనధాన్ పరిపాలయ త్వం ..

                స్కంద ఉవాచ

స్తుతైవం ముచుకుందేన రేణుకా బ్రహ్మరూపిణీ .

ప్రత్యక్షరూపా ప్రాహేదం  ప్రసన్నాహం మునీశ్వర ..

                దేవ్యువాచ

ముచుకుంద త్వయా తుల్యః కశ్చిద్భక్తో న విద్యతే .

కిం ప్రార్థయసి మత్తస్త్వం బ్రూహి యత్తేఽభివాంఛితం ..

               ముచుకుంద ఉవాచ

త్వద్భక్తిమతులాం దేహి దేవి త్వం విశ్వరూపిణీ .

నాన్యదిచ్ఛామ్యహం మాతః సత్యమేతన్మయోదితం ..

ఆత్మనః స్వం పరం బ్రహ్మస్వరూపం దర్శయస్వ మే .

యది తుష్టాసి దాసస్య కృపయా త్వం మమోపరి ..

ఇతి శ్రీస్కందమహాపురాణే రేణుకామాహాత్మ్యే

            శ్రీరేణుకాస్తోత్రం ముచుకుందకృతం ..

రేణుకాస్తవరాజస్తోత్రం కౌలార్ణవే భైరవోక్తం

శ్రీ గణేశాయ నమః .

సదాశివం నమస్కృత్య ఉమాం దుర్గాం గణేశ్వరం .

వక్ష్యామి రేణుకాస్తోత్రం భుక్తి-ముక్తి-ఫలప్రదం .

గుప్తప్రకట-సిద్ధానాం యోగినీ చక్ర-పాదుకాం .

నమామి శిరసా నాథం కాల కౌలేశ్వరం ప్రభుం ..

ఆనంద-పీఠ-మధ్యస్థమానంద-పరవేష్టితం .

ప్రణమ్య చ కులానందం జ్ఞానానంద-ప్రకాశకం ..

అక్షరం క్షరమాద్యంతం ప్రకృతిం పురుషం పరం .

తం వందే సచ్చిదానందమేకవీరం సశాంభవం ..

సింహపర్వతమాసీనం దేవదేవేశ్వరోత్తమం .

తత్రస్థంచ సురవాసినమాత్రేయం బ్రహ్మవాదినం ..

అనుసూయా వరం ప్రాప్తం పుత్రస్నేహేన వత్సలాం .

యత్ర యోగీశ్వరో విష్ణుః సంభవిష్యత్వయోనిజాం ..

నానాభోగసమాకీర్ణం క్రీడతే ప్రమదాదిభిః .

మదిరానందచైతన్యం జ్ఞానానందప్రబోధకం ..

జమదగ్నేస్తు యా భార్యా రేణుకా నామ విశ్రుతా .

రామమాతేతి విఖ్యాతా త్రిషు లోకేషు విస్తృతా ..

దత్తాత్రయో మహాత్మాఽసౌ నాగపింగలపూర్వకం .

రేణుకాయాః వినిక్షిప్తం సద్భావం బీజముత్తమం ..

మాయా బీజేన సంయుక్తం మహాపీఠోద్భవం శుభం .

తత్రస్థా శాంభవీ శక్తిః సోమయా చ కులాన్వయా ..

కులాకులవిభాగేన వామ-దక్షిణ-సంజ్ఞకం .

సంతానం త్రిః ప్రకారం చతుః సింహాసనే సదా ..

క్రమపీఠేః సదా యుక్తం ద్వీప-ద్వీపాంతరే స్థితం .

పంచాశద్వర్ణభేదేన మంత్రయంత్రాణి వై స్థితం ..

చతుష్కం పంచకం షట్కం చతుష్కం పంచకంత్రికం .

వషట్కారః సముత్పన్నః కౌమార్యా బటుకాద్వయః ..

షడ్భిః చక్రైస్తు వై దేవ్యాః శ్రీకంఠాద్యాశ్చైవ భైరవాః .

శ్రియా క్రమేణ సంయుక్తా చతుఃషష్ఠ్యాస్తు దేవతాః ..

బ్రాహ్మీ మాహేశ్వరీ చైవ కౌమారీ వైష్ణవీ తథా .

వారాహీ చ తథేంద్రాణీ చాముండా చ శివోద్భవా ..

ప్రయోగే వారుణం కౌలం ఆదావాహ్య జయంతికా .

చరత్రికం ప్రతంచైవ దేవీ కోష్ఠేన చాష్టధా ..

మాహేంద్రీ చ తథాగ్నేయీ యామ్యాం నైరృత్య వారుణీ .

వాయవ్యాం హి చ కౌవేరీ ఈశాన్యాం దివ్యయోగినీ ..

ఉడ్యాయనీ జలంధరీ కామరూపా చ యా స్థితా .

కౌలార్ణవే స్థితా యా చ మంత్రే చక్రే తు యా స్థితా ..

ప్రసన్నా ప్రకటా చైవ సహజా కులజాదయః .

క్షేత్రపాలాశ్చ దిక్పాలా వేతాలాశ్చైవ రాక్షసాః ..

పిశాచా గణగంధర్వా శాకినీ డాకినీ తథా .

ఖేచరా భూచరాశ్చైవ పాతాలాశ్చాంతరిక్షగాః ..

నానారూపధరా సర్వే బలిపూజాభికాంక్షిణః .

అధికారస్వరూపేణ విచరంతి మహీతలే ..

క్రీడతే యోగినీ వృందం క్షేత్రమాతృగృహే స్థితం .

కేచిద్ గాయంతి నృత్యంతి పూజయంతి స్తువంతి చ ..

హసంతి కిలకిలాయంతి గర్జయంతి మహాబలాః .

మాతృపాదోద్భవా సర్వే మాతృమండలసంస్థితా ..

తన్మధ్యే శాంభవీ శక్తిర్రేణుకా సురపూజితా .

శ్రావణ్యశ్చైవ శాక్తేయమష్టవ్యా శాంభవీపదం ..

తేన సా శాంభవీ ప్రోక్తా హకారాద్ధి కలాస్మృతా .

బ్రహ్మా విష్ణుశ్చ రుద్రశ్చ ఈశ్వరః శివ ఏవ చ ..

మాలాబీజసముత్పన్నా సా శక్తిర్రేణుకా మతా .

నమోఽస్తు తే మహాదేవి మహామాయే నమోఽస్తు తే ..

నమోఽస్తు తే వీరభద్రే వీరమాత్రే నమోఽస్తు తే .

రామమాత్రే నమస్తుభ్యం త్రిషు లోకేషు పూజితా ..

నమోఽస్తు కులకౌలేశి నమోఽస్తు జ్ఞానభైరవి .

నమోఽస్తు జ్ఞానగే సర్వే సర్వేశ్వరి నమోఽస్తు తే ..

రామేశ్వరి నమస్తుభ్యం కామేశ్వరి నమోఽస్తు తే .

భద్రకాలి నమస్తుభ్యం కామేశ్వరి నమోఽస్తు తే ..

జమదగ్నిప్రియే శుభ్రే రేణుకే త్వాం నమోఽస్తు తే .

చైతన్యవిగ్రహే నిత్యే వ్యాపకే త్వాం నమోఽస్తు ..

త్రైలోక్యవ్యాపినీ దేవీ విష్ణుమాయే నమోఽస్తు తే .

శంకర-ప్రేమపాత్రత్వం పార్వతి త్వాం నమోఽస్తు తే ..

హరకాయార్ద్ధవాసిత్వం శంకరి త్వాం నమోఽస్తు తే .

భక్తిప్రియే మహాశుభ్రే మాలిని త్వాం నమోఽస్తు తే ..

పంచముద్రే మహాముద్రే భూతపంచకముద్రితే .

మహాముద్రాత్మికే శాంతే రేణుకాయై నమోఽస్తు తే ..

సద్భావబీజముత్పన్నం భావేన తవ సంస్థితం .

స్వాత్మభావాత్మజాత్మస్థా రేణుకాయై నమోఽస్తు ..

స్వచ్ఛందవిహరిణీ శక్తిః స్వచ్ఛందేన చ సంస్థితా .

స్వచ్ఛందోన్మత్తమాతంగీ రేణుకాయై నమోఽస్తు తే ..

ప్రమత్తే మదిరానందే మదిరానందవిగ్రహే .

చిద్రుపే పరమానందే రేణుకాయై నమోఽస్తు తే ..

జగద్బీజే జగద్రూపే జగద్భూతే జగన్మయే .

జగన్మాతే జగన్మాతః రేణుకాయై నమోఽస్తు తే ..

వైష్ణవీ విష్ణుమాయా త్వం మోహితం సచరాచరం .

వాంఛితార్థప్రదాదేవి తాం వందే రేణుకామహం ..

స్వచ్ఛందభైరవీచండే మాతంగీ మత్తరూపిణీ .

యోగినీవృందమధ్యస్థే ఏకవీరే నమోఽస్తు తే ..

బ్రహ్మవైకుంఠరుద్రాద్యా మునీంద్రాః సిద్ధకిన్నరాః .

త్వత్పదం పూజయంతీహ మాతృపీఠే నమోఽస్తు ..

త్వం పరా త్వం చ పశ్యంతీ మధ్యమా త్వం చ వైఖరీ .

ఋగ్యజుః సామాథర్వాణి శబ్దబ్రహ్మాత్మికే నమః ..

యజ్ఞవిద్యా త్రిసంధ్యా త్వం వేదగర్భా సురేశ్వరి .

గంగా గయా చ గాయత్రీ మాతాపురనివాసినీ ..

త్వం స్వాహా త్వం స్వధా చైవ పంచయజ్ఞమహామఖే .

యస్య జాతి ద్విజేంద్రాణాం మాతృలింగమహేశ్వరి ..

త్వం చ కాలీ మహాకాలీ మహాలక్ష్మీ సరస్వతీ .

త్రిపురా త్వరితా త్వం చ రేణుకాయై నమోఽస్తు తే ..

కపాలినీ కాలికాత్వం భైరవీ త్వం చాంబికా .

మాహేంద్రీ త్వం విశాలాక్షీ రేణుకాయై నమోఽస్తు తే ..

క్షేత్రజా పీఠజా త్వం చ మంత్రజా త్వం కలాంబికే .

ప్రసన్నా ప్రకటా త్వం చ సహజా త్వం చ రేణుకే ..

వామే జ్యేష్ఠే చ రౌద్రే చ మాలినీ మంత్రయోగినీ .

వేద సిద్ధాంతయానిత్యం తాం వందే రేణుకామహం ..

సురజ్యేష్ఠే సురానందే సర్వదేవమయీ శివే .

సచ్చిదానందచిద్రూపే విశ్వేశ్వరి నమోఽస్తు తే ..

పీఠక్షేత్రే శ్మశానే చ క్రీడతే వృందభైరవీ .

చత్వారి యోగినీ వృందే రేణుకాయై నమోఽస్తు తే ..

చతుఃషష్ఠిస్తు యోగిన్యాః సిద్ధసంఘట్టమేలకే .

మాతృమండలమధ్యస్థే రేణుకాయై నమోఽస్తు తే ..

మంత్రయంత్రకులాద్యే తు కులకౌలేశ్వరి శివే .

జ్ఞానానందసురాపూర్ణే రేణుకాయై నమోఽస్తు తే ..

చతురష్టకపీఠా త్వం మాయా సా చండికా మతా .

బిందు-నాద-కలా-జ్యోతిః శివశక్తిః సుశాంభవీ ..

పంచబీజసమాయుక్తా పంచప్రణవసంభవా .

ఉకారవిగ్రహా శక్తిః సమయా చంచలాంబికా ..

కౌలాన్వయసముద్భూతే కౌలికాన్వయపూజితే .

భారతీ చైకవీరా త్వం కులకౌలాంతరాలినీ ..

రాజరాజేశ్వరీ త్వం చ సింహే చండేశ్వరీ మతే .

స్వచ్ఛందా శ్రీభవా ప్రోక్తా సా శక్తిర్మాతృమండలే ..

ఆది సూత్రక్రమైర్యుక్తం మధ్యసూత్రం తథైవ చ .

సంవర్త్తమండలాంతస్థే వీరమాత్రే నమోఽస్తు తే ..

కులావలిమథా వృక్షా అంబా శ్రీనాథపాదుకా .

అకృష్టకేతకి త్వం చ కుబ్జే చండి నమోఽస్తు తే ..

దూతీ బటుకకౌమార్యా భైరవీ క్షేత్రపాలకా .

సిద్ధసంఘట్టయోగిన్యాం క్రీడతే మాతృమండలే ..

యోగినీ పీఠమధ్యస్థం మహాపీఠం సశాంభవం .

ఏకవీరాక్షరం బ్రహ్మ సూరసిద్ధాలయం పరం ..

హంసపర్యంకమారూఢం త్రికోణం బీజపూరకం .

ఏకవీరామిదం బీజం వాగ్భవం పరమేశ్వరం ..

త్రిబీజం బాణసంయుక్తం త్రిశట్కోష్ఠదలే స్థితం .

తన్మధ్యే శాంభవీ బీజమేకవీరం చిదాత్మకం ..

త్రికోణాన్యేకబీజంచ మాయాబీజేన వేష్టితం .

ఆనంద కందకల్లోలం హసంతం మాతృమండలం ..

బ్రహ్మా విష్ణుర్మహాదేవ ఇంద్రాద్యాశ్చైవ దేవతా .

యద్బీజం మాతృపీఠస్థం శాంభవం తం నమామ్యహం ..

అకారస్యాష్టమం బీజం శివశక్తిసమన్వితం .

తన్మధ్యే వస్తునిష్క్రాంతం ఏకవీరం సశాంభవం ..

హృదిమధ్యే స్థితం పద్మం హృది పద్మం సకర్ణకం .

తన్మధ్యే వస్తునిష్క్రాంతమేకవీరం సశంభవం ..

సర్వనారీశుభత్వంచ కూటస్థం బీజమవ్యయం .

హకరార్ధకులధరమేకవీరే నమోఽస్తు తే ..

నిత్యక్లిన్నే మదద్రావే ప్రాణజీవాత్మసంజ్ఞకే .

హృల్లేఖే సచ్చిదానందే విశ్వేశ్వరి నమోఽస్తు తే ..

కులపంకజమార్తండే హంసాక్షే ప్రాణధారిణీ .

చైతన్యవిగ్రహే నిత్యే రేణుకాయై నమోఽస్తు తే ..

కదంబగోలకాకారే బ్రహ్మరంధ్రవిలంబినీ .

సూక్ష్మసూక్ష్మాంతరే నిత్యే రేణుకాయై నమోఽస్తు తే ..

కేందుః స్రవలిత శక్తిః షట్చక్రక్రమభేదినీ .

బ్రహ్మరంధ్రే వినిష్క్రాంతే రేణుకా వ్యోమమండలే ..

లింగత్రయాంతే నిష్క్రాంతే శూన్యే నాదవినిగ్రహే .

నిరాలంబే నిరాభాసే రేణుకాయై నమోఽస్తు తే ..

నాభిమూలేషు యా శక్తిః కుండిల్యాః సర్పరూపిణీ .

షట్చక్రవిందునాదాంతే రేణుకా వ్యోమమండలే ..

ఇడా పింగలమధ్యస్థే బ్రహ్మమార్గప్రవాహినీ .

మృణాలతంతురూపేణ హిమాంశు నిత్యం చిదాంబికే ..

ద్వాసప్తతి-సహస్రాణి నాడీ వృందాని చాలయేత్ .

సోమ-సూర్యాగ్నిభిన్నేఽసి చిద్రూపే పరమామృతే ..

శశికోటి సమాభాసే అవసీః బ్రహ్మమండలే .

అచలే సర్వభూతస్థే రామమాత్రే నమోఽస్తు తే ..

అంతఃకరణసంబంధి నాడీయంత్రప్రవాహినీ .

ప్రణవాత్మక హః సమ్యక్ హృత్ప్రష్ఠే ప్రతితిష్ఠతి ..

ఆధారే నాభి మధ్యస్థే హృత్పద్మ-కంఠ-తాలుకే .

ప్రాణస్యాంతర్గతే సూక్ష్మే షోడశ చైవ రేణుకే ..

స్థానత్రయవినిష్క్రాంతే మాత్రాత్రయవినిష్ఠితే .

మాతృకేత్యేకవీరే చ వ్యోమాతీతే పరాత్పరే ..

పీఠస్థే పీఠమధ్యస్థే మాయాతీత-పరాత్పరే .

హంకారార్ధకలాపూర్ణే రేణుకాయై నమోఽస్తు తే ..

త్వయా వినైకభేదేన వ్యాపితం సచరాచరం .

ఇచ్ఛా-జ్ఞాన-క్రియా-శక్తి రేణుకాయై నమోఽస్తు తే ..

గిరిమధ్యే తథారణ్యే మేరుమధ్యే హిమాచలే .

నందా కాత్యాయనీ దుర్గే రేణుకాయై నమోఽస్తు తే ..

స్వర్గపాతాలమర్త్యేషు విచరంతీ త్వనేకధా .

ప్రచండయోగినీ చండే ఏకవీరే నమోఽస్తు తే ..

తేజోమండలదుర్ధర్షే సూర్యకోటి-సమప్రభే .

దుర్నిరీక్ష్యే దురాధారే ఏకవీరే నమోఽస్తు తే ..

ఐం బీజం వ్యాపితం యేన వజ్రేయం సచరాచరం .

త్రైలోక్యం క్షోభయంతీం త్వా మాయాబీజేన రేణుకాం ..

త్వమేవ పరమం జాప్యం త్వమేవ పరమం తపః .

త్వమేవ పరమం జ్ఞానం రేణుకాయై నమోఽస్తు తే ..

త్వం మాతా త్వం పితా భ్రాతా త్వం సఖా త్వం గురుప్రభుః .

త్వమేవ జగతాం ధాత్రీ త్రాహి మాం భక్తవత్సలే ..

అధర్మః కురు తే ధర్మ ధనవాన్ ధనమీశ్వరి .

అజాతిః కురు తే జాతిస్త్వయాజ్ఞా పరమేశ్వరి ..

అపవిత్రం పవిత్రేయం కురుషే త్వం సదాంబికే .

త్వమేవ పరమం తీర్థం త్రైమూర్తిస్త్వం జగన్మయే ..

జాతిభ్రష్టా కులభ్రష్టా వ్రతభ్రష్టా చ యే నరాః .

ఏకవీరాప్రసాదేన శుద్ధాస్తే నాత్ర సంశయః ..

ద్విజాతి మ్లేక్ష పర్యంతం పాపం యః కురుతే నరః .

తత్సర్వం దహ్యతే క్షిప్రం రేణుకాదర్శనేన తు ..

వర్ణావర్ణో న తస్యాస్తి త్వన్మార్గే యే యథేరితం .

తీర్థం భూతాసి మాతంగీ రేణుకాయై నమోఽస్తు తే ..

విరజే రజనీమూర్తే నిర్ధూతే ధూతకల్మషే .

త్రైలోక్య పావని పుణ్యే ఏకవీరే నమోఽస్తు తే ..

సమనో ఘ్రాణాంఘ్రి పాణిశ్చ దద్రుస్ఫోటకమేవ చ .

దారిద్ర్య-దుఃఖ-రోగఘ్నీం తాం వందే రేణుకామహం ..

కల్పద్రుమ-సమాఖ్యాతా చింతామణి-విభూషితా .

రేజనాః కిం పశ్యంతి రేణుకాం కామధేనుకాం ..

ధర్మార్థకామమోక్షాణాం పురుషాణాం చతుర్విధాం .

ఏకవీరాప్రసాదేన సిధ్యంతే నాత్ర సంశయః ..

సర్వం తీర్థాభిషేకం తు సర్వయజ్ఞఫలం లభేత .

ఆషాఢే చైవ కార్తిక్యాం రేణుకాదర్శనేన తు ..

పృథివ్యాం యాని తీర్థాని సముద్రా సరితాని చ .

ఏకవీరా పరం నాస్తి సద్యః ప్రత్యయకారకం ..

కార్తిక్యాం కృత్తికాయోగే యః పశ్యంతీహ రేణుకాం .

న తేషాం పునరావృత్తిః కల్పకోటిశతైరపి ..

శ్రీసింహామలకం దేవ దేవదేవేన సేవితం .

ముక్తిగతా సమాసాద్య ద్విసప్తతిచతుర్ముఖాః ..

దేవదేవో తథా రుద్రః సంభేదో భాస్కరాలయం .

తోయం మేరుస్తడాగస్య సద్యః పాపహరాణి షట్ ..

కురుక్షేత్రే సకృత్తీర్థే రాహుగ్రస్తే దివాకరే .

ప్రయాగం చ సదాతీర్థం గయా గంగా చ రేణుకా ..

ఆధారభూతనిలయో లలనారూపధారిణీ .

క్షుధా తృషా చ దుఃఖఘ్నీం తాం వందే రేణుకామహం ..

యే పశ్చిమాస్తు యే సిద్ధా పూర్వాయై యే చ సంస్థితాః .

ఏకవీరా పరం బీజం శాశ్వతం పదమవ్యయం ..

మాయాబీజేన యా ప్రోక్తా హంకారార్ద్ధకలాస్మృతా .

సా యోనిః సర్వమంత్రాణాం సా శక్తిః రేణుకా స్మృతా ..

కిం తస్య బహుభిర్మంత్రైర్వేదసిద్ధాంతవిస్తరైః ..

ఏకవీరామహామంత్రం సర్వ-కామ-ఫలప్రదం ..

మూలమంత్రమిదం ప్రోక్తం హంసభేదేన సంస్థితం .

స సాక్షాద్ భైరవే ప్రోక్తమేకవీరం పరాత్పరం ..

శివశక్తిమిదం బీజం రేణుకామిదమవ్యయం .

సర్వమంగలమాంగల్యే పవిత్రం పాపనాశనం ..

య ఇదం పఠతే నిత్యం త్రిసంధ్యం శ్రద్ధయాన్వితం .

ఆయురారోగ్యమైశ్వర్యం పదం నిర్వాణమాప్నుయాత్ ..

అచలాం శ్రియామాప్నోతి పుత్రదారాది సంపదాం .

భుంజతే విపులాన్భోగాన్ త్రైలోక్యం మోహయేద్ధ్రువం ..

ఏకవీరా ఇదం బీజం త్రైలోక్యే యః పఠేన్నరః .

ఐశ్వర్యం లభతే రాజ్యం వాగైశ్వర్యం చ జాయతే ..

దుర్వృత్తానామశేషేణ తథా దుఃస్వప్నదర్శనే .

రక్షోభూత-పిశాచేభ్యో గ్రహపీడాం వ్యపోహతి ..

రేణుకాపరమం స్తోత్రం యే జపంతి చ మానవాః .

ప్రాప్నుయాత్పరమాం సిద్ధిమణిమాది గుణాష్టధాం ..

మాతాపురస్థితా దేవీ మాతృపీఠోద్భవా శివా .

మహాదేవేన సంస్తుత్య భుక్తి-ముక్తి-ఫలప్రదాం ..

రేణుకాయా ఇదం స్తోత్రం పఠిష్యతి దినే దినే .

స గచ్ఛేత్ పరమం స్థానం యత్ర దేవో మహేశ్వరః ..

ఇతి శ్రీకౌలార్ణవే శ్రీభైరవప్రోక్తం రేణుకాస్తవరాజస్తోత్రం సంపూర్ణం .

            .. శ్రీ రేణుకార్పణమస్తు ..

రేణుకాష్టక మరాఠీ శ్రీవిష్ణుదాసకృత

శ్రీగణేశాయ నమః .

లక్ష-కోటి-చండకీర్ణ-సుప్రచండ విలపతీ .

అంబ  చంద్రవదనబింబ దీప్తీమాజి లోపతీ .

సింహ-శిఖర-అచలవాసి మూళపీఠ నాయికా .

ధర్మ-అర్థ-కామ-మోక్ష కల్పవృక్ష రేణుకా .. 1..

ఆకర్ణ అరుణవర్ణ నేత్ర శ్రవణీం దివ్య కుండలే .

డోలతాతి పుష్పహార భార ఫార దాటలే .

అష్టదండి బాజుబంది కంకణాది ముద్రికా .

ధర్మ-అర్థ-కామ-మోక్ష కల్పవృక్ష రేణుకా .. 2..

ఇంద్రనీళ-పద్మరాగ-పాచహీర వేగళా .

పాయఘోళ-బోరమాళ-చంద్రహార వేగళా .

పైంజణాది భూషణేచ లోపల్యాతి పాదుకా .

ధర్మ-అర్థ-కామ-మోక్ష కల్పవృక్ష రేణుకా .. 3..

ఇంద్ర-చంద్ర-విష్ణు-బ్రహ్మ-నారదాది వందితీ .

ఆది-అంత ఠావహీన ఆదిశక్తి భగవతీ .

ప్రచండ చండముండ ఖండవిఖండకారి అంబికా .

ధర్మ-అర్థ-కామ-మోక్ష కల్పవృక్ష రేణుకా .. 4..

పర్వతాగ్రవాసి పక్షి అంబ ! అంబ ! బోలతీ .

విశాల శాలవృక్ష రానీం భవాని ధ్యాని డోలతీ .

అవతార కృత్యాసార జడ-ముడాది తారకా .

ధర్మ-అర్థ-కామ-మోక్ష కల్పవృక్ష రేణుకా .. 5..

అనంత బ్రహ్మాండ పోటి పూర్వముఖాం బైసలీ .

అనంతగుణ అనంతశక్తి విశ్వజనని భాసలీ .

సవ్యభాగి దత్త-అత్రి వామభాగి కాలికా .

ధర్మ-అర్థ-కామ-మోక్ష కల్పవృక్ష రేణుకా .. 6..

పవిత్ర మాతృక్షేత్ర ధన్య వాస పుణ్య ఆశ్రమీం .

అంబదర్శనాస భక్త అభక్త యేతి ఆశ్రమీం .

మ్హణూని విష్ణుదాస నిజలాభ పావలా ఫుకా ..

ధర్మ-అర్థ-కామ-మోక్ష కల్పవృక్ష రేణుకా .. 7..

             .. శ్రీరేణుకార్పణమస్తు ..

రేణుకాకవచం భైరవరుద్రయామాలే

శ్రీ దేవ్యువాచ .

జమదగ్నిప్రియాం దేవీం రేణుకామేకమాతరం

సర్వారంభే ప్రసీద త్వం నమామి కులదేవతాం .

అశక్తానాం ప్రకారో వై కథ్యతాం మమ శంకర

పురశ్చరణకాలేషు కా వా కార్యా క్రియాపరా ..

శ్రీ శంకర ఉవాచ .

వినా జపం వినా దానం వినా హోమం మహేశ్వరి .

రేణుకా మంత్రసిద్ధిస్యాన్నిత్యం కవచపాఠతః ..

త్రైలోక్యవిజయం నామ కవచం పరమాద్భుతం .

సర్వసిద్ధికరం లోకే సర్వరాజవశంకరం ..

డాకినీ-భూతవేతాల-బ్రహ్మరాక్షస-నాశనం .

పురా దేవాసురే యుధ్దే మాహిషే లోకే విగ్రహే ..

బ్రహ్మణా నిర్మితా రక్షా సాధకానాం సుఖాయ చ .

మంత్రవీర్యం సమోపేతం భూతాపస్మార-నాశనం ..

దేవైర్దేవస్య విజయే సిద్ధేః ఖేచర-సిధ్దయే .

దివా రాత్రమధీతం స్యాత్ రేణుకా కవచం ప్రియే ..

వనే రాజగృహే యుద్ధే బ్రహ్మరాక్షససంకులే .

బంధనే గమనే చైవ కర్మణి రాజసంకటే ..

కవచస్మరణాదేవ సర్వం కల్యాణమశ్నుతే .

రేణుకాయాః మహాదేవ్యాః కవచం శృణు పార్వతి ..

యస్య స్మరణమాత్రేణ ధర్మకామార్థభాజనం .

రేణుకా-కవచస్యాస్య ఋషిర్బ్రహ్మా విధీయతే ..

ఛందశ్చిత్రాహ్వయం ప్రోక్తం దేవతా రేణుకా స్మృతా .

పృథ్వీ బీజం రమా శక్తిః పురుషార్థ-చతుష్టయం ..

వినియోగో మహేశాని తదాకాలే ప్రకీర్త్తితః ( ప్రకీర్తితః ).

ధ్యాత్వా దేవీం మహామాయాం జగన్మాతరమంబికాం ..

పూర్ణకుంభసమాయుక్తాం ముక్తాహారవిరాజితాం .

స్వర్ణాలంకారసంయుక్తాం స్వర్ణసింహాసనస్థితాం ..

మస్తకే గురుపాదాబ్జం ప్రణమ్య కవచం పఠేత్ .

ఇంద్రో మాం రక్షతు ప్రాచ్యాం వహ్నౌ వహ్నిః సురేశ్వరి ..

యామ్యాం యమః సదా పాతు నైరృత్యాం నిరృతిస్తథా .

పశ్చిమే వరుణః పాతు వాయవ్యే వాయుదేవతా ..

ధనశ్చోత్తరే పాతు ఈశాన్యామీశ్వరో విభుః .

ఊర్ధ్వం బ్రహ్మా సదా పాతు అనంతోఽధః సదాఽవతు ..

పంచాంతకో మహేంద్రశ్చ వామకర్ణేందుభూషితః .

ప్రణవం పుటితం కృత్వా తత్కృత్వా ప్రణవం పునః ..

సముచ్చార్య తతో దేవీకవచం ప్రపఠే తథా .

బ్రహ్మాణీ మే శిరః పాతు నేత్రే పాతు మహేశ్వరీ ..

వైష్ణవీ నాసికాయుగ్మం కర్ణయోః కర్ణవాసినీ .

కంఠం మాతు మహాలక్ష్మీర్హృదయం చండభైరవీ ..

బాహూ మే బగలా పాతు కరౌ మహిషమర్దినీ .

కరాంగులిషు కేశేషు నాభిం మే చర్చికాఽవతు ..

గుహ్యం గుహ్యేశ్వరీ పాతు ఊరూ పాతు మహామతిః .

జానునీ జననీ రామా గుల్ఫయోర్నారసింహికా ..

వసుంధరా సదా పాదౌ పాయాత్పాదాంగులీషు చ .

రోమకూపే మేదమజ్జా రక్త-మాంసాస్థిఖండికే ..

రేణుకా జననీ పాతు మహాపురనివాసినీ  .

రక్షాహీనం తు యత్స్థానం వర్జితం కవచేన తు ..

పూర్వం బీజం సముచ్చార్య సంపుటక్రమయోగతః .

ముద్రాం వధ్వా మహేశాని గోలం న్యాసం సమాచరేత్ ..

అస్య శ్రీరేణుకా-కవచమంత్రస్య బ్రహ్మా ఋషిః అనుష్టుప్ ఛందః రేణుకా దేవతా

లం బీజం రేణుకా ప్రీత్యర్థే గోలన్యాసే వినియోగః .

ఓం రాం అంగుష్ఠాభ్యాం నమః .

ఓం రీం తర్జనీభ్యాం నమః .

ఓం రూం మధ్యమాభ్యాం నమః .

ఓం రైం అనామికాభ్యాం నమః .

ఓం రౌం కనిష్ఠికాభ్యాం నమః .

ఓం రః కరతలకరపృష్ఠాభ్యాం నమః .

ఏవం హృదయాదిన్యాసః .

ఓం పం నమః మూర్ధ్ని .

ఓం ఫం నమః దక్షిణనేత్రే .

ఓం బం నమః వామనేత్రే .

ఓం భం నమః దక్షిణనాసాపుటే .

ఓం మం నమః వామనాసాపుటే .

ఓం యం నమః దక్షిణకర్ణే .

ఓం రం నమః వామకర్ణే .

ఓం లం నమః ముఖే .

ఓం వం నమః గుదే .

బ్రహ్మాణీ బ్రహ్మభాగే చ శిరో ధరణి ధారిణీ .

రక్ష రక్ష మహేశాని సదా మాం పాహి పార్వతీ ..

భైరవీ త్రిపురా బాలా వజ్రా మే తారిణీ పఱా .

రక్ష రక్ష మహేశాని సదా మాం పాహి పార్వతీ ..

ఏషా మేఽఙ్గం సదా పాతు పార్వతీ హరవల్లభా .

మహిషాసురసంహర్త్రీ విధాతృవరదాయినీ ..

మస్తకే పాతు మే నిత్యం మహాకాలీ ప్రసీదతు .

ఆకాశే తాడకా పాతు పాతాలే వహ్నివాసినీ ..

వామదక్షిణయోశ్చాపి కాలికా చ కరాలికా .

ధనుర్బాణధరా చైవ ఖడ్గ-ఖట్వాంగ-ధారిణీ ..

సర్వాంగం మే సదా పాతు రేణుకా వరదాయినీ .

రాం రాం రాం రేణుకే మాతర్భార్గవోద్ధారకారిణీ ..

రాజరాజకులోద్భూతే సంగ్రామే శత్రుసంకటే .

జలాప్నావ్యే వ్యాఘ్రభయే తథా రాజభయేఽపి చ .

శ్మశానే సంకటే ఘోరే పాహి మాం పరమేశ్వరి ..

రూపం దేహి యశో దేహి ద్విషతాం నాశమేవ చ .

ప్రసాదః స్యాచ్ఛుభో మాతర్వరదా రేణుకే భవ ..

ఐం మహేశి మహేశ్వరి చండిమే

       భుజంగధారిణి శంఖకపాలికే .

కనక-కుండల-మండల-భాజనే

       వపురిదంచ పునీహి మహేశ్వరి ..

ఇదం శ్రీకవచం దేవ్యాః రేణుకాయా మహేశ్వరి .

త్రికాలం యః పఠేన్నిత్యం తస్య సిద్ధిః ప్రజాయతే ..

గ్రహణేఽర్కస్య చంద్రస్య శుచిః పూర్వముపోషితః .

శతత్రయావృత్తిపాఠాద్మంత్రసిద్ధిః ప్రజాయతే ..

నదీసంగమమాసాద్య నాభిమాత్రోదకస్థితః .

రవిమండలముద్వీక్ష్య జలే తత్ర స్థితాం శివాం ..

విచింత్య మండలే దేవీ కార్యే సిద్ధిర్భవేద్ధ్రువం .

ఘటం తవ ప్రతిష్ఠాప్య విభూతిస్తత్ర వేశయేత్ .

దీపం సర్షపతైలేన కవచం త్రిః పఠేత్తదా ..

భూతప్రేత-పిశాచాశ్చ డాకిన్యో యాతుధానికా .

సర్వ తే నాశమాయాంతి కవచస్మరణాత్ప్రియే ..

ధనం ధాన్యం యశో మేధాం యత్కించిన్మనసేప్సితం .

కవచస్మరణాదేవ సర్వమాప్నోతి నిత్యశః ..

ఇతి శ్రీ మాతృసంస్థానే భైరవరుద్రయామలే రేణుకాకల్పే

పంచమం పటలం సంపూర్ణం ..

రేణుకాకవచం డామరేశ్వరతంత్రే షష్ఠితమోఽధ్యాయః

  .. శ్రీ గణేశాయ నమః ..

శృణు దేవి ప్రవక్ష్యామి రేణుకాకవచం పరం .

యేన విజ్ఞానమాత్రేణ సాన్నిధ్యం రేణుకా భవేత్ ..

రేణుకాకవచస్యాస్య భార్గవస్తు ఋషిః స్మృతః .

ఛందోఽనుష్టుప్ తథా దేవీ రేణుకా దేవతా మమ ..

ఇష్ట-కామ్యార్థ-సిద్ధ్యర్థే వినియోగో వరాననే .

రేణుకా మే శిరః పాతు పరా శక్తిస్వరూపిణీ ..

భాలం రక్షతు భువనేశీ లోచనం మే త్రిలోచనీ .

ముఖం మే రేణుకా పాతు నాసికాం కాలనాశినీ ..

భ్రువౌ సుభ్రూలతా పాతు దంతాన్మే కుందదంతికా .

ఓష్ఠం బింబోష్ఠికా పాతు జింహ్వాం పాతు సురేశ్వరీ ..

గ్రీవాం రక్షతు ఇంద్రాణీ కుక్షౌ రక్షేత్కులేశ్వరీ .

గండం మే పాతు చాముండా మహాలక్ష్మీస్తు కంధరం ..

అసౌ హంసప్రియా పాతు బాహూ సాయుధవాహుకా .

వాణీం వక్షస్థలం పాతు హృదయం హృదయేశ్వరీ ..

జఘనే ఘనవాహా మే గుహ్యం గుహ్యేశ్వరీ మమ .

ఊరూ వరోరుకా పాతు శ్రీదేవీ సిద్ధిదేవతా ..

సర్వాంగం సర్వదా పాతు సర్వాణీ రూపిణీ వరా .

ఇతి శ్రీరేణుకా వర్మ దుష్కర్మ త్రాసనం సదా ..

స్తుతిమాత్రేణ  భక్తానాం సంరక్షణవిచక్షణం .

జప్త్వా తు కవచం దేవ్యాః యత్ర తత్ర తు గచ్ఛతి ..

తత్ర తత్ర జయో లాభః కార్యసిద్ధిశ్చ జాయతే .

.. ఇతి శ్రీ డామరేశ్వరతంత్రే రేణుకాకవచం నామ షష్ఠితమోఽధ్యాయః ..