Sacred Stotras & Deities

తులసీపూజా 1

.. అథ తులసీ పూజా ప్రారంభః ..

.. శ్రీగణేశాయ నమః ..

.. అథ తులసీపూజనం లిఖ్యతే ..

శ్రీమహాదేవ ఉవాచ ..

శుభే పక్షే శుభే వారే శుభే ఋక్షే శుభోదయే .

కేశవార్థే శుభాంశే చ రోపయేత్తులసీం మునిః .. 1..

గృహస్థో గృహమధ్యే వా గృహస్థోపవనేపి వా .

శుచౌ దేశే తు తులసీమర్చ్చయేద్బుద్ధిమాన్నరః .. 2..

మూలే చ వేదికాం కృత్వా ఆలవాలసమన్వితాం .

ప్రాతఃసంధ్యావిధిం కృత్వా స్నానపూర్వం దినే దినే .. 3..

గాయత్ర్యష్టజపం కృత్వా తులసీం పూజయేత్తతః .

ప్రాఙ్ముఖోదఙ్ముఖో వాపి స్థిత్వా ప్రయతమానసః .. 4..

ధ్యాయేచ్చ తులసీం దేవీం శ్యామాం కమలలోచనాం

ప్రసన్నపద్మకల్హారవరాభయచతుర్భుజాం .. 5..

కిరీటహారకేయూరకుండలాదివిభూషితాం .

ధవలాంశుకసంయుక్తాం పద్మాసననిషేదుషీం .. 6..   ఇతి ధ్యానం ..

దేవి త్రైలోక్యజనని సర్వలోకైకపావని .

ఆగచ్ఛ భగవత్యత్ర ప్రసీద తులసి ద్రుతం .. 7..  ఆవాహనం ..

సర్వ దేవమయే దేవి సర్వదా విష్ణువల్లభే .

రత్నస్వర్ణమయం దివ్యం గృహాణాసనమవ్యయే .. 8..   ఆసనం ..

సర్వదేవమయాకారే సర్వదేవనమోఽస్తుతే .

పాద్యం గృహాణ దేవేశి తులసి త్వం ప్రసీద మే .. 9..  పాద్యం ..

సర్వ దేవమయాకారే సర్వాంగమణిశోభితే .

ఇదమర్ఘంగృహానత్వం దేవి దైత్యాంంతకప్రియే .. 10..  అర్ఘ్యం ..

సర్వలోకస్య రక్షార్థం సదా సంనిధికారరిణి ..

గృహాణ తులసి ప్రీత్యా ఇదమాచమనీయకం .. 11..  ఆచమనం ..

గంగాదిభ్యో నదీభ్యశ్చ సమానీతమిదం జలం .

స్నానార్థం తులసి స్వచ్ఛం ప్రీత్యా తత్ప్రతిగృత్ద్యతాం .. 12..  స్నానం ..

క్షిరోదమథనోద్భూతే చంద్రలక్ష్మీసహోదరే .

గృత్ద్యతాం పరిధానార్థమిదం క్షౌమాంబరం శుభే .. 13..  వస్త్రం ..

శ్రీగంధం కుంకుమం దివ్యం కర్పూరాగరుసంయుతం .

కల్పితం తే మహాదేవి ప్రీత్యర్థం ప్రతిగృత్ద్యతాం .. 14..  గంధం ..

నీలోత్పలం తు కల్హారమాలత్యాదీని శోభనే .

పద్మాదిగంధవంతీని పుష్పాణి ప్రతిగృత్ద్యతాం .. 15..  పుష్పం ..

ధూపం గృహాణ్ దేవేశి మనోహారి సగుగ్గలం .

ఆజ్యమిస్రం తు తులసి భక్తాభిష్టప్రదాయిని .. 16..  ధూపం ..

అజ్ఞానతిమిరాంధస్య జ్ఞానదీపప్రదాయినీ .

త్వయా తు తులసి ప్రితా దీపోయం ప్రతిగృత్ద్యతాం .. 17..  దీపం .

నమస్తే జగతాం నాథే ప్రాణినాం ప్రియదర్శనే .

యథాశక్తి మయా దత్తం నైవేద్యం ప్రతిగృత్ద్యతాం .. 18..  నైవేద్యం ..

నమో భగవతే శ్రేష్ఠే నారయనజగన్మయే .

తులసి త్వరయా దేవి పానీయం ప్రతిగృత్ద్యతాం .. 19..  పానీయం ..

అమృతేమృతసంభూతే తులస్యమృతరూపిణి .

కర్పూరాదిసమాయుక్తం తాంబూలం ప్రతిగృత్ద్యతాం .. 20..  తాంబూలం ..

దక్షిణా దక్షిణకరే త్వద్భక్తానాం ప్రియంకరి .

కరోమి తే సదా భక్త్యా విష్ణుకాంతే ప్రదక్షిణాం .. 21..

నమో నమో జగద్ధాత్ర్యై జగదాద్యై నమో నమః .

నమో నమో జగద్భూత్యై నమస్తే పరమేశ్వరి .. 22..

ప్రసీద మమ దేవేశి కృపయా పరయా సదా .

అభిష్టఫలసిద్ధ్యర్థ కురు మే మాధవప్రియే .. 23..

ఇత్యేవమర్చ్చయేన్నిత్యం ప్రాతరేవ శుచిర్నరః .

మధ్యాహ్నే వాథ సాయాహ్నే పూజయేత్ప్రయతో నరః .. 24..

.. ఇతి తులసీపూజాసంపూర్ణా ..

తులసీపత్రపూజామహిమా

తులస్యువాచ .

పునస్తుష్టావ తుష్టాత్మా వచోభిరమలైః సఖి .. 1..

ఓంకారాయ నమస్తేఽస్తు శంకరాయ నమో నమః .

శివాయ హరయే దక్షబలిక్రతుహరాయ తే .. 2..

ఏకత్రిపురహంత్రే తే కైటభాంధకఘాతినే .

శ్రీగౌరీపతయే కృష్ణ మహాదేవ నమోఽస్తు తే .. 3..

ఇత్యాది స్తువతీం దేవీం తులసీం శివసన్నిధౌ .

జగాద వరదో దేవో దేవకీనందనో హరిః .. 4..

హరిరువాచ .

తులసి శ్రీమతి శ్రేష్ఠే వృందే వృందావనే ప్రియే .

స్థిరీభవ మమ ప్రీత్యై యావదాచంద్రతారకం .. 5..

సదాభినంద్యా వంద్యా చ సురాసురనరోరగైః .

తవ పత్రమృతే పూజా నాద్యారభ్య భవేన్మమ .. 6..

ఏకతః సర్వనైవేద్యనానాపుష్పవిభూషణం .

ఏకతః పచమేకం తే ద్వాదశాక్షరమంత్రవత్ .. 7..

త్వాం యః ప్రదక్షిణీకృత్య ప్రణమేత్ దండవత్ తరుం .

ససప్తద్వీపా పృథివీ కృతా తేన ప్రదక్షిణా .. 8..

శ్రాద్ధే చ తర్పణే చైవ దానే నైవేద్యదాపనే .

త్వత్పత్రేణ వినా న స్యాత్ తత్తత్కర్మఫలోత్తరం .

పూజితే మయి పత్రైస్తే తుష్టాః స్యుః సర్వదేవతాః .. 9..

కార్త్తికే మాసి తే పత్రమేకం యచ్ఛతి యో జనః .

స గోసహస్త్రదానస్య ఫలమాప్నోతి మానవః .. 10..

మాఘే మాసి చ తే పత్రమాలాం యచ్ఛతి యో జనః .

తస్మై అహం ప్రయచ్ఛామి వాజిమేధక్రతోః ఫలం .. 11..

వైశాఖే మాసి తే పత్రైర్యో మే శయ్యాం ప్రయచ్ఛతి .

తస్మై అహం ప్రయచ్ఛామి స్వమేవ కిమితోఽధికం .. 12..

వైశాఖే మాసి తే పత్రజలేన యోఽభిషించతి .

తస్మై అహం ప్రయచ్ఛామి సదామృతనిధిస్థితిం .. 13..

ఆషాఢే మాసి యో మహ్యం త్వత్పత్రరసవాసితం .

జలం దదాతి తస్మై చ దదామ్యపునరుద్భవం .. 14..

త్వత్పత్రం యత్ర తత్రాపి పతేత్ యత్ర మహీతలే .

తదహం శిరసా గ్రాహ్యం కరిష్యామి శివాజ్ఞయా .. 15..

త్వత్పత్రజలసిక్తాన్నం యో భుంక్తే మానవః క్వచిత్ .

తదేవామృతమిత్యుక్తం భుక్తం భాగ్యవతా శుభే .. 16..

త్వత్పత్రరసభోజీ యో గంగాజలసమన్వితం .

సోఽహమిత్యేవ విజ్ఞేయం సత్యం సత్యం శపే శపే .. 17..

స్పృష్ట్వా యస్తులసీపత్రం మిథ్యా వదతి శోభనే .

న తస్య నరకాదుగ్రాదుద్ధారః కల్పకోటిషు .. 18..

త్వత్కాష్ఠమాలాం త్వత్కాష్ఠఘృష్టపంకంచ యోఽదధత్ .

అహం తస్యానుగః శుద్ధే భవామి సుతవత్పితుః .. 19..

ఇతి బృహద్ధర్మపురాణాంతర్గతా నారాయణకృతా తులసీపత్రపూజామహిమా సంపూర్ణా ..

.. బృహద్ధర్మపురాణం . పూర్వఖండః . అధ్యాయః 8. 18-32..

తులసీకవచం 2

కవచం తవ వక్ష్యామి భవసంక్రమనాశనం .

యస్య జాపేన సిద్ధ్యంతి సర్వార్థా నాతియత్నతః .. 1..

తులసీ పాతు మే నిత్యం శిరోవక్త్రోష్ఠనాసికాః .

శ్రోత్రనేత్రలలాటం చ భ్రూకపోలం నిరంతరం .. 2..

శ్రీసఖీ పాతు మే కంఠం భుజౌ వక్షశ్చ కక్షకం .

పృష్ఠం చ పిఠరం సర్వం స్తనం జానూ చ హృత్తటం .. 3..

శుభా పాతూదరం నాభిం పార్శ్వం హస్తాంగులిం తథా .

జాఠరం వహ్నిమఖిలం గుదం జఘనగుహ్యకం .. 4..

పాపహారిణ్యవతు మే ఊరూ స్ఫిఙ్మాంసజానుకం .

పుణ్యదాఽవతు మే జంఘే పాదౌ నారదసేవితా .. 5..

యదుక్తం యచ్చ నోక్తం మే యద్బాహ్యం యత్తథాంతరం .

సర్వాంగం పాతు మే దేవీ నారాయణమనః ప్రియా .. 6..

ఇతీదం కవచం దివ్యం తులస్యాః సర్వసిద్ధికృత్ .

త్రిసంధ్యం యో జపేత్తస్య శ్రీర్విద్యాఽఽయుశ్చ వర్ధతే .. 7..

ప్రాచీః షడ్ విలిఖేద్రేఖాః ఉదీచీం పంచ చైవ హి .

సంఖ్యానాం వింశతిస్తత్ర కోష్ఠానాం తు భవిష్యతి .. 8..

కోష్ఠే కోష్ఠే లిఖేత్పాదం మంత్రస్యాస్య యథాక్రమం .

భూర్జే రోచనయా విద్వాన్ కోష్ఠం కుంకుమమిశ్రయా .. 9..

యస్య యంత్రమిదం మూర్ధ్ని భుజే కంఠేఽథవా భవేత్ .

సంగ్రామే వ్యవహారే చ చోరవ్యాఘ్రభయేషు చ .. 10..

మారీభయే వర్షభయే నిర్ఘాత భయపీడితే .

క్షయాపస్మారపీడాసు సర్పవృశ్చికలూల(త )కే .. 11..

తాపజ్చరేఽథవా శీతే నేత్రరోగే చ దుఃసహే .

న తస్య కించిద్ దురితమిహాముత్ర చ జాయతే .. 12..

వంధ్యా యా ధారయేద్యంత్రం అచిరాత్పుత్రిణీ భవేత్ .

ఇతీదం కవచం ప్రోక్తం వాదే చ విజయప్రదం .. 13..

గోమయేన మృదా చైవ నిర్మాయ ప్రతివాదినం .

లంబమానాం తస్య జిహ్వాం కృత్వా చ నిహయా లిపేత్ .. 14..

వామపాదేన చాక్రమ్య తజ్జిహ్వాం కవచం జపేత్ .

అచిరాత్తస్య జిహ్వాయాః స్తంభో భవతి సంసది .. 15..

వశ్యమాకర్షణం చైవ స్తంభనోచ్చాటనే తథా .

ద్వేషణం మారణం చైవ మంత్రేణానేన విందతి .. 16..

విన్యస్తకవచో యస్తు మంత్రరాజేన మంత్రితం .

భక్షయేత్తు త్వచం తస్య వాక్పతిత్వం న సంశయః .. 17..

కామ్యసిద్ధిర్మయోక్తా తే మోక్షసిద్ధిం నిశామయ .

యో నవైస్తులసీపత్రైః సాలగ్రామశిలార్చనం .. 18..

కుర్యాత్పురుషసూక్తేన తస్య మోక్షః కరే స్థితః .

వృద్ధపాద్మతః

తులసీకవచం 1

శ్రీగణేశాయ నమః .

అస్య శ్రీతులసీకవచస్తోత్రమంత్రస్య శ్రీమహాదేవ ఋషిః .

అనుష్టుప్ఛందః . శ్రీతులసీ దేవతా .

మమ ఈప్సితకామనాసిద్ధ్యర్థం జపే వినియోగః .

తులసీ శ్రీమహాదేవి నమః పంకజధారిణి .

శిరో మే తులసీ పాతు భాలం పాతు యశస్వినీ .. 1..

దృశౌ మే పద్మనయనా శ్రీసఖీ శ్రవణే మమ .

ఘ్రాణం పాతు సుగంధా మే ముఖం చ సుముఖీ మమ .. 2..

జిహ్వాం మే పాతు శుభదా కంఠం విద్యామయీ మమ .

స్కంధౌ కహ్లారిణీ పాతు హృదయం విష్ణువల్లభా .. 3..

పుణ్యదా మే పాతు మధ్యం నాభిం సౌభాగ్యదాయినీ .

కటిం కుండలినిం పాతు ఊరూ నారదవందితా .. 4..

జననీ జానునీ పాతు జంఘే సకలవందితా .

నారాయణప్రియా పాదౌ సర్వాంగం సర్వరక్షిణీ .. 5..

సంకటే విషమే దుర్గే భయే వాదే మహాహవే .

నిత్యం హి సంధ్యయోః పాతు తులసీ సర్వతః సదా .. 6..

ఇతీదం పరమం గుహ్యం తులస్యాః కవచామృతం .

మర్త్యానామమృతార్థాయ భీతానామభయాయ చ .. 7..

మోక్షాయ చ ముముక్షూణాం ధ్యాయినాం ధ్యానయోగకృత్ .

వశాయ వశ్యకామానాం విద్యాయై వేదవాదినాం .. 8..

ద్రవిణాయ దరిద్రాణాం పాపినాం పాపశాంతయే .. 9..

అన్నాయ క్షుధితానాం చ స్వర్గాయ స్వర్గమిచ్ఛితాం .

పశవ్యం పశుకామానాం పుత్రదం పుత్రకాంక్షిణాం .. 10..

రాజ్యాయ భ్రష్టరాజ్యానామశాంతానాం చ శాంతయే .

భక్త్యర్థం విష్ణుభక్తానాం విష్ణౌ సర్వాంతరాత్మని .. 11..

జాప్యం త్రివర్గసిద్ధ్యర్థం గృహస్థేన విశేషతః .

ఉద్యంతం చండకిరణముపస్థాయ కృతాంజలిః .. 12..

తులసీకాననే తిష్ఠన్నాసీనో వా జపేదిదం .

సర్వాన్కామానవాప్నోతి తథైవ మమ సన్నిధిం .. 13..

మమ ప్రియకరం నిత్యం హరిభక్తివివర్ధనం .

యా స్యాన్మృతప్రజా నారీ తస్యా అంగం ప్రమార్జయేత్ .. 14..

సా పుత్రం లభతే దీర్ఘజీవినం చాప్యరోగిణం .

వంధ్యాయా మార్జయేదంగం కుశైర్మంత్రేణ సాధకః .. 15..

సాఽపి సంవత్సరాదేవ గర్భం ధత్తే మనోహరం .

అశ్వత్థే రాజవశ్యార్థీ జపేదగ్నేః సురూపభాక్ .. 16..

పలాశమూలే విద్యార్థీ తేజోఽర్థ్యభిముఖో రవేః .

కన్యార్థీ చండికాగేహే శత్రుహత్యై గృహే మమ .. 17..

శ్రీకామో విష్ణుగేహే చ ఉద్యానే స్త్రీవశా భవేత్ .

కిమత్ర బహునోక్తేన శృణు సైన్యేశ తత్త్వతః .. 18..

యం యం కామమభిధ్యాయేత్తం తం ప్రాప్నోత్యసంశయం .

మమ గేహగతస్త్వం తు తారకస్య వధేచ్ఛయా .. 19..

జపన్ స్తోత్రం చ కవచం తులసీగతమానసః .

మండలాత్తారకం హంతా భవిష్యసి న సంశయః .. 20..

ఇతి శ్రీబ్రహ్మాండపురాణే తులసీమాహాత్మ్యే తులసీకవచం సంపూర్ణం ..

తులజాష్టకం

దుగ్ధేందు కుందోజ్జ్వలసుందరాంగీం

     ముక్తాఫలాహారవిభూషితాంగీం .

శుభ్రాంబరాం స్తనభరాలసాంగీం

     వందేఽహమాద్యాం తులజాభవానీం .. 1..

బాలార్కభాసామతిచారుహాసాం

     మాణిక్యముక్తాఫలహారకంఠీం .

రక్తాంబరాం రక్తవిశాలనేత్రీం

     వందేఽహమాద్యాం తులజాభవానీం .. 2..

శ్యామాంగవర్ణాం మృగశావనేత్రాం

     కౌశేయవస్త్రాం కుసుమేషు పూజ్యాం ..

కస్తూరికాచందనచర్చితాంగీం

     వందేఽహమాద్యాం తులజాభవానీం .. 3..

పీతాంబరాం చంపకకాంతిగౌరీం

     అలంకృతాముత్తమమండనైశ్చ .

నాశాయ భూతాం భువి దానవానాం

     వందేఽహమాద్యాం తులజాభవానీం .. 4..

చంద్రార్కతాటంకధరాం త్రినేత్రాం

     శూలం దధానామతికాలరూపాం .

విపక్షనాశాయ ధృతాయుధాం తాం

     వందేఽహమాద్యాం తులజాభవానీం .. 5..

బ్రహ్మేంద్ర నారాయణరుద్రపూజ్యాం

     దేవాంగనాభిః పరిగీయమానాం .

స్తుతాం వచోభిర్మునినారదాద్యైః

     వందేఽహమాద్యాం తులజాభవానీం .. 6..

అష్టాంగయోగే సనకాదిభిశ్చ

     ధ్యాతాం మునీంద్రైశ్చ సమాధిగమ్యాం .

భక్తస్య నిత్యం భువి కామధేనుం

     వందేఽహమాద్యాం తులజాభవానీం .. 7..

సింహాసనస్థాం పరివీజ్యమానాం

     దేవైః సమస్తైశ్చ సుచామరైశ్చ .

ఛత్రం దధానామతిశుభ్రవర్ణాం

     వందేఽహమాద్యాం తులజాభవానీం .. 8..

పూర్ణః కటాక్షోఽఖిలలోకమాతు-

     ర్గిరీంద్రకన్యాం భజతాం సుధన్యాం .

దారిద్ర్యకం నైవ కదా జనానాం

     చింతా కుతః స్యాద్భవసాగరస్య .. 9..

తులజాష్టకమిదం స్తోత్రం త్రికాలం యః పఠేన్నరః .

ఆయుః కీర్తిర్యశో లక్ష్మీ ధనపుత్రానవాప్నుయాత్ .. 10..

.. ఇతి శ్రీమచ్ఛంకరాచార్య విరచితం తులజాష్టకం సంపూర్ణం ..

తురజాష్టకం, తుళజాష్టకం