Sacred Stotras & Deities

 శ్రీ మార్గబంధు స్తోత్రం

శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
ఫాలావనంరత్కిరీటం
ఫాలనేత్రార్చిషా దగ్ధపంచేషుకీటం |
శూలాహతారాతికూటం
శుద్ధమర్ధేందుచూడం భజే మార్గబంధుం || 1 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
అంగే విరాజద్భుజంగం
అభ్రగంగాతరంగాభిరామోత్తమాంగం |
ఓంకారవాటీకురంగం
సిద్ధసంసేవితాంఘ్రిం భజే మార్గబంధుం || 2 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
నిత్యం చిదానందరూపం
నిహ్నుతాశేషలోకేశవైరిప్రతాపం |
కార్తస్వరాగేంద్రచాపం
కృత్తివాసం భజే దివ్యసన్మార్గబంధుం || 3 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
కందర్పదర్పఘ్నమీశం
కాలకంఠం మహేశం మహావ్యోమకేశం |
కుందాభదంతం సురేశం
కోటిసూర్యప్రకాశం భజే మార్గబంధుం || 4 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
మందారభూతేరుదారం
మందరాగేంద్రసారం మహాగౌర్యదూరం |
సిందూరదూరప్రచారం
సింధురాజాతిధీరం భజే మార్గబంధుం || 5 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||
అప్పయ్యయజ్వేంద్ర గీతం
స్తోత్రరాజం పఠేద్యస్తు భక్త్యా ప్రయాణే |
తస్యార్థసిద్ధిం విధత్తే
మార్గమధ్యేఽభయం చాశుతోషో మహేశః || 6 ||
శంభో మహాదేవ దేవ
శివ శంభో మహాదేవ దేవేశ శంభో
శంభో మహాదేవ దేవ ||

మహామృత్యుంజయ స్తోత్రం 1

రుద్రం పశుపతిం స్థాణుం నీలకంఠముమాపతిం |
నమామి శిరసా దేవం కిం నో మృత్యుః కరిష్యతి || 1 ||
నీలకంఠం కాలమూర్తిం కాలజ్ఞం కాలనాశనం |
నమామి శిరసా దేవం కిం నో మృత్యుః కరిష్యతి || 2 ||
నీలకంఠం విరూపాక్షం నిర్మలం నిలయప్రదం |
నమామి శిరసా దేవం కిం నో మృత్యుః కరిష్యతి || 3 ||
వామదేవం మహాదేవం లోకనాథం జగద్గురుం |
నమామి శిరసా దేవం కిం నో మృత్యుః కరిష్యతి || 4 ||
దేవదేవం జగన్నాథం దేవేశం వృషభధ్వజం |
నమామి శిరసా దేవం కిం నో మృత్యుః కరిష్యతి || 5 ||
గంగాధరం మహాదేవం సర్వాభరణభూషితం |
నమామి శిరసా దేవం కిం నో మృత్యుః కరిష్యతి || 6 ||
త్ర్యక్షం చతుర్భుజం శాంతం జటామకుటధారిణం |
నమామి శిరసా దేవం కిం నో మృత్యుః కరిష్యతి || 7 ||
భస్మోద్ధూళితసర్వాంగం నాగాభరణభూషితం |
నమామి శిరసా దేవం కిం నో మృత్యుః కరిష్యతి || 8 ||
అనంతమవ్యయం శాంతం అక్షమాలాధరం హరం |
నమామి శిరసా దేవం కిం నో మృత్యుః కరిష్యతి || 9 ||
ఆనందం పరమం నిత్యం కైవల్యపదదాయినం |
నమామి శిరసా దేవం కిం నో మృత్యుః కరిష్యతి || 10 ||
అర్ధనారీశ్వరం దేవం పార్వతీప్రాణనాయకం |
నమామి శిరసా దేవం కిం నో మృత్యుః కరిష్యతి || 11 ||
ప్రళయస్థితికర్తారమాదికర్తారమీశ్వరం |
నమామి శిరసా దేవం కిం నో మృత్యుః కరిష్యతి || 12 ||
వ్యోమకేశం విరూపాక్షం చంద్రార్ధకృతశేఖరం |
నమామి శిరసా దేవం కిం నో మృత్యుః కరిష్యతి || 13 ||
గంగాధరం శశిధరం శంకరం శూలపాణినం |
నమామి శిరసా దేవం కిం నో మృత్యుః కరిష్యతి || 14 ||
అనాథః పరమానందం కైవల్యఃపదగామినం |
నమామి శిరసా దేవం కిం నో మృత్యుః కరిష్యతి || 15 ||
స్వర్గాపవర్గదాతారం సృష్టిస్థిత్యంతకారణం |
నమామి శిరసా దేవం కిం నో మృత్యుః కరిష్యతి || 16 ||
కల్పాయుర్దేహి మే పుణ్యం యావదాయురరోగతాం |
నమామి శిరసా దేవం కిం నో మృత్యుః కరిష్యతి || 17 ||
శివేశానాం మహాదేవం వామదేవం సదాశివం |
నమామి శిరసా దేవం కిం నో మృత్యుః కరిష్యతి || 18 ||
ఉత్పత్తిస్థితిసంహారకర్తారమీశ్వరం గురుం |
నమామి శిరసా దేవం కిం నో మృత్యుః కరిష్యతి || 19 ||
మార్కండేయకృతం స్తోత్రం యః పఠేచ్ఛివసన్నిధౌ |
తస్య మృత్యుభయం నాస్తి నాగ్నిచౌరభయం క్వచిత్ || 20 ||
శతావర్తం ప్రకర్తవ్యం సంకటే కష్టనాశనం |
శుచిర్భూత్వా పఠేత్ స్తోత్రం సర్వసిద్ధిప్రదాయకం || 21 ||
మృత్యుంజయ మహాదేవ త్రాహి మాం శరణాగతం |
జన్మమృత్యుజరారోగైః పీడితం కర్మబంధనైః || 22 ||
తావకస్త్వద్గతః ప్రాణస్త్వచ్చిత్తోఽహం సదా మృడ |
ఇతి విజ్ఞాప్య దేవేశం త్ర్యంబకాఖ్యమనం జపేత్ || 23 ||
నమః శివాయ సాంబాయ హరయే పరమాత్మనే |
ప్రణతక్లేశనాశాయ యోగినాం పతయే నమః || 24 ||

శ్రీ మృత్యుంజయ మానసిక పూజా స్తోత్రం

కైలాసే కమనీయరత్నఖచితే కల్పద్రుమూలే స్థితం
కర్పూరస్ఫటికేందుసుందరతనుం కాత్యాయనీసేవితం |
గంగాతుంగతరంగరంజితజటాభారం కృపాసాగరం
కంఠాలంకృతశేషభూషణమముం మృత్యుంజయం భావయే || 1 ||
ఆగత్య మృత్యుంజయ చంద్రమౌళే
వ్యాఘ్రాజినాలంకృత శూలపాణే |
స్వభక్తసంరక్షణకామధేనో
ప్రసీద విశ్వేశ్వర పార్వతీశ || 2 ||
భాస్వన్మౌక్తికతోరణే మరకతస్తంభాయుతాలంకృతే
సౌధే ధూపసువాసితే మణిమయే మాణిక్యదీపాంచితే |
బ్రహ్మేంద్రామరయోగిపుంగవగణైర్యుక్తే చ కల్పద్రుమైః
శ్రీమృత్యుంజయ సుస్థిరో భవ విభో మాణిక్యసింహాసనే || 3 ||
మందారమల్లీకరవీరమాధవీ-
-పున్నాగనీలోత్పలచంపకాన్వితైః |
కర్పూరపాటీరసువాసితైర్జలై-
-రాధత్స్వ మృత్యుంజయ పాద్యముత్తమం || 4 ||
సుగంధపుష్పప్రకరైః సువాసితై-
-ర్వియన్నదీశీతలవారిభిః శుభైః |
త్రిలోకనాథార్తిహరార్ఘ్యమాదరా-
-ద్గృహాణ మృత్యుంజయ సర్వవందిత || 5 ||
హిమాంబువాసితైస్తోయైః శీతలైరతిపావనైః |
మృత్యుంజయ మహాదేవ శుద్ధాచమనమాచర || 6 ||
గుడదధిసహితం మధుప్రకీర్ణం
సుఘృతసమన్వితధేనుదుగ్ధయుక్తం |
శుభకర మధుపర్కమాహర త్వం
త్రినయన మృత్యుహర త్రిలోకవంద్య || 7 ||
పంచాస్త్ర శాంత పంచాస్య పంచపాతకసంహర |
పంచామృతస్నానమిదం కురు మృత్యుంజయ ప్రభో || 8 ||
జగత్త్రయీఖ్యాత సమస్తతీర్థ-
-సమాహృతైః కల్మషహారిభిశ్చ |
స్నానం సుతోయైః సముదాచర త్వం
మృత్యుంజయానంతగుణాభిరామ || 9 ||
ఆనీతేనాతిశుభ్రేణ కౌశేయేనామరద్రుమాత్ |
మార్జయామి జటాభారం శివ మృత్యుంజయ ప్రభో || 10 ||
నానాహేమవిచిత్రాణి చీరచీనాంబరాణి చ |
వివిధాని చ దివ్యాని మృత్యుంజయ సుధారయ || 11 ||
విశుద్ధముక్తాఫలజాలరంయం
మనోహరం కాంచనహేమసూత్రం |
యజ్ఞోపవీతం పరమం పవిత్ర-
-మాధత్స్వ మృత్యుంజయ భక్తిగంయ || 12 ||
శ్రీగంధం ఘనసారకుంకుమయుతం కస్తూరికాపూరితం
కాలేయేన హిమాంబునా విరచితం మందారసంవాసితం |
దివ్యం దేవమనోహరం మణిమయే పాత్రే సమారోపితం
సర్వాంగేషు విలేపయామి సతతం మృత్యుంజయ శ్రీవిభో || 13 ||
అక్షతైర్ధవలైర్దివ్యైః సంయక్తిలసమన్వితైః |
మృత్యుంజయ మహాదేవ పూజయామి వృషధ్వజ || 14 ||
చంపకపంకజకురవకకుందైః కరవీరమల్లికాకుసుమైః |
విస్తారయ నిజమకుటం మృత్యుంజయ పుండరీకనయనాప్త || 15 ||
మాణిక్యపాదుకాద్వంద్వే మౌనిహృత్పద్మమందిరే |
పాదౌ సత్పద్మసదృశౌ మృత్యుంజయ నివేశయ || 16 ||
మాణిక్యకేయూరకిరీటహారైః
కాంచీమణిస్థాపితకుండలైశ్చ |
మంజీరముఖ్యాభరణైర్మనోజ్ఞై-
-రంగాని మృత్యుంజయ భూషయామి || 17 ||
గజవదనస్కందధృతే-
-నాతిస్వచ్ఛేన చామరయుగేన |
గలదలకాననపద్మం
మృత్యుంజయ భావయామి హృత్పద్మే || 18 ||
ముక్తాతపత్రం శశికోటిశుభ్రం
శుభప్రదం కాంచనదండయుక్తం |
మాణిక్యసంస్థాపితహేమకుంభం
సురేశ మృత్యుంజయ తేఽర్పయామి || 19 ||
మణిముకురే నిష్పటలే
త్రిజగద్గాఢాంధకారసప్తాశ్వే |
కందర్పకోటిసదృశం
మృత్యుంజయ పశ్య వదనమాత్మీయం || 20 ||
కర్పూరచూర్ణం కపిలాజ్యపూతం
దాస్యామి కాలేయసమాన్వితైశ్చ |
సముద్భవం పావనగంధధూపితం
మృత్యుంజయాంగం పరికల్పయామి || 21 ||
వర్తిత్రయోపేతమఖండదీప్త్యా
తమోహరం బాహ్యమథాంతరం చ |
సాజ్యం సమస్తామరవర్గహృద్యం
సురేశ మృత్యుంజయ వంశదీపం || 22 ||
రాజాన్నం మధురాన్వితం చ మృదులం మాణిక్యపాత్రే స్థితం
హింగూజీరకసన్మరీచిమిలితైః శాకైరనేకైః శుభైః |
శాకం సంయగపూపసూపసహితం సద్యోఘృతేనాప్లుతం
శ్రీమృత్యుంజయ పార్వతీప్రియ విభో సాపోశనం భుజ్యతాం || 23 ||
కూశ్మాండవార్తాకపటోలికానాం
ఫలాని రంయాణి చ కారవల్ల్యా |
సుపాకయుక్తాని ససౌరభాణి
శ్రీకంఠ మృత్యుంజయ భక్షయేశ || 24 ||
శీతలం మధురం స్వచ్ఛం పావనం వాసితం లఘు |
మధ్యే స్వీకురు పానీయం శివ మృత్యుంజయ ప్రభో || 25 ||
శర్కరామిలితం స్నిగ్ధం దుగ్ధాన్నం గోఘృతాన్వితం |
కదలీఫలసంమిశ్రం భుజ్యతాం మృత్యుసంహర || 26 ||
కేవలమతిమాధుర్యం
దుగ్ధైః స్నిగ్ధైశ్చ శర్కరామిలితైః |
ఏలామరీచమిలితం
మృత్యుంజయ దేవ భుంక్ష్వ పరమాన్నం || 27 ||
రంభాచూతకపిత్థకంఠకఫలైర్ద్రాక్షారసస్వాదుమ-
-త్ఖర్జూరైర్మధురేక్షుఖండశకలైః సన్నారికేలాంబుభిః |
కర్పూరేణ సువాసితైర్గుడజలైర్మాధుర్యయుక్తైర్విభో
శ్రీమృత్యుంజయ పూరయ త్రిభువనాధారం విశాలోదరం || 28 ||
మనోజ్ఞరంభావనఖండఖండితా-
-న్రుచిప్రదాన్సర్షపజీరకాంశ్చ |
ససౌరభాన్సైంధవసేవితాంశ్చ
గృహాణ మృత్యుంజయ లోకవంద్య || 29 ||
హింగూజీరకసహితం
విమలామలకం కపిత్థమతిమధురం |
బిసఖండాఁల్లవణయుతా-
-న్మృత్యుంజయ తేఽర్పయామి జగదీశ || 30 ||
ఏలాశుంఠీసహీతం
దధ్యన్నం చారుహేమపాత్రస్థం |
అమృతప్రతినిధిమాఢ్యం
మృత్యుంజయ భుజ్యతాం త్రిలోకేశ || 31 ||
జంబీరనీరాంచితశృంగబేరం
మనోహరానంలశలాటుఖండాన్ |
మృదూపదంశాన్సహసోపభుంక్ష్వ
మృత్యుంజయ శ్రీకరుణాసముద్ర || 32 ||
నాగరరామఠయుక్తం
సులలితజంబీరనీరసంపూర్ణం |
మథితం సైంధవసహితం
పిబ హర మృత్యుంజయ క్రతుధ్వంసిన్ || 33 ||
మందారహేమాంబుజగంధయుక్తై-
-ర్మందాకినీనిర్మలపుణ్యతోయైః |
గృహాణ మృత్యుంజయ పూర్ణకామ
శ్రీమత్పరాపోశనమభ్రకేశ || 34 ||
గగనధునీవిమలజలై-
-ర్మృత్యుంజయ పద్మరాగపాత్రగతైః |
మృగమదచందనపూర్ణం
ప్రక్షాలయ చారు హస్తపదయుగ్మం || 35 ||
పుంనాగమల్లికాకుందవాసితైర్జాహ్నవీజలైః |
మృత్యుంజయ మహాదేవ పునరాచమనం కురు || 36 ||
మౌక్తికచూర్ణసమేతై-
-ర్మృగమదఘనసారవాసితైః పూగైః |
పర్ణైః స్వర్ణసమానై-
-ర్మృత్యుంజయ తేఽర్పయామి తాంబూలం || 37 ||
నీరాజనం నిర్మలదీప్తిమద్భి-
-ర్దీపాంకురైరుజ్జ్వలముచ్ఛ్రితైశ్చ |
ఘంటానినాదేన సమర్పయామి
మృత్యుంజయాయ త్రిపురాంతకాయ || 38 ||
విరించిముఖ్యామరబృందవందితే
సరోజమత్స్యాంకితచక్రచిహ్నితే |
దదామి మృత్యుంజయ పాదపంకజే
ఫణీంద్రభూషే పునరర్ఘ్యమీశ్వర || 39 ||
పుంనాగనీలోత్పలకుందజాజీ-
-మందారమల్లీకరవీరపంకజైః |
పుష్పాంజలిం బిల్వదలైస్తులస్యా
మృత్యుంజయాంఘ్రౌ వినివేశయామి || 40 ||
పదే పదే సర్వతమోనికృంతనం
పదే పదే సర్వశుభప్రదాయకం |
ప్రదక్షిణం భక్తియుతేన చేతసా
కరోమి మృత్యుంజయ రక్ష రక్ష మాం || 41 ||
నమో గౌరీశాయ స్ఫటికధవళాంగాయ చ నమో
నమో లోకేశాయ స్తుతవిబుధలోకాయ చ నమః |
నమః శ్రీకంఠాయ క్షపితపురదైత్యాయ చ నమో
నమః ఫాలాక్షాయ స్మరమదవినాశాయ చ నమః || 42 ||
సంసారే జనితాపరోగసహితే తాపత్రయాక్రందితే
నిత్యం పుత్రకలత్రవిత్తవిలసత్పాశైర్నిబద్ధం దృఢం |
గర్వాంధం బహుపాపవర్గసహితం కారుణ్యదృష్ట్యా విభో
శ్రీమృత్యుంజయ పార్వతీప్రియ సదా మాం పాహి సర్వేశ్వర || 43 ||
సౌధే రత్నమయే నవోత్పలదలాకీర్ణే చ తల్పాంతరే
కౌశేయేన మనోహరేణ ధవలేనాచ్ఛాదితే సర్వశః |
కర్పూరాంచితదీపదీప్తిమిలితే రంయోపధానద్వయే
పార్వత్యాః కరపద్మలాలితపదం మృత్యుంజయం భావయే || 44 ||
చతుశ్చత్వారింశద్విలసదుపచారైరభిమతై-
-ర్మనః పద్మే భక్త్యా బహిరపి చ పూజాం శుభకరీం |
కరోతి ప్రత్యూషే నిశి దివసమధ్యేఽపి చ పుమా-
-న్ప్రయాతి శ్రీమృత్యుంజయపదమనేకాద్భుతపదం || 45 ||
ప్రాతర్లింగముమాపతేరహరహః సందర్శనాత్స్వర్గదం
మధ్యాహ్నే హయమేధతుల్యఫలదం సాయంతనే మోక్షదం |
భానోరస్తమయే ప్రదోషసమయే పంచాక్షరారాధనం
తత్కాలత్రయతుల్యమిష్టఫలదం సద్యోఽనవద్యం దృఢం || 46 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ శ్రీమృత్యుంజయ మానసికపూజా స్తోత్రం సంపూర్ణం ||

శ్రీ రుద్ర కవచం

ఓం అస్య శ్రీ రుద్ర కవచస్తోత్ర మహామంత్రస్య దూర్వాసఋషిః అనుష్ఠుప్ ఛందః త్ర్యంబక రుద్రో దేవతా హ్రాం బీజం శ్రీం శక్తిః హ్రీం కీలకం మమ మనసోఽభీష్టసిద్ధ్యర్థే జపే వినియోగః |
హ్రామిత్యాది షడ్బీజైః షడంగన్యాసః ||
ధ్యానం |
శాంతం పద్మాసనస్థం శశిధరమకుటం పంచవక్త్రం త్రినేత్రం
శూలం వజ్రం చ ఖడ్గం పరశుమభయదం దక్షభాగే వహంతం |
నాగం పాశం చ ఘంటాం ప్రళయ హుతవహం సాంకుశం వామభాగే
నానాలంకారయుక్తం స్ఫటికమణినిభం పార్వతీశం నమామి ||
దూర్వాస ఉవాచ |
ప్రణంయ శిరసా దేవం స్వయంభుం పరమేశ్వరం |
ఏకం సర్వగతం దేవం సర్వదేవమయం విభుం || 1 ||
రుద్ర వర్మ ప్రవక్ష్యామి అంగ ప్రాణస్య రక్షయే |
అహోరాత్రమయం దేవం రక్షార్థం నిర్మితం పురా || 2 ||
రుద్రో మే చాగ్రతః పాతు పాతు పార్శ్వౌ హరస్తథా |
శిరో మే ఈశ్వరః పాతు లలాటం నీలలోహితః || 3 ||
నేత్రయోస్త్ర్యంబకః పాతు ముఖం పాతు మహేశ్వరః |
కర్ణయోః పాతు మే శంభుః నాసికాయాం సదాశివః || 4 ||
వాగీశః పాతు మే జిహ్వాం ఓష్ఠౌ పాత్వంబికాపతిః |
శ్రీకంఠః పాతు మే గ్రీవాం బాహూంశ్చైవ పినాకధృత్ || 5 ||
హృదయం మే మహాదేవః ఈశ్వరోవ్యాత్ స్తనాంతరం |
నాభిం కటిం చ వక్షశ్చ పాతు సర్వం ఉమాపతిః || 6 ||
బాహుమధ్యాంతరం చైవ సూక్ష్మరూపః సదాశివః |
స్వరం రక్షతు సర్వేశో గాత్రాణి చ యథా క్రమం || 7 ||
వజ్రశక్తిధరం చైవ పాశాంకుశధరం తథా |
గండశూలధరం నిత్యం రక్షతు త్రిదశేశ్వరః || 8 ||
ప్రస్థానేషు పదే చైవ వృక్షమూలే నదీతటే |
సంధ్యాయాం రాజభవనే విరూపాక్షస్తు పాతు మాం || 9 ||
శీతోష్ణాదథ కాలేషు తుహి న ద్రుమకంటకే |
నిర్మనుష్యేఽసమే మార్గే త్రాహి మాం వృషభధ్వజ || 10 ||
ఇత్యేతద్రుద్రకవచం పవిత్రం పాపనాశనం |
మహాదేవప్రసాదేన దూర్వాసో మునికల్పితం || 11 ||
మమాఖ్యాతం సమాసేన న భయం విందతి క్వచిత్ |
ప్రాప్నోతి పరమారోగ్యం పుణ్యమాయుష్యవర్ధనం || 12 ||
విద్యార్థీ లభతే విద్యాం ధనార్థీ లభతే ధనం |
కన్యార్థీ లభతే కన్యాం న భయం విందతే క్వచిత్ || 13 ||
అపుత్రో లభతే పుత్రం మోక్షార్థీ మోక్షమాప్నుయాత్ |
త్రాహి త్రాహి మహాదేవ త్రాహి త్రాహి త్రయీమయ || 14 ||
త్రాహి మాం పార్వతీనాథ త్రాహి మాం త్రిపురంతక |
పాశం ఖట్వాంగ దివ్యాస్త్రం త్రిశూలం రుద్రమేవ చ || 15 ||
నమస్కరోమి దేవేశ త్రాహి మాం జగదీశ్వర |
శత్రుమధ్యే సభామధ్యే గ్రామమధ్యే గృహాంతరే || 16 ||
గమనాగమనే చైవ త్రాహి మాం భక్తవత్సల |
త్వం చిత్తం త్వం మానసం చ త్వం బుద్ధిస్త్వం పరాయణం || 17 ||
కర్మణా మనసా చైవ త్వం బుద్ధిశ్చ యథా సదా |
జ్వరభయం ఛింది సర్వజ్వరభయం ఛింది గ్రహభయం ఛింది || 18 ||
సర్వశత్రూన్నివర్త్యాపి సర్వవ్యాధినివారణం |
రుద్రలోకం స గచ్ఛతి రుద్రలోకం సగచ్ఛత్యోన్నమ ఇతి || 19 ||
ఇతి స్కందపురాణే దూర్వాస ప్రోక్తం శ్రీ రుద్రకవచం ||

శ్రీ రుద్ర స్తుతిః

నమో దేవాయ మహతే దేవదేవాయ శూలినే |
త్ర్యంబకాయ త్రినేత్రాయ యోగినాం పతయే నమః || 1 ||
నమోఽస్తు దేవదేవాయ మహాదేవాయ వేధసే |
శంభవే స్థాణవే నిత్యం శివాయ పరమాత్మనే || 2 ||
నమః సోమాయ రుద్రాయ మహాగ్రాసాయ హేతవే |
ప్రపద్యేహం విరూపాక్షం శరణ్యం బ్రహ్మచారిణం || 3 ||
మహాదేవం మహాయోగమీశానం త్వంబికాపతిం |
యోగినాం యోగదాకారం యోగమాయాసమాహృతం || 4 ||
యోగినాం గురుమాచార్యం యోగగంయం సనాతనం |
సంసారతారణం రుద్రం బ్రహ్మాణం బ్రహ్మణోఽధిపం || 5 ||
శాశ్వతం సర్వగం శాంతం బ్రహ్మాణం బ్రాహ్మణప్రియం |
కపర్దినం కళామూర్తిమమూర్తిమమరేశ్వరం || 6 ||
ఏకమూర్తిం మహామూర్తిం వేదవేద్యం సతాం గతిం |
నీలకంఠం విశ్వమూర్తిం వ్యాపినం విశ్వరేతసం || 7 ||
కాలాగ్నిం కాలదహనం కామినం కామనాశనం |
నమామి గిరిశం దేవం చంద్రావయవభూషణం || 8 ||
త్రిలోచనం లేలిహానమాదిత్యం పరమేష్ఠినం |
ఉగ్రం పశుపతిం భీమం భాస్కరం తమసః పరం || 9 ||
ఇతి శ్రీకూర్మపురాణే వ్యాసోక్త రుద్రస్తుతిః ||

రుద్రాష్టకం

నమామీశమీశాన నిర్వాణరూపం
విభుం వ్యాపకం బ్రహ్మవేదస్వరూపం |
నిజం నిర్గుణం నిర్వికల్పం నిరీహం
చిదాకాశమాకాశవాసం భజేఽహం || 1 ||
నిరాకారమోంకారమూలం తురీయం
గిరాజ్ఞానగోతీతమీశం గిరీశం |
కరాలం మహాకాలకాలం కృపాలుం
గుణాగారసంసారపారం నతోఽహం || 2 ||
తుషారాద్రిసంకాశగౌరం గభీరం
మనోభూతకోటిప్రభాసీ శరీరం |
స్ఫురన్మౌలికల్లోలినీ చారుగంగా
లసద్భాలబాలేందు కంఠే భుజంగం || 3 ||
చలత్కుండలం శుభ్రనేత్రం విశాలం
ప్రసన్నాననం నీలకంఠం దయాలుం |
మృగాధీశచర్మాంబరం ముండమాలం
ప్రియం శంకరం సర్వనాథం భజామి || 4 ||
ప్రచండం ప్రకృష్టం ప్రగల్భం పరేశం
అఖండం భజే భానుకోటిప్రకాశం |
త్రయీశూలనిర్మూలనం శూలపాణిం
భజేఽహం భవానీపతిం భావగంయం || 5 ||
కలాతీతకల్యాణకల్పాంతకారీ
సదాసజ్జనానందదాతా పురారీ |
చిదానందసందోహమోహాపహారీ
ప్రసీద ప్రసీద ప్రభో మన్మథారీ || 6 ||
న యావదుమానాథపాదారవిందం
భజంతీహ లోకే పరే వా నరాణాం |
న తావత్సుఖం శాంతి సంతాపనాశం
ప్రసీద ప్రభో సర్వభూతాధివాసం || 7 ||
న జానామి యోగం జపం నైవ పూజాం
నతోఽహం సదా సర్వదా దేవ తుభ్యం |
జరాజన్మదుఃఖౌఘతాతప్యమానం
ప్రభో పాహి శాపాన్నమామీశ శంభో || 8 ||
రుద్రాష్టకమిదం ప్రోక్తం విప్రేణ హరతుష్టయే |
యే పఠంతి నరా భక్త్యా తేషాం శంభుః ప్రసీదతి || 9 ||
ఇతి శ్రీగోస్వామి తులసీదాస కృతం శ్రీరుద్రాష్టకం |

శ్రీ వైద్యనాథాష్టకం

శ్రీరామసౌమిత్రిజటాయువేద
షడాననాదిత్య కుజార్చితాయ |
శ్రీనీలకంఠాయ దయామయాయ
శ్రీవైద్యనాథాయ నమః శివాయ || 1 ||
గంగాప్రవాహేందు జటాధరాయ
త్రిలోచనాయ స్మర కాలహంత్రే |
సమస్త దేవైరభిపూజితాయ
శ్రీవైద్యనాథాయ నమః శివాయ || 2 ||
భక్తప్రియాయ త్రిపురాంతకాయ
పినాకినే దుష్టహరాయ నిత్యం |
ప్రత్యక్షలీలాయ మనుష్యలోకే
శ్రీవైద్యనాథాయ నమః శివాయ || 3 ||
ప్రభూతవాతాది సమస్తరోగ-
-ప్రణాశకర్త్రే మునివందితాయ |
ప్రభాకరేంద్వగ్నివిలోచనాయ
శ్రీవైద్యనాథాయ నమః శివాయ || 4 ||
వాక్శ్రోత్రనేత్రాంఘ్రి విహీనజంతోః
వాక్శ్రోత్రనేత్రాంఘ్రి సుఖప్రదాయ |
కుష్ఠాదిసర్వోన్నతరోగహంత్రే
శ్రీవైద్యనాథాయ నమః శివాయ || 5 ||
వేదాంతవేద్యాయ జగన్మయాయ
యోగీశ్వరధ్యేయపదాంబుజాయ |
త్రిమూర్తిరూపాయ సహస్రనాంనే
శ్రీవైద్యనాథాయ నమః శివాయ || 6 ||
స్వతీర్థమృద్భస్మభృతాంగభాజాం
పిశాచదుఃఖార్తిభయాపహాయ |
ఆత్మస్వరూపాయ శరీరభాజాం
శ్రీవైద్యనాథాయ నమః శివాయ || 7 ||
శ్రీనీలకంఠాయ వృషధ్వజాయ
స్రక్గంధభస్మాద్యభిశోభితాయ |
సుపుత్రదారాది సుభాగ్యదాయ
శ్రీవైద్యనాథాయ నమః శివాయ || 8 ||
బాలాంబికేశ వైద్యేశ భవరోగహరేతి చ |
జపేన్నామత్రయం నిత్యం మహారోగనివారణం || 9 ||

శ్రీ శంకరాష్టకం 2

హే వామదేవ శివశంకర దీనబంధో
కాశీపతే పశుపతే పశుపాశనాశిన్ |
హే విశ్వనాథ భవబీజ జనార్తిహారిన్
సంసారదుఃఖగహనాజ్జగదీశ రక్ష || 1 ||
హే భక్తవత్సల సదాశివ హే మహేశ
హే విశ్వతాత జగదాశ్రయ హే పురారే |
గౌరీపతే మమ పతే మమ ప్రాణనాథ
సంసారదుఃఖగహనాజ్జగదీశ రక్ష || 2 ||
హే దుఃఖభంజక విభో గిరిజేశ శూలిన్
హే వేదశాస్త్రవినివేద్య జనైకబంధో |
హే వ్యోమకేశ భువనేశ జగద్విశిష్ట
సంసారదుఃఖగహనాజ్జగదీశ రక్ష || 3 ||
హే ధూర్జటే గిరిశ హే గిరిజార్ధదేహ
హే సర్వభూతజనక ప్రమథేశ దేవ |
హే సర్వదేవపరిపూజితపాదపద్మ
సంసారదుఃఖగహనాజ్జగదీశ రక్ష || 4 ||
హే దేవదేవ వృషభధ్వజ నందికేశ
కాలీపతే గణపతే గజచర్మవాసః |
హే పార్వతీశ పరమేశ్వర రక్ష శంభో
సంసారదుఃఖగహనాజ్జగదీశ రక్ష || 5 ||
హే వీరభద్ర భవవైద్య పినాకపాణే
హే నీలకంఠ మదనాంత శివాకలత్ర |
వారాణసీపురపతే భవభీతిహారిన్
సంసారదుఃఖగహనాజ్జగదీశ రక్ష || 6 ||
హే కాలకాల మృడ శర్వ సదాసహాయ
హే భూతనాథ భవబాధక హే త్రినేత్ర |
హే యజ్ఞశాసక యమాంతక యోగివంద్య
సంసారదుఃఖగహనాజ్జగదీశ రక్ష || 7 ||
హే వేదవేద్య శశిశేఖర హే దయాళో
హే సర్వభూతప్రతిపాలక శూలపాణే |
హే చంద్రసూర్యశిఖినేత్ర చిదేకరూప
సంసారదుఃఖగహనాజ్జగదీశ రక్ష || 8 ||
శ్రీశంకరాష్టకమిదం యోగానందేన నిర్మితం |
సాయం ప్రాతః పఠేన్నిత్యం సర్వపాపవినాశకం || 9 ||
ఇతి శ్రీయోగానందతీర్థవిరచితం శంకరాష్టకం ||

శ్రీ శంకరాష్టకం

శీర్షజటాగణభారం గరలాహారం సమస్తసంహారం |
కైలాసాద్రివిహారం పారం భవవారిధేరహం వన్దే || 1 ||
చన్ద్రకలోజ్జ్వలఫాలం కణ్ఠవ్యాలం జగత్త్రయీపాలం |
కృతనరమస్తకమాలం కాలం కాలస్య కోమలం వన్దే || 2 ||
కోపేక్షణహతకామం స్వాత్మారామం నగేన్ద్రజావామం |
సంసృతిశోకవిరామం శ్యామం కణ్ఠేన కారణం వన్దే || 3 ||
కటితటవిలసితనాగం ఖణ్డితయాగం మహాద్భుతత్యాగం |
విగతవిషయరసరాగం భాగం యజ్ఞేషు బిభ్రతం వన్దే || 4 ||
త్రిపురాదికదనుజాన్తం గిరిజాకాన్తం సదైవ సంశాన్తం |
లీలావిజితకృతాన్తం భాన్తం స్వాంతేషు దేవానాం వన్దే || 5 ||
సురసరిదాప్లుతకేశం త్రిదశకులేశం హృదాలయావేశం |
విగతాశేషక్లేశం దేశం సర్వేష్టసంపదాం వన్దే || 6 ||
కరతలకలితపినాకం విగతజలాకం సుకర్మణాం పాకం |
పరపదవీతవరాకం నాకఙ్గమపూగవన్దితం వన్దే || 7 ||
భూతవిభూషితకాయం దుస్తరమాయం వివర్జితాపాయం |
ప్రమథసమూహసహాయం సాయం ప్రాతర్నిరన్తరం వన్దే || 8 ||
యస్తు పదాష్టకమేతద్బ్రహ్మానన్దేన నిర్మితం నిత్యం |
పఠతి సమాహితచేతాః ప్రాప్నోత్యన్తే స శైవమేవ పదం || 9 ||
ఇతి శ్రీమత్పరమహంస స్వామిబ్రహ్మానన్దవిరచితం శ్రీశంకరాష్టకం |

శ్రీ శంభుదేవ ప్రార్థన

బ్రహ్మాండ పురాణంలో చెప్పబడిన శంభుదేవ ప్రార్థన శివుని స్తుతిస్తూ ఉంటుంది.

జయ ఫాలనయన శ్రితలోలనయన సితశైలనయన శర్వా |
జయ కాలకాల జయ మృత్యుమృత్యు జయ దేవదేవ శంభో || 1 ||

జయ చంద్రమౌళి నమదింద్రమౌళి మణిసాంద్రహేళి చరణా |
జయ యోగమార్గ జితరాగదుర్గ మునియాగభాగ భర్గా || 2 ||

జయ స్వర్గవాసి మతివర్గభాసి ప్రతిసర్గసర్గ కల్పా |
జయ బంధుజీవ సుమబంధుజీవ సమసాంధ్య రాగ జూటా || 3 ||

జయ చండచండతర తాండవోగ్రభర కంపమాన భువనా |
జయ హార హీర ఘనసార సారతర శారదాభ్రరూపా || 4 ||

జయ శృంగి శృంగి శ్రుతి భృంగి భృంగి భృతి నంది నంది వినుతీ |
జయ కాలకంఠ కలకంఠకంఠ సురసుందరీస్తుత శ్రీ || 5 ||

జయ భావజాత సమభావజాత సుకళాజిత ప్రియాహ్రీ |
జయ దగ్ధభావ భవ స్నిగ్ధభావ భవ ముగ్ధభావ భవనా || 6 ||

జయ రుండమాలి జయ రూక్షవీక్ష రుచిరుంద్రరూప రుద్రా |
జయ నాసికాగ్ర నయనోగ్ర దృష్టి జనితాగ్ని భుగ్న విభవా || 7 ||

జయ ఘోర ఘోరతరతాపజాప తప ఉగ్రరూప విజితా |
జయ కాంతిమాలి జయ క్రాంతికేలి జయ శాంతిశాలి శూలీ || 8 ||

జయ సూర్యచంద్రశిఖి సూచనాగ్ర నయలోచనాగ్ర ఉగ్రా |
జయ బ్రహ్మ విష్ణు పురుహూత ముఖ్య సురసన్నుతాంఘ్రి యుగ్మా || 9 ||

జయ ఫాలనేత్ర జయ చంద్రశీర్ష జయ నాగభూష శూలీ |
జయ కాలకాల జయ మృత్యుమృత్యు జయ దేవదేవ శంభో || 10 ||

సువర్ణమాలా స్తుతిః

అథ కథమపి మద్రాసనాం త్వద్గుణలేశైర్విశోధయామి విభో |
సాంబ సదాశివ శంభో శంకర శరణం మే తవ చరణయుగం || 1 ||
ఆఖండలమదఖండనపండిత తండుప్రియ చండీశ విభో |
సాంబ సదాశివ శంభో శంకర శరణం మే తవ చరణయుగం || 2 ||
ఇభచర్మాంబర శంబరరిపువపురపహరణోజ్జ్వలనయన విభో |
సాంబ సదాశివ శంభో శంకర శరణం మే తవ చరణయుగం || 3 ||
ఈశ గిరీశ నరేశ పరేశ మహేశ బిలేశయభూషణ భో |
సాంబ సదాశివ శంభో శంకర శరణం మే తవ చరణయుగం || 4 ||
ఉమయా దివ్యసుమంగళవిగ్రహయాలింగితవామాంగ విభో |
సాంబ సదాశివ శంభో శంకర శరణం మే తవ చరణయుగం || 5 ||
ఊరీకురు మామజ్ఞమనాథం దూరీకురు మే దురితం భో |
సాంబ సదాశివ శంభో శంకర శరణం మే తవ చరణయుగం || 6 ||
ఋషివరమానసహంస చరాచరజననస్థితిలయకారణ భో |
సాంబ సదాశివ శంభో శంకర శరణం మే తవ చరణయుగం || 7 ||
ౠక్షాధీశకిరీట మహోక్షారూఢ విధృతరుద్రాక్ష విభో |
సాంబ సదాశివ శంభో శంకర శరణం మే తవ చరణయుగం || 8 ||
లువర్ణద్వంద్వమవృంతసుకుసుమమివాంఘ్రౌ తవార్పయామి విభో |
సాంబ సదాశివ శంభో శంకర శరణం మే తవ చరణయుగం || 9 ||
ఏకం సదితి శ్రుత్యా త్వమేవ సదసీత్యుపాస్మహే మృడ భో |
సాంబ సదాశివ శంభో శంకర శరణం మే తవ చరణయుగం || 10 ||
ఐక్యం నిజభక్తేభ్యో వితరసి విశ్వంభరోఽత్ర సాక్షీ భో |
సాంబ సదాశివ శంభో శంకర శరణం మే తవ చరణయుగం || 11 ||
ఓమితి తవ నిర్దేష్ట్రీ మాయాస్మాకం మృడోపకర్త్రీ భో |
సాంబ సదాశివ శంభో శంకర శరణం మే తవ చరణయుగం || 12 ||
ఔదాస్యం స్ఫుటయతి విషయేషు దిగంబరతా చ తవైవ విభో |
సాంబ సదాశివ శంభో శంకర శరణం మే తవ చరణయుగం || 13 ||
అంతఃకరణవిశుద్ధిం భక్తిం చ త్వయి సతీం ప్రదేహి విభో |
సాంబ సదాశివ శంభో శంకర శరణం మే తవ చరణయుగం || 14 ||
అస్తోపాధిసమస్తవ్యస్తై రూపైర్జగన్మయోఽసి విభో |
సాంబ సదాశివ శంభో శంకర శరణం మే తవ చరణయుగం || 15 ||
కరుణావరుణాలయ మయి దాస ఉదాసస్తవోచితో న హి భో |
సాంబ సదాశివ శంభో శంకర శరణం మే తవ చరణయుగం || 16 ||
ఖలసహవాసం విఘటయ ఘటయ సతామేవ సంగమనిశం భో |
సాంబ సదాశివ శంభో శంకర శరణం మే తవ చరణయుగం || 17 ||
గరళం జగదుపకృతయే గిలితం భవతా సమోఽస్తి కోఽత్ర విభో |
సాంబ సదాశివ శంభో శంకర శరణం మే తవ చరణయుగం || 18 ||
ఘనసారగౌరగాత్ర ప్రచురజటాజూటబద్ధగంగ విభో |
సాంబ సదాశివ శంభో శంకర శరణం మే తవ చరణయుగం || 19 ||
జ్ఞప్తిః సర్వశరీరేష్వఖండితా యా విభాతి సా త్వం భో |
సాంబ సదాశివ శంభో శంకర శరణం మే తవ చరణయుగం || 20 ||
చపలం మమ హృదయకపిం విషయద్రుచరం దృఢం బధాన విభో |
సాంబ సదాశివ శంభో శంకర శరణం మే తవ చరణయుగం || 21 ||
ఛాయా స్థాణోరపి తవ తాపం నమతాం హరత్యహో శివ భో |
సాంబ సదాశివ శంభో శంకర శరణం మే తవ చరణయుగం || 22 ||
జయ కైలాసనివాస ప్రమథగణాధీశ భూసురార్చిత భో |
సాంబ సదాశివ శంభో శంకర శరణం మే తవ చరణయుగం || 23 ||
ఝణుతకఝంకిణుఝణుతత్కిటతక-శబ్దైర్నటసి మహానట భో |
సాంబ సదాశివ శంభో శంకర శరణం మే తవ చరణయుగం || 24 ||
జ్ఞానం విక్షేపావృతిరహితం కురు మే గురుస్త్వమేవ విభో |
సాంబ సదాశివ శంభో శంకర శరణం మే తవ చరణయుగం || 25 ||
టంకారస్తవ ధనుషో దలయతి హృదయం ద్విషామశనిరివ భో |
సాంబ సదాశివ శంభో శంకర శరణం మే తవ చరణయుగం || 26 ||
ఠాకృతిరివ తవ మాయా బహిరంతః శూన్యరూపిణీ ఖలు భో |
సాంబ సదాశివ శంభో శంకర శరణం మే తవ చరణయుగం || 27 ||
డంబరమంబురుహామపి దలయత్యనఘం త్వదంఘ్రియుగళం భో |
సాంబ సదాశివ శంభో శంకర శరణం మే తవ చరణయుగం || 28 ||
ఢక్కాక్షసూత్రశూలద్రుహిణకరోటీసముల్లసత్కర భో |
సాంబ సదాశివ శంభో శంకర శరణం మే తవ చరణయుగం || 29 ||
ణాకారగర్భిణీ చేచ్ఛుభదా తే శరగతిర్నృణామిహ భో |
సాంబ సదాశివ శంభో శంకర శరణం మే తవ చరణయుగం || 30 ||
తవ మన్వతిసంజపతః సద్యస్తరతి నరో హి భవాబ్ధిం భో |
సాంబ సదాశివ శంభో శంకర శరణం మే తవ చరణయుగం || 31 ||
థూత్కారస్తస్య ముఖే భూయాత్తే నామ నాస్తి యస్య విభో |
సాంబ సదాశివ శంభో శంకర శరణం మే తవ చరణయుగం || 32 ||
దయనీయశ్చ దయాళుః కోఽస్తి మదన్యస్త్వదన్య ఇహ వద భో |
సాంబ సదాశివ శంభో శంకర శరణం మే తవ చరణయుగం || 33 ||
ధర్మస్థాపనదక్ష త్ర్యక్ష గురో దక్షయజ్ఞశిక్షక భో |
సాంబ సదాశివ శంభో శంకర శరణం మే తవ చరణయుగం || 34 ||
నను తాడితోఽసి ధనుషా లుబ్ధధియా త్వం పురా నరేణ విభో |
సాంబ సదాశివ శంభో శంకర శరణం మే తవ చరణయుగం || 35 ||
పరిమాతుం తవ మూర్తిం నాలమజస్తత్పరాత్పరోఽసి విభో |
సాంబ సదాశివ శంభో శంకర శరణం మే తవ చరణయుగం || 36 ||
ఫలమిహ నృతయా జనుషస్త్వత్పదసేవా సనాతనేశ విభో |
సాంబ సదాశివ శంభో శంకర శరణం మే తవ చరణయుగం || 37 ||
బలమారోగ్యం చాయుస్త్వద్గుణరుచితాం చిరం ప్రదేహి విభో |
సాంబ సదాశివ శంభో శంకర శరణం మే తవ చరణయుగం || 38 ||
భగవన్భర్గ భయాపహ భూతపతే భూతిభూషితాంగ విభో |
సాంబ సదాశివ శంభో శంకర శరణం మే తవ చరణయుగం || 39 ||
మహిమా తవ న హి మాతి శ్రుతిషు హిమానీధరాత్మజాధవ భో |
సాంబ సదాశివ శంభో శంకర శరణం మే తవ చరణయుగం || 40 ||
యమనియమాదిభిరంగైర్యమినో హృదయే భజంతి స త్వం భో |
సాంబ సదాశివ శంభో శంకర శరణం మే తవ చరణయుగం || 41 ||
రజ్జావహిరివ శుక్తౌ రజతమివ త్వయి జగంతి భాంతి విభో |
సాంబ సదాశివ శంభో శంకర శరణం మే తవ చరణయుగం || 42 ||
లబ్ధ్వా భవత్ప్రసాదాచ్చక్రం విధురవతి లోకమఖిలం భో |
సాంబ సదాశివ శంభో శంకర శరణం మే తవ చరణయుగం || 43 ||
వసుధాతద్ధరతచ్ఛయరథమౌర్వీశర పరాకృతాసుర భో |
సాంబ సదాశివ శంభో శంకర శరణం మే తవ చరణయుగం || 44 ||
శర్వ దేవ సర్వోత్తమ సర్వద దుర్వృత్తగర్వహరణ విభో |
సాంబ సదాశివ శంభో శంకర శరణం మే తవ చరణయుగం || 45 ||
షడ్రిపుషడూర్మిషడ్వికారహర సన్ముఖ షణ్ముఖజనక విభో |
సాంబ సదాశివ శంభో శంకర శరణం మే తవ చరణయుగం || 46 ||
సత్యం జ్ఞానమనంతం బ్రహ్మేత్యేతల్లక్షణలక్షిత భో |
సాంబ సదాశివ శంభో శంకర శరణం మే తవ చరణయుగం || 47 ||
హాహాహూహూముఖసురగాయకగీతాపదానపద్య విభో |
సాంబ సదాశివ శంభో శంకర శరణం మే తవ చరణయుగం || 48 ||
ళాదిర్న హి ప్రయోగస్తదంతమిహ మంగళం సదాస్తు విభో |
సాంబ సదాశివ శంభో శంకర శరణం మే తవ చరణయుగం || 49 ||
క్షణమివ దివసాన్నేష్యతి త్వత్పదసేవాక్షణోత్సుకః శివ భో |
సాంబ సదాశివ శంభో శంకర శరణం మే తవ చరణయుగం || 50 ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ సువర్ణమాలా స్తుతిః సంపూర్ణా ||

 శ్రీ సోమసుందరాష్టకం

ఇంద్ర ఉవాచ |
ఏకం బ్రహ్మాద్వితీయం చ పరిపూర్ణం పరాపరం |
ఇతి యో గీయతే వేదైస్తం వందే సోమసుందరం || 1 ||
జ్ఞాతృజ్ఞానజ్ఞేయరూపం విశ్వవ్యాప్యం వ్యవస్థితం |
యం సర్వైరప్యదృశ్యోయస్తం వందే సోమసుందరం || 2 ||
అశ్వమేధాదియజ్ఞైశ్చ యః సమారాధ్యతే ద్విజైః |
దదాతి చ ఫలం తేషాం తం వందే సోమసుందరం || 3 ||
యం విదిత్వా బుధాః సర్వే కర్మబంధవివర్జితాః |
లభంతే పరమాం ముక్తిం తం వందే సోమసుందరం || 4 ||
దేవదేవం యమారాధ్య మృకండుతనయో మునిః |
నిత్యత్వమగమత్సద్యస్తం వందే సోమసుందరం || 5 ||
నిజనేత్రాంబుజకృతం పూజయా పరితోష్యయం |
శ్రీపతిర్లభతే చక్రం తం వందే సోమసుందరం || 6 ||
యేన సర్వం జగత్సృష్టం రక్షితం సంహృతం క్రమాత్ |
నత్వం విజ్ఞానమానందం తం వందే సోమసుందరం || 7 ||
యస్మాత్పరం చాపరం చ కించిద్వస్తు న విద్యతే |
ఈశ్వరం సర్వభూతానాం తం వందే సోమసుందరం || 8 ||
యస్మై వేదాశ్చ చత్వారో నమస్యంత వపుర్ధరాః |
ఈశానం సర్వవిద్యానాం తం వందే సోమసుందరం || 9 ||
యస్య ప్రణామమాత్రేణ సంతి సర్వాశ్చ సంపదః |
సర్వసిద్ధిప్రదం శంభుం తం వందే సోమసుందరం || 10 ||
యస్య దర్శనమాత్రేణ బ్రహ్మహత్యాది పాతకం |
అవశ్యం నశ్యతి క్షిప్రం తం వందే సోమసుందరం || 11 ||
ఉత్తమాంగం చ చరణం బ్రహ్మణా విష్ణునాపి చ |
న దృశ్యతే యస్య యత్నస్తం వందే సోమసుందరం || 12 ||
ఇతి శ్రీహాలాస్యమాహాత్ంయే ఇంద్రకృతం శ్రీసోమసుందరాష్టకం |