Sacred Stotras & Deities

శ్రీ రామ భుజంగప్రయాత స్తోత్రం

విశుద్ధం పరం సచ్చిదానందరూపం
గుణాధారమాధారహీనం వరేణ్యం |
మహాన్తం విభాన్తం గుహాన్తం గుణాన్తం
సుఖాన్తం స్వయం ధామ రామం ప్రపద్యే || 1 ||
శివం నిత్యమేకం విభుం తారకాఖ్యం
సుఖాకారమాకారశూన్యం సుమాన్యం |
మహేశం కలేశం సురేశం పరేశం
నరేశం నిరీశం మహీశం ప్రపద్యే || 2 ||
యదావర్ణయత్కర్ణమూలేఽన్తకాలే
శివో రామ రామేతి రామేతి కాశ్యాం |
తదేకం పరం తారకబ్రహ్మరూపం
భజేఽహం భజేఽహం భజేఽహం భజేఽహం || 3 ||
మహారత్నపీఠే శుభే కల్పమూలే
సుఖాసీనమాదిత్యకోటిప్రకాశం |
సదా జానకీలక్ష్మణోపేతమేకం
సదా రామచంద్రం భజేఽహం భజేఽహం || 4 ||
క్వణద్రత్నమంజీరపాదారవిందం
లసన్మేఖలాచారుపీతాంబరాఢ్యం |
మహారత్నహారోల్లసత్కౌస్తుభాంగం
నదచ్చంచరీమంజరీలోలమాలం || 5 ||
లసచ్చంద్రికాస్మేరశోణాధరాభం
సముద్యత్పతంగేందుకోటిప్రకాశం |
నమద్బ్రహ్మరుద్రాదికోటీరరత్న
స్ఫురత్కాన్తినీరాజనారాధితాంఘ్రిం || 6 ||
పురః ప్రాంజలీనాంజనేయాదిభక్తాన్
స్వచిన్ముద్రయా భద్రయా బోధయన్తం |
భజేఽహం భజేఽహం సదా రామచంద్రం
త్వదన్యం న మన్యే న మన్యే న మన్యే || 7 ||
యదా మత్సమీపం కృతాన్తః సమేత్య
ప్రచండప్రకోపైర్భటైర్భీషయేన్మాం |
తదావిష్కరోషి త్వదీయం స్వరూపం
సదాపత్ప్రణాశం సకోదండబాణం || 8 ||
నిజే మానసే మందిరే సన్నిధేహి
ప్రసీద ప్రసీద ప్రభో రామచంద్ర |
ససౌమిత్రిణా కైకయీనందనేన
స్వశక్త్యానుభక్త్యా చ సంసేవ్యమాన || 9 ||
స్వభక్తాగ్రగణ్యైః కపీశైర్మహీశై-
-రనీకైరనేకైశ్చ రామ ప్రసీద |
నమస్తే నమోఽస్త్వీశ రామ ప్రసీద
ప్రశాధి ప్రశాధి ప్రకాశం ప్రభో మాం || 10 ||
త్వమేవాసి దైవం పరం మే యదేకం
సుచైతన్యమేతత్త్వదన్యం న మన్యే |
యతోఽభూదమేయం వియద్వాయుతేజో
జలోర్వ్యాదికార్యం చరం చాచరం చ || 11 ||
నమః సచ్చిదానందరూపాయ తస్మై
నమో దేవదేవాయ రామాయ తుభ్యం |
నమో జానకీజీవితేశాయ తుభ్యం
నమః పుండరీకాయతాక్షాయ తుభ్యం || 12 ||
నమో భక్తియుక్తానురక్తాయ తుభ్యం
నమః పుణ్యపుంజైకలభ్యాయ తుభ్యం |
నమో వేదవేద్యాయ చాద్యాయ పుంసే
నమః సుందరాయేందిరావల్లభాయ || 13 ||
నమో విశ్వకర్త్రే నమో విశ్వహర్త్రే
నమో విశ్వభోక్త్రే నమో విశ్వమాత్రే |
నమో విశ్వనేత్రే నమో విశ్వజేత్రే
నమో విశ్వపిత్రే నమో విశ్వమాత్రే || 14 ||
నమస్తే నమస్తే సమస్తప్రపంచ-
-ప్రభోగప్రయోగప్రమాణప్రవీణ |
మదీయం మనస్త్వత్పదద్వంద్వసేవాం
విధాతుం ప్రవృత్తం సుచైతన్యసిద్ధ్యై || 15 ||
శిలాపి త్వదంఘ్రిక్షమాసంగిరేణు
ప్రసాదాద్ధి చైతన్యమాధత్త రామ |
నరస్త్వత్పదద్వంద్వసేవావిధానా-
-త్సుచైతన్యమేతీతి కిం చిత్రమత్ర || 16 ||
పవిత్రం చరిత్రం విచిత్రం త్వదీయం
నరా యే స్మరన్త్యన్వహం రామచంద్ర |
భవన్తం భవాన్తం భరన్తం భజన్తో
లభన్తే కృతాన్తం న పశ్యన్త్యతోఽన్తే || 17 ||
స పుణ్యః స గణ్యః శరణ్యో మమాయం
నరో వేద యో దేవచూడామణిం త్వాం |
సదాకారమేకం చిదానందరూపం
మనోవాగగంయం పరం ధామ రామ || 18 ||
ప్రచండప్రతాపప్రభావాభిభూత-
-ప్రభూతారివీర ప్రభో రామచంద్ర |
బలం తే కథం వర్ణ్యతేఽతీవ బాల్యే
యతోఽఖండి చండీశకోదండదండం || 19 ||
దశగ్రీవముగ్రం సపుత్రం సమిత్రం
సరిద్దుర్గమధ్యస్థరక్షోగణేశం |
భవన్తం వినా రామ వీరో నరో వా
సురో వాఽమరో వా జయేత్కస్త్రిలోక్యాం || 20 ||
సదా రామ రామేతి రామామృతం తే
సదారామమానందనిష్యందకందం |
పిబన్తం నమన్తం సుదన్తం హసన్తం
హనూమన్తమన్తర్భజే తం నితాన్తం || 21 ||
సదా రామ రామేతి రామామృతం తే
సదారామమానందనిష్యందకందం |
పిబన్నన్వహం నన్వహం నైవ మృత్యో-
-ర్బిభేమి ప్రసాదాదసాదాత్తవైవ || 22 ||
అసీతాసమేతైరకోదండభూషై-
-రసౌమిత్రివంద్యైరచండప్రతాపైః |
అలంకేశకాలైరసుగ్రీవమిత్రై-
-రరామాభిధేయైరలం దైవతైర్నః || 23 ||
అవీరాసనస్థైరచిన్ముద్రికాఢ్యై-
-రభక్తాంజనేయాదితత్త్వప్రకాశైః |
అమందారమూలైరమందారమాలై-
-రరామాభిధేయైరలం దైవతైర్నః || 24 ||
అసింధుప్రకోపైరవంద్యప్రతాపై-
-రబంధుప్రయాణైరమందస్మితాఢ్యైః |
అదండప్రవాసైరఖండప్రబోధై-
-రరామాభిధేయైరలం దైవతైర్నః || 25 ||
హరే రామ సీతాపతే రావణారే
ఖరారే మురారేఽసురారే పరేతి |
లపన్తం నయన్తం సదాకాలమేవం
సమాలోకయాలోకయాశేషబంధో || 26 ||
నమస్తే సుమిత్రాసుపుత్రాభివంద్య
నమస్తే సదా కైకయీనందనేడ్య |
నమస్తే సదా వానరాధీశవంద్య
నమస్తే నమస్తే సదా రామచంద్ర || 27 ||
ప్రసీద ప్రసీద ప్రచండప్రతాప
ప్రసీద ప్రసీద ప్రచండారికాల |
ప్రసీద ప్రసీద ప్రపన్నానుకంపిన్
ప్రసీద ప్రసీద ప్రభో రామచంద్ర || 28 ||
భుజంగప్రయాతం పరం వేదసారం
ముదా రామచంద్రస్య భక్త్యా చ నిత్యం |
పఠన్సన్తతం చిన్తయన్స్వాన్తరంగే
స ఏవ స్వయం రామచంద్రః స ధన్యః || 29 ||
ఇతి శ్రీమచ్ఛంకరాచార్య కృతం శ్రీ రామ భుజంగప్రయాత స్తోత్రం |

శ్రీ రామ పంచరత్నం

కంజాతపత్రాయతలోచనాయ
కర్ణావతంసోజ్జ్వలకుండలాయ |
కారుణ్యపాత్రాయ సువంశజాయ
నమోఽస్తు రామాయ సలక్ష్మణాయ || 1 ||
విద్యున్నిభాంభోదసువిగ్రహాయ
విద్యాధరైః సంస్తుతసద్గుణాయ |
వీరావతారాయ విరోధిహంత్రే
నమోఽస్తు రామాయ సలక్ష్మణాయ || 2 ||
సంసక్తదివ్యాయుధకార్ముకాయ
సముద్రగర్వాపహరాయుధాయ |
సుగ్రీవమిత్రాయ సురారిహంత్రే
నమోఽస్తు రామాయ సలక్ష్మణాయ || 3 ||
పీతాంబరాలంకృతమధ్యకాయ
పితామహేంద్రామరవందితాయ |
పిత్రే స్వభక్తస్య జనస్య మాత్రే
నమోఽస్తు రామాయ సలక్ష్మణాయ || 4 ||
నమో నమస్తేఽఖిలపూజితాయ
నమో నమశ్చంద్రనిభాననాయ |
నమో నమస్తే రఘువంశజాయ
నమోఽస్తు రామాయ సలక్ష్మణాయ || 5 ||
ఇమాని పంచరత్నాని త్రిసంధ్యం యః పఠేన్నరః |
సర్వపాపవినిర్ముక్తః స యాతి పరమాం గతిం || 6 ||
ఇతి శ్రీరామకర్ణామృతాంతర్గతం శ్రీరామపంచరత్నం |

శ్రీ రామచంద్రాష్టకం

సుగ్రీవమిత్రం పరమం పవిత్రం
సీతాకళత్రం నవమేఘగాత్రం |
కారుణ్యపాత్రం శతపత్రనేత్రం
శ్రీరామచంద్రం సతతం నమామి || 1 ||
సంసారసారం నిగమప్రచారం
ధర్మావతారం హృతభూమిభారం |
సదాఽవికారం సుఖసింధుసారం
శ్రీరామచంద్రం సతతం నమామి || 2 ||
లక్ష్మీవిలాసం జగతాం నివాసం
లంకావినాశం భువనప్రకాశం |
భూదేవవాసం శరదిందుహాసం
శ్రీరామచంద్రం సతతం నమామి || 3 ||
మందారమాలం వచనే రసాలం
గుణైర్విశాలం హతసప్తతాళం |
క్రవ్యాదకాలం సురలోకపాలం
శ్రీరామచంద్రం సతతం నమామి || 4 ||
వేదాంతగానం సకలైస్సమానం
హృతారిమానం త్రిదశప్రధానం |
గజేంద్రయానం విగతావసానం
శ్రీరామచంద్రం సతతం నమామి || 5 ||
శ్యామాభిరామం నయనాభిరామం
గుణాభిరామం వచనాభిరామం |
విశ్వప్రణామం కృతభక్తకామం
శ్రీరామచంద్రం సతతం నమామి || 6 ||
లీలాశరీరం రణరంగధీరం
విశ్వైకసారం రఘువంశహారం |
గంభీరవాదం జితసర్వవాదం
శ్రీరామచంద్రం సతతం నమామి || 7 ||
ఖలే కృతాంతం స్వజనే వినీతం
సామోపగీతం మనసా ప్రతీతం |
రాగేణ గీతం వచనాదతీతం
శ్రీరామచంద్రం సతతం నమామి || 8 ||
శ్రీరామచంద్రస్య వరాష్టకం త్వాం
మయేరితం దేవి మనోహరం యే |
పఠంతి శృణ్వంతి గృణంతి భక్త్యా
తే స్వీయకామాన్ ప్రలభన్తి నిత్యం || 9 ||
ఇతి శతకోటిరామచరితాంతర్గతే శ్రీమదానందరామాయణే వాల్మీకీయే సారకాండే యుద్ధచరితే ద్వాదశసర్గాంతర్గతం శ్రీరామాష్టకం సమాప్తం ||

శ్రీ రామచంద్ర స్తుతిః

నమామి భక్తవత్సలం కృపాలు శీలకోమలం
భజామి తే పదాంబుజం హ్యకామినాం స్వధామదం |
నికామశ్యామసుందరం భవాంబువార్ధిమందరం
ప్రఫుల్లకంజలోచనం మదాదిదోషమోచనం || 1 ||
ప్రలంబబాహువిక్రమం ప్రభోఽప్రమేయవైభవం
నిషంగచాపసాయకం ధరం త్రిలోకనాయకం |
దినేశవంశమండనం మహేశచాపఖండనం
మునీంద్రచిత్తరంజనం సురారిబృందభంజనం || 2 ||
మనోజవైరివందితం హ్యజాదిదేవసేవితం
విశుద్ధబోధవిగ్రహం సమస్తదూషణాపహం |
నమామి జానకీపతిం సుఖాకరం సతాం గతిం
భజే సశక్తిసానుజం శచీపతిప్రియానుజం || 3 ||
త్వదంఘ్రిసీమ యే నరా భజంతి హీనమత్సరాః
పతంతి నో భవార్ణవే వితర్కవీచిసంకులే |
వివిక్తవాసినః సదా భజంతి ముక్తయే ముదా
నిరస్య హీంద్రియాదికం ప్రయాంతి తే గతిం స్వకం || 4 ||
త్వమేకమద్భుతం ప్రభుం నిరీహమీశ్వరం విభుం
జగద్గురుం చ శాశ్వతం తురీయమేవ కేవలం |
భజామి భావవల్లభం సుయోగినాం సుదుర్లభం
స్వభక్తకల్పపాదపం సమస్తసేవ్యమన్వహం || 5 ||
అనూపరూపభూపతిం నతోఽహముర్విజాపతిం
ప్రసీద మే నమామి తే పదాబ్జభక్తి దేహి మే |
పఠంతి యే స్తవం త్విదం సదాదరేణ తే పదం
వ్రజంతి నాత్ర సంశయం త్వదీయ భక్తిసంయుతాః || 6 ||

శ్రీ రామ కవచం

అగస్తిరువాచ |
ఆజానుబాహుమరవిందదళాయతాక్ష-
-మాజన్మశుద్ధరసహాసముఖప్రసాదం |
శ్యామం గృహీత శరచాపముదారరూపం
రామం సరామమభిరామమనుస్మరామి || 1 ||
అస్య శ్రీరామకవచస్య అగస్త్య ఋషిః అనుష్టుప్ ఛందః సీతాలక్ష్మణోపేతః శ్రీరామచంద్రో దేవతా శ్రీరామచంద్రప్రసాదసిద్ధ్యర్థే జపే వినియోగః |
అథ ధ్యానం |
నీలజీమూతసంకాశం విద్యుద్వర్ణాంబరావృతం |
కోమలాంగం విశాలాక్షం యువానమతిసుందరం || 1 ||
సీతాసౌమిత్రిసహితం జటాముకుటధారిణం |
సాసితూణధనుర్బాణపాణిం దానవమర్దనం || 2 ||
యదా చోరభయే రాజభయే శత్రుభయే తథా |
ధ్యాత్వా రఘుపతిం క్రుద్ధం కాలానలసమప్రభం || 3 ||
చీరకృష్ణాజినధరం భస్మోద్ధూళితవిగ్రహం |
ఆకర్ణాకృష్టవిశిఖకోదండభుజమండితం || 4 ||
రణే రిపూన్ రావణాదీంస్తీక్ష్ణమార్గణవృష్టిభిః |
సంహరంతం మహావీరముగ్రమైంద్రరథస్థితం || 5 ||
లక్ష్మణాద్యైర్మహావీరైర్వృతం హనుమదాదిభిః |
సుగ్రీవాద్యైర్మాహావీరైః శైలవృక్షకరోద్యతైః || 6 ||
వేగాత్కరాలహుంకారైర్భుభుక్కారమహారవైః |
నదద్భిః పరివాదద్భిః సమరే రావణం ప్రతి || 7 ||
శ్రీరామ శత్రుసంఘాన్మే హన మర్దయ ఖాదయ |
భూతప్రేతపిశాచాదీన్ శ్రీరామాశు వినాశయ || 8 ||
ఏవం ధ్యాత్వా జపేద్రామకవచం సిద్ధిదాయకం |
సుతీక్ష్ణ వజ్రకవచం శృణు వక్ష్యాంయనుత్తమం || 9 ||
అథ కవచం |
శ్రీరామః పాతు మే మూర్ధ్ని పూర్వే చ రఘువంశజః |
దక్షిణే మే రఘువరః పశ్చిమే పాతు పావనః || 10 ||
ఉత్తరే మే రఘుపతిర్భాలం దశరథాత్మజః |
భ్రువోర్దూర్వాదలశ్యామస్తయోర్మధ్యే జనార్దనః || 11 ||
శ్రోత్రం మే పాతు రాజేంద్రో దృశౌ రాజీవలోచనః |
ఘ్రాణం మే పాతు రాజర్షిర్గండౌ మే జానకీపతిః || 12 ||
కర్ణమూలే ఖరధ్వంసీ భాలం మే రఘువల్లభః |
జిహ్వాం మే వాక్పతిః పాతు దంతపంక్తీ రఘూత్తమః || 13 ||
ఓష్ఠౌ శ్రీరామచంద్రో మే ముఖం పాతు పరాత్పరః |
కంఠం పాతు జగద్వంద్యః స్కంధౌ మే రావణాంతకః || 14 ||
ధనుర్బాణధరః పాతు భుజౌ మే వాలిమర్దనః |
సర్వాణ్యంగులిపర్వాణి హస్తౌ మే రాక్షసాంతకః || 15 ||
వక్షో మే పాతు కాకుత్స్థః పాతు మే హృదయం హరిః |
స్తనౌ సీతాపతిః పాతు పార్శ్వం మే జగదీశ్వరః || 16 ||
మధ్యం మే పాతు లక్ష్మీశో నాభిం మే రఘునాయకః |
కౌసల్యేయః కటీ పాతు పృష్ఠం దుర్గతినాశనః || 17 ||
గుహ్యం పాతు హృషీకేశః సక్థినీ సత్యవిక్రమః |
ఊరూ శార్ఙ్గధరః పాతు జానునీ హనుమత్ప్రియః || 18 ||
జంఘే పాతు జగద్వ్యాపీ పాదౌ మే తాటకాంతకః |
సర్వాంగం పాతు మే విష్ణుః సర్వసంధీననామయః || 19 ||
జ్ఞానేంద్రియాణి ప్రాణాదీన్ పాతు మే మధుసూదనః |
పాతు శ్రీరామభద్రో మే శబ్దాదీన్విషయానపి || 20 ||
ద్విపదాదీని భూతాని మత్సంబంధీని యాని చ |
జామదగ్న్యమహాదర్పదలనః పాతు తాని మే || 21 ||
సౌమిత్రిపూర్వజః పాతు వాగాదీనీంద్రియాణి చ |
రోమాంకురాణ్యశేషాణి పాతు సుగ్రీవరాజ్యదః || 22 ||
వాఙ్మనోబుద్ధ్యహంకారైర్జ్ఞానాజ్ఞానకృతాని చ |
జన్మాంతరకృతానీహ పాపాని వివిధాని చ || 23 ||
తాని సర్వాణి దగ్ధ్వాశు హరకోదండఖండనః |
పాతు మాం సర్వతో రామః శార్ఙ్గబాణధరః సదా || 24 ||
ఇతి శ్రీరామచంద్రస్య కవచం వజ్రసంమితం |
గుహ్యాద్గుహ్యతమం దివ్యం సుతీక్ష్ణ మునిసత్తమ || 25 ||
యః పఠేచ్ఛృణుయాద్వాపి శ్రావయేద్వా సమాహితః |
స యాతి పరమం స్థానం రామచంద్రప్రసాదతః || 26 ||
మహాపాతకయుక్తో వా గోఘ్నో వా భ్రూణహా తథా |
శ్రీరామచంద్రకవచపఠనాచ్ఛుద్ధిమాప్నుయాత్ || 27 ||
బ్రహ్మహత్యాదిభిః పాపైర్ముచ్యతే నాత్ర సంశయః |
భో సుతీక్ష్ణ యథా పృష్టం త్వయా మమ పురాః శుభం |
తథా శ్రీరామకవచం మయా తే వినివేదితం || 28 ||
ఇతి శ్రీమదానందరామాయణే మనోహరకాండే సుతీక్ష్ణాగస్త్యసంవాదే శ్రీరామకవచం ||

శ్రీ రామ కర్ణామృతం

మంగళశ్లోకాః |
మంగళం భగవాన్విష్ణుర్మంగళం మధుసూదనః |
మంగళం పుండరీకాక్షో మంగళం గరుడధ్వజః || 1
మంగళం కోసలేంద్రాయ మహనీయగుణాబ్ధయే |
చక్రవర్తితనూజాయ సార్వభౌమాయ మంగళం || 2
వేదవేదాన్తవేద్యాయ మేఘశ్యామలమూర్తయే |
పుంసాం మోహనరూపాయ పుణ్యశ్లోకాయ మంగళం || 3
విశ్వామిత్రాంతరంగాయ మిథిలానగరీపతేః |
భాగ్యానాం పరిపాకాయ భవ్యరూపాయ మంగళం || 4
పితృభక్తాయ సతతం భ్రాతృభిః సహ సీతయా |
నందితాఖిలలోకాయ రామచంద్రాయ మంగళం || 5
త్యక్తసాకేతవాసాయ చిత్రకూటవిహారిణే |
సేవ్యాయ సర్వయమినాం ధీరోదాత్తాయ మంగళం || 6
సౌమిత్రిణా చ జానక్యా చాపబాణాసిధారిణా |
సంసేవ్యాయ సదా భక్త్యా సానుజాయాస్తు మంగళం || 7
దండకారణ్యవాసాయ ఖండితామరశత్రవే |
గృధ్రరాజాయ భక్తాయ ముక్తిదాయాస్తు మంగళం || 8
సాదరం శబరీదత్తఫలమూలాభిలాషిణే |
సౌలభ్యపరిపూర్ణాయ సత్త్వోద్యుక్తాయ మంగళం || 9
హనూమత్సమవేతాయ హరీశాభీష్టదాయినే |
వాలిప్రమథనాయాస్తు మహాధీరాయ మంగళం || 10
శ్రీమతే రఘువీరాయ సేతులంఘితసింధవే |
జితరాక్షసరాజాయ రణధీరాయ మంగళం || 11
ఆసాద్య నగరీం దివ్యామభిషిక్తాయ సీతయా |
రాజాధిరాజరాజాయ రామభద్రాయ మంగళం || 12
విభీషణకృతే ప్రీత్యా విశ్వాభీష్టప్రదాయినే |
జానకీప్రాణనాథాయ సదా రామాయ మంగళం || 13
శ్రీరామం త్రిజగద్గురుం సురవరం సీతామనోనాయకం
శ్యామాంగం శశికోటిపూర్ణవదనం చంచత్కలాకౌస్తుభం |
సౌంయం సత్యగుణోత్తమం సుసరయూతీరే వసంతం ప్రభుం
త్రాతారం సకలార్థసిద్ధిసహితం వందే రఘూణాం పతిం || 14
శ్రీరాఘవం దశరథాత్మజమప్రమేయం
సీతాపతిం రఘువరాన్వయరత్నదీపం |
ఆజానుబాహుమరవిందదళాయతాక్షం
రామం నిశాచరవినాశకరం నమామి || 15
శ్రీరామచంద్ర కరుణాకర రాఘవేంద్ర
రాజేంద్రచంద్ర రఘువంశసముద్రచంద్ర |
సుగ్రీవనేత్రయుగళోత్పల-పూర్ణచంద్ర
సీతామనఃకుముదచంద్ర నమో నమస్తే || 16
సీతామనోమానసరాజహంస
సంసారసన్తాపహర క్షమావన్ |
శ్రీరామ దైత్యాంతక శాంతరూప
శ్రీతారకబ్రహ్మ నమో నమస్తే || 17
విష్ణో రాఘవ వాసుదేవ నృహరే దేవౌఘచూడామణే |
సంసారార్ణవకర్ణధారక హరే కృష్ణాయ తుభ్యం నమః || 18
సుగ్రీవాదిసమస్తవానరవరైస్సంసేవ్యమానం సదా |
విశ్వామిత్రపరాశరాదిమునిభిస్సంస్తూయమానం భజే || 19
రామం చందనశీతలం క్షితిసుతామోహాకరం శ్రీకరం
వైదేహీనయనారవిందమిహిరం సంపూర్ణచంద్రాననం |
రాజానం కరుణాసమేతనయనం సీతామనోనందనం
సీతాదర్పణచారుగండలలితం వందే సదా రాఘవం || 20
జానాతి రామ తవ నామరుచిం మహేశో
జానాతి గౌతమసతీ చరణప్రభావం |
జానాతి దోర్బలపరాక్రమమీశచాపో
జానాత్యమోఘపటుబాణగతిం పయోధిః || 21
మాతా రామో మత్పితా రామచంద్రో
భ్రాతా రామో మత్సఖా రాఘవేశః |
సర్వస్వం మే రామచంద్రో దాయాళు-
ర్నాన్యం దైవం నైవ జానే న జానే || 22
విమలకమలనేత్రం విస్ఫురన్నీలగాత్రం
తపనకులపవిత్రం దానవధ్వంతమిత్రం |
భువనశుభచరిత్రం భూమిపుత్రీకళత్రం
దశరథవరపుత్రం నౌమి రామాఖ్యమిత్రం || 23
మార్గే మార్గే శాఖినాం రత్నవేదీ
వేద్యాం వేద్యాం కిన్నరీబృందగీతం |
గీతే గీతే మంజులాలాపగోష్ఠీ
గోష్ఠ్యాం గోష్ఠ్యాం త్వత్కథా రామచంద్ర || 24
వృక్షే వృక్షే వీక్షితాః పక్షిసంఘాః
సంఘే సంఘే మంజులామోదవాక్యం |
వాక్యే వాక్యే మంజులాలాపగోష్ఠీ
గోష్ఠ్యాం గోష్ఠ్యాం త్వత్కథా రామచంద్ర || 25
దురితతిమిరచంద్రో దుష్టకంజాతచంద్రః
సురకువలయచంద్రస్సూర్యవంశాబ్ధిచంద్రః |
స్వజననివహచంద్రశ్శత్రురాజీవచంద్రః
ప్రణతకుముదచంద్రః పాతు మాం రామచంద్రః || 26
కళ్యాణదం కౌశికయజ్ఞపాలం
కళానిధిం కాంచనశైలధీరం |
కంజాతనేత్రం కరుణాసముద్రం
కాకుత్స్థరామం కలయామి చిత్తే || 27
రాజీవాయతలోచనం రఘువరం నీలోత్పలశ్యామలం
మందారాంచితమండపే సులలితే సౌవర్ణకే పుష్పకే |
ఆస్థానే నవరత్నరాజిఖచితే సింహాసనే సంస్థితం
సీతాలక్ష్మణలోకపాలసహితం వందే మునీంద్రాస్పదం || 28
ధ్యాయే రామం సుధాంశుం నతసకలభవారణ్యతాపప్రహారం |
శ్యామం శాంతం సురేంద్రం సురమునివినుతం కోటిసూర్యప్రకాశం |
సీతాసౌమిత్రిసేవ్యం సురనరసుగమం దివ్యసింహాసనస్థం |
సాయాహ్నే రామచంద్రం స్మితరుచిరముఖం సర్వదా మే ప్రసన్నం || 29
ఇంద్రనీలమణిసన్నిభదేహం
వందనీయమసకృన్మునిబృందైః |
లంబమానతులసీవనమాలం
చింతయామి సతతం రఘువీరం || 30
సంపూర్ణచంద్రవదనం సరసీరుహాక్షం
మాణిక్యకుండలధరం ముకుటాభిరామం |
చాంపేయగౌరవసనం శరచాపహస్తం
శ్రీరామచంద్రమనిశం మనసా స్మరామి || 31
మాతుః పార్శ్వే చరన్తం మణిమయశయనే మంజుభూషాంచితాంగం |
మందం మందం పిబంతం ముకుళితనయనం స్తన్యమన్యస్తనాగ్రం |
అంగుళ్యాగ్రైః స్పృశన్తం సుఖపరవశయా సస్మితాలింగితాంగం |
గాఢం గాఢం జనన్యా కలయతు హృదయం మామకం రామబాలం || 32
రామాభిరామం నయనాభిరామం
వాచాభిరామం వదనాభిరామం |
సర్వాభిరామం చ సదాభిరామం
వందే సదా దాశరథిం చ రామం || 33
రాశబ్దోచ్చారమాత్రేణ ముఖాన్నిర్యాతి పాతకాః |
పునః ప్రవేశభీత్యా చ మకారస్తు కవాటవత్ || 34
అనర్ఘమాణిక్యవిరాజమాన-
శ్రీపాదుకాలంకృతశోభనాభ్యాం |
అశేషబృందారకవందితాభ్యాం
నమో నమో రామపదాంబుజాభ్యాం || 35
చలత్కనకకుండలోల్లసితదివ్యగండస్థలం
చరాచరజగన్మయం చరణపద్మగంగాశ్రయం |
చతుర్విధఫలప్రదం చరమపీఠమధ్యస్థితం
చిదంశమఖిలాస్పదం దశరథాత్మజం చింతయే || 36
సనందనమునిప్రియం సకలవర్ణవేదాత్మకం
సమస్తనిగమాగమస్ఫురితతత్త్వసింహాసనం |
సహస్రనయనాబ్జజాద్యమరబృందసంసేవితం
సమష్టిపురవల్లభం దశరథాత్మజం చింతయే || 37
జాగ్రత్స్వప్నసుషుప్తి-కాలవిలసత్తత్త్వాత్మచిన్మాత్రకం
చైతన్యాత్మకమాధిపాపరహితం భూంయాదితన్మాత్రకం |
శాంభవ్యాదిసమస్తయోగకులకం సాంఖ్యాదితత్త్వాత్పరం
శబ్దావాచ్యమహం నమామి సతతం వ్యుత్పత్తినాశాత్పరం || 38
ఇక్ష్వాకువంశార్ణవజాతరత్నం
సీతాంగనాయౌవనభాగ్యరత్నం |
వైకుంఠరత్నం మమ భాగ్యరత్నం
శ్రీరామరత్నం శిరసా నమామి || 39
ఇక్ష్వాకునందనం సుగ్రీవపూజితం
త్రైలోక్యరక్షకం సత్యసంధం సదా |
రాఘవం రఘుపతిం రాజీవలోచనం
రామచంద్రం భజే రాఘవేశం భజే || 40
భక్తప్రియం భక్తసమాధిగంయం
చింతాహరం చింతితకామధేనుం |
సూర్యేందుకోటిద్యుతిభాస్వరం తం
రామం భజే రాఘవరామచంద్రం || 41
శ్రీరామం జనకక్షితీశ్వరసుతావక్త్రాంబుజాహారిణం
శ్రీమద్భానుకులాబ్ధికౌస్తుభమణిం శ్రీరత్నవక్షస్స్థలం |
శ్రీకంఠాద్యమరౌఘరత్నమకుటాలంకారపాదాంబుజం
శ్రీవత్సోజ్జ్వలమింద్రనీలసదృశం శ్రీరామచంద్రం భజే || 42
రామచంద్ర చరితాకథామృతం
లక్ష్మణాగ్రజగుణానుకీర్తనం |
రాఘవేశ తవ పాదసేవనం
సంభవంతు మమ జన్మజన్మని || 43
అజ్ఞానసంభవ-భవాంబుధిబాడబాగ్ని-
రవ్యక్తతత్త్వనికరప్రణవాధిరూఢః |
సీతాసమేతమనుజేన హృదన్తరాళే
ప్రాణప్రయాణసమయే మమ సన్నిధత్తే || 44
రామో మత్కులదైవతం సకరుణం రామం భజే సాదరం
రామేణాఖిలఘోరపాపనిహతీ రామాయ తస్మై నమః |
రామాన్నాస్తి జగత్రయైకసులభో రామస్య దాసోఽస్ంయహం
రామే ప్రీతిరతీవ మే కులగురో శ్రీరామ రక్షస్వ మాం || 45
వైదేహీసహితం సురద్రుమతలే హైమే మహామంటపే |
మధ్యేపుష్పకమాసనే మణిమయే వీరాసనే సంస్థితం |
అగ్రే వాచయతి ప్రభంజనసుతే తత్త్వం మునిభ్యః పరం |
వ్యాఖ్యాన్తం భరతాదిభిః పరివృతం రామం భజే శ్యామలం || 46
వామే భూమిసుతా పురస్తు హనుమాన్పశ్చాత్సుమిత్రాసుత-
శ్శత్రుఘ్నో భరతశ్చ పార్శ్వదళయోర్వాయ్వాదికోణేష్వపి |
సుగ్రీవశ్చ విభీషణశ్చ యువరాట్ తారాసుతో జాంబవాన్
మధ్యే నీలసరోజకోమలరుచిం రామం భజే శ్యామలం || 47
కేయూరాంగదకంకణైర్మణిగణైర్వైరోచమానం సదా
రాకాపర్వణిచంద్రకోటిసదృశం ఛత్రేణ వైరాజితం |
హేమస్తంభసహస్రషోడశయుతే మధ్యే మహామండపే
దేవేశం భరతాదిభిః పరివృతం రామం భజే శ్యామలం || 48
సాకేతే శరదిందుకుందధవళే సౌఘే మహామంటపే |
పర్యస్తాగరుధూపధూమపటలే కర్పూరదీపోజ్జ్వలే |
సుగ్రీవాంగదవాయుపుత్రసహితం సౌమిత్రిణా సేవితం
లీలామానుషవిగ్రహం రఘుపతిం రామం భజే శ్యామలం || 49
శాంతం శారదచంద్రకోటిసదృశం చంద్రాభిరామాననం
చంద్రార్కాగ్నివికాసికుండలధరం చంద్రావతంసస్తుతం |
వీణాపుస్తకసాక్షసూత్రవిలసద్వ్యాఖ్యానముద్రాకరం
దేవేశం భరతాదిభిః పరివృతం రామం భజే శ్యామలం || 50
రామం రాక్షసమర్దనం రఘుపతిం శక్రారివిధ్వంసినం
సుగ్రీవేప్సితరాజ్యదం సురపతేః పుత్రాంతకం శార్‍ఙ్గిణం |
భక్తానామభయప్రదం భయహరం పాపౌఘవిధ్వంసినం
సీతాసేవితపాదపద్మయుగళం రామం భజే శ్యామలం || 51
కందర్పాయుతకోటికోటితులితం కాలాంబుదశ్యామలం
కంబుగ్రీవముదారకౌస్తుభధరం కర్ణావతంసోత్పలం |
కస్తూరీతిలకోజ్జ్వలం స్మితముఖం చిన్ముద్రయాలంకృతం
సీతాలక్ష్మణవాయుపుత్రసహితం సింహాసనస్థం భజే || 52
సాకేతే నవరత్నపంక్తిఖచితే చిత్రధ్వజాలంకృతే
వాసే స్వర్ణమయే దళాష్టలలితే పద్మే విమానోత్తమే |
ఆసీనం భరతాదిసోదరజనైః శాఖామృగైః కిన్నరైః
దిక్పాలైర్మునిపుంగవైర్నృపగణైస్సంసేవ్యమానం భజే || 53
కస్తూరీఘనసారకుంకుమలసచ్ఛ్రీచందనాలంకృతం
కందర్పాధికసుందరం ఘననిభం కాకుత్స్థవంశధ్వజం |
కళ్యాణాంభరవేష్టితం కమలయా యుక్తం కలావల్లభం
కళ్యాణాచలకార్ముకప్రియసఖం కళ్యాణరామం భజే || 54
ముక్తేర్మూలం మునివరహృదానందకందం ముకుందం
కూటస్థాఖ్యం సకలవరదం సర్వచైతన్యరూపం |
నాదాతీతం కమలనిలయం నాదనాదాంతతత్త్వం
నాదాతీతం ప్రకృతిరహితం రామచంద్రం భజేఽహం || 55
తారాకారం నిఖిలనిలయం తత్త్వమస్యాదిలక్ష్యం
శబ్దావాచ్యం త్రిగుణరహితం వ్యోమమంగుష్ఠమాత్రం |
నిర్వాణాఖ్యం సగుణమగుణవ్యోమరంధ్రాంతరస్థం
సౌషుంనాంతః ప్రణవసహితం రామచంద్రం భజేఽహం || 56
నిజానందాకారం నిగమతురగారాధితపదం
పరబ్రహ్మానందం పరమపదగం పాపహరణం |
కృపాపారావారం పరమపురుషం పద్మనిలయం
భజే రామం శ్యామం ప్రకృతిరహితం నిర్గుణమహం || 57
సాకేతే నగరే సమస్తమహిమాధారే జగన్మోహనే
రత్నస్తంభసహస్రమంటపమహాసింహాసనే సాంబుజే |
విశ్వామిత్రవసిష్ఠగౌతమశుకవ్యాసాదిభిర్మౌనిభిః
ధ్యేయం లక్ష్మణలోకపాలసహితం సీతాసమేతం భజే || 58
రామం శ్యామాభిరామం రవిశశినయనం కోటిసూర్యప్రకాశం
దివ్యం దివ్యాస్త్రపాణిం శరముఖశరధిం చారుకోడండహస్తం |
కాలం కాలాగ్నిరుద్రం రిపుకులదహనం విఘ్నవిచ్ఛేదదక్షం
భీమం భీమాట్టహాసం సకలభయహరం రామచంద్రం భజేఽహం || 59
శ్రీరామం భువనైకసుందరతనుం ధారాధరశ్యామలం
రాజీవాయతలోచనం రఘువరం రాకేందుబింబాననం |
కోదండాదినిజాయుధాశ్రితభుజైర్భ్రాంతం విదేహాత్మజా-
ధీశం భక్తజనావనం రఘువరం శ్రీరామచంద్రం భజే || 60
శ్రీవత్సాంకముదారకౌస్తుభలసత్పీతాంబరాలంకృతం
నానారత్నవిరాజమానమకుటం నీలాంబుదశ్యామలం |
కస్తూరీఘనసారచర్చితతనుం మందారమాలాధరం
కందర్పాయుతసుందరం రఘుపతిం సీతాసమేతం భజే || 61
సదానందదేవే సహస్రారపద్మే
గలచ్చంద్రపీయూషధారామృతాంతే |
స్థితం రామమూర్తిం నిషేవే నిషేవే-
ఽన్యదైవం న సేవే న సేవే న సేవే || 62
సుధాభాసితద్వీపమధ్యే విమానే
సుపర్వాళివృక్షోజ్జ్వలే శేషతల్పే |
నిషణ్ణం రమాంకం నిషేవే నిషేవే-
ఽన్యదైవం న సేవే న సేవే న సేవే || 63
చిదంశం సమానందమానందకందం
సుషుంనాఖ్యరంధ్రాంతరాళే చ హంసం |
సచక్రం సశంఖం సపీతాంబరాంకం
పరంచాన్యదైవం న జానే న జానే || 64
చతుర్వేదకూటోల్లసత్కారణాఖ్యం
స్ఫురద్దివ్యవైమానికే భోగితల్పే |
పరంధామమూర్తిం నిషణ్ణం నిషేవే
నిషేవేఽన్యదైవం న సేవే న సేవే || 65
సింహాసనస్థం సురసేవితవ్యం
రత్నాంకితాలంకృతపాదపద్మం |
సీతాసమేతం శశిసూర్యనేత్రం
రామం భజే రాఘవ రామచంద్రం || 66
రామం పురాణపురుషం రమణీయవేషం
రాజాధిరాజమకుటార్చితపాదపీఠం |
సీతాపతిం సునయనం జగదేకవీరం
శ్రీరామచంద్రమనిశం కలయామి చిత్తే || 67
పరానందవస్తుస్వరూపాదిసాక్షిం
పరబ్రహ్మగంయం పరంజ్యోతిమూర్తిం |
పరాశక్తిమిత్రాఽప్రియారాధితాంఘ్రిం
పరంధామరూపం భజే రామచంద్రం || 68
మందస్మితం కుండలగండభాగం
పీతాంబరం భూషణభూషితాంగం |
నీలోత్పలాంగం భువనైకమిత్రం
రామం భజే రాఘవ రామచంద్రం || 69
అచింత్యమవ్యక్తమనంతరూప-
మద్వైతమానందమనాదిగంయం |
పుణ్యస్వరూపం పురుషోత్తమాఖ్యం
రామం భజే రాఘవ రామచంద్రం || 70
పద్మాసనస్థం సురసేవితవ్యం
పద్మాలయానందకటాక్షవీక్ష్యం |
గంధర్వవిద్యాధరగీయమానం
రామం భజే రాఘవ రామచంద్రం || 71
అనంతకీర్తిం వరదం ప్రసన్నం
పద్మాసనం సేవకపారిజాతం |
రాజాధిరాజం రఘువీరకేతుం
రామం భజే రాఘవ రామచంద్రం || 72
సుగ్రీవమిత్రం సుజనానురూపం
లంకాహరం రాక్షసవంశనాశం |
వేదాశ్రయాంగం విపులాయతాక్షం
రామం భజే రాఘవ రామచంద్రం || 73
సకృత్ప్రణతరక్షాయాం సాక్షీ యస్య విభీషణః |
సాపరాధప్రతీకారః స శ్రీరామో గతిర్మమ || 74
ఫలమూలాశినౌ దాంతౌ తాపసౌ ధర్మచారిణౌ |
రక్షఃకులవిహన్తారౌ భ్రాతరౌ రామలక్ష్మణౌ || 75
తరుణౌ రూపసంపన్నౌ సుకుమారౌ మహాబలౌ |
పుండరీక విశాలాక్షౌ చీరకృష్ణాజినాంబరౌ || 76
కౌసల్యానయనేందుం దశరథముఖారవిందమార్తాండం |
సీతామానసహంసం రామం రాజీవలోచనం వందే || 77
భర్జనం భవబీజానాం మార్జనం సుఖసంపదాం |
తర్జనం యమదూతానాం రామరామేతి కీర్తనం || 78
న జానే జానకీ జానే రామ త్వన్నామవైభవం |
సర్వేశో భగవాన్ శంభుర్వాల్మీకిర్వేత్తి వా నవా || 79
కరతలధృతచాపం కాలమేఘస్వరూపం
సరసిజదళనేత్రం చారుహాసం సుగాత్రం |
విచినుతవనవాసం విక్రమోదగ్రవేషం
ప్రణమత రఘునాథం జానకీప్రాణనాథం || 80
విద్యుత్స్ఫురన్మకరకుండలదీప్తచారు-
గండస్థలం మణికిరీటవిరాజమానం |
పీతాంబరం జలదనీలముదారకాంతిం
శ్రీరామచంద్రమనిశం కలయామి చిత్తే || 81
రత్నోల్లసజ్జ్వలితకుండలగండభాగం
కస్తూరికాతిలకశోభితఫాలభాగం |
కర్ణాంతదీర్ఘనయనం కరుణాకటాక్షం
శ్రీరామచంద్ర ముఖమాత్మని సన్నిధత్తం || 82
వైదేహీసహితం చ లక్ష్మణయుతం కైకేయిపుత్రాన్వితం
సుగ్రీవం చ విభీషణానిలసుతౌ నీలం నలం సాంగదం |
విశ్వామిత్రవసిష్ఠగౌతమభరద్వాజాదికాన్ మానయన్
రామో మారుతిసేవితః స్మరతు మాం సాంరాజ్యసింహాసనే || 83
సకలగుణనిధానం యోగిభిస్స్తూయమానం
భజితసురవిమానం రక్షితేంద్రాదిమానం |
మహితవృషభయానం సీతయా శోభమానం
స్మరతు హృదయభానుం బ్రహ్మరామాభిరామం || 84
త్రిదశకుముదచంద్రో దానవాంభోజచంద్రో
దురితతిమిరచంద్రో యోగినాం జ్ఞానచంద్రః |
ప్రణతనయనచంద్రో మైథిలీనేత్రచంద్రో
దశముఖరిపుచంద్రః పాతు మాం రామచంద్రః || 85
యన్నామైవ సహస్రనామసదృశం యన్నామ వేదైస్సమం
యన్నామాంకితవాక్య-మాసురబలస్త్రీగర్భవిచ్ఛేదనం |
యన్నామ శ్వపచార్యభేదరహితం ముక్తిప్రదానోజ్జ్వలం
తన్నామాఽలఘురామరామరమణం శ్రీరామనామామృతం || 86
రాజీవనేత్ర రఘుపుంగవ రామభద్ర
రాకేందుబింబసదృశానన నీలగాత్ర |
రామాఽభిరామ రఘువంశసముద్భవ త్వం
శ్రీరామచంద్ర మమ దేహి కరావలంబం || 87
మాణిక్యమంజీరపదారవిందం
రామార్కసంఫుల్లముఖారవిందం |
భక్తాభయప్రాపికరారవిందాం
దేవీం భజే రాఘవవల్లభాం తాం || 88
జయతు విజయకారీ జానకీమోదకారీ
తపనకులవిహారీ దండకారణ్యచారీ |
దశవదనకుఠారీ దైత్యవిచ్ఛేదకారీ
మణిమకుటకధారీ చండకోదండధారీ || 89
రామః పితా రఘవ ఏవ మాతా
రామస్సుబంధుశ్చ సఖా హితశ్చ |
రామో గురుర్మే పరమం చ దైవం
రామం వినా నాఽన్యమహం స్మరామి || 90
శ్రీరామ మే త్వం హి పితా చ మాతా
శ్రీరామ మే త్వం హి సుహృచ్చ బంధుః |
శ్రీరామ మే త్వం హి గురుశ్చ గోష్ఠీ
శ్రీరామ మే త్వం హి సమస్తమేవ || 91
రామచంద్రచరితామృతపానం
సోమపానశతకోటిసమానం |
సోమపానశతకోటిభిరీయా-
జ్జన్మ నైతి రఘునాయకనాంనా || 92
రామ రామ దయాసింధో రావణారే జగత్పతే |
త్వత్పాదకమలాసక్తి-ర్భవేజ్జన్మని జన్మని || 93
శ్రీరామచంద్రేతి దయాపరేతి
భక్తప్రియేతి భవబంధనమోచనేతి |
నాథేతి నాగశయనేతి సదా స్తువంతం
మాం పాహి భీతమనిశం కృపణం కృపాళో || 94
అయోధ్యానాథ రాజేంద్ర సీతాకాంత జగత్పతే |
శ్రీరామ పుండరీకాక్ష రామచంద్ర నమోఽస్తు తే || 95
హే రామ హే రమణ హే జగదేకవీర
హే నాథ హే రఘుపతే కరుణాలవాల |
హే జానకీరమణ హే జగదేకబంధో
మాం పాహి దీనమనిశం కృపణం కృతఘ్నం || 96
జానాతి రామ తవ తత్త్వగతిం హనూమాన్ |
జానాతి రామ తవ సఖ్యగతిం కపీశః |
జానాతి రామ తవ యుద్ధగతిం దశాస్యో |
జానాతి రామ ధనదానుజ ఏవ సత్యం || 97
సేవ్యం శ్రీరామమంత్రం శ్రవణశుభకరం శ్రేష్ఠసుజ్ఞానిమంత్రం
స్తవ్యం శ్రీరామమంత్రం నరకదురితదుర్వారనిర్ఘాతమంత్రం |
భవ్యం శ్రీరామమంత్రం భజతు భజతు సంసారనిస్తారమంత్రం
దివ్యం శ్రీరామమంత్రం దివి భువి విలసన్మోక్షరక్షైకమంత్రం || 98
నిఖిలనిలయమంత్రం నిత్యతత్త్వాఖ్యమంత్రం
భవకులహరమంత్రం భూమిజాప్రాణమంత్రం |
పవనజనుతమంత్రం పార్వతీమోక్షమంత్రం
పశుపతినిజమంత్రం పాతు మాం రామమంత్రం || 99
ప్రణవనిలయమంత్రం ప్రాణనిర్వాణమంత్రం
ప్రకృతిపురుషమంత్రం బ్రహ్మరుద్రేంద్రమంత్రం |
ప్రకటదురితరాగద్వేషనిర్ణాశమంత్రం
రఘుపతినిజమంత్రం రామరామేతిమంత్రం || 100
దశరథసుతమంత్రం దైత్యసంహారమంత్రం
విబుధవినుతమంత్రం విశ్వవిఖ్యాతమంత్రం |
మునిగణనుతమంత్రం ముక్తిమార్గైకమంత్రం
రఘుపతినిజమంత్రం రామరామేతిమంత్రం || 101
సంసారసాగరభయాపహవిశ్వమంత్రం
సాక్షాన్ముముక్షుజనసేవితసిద్ధమంత్రం |
సారంగహస్తముఖహస్తనివాసమంత్రం
కైవల్యమంత్రమనిశం భజ రామమంత్రం || 102
జయతు జయతు మంత్రం జన్మసాఫల్యమంత్రం
జననమరణభేదక్లేశవిచ్ఛేదమంత్రం |
సకలనిగమమంత్రం సర్వశాస్త్రైకమంత్రం
రఘుపతినిజమంత్రం రామరామేతిమంత్రం || 103
జగతి విశదమంత్రం జానకీప్రాణమంత్రం
విబుధవినుతమంత్రం విశ్వవిఖ్యాతమంత్రం |
దశరథసుతమంత్రం దైత్యసంహారమంత్రం
రఘుపతినిజమంత్రం రామరామేతిమంత్రం || 104
బ్రహ్మాదియోగిమునిపూజితసిద్ధమంత్రం
దారిద్ర్యదుఃఖభవరోగవినాశమంత్రం |
సంసారసాగరసముత్తరణైకమంత్రం
వందే మహాభయహరం రఘురామమంత్రం || 105
శత్రుచ్ఛేదైకమంత్రం సరసముపనిషద్వాక్యసంపూజ్యమంత్రం
సంసారోత్తారమంత్రం సముచితసమయే సంగనిర్యాణమంత్రం |
సర్వైశ్వర్యైకమంత్రం వ్యసనభుజగసన్దష్టసన్త్రాణమంత్రం
జిహ్వే శ్రీరామమంత్రం జప జప సఫలం జన్మసాఫల్యమంత్రం || 106
నిత్యం శ్రీరామమంత్రం నిరుపమమధికం నీతిసుజ్ఞానమంత్రం
సత్యం శ్రీరామమంత్రం సదమలహృదయే సర్వదారోగ్యమంత్రం |
స్తుత్యం శ్రీరామమంత్రం సులలితసుమనస్సౌఖ్యసౌభాగ్యమంత్రం
పఠ్యం శ్రీరామమంత్రం పవనజవరదం పాతు మాం రామమంత్రం || 107
వ్యామోహప్రశమౌషధం మునిమనోవృత్తిప్రవృత్త్యౌషధం
దైత్యోన్మూలకరౌషధం భవభయప్రధ్వంసనైకౌషధం |
భక్తానందకరౌషధం త్రిభువనే సంజీవనైకౌషధం
శ్రేయః ప్రాప్తికరౌషధం పిబ మనః శ్రీరామనామౌషధం || 108
సకలభువనరత్నం సర్వశాస్త్రార్థరత్నం
సమరవిజయరత్నం సచ్చిదానందరత్నం |
దశముఖహరరత్నం దానవారాతిరత్నం
రఘుకులనృపరత్నం పాతు మాం రామరత్నం || 109
సకలభువనరత్నం సచ్చిదానందరత్నం
సకలహృదయరత్నం సూర్యబింబాంతరత్నం |
విమలసుకృతరత్నం వేదవేదాంతరత్నం
పురహరజపరత్నం పాతు మాం రామరత్నం || 110
నిగమశిఖరరత్నం నిర్మలానందరత్నం
నిరుపమగుణరత్నం నాదనాదాంతరత్నం |
దశరథకులరత్నం ద్వాదశాంతస్స్థరత్నం
పశుపతిజపరత్నం పాతు మాం రామరత్నం || 111
శతమఖసుతరత్నం షోడశాంతస్స్థరత్నం
మునిజనజపరత్నం ముఖ్యవైకుంఠరత్నం |
నిరుపమగుణరత్నం నీరజాంతస్స్థరత్నం
పరమపదవిరత్నం పాతు మాం రామరత్నం || 112
సకలసుకృతరత్నం సత్యవాక్యార్థరత్నం
శమదమగుణరత్నం శాశ్వతానందరత్నం |
ప్రణయనిలయరత్నం ప్రస్ఫుటద్యోతిరత్నం
పరమపదవిరత్నం పాతు మాం రామరత్నం || 113
నిగమశిఖరరత్నం నిత్యమాశాస్యరత్నం
జననుతనృపరత్నం జానకీరూపరత్నం |
భువనవలయరత్నం భూభుజామేకరత్నం
రఘుకులవరరత్నం పాతు మాం రామరత్నం || 114
విశాలనేత్రం పరిపూర్ణగాత్రం
సీతాకలత్రం సురవైరిజైత్రం |
కారుణ్యపాత్రం జగతః పవిత్రం
శ్రీరామరత్నం ప్రణతోఽస్మి నిత్యం || 115
హే గోపాలక హే దయాజలనిధే హే సద్గుణాంభోనిధే
హే దైత్యాంతక హే విభీషణదయాపరీణ హే భూపతే |
హే వైదేహసుతామనోజవిహృతే హే కోటిమారాకృతే
హే నవ్యాంబుజనేత్ర పాలయ పరం జానామి న త్వాం వినా || 116
యస్య కించిదపి నో హరణీయం
కర్మ కించిదపి నో చరణీయం |
రామనామ చ సదా స్మరణీయం
లీలయా భవజలం తరణీయం || 117
దశరథసుతమీశం దండకారణ్యవాసం
శతమఖమణినీలం జానకీప్రాణలోలం |
సకలభువనమోహం సన్నుతాంభోదదేహం
బహుళనుతసముద్రం భావయే రామభద్రం || 118
విశాలనేత్రం పరిపూర్ణగాత్రం
సీతాకళత్రం సురవైరిజైత్రం |
జగత్పవిత్రం పరమాత్మతంత్రం
శ్రీరామచంద్రం ప్రణమామి చిత్తే || 119
జయ జయ రఘురామ శ్రీముఖాంభోజభానో
జయ జయ రఘువీర శ్రీమదంభోజనేత్ర |
జయ జయ రఘునాథ శ్రీకరాభ్యర్చితాంఘ్రి
జయ జయ రఘువర్య శ్రీశ కారుణ్యసింధో || 120
మందారమూలే మణిపీఠసంస్థం
సుధాప్లుతం దివ్యవిరాట్స్వరూపం |
సబిందునాదాంతకలాంతతుర్య-
మూర్తిం భజేఽహం రఘువంశరత్నం || 121
నాదం నాదవినీలచిత్తపవనం నాదాంతత్త్వప్రియం
నామాకారవివర్జితం నవఘనశ్యామాంగనాదప్రియం |
నాదాంభోజమరందమత్తవిలసద్భృంగం మదాంతస్స్థితం
నాదాంతధృవమండలాబ్జరుచిరం రామం భజే తారకం || 122
నానాభూతహృదబ్జపద్మనిలయం నామోజ్జ్వలాభూషణం |
నామస్తోత్రపవిత్రితత్రిభువనం నారాయణాష్టాక్షరం |
నాదాంతేందుగళత్సుధాప్లుతతనుం నానాత్మచిన్మాత్రకం |
నానాకోటియుగాంతభానుసదృశం రామం భజే తారకం || 123
వేద్యం వేదగురుం విరించిజనకం వేదాంతమూర్తిం స్ఫుర-
ద్వేదం వేదకలాపమూలమహిమాధారాంతకందాంకురం |
వేదశృంగసమానశేషశయనం వేదాంతవేద్యాత్మకం
వేదారాధితపాదపంకజమహం రామం భజే తారకం || 124
మజ్జీవం మదనుగ్రహం మదధిపం మద్భావనం మత్సుఖం
మత్తాతం మమ సద్గురుం మమ వరం మోహాంధవిచ్ఛేదనం |
మత్పుణ్యం మదనేకబాంధవజనం మజ్జీవనం మన్నిధిం
మత్సిద్ధిం మమ సర్వకర్మసుకృతం రామం భజే తారకం || 125
నిత్యం నీరజలోచనం నిరుపమం నీవారశూకోపమం
నిర్భేదానుభవం నిరంతరగుణం నీలాంగరాగోజ్జ్వలం |
నిష్పాపం నిగమాగమార్చితపదం నిత్యాత్మకం నిర్మలం
నిష్పుణ్యం నిఖిలం నిరంజనపదం రామం భజే తారకం || 126
ధ్యాయే త్వాం హృదయాంబుజే రఘుపతిం విజ్ఞానదీపాంకురం
హంసోహంసపరంపరాదిమహిమాధారం జగన్మోహనం |
హస్తాంభోజగదాబ్జచక్రమతులం పీతాంబరం కౌస్తుభం
శ్రీవత్సం పురుషోత్తమం మణినిభం రామం భజే తారకం || 127
సత్యజ్ఞానమనంతమచ్యుతమజం చావ్యాకృతం తత్పరం
కూటస్థాదిసమస్తసాక్షిమనఘం సాక్షాద్విరాట్తత్త్వదం |
వేద్యం విశ్వమయం స్వలీనభువనస్వారాజ్యసౌఖ్యప్రదం
పూర్ణం పూర్ణతరం పురాణపురుషం రామం భజే తారకం || 128
రామం రాక్షసవంశనాశనకరం రాకేందుబింబాననం
రక్షోరిం రఘువంశవర్ధనకరం రక్తాధరం రాఘవం |
రాధాయాత్మనివాసినం రవినిభం రంయం రమానాయకం
రంధ్రాంతర్గతశేషశాయినమహం రామం భజే తారకం || 129
ఓతప్రోతసమస్తవస్తునిచయం ఓంకారబీజాక్షరం
ఓంకారప్రకృతిం షడక్షరహితం ఓంకారకందాంకురం |
ఓంకారస్ఫుటభూర్భువస్సుపరితం ఓఘత్రయారాధితం
ఓంకారోజ్జ్వలసింహపీఠనిలయం రామం భజే తారకం || 130
సాకేతే నగరే సమస్తసుఖదే హర్ంయేఽబ్జకోటిద్యుతే
నక్షత్రగ్రహపంక్తిలగ్నశిఖరే చాంతర్యపంకేరుహే |
వాల్మీకాత్రిపరాశరాదిమునిభిస్సంసేవ్యమానం స్థితం
సీతాలంకృతవామభాగమనిశం రామం భజే తారకం || 131
వైకుంఠే నగరే సురద్రుమతలే చానందవప్రాంతరే
నానారత్నవినిర్మితస్ఫుటపటుప్రాకారసంవేష్టితే |
సౌధేందూపలశేషతల్పలలితే నీలోత్పలచ్ఛాదితే
పర్యంకే శయనం రమాదిసహితం రామం భజే తారకం || 132
వందే రామమనాదిపూరుషమజం వందే రమానాయకం
వందే హారికిరీటకుండలధరం వందే సునీలద్యుతిం |
వందే చాపకలంబకోజ్జ్వలకరం వందే జగన్మంగళం
వందే పంక్తిరథాత్మజం మమ గురుం వందే సదా రాఘవం || 133
వందే శౌనకగౌతమాద్యభినుతం వందే ఘనశ్యామలం
వందే తారకపీఠమధ్యనిలయం వందే జగన్నాయకం |
వందే భక్తజనౌఘదేవివటపం వందే ధనుర్వల్లభం
వందే తత్త్వమసీతివాక్యజనకం వందే సదా రాఘవం || 134
వందే సూర్యశశాంకలోచనయుగం వందే జగత్పావనం
వందే పత్రసహస్రపద్మనిలయం వందే పురారిప్రియం |
వందే రాక్షసవంశనాశనకరం వందే సుధాశీతలం
వందే దేవకపీంద్రకోటివినుతం వందే సదా రాఘవం || 135
వందే సాగరగర్వభంగవిశిఖం వందే జగజ్జీవనం
వందే కౌశికయాగరక్షణకరం వందే గురుణాం గురుం |
వందే బాణశరాసనోజ్జ్వలకరం వందే జటావల్కలం
వందే లక్ష్మణభూమిజాన్వితమహం వందే సదా రాఘవం || 136
వందే పాండరపుండరీకనయనం వందేఽబ్జబింబాననం
వందే కంబుగళం కరాబ్జయుగళం వందే లలాటోజ్జ్వలం |
వందే పీతదుకూలమంబుదనిభం వందే జగన్మోహనం
వందే కారణమానుషోజ్జ్వలతనుం వందే సదా రాఘవం || 137
వందే నీలసరోజకోమలరుచిం వందే జగద్వందితం
వందే సూర్యకులాబ్ధికౌస్తుభమణిం వందే సురారాధితం |
వందే పాతకపంచకప్రహరణం వందే జగత్కారణం
వందే వింశతిపంచతత్త్వరహితం వందే సదా రాఘవం || 138
వందే సాధకవర్గకల్పకతరుం వందే త్రిమూర్త్యాత్మకం
వందే నాదలయాంతరస్థలగతం వందే త్రివర్గాత్మకం |
వందే రాగవిహీనచిత్తసులభం వందే సభానాయకం
వందే పూర్ణదయామృతార్ణవమహం వందే సదా రాఘవం || 139
వందే సాత్త్వికతత్త్వముద్రితతనుం వందే సుధాదాయకం
వందే చారుచతుర్భుజం మణినిభం వందే షడబ్జస్థితం |
వందే బ్రహ్మపిపీలికాదినిలయం వందే విరాట్విగ్రహం
వందే పన్నగతల్పశాయినమహం వందే సదా రాఘవం || 140
సింహాసనస్థం మునిసిద్ధసేవ్యం
రక్తోత్పలాలంకృతపాదపద్మం |
సీతాసమేతం శశిసూర్యనేత్రం
రామం భజే రాఘవరామచంద్రం || 141
శ్రీరామభద్రాశ్రితసద్గురూణాం
పాదారవిందం భజతాం నరాణాం |
ఆరోగ్యమైశ్వర్యమనంతకీర్తి-
రంతే చ విష్ణోః పదమస్తి సత్యం || 142
దశరథవరపుత్రం జానకీసత్కళత్రం
దశముఖహరదక్షం పద్మపత్రాయతాక్షం |
కరధృతశరచాపం చారుముక్తాకలాపం
రఘుకులనృవరేణ్యం రామమీడే శరణ్యం || 143
దశముఖగజసింహం దైత్యగర్వాతిరంహం
కదనభయదహస్తం తారకబ్రహ్మ శస్తం |
మణిఖచితకిరీటం మంజులాలాపవాటం
దశరథకులచంద్రం రామచంద్రం భజేఽహం || 144
రామం రక్తసరోరుహాక్షమమలం లంకాధినాథాంతకం
కౌసల్యానయనోత్సుకం రఘువరం నాగేంద్రతల్పస్థితం |
వైదేహీకుచకుంభకుంకుమరజోలంకారహారం హరిం
మాయామానుషవిగ్రహం రఘుపతిం సీతాసమేతం భజే || 145
రామం రాక్షసమర్దనం రఘువరం దైతేయభిధ్వంసినం
సుగ్రీవేప్సితరాజ్యదం సురపతేర్భీత్యంతకం శార్‍ఙ్గిణం |
భక్తానామభయప్రదం భయహరం పాపౌఘవిధ్వంసినం
సామీరిస్తుతపాదపద్మయుగళం సీతాసమేతం భజే || 146
యత్పాదాంబుజరేణునా మునిసతీ ముక్తింగతా యన్మహః
పుణ్యం పాతకనాశనం త్రిజగతాం భాతి స్మృతం పావనం |
స్మృత్వా రాఘవమప్రమేయమమలం పూర్ణేందుమందస్మితం
తం రామం సరసీరుహాక్షమమలం సీతాసమేతం భజే || 147
వైదేహీకుచమండలాగ్ర-విలసన్మాణిక్యహస్తాంబుజం
చంచత్కంకణహారనూపుర-లసత్కేయూరహారాన్వితం |
దివ్యశ్రీమణికుండలోజ్జ్వల-మహాభూషాసహస్రాన్వితం
వీరశ్రీరఘుపుంగవం గుణనిధిం సీతాసమేతం భజే || 148
వైదేహీకుచమండలోపరి-లసన్మాణిక్యహారావళీ-
మధ్యస్థం నవనీతకోమలరుచిం నీలోత్పలశ్యామలం |
కందర్పాయుతకోటిసుందరతనుం పూర్ణేందుబింబాననం
కౌసల్యాకులభూషణం రఘుపతిం సీతాసమేతం భజే || 149
దివ్యారణ్యయతీంద్రనామనగరే మధ్యే మహామంటపే
స్వర్ణస్తంభసహస్రషోడశయుతే మందారమూలాశ్రితే |
నానారత్నవిచిత్రనిర్మలమహాసింహాసనే సంస్థితం
సీతాలక్ష్మణసేవితం రఘుపతిం సీతాసమేతం భజే || 150
కస్తూరీతిలకం కపీంద్రహరణం కారుణ్యవారాంనిధిం
క్షీరాంభోధిసుతాముఖాబ్జమధుపం కల్యాణసంపన్నిధిం |
కౌసల్యానయనోత్సుకం కపివరత్రాణం మహాపౌరుషం
కౌమారప్రియమర్కకోటిసదృశం సీతాసమేతం భజే || 151
విద్యుత్కోటిదివాకరద్యుతినిభం శ్రీకౌస్తుభాలంకృతం
యోగీంద్రైస్సనకాదిభిః పరివృతం కైలాసనాథప్రియం |
ముక్తారత్నకిరీటకుండలధరం గ్రైవేయహారాన్వితం
వైదేహీకుచసన్నివాసమనిశం సీతాసమేతం భజే || 152
మేఘశ్యామలమంబుజాతనయనం విస్తీర్ణవక్షస్స్థలం
బాహుద్వంద్వవిరాజితం సువదనం శోణాంఘ్రిపంకేరుహం |
నానారత్నవిచిత్రభూషణయుతం కోదండబాణాంకితం
త్రైలోక్యాఽప్రతిమానసుందరతనుం సీతాసమేతం భజే || 153
వైదేహీయుతవామభాగమతులం వందారుమందారకం
వందే ప్రస్తుతకీర్తివాసితతరుచ్ఛాయానుకారిప్రభం |
వైదేహీకుచకుంకుమాంకితమహోరస్కం మహాభూషణం
వేదాన్తైరుపగీయమానమసకృత్సీతాసమేతం భజే || 154
దేవానాం హితకారణేన భువనే ధృత్వాఽవతారం ధ్రువం
రామం కౌశికయజ్ఞవిఘ్నదలనం తత్తాటకాసంహరం |
నిత్యం గౌతమపత్నిశాపదలనశ్రీపాదరేణుం శుభం
శంభోరుత్కటచాపఖండనమహాసత్వం భజే రాఘవం || 155
శ్రీరామం నవరత్నకుండలధరం శ్రీరామరక్షామణిం
శ్రీరామం చ సహస్రభానుసదృశం శ్రీరామచంద్రోదయం |
శ్రీరామం శ్రుతకీర్తిమాకరమహం శ్రీరామముక్తిప్రదం
శ్రీరామం రఘునందనం భయహరం శ్రీరామచంద్రం భజే || 156
రామమిందీవరశ్యామం రాజీవాయతలోచనం |
జ్యాఘోషనిర్జితారాతిం జానకీరమణం భజే || 157
దీర్ఘబాహుమరవిందలోచనం
దీనవత్సలమనాథరక్షకం |
దీక్షితం సకలలోకరక్షణే
దైవతం దశరథాత్మజం భజే || 158
ప్రాతస్స్మరామి రఘునాథముఖారవిందం
మందస్మితం మధురభాషి విశాలఫాలం |
కర్ణావలంబిచలకుండలగండభాగం
కర్ణాన్తదీర్ఘనయనం నయనాభిరామం || 159
ప్రాతర్భజామి రఘునాథకరారవిందం
రక్షోగణాయ భయదం వరదం నిజేభ్యః |
యద్రాజసంసది విభిద్య మహేశచాపం
సీతాకరగ్రహణమంగళమాప సద్యః || 160
ప్రాతర్నమామి రఘునాథపదారవిందం
పద్మాంకుశాదిశుభరేఖశుభావహం చ |
యోగీంద్రమానసమధువ్రతసేవ్యమానం
శాపాపహం సపది గౌతమధర్మపత్న్యాః || 161
ప్రాతర్వదామి వచసా రఘునాథనామ
వాగ్దోషహారి సకలం కలుషం నిహన్తృ |
యత్పార్వతీ స్వపతినా సహ భోక్తుకామా
ప్రీత్యా సహస్రహరినామసమం జజాప || 162
ప్రాతః శ్రయే శ్రుతినుతం రఘునాథమూర్తిం
నీలాంబుదోత్పలసితేతరరత్ననీలాం |
ఆముక్తమౌక్తికవిశేషవిభూషణాఢ్యాం
ధ్యేయాం సమస్తమునిభిర్నిజభృత్యముఖ్యైః || 163
రఘుకులవరనాథో జానకీప్రాణనాథః
పితృవచనవిధాతా కీశరాజ్యప్రదాతా |
ప్రతినిశిచరనాశః ప్రాప్తరాజ్యప్రవేశో
విహితభువనరక్షః పాతు పద్మాయతాక్షః || 164
కువలయదళనీలః పీతవాసాః స్మితాస్యో
వివిధరుచిరభూషాభూషితో దివ్యమూర్తిః |
దశరథకులనాథో జానకీప్రాణనాథో
నివసతు మమ చిత్తే సర్వదా రామచంద్రః || 165
జయతు జయతు రామో జానకీవల్లభోఽయం
జయతు జయతు రామశ్చంద్రచూడార్చితాంఘ్రిః |
జయతు జయతు వాణీనాథనాథః పరాత్మా
జయతు జయతు రామోఽనాథనాథః కృపాళుః || 166
వదతు వదతు వాణీ రామరామేతి నిత్యం
జయతు జయతు చిత్తం రామపాదారవిందం |
నమతు నమతు దేహం సంతతం రామచంద్రం
న భవతు మమ పాపం జన్మజన్మాంతరేషు || 167
ఆనందరూపం వరదం ప్రసన్నం
సింహేక్షణం సేవకపారిజాతం |
నీలోత్పలాంగం భువనైకమిత్రం
రామం భజే రాఘవరామచంద్రం || 168
లంకావిరామం రణరంగభీమం
రాజీవనేత్రం రఘువంశమిత్రం |
కారుణ్యమూర్తిం కరుణాప్రపూర్తిం
శ్రీరామచంద్రం శరణం ప్రపద్యే || 169
సుగ్రీవమిత్రం పరమం పవిత్రం
సీతాకళత్రం నవహేమసూత్రం |
కారుణ్యపాత్రం శతపత్రనేత్రం
శ్రీరామచంద్రం శిరసా నమామి || 170
శ్రీరాఘవేతి రమణేతి రఘూద్వహేతి
రామేతి రావణహరేతి రమాధవేతి |
సాకేతనాథసుముఖేతి చ సువ్రతేతి
వాణీ సదా వదతు రామ హరే హరేతి || 171
శ్రీరామనామామృతమంత్రబీజం
సంజీవనం చేన్మనసి ప్రతిష్ఠం |
హాలాహలం వా ప్రళయానలం వా
మృత్యోర్ముఖం వా వితథీకరోతి || 172
కిం యోగశాస్త్రైః కిమశేషవిద్యా
కిం యాగగంగాదివిశేషతీర్థైః |
కిం బ్రహ్మచర్యాశ్రమసంచరేణ
భక్తిర్నచేత్తే రఘువంశకీర్త్యాం || 173
ఇదం శరీరం శ్లథసంధిజర్ఝరం
పతత్యవశ్యం పరిణామపేశలం |
కిమౌషథం పృచ్ఛసి మూఢ దుర్మతే
నిరామయం రామకథామృతం పిబ || 174
హే రామభద్రాశ్రయ హే కృపాళో
హే భక్తలోకైకశరణ్యమూర్తే |
పునీహి మాం త్వచ్చరణారవిందం
జగత్పవిత్రం శరణం మమాఽస్తు || 175
నీలాభ్రదేహ నిఖిలేశ జగన్నివాస
రాజీవనేత్ర రమణీయగుణాభిరామ |
శ్రీదామ దైత్యకులమర్దన రామచంద్ర
త్వత్పాదపద్మమనిశం కలయామి చిత్తే || 176
శ్రీరామచంద్ర కరుణాకర దీనబంధో
సీతాసమేత భరతాగ్రజ రాఘవేశ |
పాపార్తిభంజన భయాతురదీనబంధో
పాపాంబుధౌ పతితముద్ధర మామనాథం || 177
ఇందీవరదళశ్యామ-మిందుకోటినిభాననం |
కందర్పకోటిలావణ్యం వందేఽహం రఘునందనం || 175
ఇతి శ్రీబోధేంద్రసరస్వతీ కృత శ్రీరామకర్ణామృతం ||

శ్రీ రామ ఆపదుద్ధారక స్తోత్రం

ఆపదామపహర్తారం దాతారం సర్వసంపదాం |
లోకాభిరామం శ్రీరామం భూయో భూయో నమాంయహం ||
నమః కోదండహస్తాయ సంధీకృతశరాయ చ |
దండితాఖిలదైత్యాయ రామాయాపన్నివారిణే || 1 ||
ఆపన్నజనరక్షైకదీక్షాయామితతేజసే |
నమోఽస్తు విష్ణవే తుభ్యం రామాయాపన్నివారిణే || 2 ||
పదాంభోజరజస్స్పర్శపవిత్రమునియోషితే |
నమోఽస్తు సీతాపతయే రామాయాపన్నివారిణే || 3 ||
దానవేంద్రమహామత్తగజపంచాస్యరూపిణే |
నమోఽస్తు రఘునాథాయ రామాయాపన్నివారిణే || 4 ||
మహిజాకుచసంలగ్నకుంకుమారుణవక్షసే |
నమః కల్యాణరూపాయ రామాయాపన్నివారిణే || 5 ||
పద్మసంభవ భూతేశ మునిసంస్తుతకీర్తయే |
నమో మార్తాండవంశ్యాయ రామాయాపన్నివారిణే || 6 ||
హరత్యార్తిం చ లోకానాం యో వా మధునిషూదనః |
నమోఽస్తు హరయే తుభ్యం రామాయాపన్నివారిణే || 7 ||
తాపకారణసంసారగజసింహస్వరూపిణే |
నమో వేదాంతవేద్యాయ రామాయాపన్నివారిణే || 8 ||
రంగత్తరంగజలధిగర్వహృచ్ఛరధారిణే |
నమః ప్రతాపరూపాయ రామాయాపన్నివారిణే || 9 ||
దారోపహితచంద్రావతంసధ్యాతస్వమూర్తయే |
నమః సత్యస్వరూపాయ రామాయాపన్నివారిణే || 10 ||
తారానాయకసంకాశవదనాయ మహౌజసే |
నమోఽస్తు తాటకాహంత్రే రామాయాపన్నివారిణే || 11 ||
రంయసానులసచ్చిత్రకూటాశ్రమవిహారిణే |
నమః సౌమిత్రిసేవ్యాయ రామాయాపన్నివారిణే || 12 ||
సర్వదేవహితాసక్త దశాననవినాశినే |
నమోఽస్తు దుఃఖధ్వంసాయ రామాయాపన్నివారిణే || 13 ||
రత్నసానునివాసైక వంద్యపాదాంబుజాయ చ |
నమస్త్రైలోక్యనాథాయ రామాయాపన్నివారిణే || 14 ||
సంసారబంధమోక్షైకహేతుధామప్రకాశినే |
నమః కలుషసంహర్త్రే రామాయాపన్నివారిణే || 15 ||
పవనాశుగ సంక్షిప్త మారీచాది సురారయే |
నమో మఖపరిత్రాత్రే రామాయాపన్నివారిణే || 16 ||
దాంభికేతరభక్తౌఘమహదానందదాయినే |
నమః కమలనేత్రాయ రామాయాపన్నివారిణే || 17 ||
లోకత్రయోద్వేగకర కుంభకర్ణశిరశ్ఛిదే |
నమో నీరదదేహాయ రామాయాపన్నివారిణే || 18 ||
కాకాసురైకనయనహరల్లీలాస్త్రధారిణే |
నమో భక్తైకవేద్యాయ రామాయాపన్నివారిణే || 19 ||
భిక్షురూపసమాక్రాంత బలిసర్వైకసంపదే |
నమో వామనరూపాయ రామాయాపన్నివారిణే || 20 ||
రాజీవనేత్రసుస్పంద రుచిరాంగసురోచిషే |
నమః కైవల్యనిధయే రామాయాపన్నివారిణే || 21 ||
మందమారుతసంవీత మందారద్రుమవాసినే |
నమః పల్లవపాదాయ రామాయాపన్నివారిణే || 22 ||
శ్రీకంఠచాపదళనధురీణబలబాహవే |
నమః సీతానుషక్తాయ రామాయాపన్నివారిణే || 23 ||
రాజరాజసుహృద్యోషార్చిత మంగళమూర్తయే |
నమ ఇక్ష్వాకువంశ్యాయ రామాయాపన్నివారిణే || 24 ||
మంజులాదర్శవిప్రేక్షణోత్సుకైకవిలాసినే |
నమః పాలితభక్తాయ రామాయాపన్నివారిణే || 25 ||
భూరిభూధర కోదండమూర్తి ధ్యేయస్వరూపిణే |
నమోఽస్తు తేజోనిధయే రామాయాపన్నివారిణే || 26 ||
యోగీంద్రహృత్సరోజాతమధుపాయ మహాత్మనే |
నమో రాజాధిరాజాయ రామాయాపన్నివారిణే || 27 ||
భూవరాహస్వరూపాయ నమో భూరిప్రదాయినే |
నమో హిరణ్యగర్భాయ రామాయాపన్నివారిణే || 28 ||
యోషాంజలివినిర్ముక్త లాజాంచితవపుష్మతే |
నమః సౌందర్యనిధయే రామాయాపన్నివారిణే || 29 ||
నఖకోటివినిర్భిన్నదైత్యాధిపతివక్షసే |
నమో నృసింహరూపాయ రామాయాపన్నివారిణే || 30 ||
మాయామానుషదేహాయ వేదోద్ధరణహేతవే |
నమోఽస్తు మత్స్యరూపాయ రామాయాపన్నివారిణే || 31 ||
మితిశూన్య మహాదివ్యమహింనే మానితాత్మనే |
నమో బ్రహ్మస్వరూపాయ రామాయాపన్నివారిణే || 32 ||
అహంకారేతరజన స్వాంతసౌధవిహారిణే |
నమోఽస్తు చిత్స్వరూపాయ రామాయాపన్నివారిణే || 33 ||
సీతాలక్ష్మణసంశోభిపార్శ్వాయ పరమాత్మనే |
నమః పట్టాభిషిక్తాయ రామాయాపన్నివారిణే || 34 ||
అగ్రతః పృష్ఠతశ్చైవ పార్శ్వతశ్చ మహాబలౌ |
ఆకర్ణపూర్ణధన్వానౌ రక్షేతాం రామలక్ష్మణౌ || 35 ||
సన్నద్ధః కవచీ ఖడ్గీ చాపబాణధరో యువా |
తిష్ఠన్మమాగ్రతో నిత్యం రామః పాతు సలక్ష్మణః || 36 ||
ఆపదామపహర్తారం దాతారం సర్వసంపదాం |
లోకాభిరామం శ్రీరామం భూయో భూయో నమాంయహం ||
ఫలశ్రుతి |
ఇమం స్తవం భగవతః పఠేద్యః ప్రీతమానసః |
ప్రభాతే వా ప్రదోషే వా రామస్య పరమాత్మనః || 1 ||
స తు తీర్త్వా భవాంబోధిమాపదస్సకలానపి |
రామసాయుజ్యమాప్నోతి దేవదేవప్రసాదతః || 2 ||
కారాగృహాదిబాధాసు సంప్రాప్తే బహుసంకటే |
ఆపన్నివారకస్తోత్రం పఠేద్యస్తు యథావిధిః || 3 ||
సంయోజ్యానుష్టుభం మంత్రమనుశ్లోకం స్మరన్విభుం |
సప్తాహాత్సర్వబాధాభ్యో ముచ్యతే నాత్ర సంశయః || 4 ||
ద్వాత్రింశద్వారజపతః ప్రత్యహం తు దృఢవ్రతః |
వైశాఖే భానుమాలోక్య ప్రత్యహం శతసంఖ్యయా || 5 ||
ధనవాన్ ధనదప్రఖ్యస్స భవేన్నాత్ర సంశయః |
బహునాత్ర కిముక్తేన యం యం కామయతే నరః || 6 ||
తం తం కామమవాప్నోతి స్తోత్రేణానేన మానవః |
యంత్రపూజావిధానేన జపహోమాదితర్పణైః || 7 ||
యస్తు కుర్వీత సహసా సర్వాన్కామానవాప్నుయాత్ |
ఇహ లోకే సుఖీ భూత్వా పరే ముక్తో భవిష్యతి || 8 ||

సంక్షేప రామాయణం

పఃస్వాధ్యాయనిరతం తపస్వీ వాగ్విదాం వరం |
నారదం పరిపప్రచ్ఛ వాల్మీకిర్మునిపుంగవం || 1 ||
కోఽన్వస్మిన్సాంప్రతం లోకే గుణవాన్ కశ్చ వీర్యవాన్ |
ధర్మజ్ఞశ్చ కృతజ్ఞశ్చ సత్యవాక్యో దృఢవ్రతః || 2 ||
చారిత్రేణ చ కో యుక్తః సర్వభూతేషు కో హితః |
విద్వాన్ కః కః సమర్థశ్చ కశ్చైకప్రియదర్శనః || 3 ||
ఆత్మవాన్ కో జితక్రోధో ద్యుతిమాన్ కోఽనసూయకః |
కస్య బిభ్యతి దేవాశ్చ జాతరోషస్య సంయుగే || 4 ||
ఏతదిచ్ఛాంయహం శ్రోతుం పరం కౌతూహలం హి మే |
మహర్షే త్వం సమర్థోఽసి జ్ఞాతుమేవంవిధం నరం || 5 ||
శ్రుత్వా చైతత్త్రిలోకజ్ఞో వాల్మీకేర్నారదో వచః |
శ్రూయతామితి చామంత్ర్య ప్రహృష్టో వాక్యమబ్రవీత్ || 6 ||
బహవో దుర్లభాశ్చైవ యే త్వయా కీర్తితా గుణాః |
మునే వక్ష్యాంయహం బుద్ధ్వా తైర్యుక్తః శ్రూయతాం నరః || 7 || [బుద్ధ్యా] ఇక్ష్వాకువంశప్రభవో రామో నామ జనైః శ్రుతః |
నియతాత్మా మహావీర్యో ద్యుతిమాన్ధృతిమాన్వశీ || 8 ||
బుద్ధిమాన్నీతిమాన్వాగ్మీ శ్రీమాన్ శత్రునిబర్హణః |
విపులాంసో మహాబాహుః కంబుగ్రీవో మహాహనుః || 9 ||
మహోరస్కో మహేష్వాసో గూఢజత్రురరిందమః |
ఆజానుబాహుః సుశిరాః సులలాటః సువిక్రమః || 10 ||
సమః సమవిభక్తాంగః స్నిగ్ధవర్ణః ప్రతాపవాన్ |
పీనవక్షా విశాలాక్షో లక్ష్మీవాన్ శుభలక్షణః || 11 ||
ధర్మజ్ఞః సత్యసంధశ్చ ప్రజానాం చ హితే రతః |
యశస్వీ జ్ఞానసంపన్నః శుచిర్వశ్యః సమాధిమాన్ || 12 ||
ప్రజాపతిసమః శ్రీమాన్ ధాతా రిపునిషూదనః |
రక్షితా జీవలోకస్య ధర్మస్య పరిరక్షితా || 13 ||
రక్షితా స్వస్య ధర్మస్య స్వజనస్య చ రక్షితా |
వేదవేదాంగతత్త్వజ్ఞో ధనుర్వేదే చ నిష్ఠితః || 14 ||
సర్వశాస్త్రార్థతత్త్వజ్ఞః స్మృతిమాన్ప్రతిభానవాన్ |
సర్వలోకప్రియః సాధురదీనాత్మా విచక్షణః || 15 ||
సర్వదాభిగతః సద్భిః సముద్ర ఇవ సింధుభిః |
ఆర్యః సర్వసమశ్చైవ సదైవ ప్రియదర్శనః || 16 ||
స చ సర్వగుణోపేతః కౌసల్యానందవర్ధనః |
సముద్ర ఇవ గాంభీర్యే ధైర్యేణ హిమవానివ || 17 ||
విష్ణునా సదృశో వీర్యే సోమవత్ప్రియదర్శనః |
కాలాగ్నిసదృశః క్రోధే క్షమయా పృథివీసమః || 18 ||
ధనదేన సమస్త్యాగే సత్యే ధర్మ ఇవాపరః |
తమేవం‍గుణసంపన్నం రామం సత్యపరాక్రమం || 19 ||
జ్యేష్ఠం శ్రేష్ఠగుణైర్యుక్తం ప్రియం దశరథః సుతం |
ప్రకృతీనాం హితైర్యుక్తం ప్రకృతిప్రియకాంయయా || 20 ||
యౌవరాజ్యేన సంయోక్తుమైచ్ఛత్ప్రీత్యా మహీపతిః |
తస్యాభిషేకసంభారాన్దృష్ట్వా భార్యాఽథ కైకయీ || 21 ||
పూర్వం దత్తవరా దేవీ వరమేనమయాచత |
వివాసనం చ రామస్య భరతస్యాభిషేచనం || 22 ||
స సత్యవచనాద్రాజా ధర్మపాశేన సంయతః | [చైవ] వివాసయామాస సుతం రామం దశరథః ప్రియం || 23 ||
స జగామ వనం వీరః ప్రతిజ్ఞామనుపాలయన్ |
పితుర్వచననిర్దేశాత్కైకేయ్యాః ప్రియకారణాత్ || 24 ||
తం వ్రజంతం ప్రియో భ్రాతా లక్ష్మణోఽనుజగామ హ |
స్నేహాద్వినయసంపన్నః సుమిత్రానందవర్ధనః || 25 ||
భ్రాతరం దయితో భ్రాతుః సౌభ్రాత్రమనుదర్శయన్ |
రామస్య దయితా భార్యా నిత్యం ప్రాణసమా హితా || 26 ||
జనకస్య కులే జాతా దేవమాయేవ నిర్మితా |
సర్వలక్షణసంపన్నా నారీణాముత్తమా వధూః || 27 ||
సీతాప్యనుగతా రామం శశినం రోహిణీ యథా |
పౌరైరనుగతో దూరం పిత్రా దశరథేన చ || 28 ||
శృంగిబేరపురే సూతం గంగాకూలే వ్యసర్జయత్ |
గుహమాసాద్య ధర్మాత్మా నిషాదాధిపతిం ప్రియం || 29 ||
గుహేన సహితో రామో లక్ష్మణేన చ సీతయా |
తే వనేన వనం గత్వా నదీస్తీర్త్వా బహూదకాః || 30 ||
చిత్రకూటమనుప్రాప్య భరద్వాజస్య శాసనాత్ |
రంయమావసథం కృత్వా రమమాణా వనే త్రయః || 31 ||
దేవగంధర్వసంకాశాస్తత్ర తే న్యవసన్సుఖం |
చిత్రకూటం గతే రామే పుత్రశోకాతురస్తథా || 32 ||
రాజా దశరథః స్వర్గం జగామ విలపన్సుతం |
మృతే తు తస్మిన్భరతో వసిష్ఠప్రముఖైర్ద్విజైః || 33 ||
నియుజ్యమానో రాజ్యాయ నైచ్ఛద్రాజ్యం మహాబలః |
స జగామ వనం వీరో రామపాదప్రసాదకః || 34 ||
గత్వా తు సుమహాత్మానం రామం సత్యపరాక్రమం | [స మహా.] అయాచద్భ్రాతరం రామమార్యభావపురస్కృతః || 35 ||
త్వమేవ రాజా ధర్మజ్ఞ ఇతి రామం వచోఽబ్రవీత్ |
రామోఽపి పరమోదారః సుముఖః సుమహాయశాః || 36 ||
న చైచ్ఛత్పితురాదేశాద్రాజ్యం రామో మహాబలః |
పాదుకే చాస్య రాజ్యాయ న్యాసం దత్త్వా పునః పునః || 37 ||
నివర్తయామాస తతో భరతం భరతాగ్రజః |
స కామమనవాప్యైవ రామపాదావుపస్పృశన్ || 38 ||
నందిగ్రామేఽకరోద్రాజ్యం రామాగమనకాంక్షయా |
గతే తు భరతే శ్రీమాన్సత్యసంధో జితేంద్రియః || 39 ||
రామస్తు పునరాలక్ష్య నాగరస్య జనస్య చ |
తత్రాగమనమేకాగ్రో దండకాన్ప్రవివేశ హ || 40 ||
ప్రవిశ్య తు మహారణ్యం రామో రాజీవలోచనః |
విరాధం రాక్షసం హత్వా శరభంగం దదర్శ హ || 41 ||
సుతీక్ష్ణం చాప్యగస్త్యం చ అగస్త్యభ్రాతరం తథా |
అగస్త్యవచనాచ్చైవ జగ్రాహైంద్రం శరాసనం || 42 ||
ఖడ్గం చ పరమప్రీతస్తూణీ చాక్షయసాయకౌ |
వసతస్తస్య రామస్య వనే వనచరైః సహ || 43 ||
ఋషయోఽభ్యాగమన్సర్వే వధాయాసురరక్షసాం |
స తేషాం ప్రతిశుశ్రావ రాక్షసానాం తథా వనే || 44 ||
ప్రతిజ్ఞాతశ్చ రామేణ వధః సంయతి రక్షసాం |
ఋషీణామగ్నికల్పానాం దండకారణ్యవాసినాం || 45 ||
తేన తత్రైవ వసతా జనస్థాననివాసినీ |
విరూపితా శూర్పణఖా రాక్షసీ కామరూపిణీ || 46 ||
తతః శూర్పణఖావాక్యాదుద్యుక్తాన్సర్వరాక్షసాన్ |
ఖరం త్రిశిరసం చైవ దూషణం చైవ రాక్షసం || 47 ||
నిజఘాన రణే రామస్తేషాం చైవ పదానుగాన్ |
వనే తస్మిన్నివసతా జనస్థాననివాసినాం || 48 ||
రక్షసాం నిహతాన్యాసన్సహస్రాణి చతుర్దశ |
తతో జ్ఞాతివధం శ్రుత్వా రావణః క్రోధమూర్ఛితః || 49 ||
సహాయం వరయామాస మారీచం నామ రాక్షసం |
వార్యమాణః సుబహుశో మారీచేన స రావణః || 50 ||
న విరోధో బలవతా క్షమో రావణ తేన తే |
అనాదృత్య తు తద్వాక్యం రావణః కాలచోదితః || 51 ||
జగామ సహమారీచస్తస్యాశ్రమపదం తదా |
తేన మాయావినా దూరమపవాహ్య నృపాత్మజౌ || 52 ||
జహార భార్యాం రామస్య గృధ్రం హత్వా జటాయుషం |
గృధ్రం చ నిహతం దృష్ట్వా హృతాం శ్రుత్వా చ మైథిలీం || 53 ||
రాఘవః శోకసంతప్తో విలలాపాకులేంద్రియః |
తతస్తేనైవ శోకేన గృధ్రం దగ్ధ్వా జటాయుషం || 54 ||
మార్గమాణో వనే సీతాం రాక్షసం సందదర్శ హ |
కబంధం నామ రూపేణ వికృతం ఘోరదర్శనం || 55 ||
తం నిహత్య మహాబాహుర్దదాహ స్వర్గతశ్చ సః |
స చాఽఽస్య కథయామాస శబరీం ధర్మచారిణీం || 56 ||
శ్రమణీం ధర్మనిపుణామభిగచ్ఛేతి రాఘవం |
సోఽభ్యగచ్ఛన్మహాతేజాః శబరీం శత్రుసూదనః || 57 ||
శబర్యా పూజితః సంయగ్రామో దశరథాత్మజః |
పంపాతీరే హనుమతా సంగతో వానరేణ హ || 58 ||
హనుమద్వచనాచ్చైవ సుగ్రీవేణ సమాగతః |
సుగ్రీవాయ చ తత్సర్వం శంసద్రామో మహాబలః || 59 ||
ఆదితస్తద్యథావృత్తం సీతాయాశ్చ విశేషతః |
సుగ్రీవశ్చాపి తత్సర్వం శ్రుత్వా రామస్య వానరః || 60 ||
చకార సఖ్యం రామేణ ప్రీతశ్చైవాగ్నిసాక్షికం |
తతో వానరరాజేన వైరానుకథనం ప్రతి || 61 ||
రామాయావేదితం సర్వం ప్రణయాద్దుఃఖితేన చ |
ప్రతిజ్ఞాతం చ రామేణ తదా వాలివధం ప్రతి || 62 ||
వాలినశ్చ బలం తత్ర కథయామాస వానరః |
సుగ్రీవః శంకితశ్చాసీన్నిత్యం వీర్యేణ రాఘవే || 63 ||
రాఘవప్రత్యయార్థం తు దుందుభేః కాయముత్తమం |
దర్శయామాస సుగ్రీవో మహాపర్వత సన్నిభం || 64 ||
ఉత్స్మయిత్వా మహాబాహుః ప్రేక్ష్య చాస్థి మహాబలః |
పాదాంగుష్ఠేన చిక్షేప సంపూర్ణం దశయోజనం || 65 ||
బిభేద చ పునః సాలాన్సప్తైకేన మహేషుణా |
గిరిం రసాతలం చైవ జనయన్ప్రత్యయం తదా || 66 ||
తతః ప్రీతమనాస్తేన విశ్వస్తః స మహాకపిః |
కిష్కింధాం రామసహితో జగామ చ గుహాం తదా || 67 ||
తతోఽగర్జద్ధరివరః సుగ్రీవో హేమపింగళః |
తేన నాదేన మహతా నిర్జగామ హరీశ్వరః || 68 ||
అనుమాన్య తదా తారాం సుగ్రీవేణ సమాగతః |
నిజఘాన చ తత్రైనం శరేణైకేన రాఘవః || 69 ||
తతః సుగ్రీవవచనాద్ధత్వా వాలినమాహవే |
సుగ్రీవమేవ తద్రాజ్యే రాఘవః ప్రత్యపాదయత్ || 70 ||
స చ సర్వాన్సమానీయ వానరాన్వానరర్షభః |
దిశః ప్రస్థాపయామాస దిదృక్షుర్జనకాత్మజాం || 71 ||
తతో గృధ్రస్య వచనాత్సంపాతేర్హనుమాన్బలీ |
శతయోజనవిస్తీర్ణం పుప్లువే లవణార్ణవం || 72 ||
తత్ర లంకాం సమాసాద్య పురీం రావణపాలితాం |
దదర్శ సీతాం ధ్యాయంతీమశోకవనికాం గతాం || 73 ||
నివేదయిత్వాఽభిజ్ఞానం ప్రవృత్తిం చ నివేద్య చ |
సమాశ్వాస్య చ వైదేహీం మర్దయామాస తోరణం || 74 ||
పంచ సేనాగ్రగాన్హత్వా సప్త మంత్రిసుతానపి |
శూరమక్షం చ నిష్పిష్య గ్రహణం సముపాగమత్ || 75 ||
అస్త్రేణోన్ముక్తమాత్మానం జ్ఞాత్వా పైతామహాద్వరాత్ |
మర్షయన్రాక్షసాన్వీరో యంత్రిణస్తాన్యదృచ్ఛయా || 76 ||
తతో దగ్ధ్వా పురీం లంకామృతే సీతాం చ మైథిలీం |
రామాయ ప్రియమాఖ్యాతుం పునరాయాన్మహాకపిః || 77 ||
సోఽభిగంయ మహాత్మానం కృత్వా రామం ప్రదక్షిణం |
న్యవేదయదమేయాత్మా దృష్టా సీతేతి తత్త్వతః || 78 ||
తతః సుగ్రీవసహితో గత్వా తీరం మహోదధేః |
సముద్రం క్షోభయామాస శరైరాదిత్యసన్నిభైః || 79 ||
దర్శయామాస చాత్మానం సముద్రః సరితాం పతిః |
సముద్రవచనాచ్చైవ నలం సేతుమకారయత్ || 80 ||
తేన గత్వా పురీం లంకాం హత్వా రావణమాహవే |
రామః సీతామనుప్రాప్య పరాం వ్రీడాముపాగమత్ || 81 ||
తామువాచ తతో రామః పరుషం జనసంసది |
అమృష్యమాణా సా సీతా వివేశ జ్వలనం సతీ || 82 ||
తతోఽగ్నివచనాత్సీతాం జ్ఞాత్వా విగతకల్మషాం |
బభౌ రామః సంప్రహృష్టః పూజితః సర్వదైవతైః || 83 ||
కర్మణా తేన మహతా త్రైలోక్యం సచరాచరం |
సదేవర్షిగణం తుష్టం రాఘవస్య మహాత్మనః || 84 ||
అభిషిచ్య చ లంకాయాం రాక్షసేంద్రం విభీషణం |
కృతకృత్యస్తదా రామో విజ్వరః ప్రముమోద హ || 85 ||
దేవతాభ్యో వరం ప్రాప్య సముత్థాప్య చ వానరాన్ |
అయోధ్యాం ప్రస్థితో రామః పుష్పకేణ సుహృద్వృతః || 86 ||
భరద్వాజాశ్రమం గత్వా రామః సత్యపరాక్రమః |
భరతస్యాంతికం రామో హనూమంతం వ్యసర్జయత్ || 87 ||
పునరాఖ్యాయికాం జల్పన్సుగ్రీవసహితశ్చ సః |
పుష్పకం తత్సమారుహ్య నందిగ్రామం యయౌ తదా || 88 ||
నందిగ్రామే జటాం హిత్వా భ్రాతృభిః సహితోఽనఘః |
రామః సీతామనుప్రాప్య రాజ్యం పునరవాప్తవాన్ || 89 ||
ప్రహృష్టముదితో లోకస్తుష్టః పుష్టః సుధార్మికః | [ప్రహృష్టో] నిరామయో హ్యరోగశ్చ దుర్భిక్షభయవర్జితః || 90 ||
న పుత్రమరణం కించిద్ద్రక్ష్యంతి పురుషాః క్వచిత్ |
నార్యశ్చావిధవా నిత్యం భవిష్యంతి పతివ్రతాః || 91 ||
న చాగ్నిజం భయం కించిన్నాప్సు మజ్జంతి జంతవః |
న వాతజం భయం కించిన్నాపి జ్వరకృతం తథా || 92 ||
న చాపి క్షుద్భయం తత్ర న తస్కరభయం తథా |
నగరాణి చ రాష్ట్రాణి ధనధాన్యయుతాని చ || 93 ||
నిత్యం ప్రముదితాః సర్వే యథా కృతయుగే తథా |
అశ్వమేధశతైరిష్ట్వా తథా బహుసువర్ణకైః || 94 ||
గవాం కోట్యయుతం దత్వా విద్వద్భ్యో విధిపూర్వకం |
అసంఖ్యేయం ధనం దత్వా బ్రాహ్మణేభ్యో మహాయశాః || 95 ||
రాజవంశాన్ శతగుణాన్ స్థాపయిష్యతి రాఘవః |
చాతుర్వర్ణ్యం చ లోకేఽస్మిన్ స్వే స్వే ధర్మే నియోక్ష్యతి || 96 ||
దశవర్షసహస్రాణి దశవర్షశతాని చ |
రామో రాజ్యముపాసిత్వా బ్రహ్మలోకం ప్రయాస్యతి || 97 ||
ఇదం పవిత్రం పాపఘ్నం పుణ్యం వేదైశ్చ సంమితం |
యః పఠేద్రామచరితం సర్వపాపైః ప్రముచ్యతే || 98 ||
ఏతదాఖ్యానమాయుష్యం పఠన్రామాయణం నరః |
సపుత్రపౌత్రః సగణః ప్రేత్య స్వర్గే మహీయతే || 99 ||
పఠన్ ద్విజో వాగృషభత్వమీయా-
-త్స్యాత్ క్షత్రియో భూమిపతిత్వమీయాత్ |
వణిగ్జనః పణ్యఫలత్వమీయా-
-జ్జనశ్చ శూద్రోఽపి మహత్త్వమీయాత్ || 100 ||
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే (నారదవాక్యం నామ) ప్రథమః సర్గః || 1 |

శ్రీ సీతారామ కళ్యాణ సర్గః (బాలకాండం)

యస్మింస్తు దివసే రాజా చక్రే గోదానముత్తమం |
తస్మింస్తు దివసే వీరో యుధాజిత్సముపేయివాన్ || 1
పుత్రః కేకయరాజస్య సాక్షాద్భరతమాతులః |
దృష్ట్వా పృష్ట్వా చ కుశలం రాజానమిదమబ్రవీత్ || 2
కేకయాధిపతీ రాజా స్నేహాత్ కుశలమబ్రవీత్ |
యేషాం కుశలకామోఽసి తేషాం సంప్రత్యనామయం || 3
స్వస్రీయం మమ రాజేంద్ర ద్రష్టుకామో మహీపతిః |
తదర్థముపయాతోఽహమయోధ్యాం రఘునందన || 4
శ్రుత్వా త్వహమయోధ్యాయాం వివాహార్థం తవాత్మజాన్ |
మిథిలాముపయాతాంస్తు త్వయా సహ మహీపతే || 5
త్వరయాఽభ్యుపయాతోఽహం ద్రష్టుకామః స్వసుః సుతం |
అథ రాజా దశరథః ప్రియాతిథిముపస్థితం |
దృష్ట్వా పరమసత్కారైః పూజనార్హమపూజయత్ || 6
తతస్తాముషితో రాత్రిం సహ పుత్రైర్మహాత్మభిః |
ప్రభాతే పునరుత్థాయ కృత్వా కర్మాణి కర్మవిత్ |
ఋషీంస్తదా పురస్కృత్య యజ్ఞవాటముపాగమత్ || 7
యుక్తే ముహూర్తే విజయే సర్వాభరణభూషితైః |
భ్రాతృభిః సహితో రామః కృతకౌతుకమంగలః || 8
వసిష్ఠం పురతః కృత్వా మహర్షీనపరానపి |
పితుః సమీపమాశ్రిత్య తస్థౌ భ్రాతృభిరావృతః |
వసిష్ఠో భగవానేత్య వైదేహమిదమబ్రవీత్ || 9
రాజా దశరథో రాజన్ కృతకౌతుకమంగలైః |
పుత్రైర్నరవర శ్రేష్ఠ దాతారమభికాంక్షతే || 10
దాతృప్రతిగ్రహీతృభ్యాం సర్వార్థాః ప్రభవంతి హి |
స్వధర్మం ప్రతిపద్యస్వ కృత్వా వైవాహ్యముత్తమం || 11
ఇత్యుక్తః పరమోదారో వసిష్ఠేన మహాత్మనా |
ప్రత్యువాచ మహాతేజా వాక్యం పరమధర్మవిత్ || 12
కః స్థితః ప్రతిహారో మే కస్యాజ్ఞా సంప్రతీక్ష్యతే |
స్వగృహే కో విచారోఽస్తి యథా రాజ్యమిదం తవ || 13
కృతకౌతుకసర్వస్వా వేదిమూలముపాగతాః |
మమ కన్యా మునిశ్రేష్ఠ దీప్తా వహ్నేరివార్చిషః || 14
సజ్జోఽహం త్వత్ప్రతీక్షోఽస్మి వేద్యామస్యాం ప్రతిష్ఠితః |
అవిఘ్నం కురుతాం రాజా కిమర్థమవలంబతే || 15
తద్వాక్యం జనకేనోక్తం శ్రుత్వా దశరథస్తదా |
ప్రవేశయామాస సుతాన్ సర్వానృషిగణానపి || 16
తతో రాజా విదేహానాం వసిష్ఠమిదమబ్రవీత్ |
కారయస్వ ఋషే సర్వామృషిభిః సహ ధార్మిక |
రామస్య లోకరామస్య క్రియాం వైవాహికీం ప్రభో || 17
తథేత్యుక్త్వా తు జనకం వసిష్ఠో భగవానృషిః |
విశ్వామిత్రం పురస్కృత్య శతానందం చ ధార్మికం || 18
ప్రపామధ్యే తు విధివద్వేదిం కృత్వా మహాతపాః |
అలంచకార తాం వేదిం గంధపుష్పైః సమన్తతః || 19
సువర్ణపాలికాభిశ్చ ఛిద్రకుంభైశ్చ సాంకురైః |
అంకురాఢ్యైః శరావైశ్చ ధూపపాత్రైః సధూపకైః || 20
శంఖపాత్రైః స్రువైః స్రుగ్భిః పాత్రైరర్ఘ్యాభిపూరితైః |
లాజపూర్ణైశ్చ పాత్రీభిరక్షతైరభిసంస్కృతైః || 21
దర్భైః సమైః సమాస్తీర్య విధివన్మంత్రపూర్వకం |
అగ్నిమాధాయ వేద్యాం తు విధిమంత్రపురస్కృతం || 22
జుహావాగ్నౌ మహాతేజా వసిష్ఠో భగవానృషిః |
తతః సీతాం సమానీయ సర్వాభరణభూషితాం |
సమక్షమగ్నేః సంస్థాప్య రాఘవాభిముఖే తదా |
అబ్రవీజ్జనకో రాజా కౌసల్యానందవర్ధనం || 23
ఇయం సీతా మమ సుతా సహధర్మచరీ తవ |
ప్రతీచ్ఛ చైనాం భద్రం తే పాణిం గృహ్ణీష్వ పాణినా || 24
పతివ్రతా మహాభాగా ఛాయేవానుగతా సదా |
ఇత్యుక్త్వా ప్రాక్షిపద్రాజా మంత్రపూతం జలం తదా || 25
సాధుసాధ్వితి దేవానామృషీణాం వదతాం తదా |
దేవదుందుభినిర్ఘోషః పుష్పవర్షో మహానభూత్ || 26
ఏవం దత్వా తదా సీతాం మంత్రోదకపురస్కృతాం |
అబ్రవీజ్జనకో రాజా హర్షేణాభిపరిప్లుతః || 27
లక్ష్మణాగచ్ఛ భద్రం తే ఊర్మిలాముద్యతాం మయా |
ప్రతీచ్ఛ పాణిం గృహ్ణీష్వ మా భూత్కాలస్య పర్యయః || 28
తమేవముక్త్వా జనకో భరతం చాభ్యభాషత |
గృహాణ పాణిం మాండవ్యాః పాణినా రఘునందన || 29
శత్రుఘ్నం చాపి ధర్మాత్మా అబ్రవీజ్జనకేశ్వరః |
శ్రుతకీర్త్యా మహాబాహో పాణిం గృహ్ణీష్వ పాణినా || 30
సర్వే భవంతః సౌంయాశ్చ సర్వే సుచరితవ్రతాః |
పత్నీభిః సంతు కాకుత్స్థా మా భూత్కాలస్య పర్యయః || 31
జనకస్య వచః శ్రుత్వా పాణీన్పాణిభిరస్పృశన్ |
చత్వారస్తే చతసృణాం వసిష్ఠస్య మతే స్థితాః || 32
అగ్నిం ప్రదక్షిణీకృత్య వేదిం రాజానమేవ చ |
ఋషీంశ్చైవ మహాత్మానః సభార్యా రఘుసత్తమాః |
యథోక్తేన తథా చక్రుర్వివాహం విధిపూర్వకం || 33
[కాకుత్స్థైశ్చ గృహీతేషు లలితేషు చ పాణిషు|] పుష్పవృష్టిర్మహత్యాసీదంతరిక్షాత్సుభాస్వరా |
దివ్యదుందుభినిర్ఘోషైర్గీతవాదిత్రనిఃస్వనైః || 34
ననృతుశ్చాప్సరస్సంఘా గంధర్వాశ్చ జగుః కలం |
వివాహే రఘుముఖ్యానాం తదద్భుతమదృశ్యత || 35
ఈదృశే వర్తమానే తు తూర్యోద్ఘుష్టనినాదితే |
త్రిరగ్నిం తే పరిక్రంయ ఊహుర్భార్యా మహౌజసః || 36
అథోపకార్యాం జగ్ముస్తే సభార్యా రఘునందనాః |
రాజాఽప్యనుయయౌ పశ్యన్సర్షిసంఘః సబాంధవః || 37
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే త్రిసప్తతితమః సర్గః |

సప్తర్షి రామాయణం

కశ్యపః (బాలకాండం) –
జాతః శ్రీరఘునాయకో దశరథాన్మున్యాశ్రయాత్తాటకాం
హత్వా రక్షితకౌశికక్రతువరః కృత్వాప్యహల్యాం శుభాం |
భంక్త్వా రుద్రశరాసనం జనకజాం పాణౌ గృహీత్వా తతో
జిత్వార్ధాధ్వని భార్గవం పునరగాత్ సీతాసమేతః పురీం || 1 ||
అత్రిః (అయోధ్యాకాండం) –
దాస్యా మంథరయా దయారహితయా దుర్భేదితా కైకయీ
శ్రీరామప్రథమాభిషేకసమయే మాతాప్యయాచద్వరౌ |
భర్తారం భరతః ప్రశాస్తు ధరణీం రామో వనం గచ్ఛతా-
-దిత్యాకర్ణ్య స చోత్తరం న హి దదౌ దుఃఖేన మూర్ఛాం గతః || 2 ||
భరద్వాజః (ఆరణ్యకాండం) –
శ్రీరామః పితృశాసనాద్వనమగాత్ సౌమిత్రిసీతాన్వితో
గంగాం ప్రాప్య జటాం నిబధ్య సగుహః సచ్చిత్రకూటే వసన్ |
కృత్వా తత్ర పితృక్రియాం సభరతో దత్వాఽభయం దండకే
ప్రాప్యాగస్త్యమునీశ్వరం తదుదితం ధృత్వా ధనుశ్చాక్షయం || 3 ||
విశ్వామిత్రః (కిష్కింధకాండం) –
గత్వా పంచవటీమగస్త్యవచనాద్దత్వాఽభయం మౌనినాం
ఛిత్వా శూర్పణఖాస్యకర్ణయుగలం త్రాతుం సమస్తాన్ మునీన్ |
హత్వా తం చ ఖరం సువర్ణహరిణం భిత్వా తథా వాలినం
తారారత్నమవైరిరాజ్యమకరోత్సర్వం చ సుగ్రీవసాత్ || 4 ||
గౌతమః (సుందరకాండం) –
దూతో దాశరథేః సలీలముదధిం తీర్త్వా హనూమాన్ మహాన్
దృష్ట్వాఽశోకవనే స్థితాం జనకజాం దత్వాంగులేర్ముద్రికాం |
అక్షాదీనసురాన్నిహత్య మహతీం లంకాం చ దగ్ధ్వా పునః
శ్రీరామం చ సమేత్య దేవ జననీ దృష్టా మయేత్యబ్రవీత్ || 5 ||
జమదగ్నిః (యుద్ధకాండం) –
రామో బద్ధపయోనిధిః కపివరైర్వీరైర్నలాద్యైర్వృతో
లంకాం ప్రాప్య సకుంభకర్ణతనుజం హత్వా రణే రావణం |
తస్యాం న్యస్య విభీషణం పునరసౌ సీతాపతిః పుష్పకా-
-రూఢః సన్ పురమాగతః సభరతః సింహాసనస్థో బభౌ || 6 ||
వసిష్ఠః (ఉత్తరకాండం) –
శ్రీరామో హయమేధముఖ్యమఖకృత్ సంయక్ ప్రజాః పాలయన్
కృత్వా రాజ్యమథానుజైశ్చ సుచిరం భూరి స్వధర్మాన్వితౌ |
పుత్రౌ భ్రాతృసమన్వితౌ కుశలవౌ సంస్థాప్య భూమండలే
సోఽయోధ్యాపురవాసిభిశ్చ సరయూస్నాతః ప్రపేదే దివం || 7 ||
సర్వే ఋషయః –
శ్రీరామస్య కథాసుధాతిమధురాన్ శ్లోకానిమానుత్తమాన్
యే శృణ్వంతి పఠంతి చ ప్రతిదినం తేఽఘౌఘవిధ్వంసినః |
శ్రీమంతో బహుపుత్రపౌత్రసహితా భుక్త్వేహ భోగాంశ్చిరం
భోగాంతే తు సదార్చితం సురగణైర్విష్ణోర్లభంతే పదం || 8 ||

రామాయణ జయ మంత్రం

జయత్యతిబలో రామో లక్ష్మణశ్చ మహాబలః |
రాజా జయతి సుగ్రీవో రాఘవేణాభిపాలితః || 1 ||
దాసోఽహం కోసలేంద్రస్య రామస్యాక్లిష్టకర్మణః |
హనుమాన్ శత్రుసైన్యానాం నిహంతా మారుతాత్మజః || 2 ||
న రావణసహస్రం మే యుద్ధే ప్రతిబలం భవేత్ |
శిలాభిస్తు ప్రహరతః పాదపైశ్చ సహస్రశః || 3 ||
అర్దయిత్వా పురీం లంకామభివాద్య చ మైథిలీం |
సమృద్ధార్థో గమిష్యామి మిషతాం సర్వరక్షసాం || 4 ||

రామ రామ జయ రాజా రామ |
రామ రామ జయ సీతా రామ |
బాలకాండం-
శుద్ధబ్రహ్మపరాత్పర రామ |
కాలాత్మక పరమేశ్వర రామ |
శేషతల్పసుఖనిద్రిత రామ |
బ్రహ్మాద్యమరప్రార్థిత రామ |
చండకిరణకులమండన రామ |
శ్రీమద్దశరథనందన రామ |
కౌసల్యాసుఖవర్ధన రామ |
విశ్వామిత్రప్రియధన రామ |
ఘోరతాటకాఘాతక రామ |
మారీచాదినిపాతక రామ |
కౌశికమఖసంరక్షక రామ |
శ్రీమదహల్యోద్ధారక రామ |
గౌతమమునిసంపూజిత రామ |
సురమునివరగణసంస్తుత రామ |
నావికధావితమృదుపద రామ |
మిథిలాపురజనమోహక రామ |
విదేహమానసరంజక రామ |
త్ర్యంబకకార్ముకభంజక రామ |
సీతార్పితవరమాలిక రామ |
కృతవైవాహికకౌతుక రామ |
భార్గవదర్పవినాశక రామ |
శ్రీమదయోధ్యాపాలక రామ |
అయోధ్యాకాండం-
అగణితగుణగణభూషిత రామ |
అవనీతనయాకామిత రామ |
రాకాచంద్రసమానన రామ |
పితృవాక్యాశ్రితకానన రామ |
ప్రియగుహవినివేదితపద రామ |
తత్‍క్షాళితనిజమృదుపద రామ |
భరద్వాజముఖానందక రామ |
చిత్రకూటాద్రినికేతన రామ |
దశరథసంతతచింతిత రామ |
కైకేయీతనయార్థిత రామ |
విరచితనిజపితృకర్మక రామ |
భరతార్పితనిజపాదుక రామ |
అరణ్యకాండం-
దండకావనజనపావన రామ |
దుష్టవిరాధవినాశన రామ |
శరభంగసుతీక్ష్ణార్చిత రామ |
అగస్త్యానుగ్రహవర్ధిత రామ |
గృధ్రాధిపసంసేవిత రామ |
పంచవటీతటసుస్థిత రామ |
శూర్పణఖార్తివిధాయక రామ |
ఖరదూషణముఖసూదక రామ |
సీతాప్రియహరిణానుగ రామ |
మారీచార్తికృదాశుగ రామ |
వినష్టసీతాన్వేషక రామ |
గృధ్రాధిపగతిదాయక రామ |
శబరీదత్తఫలాశన రామ |
కబంధబాహుచ్ఛేదన రామ |
కిష్కింధాకాండం-
హనుమత్సేవితనిజపద రామ |
నతసుగ్రీవాభీష్టద రామ |
గర్వితవాలిసంహారక రామ |
వానరదూతప్రేషక రామ |
హితకరలక్ష్మణసంయుత రామ |
సుందరకాండం-
కపివరసంతతసంస్మృత రామ |
తద్గతివిఘ్నధ్వంసక రామ |
సీతాప్రాణాధారక రామ |
దుష్టదశాననదూషిత రామ |
శిష్టహనూమద్భూషిత రామ |
సీతవేదితకాకావన రామ |
కృతచూడామణిదర్శన రామ |
కపివరవచనాశ్వాసిత రామ |
యుద్ధకాండం-
రావణనిధనప్రస్థిత రామ |
వానరసైన్యసమావృత రామ |
శోషితసరిదీశార్థిత రామ |
విభీషణాభయదాయక రామ |
పర్వతసేతునిబంధక రామ |
కుంభకర్ణశిరశ్ఛేదక రామ |
రాక్షససంఘవిమర్దక రామ |
అహిమహిరావణచారణ రామ |
సంహృతదశముఖరావణ రామ |
విధిభవముఖసురసంస్తుత రామ |
ఖస్థితదశరథవీక్షిత రామ |
సీతాదర్శనమోదిత రామ |
అభిషిక్తవిభీషణనత రామ |
పుష్పకయానారోహణ రామ |
భరద్వాజాభినిషేవణ రామ |
భరతప్రాణప్రియకర రామ |
సాకేతపురీభూషణ రామ |
సకలస్వీయసమానత రామ |
రత్నలసత్పీఠస్థిత రామ |
పట్టాభిషేకాలంకృత రామ |
పార్థివకులసంమానిత రామ |
విభీషణార్పితరంగక రామ |
కీశకులానుగ్రహకర రామ |
సకలజీవసంరక్షక రామ |
సమస్తలోకాధారక రామ |
ఉత్తరకాండం-
ఆగతమునిగణసంస్తుత రామ |
విశ్రుతదశకంఠోద్భవ రామ |
సీతాలింగననిర్వృత రామ |
నీతిసురక్షితజనపద రామ |
విపినత్యాజితజనకజ రామ |
కారితలవణాసురవధ రామ |
స్వర్గతశంబుకసంస్తుత రామ |
స్వతనయకుశలవనందిత రామ |
అశ్వమేధక్రతుదీక్షిత రామ |
కాలావేదితసురపద రామ |
ఆయోధ్యకజనముక్తిద రామ |
విధిముఖవిబుధానందక రామ |
తేజోమయనిజరూపక రామ |
సంసృతిబంధవిమోచక రామ |
ధర్మస్థాపనతత్పర రామ |
భక్తిపరాయణముక్తిద రామ |
సర్వచరాచరపాలక రామ |
సర్వభవామయవారక రామ |
వైకుంఠాలయసంస్థిత రామ |
నిత్యానందపదస్థిత రామ |
రామ రామ జయ రాజా రామ |
రామ రామ జయ సీతా రామ ||
మంగళం-
భయహర మంగళ దశరథ రామ |
జయ జయ మంగళ సీతా రామ |
మంగళకర జయ మంగళ రామ |
సంగతశుభవిభవోదయ రామ |
ఆనందామృతవర్షక రామ |
ఆశ్రితవత్సల జయ జయ రామ |
రఘుపతి రాఘవ రాజా రామ |
పతితపావన సీతా రామ |