Sacred Stotras & Deities

గాయత్రీ రామాయణం

తపః స్వాధ్యాయనిరతం తపస్వీ వాగ్విదాం వరం |
నారదం పరిపప్రచ్ఛ వాల్మీకిర్మునిపుంగవం || 1
స హత్వా రాక్షసాన్ సర్వాన్ యజ్ఞఘ్నాన్ రఘునందనః |
ఋషిభిః పూజితః సంయగ్యథేంద్రో విజయీ పురా || 2
విశ్వామిత్రః స ధర్మాత్మా శ్రుత్వా జనకభాషితం |
వత్స రామ ధనుః పశ్య ఇతి రాఘవమబ్రవీత్ || 3
తుష్టావాస్య తదా వంశం ప్రవిష్య స విశాంపతేః |
శయనీయం నరేంద్రస్య తదాసాద్య వ్యతిష్ఠత || 4
వనవాసం హి సంఖ్యాయ వాసాంస్యాభరణాని చ |
భర్తారమనుగచ్ఛంత్యై సీతాయై శ్వశురో దదౌ || 5
రాజా సత్యం చ ధర్మం చ రాజా కులవతాం కులం |
రాజా మాతా పితా చైవ రాజా హితకరో నృణాం || 6
నిరీక్ష్య స ముహూర్తం తు దదర్శ భరతో గురుం |
ఉటజే రామమాసీనం జటావల్కలధారిణం || 7
యది బుద్ధిః కృతా ద్రష్టుమగస్త్యం తం మహామునిం |
అద్యైవ గమనే బుద్ధిం రోచయస్వ మహాయశాః || 8
భరతస్యార్యపుత్రస్య శ్వశ్రూణాం మమ చ ప్రభో |
మృగరూపమిదం వ్యక్తం విస్మయం జనయిష్యతి || 9
గచ్ఛ శీఘ్రమితో రామ సుగ్రీవం తం మహాబలం |
వయస్యం తం కురు క్షిప్రమితో గత్వాఽద్య రాఘవ || 10
దేశకాలౌ ప్రతీక్షస్వ క్షమమాణః ప్రియాప్రియే |
సుఖదుఃఖసహః కాలే సుగ్రీవ వశగో భవ || 11
వంద్యాస్తే తు తపః సిద్ధాస్తాపసా వీతకల్మషాః |
ప్రష్టవ్యాశ్చాపి సీతాయాః ప్రవృత్తిం వినయాన్వితైః || 12
స నిర్జిత్య పురీం శ్రేష్ఠాం లంకాం తాం కామరూపిణీం |
విక్రమేణ మహతేజాః హనుమాన్మారుతాత్మజః || 13
ధన్యా దేవాః స గంధర్వాః సిద్ధాశ్చ పరమర్షయః |
మమ పశ్యంతి యే నాథం రామం రాజీవలోచనం || 14
మంగళాభిముఖీ తస్య సా తదాసీన్మహాకపేః |
ఉపతస్థే విశాలాక్షీ ప్రయతా హవ్యవాహనం || 15
హితం మహార్థం మృదు హేతు సంహితం
వ్యతీతకాలాయతి సంప్రతిక్షమం |
నిశంయ తద్వాక్యముపస్థితజ్వరః
ప్రసంగవానుత్తరమేతదబ్రవీత్ || 16
ధర్మాత్మా రక్షసాం శ్రేష్ఠః సంప్రాప్తోఽయం విభీషణః |
లంకైశ్వర్యం ధ్రువం శ్రీమానయం ప్రాప్నోత్యకంటకం || 17
యో వజ్రపాతాశని సన్నిపాతాన్
న చక్షుభే నాపి చచాల రాజా |
స రామబాణాభిహతో భృశార్తః
చచాల చాపం చ ముమోచ వీరః || 18
యస్య విక్రమమాసాద్య రాక్షసా నిధనం గతాః |
తం మన్యే రాఘవం వీరం నారాయణమనామయం || 19
న తే దదృశిరే రామం దహంతమరివాహినీం |
మోహితాః పరమాస్త్రేణ గాంధర్వేణ మహాత్మనా || 20
ప్రణంయ దేవతాభ్యశ్చ బ్రాహ్మణేభ్యశ్చ మైథిలీ |
బద్ధాంజలిపుటా చేదమువాచాగ్ని సమీపతః || 21
చలనాత్పర్వతేంద్రస్య గణా దేవాశ్చ కంపితాః |
చచాల పార్వతీ చాపి తదాశ్లిష్టా మహేశ్వరం || 22
దారాః పుత్రాః పురం రాష్ట్రం భోగాచ్ఛాదనభాజనం |
సర్వమేవాఽవిభక్తం నో భవిష్యతి హరీశ్వర || 23
యామేవ రాత్రిం శత్రుఘ్నః పర్ణశాలాం సమావిశత్ |
తామేవ రాత్రిం సీతాఽపి ప్రసూతా దారకద్వయం || 24
ఇదం రామాయణం కృత్స్నం గాయత్రీబీజసంయుతం |
త్రిసంధ్యం యః పఠేన్నిత్యం సర్వపాపైః ప్రముచ్యతే ||

ఏక శ్లోకీ రామాయణం

ఆదౌ రామ తపోవనాదిగమనం హత్వా మృగం కాంచనం
వైదేహీ హరణం జటాయు మరణం సుగ్రీవ సంభాషణం |
వాలీ నిగ్రహణం సముద్రతరణం లంకాపురీదాహనం
పశ్చాద్రావణకుంభకర్ణహననం హ్యేతద్ధి రామాయణం ||

భద్రగిరిపతి శ్రీ రామచంద్ర మంగళాశాసనం

మంగళం కౌశలేంద్రాయ మహనీయగుణాత్మనే |
చక్రవర్తి తనూజాయ సార్వభౌమాయ మంగళం || 1 ||
వేదవేదాంతవేద్యాయ మేఘశ్యామలమూర్తయే |
పుంసాం మోహనరూపాయ పుణ్యశ్లోకాయ మంగళం || 2 ||
విశ్వామిత్రాంతరంగాయ మిథిలానగరీపతేః |
భాగ్యానాం పరిపాకాయ భవ్యరూపాయ మంగళం || 3 ||
పితృభక్తాయ సతతం భ్రాతృభి స్సహ సీతయా |
వందితాఖిలలోకాయ రామభద్రాయ మంగళం || 4 ||
త్యక్తసాకేతవాసాయ చిత్రకూటవిహారిణే |
సేవ్యాయ సర్వయమినాం ధీరోదారాయ మంగళం || 5 ||
సౌమిత్రిణా చ జానక్యా చాపబాణసిధారిణే |
సంసేవ్యాయ సదా భక్త్యా స్వామినే మమ మంగళం || 6 ||
దండకారాణ్యవాసాయ ఖండితామరశత్రవే |
గృధ్రరాజాయ భక్తాయ ముక్తిదాయాస్తు మంగళం || 7 ||
సాదరం శబరీదత్త ఫలమూలాభిలాషిణే |
సౌలభ్యపరిపూర్ణాయ సత్వోద్రిక్తాయ మంగళం || 8 ||
హనుమత్సమవేతాయ హరీశాభీష్టదాయినే |
వాలిప్రమథనాయాస్తు మహాధీరాయ మంగళం || 9 ||
శ్రీమతే రఘువీరాయ సేతూల్లంఘితసింధవే |
జితరాక్షసరాజాయ రణధీరాయ మంగళం || 10 ||
విభీషణకృతే ప్రీత్యా లంకాభీష్టప్రదాయినే |
సర్వలోకశరణ్యాయ శ్రీరాఘవాయ మంగళం || 11 ||
ఆసాద్య నగరీం దివ్యా మభిషిక్తాయ సీతయా |
రాజాధిరాజరాజాయ రామభద్రాయ మంగళం || 12 ||
భద్రాచలనివాసాయ భద్రాయ పరమాత్మనే |
జానకీప్రాణనాథాయ రామచంద్రాయ మంగళం || 13 ||
శ్రీసౌంయజామాతృమునేః కృపయాస్మానుపేయుషే |
మహతేమమనాథాయ రఘునాథాయ మంగళం || 14 ||
మంగలాశాసనపరై ర్మదాచార్యపురోగమైః |
సర్వైశ్చ పూర్వై రాచార్యై స్సత్కృతాయాస్తు మంగళం || 15 ||
రంయజామాతృమునినా మంగళాశాసనం కృతం |
త్రైలోక్యాధిపతిశ్శ్రీమాన్ కరోతు మంగళం సదా || 16 ||
కాయేన వాచా మనసేంద్రియై ర్వా బుద్ధ్యాత్మనా వా ప్రకృతీ స్స్వభావాత్ |
కరోమి యద్యత్ సకలం పరస్మై నారాయణాయేతి సమర్పయామి || 17 ||
ఇతి శ్రీవరవరమునిస్వామికృత శ్రీ భద్రాద్రిరామ మంగళాశాసనం సంపూర్ణం ||

భద్రగిరిపతి శ్రీ రామచంద్ర శరణాగతిః

శ్రీమత్పయోరుహసుధాకలశాతపత్ర
మత్స్యధ్వజాంకుశధరాదిమహార్షచిహ్నౌ |
పద్మప్రవాళమణివిద్రుమమంజుశోభౌ
భద్రాద్రిరామచరణౌ శరణం ప్రపద్యే || 1 ||
వామాంకహస్తధృతభూమిసుతారథాంగ
సంఖాశుగప్రణయిసవ్యకరాఽబ్జనేత్ర |
పార్శ్వస్థచాపధరలక్ష్మణ తావకీనౌ
భద్రాద్రిరామచరణౌ శరణం ప్రపద్యే || 2 ||
ఫుల్లారవిందరుచిరా వనిశం లసంతౌ
సంవర్తికాళిసమతాలలితాంగుళీకౌ |
తత్సూతమౌక్తికఫలాయితసన్నిభౌ తే
భద్రాద్రిరామచరణౌ శరణం ప్రపద్యే || 3 ||
భక్త్యర్పితస్ఫురదుదారసరోరుహాళీ
సంయగ్విలగ్నమకరందలవాభిశంకాం |
పాదాంగుళీనఖమిషాత్ పరికల్పయన్తౌ
భద్రాద్రిరామచరణౌ శరణం ప్రపద్యే || 4 ||
ముక్తావళీ లసతి విష్ణుపదే తవేతి
వేదః ప్రబోధయతి తాం నఖరాళిరక్ష్యాత్ |
ప్రత్యక్షతః ప్రకటనేన తతోఽదికౌ తే
భద్రాద్రిరామచరణౌ శరణం ప్రపద్యే || 5 ||
నీహారబిందుదళశోభితనాళపద్మే
భాస్వన్నఖాంగుళిసుజంఘతయా విజిత్య |
విధ్యర్చితై రివ సుమై ర్విహితాట్టహాసౌ
భద్రాద్రిరామచరణౌ శరణం ప్రపద్యే || 6 ||
పూర్ణః కళంకరహితో విధు రాననాత్మ
సూర్యప్రభాఽభిభవముక్తమతి ప్రసన్నాం |
తారావళీ మివ నఖావళి మావహస్తౌ
భద్రాద్రిరామచరణౌ శరణం ప్రపద్యే || 7 ||
శ్రుత్యంగనాకచభరాంతరరాజమాన
సిందూరరేణుమిళనా దివ భక్తాహృత్సు |
వాసాతిరేకవశతః కిల జాతరాగౌ
భద్రాద్రిరామచరణౌ శరణం ప్రపద్యే || 8 ||
కోటీరకోటిఘటనా దివ దేవతానాం
కోపాదివాంబురుహవిద్రుమపల్లవేషు |
భక్తాళివైరికలనా దతిమాత్రరక్తౌ
భద్రాద్రిరామచరణౌ శరణం ప్రపద్యే || 9 ||
భేదోఽస్తి నైవ ఖలు దారుశిలాదికానాం
ఆలోచ్య చైవ మఖిలాకరచూర్ణభాజౌ |
సంక్షాళితౌ సుమనసా తరిజీవినా తే
భద్రాద్రిరామచరణౌ శరణం ప్రపద్యే || 10 ||
ధ్యానైకనిఘ్నమునిమానసవాసకాలే
సక్తానురాగయుతసత్యగుణైకశంకాం |
భక్తావళే ర్నఖరుచా పరికల్పయన్తౌ
భద్రాద్రిరామచరణౌ శరణం ప్రపద్యే || 11 ||
ఉన్మార్గకర్షిమునిమానసవారణానాం
శబ్దాదిభోగమదవారిమలీమసానాం |
ఆలానపాదదృఢతాకరకీలగుల్ఫౌ
భద్రాద్రిరామచరణౌ శరణం ప్రపద్యే || 12 ||
మాయామృగార్థ మవనీతనయానియోగాత్
ఆయాసపూర్వ మటవీతటదూరచారాత్ |
ఆరక్తకోకనదకోమలకాన్తిభాజౌ
భద్రాద్రిరామచరణౌ శరణం ప్రపద్యే || 13 ||
భూమీసుతాకరతలోదరరాజమాన
కాశ్మీరకాంతిమిళనా దివ రాగవన్తౌ |
భక్తౌఘరక్షణకళాతివిచక్షణౌ తే
భద్రాద్రిరామచరణౌ శరణం ప్రపద్యే || 14 ||
పాథోధిజన్మపరికల్పితపాద్యధారౌ
ఫాలాక్షమూర్ధధఽతపావనతీర్థహేతూ |
పాషాణ మేణనయనావిభవం నయన్తౌ
భద్రాద్రిరామచరణౌ శరణం ప్రపద్యే || 15 ||
శ్రీ వేంకటార్యపదపంకజసేవకేన
శ్రీ శ్రీనివాస చరమావధికింక రేణ |
ప్రోక్తా ప్రపత్తివినుతిం పఠతాం జనానాం
భద్రాద్రిరా డ్దిశతు భద్ర మనిద్రమేవ || 16 ||

భద్రగిరిపతి శ్రీ రామచంద్ర సంస్తుతిః

ధరణీతనయా రమణీ కమనీయ సీతాంక మనోహరరూప హరే |
భరతాగ్రజ రాఘవ దాశరథే విజయీ భవ భద్రగిరీంద్రపతే || 1 ||
బుధలక్షణలక్షణ సర్వవిలక్షణ లక్షణపూర్వజ రామ హరే |
భవపాశవినాశక హే నృహరే విజయీ భవ భద్రగిరీంద్రపతే || 2 ||
ధరచక్ర ధనుశ్శరదీప్త చతుష్కరచక్రభవాద్యభవాదివిభో |
పరచక్రభయంకరహే భగవన్ విజయీ భవ భద్రగిరీంద్రపతే || 3 ||
అధినీరజజన్మసురేశమునీంద్రవిలక్షణలక్షణదక్షపతే |
నవకంధరసుందరదివ్యవతనో విజయీ భవ భద్రగిరీంద్రపతే || 4 ||
సతతః ప్రతతః ప్రచరైః కరుణా భరణై స్తవ దిగ్విసరై ర్నమిత |
స్మరణాణాభిరతం భవతం సతతం కురు మా మిహ భద్రగిరీంద్రపతే || 5 ||
సచతుర్ముఖషణ్ముఖపంచముఖ ప్రముఖాఖిలదైవతమౌళిమణే |
శరణాగతవత్సల సారనిధే పరిపాలయ మాం వృషశైలపతే || 6 ||
అభిరామగుణాకర దాశరథే జగదేకదనుర్ధర ధీరమతే |
రఘునాయక రామ రమేశ విభో వరదోభవ దేవ దయాజలధే || 7 ||

భద్రగిరిపతి శ్రీ రామచంద్ర సుప్రభాతం

వామాంకస్థితజానకీపరిలసత్కోదండదండం కరే
చక్రం చోర్ధ్వకరేణ బాహుయుగళే శంఖం శరం దక్షిణే |
బిభ్రాణం జలజాతపత్రనయనం భద్రాద్రిమూర్ధస్థితం
కేయూరాదివిభూషితం రఘుపతిం సౌమిత్రియుక్తం భజే || 1 ||
శ్రీమచ్చందనచర్చితోన్నతకుచ వ్యాలోలమాలాంకితాం |
తాటంకద్యుతిసత్కపోలయుగళాం పీతాంబరాలంకృతాం || 2 ||
కాంచీకంకణహారనూపురలస త్కల్యాణదామాన్వితాం |
శ్రీ వామాంకగతాం సరోరుహకరాం సీతాం మృగాక్షీం భజే || 3 ||
ద్విభుజం స్వర్ణవపుషం పద్మపత్రనిభేక్షణం |
ధనుర్బాణధరం ధీరం రామానుజ మహం భజే || 4 ||
కౌసల్యా సుప్రజా రామ పూర్వా సంధ్యా ప్రవర్తతే |
ఉత్తిష్ఠ నరశార్దూల కర్తవ్యం దైవమాహ్నికం || 5 ||
ఉత్తిష్ఠోత్తిష్ఠ గోవింద ఉత్తిష్ఠ గరుడధ్వజ |
ఉత్తిష్ఠ కమలాకాంత త్రైలోక్యం మంగలం కురు || 6 ||
వందే శ్రీరఘునందనం జనకజా నేత్రాసితాంభోరుహం
ప్రాలేయాంబు మనల్పమంజులగుణం పద్మాసనోద్భాసినం |
చక్రాబ్జేషుశరాసనాని దధతం హస్తారవిందోత్తమైః
శ్రీమన్మారుతిపూజితాంఘ్రియుగళం భద్రాద్రిచింతామణిం || 7 ||
శ్రీరామచంద్రవరకౌముది భక్తలోక
కల్పాఖ్యవల్లరి వినంరజనైకబంధో |
కారుణ్యపూరపరిపూరితసత్కటాక్షే
భద్రాద్రినాధదయితే తవ సుప్రభాతం || 8 ||
అంలానభక్తికుసుమాఽమలినాః ప్రదీపాః
సౌధాన్ జయ త్యవిరలాగురుధూమరాజిః |
నాకం స్పృశంతి ధరణీసురవేదనాదాః
భద్రాద్రిశేఖర విభో తవ సుప్రభాతం || 9 ||
సాంద్రోడురంయసుషమా న విభాతి రాజా
దీనో యథా గతవసు ర్మలినాఽంతరంగః |
దైన్యం గతా కుముదినీ ప్రియవిప్రయోగాత్
భద్రాద్రిశేఖర విభో తవ సుప్రభాతం || 10 ||
పూర్వాద్రిపీఠ మధితిష్ఠతి భానుబింబం
గాఢం ప్రయాతి తిమిరం కకుభః ప్రసన్నాః |
త్వత్స్వాగతం ఖగరుతైః కథయంతి మంద్రం
భద్రాద్రిశేఖర విభో తవ సుప్రభాతం || 11 ||
ఆదిత్యలోలకరలాలనజాతహర్షా
సా పద్మినీ త్యజతి మా సకృ దాస్యముద్రాం |
భృంగావళీ విశతి చాటువచా స్సరోజం
భద్రాద్రిశేఖర విభో తవ సుప్రభాతం || 12 ||
ప్రాలేయబిందునికరా నవపల్లవేషు
బింబాధరే స్మితరుచిం తవ సంవదంతి |
ఆయాంతి చక్రమిథునాని గృహస్థభావం
భద్రాద్రిశేఖర విభో తవ సుప్రభాతం || 13 ||
ఆనేతు మాస్యపవనం తవ సత్సుగంధీ
మాల్యాని జాతికుసుమాని సరోరుహాణి |
ఆమర్దయన్ సురభిగంధమహోఽ భివాతి
భద్రాద్రిశేఖర విభో తవ సుప్రభాతం || 14 ||
గోపీకరాకలితమంథనరంయనాదాః
గోపాలవేణునినదేన సమం ప్రవృత్తాః |
ధున్వంతి హంసమిథునాని తుషారపక్షాన్
భద్రాద్రిశేఖర విభో తవ సుప్రభాతం || 15 ||
స్తంభేరమా ఉభయపక్ష వినీత నిద్రాః
కర్షంతి తే కలిత ఘీంకృతిశృంఖలాని |
వాహా ముఖోష్మమలినీకృతసైంధవాంశాః
భద్రాద్రిశేఖర విభో తవ సుప్రభాతం || 16 ||
శ్రీవందిన స్తవ పఠంతి చ మంజుకంఠైః
రంయావధానచరితా న్యమృతోపమాని |
మంద్రం నదంతి మురజా శ్శుభశంఖనాదైః
భద్రాద్రిశేఖర విభో తవ సుప్రభాతం || 17 ||
ఉత్తానకేతనరథా రవయో మహేశాః
శుద్ధోక్షవాహనగతా వసవోఽపి సిద్ధాః |
ద్వారే వసంతి తవ దర్శనలాలసా స్తే
భద్రాద్రిశేఖర విభో తవ సుప్రభాతం || 18 ||
చక్రాంగవాహవిధి రేష సురేశ్వరోఽయం
దేవర్షిభి ర్మునిగణై స్సహ లోకపాలైః |
రత్నోపదాంజలిభరోఽభిముఖం సమాస్తే
భద్రాద్రిశేఖర విభో తవ సుప్రభాతం || 19 ||
దాతుం భవాన్ వివిధగోధనరత్నపూగాన్
ఆలోకనాయ ముకురాదిశుభార్థపుంజాన్ |
ఆదాయ దేహలితలే త్రిదశా నిషణ్ణాః
భద్రాద్రిశేఖర విభో తవ సుప్రభాతం || 20 ||
గోదావరీవిమలవారిసముద్భవాని
నిర్హారిపుష్పవిసరాణి ముదా హరంతః |
శుశ్రూషయా తవ బుధాః ప్రతిపాలయంతి
భద్రాద్రిశేఖర విభో తవ సుప్రభాతం || 21 ||
ఏలాలవంగవరకుంకుమకేసరాద్యైః
పున్నాగనాగతులసీవకులాదిపుష్పైః |
నీతా సుతీర్థకలశా అభిషేచనాయ
భద్రాద్రిశేఖర విభో తవ సుప్రభాతం || 22 ||
కస్తూరికాసురభిచందనపద్మమాలాః
పీతాంబరం చ తడిదాభ మనల్పమూల్యం |
సజ్జీకృతాని రఘునాయక మంజుళాని
భద్రాద్రిశేఖర విభో తవ సుప్రభాతం || 23 ||
కేయూరకంకణకలాపకిరీటదేవ
ఛందాంగుళీయకముఖా నవరత్నభూషాః |
రాజన్తి తావకపురో రవికాంతికాంతాః
భద్రాద్రిశేఖర విభో తవ సుప్రభాతం || 24 ||
గోదావరీసలిలసంప్లవనిర్మలాంగాః
దీప్తోర్ధ్వపుండ్రతులసీనలినాక్షమాలాః |
శ్రీవైష్ణవా స్తవ పఠంతి విబోధగాథాః
భద్రాద్రిశేఖర విభో తవ సుప్రభాతం || 25 ||
స్వర్లోకవారవనితా స్సురలోకతోమీ
రంభాదయో విమలమంగలకుంభదీపైః |
సంఘీభవంతి భవదంగణపూర్వభాగే
భద్రాద్రిశేఖర విభో తవ సుప్రభాతం || 26 ||
సీతాప్రవాలసుమనోహరపాణియుగ్మ-
సంవాహితాత్మపదపంకజ పద్మనేత్ర |
సౌమిత్రిసాదరసమర్పితసౌంయశయ్య
భద్రాద్రిశేఖర విభో తవ సుప్రభాతం || 27 ||
శ్రీశేషతల్ప శరణాగతరక్షకార్క-
వంశే నిశాచరవధాయ కృతావతార |
పాదాబ్జరేణుహృతగౌతమదారశాప
భద్రాద్రిశేఖర విభో తవ సుప్రభాతం || 28 ||
పాఠీనకూర్మకిటిమానుషసింహవేష
కుబ్జావతార భృగునందన రాఘవేంద్ర |
తాలాంక కృష్ణ యవనాంతక బుద్ధరూప
భద్రాద్రిశేఖర విభో తవ సుప్రభాతం || 29 ||
బ్రహ్మాదిసర్వవిబుధాం స్తవ పాదభక్తాన్
సంఫుల్లతామరసభాసురలోచనాద్యైః |
ఆనందయస్వ రిపుశోధన చాపధారిన్
భద్రాద్రిశేఖర విభో తవ సుప్రభాతం || 30 ||
తల్పం విహాయ కృపయా వరభద్రపీఠం
ఆస్థాయ పూజన మశేష మిదం గృహీత్వా |
భక్తా నశేషభువనాని చ పాలయస్వ
భద్రాద్రిశేఖర విభో తవ సుప్రభాతం || 31 ||
కుందసుందరదంతపంక్తి విభాసమానముఖాంబుజం
నీలనీరదకాయశోభితజానకీతటదుజ్జ్వలం |
శంఖచక్రశరాసనేషువిరాజమానకరాంబుజం
భద్రభూధరశేఖరం ప్రణమామి రామసుధాకరం || 32 ||
అబ్జసంభవశంకరాదిభి రర్చితాంఘ్రిపయోరుహం
మేరునందనభద్రతాపసమానసాబ్జదివాకరం |
నంరభక్తజనేష్టదాయకపద్మపీఠసమాస్థితం
గౌతమీక్షణలాలసం ప్రణమామి రామసుధాకరం || 33 ||
భీతభానుతనూభవార్తినివారణాతివిశారదం
పాదనంరవిభీషణాహితవైరిరాజ్యవిభూతికం |
భీమరావణమత్తవారణసింహముత్తమవిక్రమం
భద్రభూధరశేఖరం ప్రణమామి రామసుధాకరం || 34 ||
ఘోరసంసృతిదుస్తరాంబుధికుంభసంభవసన్నిభం
యోగిబృందమనోఽరవిందసుకేసరోజ్జ్వలషట్పదం |
భక్తలోకవిలోచనామృతవర్తి కాయితవిగ్రహం
భద్రభూధరశేఖరం ప్రణమామి రామసుధాకరం || 35 ||
భూసుతాచిరరోచిషం వరసత్పథైక విహారిణం
తాపనాశనదీక్షితంనతచాతకావళిరక్షకం |
చిత్రచాపకృపాంబుమండలనీలవిగ్రహభాసురం
భద్రభూధరశేఖరం ప్రణమామి రామపయోధరం || 36 ||
ఇతి భద్రాద్రిరామ (భద్రాచలరామ) సుప్రభాతస్తోత్రం సంపూర్ణం |

పాహి రామప్రభో

పల్లవి
పాహి రామప్రభో పాహి రామప్రభో
పాహి భద్రాద్రి వైదేహి రామప్రభో
పాహి రామప్రభో
1.ఇందిరా హృదయారవిందాధి రూఢ
సుందరాకార నానంద రామప్రభో
ఎందునే చూడ మీ సుందరానందము
కందునో కన్నులింపొంద శ్యామప్రభో
2.బృందారకాది బృందార్చిత పదార
విందముల సందర్షితానంద రామప్రభో
తల్లివి నీవె మా తండ్రివి నీవె
మా దాతవు నీవు మా భ్రాత రామప్రభో
3.నీదు బాణంబులను నాదు షతృల బట్టి
బాధింపకున్నావదేమి రామప్రభో
ఆదిమధ్యాంత బహిరంతరాత్ముండనుచు
వాదింతునే జగన్నాథ రామప్రభో
4.శ్రీ రామరామేతి శ్రేష్ఠ మంత్రము
సారె సారె కును వింతగా చదువు రామప్రభో
శ్రీ రామ నీ నామ చింతనామృత పాన
సారమే నాదు మది గోరు రామప్రభో
5.కలికి రూపము దాల్చి కలియుగంబున నీవు
వెలసితివి భద్రాద్రి నిలయ రామప్రభో
అవ్యయుడవైన ఈ అవతారములవలన
దివ్యులైనారు మునులయ్య రామప్రభో
6.పాహి శ్రీ రామ నీ పాద పద్మాశ్రయుల
పాలింపుమా భద్రశైల రామప్రభో
పాహి రామప్రభో పాహి రామప్రభో
పాహి భద్రాద్రి వైదేహి రామప్రభో

శ్రీ రామచంద్ర కృపాళు

శ్రీ రామచంద్ర కృపాళు భజు మన హరణ భవ భయ దారుణం |
నవకంజ లోచన కంజ ముఖ కర కంజ పద కంజారుణం || 1
కందర్ప అగణిత అమిత ఛవి నవ నీల నీరజ సుందరం |
వటపీత మానహు తడిత రుచి శుచి నౌమి జనక సుతావరం || 2
భజు దీన బంధు దినేశ దానవ దైత్యవంశనికందనం |
రఘునంద ఆనందకంద కౌశల చంద దశరథ నందనం || 3
శిర ముకుట కుండల తిలక చారు ఉదార అంగ విభూషణం |
ఆజానుభుజ శరచాపధర సంగ్రామ జిత కరదూషణం || 4
ఇతి వదతి తులసీదాస శంకర శేష ముని మనరంజనం |
మమ హృదయకంజ నివాస కురు కామాదిఖలదలమంజనం || 5

రామచంద్రాయ

రామచంద్రాయ జనకరాజజా మనోహరాయ
మామకాభీష్టదాయ మహిత మంగళం ||
కోసలేశాయ మందహాస దాసపోషణాయ
వాసవాది వినుత సద్వరద మంగళం || 1 ||
చారు కుంకుమో పేత చందనాది చర్చితాయ
హారకటక శోభితాయ భూరి మంగళం || 2 ||
లలిత రత్నకుండలాయ తులసీవనమాలికాయ
జలద సద్రుశ దేహాయ చారు మంగళం || 3 ||
దేవకీపుత్రాయ దేవ దేవోత్తమాయ
చాప జాత గురు వరాయ భవ్య మంగళం || 4 ||
పుండరీకాక్షాయ పూర్ణచంద్రాననాయ
అండజాతవాహనాయ అతుల మంగళం || 5 ||
విమలరూపాయ వివిధ వేదాంతవేద్యాయ
సుజన చిత్త కామితాయ శుభగ మంగళం || 6 ||
రామదాస మృదుల హృదయ తామరస నివాసాయ
స్వామి భద్రగిరివరాయ సర్వ మంగళం || 7 ||

శ్రీ శివరామాష్టకం

శివ హరే శివరామసఖే ప్రభో
త్రివిధతాపనివారణ హే విభో |
అజజనేశ్వరయాదవ పాహి మాం
శివ హరే విజయం కురు మే వరం || 1 ||
కమలలోచన రామ దయానిధే
హర గురో గజరక్షక గోపతే |
శివతనో భవశంకర పాహి మాం
శివ హరే విజయం కురు మే వరం || 2 ||
సుజనరంజనమంగలమందిరం
భజతి తే పురుషః పరమం పదం |
భవతి తస్య సుఖం పరమాద్భుతం
శివ హరే విజయం కురు మే వరం || 3 ||
జయ యుధిష్ఠిరవల్లభ భూపతే
జయ జయార్జిత పుణ్యపయోనిధే |
జయ కృపామయ కృష్ణ నమోఽస్తు తే
శివ హరే విజయం కురు మే వరం || 4 ||
భవవిమోచన మాధవ మాపతే
సుకవిమానసహంస శివారతే |
జనకజారత రాఘవ రక్ష మాం
శివ హరే విజయం కురు మే వరం || 5 ||
అవనిమండలమంగళ మాపతే
జలదసుందర రామ రమాపతే |
నిగమకీర్తిగుణార్ణవ గోపతే
శివ హరే విజయం కురు మే వరం || 6 ||
పతితపావన నామమయీ లతా
తవ యశో విమలం పరిగీయతే |
తదపి మాధవ మాం కిముపేక్షసే
శివ హరే విజయం కురు మే వరం || 7 ||
అమరతాపరదేవ రమాపతే
విజయతస్తవ నామధనోపమా |
మయి కథం కరుణార్ణవ జాయతే
శివ హరే విజయం కురు మే వరం || 8 ||
హనుమతః ప్రియచాపకర ప్రభో
సురసరిద్ధృతశేఖర హే గురో |
మమ విభో కిము విస్మరణం కృతం
శివ హరే విజయం కురు మే వరం || 9 ||
అహరహర్జన రంజనసుందరం
పఠతి యః శివరామకృతస్తవం |
విశతి రామరమాచరణాంబుజే
శివ హరే విజయం కురు మే వరం || 10 ||
ప్రాతరుత్థాయ యో భక్త్యా పఠేదేకాగ్రమానసః |
విజయో జాయతే తస్య విష్ణుమారాధ్యమాప్నుయాత్ || 11 ||
ఇతి శ్రీరామానందవిరచితం శ్రీశివరామస్తోత్రం |

శ్రీరామ పట్టాభిషేక సర్గః (యుద్ధకాండం)

శిరస్యంజలిమాధాయ కైకేయ్యానందవర్ధనః |
బభాషే భరతో జ్యేష్ఠం రామం సత్యపరాక్రమం || 1 ||

Business & Productivity Software

పూజితా మామికా మాతా దత్తం రాజ్యమిదం మమ |
తద్దదామి పునస్తుభ్యం యథా త్వమదదా మమ || 2 ||

ధురమేకాకినా న్యస్తామృషభేణ బలీయసా |
కిశోరవద్గురుం భారం న వోఢుమహముత్సహే || 3 ||

వారివేగేన మహతా భిన్నః సేతురివ క్షరన్ |
దుర్బంధనమిదం మన్యే రాజ్యచ్ఛిద్రమసంవృతం || 4 ||

గతిం ఖర ఇవాశ్వస్య హంసస్యేవ చ వాయసః |
నాన్వేతుముత్సహే రామ తవ మార్గమరిందమ || 5 ||

యథా చారోపితో వృక్షో జాతశ్చాంతర్నివేశనే |
మహాంశ్చ సుదురారోహో మహాస్కంధః ప్రశాఖవాన్ || 6 ||

శీర్యేత పుష్పితో భూత్వా న ఫలాని ప్రదర్శయన్ |
తస్య నానుభవేదర్థం యస్య హేతోః స రోప్యతే || 7 ||

ఏషోపమా మహాబాహో త్వదర్థం వేత్తుమర్హసి |
యద్యస్మాన్మనుజేంద్ర త్వం భక్తాన్భృత్యాన్న శాధి హి || 8 ||

జగదద్యాభిషిక్తం త్వామనుపశ్యతు సర్వతః |
ప్రతపంతమివాదిత్యం మధ్యాహ్నే దీప్తతేజసం || 9 ||

తూర్యసంఘాతనిర్ఘోషైః కాంచీనూపురనిస్వనైః |
మధురైర్గీతశబ్దైశ్చ ప్రతిబుధ్యస్వ రాఘవ || 10 ||

రామ భక్తి పాటలు

యావదావర్తతే చక్రం యావతీ చ వసుంధరా |
తావత్త్వమిహ సర్వస్య స్వామిత్వమనువర్తయ || 11 ||

భరతస్య వచః శ్రుత్వా రామః పరపురంజయః |
తథేతి ప్రతిజగ్రాహ నిషసాదాసనే శుభే || 12 ||

తతః శత్రుఘ్నవచనాన్నిపుణాః శ్మశ్రువర్ధకాః |
సుఖహస్తాః సుశీఘ్రాశ్చ రాఘవం పర్యుపాసత || 13 ||

పూర్వం తు భరతే స్నాతే లక్ష్మణే చ మహాబలే |
సుగ్రీవే వానరేంద్రే చ రాక్షసేంద్రే విభీషణే || 14 ||

విశోధితజటః స్నాతశ్చిత్రమాల్యానులేపనః |
మహార్హవసనో రామస్తస్థౌ తత్ర శ్రియా జ్వలన్ || 15 ||

ప్రతికర్మ చ రామస్య కారయామాస వీర్యవాన్ |
లక్ష్మణస్య చ లక్ష్మీవానిక్ష్వాకుకులవర్ధనః || 16 ||

ప్రతికర్మ చ సీతాయాః సర్వా దశరథస్త్రియః |
ఆత్మనైవ తదా చక్రుర్మనస్విన్యో మనోహరం || 17 ||

తతో వానరపత్నీనాం సర్వాసామేవ శోభనం |
చకార యత్నాత్కౌసల్యా ప్రహృష్టా పుత్రవత్సలా || 18 ||

తతః శత్రుఘ్నవచనాత్సుమంత్రో నామ సారథిః |
యోజయిత్వాఽభిచక్రామ రథం సర్వాంగశోభనం || 19 ||

అర్కమండలసంకాశం దివ్యం దృష్ట్వా రథోత్తమం |
ఆరురోహ మహాబాహూ రామః సత్యపరాక్రమః || 20 ||

సుగ్రీవో హనుమాంశ్చైవ మహేంద్రసదృశద్యుతీ |
స్నాతౌ దివ్యనిభైర్వస్త్రైర్జగ్మతుః శుభకుండలౌ || 21 ||

వరాభరణసంపన్నా యయుస్తాః శుభకుండలాః |
సుగ్రీవపత్న్యః సీతా చ ద్రష్టుం నగరముత్సుకాః || 22 ||

అయోధ్యాయాం తు సచివా రాజ్ఞో దశరథస్య యే |
పురోహితం పురస్కృత్య మంత్రయామాసురర్థవత్ || 23 ||

అశోకో విజయశ్చైవ సుమంత్రశ్చైవ సంగతాః |
మంత్రయన్రామవృద్ధ్యర్థమృద్ధ్యర్థం నగరస్య చ || 24 ||

సర్వమేవాభిషేకార్థం జయార్హస్య మహాత్మనః |
కర్తుమర్హథ రామస్య యద్యన్మంగళపూర్వకం || 25 ||

ఇతి తే మంత్రిణః సర్వే సందిశ్య తు పురోహితం |
నగరాన్నిర్యయుస్తూర్ణం రామదర్శనబుద్ధయః || 26 ||

హరియుక్తం సహస్రాక్షో రథమింద్ర ఇవానఘః |
ప్రయయౌ రథమాస్థాయ రామో నగరముత్తమం || 27 ||

జగ్రాహ భరతో రశ్మీఞ్శత్రుఘ్నశ్ఛత్రమాదదే |
లక్ష్మణో వ్యజనం తస్య మూర్ధ్ని సంపర్యవీజయత్ || 28 ||

శ్వేతం చ వాలవ్యజనం జగ్రాహ పురతః స్థితః |
అపరం చంద్రసంకాశం రాక్షసేంద్రో విభీషణః || 29 ||

ఋషిసంఘైస్తదాఽఽకాశే దేవైశ్చ సమరుద్గణైః |
స్తూయమానస్య రామస్య శుశ్రువే మధురధ్వనిః || 30 ||

తతః శత్రుంజయం నామ కుంజరం పర్వతోపమం |
ఆరురోహ మహాతేజాః సుగ్రీవః ప్లవగర్షభః || 31 ||

నవనాగసహస్రాణి యయురాస్థాయ వానరాః |
మానుషం విగ్రహం కృత్వా సర్వాభరణభూషితాః || 32 ||

శంఖశబ్దప్రణాదైశ్చ దుందుభీనాం చ నిస్స్వనైః |
ప్రయయౌ పురుషవ్యాఘ్రస్తాం పురీం హర్ంయమాలినీం || 33 ||

దదృశుస్తే సమాయాంతం రాఘవం సపురస్సరం |
విరాజమానం వపుషా రథేనాతిరథం తదా || 34 ||

తే వర్ధయిత్వా కాకుత్స్థం రామేణ ప్రతినందితాః |
అనుజగ్ముర్మహాత్మానం భ్రాతృభిః పరివారితం || 35 ||

అమాత్యైర్బ్రాహ్మణైశ్చైవ తథా ప్రకృతిభిర్వృతః |
శ్రియా విరురుచే రామో నక్షత్రైరివ చంద్రమాః || 36 ||

స పురోగామిభిస్తూర్యైస్తాలస్వస్తికపాణిభిః |
ప్రవ్యాహరద్భిర్ముదితైర్మంగళాని యయౌ వృతః || 37 ||

అక్షతం జాతరూపం చ గావః కన్యాస్తథా ద్విజాః |
నరా మోదకహస్తాశ్చ రామస్య పురతో యయుః || 38 ||

సఖ్యం చ రామః సుగ్రీవే ప్రభావం చానిలాత్మజే |
వానరాణాం చ తత్కర్మ రాక్షసానాం చ తద్బలం |
విభీషణస్య సంయోగమాచచక్షే చ మంత్రిణాం || 39 ||

శ్రుత్వా తు విస్మయం జగ్మురయోధ్యాపురవాసినః || 40 ||

ద్యుతిమానేతదాఖ్యాయ రామో వానరసంవృతః |
హృష్టపుష్టజనాకీర్ణామయోధ్యాం ప్రవివేశ హ || 41 ||

తతో హ్యభ్యుచ్ఛ్రయన్పౌరాః పతాకాస్తే గృహే గృహే || 42 ||

ఐక్ష్వాకాధ్యుషితం రంయమాససాద పితుర్గృహం || 43 ||

అథాబ్రవీద్రాజసుతో భరతం ధర్మిణాం వరం |
అర్థోపహితయా వాచా మధురం రఘునందనః || 44 ||

పితుర్భవనమాసాద్య ప్రవిశ్య చ మహాత్మనః |
కౌసల్యాం చ సుమిత్రాం చ కైకేయీమభివాద్య చ || 45 ||

Also Read  Sri Sita Ashtottara Shatanamavali pdf download – శ్రీ సీతా అష్టోత్తరశతనామావళిః

యచ్చ మద్భవనం శ్రేష్ఠం సాశోకవనికం మహత్ |
ముక్తావైడూర్యసంకీర్ణం సుగ్రీవాయ నివేదయ || 46 ||

తస్య తద్వచనం శ్రుత్వా భరతః సత్యవిక్రమః |
పాణౌ గృహీత్వా సుగ్రీవం ప్రవివేశ తమాలయం || 47 ||

తతస్తైలప్రదీపాంశ్చ పర్యంకాస్తరణాని చ |
గృహీత్వా వివిశుః క్షిప్రం శత్రుఘ్నేన ప్రచోదితాః || 48 ||

ఉవాచ చ మహాతేజాః సుగ్రీవం రాఘవానుజః |
అభిషేకాయ రామస్య దూతానాజ్ఞాపయ ప్రభో || 49 ||

సౌవర్ణాన్వానరేంద్రాణాం చతుర్ణాం చతురో ఘటాన్ |
దదౌ క్షిప్రం స సుగ్రీవః సర్వరత్నవిభూషితాన్ || 50 ||

యథా ప్రత్యూషసమయే చతుర్ణాం సాగరాంభసాం |
పూర్ణైర్ఘటైః ప్రతీక్షధ్వం తథా కురుత వానరాః || 51 ||

ఏవముక్తా మహాత్మానో వానరా వారణోపమాః |
ఉత్పేతుర్గగనం శీఘ్రం గరుడా ఇవ శీఘ్రగాః || 52 ||

జాంబవాంశ్చ హనూమాంశ్చ వేగదర్శీ చ వానరః |
ఋషభశ్చైవ కలశాఞ్జలపూర్ణానథానయన్ || 53 ||

నదీశతానాం పంచానాం జలం కుంభేషు చాహరన్ || 54 ||

పూర్వాత్సముద్రాత్కలశం జలపూర్ణమథానయత్ |
సుషేణః సత్త్వసంపన్నః సర్వరత్నవిభూషితం || 55 ||

ఋషభో దక్షిణాత్తూర్ణం సముద్రాజ్జలమాహరత్ |
రక్తచందనశాఖాభిః సంవృతం కాంచనం ఘటం || 56 ||

గవయః పశ్చిమాత్తోయమాజహార మహార్ణవాత్ |
రత్నకుంభేన మహతా శీతం మారుతవిక్రమః || 57 ||

ఉత్తరాచ్చ జలం శీఘ్రం గరుడానిలవిక్రమః |
ఆజహార స ధర్మాత్మా నలః సర్వగుణాన్వితః || 58 ||

తతస్తైర్వానరశ్రేష్ఠైరానీతం ప్రేక్ష్య తజ్జలం |
అభిషేకాయ రామస్య శత్రుఘ్నః సచివైః సహ |
పురోహితాయ శ్రేష్ఠాయ సుహృద్భ్యశ్చ న్యవేదయత్ || 59 ||

తతః స ప్రయతో వృద్ధో వసిష్ఠో బ్రాహ్మణైః సహ |
రామం రత్నమయే పీఠే సహసీతం న్యవేశయత్ || 60 ||

వసిష్ఠో వామదేవశ్చ జాబాలిరథ కాశ్యపః |
కాత్యాయనః సుయజ్ఞశ్చ గౌతమో విజయస్తథా || 61 ||

అభ్యషించన్నరవ్యాఘ్రం ప్రసన్నేన సుగంధినా |
సలిలేన సహస్రాక్షం వసవో వాసవం యథా || 62 ||

ఋత్విగ్భిర్బ్రాహ్మణైః పూర్వం కన్యాభిర్మంత్రిభిస్తథా |
యోధైశ్చైవాభ్యషించంస్తే సంప్రహృష్టాః సనైగమైః || 63 ||

సర్వౌషధిరసైర్దివ్యైర్దైవతైర్నభసి స్థితైః |
చతుర్భిర్లోకపాలైశ్చ సర్వైర్దేవైశ్చ సంగతైః || 64 ||

బ్రహ్మణా నిర్మితం పూర్వం కిరీటం రత్నశోభితం |
అభిషిక్తః పురా యేన మనుస్తం దీప్తతేజసం || 65 ||

తస్యాన్వవాయే రాజానః క్రమాద్యేనాభిషేచితాః |
సభాయాం హేమక్లుప్తాయాం శోభితాయాం మహాధనైః |
రత్నైర్నానావిధైశ్చైవ చిత్రితాయాం సుశోభనైః || 66 ||

నానారత్నమయే పీఠే కల్పయిత్వా యథావిధి |
కిరీటేన తతః పశ్చాద్వసిష్ఠేన మహాత్మనా |
ఋత్విగ్భిర్భూషణైశ్చైవ సమయోక్ష్యత రాఘవః || 67 ||

ఛత్రం తు తస్య జగ్రాహ శత్రుఘ్నః పాండురం శుభం |
శ్వేతం చ వాలవ్యజనం సుగ్రీవో వానరేశ్వరః |
అపరం చంద్రసంకాశం రాక్షసేంద్రో విభీషణః || 68 ||

మాలాం జ్వలంతీం వపుషా కాంచనీం శతపుష్కరాం |
రాఘవాయ దదౌ వాయుర్వాసవేన ప్రచోదితః || 69 ||

సర్వరత్నసమాయుక్తం మణిరత్నవిభూషితం |
ముక్తాహారం నరేంద్రాయ దదౌ శక్రప్రచోదితః || 70 ||

ప్రజగుర్దేవగంధర్వా ననృతుశ్చాప్సరోగణాః |
అభిషేకే తదర్హస్య తదా రామస్య ధీమతః || 71 ||

భూమిః సస్యవతీ చైవ ఫలవంతశ్చ పాదపాః |
గంధవంతి చ పుష్పాణి బభూవూ రాఘవోత్సవే || 72 ||

సహస్రశతమశ్వానాం ధేనూనాం చ గవాం తథా |
దదౌ శతం వృషాన్పూర్వం ద్విజేభ్యో మనుజర్షభః || 73 ||

త్రింశత్కోటీర్హిరణ్యస్య బ్రాహ్మణేభ్యో దదౌ పునః |
నానాభరణవస్త్రాణి మహార్హాణి చ రాఘవః || 74 ||

అర్కరశ్మిప్రతీకాశాం కాంచనీం మణివిగ్రహాం |
సుగ్రీవాయ స్రజం దివ్యాం ప్రాయచ్ఛన్మనుజర్షభః || 75 ||

వైడూర్యమణిచిత్రే చ వజ్రరత్నవిభూషితే |
వాలిపుత్రాయ ధృతిమానంగదాయాంగదే దదౌ || 76 ||

మణిప్రవరజుష్టం చ ముక్తాహారమనుత్తమం |
సీతాయై ప్రదదౌ రామశ్చంద్రరశ్మిసమప్రభం || 77 ||

అరజే వాససీ దివ్యే శుభాన్యాభరణాని చ |
అవేక్షమాణా వైదేహీ ప్రదదౌ వాయుసూనవే || 78 ||

అవముచ్యాత్మనః కంఠాద్ధారం జనకనందినీ |
అవైక్షత హరీన్సర్వాన్భర్తారం చ ముహుర్ముహుః || 79 ||

తామింగితజ్ఞః సంప్రేక్ష్య బభాషే జనకాత్మజాం |
ప్రదేహి సుభగే హారం యస్య తుష్టాసి భామిని |
పౌరుషం విక్రమో బుద్ధిర్యస్మిన్నేతాని సర్వశః || 80 ||

దదౌ సా వాయుపుత్రాయ తం హారమసితేక్షణా |
హనుమాంస్తేన హారేణ శుశుభే వానరర్షభః |
చంద్రాంశుచయగౌరేణ శ్వేతాభ్రేణ యథాఽచలః || 81 ||

తతో ద్వివిదమైందాభ్యాం నీలాయ చ పరన్తపః |
సర్వాన్కామగుణాన్వీక్ష్య ప్రదదౌ వసుధాధిపః || 82 ||

సర్వవానరవృద్ధాశ్చ యే చాన్యే వానరేశ్వరాః |
వాసోభిర్భూషణైశ్చైవ యథార్హం ప్రతిపూజితాః || 83 ||

విభీషణోఽథ సుగ్రీవో హనుమాన్ జాంబవాంస్తథా |
సర్వవానరముఖ్యాశ్చ రామేణాక్లిష్టకర్మణా || 84 ||

యథార్హం పూజితాః సర్వైః కామై రత్నైశ్చ పుష్కలైః |
ప్రహృష్టమనసః సర్వే జగ్మురేవ యథాగతం || 85 ||

Also Read  Brahma Kruta Sri Rama Stuti pdf download – శ్రీ రామ స్తుతిః (బ్రహ్మదేవ కృతం)

నత్వా సర్వే మహాత్మానం తతస్తే ప్లవగర్షభాః |
విసృష్టాః పార్థివేంద్రేణ కిష్కింధామభ్యుపాగమన్ || 86 ||

సుగ్రీవో వానరశ్రేష్ఠో దృష్ట్వా రామాభిషేచనం |
పూజితశ్చైవ రామేణ కిష్కింధాం ప్రావిశత్పురీం || 87 ||

[రామేణ సర్వకామైశ్చ యథార్హం ప్రతిపూజితః |]
విభీషణోఽపి ధర్మాత్మా సహ తైర్నైరృతర్షభైః |
లబ్ధ్వా కులధనం రాజా లంకాం ప్రాయాద్విభీషణః || 88 ||

స రాజ్యమఖిలం శాసన్నిహతారిర్మహాయశాః |
రాఘవః పరమోదారః శశాస పరయా ముదా || 89 ||

ఉవాచ లక్ష్మణం రామో ధర్మజ్ఞం ధర్మవత్సలః || 90 ||

ఆతిష్ఠ ధర్మజ్ఞ మయా సహేమాం
గాం పూర్వరాజాధ్యుషితాం బలేన |
తుల్యం మయా త్వం పితృభిర్ధృతా యా
తాం యౌవరాజ్యే ధురముద్వహస్వ || 91 ||

సర్వాత్మనా పర్యనునీయమానో
యదా న సౌమిత్రిరుపైతి యోగం |
నియుజ్యమానోఽపి చ యౌవరాజ్యే
తతోఽభ్యషించద్భరతం మహాత్మా || 92 ||

పౌండరీకాశ్వమేధాభ్యాం వాజపేయేన చాసకృత్ |
అన్యైశ్చ వివిధైర్యజ్ఞైరయజత్పార్థివర్షభః || 93 ||

రాజ్యం దశసహస్రాణి ప్రాప్య వర్షాణి రాఘవః |
శతాశ్వమేధానాజహ్రే సదశ్వాన్భూరిదక్షిణాన్ || 94 ||

ఆజానులంబబాహుః స మహాస్కంధః ప్రతాపవాన్ |
లక్ష్మణానుచరో రామః పృథివీమన్వపాలయత్ || 95 ||

రాఘవశ్చాపి ధర్మాత్మా ప్రాప్య రాజ్యమనుత్తమం |
ఈజే బహువిధైర్యజ్ఞైః ససుహృజ్జ్ఞాతిబాంధవః || 96 ||

న పర్యదేవన్విధవా న చ వ్యాలకృతం భయం |
న వ్యాధిజం భయం వాఽపి రామే రాజ్యం ప్రశాసతి || 97 ||

నిర్దస్యురభవల్లోకో నానర్థః కం‍చిదస్పృశత్ |
న చ స్మ వృద్ధా బాలానాం ప్రేతకార్యాణి కుర్వతే || 98 ||

సర్వం ముదితమేవాసీత్సర్వో ధర్మపరోఽభవత్ |
రామమేవానుపశ్యంతో నాభ్యహింసన్పరస్పరం || 99 ||

ఆసన్వర్షసహస్రాణి తథా పుత్రసహస్రిణః |
నిరామయా విశోకాశ్చ రామే రాజ్యం ప్రశాసతి || 100 ||

రామో రామో రామ ఇతి ప్రజానామభవన్కథాః |
రామభూతం జగదభూద్రామే రాజ్యం ప్రశాసతి || 101 ||

రామ భక్తి పాటలు

నిత్యపుష్పా నిత్యఫలాస్తరవః స్కంధవిస్తృతాః |
కాలే వర్షీ చ పర్జన్యః సుఖస్పర్శశ్చ మారుతః || 102 ||

బ్రాహ్మణాః క్షత్రియా వైశ్యాః శూద్రా లోభవివర్జితాః |
స్వకర్మసు ప్రవర్తంతే తుష్టాః స్వైరేవ కర్మభిః || 103 ||

ఆసన్ప్రజా ధర్మరతా రామే శాసతి నానృతాః |
సర్వే లక్షణసంపన్నాః సర్వే ధర్మపరాయణాః || 104 ||

దశ వర్షసహస్రాణి దశ వర్షశతాని చ |
భ్రాతృభిః సహితః శ్రీమాన్రామో రాజ్యమకారయత్ || 105 ||

ధన్యం యశస్యమాయుష్యం రాజ్ఞాం చ విజయావహం |
ఆదికావ్యమిదం త్వార్షం పురా వాల్మీకినా కృతం |
యః పఠేచ్ఛృణుయాల్లోకే నరః పాపాద్విముచ్యతే || 106 ||

పుత్రకామస్తు పుత్రాన్వై ధనకామో ధనాని చ |
లభతే మనుజో లోకే శ్రుత్వా రామాభిషేచనం || 107 ||

మహీం విజయతే రాజా రిపూంశ్చాప్యధితిష్ఠతి |
రాఘవేణ యథా మాతా సుమిత్రా లక్ష్మణేన చ || 108 ||

భరతేనేవ కైకేయీ జీవపుత్రాస్తథా స్త్రియః |
భవిష్యంతి సదానందాః పుత్రపౌత్రసమన్వితాః || 109 ||

శ్రుత్వా రామాయణమిదం దీర్ఘమాయుశ్చ విన్దతి |
రామస్య విజయం చైవ సర్వమక్లిష్టకర్మణః || 110 ||

శృణోతి య ఇదం కావ్యమార్షం వాల్మీకినా కృతం |
శ్రద్దధానో జితక్రోధో దుర్గాణ్యతితరత్యసౌ || 111 ||

సమాగమం ప్రవాసాంతే లభతే చాపి బాంధవైః |
ప్రార్థితాంశ్చ వరాన్సర్వాన్ప్రాప్నుయాదిహ రాఘవాత్ || 112 ||

శ్రవణేన సురాః సర్వే ప్రీయంతే సం‍ప్రశృణ్వతాం |
వినాయకాశ్చ శాంయంతి గృహే తిష్ఠంతి యస్య వై || 113 ||

విజయేతి మహీం రాజా ప్రవాసీ స్వస్తిమాన్వ్రజేత్ |
స్త్రియో రజస్వలాః శ్రుత్వా పుత్రాన్ సూయురనుత్తమాన్ || 114 ||

పూజయంశ్చ పఠంశ్చేమమితిహాసం పురాతనం |
సర్వపాపాత్ప్రముచ్యేత దీర్ఘమాయురవాప్నుయాత్ || 115 ||

ప్రణంయ శిరసా నిత్యం శ్రోతవ్యం క్షత్రియైర్ద్విజాత్ |
ఐశ్వర్యం పుత్రలాభశ్చ భవిష్యతి న సంశయః || 116 ||

రామాయణమిదం కృత్స్నం శృణ్వతః పఠతః సదా |
ప్రీయతే సతతం రామః స హి విష్ణుః సనాతనః || 117 ||

ఆదిదేవో మహాబాహుర్హరిర్నారాయణః ప్రభుః |
సాక్షాద్రామో రఘుశ్రేష్ఠః శేషో లక్ష్మణ ఉచ్యతే || 118 ||

కుటుంబవృద్ధిం ధనధాన్యవృద్ధిం
స్త్రియశ్చ ముఖ్యాః సుఖముత్తమం చ |
శృత్వా శుభం కావ్యమిదం మహార్థం
ప్రాప్నోతి సర్వాం భువి చార్థసిద్ధిం || 119 ||

ఆయుష్యమారోగ్యకరం యశస్యం
సౌభ్రాతృకం బుద్ధికరం సుఖం చ |
శ్రోతవ్యమేతన్నియమేన సద్భి-
-రాఖ్యానమోజస్కరమృద్ధికామైః || 120 ||

ఏవమేతత్పురావృత్తమాఖ్యానం భద్రమస్తు వః |
ప్రవ్యాహరత విస్రబ్ధం బలం విష్ణోః ప్రవర్ధతాం || 121 ||

దేవాశ్చ సర్వే తుష్యంతి గ్రహణాచ్ఛ్రవణాత్తథా |
రామాయణస్య శ్రవణాత్తుష్యంతి పితరస్తథా || 122 ||

భక్త్యా రామస్య యే చేమాం సంహితామృషిణా కృతాం |
లేఖయంతీహ చ నరాస్తేషాం వాసస్త్రివిష్టపే || 123 ||

ఇత్యార్షే శ్రీమద్రామాయణే వాల్మీకీయే ఆదికావ్యే చతుర్వింశతిసహస్రికాయాం సంహితాయాం యుద్ధకాండే శ్రీరామపట్టాభిషేకో నామ ఏకత్రింశదుత్తరశతతమః సర్గః || 124 ||