శ్రీ దండపాణి పంచరత్నం

చండపాపహరపాదసేవనం
గండశోభివరకుండలద్వయం |
దండితాఖిలసురారిమండలం
దండపాణిమనిశం విభావయే || 1 ||
కాలకాలతనుజం కృపాలయం
బాలచంద్రవిలసజ్జటాధరం |
చేలధూతశిశువాసరేశ్వరం
దండపాణిమనిశం విభావయే || 2 ||
తారకేశసదృశాననోజ్జ్వలం
తారకారిమఖిలార్థదం జవాత్ |
తారకం నిరవధేర్భవాంబుధే-
-ర్దండపాణిమనిశం విభావయే || 3 ||
తాపహారినిజపాదసంస్తుతిం
కోపకామముఖవైరివారకం |
ప్రాపకం నిజపదస్య సత్వరం
దండపాణిమనిశం విభావయే || 4 ||
కామనీయకవినిర్జితాంగజం
రామలక్ష్మణకరాంబుజార్చితం |
కోమలాంగమతిసుందరాకృతిం
దండపాణిమనిశం విభావయే || 5 ||
ఇతి శృంగేరిజగద్గురు శ్రీసచ్చిదానందశివాభినవనృసింహభారతీ స్వామిభిః విరచితం శ్రీదండపాణి పంచరత్నం |

శ్రీ దండాయుధపాణ్యష్టకం

యః పూర్వం శివశక్తినామకగిరిద్వంద్వే హిడింబాసురే-
-ణానీతే ఫళినీస్థలాంతరగతే కౌమారవేషోజ్జ్వలః |
ఆవిర్భూయ ఘటోద్భవాయ మునయే భూయో వరాన్ ప్రాదిశత్
శ్రీదండాయుధపాణిరాత్తకరుణః పాయాదపాయాత్స మాం || 1 ||
శ్రీమత్పుష్యరథోత్సవేఽన్నమధుదుగ్ధాద్యైః పదార్థోత్తమైః
నానాదేశసమాగతైరగణితైర్యః కావడీసంభృతైః |
భక్తౌఘైరభిషేచితో బహువరాంస్తేభ్యో దదాత్యాదరాత్
శ్రీదండాయుధపాణిరాత్తకరుణః పాయాదపాయత్స మాం || 2 ||
నానాదిగ్భ్య ఉపాగతా నిజమహావేశాన్వితాః సుందరీః
తాసామేత్య నిశాసు యః సుమశరానందానుభూతిచ్ఛలాత్ |
గోపీనాం యదునాథవన్నిజపరానందం తనోతి స్ఫుటం
శ్రీదండాయుధపాణిరాత్తకరుణః పాయాదపాయాత్స మాం || 3 ||
దుష్టానామిహ భూతభావిభవతాం దుర్మార్గసంచారిణాం
కష్టాహంకృతిజన్యకిల్బిషవశాచ్ఛిష్టప్రవిధ్వంసినాం |
శిక్షార్థం నిజపాణినోద్వహతి యో దండాభిధానాయుధం
శ్రీదండాయుధపాణిరాత్తకరుణః పాయాదపాయాత్స మాం || 4 ||
పూర్వం తారకసంజ్ఞకం దితిసుతం యః శూరపద్మాసురం
సింహాస్యం చ నిహత్య వాసవముఖాన్ దేవాన్ జుగోపాఖిలాన్ |
శ్రీవల్ల్యా సహితశ్చ నిస్తులయశాః శ్రీదేవసేన్యా యుతః
శ్రీదండాయుధపాణిరాత్తకరుణః పాయాదపాయాత్స మాం || 5 ||
యస్యాంగస్థితరోమకూపనికరే బ్రహ్మాండకోటిచ్ఛటాః
సౌధాగ్రస్థగవాక్షరంధ్రవిచరత్పీలూపమా ఏవ తాః |
లక్ష్యంతే యమిదృగ్భిరాత్మని తథాభూతస్వవిశ్వాకృతిః
శ్రీదండాయుధపాణిరాత్తకరుణః పాయాదపాయాత్స మాం || 6 ||
సద్యోజాతముఖైశ్చ పంచవదనైః శంభోః సహైకం ముఖం
పార్వత్యా మిలితం విభాతి సతతం యద్వక్త్రషట్కాత్మనా |
తత్తాదృక్ చ్ఛివశక్త్యభేదవిషయవ్యక్త్యుజ్జ్వలాంగం వహన్
శ్రీదండాయుధపాణిరాత్తకరుణః పాయాదపాయాత్స మాం || 7 ||
సత్యం జ్ఞానమనంతమద్వయమితి శ్రుత్యంతవాక్యోదితం
యద్బ్రహ్మాస్తి తదేవ యస్య చ విభోర్మూర్తేః స్వరూపం విదుః |
యోగీంద్రా విమలాశయా హృది నిజానందానుభూత్యున్నతాః
శ్రీదండాయుధపాణిరాత్తకరుణః పాయాదపాయాత్స మాం || 8 ||
ఇదం శ్రీఫళినీదండాయుధపాణ్యష్టకస్తవం |
పఠతామాశు సిద్ధ్యంతి నిఖిలాశ్చ మనోరథాః || 9 ||

ప్రజ్ఞావివర్ధన కార్తికేయ స్తోత్రం

స్కంద ఉవాచ |
యోగీశ్వరో మహాసేనః కార్తికేయోఽగ్నినందనః |
స్కందః కుమారః సేనానీః స్వామీ శంకరసంభవః || 1 ||
గాంగేయస్తాంరచూడశ్చ బ్రహ్మచారీ శిఖిధ్వజః |
తారకారిరుమాపుత్రః క్రౌంచారిశ్చ షడాననః || 2 ||
శబ్దబ్రహ్మసముద్రశ్చ సిద్ధః సారస్వతో గుహః |
సనత్కుమారో భగవాన్ భోగమోక్షఫలప్రదః || 3 ||
శరజన్మా గణాధీశపూర్వజో ముక్తిమార్గకృత్ |
సర్వాగమప్రణేతా చ వాంఛితార్థప్రదర్శనః || 4 ||
అష్టావింశతినామాని మదీయానీతి యః పఠేత్ |
ప్రత్యూషే శ్రద్ధయా యుక్తో మూకో వాచస్పతిర్భవేత్ || 5 ||
మహామంత్రమయానీతి మమ నామానుకీర్తనం |
మహాప్రజ్ఞామవాప్నోతి నాత్ర కార్యా విచారణా || 6 ||
ఇతి శ్రీరుద్రయామలే ప్రజ్ఞావివర్ధనాఖ్యం శ్రీమత్కార్తికేయస్తోత్రం ||

శరవణభవ దేవసేనేశ షట్కం

కరతలరాజచ్ఛక్తే స్వరదపరాభూతకుందసుమగర్వ |
సురవరనిషేవితాంఘ్రే శరవణభవ పాహి దేవసేనేశ || 1 ||
తటిదాభదేహకాంతే కటివిలసత్పీతవర్ణకౌశేయ |
పాటితశూరాసుర భో శరవణభవ పాహి దేవసేనేశ || 2 ||
నీలగ్రీవతనూద్భవ బాలదినేశానకోటినిభదేహ |
కాలప్రతిభటమోదద శరవణభవ పాహి దేవసేనేశ || 3 ||
పదజితపంకజ పంకజభవపంకజనేత్రముఖ్యసురవంద్య |
పదవీం ప్రాపయ మహతీం శరవణభవ పాహి దేవసేనేశ || 4 ||
తారకదైత్యనివారక తారాపతిగర్వహారిషడ్వక్త్ర |
తారక భవాంబురాశేః శరవణభవ పాహి దేవసేనేశ || 5 ||
పర్వతసుతామనోఽంబుజసద్యఃసంజాతవాసరేశతతే |
సర్వశ్రుతిగీతవిభో శరవణభవ పాహి దేవసేనేశ || 6 ||
ఇతి శృంగేరిజగద్గురు శ్రీసచ్చిదానందశివాభినవనృసింహభారతీ స్వామిభిః విరచితం శ్రీ శరవణభవ దేవసేనేశ షట్కం |

శరవణభవ మంత్రాక్షర షట్కం

శక్తిస్వరూపాయ శరోద్భవాయ
శక్రార్చితాయాథ శచీస్తుతాయ |
శమాయ శంభుప్రణవార్థదాయ
శకారరూపాయ నమో గుహాయ || 1 ||
రణన్మణిప్రోజ్జ్వలమేఖలాయ
రమాసనాథప్రణవార్థదాయ |
రతీశపూజ్యాయ రవిప్రభాయ
రకారరూపాయ నమో గుహాయ || 2 ||
వరాయ వర్ణాశ్రమరక్షకాయ
వరత్రిశూలాభయమండితాయ |
వలారికన్యాసుకృతాలయాయ
వకారరూపాయ నమో గుహాయ || 3 ||
నగేంద్రకన్యేశ్వరతత్త్వదాయ
నగాధిరూఢాయ నగార్చితాయ |
నగాసురఘ్నాయ నగాలయాయ
నకారరూపాయ నమో గుహాయ || 4 ||
భవాయ భర్గాయ భవాత్మజాయ
భస్మాయమానాద్భుతవిగ్రహాయ |
భక్తేష్టకామప్రదకల్పకాయ
భకారరూపాయ నమో గుహాయ || 5 ||
వల్లీవలారాతిసుతార్చితాయ
వరాంగరాగాంచితవిగ్రహాయ |
వల్లీకరాంభోరుహమర్దితాయ
వకారరూపాయ నమో గుహాయ || 6 ||

షడానన స్తుతిః

శ్రీగౌరీసహితేశఫాలనయనాదుద్భూతమగ్న్యాశుగ-
-వ్యూఢం విష్ణుపదీపయః శరవణే సంభూతమన్యాదృశం |
షోఢావిగ్రహసుందరాస్యమమలం శ్రీకృత్తికాప్రీతయే
శర్వాణ్యంకవిభూషణం స్ఫురతు మచ్చిత్తే గుహాఖ్యం మహః || 1 ||
త్రిషడకృశదృగబ్జః షణ్ముఖాంభోరుహశ్రీః
ద్విషడతులభుజాఢ్యః కోటికందర్పశోభః |
శిఖివరమధిరూఢః శిక్షయన్ సర్వలోకాన్
కలయతు మమ భవ్యం కార్తికేయో మహాత్మా || 2 ||
యద్రూపం నిర్గుణం తే తదిహ గుణమహాయోగిభిర్ధ్యానగంయం
యచ్చాన్యద్విశ్వరూపం తదనవధితయా యోగిభిశ్చాప్యచింత్యం |
షడ్వక్త్రాష్టాదశాక్షాద్యుపహితకరుణామూర్తిరేషైవ భాతి
స్వారాధ్యాశేషదుఃఖప్రశమనబహులీలాస్పదా చాప్యతుల్యా || 3 ||
యచ్ఛ్రీమత్పాదపంకేరుహయుగళమహాపాదుకే స్వస్వమూర్ధ్నా
ధర్తుం విష్ణుప్రముఖ్యా అపి చ సుమనసః ప్రాగకుర్వంస్తపాంసి |
తత్తాదృక్స్థూలభూతం పదకమలయుగం యోగిహృద్ధ్యానగంయం
శ్రీసుబ్రహ్మణ్య సాక్షాత్ స్ఫురతు మమ హృది త్వత్కటాక్షేణ నిత్యం || 4 ||
యస్య శ్రీశముఖామరాశ్చ జగతి క్రీడాం చ బాల్యోద్భవాం
చిత్రారోపితమానుషా ఇవ సమాలోక్యాభవంస్తంభితాః |
లోకోపద్రవకృత్స నారదపశుర్యస్యాభవద్వాహనం
సోఽస్మాన్ పాతు నిరంతరం కరుణయా శ్రీబాలషాణ్మాతురః || 5 ||
యేన సాక్షాచ్చతుర్వక్త్రః ప్రణవార్థవినిర్ణయే |
కారాగృహం ప్రాపితోఽభూత్ సుబ్రహ్మణ్యః స పాతు మాం || 6 ||
కారుణ్యద్రుతపంచకృత్యనిరతస్యానందమూర్తేర్ముఖైః
శ్రీశంభోః సహ పంచభిశ్చ గిరిజావక్త్రం మిలిత్వామలం |
యస్య శ్రీశివశక్త్యభిన్నవపుషో వక్త్రాబ్జషట్కాకృతిం
ధత్తే సోఽసురవంశభూధరపవిః సేనాపతిః పాతు నః || 7 ||
యః శక్త్యా తారకోరఃస్థలమతికఠినం క్రౌంచగోత్రం చ భిత్త్వా
హత్వా తత్సైన్యశేషం నిఖిలమపి చ తాన్ వీరబాహుప్రముఖ్యాన్ |
ఉద్ధృత్వా యుద్ధరంగే సపది చ కుసుమైర్వర్షితో నాకిబృందైః
పాయాదాయాసతోఽస్మాన్ స ఝటితి కరుణారాశిరీశానసూనుః || 8 ||
యద్దూతో వీరబాహుః సపది జలనిధిం వ్యోమమార్గేణ తీర్త్వా
జిత్వా లంకాం సమేత్య ద్రుతమథ నగరీం వీరమాహేంద్రనాంనీం |
దేవానాశ్వాస్య శూరప్రహితమపి బలం తత్సభాం గోపురాదీన్
భిత్త్వా యత్పాదపద్మం పునరపి చ సమేత్యానమత్తం భజేఽహం || 9 ||
యో వైకుంఠాదిదేవైః స్తుతపదకమలో వీరభూతాదిసైన్యైః
సంవీతో యో నభస్తో ఝటితి జలనిధిం ద్యోపథేనైవ తీర్త్వా |
శూరద్వీపోత్తరస్యాం దిశి మణివిలసద్ధేమకూటాఖ్యపుర్యాం
త్వష్టుర్నిర్మాణజాయాం కృతవసతిరభూత్ పాతు నః షణ్ముఖః సః || 10 ||
నానాభూతౌఘవిధ్వంసితనిజపృతనో నిర్జితశ్చ ద్విరావృ-
-త్త్యాలబ్ధస్వావమానే నిజపితరి తతః సంగరే భానుకోపః |
మాయీ యత్పాదభృత్యప్రవరతరమహావీరబాహుప్రణష్ట-
-ప్రాణోఽభూత్ సోఽస్తు నిత్యం విమలతరమహాశ్రేయసే తారకారిః || 11 ||
యేన కృచ్ఛ్రేణ నిహతః సింహవక్త్రో మహాబలః |
ద్విసహస్రభుజో భీమః ససైన్యస్తం గుహం భజే || 12 ||
భూరిభీషణమహాయుధారవ-
-క్షోభితాబ్ధిగణయుద్ధమండలః |
సింహవక్త్రశివపుత్రయో రణః
సింహవక్త్రశివపుత్రయోరివ || 13 ||
శూరాపత్యగణేషు యస్య గణపైర్నష్టేషు సింహాననో
దైత్యః క్రూరబలోఽసురేంద్రసహజః సేనాసహస్రైర్యుతః |
యుద్ధే చ్ఛిన్నభుజోత్తమాంగనికరో యద్బాహువజ్రాహతో
మృత్యుం ప్రాప స మృత్యుజన్యభయతో మాం పాతు వల్లీశ్వరః || 14 ||
అష్టోత్తరసహస్రాండప్రాప్తశూరబలం మహత్ |
క్షణేన యః సంహృతవాన్ స గుహః పాతు మాం సదా || 15 ||
అండభిత్తిపరికంపిభీషణ-
-క్రూరసైన్యపరివారపూర్ణయోః |
శూరపద్మగుహయోర్మహారణః
శూరపద్మగుహయోరివోల్బణః || 16 ||
నానారూపధరశ్చ నిస్తులబలో నానావిధైరాయుధై-
-ర్యుద్ధం దిక్షు విదిక్షు దర్శితమహాకాయోఽండషండేష్వపి |
యః శక్త్యాశు విభిన్నతాముపగతః శూరోఽభవద్వాహనం
కేతుశ్చాపి నమామి యస్య శిరసా తస్యాంఘ్రిపంకేరుహే || 17 ||
కేకికుక్కుటరూపాభ్యాం యస్య వాహనకేతుతాం |
అద్యాపి వహతే శూరస్తం ధ్యాయాంయన్వహం హృది || 18 ||
దేవైః సంపూజితో యో బహువిధసుమనోవర్షిభిర్భూరిహర్షై-
-ర్వృత్రారిం స్వర్గలోకే విపులతరమహావైభవైరభ్యషించత్ |
తద్దత్తాం తస్య కన్యాం స్వయమపి కృపయా దేవయానాముదూహ్య
శ్రీమత్కైలాసమాప ద్రుతమథ లవలీం చోద్వహంస్తం భజేఽహం || 19 ||
తత్రానంతగుణాభిరామమతులం చాగ్రే నమంతం సుతం
యం దృష్ట్వా నిఖిలప్రపంచపితరావాఘ్రాయ మూర్ధ్న్యాదరాత్ |
స్వాత్మానందసుఖాతిశాయి పరమానందం సమాజగ్మతుః
మచ్చిత్తభ్రమరో వసత్వనుదినం తత్పాదపద్మాంతరే || 20 ||
దుష్పుత్రైర్జననీ సతీ పతిమతీ కోపోద్ధతైః స్వైరిణీ-
-రండాసీత్యతినిందితాపి న తథా భూయాద్యథా తత్త్వతః |
దుష్పాషండిజనైర్దురాగ్రహపరైః స్కాందం పురాణం మహత్
మిథ్యేత్యుక్తమపి క్వచిచ్చ న తథా భూయాత్తథా సత్యతః || 21 ||
కిం తు తద్దూషణాత్తేషామేవ కుత్సితజన్మనాం |
ఐహికాముష్మికమహాపురుషార్థక్షయో భవేత్ || 22 ||
యత్సంహితాషట్కమధ్యే ద్వితీయా సూతసంహితా |
భాతి వేదశిరోభూషా స్కాందం తత్కేన వర్ణ్యతే || 23 ||
యస్య శంభౌ పరా భక్తిర్యస్మిన్నీశకృపామలా |
అపాంసులా యస్య మాతా తస్య స్కాందే భవేద్రతిః || 24 ||
షడాననస్తుతిమిమాం యో జపేదనువాసరం |
ధర్మమర్థం చ కామం చ మోక్షం చాపి స విందతి || 25 ||

శ్రీ షణ్ముఖ దండకం

శ్రీపార్వతీపుత్ర, మాం పాహి వల్లీశ, త్వత్పాదపంకేజ సేవారతోఽహం, త్వదీయాం నుతిం దేవభాషాగతాం కర్తుమారబ్ధవానస్మి, సంకల్పసిద్ధిం కృతార్థం కురు త్వం |
భజే త్వాం సదానందరూపం, మహానందదాతారమాద్యం, పరేశం, కలత్రోల్లసత్పార్శ్వయుగ్మం, వరేణ్యం, విరూపాక్షపుత్రం, సురారాధ్యమీశం, రవీంద్వగ్నినేత్రం, ద్విషడ్బాహు సంశోభితం, నారదాగస్త్యకణ్వాత్రిజాబాలివాల్మీకివ్యాసాది సంకీర్తితం, దేవరాట్పుత్రికాలింగితాంగం, వియద్వాహినీనందనం, విష్ణురూపం, మహోగ్రం, ఉదగ్రం, సుతీక్షం, మహాదేవవక్త్రాబ్జభానుం, పదాంభోజసేవా సమాయాత భక్తాళి సంరక్షణాయత్త చిత్తం, ఉమా శర్వ గంగాగ్ని షట్కృత్తికా విష్ణు బ్రహ్మేంద్ర దిక్పాల సంపూతసద్యత్న నిర్వర్తితోత్కృష్ట సుశ్రీతపోయజ్ఞ సంలబ్ధరూపం, మయూరాధిరూఢం, భవాంభోధిపోతం, గుహం వారిజాక్షం, గురుం సర్వరూపం, నతానాం శరణ్యం, బుధానాం వరేణ్యం, సువిజ్ఞానవేద్యం, పరం, పారహీనం, పరాశక్తిపుత్రం, జగజ్జాల నిర్మాణ సంపాలనాహార్యకారం, సురాణాం వరం, సుస్థిరం, సుందరాంగం, స్వభాక్తాంతరంగాబ్జ సంచారశీలం, సుసౌందర్యగాంభీర్య సుస్థైర్యయుక్తం, ద్విషడ్బాహు సంఖ్యాయుధ శ్రేణిరంయం, మహాంతం, మహాపాపదావాగ్ని మేఘం, అమోఘం, ప్రసన్నం, అచింత్య ప్రభావం, సుపూజా సుతృప్తం, నమల్లోక కల్పం, అఖండ స్వరూపం, సుతేజోమయం, దివ్యదేహం, భవధ్వాంతనాశాయసూర్యం, దరోన్మీలితాంభోజనేత్రం, సురానీక సంపూజితం, లోకశస్తం, సుహస్తాధృతానేకశస్త్రం, నిరాలంబమాభాసమాత్రం శిఖామధ్యవాసం, పరం ధామమాద్యంతహీనం, సమస్తాఘహారం, సదానందదం, సర్వసంపత్ప్రదం, సర్వరోగాపహం, భక్తకార్యార్థసంపాదకం, శక్తిహస్తం, సుతారుణ్యలావణ్యకారుణ్యరూపం, సహస్రార్క సంకాశ సౌవర్ణహారాళి సంశోభితం, షణ్ముఖం, కుండలానాం విరాజత్సుకాంత్యం చిత్తేర్గండభాగైః సుసంశోభితం, భక్తపాలం, భవానీసుతం, దేవమీశం, కృపావారికల్లోల భాస్వత్కటాక్షం, భజే శర్వపుత్రం, భజే కార్తికేయం, భజే పార్వతేయం, భజే పాపనాశం, భజే బాహులేయం, భజే సాధుపాలం, భజే సర్పరూపం, భజే భక్తిలభ్యం, భజే రత్నభూషం, భజే తారకారిం, దరస్మేరవక్త్రం, శిఖిస్థం, సురూపం, కటిన్యస్త హస్తం, కుమారం, భజేఽహం మహాదేవ, సంసారపంకాబ్ధి సంమగ్నమజ్ఞానినం పాపభూయిష్ఠమార్గే చరం పాపశీలం, పవిత్రం కురు త్వం ప్రభో, త్వత్కృపావీక్షణైర్మాం ప్రసీద, ప్రసీద ప్రపన్నార్తిహారాయ సంసిద్ధ, మాం పాహి వల్లీశ, శ్రీదేవసేనేశ, తుభ్యం నమో దేవ, దేవేశ, సర్వేశ, సర్వాత్మకం, సర్వరూపం, పరం త్వాం భజేఽహం భజేఽహం భజేఽహం |

షణ్ముఖ ధ్యాన శ్లోకాః

షడాననం త్రిషణ్ణేత్రం విద్రుమాభం ద్విపాదకం |
ఖడ్గాభయగదాశక్తిఖేటం దక్షిణబాహుభిః || 1 ||
వరపద్మధనుఃశూలవజ్రాన్ వామేన ధారిణం |
వజ్రప్రవాళవైడూర్యప్రత్యుప్తమకుటాన్వితం || 2 ||
పీతాంబరవిభూషాఢ్యం దివ్యగంధానులేపనం |
రత్నాద్యాభరణైర్యుక్తం ప్రసన్నవదనాన్వితం || 3 ||
మయూరేశసమాసీనం సర్వాభరణభూషితం |
గుహం షోడశవేతానం షణ్ముఖం చ విభావయేత్ || 4 ||
– పూర్వముఖ ధ్యానం –
వచద్భువం శశాంకాభం ఏకవక్త్రం త్రిలోచనం |
చతుర్భుజసమాయుక్తం వరాభయసమన్వితం ||
సవ్యే చాన్యే దండయుతం ఊరూహస్తం చ వామకే |
రుద్రాక్షమాలాభరణం భస్మపుండ్రాంకితం క్రమాత్ ||
పురశ్చూడాసమాయుక్తం మౌంజీకౌపీనధారిణం |
అక్షమాలాసమాయుక్తం పాదుకాద్వయభూషితం ||
కాషాయవస్త్రసంయుక్తం వచద్భువం విభావయేత్ ||
– దక్షిణముఖ ధ్యానం –
జగద్భూతం భృంగవర్ణం ఏకవక్త్రం వరాభయం |
శక్తిశూలసమాయుక్తం కరండమకుటాన్వితం |
మయురేశసమాసీనం భావయే చ విశేషతః ||
– నైరృతిముఖ ధ్యానం –
విశ్వభువం చ రక్తాభం ఏకవక్త్రం త్రిలోచనం |
వరాభయకరోపేతం ఖడ్గఖేటకసంయుతం |
మయూరవాహనారూఢం భావయేత్సతతం ముదా ||
– పశ్చిమముఖ ధ్యానం –
శుక్లవర్ణం బ్రహ్మభువం ఏకవక్త్రం త్రిలోచనం |
వరాభయసమాయుక్తం ఘంటానాదసమన్వితం |
మయూరేశసమాసీనం భావయే చ విశేషతః ||
– ఉత్తరముఖ ధ్యానం –
హేమవర్ణం చాగ్నిభువం త్రినేత్రం చైకవక్త్రకం |
వరాభయసమాయుక్తం గదాధ్వజసమన్వితం |
మయూరవాహనారూఢం భావయేద్వహ్నిసంభవం ||
– ఈశానముఖ ధ్యానం –
బృహద్భువం చ స్ఫటికవర్ణాభం చైకవక్త్రకం |
వరాభయసమాయుక్తం త్రినేత్రం యజ్ఞసూత్రకం |
మయూరేశసమాసీనం బృహద్భువం విభావయేత్ ||

శ్రీ షణ్ముఖ పంచరత్న స్తుతిః

స్ఫురద్విద్యుద్వల్లీవలయితమగోత్సంగవసతిం
భవాప్పిత్తప్లుష్టానమితకరుణాజీవనవశాత్ |
అవంతం భక్తానాముదయకరమంభోధర ఇతి
ప్రమోదాదావాసం వ్యతనుత మయూరోఽస్య సవిధే || 1 ||
సుబ్రహ్మణ్యో యో భవేజ్జ్ఞానశక్త్యా
సిద్ధం తస్మిన్దేవసేనాపతిత్వం |
ఇత్థం శక్తిం దేవసేనాపతిత్వం
సుబ్రహ్మణ్యో బిభ్రదేష వ్యనక్తి || 2 ||
పక్షోఽనిర్వచనీయో దక్షిణ ఇతి ధియమశేషజనతాయాః |
జనయతి బర్హీ దక్షిణనిర్వచనాయోగ్యపక్షయుక్తోఽయం || 3 ||
యః పక్షమనిర్వచనం యాతి సమవలంబ్య దృశ్యతే తేన |
బ్రహ్మ పరాత్పరమమలం సుబ్రహ్మణ్యాభిధం పరం జ్యోతిః || 4 ||
షణ్ముఖం హసన్ముఖం సుఖాంబురాశిఖేలనం
సన్మునీంద్రసేవ్యమానపాదపంకజం సదా |
మన్మథాదిశత్రువర్గనాశకం కృపాంబుధిం
మన్మహే ముదా హృది ప్రపన్నకల్పభూరుహం || 5 ||
ఇతి జగద్గురు శృంగేరీపీఠాధిప శ్రీచంద్రశేఖరభారతీ శ్రీపాదైః విరచితా శ్రీషణ్ముఖపంచరత్నస్తుతిః |

 శ్రీ షణ్ముఖ భుజంగ స్తుతిః

హ్రియా లక్ష్ంయా వల్ల్యా సురపృతనయాఽఽలింగితతనుః
మయూరారూఢోఽయం శివవదనపంకేరుహరవిః |
షడాస్యో భక్తానామచలహృదివాసం ప్రతనవై
ఇతీమం బుద్ధిం ద్రాగచలనిలయః సంజనయతి || 1 ||
స్మితన్యక్కృతేందుప్రభాకుందపుష్పం
సితాభ్రాగరుప్రష్ఠగంధానులిప్తం |
శ్రితాశేషలోకేష్టదానామరద్రుం
సదా షణ్ముఖం భావయే హృత్సరోజే || 2 ||
శరీరేంద్రియాదావహంభావజాతాన్
షడూర్మీర్వికారాంశ్చ శత్రూన్నిహంతుం |
నతానాం దధే యస్తమాస్యాబ్జషట్కం
సదా షణ్ముఖం భావయే హృత్సరోజే || 3 ||
అపర్ణాఖ్యవల్లీసమాశ్లేషయోగాత్
పురా స్థాణుతో యోఽజనిష్టామరార్థం |
విశాఖం నగే వల్లికాఽఽలింగితం తం
సదా షణ్ముఖం భావయే హృత్సరోజే || 4 ||
గుకారేణ వాచ్యం తమో బాహ్యమంతః
స్వదేహాభయా జ్ఞానదానేన హంతి |
య ఏనం గుహం వేదశీర్షైకమేయం
సదా షణ్ముఖం భావయే హృత్సరోజే || 5 ||
యతః కర్మమార్గో భువి ఖ్యాపితస్తం
స్వనృత్యే నిమిత్తస్య హేతుం విదిత్వా |
వహత్యాదరాన్మేఘనాదానులాసీ
సదా షణ్ముఖం భావయే హృత్సరోజే || 6 ||
కృపావారిరాశిర్నృణామాస్తికత్వం
దృఢం కర్తుమద్యాపి యః కుక్కుటాదీన్ |
భృశం పాచితాన్ జీవయన్రాజతే తం
సదా షణ్ముఖం భావయే హృత్సరోజే || 7 ||
భుజంగప్రయాతేన వృత్తేన క్లుప్తాం
స్తుతిం షణ్ముఖస్యాదరాద్యే పఠంతి |
సుపుత్రాయురారోగ్యసంపద్విశిష్టాన్
కరోత్యేవ తాన్ షణ్ముఖః సద్విదగ్ర్యాన్ || 8 ||
ఇతి శ్రీశృంగేరి శారదాపీఠ జగద్గురు శ్రీచంద్రశేఖరభారతీ స్వామిభిః విరచితం శ్రీషణ్ముఖ భుజంగ స్తుతిః |

శ్రీ షణ్ముఖ షట్కం

గిరితనయాసుత గాంగపయోదిత గంధసువాసిత బాలతనో
గుణగణభూషణ కోమలభాషణ క్రౌంచవిదారణ కుందతనో |
గజముఖసోదర దుర్జయదానవసంఘవినాశక దివ్యతనో
జయ జయ హే గుహ షణ్ముఖ సుందర దేహి రతిం తవ పాదయుగే || 1 ||
ప్రతిగిరిసంస్థిత భక్తహృదిస్థిత పుత్రధనప్రద రంయతనో
భవభయమోచక భాగ్యవిధాయక భూసుతవార సుపూజ్యతనో |
బహుభుజశోభిత బంధవిమోచక బోధఫలప్రద బోధతనో
జయ జయ హే గుహ షణ్ముఖ సుందర దేహి రతిం తవ పాదయుగే || 2 ||
శమధనమానిత మౌనిహృదాలయ మోక్షకృదాలయ ముగ్ధతనో
శతమఖపాలక శంకరతోషక శంఖసువాదక శక్తితనో |
దశశతమన్మథ సన్నిభసుందర కుండలమండిత కర్ణవిభో
జయ జయ హే గుహ షణ్ముఖ సుందర దేహి రతిం తవ పాదయుగే || 3 ||
గుహ తరుణారుణచేలపరిష్కృత తారకమారక మారతనో
జలనిధితీరసుశోభివరాలయ శంకరసన్నుత దేవగురో |
విహితమహాధ్వరసామనిమంత్రిత సౌంయహృదంతర సోమతనో
జయ జయ హే గుహ షణ్ముఖ సుందర దేహి రతిం తవ పాదయుగే || 4 ||
లవలికయా సహ కేలికలాపర దేవసుతార్పిత మాల్యతనో
గురుపదసంస్థిత శంకరదర్శిత తత్త్వమయప్రణవార్థవిభో |
విధిహరిపూజిత బ్రహ్మసుతార్పిత భాగ్యసుపూరక యోగితనో
జయ జయ హే గుహ షణ్ముఖ సుందర దేహి రతిం తవ పాదయుగే || 5 ||
కలిజనపాలన కంజసులోచన కుక్కుటకేతన కేలితనో
కృతబలిపాలన బర్హిణవాహన ఫాలవిలోచనశంభుతనో |
శరవణసంభవ శత్రునిబర్హణ చంద్రసమానన శర్మతనో
జయ జయ హే గుహ షణ్ముఖ సుందర దేహి రతిం తవ పాదయుగే || 6 ||
సుఖదమనంతపదాన్విత రామసుదీక్షిత సత్కవిపద్యమిదం
శరవణ సంభవ తోషదమిష్టదమష్టసుసిద్ధిదమార్తిహరం |
పఠతి శృణోతి చ భక్తియుతో యది భాగ్యసమృద్ధిమథో లభతే
జయ జయ హే గుహ షణ్ముఖ సుందర దేహి రతిం తవ పాదయుగే || 7 ||
ఇతి శ్రీఅనంతరామదీక్షిత కృతం షణ్ముఖ షట్కం ||

శ్రీ షణ్ముఖ షట్పదీ స్తవః

మయూరాచలాగ్రే సదారం వసంతం
ముదారం దదానం నతేభ్యో వరాంశ్చ |
దధానం కరాంభోజమధ్యే చ శక్తిం
సదా షణ్ముఖం భావయే హృత్సరోజే || 1 ||
గిరీశాస్యవారాశిపూర్ణేందుబింబం
కురంగాంకధిక్కారివక్త్రారవిందం |
సురేంద్రాత్మజాచిత్తపాథోజభానుం
సదా షణ్ముఖం భావయే హృత్సరోజే || 2 ||
నతానాం హి రాజ్ఞాం గుణానాం చ షణ్ణాం
కృపాభారతో యో ద్రుతం బోధనాయ |
షడాస్యాంబుజాతాన్యగృహ్ణాత్పరం తం
సదా షణ్ముఖం భావయే హృత్సరోజే || 3 ||
పురా తారకం యో విజిత్యాజిమధ్యే
సురాన్దుఃఖముక్తాంశ్చకారాశు మోదాత్ |
తమానందకందం కృపావారిరాశిం
సదా షణ్ముఖం భావయే హృత్సరోజే || 4 ||
శరాణాం వనే జాతమేనం హి బాలం
యతః కృత్తికాః పాయయంతి స్మ దుగ్ధం |
తతః కార్తికేయం వదంతీహ యం తం
సదా షణ్ముఖం భావయే హృత్సరోజే || 5 ||
హరంతం చ బాఢం తమో హార్దగాఢం
గవానాద్యయా చాతిమోదేన లీఢం |
సురేంద్రస్య పుత్ర్యా చ గాఢోపగూఢం
సదా షణ్ముఖం భావయే హృత్సరోజే || 6 ||
ఇయం షట్పదీ యస్య వక్త్రారవిందే
విహారం కరోత్యాదరాన్నిత్యమేవ |
షడాస్యః కృపాతః సమస్తాశ్చ విద్యా
వితీర్యాశు తస్మై స్వభక్తిం దదాతి || 7 ||
ఇతి శ్రీశృంగేరిజగద్గురు శ్రీసచ్చిదానంద శివాభినవనృసింహభారతీ స్వామిభిః విరచితం శ్రీ షణ్ముఖ షట్పదీ స్తవః |