MATANGI Stotras & Hymns - Read Sacred Verses

శ్రీ మాతంగీ అష్టోత్తరశతనామావళిః

శ్రీ మాతంగీ అష్టోత్తరశతనామావళిః.

Telugu

శ్రీ మాతంగీ అష్టోత్తరశతనామావళిః

శ్రీ శ్యామలా కవచం

శ్రీ శ్యామలా కవచం.

Telugu

Read Stotra

శ్రీ శ్యామలా కవచం

శ్రీ దేవ్యువాచ |
సాధుసాధు మహాదేవ కథయస్వ మహేశ్వర |
యేన సంపద్విధానేన సాధకానాం జయప్రదం || 1 ||
వినా జపం వినా హోమం వినా మంత్రం వినా నుతిం |
యస్య స్మరణమాత్రేణ సాధకో ధరణీపతిః || 2 ||
శ్రీ భైరవ ఉవాచ |
శృణు దేవి ప్రవక్ష్యామి మాతంగీకవచం పరం |
గోపనీయం ప్రయత్నేన మౌనేన జపమాచరేత్ || 3 ||
మాతంగీకవచం దివ్యం సర్వరక్షాకరం నృణాం |
కవిత్వం చ మహత్వం చ గజావాజిసుతాదయః || 4 ||
శుభదం సుఖదం నిత్యమణిమాదిప్రదాయకం |
బ్రహ్మవిష్ణుమహేశానాం తేషామాద్యా మహేశ్వరీ || 5 ||
శ్లోకార్ధం శ్లోకమేకం వా యస్తు సంయక్పఠేన్నరః |
తస్య హస్తే సదైవాస్తే రాజ్యలక్ష్మీర్న సంశయః || 6 ||
సాధకః శ్యామలాం ధ్యాయన్ కమలాసనసంస్థితః |
యోనిముద్రాం కరే బధ్వా శక్తిధ్యానపరాయణః || 7 ||
కవచం తు పఠేద్యస్తు తస్య స్యుః సర్వసంపదః |
పుత్రపౌత్రాదిసంపత్తిరంతే ముక్తిశ్చ శాశ్వతీ || 8 ||
బ్రహ్మరంధ్రం సదా పాయాచ్ఛ్యామలా మంత్రనాయికా |
లలాటం రక్షతాం నిత్యం కదంబేశీ సదా మమ || 9 ||
భ్రువౌ పాయచ్చ సుముఖీ అవ్యాన్నేత్రే చ వైణికీ |
వీణావతీ నాసికాం చ ముఖం రక్షతు మంత్రిణీ || 10 ||
సంగీతయోగినీ దంతాన్ అవ్యాదోష్ఠౌ శుకప్రియా |
చుబుకం పాతు మే శ్యామా జిహ్వాం పాయాన్మహేశ్వరీ || 11 ||
కర్ణౌ దేవీ స్తనౌ కాళీ పాతు కాత్యాయనీ ముఖం |
నీపప్రియా సదా రక్షేదుదరం మమ సర్వదా || 12 ||
ప్రియంకరీ ప్రియవ్యాపీ నాభిం రక్షతు ముద్రిణీ |
స్కంధౌ రక్షతు శర్వాణీ భుజౌ మే పాతు మోహినీ || 13 ||
కటిం పాతు ప్రధానేశీ పాతు పాదౌ చ పుష్పిణీ |
ఆపాదమస్తకం శ్యామా పూర్వే రక్షతు పుష్టిదా || 14 ||
ఉత్తరే త్రిపురా రక్షేద్విద్యా రక్షతు పశ్చిమే |
విజయా దక్షిణే పాతు మేధా రక్షతు చానలే || 15 ||
ప్రాజ్ఞా రక్షతు నైరృత్యాం వాయవ్యాం శుభలక్షణా |
ఈశాన్యాం రక్షతాద్దేవీ మాతంగీ శుభకారిణీ || 16 ||
ఊర్ధ్వం పాతు సదా దేవీ దేవానాం హితకారిణీ |
పాతళే పాతు మాం నిత్యా వాసుకీ విశ్వరూపిణీ || 17 ||
అకారాదిక్షకారాంతమాతృకారూపధారిణీ |
ఆపాదమస్తకం పాయాదష్టమాతృస్వరూపిణీ || 18 ||
అవర్గసంభవా బ్రాహ్మీ ముఖం రక్షతు సర్వదా |
కవర్గస్థా తు మాహేశీ పాతు దక్షభుజం తథా || 19 ||
చవర్గస్థా తు కౌమారీ పాయాన్మే వామకం భుజం |
దక్షపాదం సమాశ్రిత్య టవర్గం పాతు వైష్ణవీ || 20 ||
తవర్గజన్మా వారాహీ పాయాన్మే వామపాదకం |
తథా పవర్గజేంద్రాణీ పార్శ్వాదీన్ పాతు సర్వదా || 21 ||
యవర్గస్థా తు చాముండా హృద్దోర్మూలే చ మే తథా |
హృదాదిపాణిపాదాంతజఠరాననసంజ్ఞికం || 22 ||
చండికా చ శవర్గస్థా రక్షతాం మమ సర్వదా |
విశుద్ధం కంఠమూలం తు రక్షతాత్షోడశస్వరాః || 23 ||
కకారాది ఠకారాంత ద్వాదశార్ణం హృదంబుజం |
మణిపూరం డాధిఫాంత దశవర్ణస్వరూపిణీ || 24 ||
స్వాధిష్ఠానం తు షట్పత్రం బాదిలాంతస్వరూపిణీ |
వాదిసాంతస్వరూపాఽవ్యాన్మూలాధారం చతుర్దళం || 25 ||
హంక్షార్ణమాజ్ఞా ద్విదళం భ్రువోర్మధ్యం సదావతు |
అకారాదిక్షకారాంతమాతృకాబీజరూపిణి || 26 ||
మాతంగీ మాం సదా రక్షేదాపాదతలమస్తకం |
ఇమం మంత్రం సముద్ధార్య ధారయేద్వామకే భుజే || 27 ||
కంఠే వా ధారయేద్యస్తు స వై దేవో మహేశ్వరః |
తం దృష్ట్వా దేవతాః సర్వాః ప్రణమంతి సుదూరతః || 28 ||
తస్య తేజః ప్రభావేన సంయగ్గంతుం న శక్యతే |
ఇంద్రాదీనాం లభేత్సత్యం భూపతిర్వశగో భవేత్ || 29 ||
వాక్సిద్ధిర్జాయతే తస్య అణిమాద్యష్టసిద్ధయః |
అజ్ఞాత్వా కవచం దేవ్యాః శ్యామలాం యో జపేన్నరః || 30 ||
తస్యావశ్యం తు సా దేవీ యోగినీ భక్షయేత్తనుం |
ఇహ లోకే సదా దుఃఖం అతో దుఃఖీ భవిష్యతి || 31 ||
జన్మకోటి సదా మూకో మంత్రసిద్ధిర్న విద్యతే |
గురుపాదౌ నమస్కృత్య యథామంత్రం భవేత్సుధీః || 32 ||
తథా తు కవచం దేవ్యాః సఫలం గురుసేవయా |
ఇహ లోకే నృపో భూత్వా పఠేన్ముక్తో భవిష్యతి || 33 ||
బోధయేత్పరశిష్యాయ దుర్జనాయ సురేశ్వరి |
నిందకాయ కుశీలాయ శక్తిహింసాపరాయ చ || 34 ||
యో దదాతి న సిధ్యేత మాతంగీకవచం శుభం |
న దేయం సర్వదా భద్రే ప్రాణైః కంఠగతైరపి || 35 ||
గోప్యాద్గోప్యతరం గోప్యం గుహ్యాద్గుహ్యతమం మహత్ |
దద్యాద్గురుః సుశిష్యాయ గురుభక్తిపరాయ చ |
శివే నష్టే గురుస్త్రాతా గురౌ నష్టే న కశ్చన || 36 ||
ఇతి శ్రీశక్తితంత్రమహార్ణవే శ్రీ శ్యామలా కవచం |

శ్రీ మాతంగినీ కవచం (త్రైలోక్యమంగళ కవచం)

శ్రీ మాతంగినీ కవచం (త్రైలోక్యమంగళ కవచం).

Telugu

Read Stotra

శ్రీ మాతంగినీ కవచం (త్రైలోక్యమంగళ కవచం)

శ్రీదేవ్యువాచ |
సాధు సాధు మహాదేవ కథయస్వ సురేశ్వర |
మాతంగీకవచం దివ్యం సర్వసిద్ధికరం నృణాం || 1 ||
శ్రీ ఈశ్వర ఉవాచ |
శృణు దేవి ప్రవక్ష్యామి మాతంగీకవచం శుభం |
గోపనీయం మహాదేవి మౌనీ జాపం సమాచరేత్ || 2 ||
అస్య శ్రీమాతంగీకవచస్య దక్షిణామూర్తిరృషిః విరాట్ ఛందః మాతంగీ దేవతా చతుర్వర్గసిద్ధ్యర్థే వినియోగః ||
ఓం శిరో మాతంగినీ పాతు భువనేశీ తు చక్షుషీ |
తోడలా కర్ణయుగళం త్రిపురా వదనం మమ || 3 ||
పాతు కంఠే మహామాయా హృది మాహేశ్వరీ తథా |
త్రిపుష్పా పార్శ్వయోః పాతు గుదే కామేశ్వరీ మమ || 4 ||
ఊరుద్వయే తథా చండీ జంఘయోశ్చ హరప్రియా |
మహామాయా పాదయుగ్మే సర్వాంగేషు కులేశ్వరీ || 5 ||
అంగం ప్రత్యంగకం చైవ సదా రక్షతు వైష్ణవీ |
బ్రహ్మరంధ్రే సదా రక్షేన్మాతంగీ నామ సంస్థితా || 6 ||
రక్షేన్నిత్యం లలాటే సా మహాపిశాచినీతి చ |
నేత్రాయోః సుముఖీ రక్షేద్దేవీ రక్షతు నాసికాం || 7 ||
మహాపిశాచినీ పాయాన్ముఖే రక్షతు సర్వదా |
లజ్జా రక్షతు మాం దంతాన్ చోష్ఠౌ సంమార్జనీకరీ || 8 ||
చిబుకే కంఠదేశే తు ఠకారత్రితయం పునః |
సవిసర్గం మహాదేవి హృదయం పాతు సర్వదా || 9 ||
నాభిం రక్షతు మాం లోలా కాలికావతు లోచనే |
ఉదరే పాతు చాముండా లింగే కాత్యాయనీ తథా || 10 ||
ఉగ్రతారా గుదే పాతు పాదౌ రక్షతు చాంబికా |
భుజౌ రక్షతు శర్వాణీ హృదయం చండభూషణా || 11 ||
జిహ్వాయాం మాతృకా రక్షేత్పూర్వే రక్షతు పుష్టికా |
విజయా దక్షిణే పాతు మేధా రక్షతు వారుణే || 12 ||
నైరృత్యాం సుదయా రక్షేద్వాయవ్యాం పాతు లక్ష్మణా |
ఐశాన్యాం రక్షేన్మాం దేవీ మాతంగీ శుభకారిణీ || 13 ||
రక్షేత్సురేశీ చాగ్నేయ్యాం బగలా పాతు చోత్తరే |
ఊర్ధ్వం పాతు మహాదేవీ దేవానాం హితకారిణీ || 14 ||
పాతాలే పాతు మా నిత్యం వశినీ విశ్వరూపిణీ |
ప్రణవం చ తమోమాయా కామబీజం చ కూర్చకం || 15 ||
మాతంగినీ ఙేయుతాస్త్రం వహ్నిజాయావధిర్మనుః |
సార్ధైకాదశవర్ణా సా సర్వత్ర పాతు మాం సదా || 16 ||
ఇతి తే కథితం దేవి గుహ్యాద్గుహ్యతరం పరం |
త్రైలోక్యమంగళం నామ కవచం దేవదుర్లభం || 17 ||
య ఇదం ప్రపఠేన్నిత్యం జాయతే సంపదాలయం |
పరమైశ్వర్యమతులం ప్రాప్నుయాన్నాత్ర సంశయః || 18 ||
గురుమభ్యర్చ్య విధివత్కవచం ప్రపఠేద్యది |
ఐశ్వర్యం సుకవిత్వం చ వాక్సిద్ధిం లభతే ధ్రువం || 19 ||
నిత్యం తస్య తు మాతంగీ మహిలా మంగలం చరేత్ |
బ్రహ్మా విష్ణుశ్చ రుద్రశ్చ యే దేవాః సురసత్తమాః || 20 ||
బ్రహ్మరాక్షసవేతాలా గ్రహాద్యా భూతజాతయః |
తం దృష్ట్వా సాధకం దేవి లజ్జాయుక్తా భవంతి తే || 21 ||
కవచం ధారయేద్యస్తు సర్వసిద్ధిం లభేద్ధ్రువం |
రాజానోఽపి చ దాసాః స్యుః షట్కర్మాణి చ సాధయేత్ || 22 ||
సిద్ధో భవతి సర్వత్ర కిమన్యైర్బహుభాషితైః |
ఇదం కవచమజ్ఞాత్వా మాతంగీం యో భజేన్నరః || 23 ||
అల్పాయుర్నిర్ధనో మూర్ఖో భవత్యేవ న సంశయః |
గురౌ భక్తిః సదా కార్యా కవచే చ దృఢా మతిః || 24 ||
తస్మై మాతంగినీ దేవీ సర్వసిద్ధిం ప్రయచ్ఛతి || 25 ||
ఇతి నంద్యావర్తే ఉత్తరఖండే మాతంగినీ కవచం ||

శ్రీ మాతంగీ కవచం (సుముఖీ కవచం)

శ్రీ మాతంగీ కవచం (సుముఖీ కవచం).

Telugu

Read Stotra

శ్రీ మాతంగీ కవచం (సుముఖీ కవచం)

శ్రీపార్వత్యువాచ |
దేవదేవ మహాదేవ సృష్టిసంహారకారక |
మాతంగ్యాః కవచం బ్రూహి యది స్నేహోఽస్తి తే మయి || 1 ||
శివ ఉవాచ |
అత్యంతగోపనం గుహ్యం కవచం సర్వకామదం |
తవ ప్రీత్యా మయాఽఽఖ్యాతం నాన్యేషు కథ్యతే శుభే || 2 ||
శపథం కురు మే దేవి యది కించిత్ప్రకాశసే |
అనయా సదృశీ విద్యా న భూతా న భవిష్యతి || 3 ||
ధ్యానం |
శవాసనాం రక్తవస్త్రాం యువతీం సర్వసిద్ధిదాం |
ఏవం ధ్యాత్వా మహాదేవీం పఠేత్కవచముత్తమం || 4 ||
కవచం |
ఉచ్ఛిష్టం రక్షతు శిరః శిఖాం చండాలినీ తతః |
సుముఖీ కవచం రక్షేద్దేవీ రక్షతు చక్షుషీ || 5 ||
మహాపిశాచినీ పాయాన్నాసికాం హ్రీం సదాఽవతు |
ఠః పాతు కంఠదేశం మే ఠః పాతు హృదయం తథా || 6 ||
ఠో భుజౌ బాహుమూలే చ సదా రక్షతు చండికా |
ఐం చ రక్షతు పాదౌ మే సౌః కుక్షిం సర్వతః శివా || 7 ||
ఐం హ్రీం కటిదేశం చ ఆం హ్రీం సంధిషు సర్వదా |
జ్యేష్ఠమాతంగ్యంగులీర్మే అంగుల్యగ్రే నమామి చ || 8 ||
ఉచ్ఛిష్టచాండాలి మాం పాతు త్రైలోక్యస్య వశంకరీ |
శివే స్వాహా శరీరం మే సర్వసౌభాగ్యదాయినీ || 9 ||
ఉచ్ఛిష్టచాండాలి మాతంగి సర్వవశంకరి నమః |
స్వాహా స్తనద్వయం పాతు సర్వశత్రువినాశినీ || 10 ||
అత్యంతగోపనం దేవి దేవైరపి సుదుర్లభం |
భ్రష్టేభ్యః సాధకేభ్యోఽపి ద్రష్టవ్యం న కదాచన || 11 ||
దత్తేన సిద్ధిహానిః స్యాత్సర్వథా న ప్రకాశ్యతాం |
ఉచ్ఛిష్టేన బలిం దత్వా శనౌ వా మంగలే నిశి || 12 ||
రజస్వలాభగం స్పృష్ట్వా జపేన్మంత్రం చ సాధకః |
రజస్వలాయా వస్త్రేణ హోమం కుర్యాత్సదా సుధీః || 13 ||
సిద్ధవిద్యా ఇతో నాస్తి నియమో నాస్తి కశ్చన |
అష్టసహస్రం జపేన్మంత్రం దశాంశం హవనాదికం || 14 ||
భూర్జపత్రే లిఖిత్వా చ రక్తసూత్రేణ వేష్టయేత్ |
ప్రాణప్రతిష్ఠామంత్రేణ జీవన్యాసం సమాచరేత్ || 15 ||
స్వర్ణమధ్యే తు సంస్థాప్య ధారయేద్దక్షిణే కరే |
సర్వసిద్ధిర్భవేత్తస్య అచిరాత్పుత్రవాన్భవేత్ || 16 ||
స్త్రీభిర్వామకరే ధార్యం బహుపుత్రా భవేత్తదా |
వంధ్యా వా కాకవంధ్యా వా మృతవత్సా చ సాంగనా || 17 ||
జీవద్వత్సా భవేత్సాపి సమృద్ధిర్భవతి ధ్రువం |
శక్తిపూజాం సదా కుర్యాచ్ఛివాబలిం ప్రదాపయేత్ || 18 ||
ఇదం కవచమజ్ఞాత్వా మాతంగీ యో జపేత్సదా |
తస్య సిద్ధిర్న భవతి పురశ్చరణలక్షతః || 19 ||
ఇతి శ్రీరుద్రయామలతంత్రే మాతంగీ సుముఖీ కవచం |

శ్రీ మాతంగీ స్తోత్రం 1

శ్రీ మాతంగీ స్తోత్రం 1.

Telugu

Read Stotra

శ్రీ మాతంగీ స్తోత్రం 1

ఈశ్వర ఉవాచ |
ఆరాధ్య మాతశ్చరణాంబుజే తే
బ్రహ్మాదయో విస్తృతకీర్తిమాపుః |
అన్యే పరం వా విభవం మునీంద్రాః
పరాం శ్రియం భక్తిభరేణ చాన్యే || 1
నమామి దేవీం నవచంద్రమౌళే-
-ర్మాతంగినీం చంద్రకళావతంసాం |
ఆంనాయప్రాప్తిప్రతిపాదితార్థం
ప్రబోధయంతీం ప్రియమాదరేణ || 2 ||
వినంరదేవాసురమౌళిరత్నై-
-ర్నీరాజితం తే చరణారవిందం |
భజంతి యే దేవి మహీపతీనాం
వ్రజంతి తే సంపదమాదరేణ || 3 ||
కృతార్థయంతీం పదవీం పదాభ్యా-
-మాస్ఫాలయంతీం కృతవల్లకీం తాం |
మాతంగినీం సద్ధృదయాం ధినోమి
లీలాంశుకాం శుద్ధనితంబబింబాం || 4 ||
తాలీదళేనార్పితకర్ణభూషాం
మాధ్వీమదోద్ఘూర్ణితనేత్రపద్మాం |
ఘనస్తనీం శంభువధూం నమామి
తటిల్లతాకాంతిమనర్ఘ్యభూషాం || 5 ||
చిరేణ లక్ష్యం నవలోమరాజ్యా
స్మరామి భక్త్యా జగతామధీశే |
వలిత్రయాఢ్యం తమ మధ్యమంబ
నీలోత్పలాంశుశ్రియమావహంత్యాః || 6 ||
కాంత్యా కటాక్షైః కమలాకరాణాం
కదంబమాలాంచితకేశపాశం |
మాతంగకన్యాం హృది భావయామి
ధ్యాయేయమారక్తకపోలబింబం || 7 ||
బింబాధరన్యస్తలలామవశ్య-
-మాలీలలీలాలకమాయతాక్షం |
మందస్మితం తే వదనం మహేశి
స్తుత్యానయా శంకరధర్మపత్నీం || 8 ||
మాతంగినీం వాగధిదేవతాం తాం
స్తువంతి యే భక్తియుతా మనుష్యాః |
పరాం శ్రియం నిత్యముపాశ్రయంతి
పరత్ర కైలాసతలే వసంతి || 9 ||
ఉద్యద్భానుమరీచివీచివిలసద్వాసో వసానాం పరాం
గౌరీం సంగతిపానకర్పరకరామానందకందోద్భవాం |
గుంజాహారచలద్విహారహృదయామాపీనతుంగస్తనీం
మత్తస్మేరముఖీం నమామి సుముఖీం శావాసనాసేదుషీం || 10 ||
ఇతి శ్రీరుద్రయామలే మాతంగీ స్తోత్రం |

శ్రీ మాతంగీ స్తోత్రం 2

శ్రీ మాతంగీ స్తోత్రం 2.

Telugu

Read Stotra

శ్రీ మాతంగీ స్తోత్రం 2

మాతంగీం మధుపానమత్తనయనాం మాతంగ సంచారిణీం
కుంభీకుంభవివృత్తపీవరకుచాం కుంభాదిపాత్రాంచితాం |
ధ్యాయేఽహం మధుమారణైకసహజాం ధ్యాతుః సుపుత్రప్రదాం
శర్వాణీం సురసిద్ధసాధ్యవనితా సంసేవితా పాదుకాం || 1 ||
మాతంగీ మహిషాదిరాక్షసకృతధ్వాంతైకదీపో మణిః
మన్వాదిస్తుత మంత్రరాజవిలసత్సద్భక్త చింతామణిః |
శ్రీమత్కౌలికదానహాస్యరచనా చాతుర్య రాకామణిః
దేవి త్వం హృదయే వసాద్యమహిమే మద్భాగ్య రక్షామణిః || 2 ||
జయ దేవి విశాలాక్షి జయ సర్వేశ్వరి జయ |
జయాంజనగిరిప్రఖ్యే మహాదేవ ప్రియంకరి || 3 ||
మహావిశ్వేశదయితే జయ బ్రహ్మాది పూజితే |
పుష్పాంజలిం ప్రదాస్యామి గృహాణ కులనాయికే || 4 ||
జయ మాతర్మహాకృష్ణే జయ నీలోత్పలప్రభే |
మనోహారి నమస్తేఽస్తు నమస్తుభ్యం వశంకరి || 5 ||
జయ సౌభాగ్యదే నౄణాం లోకమోహిని తే నమః |
సర్వైశ్వర్యప్రదే పుంసాం సర్వవిద్యాప్రదే నమః || 6 ||
సర్వాపదాం నాశకరీం సర్వదారిద్ర్యనాశినీం |
నమో మాతంగతనయే నమశ్చాండాలి కామదే || 7 ||
నీలాంబరే నమస్తుభ్యం నీలాలకసమన్వితే |
నమస్తుభ్యం మహావాణి మహాలక్ష్మి నమోఽస్తు తే || 8 ||
మహామాతంగి పాదాబ్జం తవ నిత్యం నమాంయహం |
ఏతదుక్తం మహాదేవ్యా మాతంగ్యాః స్తోత్రముత్తమం || 9 ||
సర్వకామప్రదం నిత్యం యః పఠేన్మానవోత్తమః |
విముక్తః సకలైః పాపైః సమగ్రం పుణ్యమశ్నుతే || 10 ||
రాజానో దాసతాం యాంతి నార్యో దాసీత్వమాప్నుయుః |
దాసీభూతం జగత్సర్వం శీఘ్రం తస్య భవేద్ధ్రువం || 11 ||
మహాకవీ భవేద్వాగ్భిః సాక్షాద్వాగీశ్వరో భవేత్ |
అచలాం శ్రియమాప్నోతి అణిమాద్యష్టకం లభేత్ || 12 ||
లభేన్మనోరథాన్ సర్వాన్ త్రైలోక్యే నాపి దుర్లభాన్ |
అంతే శివత్వమాప్నోతి నాత్ర కార్యా విచారణా || 13 ||

శ్రీ శ్యామలా దండకం

శ్రీ శ్యామలా దండకం.

Telugu

Read Stotra

శ్రీ శ్యామలా దండకం

ధ్యానం –
మాణిక్యవీణాముపలాలయంతీం
మదాలసాం మంజులవాగ్విలాసాం |
మాహేంద్రనీలద్యుతికోమలాంగీం
మాతంగకన్యాం మనసా స్మరామి || 1 ||
చతుర్భుజే చంద్రకళావతంసే
కుచోన్నతే కుంకుమరాగ శోణే |
పుండ్రేక్షుపాశాంకుశపుష్పబాణ-
-హస్తే నమస్తే జగదేకమాతః || 2 ||
మాతా మరకతశ్యామా మాతంగీ మదశాలినీ |
కుర్యాత్కటాక్షం కళ్యాణీ కదంబవనవాసినీ || 3 ||
జయ మాతంగతనయే జయ నీలోత్పలద్యుతే |
జయ సంగీతరసికే జయ లీలాశుకప్రియే || 4 ||
దండకం –
జయ జనని సుధా సముద్రాంతరుద్యన్ మణిద్వీప సంరూఢ బిల్వాటవీమధ్యకల్పద్రుమాకల్ప కాదంబకాంతార వాసప్రియే కృత్తివాసఃప్రియే సర్వలోకప్రియే |
సాదరారబ్ధ సంగీత సంభావనా సంభ్రమాలోల నీపస్రగాబద్ధచూలీ సనాథత్రికే సానుమత్పుత్రికే | శేఖరీభూత శీతాంశురేఖా మయూఖావలీ బద్ధ సుస్నిగ్ధ నీలాలకశ్రేణిశృంగారితే లోకసంభావితే | కామలీలా ధనుఃసన్నిభ భ్రూలతాపుష్ప సందోహ సందేహ కృల్లోచనే వాక్సుధాసేచనే | చారు గోరోచనా పంక కేలీ లలామాభిరామే సురామే రమే | ప్రోల్లసద్వాలికా మౌక్తికశ్రేణికా చంద్రికా మండలోద్భాసి లావణ్యగండస్థల న్యస్తకస్తూరికాపత్రరేఖా సముద్భూత సౌరభ్య సంభ్రాంత భృంగాంగనా గీతసాంద్రీభవన్మంద్ర తంత్రీస్వరే సుస్వరే భాస్వరే | వల్లకీ వాదన ప్రక్రియా లోల తాలీదలాబద్ధతాటంక భూషావిశేషాన్వితే సిద్ధసంమానితే | దివ్య హాలామదోద్వేల హేలాలసచ్చక్షురాందోలన శ్రీసమాక్షిప్త కర్ణైక నీలోత్పలే పూరితాశేష లోకాభివాంఛా ఫలే శ్రీఫలే | స్వేద బిందూల్లసత్ఫాల లావణ్య నిష్యంద సందోహ సందేహకృన్నాసికా మౌక్తికే సర్వవిశ్వాత్మికే కాలికే | ముగ్ధ మందస్మితోదార వక్త్రస్ఫురత్పూగ తాంబూలకర్పూర ఖండోత్కరే జ్ఞానముద్రాకరే సర్వసంపత్కరే పద్మభాస్వత్కరే | కుందపుష్పద్యుతి స్నిగ్ధ దంతావలీ నిర్మలాలోల కల్లోల సంమేలన స్మేరశోణాధరే చారువీణాధరే పక్వబింబాధరే |
సులలిత నవయౌవనారంభ చంద్రోదయోద్వేల లావణ్య దుగ్ధార్ణవావిర్భవత్కంబుబిబ్బోక భృత్కంధరే సత్కలామందిరే మంథరే | దివ్యరత్నప్రభా బంధురచ్ఛన్న హారాదిభూషా సముద్యోతమానానవద్యాంశు శోభే శుభే | రత్నకేయూర రశ్మిచ్ఛటా పల్లవప్రోల్లసద్దోర్లతా రాజితే యోగిభిః పూజితే | విశ్వదిఙ్మండలవ్యాపి మాణిక్యతేజః స్ఫురత్కంకణాలంకృతే విభ్రమాలంకృతే సాధకైః సత్కృతే | వాసరారంభ వేలా సముజ్జృంభమాణారవింద ప్రతిద్వంద్విపాణిద్వయే సంతతోద్యద్దయే అద్వయే | దివ్య రత్నోర్మికాదీధితి స్తోమసంధ్యాయమానాంగులీ పల్లవోద్యన్నఖేందు ప్రభామండలే సన్నతాఖండలే చిత్ప్రభామండలే ప్రోల్లసత్కుండలే | తారకారాజినీకాశ హారావలిస్మేర చారుస్తనాభోగ భారానమన్మధ్యవల్లీవలిచ్ఛేద వీచీసముల్లాస సందర్శితాకార సౌందర్య రత్నాకరే వల్లకీభృత్కరే కింకర శ్రీకరే | హేమకుంభోపమోత్తుంగ వక్షోజ భారావనంరే త్రిలోకావనంరే | లసద్వృత్త గంభీర నాభీ సరస్తీర శైవాల శంకాకర శ్యామ రోమావలీభూషణే మంజు సంభాషణే | చారు శింజత్కటీ సూత్ర నిర్భర్త్సితానంగ లీలా ధనుః శింజినీడంబరే దివ్యరత్నాంబరే |
పద్మరాగోల్లసన్మేఖలా భాస్వర శ్రోణి శోభా జిత స్వర్ణభూభృత్తలే చంద్రికాశీతలే |
వికసిత నవ కింశుకాతాంర దివ్యాంశుకచ్ఛన్న చారూరుశోభా పరాభూతసిందూర శోణాయమానేంద్ర మాతంగ హస్తార్గలే వైభవానర్గలే శ్యామలే | కోమల స్నిగ్ధ నీలోపలోత్పాదితానంగ తూణీర శంకాకరోదార జంఘాలతే చారులీలాగతే | నంర దిక్పాల సీమంతినీ కుంతల స్నిగ్ధ నీల ప్రభా పుంజ సంజాత దూర్వాంకురాశంక సారంగ సంయోగ రింఖన్నఖేందూజ్జ్వలే ప్రోజ్జ్వలే నిర్మలే | ప్రహ్వ దేవేశ లక్ష్మీశ భూతేశ తోయేశ వాణీశ కీనాశ దైత్యేశ యక్షేశ వాయ్వగ్నికోటీర మాణిక్య సంఘృష్ట బాలాతపోద్దామ లాక్షారసారుణ్య తారుణ్య లక్ష్మీగృహీతాంఘ్రి పద్మే సుపద్మే ఉమే |
సురుచిర నవరత్న పీఠస్థితే సుస్థితే | రత్నపద్మాసనే రత్నసింహాసనే శంఖపద్మద్వయోపాశ్రితే | తత్ర విఘ్నేశ దుర్గా వటు క్షేత్రపాలైర్యుతే | మత్తమాతంగ కన్యాసమూహాన్వితే మంజులా మేనకాద్యంగనా మానితే భైరవైరష్టభిర్వేష్టితే | దేవి వామాదిభిః శక్తిభిః సేవితే | ధాత్రిలక్ష్ంయాది శక్త్యష్టకైః సంయుతే | మాతృకామండలైర్మండితే | యక్ష గంధర్వ సిద్ధాంగనా మండలైరర్చితే | పంచబాణాత్మికే | పంచబాణేన రత్యా చ సంభావితే | ప్రీతిభాజా వసంతేన చానందితే | భక్తిభాజాం పరం శ్రేయసే కల్పసే | యోగినాం మానసే ద్యోతసే | ఛందసామోజసా భ్రాజసే | గీతవిద్యా వినోదాతితృష్ణేన కృష్ణేన సంపూజ్యసే | భక్తిమచ్చేతసా వేధసా స్తూయసే | విశ్వహృద్యేన వాద్యేన విద్యాధరైర్గీయసే |
శ్రవణహరణ దక్షిణక్వాణయా వీణయా కిన్నరైర్గీయసే | యక్ష గంధర్వ సిద్ధాంగనా మండలైరర్చ్యసే | సర్వసౌభాగ్యవాంఛావతీభిర్వధూభిః సురాణాం సమారాధ్యసే | సర్వవిద్యావిశేషాత్మకం చాటుగాథాసముచ్చారణం కంఠమూలోల్లసద్వర్ణరాజిత్రయం కోమలశ్యామలోదారపక్షద్వయం తుండశోభాతిదూరీభవత్కింశుకం తం శుకం లాలయంతీ పరిక్రీడసే | పాణిపద్మద్వయేనాక్షమాలామపి స్ఫాటికీం జ్ఞానసారాత్మకం పుస్తకం చాంకుశం పాశమాబిభ్రతీ యేన సంచింత్యసే తస్య వక్త్రాంతరాత్ గద్యపద్యాత్మికా భారతీ నిస్సరేత్ | యేన వా యావకాభాకృతిర్భావ్యసే తస్య వశ్యా భవంతి స్త్రియః పూరుషాః | యేన వా శాతకుంభద్యుతిర్భావ్యసే సోఽపి లక్ష్మీసహస్రైః పరిక్రీడతే | కిం న సిద్ధ్యేద్వపుః శ్యామలం కోమలం చంద్రచూడాన్వితం తావకం ధ్యాయతః | తస్య లీలాసరో వారిధిః, తస్య కేలీవనం నందనం, తస్య భద్రాసనం భూతలం, తస్య గీర్దేవతా కింకరీ, తస్య చాజ్ఞాకరీ శ్రీః స్వయం | సర్వతీర్థాత్మికే, సర్వమంత్రాత్మికే, సర్వతంత్రాత్మికే, సర్వయంత్రాత్మికే, సర్వపీఠాత్మికే, సర్వతత్త్వాత్మికే, సర్వశక్త్యాత్మికే, సర్వవిద్యాత్మికే, సర్వయోగాత్మికే, సర్వనాదాత్మికే, సర్వశబ్దాత్మికే, సర్వవిశ్వాత్మికే, సర్వదీక్షాత్మికే, సర్వసర్వాత్మికే, సర్వగే, పాహి మాం పాహి మాం పాహి మాం, దేవి తుభ్యం నమో, దేవి తుభ్యం నమో, దేవి తుభ్యం నమః ||
ఇతి శ్రీకాళిదాస కృత శ్రీ శ్యామలా దండకం |

శ్రీ శ్యామలా నవరత్నమాలికా స్తోత్రం

శ్రీ శ్యామలా నవరత్నమాలికా స్తోత్రం.

Telugu

Read Stotra

శ్రీ శ్యామలా నవరత్నమాలికా స్తోత్రం

ఓంకారపంజరశుకీం ఉపనిషదుద్యానకేలికలకంఠీం |
ఆగమవిపినమయూరీం ఆర్యామంతర్విభావయే గౌరీం || 1 ||
దయమానదీర్ఘనయనాం దేశికరూపేణ దర్శితాభ్యుదయాం |
వామకుచనిహితవీణాం వరదాం సంగీతమాతృకాం వందే || 2 ||
శ్యామతనుసౌకుమార్యాం సౌందర్యానందసంపదున్మేషాం |
తరుణిమకరుణాపూరాం మదజలకల్లోలలోచనాం వందే || 3 ||
నఖముఖముఖరితవీణానాదరసాస్వాదనవనవోల్లాసం |
ముఖమంబ మోదయతు మాం ముక్తాతాటంకముగ్ధహసితం తే || 4 ||
సరిగమపధనిరతాం తాం వీణాసంక్రాంతకాంతహస్తాం తాం |
శాంతాం మృదులస్వాంతాం కుచభరతాంతాం నమామి శివకాంతాం || 5 ||
అవటుతటఘటితచూలీతాడితతాలీపలాశతాటంకాం |
వీణావాదనవేలాకంపితశిరసం నమామి మాతంగీం || 6 ||
వీణారవానుషంగం వికచముఖాంభోజమాధురీభృంగం |
కరుణాపూరతరంగం కలయే మాతంగకన్యకాపాంగం || 7 ||
మణిభంగమేచకాంగీం మాతంగీం నౌమి సిద్ధమాతంగీం |
యౌవనవనసారంగీం సంగీతాంభోరుహానుభవభృంగీం || 8 ||
మేచకమాసేచనకం మిథ్యాదృష్టాంతమధ్యభాగం తే |
మాతస్తవ స్వరూపం మంగళసంగీతసౌరభం మన్యే || 9 ||
నవరత్నమాల్యమేతద్రచితం మాతంగకన్యకాభరణం |
యః పఠతి భక్తియుక్తః సః భవేద్వాగీశ్వరః సాక్షాత్ || 10 ||
ఇతి కాళిదాస కృత శ్రీ శ్యామలా నవరత్నమాలికా స్తోత్రం |

శ్రీ శ్యామలా పంచాశత్స్వరవర్ణమాలికా స్తోత్రం

శ్రీ శ్యామలా పంచాశత్స్వరవర్ణమాలికా స్తోత్రం.

Telugu

Read Stotra

శ్రీ శ్యామలా పంచాశత్స్వరవర్ణమాలికా స్తోత్రం

వందేఽహం వనజేక్షణాం వసుమతీం వాగ్దేవి తాం వైష్ణవీం
శబ్దబ్రహ్మమయీం శశాంకవదనాం శాతోదరీం శాంకరీం |
షడ్బీజాం సశివాం సమంచితపదామాధారచక్రేస్థితాం
చిద్రూపాం సకలేప్సితార్థవరదాం బాలాం భజే శ్యామలాం || 1 ||
బాలాం భాస్కరభాసమప్రభయుతాం భీమేశ్వరీం భారతీం
మాణిక్యాంచితహారిణీమభయదాం యోనిస్థితేయం పదాం |
హ్రాం హ్రాం హ్రీం కమయీం రజస్తమహరీం లంబీజమోంకారిణీం
చిద్రూపాం సకలేప్సితార్థవరదాం బాలాం భజే శ్యామలాం || 2 ||
డం ఢం ణం త థమక్షరీం తవ కళాంతాద్యాకృతీతుర్యగాం
దం ధం నం నవకోటిమూర్తిసహితాం నాదం సబిందూకలాం |
పం ఫం మన్త్రఫలప్రదాం ప్రతిపదాం నాభౌ సచక్రేస్థితాం
చిద్రూపాం సకలేప్సితార్థవరదాం బాలాం భజే శ్యామలాం || 3 ||
కం ఖం గం ఘ మయీం గజాస్యజననీం గానప్రియామాగమీం
చం ఛం జం ఝం ఝణ క్వణి ఘణు ఘిణూ ఝంకారపాదాం రమాం |
ఞం టం ఠం హృదయే స్థితాం కిణికిణీ నాదౌ కరౌ కంకణాం
చిద్రూపాం సకలేప్సితార్థవరదాం బాలాం భజే శ్యామలాం || 4 ||
అం ఆం ఇం ఇమయీం ఇహైవ సుఖదామీకార ఉ ఊపమాం
ఋం ౠం లుం సహవర్ణపీఠనిలయే లూంకార ఏం ఐం సదా |
ఓం ఔం అన్నమయే అః స్తవనుతామానందమానందినీం
చిద్రూపాం సకలేప్సితార్థవరదాం బాలాం భజే శ్యామలాం || 5 ||
హం క్షం బ్రహ్మమయీం ద్విపత్రకమలాం భ్రూమధ్యపీఠేస్థితాం
ఇడాపింగళమధ్యదేశగమనామిష్టార్థసందాయినీం |
ఆరోహప్రతిరోహయంత్రభరితాం సాక్షాత్సుషుంనా కలాం
చిద్రూపాం సకలేప్సితార్థవరదాం బాలాం భజే శ్యామలాం || 6 ||
బ్రహ్మేశాది సమస్త మౌనిఋషిభిర్దేవైః సదా ధ్యాయినీం
బ్రహ్మస్థాననివేశినీం తవ కలాం తారం సహస్రాంశకే |
ఖవ్యం ఖవ్యమయీం ఖగేశవినుతాం ఖం రూపిమోంకారిణీం
చిద్రూపాం సకలేప్సితార్థవరదాం బాలాం భజే శ్యామలాం || 7 ||
చక్రాణ్యే సతు సప్తమంతరగతే వర్ణాత్మికే తాం శ్రియం
నాదం బిందుకలామయీంశ్చరహితే నిఃశబ్ద నిర్వ్యాపకే |
నిర్వ్యక్తాం చ నిరంజనీం నిరవయాం శ్రీయంత్రమాత్రాం పరాం
చిద్రూపాం సకలేప్సితార్థవరదాం బాలాం భజే శ్యామలాం || 8 ||
బాలామాలమనోహరాం ప్రతిదినం వాంఛంతి వాచ్యం పఠేత్
వేదే శాస్త్ర వివాదకాలసమయే స్థిత్వా సభామధ్యమే |
పంచాశత్స్వరవర్ణమాలికమియాం జిహ్వాగ్ర సంస్థా పఠే-
-ద్ధర్మార్థాఖిలకామవిక్షితకృపాః సిధ్యంతి మోక్షం తథా || 9 ||
ఇతి శ్రీ శ్యామలా పంచాశత్స్వరవర్ణమాలికా స్తోత్రం |

శ్రీ శ్యామలా షోడశనామ స్తోత్రం

శ్రీ శ్యామలా షోడశనామ స్తోత్రం.

Telugu

Read Stotra

శ్రీ శ్యామలా స్తోత్రం

శ్రీ శ్యామలా స్తోత్రం.

Telugu

Read Stotra

శ్రీ శ్యామలా స్తోత్రం

జయ మాతర్విశాలాక్షి జయ సంగీతమాతృకే |
జయ మాతంగి చండాలి గృహీతమధుపాత్రకే || 1 ||
నమస్తేఽస్తు మహాదేవి నమో భగవతీశ్వరి |
నమస్తేఽస్తు జగన్మాతర్జయ శంకరవల్లభే || 2 ||
జయ త్వం శ్యామలే దేవి శుకశ్యామే నమోఽస్తు తే |
మహాశ్యామే మహారామే జయ సర్వమనోహరే || 3 ||
జయ నీలోత్పలప్రఖ్యే జయ సర్వవశంకరి |
జయ త్వజాత్వసంస్తుత్యే లఘుశ్యామే నమోఽస్తు తే || 4 ||
నమో నమస్తే రక్తాక్షి జయ త్వం మదశాలిని |
జయ మాతర్మహాలక్ష్మి వాగీశ్వరి నమోఽస్తు తే || 5 ||
నమ ఇంద్రాదిసంస్తుత్యే నమో బ్రహ్మాదిపూజితే |
నమో మరకతప్రఖ్యే శంఖకుండలశోభితే || 6 ||
జయ త్వం జగదీశాని లోకమోహిని తే నమః |
నమస్తేఽస్తు మహాకృష్ణే నమో విశ్వేశవల్లభే || 7 ||
మహేశ్వరి నమస్తేఽస్తు నీలాంబరసమన్వితే |
నమః కళ్యాణి కృష్ణాంగి నమస్తే పరమేశ్వరి || 8 ||
మహాదేవప్రియకరి నమః సర్వవశంకరి |
మహాసౌభాగ్యదే నౄణాం కదంబవనవాసిని || 9 ||
జయ సంగీతరసికే వీణాహస్తే నమోఽస్తు తే |
జనమోహిని వందే త్వాం బ్రహ్మవిష్ణుశివాత్మికే || 10 ||
వాగ్వాదిని నమస్తుభ్యం సర్వవిద్యాప్రదే నమః |
నమస్తే కులదేవేశి నమో నారీవశంకరి || 11 ||
అణిమాదిగుణాధారే జయ నీలాద్రిసన్నిభే |
శంఖపద్మాదిసంయుక్తే సిద్ధిదే త్వాం భజాంయహం || 12 ||
జయ త్వం వరభూషాంగి వరాంగీం త్వాం భజాంయహం |
దేవీం వందే యోగివంద్యే జయ లోకవశంకరి || 13 ||
సర్వాలంకారసంయుక్తే నమస్తుభ్యం నిధీశ్వరి |
సర్గపాలనసంహారహేతుభూతే సనాతని || 14 ||
జయ మాతంగతనయే జయ నీలోత్పలప్రభే |
భజే శక్రాదివంద్యే త్వాం జయ త్వం భువనేశ్వరి || 15 ||
జయ త్వం సర్వభక్తానాం సకలాభీష్టదాయిని |
జయ త్వం సర్వభద్రాంగీ భక్తాఽశుభవినాశిని || 16 ||
మహావిద్యే నమస్తుభ్యం సిద్ధలక్ష్మి నమోఽస్తు తే |
బ్రహ్మవిష్ణుశివస్తుత్యే భక్తానాం సర్వకామదే || 17 ||
మాతంగీశ్వరవంద్యే త్వాం ప్రసీద మమ సర్వదా |
ఇత్యేతచ్ఛ్యామలాస్తోత్రం సర్వకామసమృద్ధిదం || 18 ||
శుద్ధాత్మా ప్రజపేద్యస్తు నిత్యమేకాగ్రమానసః |
స లభేత్సకలాన్కామాన్ వశీకుర్యాజ్జగత్త్రయం || 19 ||
శీఘ్రం దాసా భవంత్యస్య దేవా యోగీశ్వరాదయః |
రంభోర్వశ్యాద్యప్సరసామవ్యయో మదనో భవేత్ || 20 ||
నృపాశ్చ మర్త్యాః సర్వేఽస్య సదా దాసా భవంతి హి |
లభేదష్టగుణైశ్వర్యం దారిద్ర్యేణ విముచ్యతే || 21 ||
శంఖాది నిధయో ద్వార్స్థాః సాన్నిధ్యం పర్యుపాసతే |
వ్యాచష్టే సర్వశాస్త్రాణి సర్వవిద్యానిధిర్భవేత్ || 22 ||
విముక్తః సకలాపద్భిః లభేత్సంపత్తిముత్తమాం |
మహాపాపోపపాపౌఘైః సశీఘ్రం ముచ్యతే నరః || 23 ||
జాతిస్మరత్వమాప్నోతి బ్రహ్మజ్ఞానమనుత్తమం |
సదాశివత్వమాప్నోతి సోంతే నాత్ర విచారణా || 24 ||

శ్రీ మాతంగీ అష్టోత్తరశతనామ స్తోత్రం

శ్రీ మాతంగీ అష్టోత్తరశతనామ స్తోత్రం.

Telugu

Read Stotra

శ్రీ మాతంగీ అష్టోత్తరశతనామ స్తోత్రం

శ్రీభైరవ్యువాచ |
భగవన్ శ్రోతుమిచ్ఛామి మాతంగ్యాః శతనామకం |
యద్గుహ్యం సర్వతంత్రేషు కేనాపి న ప్రకాశితం || 1 ||
శ్రీభైరవ ఉవాచ |
శృణు దేవి ప్రవక్ష్యామి రహస్యాతిరహస్యకం |
నాఖ్యేయం యత్ర కుత్రాపి పఠనీయం పరాత్పరం || 2 ||
యస్యైకవారపఠనాత్సర్వే విఘ్నా ఉపద్రవాః |
నశ్యంతి తత్క్షణాద్దేవి వహ్నినా తూలరాశివత్ || 3 ||
ప్రసన్నా జాయతే దేవీ మాతంగీ చాస్య పాఠతః |
సహస్రనామపఠనే యత్ఫలం పరికీర్తితం |
తత్కోటిగుణితం దేవీనామాష్టశతకం శుభం || 4 ||
అస్య శ్రీమాతంగ్యష్టోత్తరశతనామస్తోత్రస్య భగవాన్మతంగ ఋషిః అనుష్టుప్ఛందః శ్రీమాతంగీ దేవతా శ్రీమాతంగీ ప్రీతయే జపే వినియోగః |
మహామత్తమాతంగినీ సిద్ధిరూపా
తథా యోగినీ భద్రకాళీ రమా చ |
భవానీ భవప్రీతిదా భూతియుక్తా
భవారాధితా భూతిసంపత్కరీ చ || 1 ||
ధనాధీశమాతా ధనాగారదృష్టి-
-ర్ధనేశార్చితా ధీరవాపీ వరాంగీ |
ప్రకృష్టా ప్రభారూపిణీ కామరూపా
ప్రహృష్టా మహాకీర్తిదా కర్ణనాలీ || 2 ||
కరాళీ భగా ఘోరరూపా భగాంగీ
భగాహ్వా భగప్రీతిదా భీమరూపా |
భవానీ మహాకౌశికీ కోశపూర్ణా
కిశోరీ కిశోరప్రియా నందఈహా || 3 ||
మహాకారణాఽకారణా కర్మశీలా
కపాలీ ప్రసిద్ధా మహాసిద్ధఖండా |
మకారప్రియా మానరూపా మహేశీ
మలోల్లాసినీ లాస్యలీలాలయాంగీ || 4 ||
క్షమా క్షేమశీలా క్షపాకారిణీ చా-
-ఽక్షయప్రీతిదా భూతియుక్తా భవానీ |
భవారాధితా భూతిసత్యాత్మికా చ
ప్రభోద్భాసితా భానుభాస్వత్కరా చ || 5 ||
ధరాధీశమాతా ధరాగారదృష్టి-
-ర్ధరేశార్చితా ధీవరా ధీవరాంగీ |
ప్రకృష్టా ప్రభారూపిణీ ప్రాణరూపా
ప్రకృష్టస్వరూపా స్వరూపప్రియా చ || 6 ||
చలత్కుండలా కామినీ కాంతయుక్తా
కపాలాఽచలా కాలకోద్ధారిణీ చ |
కదంబప్రియా కోటరీ కోటదేహా
క్రమా కీర్తిదా కర్ణరూపా చ కాక్ష్మీః || 7 ||
క్షమాంగీ క్షయప్రేమరూపా క్షయా చ
క్షయాక్షా క్షయాహ్వా క్షయప్రాంతరా చ |
క్షవత్కామినీ క్షారిణీ క్షీరపూర్ణా
శివాంగీ చ శాకంభరీ శాకదేహా || 8 ||
మహాశాకయజ్ఞా ఫలప్రాశకా చ
శకాహ్వాఽశకాహ్వా శకాఖ్యా శకా చ |
శకాక్షాంతరోషా సురోషా సురేఖా
మహాశేషయజ్ఞోపవీతప్రియా చ || 9 ||
జయంతీ జయా జాగ్రతీ యోగ్యరూపా
జయాంగా జపధ్యానసంతుష్టసంజ్ఞా |
జయప్రాణరూపా జయస్వర్ణదేహా
జయజ్వాలినీ యామినీ యాంయరూపా || 10 ||
జగన్మాతృరూపా జగద్రక్షణా చ
స్వధావౌషడంతా విలంబాఽవిలంబా |
షడంగా మహాలంబరూపాసిహస్తా-
పదాహారిణీహారిణీ హారిణీ చ || 11 ||
మహామంగళా మంగళప్రేమకీర్తి-
-ర్నిశుంభచ్ఛిదా శుంభదర్పాపహా చ |
తథాఽఽనందబీజాదిముక్తిస్వరూపా
తథా చండముండాపదా ముఖ్యచండా || 12 ||
ప్రచండాఽప్రచండా మహాచండవేగా
చలచ్చామరా చామరా చంద్రకీర్తిః |
సుచామీకరా చిత్రభూషోజ్జ్వలాంగీ
సుసంగీతగీతా చ పాయాదపాయాత్ || 13 ||
ఇతి తే కథితం దేవి నాంనామష్టోత్తరం శతం |
గోప్యం చ సర్వతంత్రేషు గోపనీయం చ సర్వదా || 14 ||
ఏతస్య సతతాభ్యాసాత్సాక్షాద్దేవో మహేశ్వరః |
త్రిసంధ్యం చ మహాభక్త్యా పఠనీయం సుఖోదయం || 15 ||
న తస్య దుష్కరం కించిజ్జాయతే స్పర్శతః క్షణాత్ |
సుకృతం యత్తదేవాప్తం తస్మాదావర్తయేత్సదా || 16 ||
సదైవ సన్నిధౌ తస్య దేవీ వసతి సాదరం |
అయోగా యే త ఏవాగ్రే సుయోగాశ్చ భవంతి వై || 17 ||
త ఏవ మిత్రభూతాశ్చ భవంతి తత్ప్రసాదతః |
విషాణి నోపసర్పంతి వ్యాధయో న స్పృశంతి తాన్ || 18 ||
లూతావిస్ఫోటకాః సర్వే శమం యాంతి చ తత్క్షణాత్ |
జరాపలితనిర్ముక్తః కల్పజీవీ భవేన్నరః || 19 ||
అపి కిం బహునోక్తేన సాన్నిధ్యం ఫలమాప్నుయాత్ |
యావన్మయా పురా ప్రోక్తం ఫలం సాహస్రనామకం |
తత్సర్వం లభతే మర్త్యో మహామాయాప్రసాదతః || 20 ||
ఇతి శ్రీరుద్రయామలే శ్రీమాతంగీశతనామస్తోత్రం |

Sign In

OTP Verification

Sacred Stotras & Deities

శ్రీ మాతంగీ అష్టోత్తరశతనామావళిః

శ్రీ శ్యామలా కవచం

శ్రీ మాతంగినీ కవచం (త్రైలోక్యమంగళ కవచం)

శ్రీ మాతంగీ కవచం (సుముఖీ కవచం)

శ్రీ మాతంగీ స్తోత్రం 1

శ్రీ మాతంగీ స్తోత్రం 2

శ్రీ శ్యామలా దండకం

శ్రీ శ్యామలా నవరత్నమాలికా స్తోత్రం

శ్రీ శ్యామలా పంచాశత్స్వరవర్ణమాలికా స్తోత్రం

శ్రీ శ్యామలా షోడశనామ స్తోత్రం

శ్రీ శ్యామలా స్తోత్రం

శ్రీ మాతంగీ అష్టోత్తరశతనామ స్తోత్రం

MENU

LINKS

Astrologer Section

Vendor Section

GET ADVICE ON

Download Our Apps