Sacred Stotras & Deities

 శ్రీ నృసింహ స్తోత్రం 2 

కుందేందుశంఖవర్ణ కృతయుగభగవాన్ పద్మపుష్పప్రదాతా
త్రేతాయాం కాంచనాభః పునరపి సమయే ద్వాపరే రక్తవర్ణః |
శంకే సంప్రాప్తకాలే కలియుగసమయే నీలమేఘశ్చ నాభౌ
ప్రద్యోత సృష్టికర్తా పరబలమదనః పాతు మాం నారసింహః || 1 ||
నాసాగ్రం పీనగండం పరబలమదనం బద్ధకేయురహారం
వజ్రం దంష్ట్రాకరాళం పరిమితగణనః కోటిసూర్యాగ్నితేజః |
గాంభీర్యం పింగళాక్షం భ్రుకిటితటముఖం కేశకేశార్ధభాగం
వందే భీమాట్టహాసం త్రిభువనవిజయః పాతు మాం నారసింహః || 2 ||
పాదద్వంద్వం ధరిత్ర్యాం పటుతరవిపులం మేరు మధ్యాహ్నసేతుం
నాభిం బ్రహ్మాండసింధో హృదయమభిముఖం భూతవిధ్వంసనేతః |
ఆహుశ్చక్రంతస్యబాహుం కులిశనఖముఖం చంద్రసూర్యాగ్నినేత్రం |
వక్త్రం వహ్న్యస్య విద్వత్సురగణవినుతః పాతు మాం నారసింహః || 3 ||
ఘోరం భీమం మహోగ్రం స్ఫటికకుటిలతా భీమపాలం పలాక్షం
చోర్ధ్వం కేశం ప్రళయశశిముఖం వజ్రదంష్ట్రాకరాళం |
ద్వాత్రింశద్బాహుయుగ్మం పరిఖగదాశూలపాశాగ్నిధారం
వందే భీమాట్టహాసం నఖగుణవిజయః పాతు మాం నారసింహః || 4 ||
గోకంఠం దారుణాంతం వనవరవిటపీ డిండిడిండోటడింభం
డింభం డింభం డిడింభం దహమపి దహమః ఝంప్రఝంప్రేస్తు ఝంప్రైః |
తుల్యస్తుల్యస్తుతుల్య త్రిఘుమ ఘుమఘుమాం కుంకుమాం కుంకుమాంగం
ఇత్యేవం నారసింహం వహతి కకుభతః పాతు మాం నారసింహః || 5 ||
భూభృద్భూభృద్భుజంగం మకరకరకర ప్రజ్వలజ్జ్వాలమాలం
ఖర్జంతం ఖర్జఖర్జం ఖజఖజఖజితం ఖర్జఖర్జర్జయంతం |
భూభాగం భోగభాగం గగగగ గహనం కద్రుమధృత్యకంఠం
స్వచ్ఛం పుచ్ఛం సుకచ్ఛం స్వచితహితకరః పాతు మాం నారసింహః || 6 ||
ఝుంఝుంఝుంకారకారం జటిమటిజననం జానురూపం జకారం
హంహం హంసస్వరూపం హయశతకకుభం అట్టహాసం వివేశం |
వంవంవం వాయువేగం సురవరవినుతం వామనాక్షం సురేశం
లంలంలం లాలితాక్షం నఖగుణవిజయః పాతు మాం నారసింహః || 7 ||
యం దృష్ట్వా నారసింహం వికృతనఖముఖం తీక్ష్ణదంష్ట్రాకరాళం
పింగాక్షం స్నిగ్ధవర్ణం జితవపుసదృశః కుంచితాగ్రోగ్రతేజాః |
భీతాఽమీదానవేంద్రాః సురభయవినుతిః శక్తినిర్ముక్తహస్తం
నాసాస్యం కిం కిమేతం క్షం వితజనకజః పాతు మాం నారసింహః || 8 ||
శ్రీవత్సాంకం త్రినేత్రం శశిధరధవళం చక్రహస్తం సురేశం
వేదాంగం వేదనాదం వినుతతనువిదం వేదరూపం స్వరూపం |
హోంహోంహోంకారకారం హుతవహనయనం ప్రజ్వలజ్వాలఫాలం
క్షంక్షంక్షం బీజరూపం నరహరివినుతః పాతు మాం నారసింహః || 9 ||
అహో వీర్యమహో శౌర్యం మహాబలపరాక్రమం |
నారసింహం మహాదేవం అహోబలమహాబలం || 10 ||
జ్వాలాఽహోబల మాలోలః క్రోడ కారంజ భార్గవం |
యోగానందశ్ఛత్రవట పావనా నవమూర్తయః || 11 ||
శ్రీమన్నృసింహ విభవే గరుడధ్వజాయ
తాపత్రయోపశమనాయ భవౌషధాయ |
తృష్ణాదివృశ్చికజలాగ్నిభుజంగరోగ-
-క్లేశవ్యయాయ హరయే గురవే నమస్తే ||

 శ్రీ నృసింహ స్తోత్రం –3 (రామసత్కవి కృతం)

శ్రీరమాకుచాగ్రభాసికుంకుమాంకితోరసం
తాపనాంఘ్రిసారసం సదాదయాసుధారసం |
కుందశుభ్రశారదారవిందచంద్రసుందరం
సింహశైలమందిరం నృసింహదేవమాశ్రయే || 1 ||
పాపపాశమోచనం విరోచనేందులోచనం
ఫాలలోచనాదిదేవసన్నుతం మహోన్నతం |
శేషతల్పశాయినం మనోరథప్రదాయినం
సింహశైలమందిరం నృసింహదేవమాశ్రయే || 2 ||
సంచరస్సటాజటాభిరున్నమేఘమండలం
భైరవారవాటహాసభేదిదామిహోదరం |
దీనలోకసాదరం ధరాభరం జటాధరం
సింహశైలమందిరం నృసింహదేవమాశ్రయే || 3 ||
శాకినీపిశాచిఘోరఢాకినీభయంకరం
బ్రహ్మరాక్షసవ్యథా క్షయంకరం శివంకరం |
దేవతాసుహృత్తమం దివాకరం సుధాకరం
సింహశైలమందిరం నృసింహదేవమాశ్రయే || 4 ||
మత్స్యకూర్మక్రోడనారసింహవామనాకృతిం
భార్గవం రఘూద్వహం ప్రలంభగర్పురాపహం |
బుద్ధకల్కివిగ్రహం జగద్విరోధినిగ్రహం
సింహశైలమందిరం నృసింహదేవమాశ్రయే || 5 ||
ధారుణీ వధూమణీ గృహీతపాదపల్లవం
నందగోష్ట్రవల్లవీసతీమనోజ్ఞవల్లభం |
మాయినాం విశారదం భవాంబురాశిపారదం
సింహశైలమందిరం నృసింహదేవమాశ్రయే || 6 ||
మోహతాపహారిణం గదారథాంగధారిణం
శ్రీమనోవిహారిణం విదేహజోర్నివారిణం |
దానవేంద్రవైరిణం తపోధనేష్టకారిణం
సింహశైలమందిరం నృసింహదేవమాశ్రయే || 7 ||
రామసత్కవిప్రణీతమేతదష్టకా శివం
దేవసారసంగ్రహం మహోగ్రపాతకాంతకం |
జల్పితాం నిరంతరం సమస్తకామపూరకం
సింహశైలమందిరం నృసింహదేవమాశ్రయే || 8 ||
ఇతి రామసత్కవి కృత శ్రీ నృసింహ అష్టక స్తోత్రం ||

 శ్రీ నృసింహ స్తోత్రం –4 (బ్రహ్మ కృతం) 

బ్రహ్మోవాచ |
భవానక్షరమవ్యక్తమచింత్యం గుహ్యముత్తమం |
కూటస్థమకృతం కర్తృ సనాతనమనామయం || 1 ||
సాంఖ్యయోగే చ యా బుద్ధిస్తత్త్వార్థపరినిష్ఠితా |
తాం భవాన్ వేదవిద్యాత్మా పురుషః శాశ్వతో ధ్రువః || 2 ||
త్వం వ్యక్తశ్చ తథాఽవ్యక్తస్త్వత్తః సర్వమిదం జగత్ |
భవన్మయా వయం దేవ భవానాత్మా భవాన్ ప్రభుః || 3 ||
చతుర్విభక్తమూర్తిస్త్వం సర్వలోకవిభుర్గురుః |
చతుర్యుగసహస్రేణ సర్వలోకాంతకాంతకః || 4 ||
ప్రతిష్ఠా సర్వభూతానామనంతబలపౌరుషః |
కపిలప్రభృతీనాం చ యతీనాం పరమా గతిః || 5 ||
అనాదిమధ్యనిధనః సర్వాత్మా పురుషోత్తమః |
స్రష్టా త్వం త్వం చ సంహర్తా త్వమేకో లోకభావనః || 6 ||
భవాన్ బ్రహ్మా చ రుద్రశ్చ మహేంద్రో వరుణో యమః |
భవాన్ కర్తా వికర్తా చ లోకానాం ప్రభురవ్యయః || 7 ||
పరాం చ సిద్ధిం పరమం చ దేవం
పరం చ మంత్రం పరమం మనశ్చ |
పరం చ ధర్మం పరమం యశశ్చ
త్వామాహురగ్ర్యం పురుషం పురాణం || 8 ||
పరం చ సత్యం పరమం హవిశ్చ
పరం పవిత్రం పరమం చ మార్గం |
పరం చ హోత్రం పరమం చ యజ్ఞం
త్వామాహురగ్ర్యం పురుషం పురాణం || 9 ||
పరం శరీరం పరమం చ ధామ
పరం చ యోగం పరమాం చ వాణీం |
పరం రహస్యం పరమాం గతిం చ
త్వామాహురగ్ర్యం పురుషం పురాణం || 10 ||
పరం పరస్యాపి పరం చ యత్పరం
పరం పరస్యాపి పరం చ దేవం |
పరం పరస్యాపి పరం ప్రభుం చ
త్వామాహురగ్ర్యం పురుషం పురాణం || 11 ||
పరం పరస్యాపి పరం ప్రధానం
పరం పరస్యాపి పరం చ తత్త్వం |
పరం పరస్యాపి పరం చ ధాతా
త్వామాహురగ్ర్యం పురుషం పురాణం || 12 ||
పరం పరస్యాపి పరం రహస్యం
పరం పరస్యాపి పరం పరం యత్ |
పరం పరస్యాపి పరం తపో యత్
త్వామాహురగ్ర్యం పురుషం పురాణం || 13 ||
పరం పరస్యాపి పరం పరాయణం
పరం చ గుహ్యం చ పరం చ ధామ |
పరం చ యోగం పరమం ప్రభుత్వం
త్వామాహురగ్ర్యం పురుషం పురాణం || 14 ||
ఇతి శ్రీహరివంశే భవిష్యపర్వణి సప్తచత్వారింశోఽధ్యాయే బ్రహ్మ కృత శ్రీ నరసింహ స్తోత్రం |

 శ్రీ నృసింహ స్తోత్రం –5 (శ్రీవాసుదేవానంద సరస్వతి కృతం) 

 జయ జయ భయహారిన్ భక్తచిత్తాబ్జచారిన్
జయ జయ నయచారిన్ దృప్తమత్తారిమారిన్ |
జయ జయ జయశాలిన్ పాహి నః శూరసింహ
జయ జయ దయయార్ద్ర త్రాహి నః శ్రీనృసింహ || 1 ||
అసురసమరధీరస్త్వం మహాత్మాసి జిష్ణో
అమరవిసరవీరస్త్వం పరాత్మాసి విష్ణో |
సదయహృదయ గోప్తా త్వన్న చాన్యో విమోహ
జయ జయ దయయార్ద్ర త్రాహి నః శ్రీనృసింహ || 2 ||
ఖరతరనఖరాస్త్రం స్వారిహత్యై విధత్సే
పరతరవరహస్తం స్వావనాయైవ ధత్సే |
భవభయభయకర్తా కోఽపరాస్తార్క్ష్యవాహ
జయ జయ దయయార్ద్ర త్రాహి నః శ్రీనృసింహ || 3 ||
అసురకులబలారిః స్వేష్టచేతస్తమోఽరిః
సకలఖలబలారిస్త్వం స్వభక్తారివైరీ |
త్వదిత స ఇనదృక్ సత్పక్షపాతీ న చేహ
జయ జయ దయయార్ద్ర త్రాహి నః శ్రీనృసింహ || 4 ||
సకలసురబలారిః ప్రాణిమాత్రాపకారీ
తవ భజకవరారిర్ధర్మవిధ్వంసకారీ |
సురవరవరదృప్తః సోఽప్యరిస్తే హతో హ
జయ జయ దయయార్ద్ర త్రాహి నః శ్రీనృసింహ || 5 ||
దహనాదహహాబ్ధిపాతనా-
-ద్గరదానాద్భృగుపాతనాదపి |
నిజభక్త ఇహావితో యథా
నరసింహాపి సదావ నస్తథా || 6 ||
నిజభృత్యవిభాషితం మితం
ఖలు కర్తుం త్వమృతం దయాకర |
ప్రకటీకృతమిధ్మమధ్యతో
నిజరూపం నరసింహ ధీశ్వర || 7 ||
నారాధనం న హవనం న తపో జపో వా
తీర్థం వ్రతం న చ కృతం శ్రవణాది నో వా |
సేవా కుటుంబభరణాయ కృతాదిదీనా
దీనార్తిహన్ నరహరేఽఘహరే హ నోఽవ || 8 ||
ఇతి శ్రీమత్పరమహంస పరివ్రాజకాచార్య శ్రీవాసుదేవానందసరస్వతీ విరచితం శ్రీ నరసింహ స్తోత్రం |

శ్రీ నృసింహ స్తోత్రం –6 (నారకా కృతం) 

నారకా ఊచుః |
ఓం నమో భగవతే తస్మై కేశవాయ మహాత్మనే |
యన్నామకీర్తనాత్సద్యో నరకాగ్నిః ప్రశాంయతి || 1 ||
భక్తప్రియాయ దేవాయ పరస్మై హరయే నమః | [రక్షాయ] లోకనాథాయ శాంతాయ యజ్ఞేశాయాదిమూర్తయే || 2 ||
అనంతాయాప్రమేయాయ నరసింహాయ తే నమః |
నారాయణాయ గురవే శంఖచక్రగదాభృతే || 3 ||
వేదప్రియాయ మహతే విక్రమాయ నమో నమః |
వరాహాయాప్రతర్క్యాయ వేదాంగాయ మహీభృతే || 4 ||
నమో ద్యుతిమతే నిత్యం బ్రాహ్మణాయ నమో నమః |
వామనాయ బహుజ్ఞాయ వేదవేదాంగధారిణే || 5 ||
బలిబంధనదక్షాయ వేదపాలాయ తే నమః |
విష్ణవే సురనాథాయ వ్యాపినే పరమాత్మనే || 6 ||
చతుర్భుజాయ శుద్ధాయ శుద్ధద్రవ్యాయ తే నమః |
జామదగ్న్యాయ రామాయ దుష్టక్షత్రాంతకారిణే || 7 ||
రామాయ రావణాంతాయ నమస్తుభ్యం మహాత్మనే |
అస్మానుద్ధర గోవింద పూతిగంధాన్నమోఽస్తు తే || 8 ||
ఇతి శ్రీనృసింహపురాణే అష్టమోఽధ్యాయే నారకాకృత శ్రీ నృసింహ స్తోత్రం |

  శ్రీ నృసింహ సంస్తుతిః

భైరవాడంబరం బాహుదంష్ట్రాయుధం
చండకోపం మహాజ్వాలమేకం ప్రభుం |
శంఖచక్రాబ్జహస్తం స్మరాత్సుందరం
హ్యుగ్రమత్యుష్ణకాంతిం భజేఽహం ముహుః || 1 ||
దివ్యసింహం మహాబాహుశౌర్యాన్వితం
రక్తనేత్రం మహాదేవమాశాంబరం |
రౌద్రమవ్యక్తరూపం చ దైత్యాంబరం
వీరమాదిత్యభాసం భజేఽహం ముహుః || 2 ||
మందహాసం మహేంద్రేంద్రమాదిస్తుతం
హర్షదం శ్మశ్రువంతం స్థిరజ్ఞప్తికం |
విశ్వపాలైర్వివంద్యం వరేణ్యాగ్రజం
నాశితాశేషదుఃఖం భజేఽహం ముహుః || 3 ||
సవ్యజూటం సురేశం వనేశాయినం
ఘోరమర్కప్రతాపం మహాభద్రకం |
దుర్నిరీక్ష్యం సహస్రాక్షముగ్రప్రభం
తేజసా సంజ్వలంతం భజేఽహం ముహుః || 4 ||
సింహవక్త్రం శరీరేణ లోకాకృతిం
వారణం పీడనానాం సమేషాం గురుం |
తారణం లోకసింధోర్నరాణాం పరం
ముఖ్యమస్వప్నకానాం భజేఽహం ముహుః || 5 ||
పావనం పుణ్యమూర్తిం సుసేవ్యం హరిం
సర్వవిజ్ఞం భవంతం మహావక్షసం |
యోగినందం చ ధీరం పరం విక్రమం
దేవదేవం నృసింహం భజేఽహం ముహుః || 6 ||
సర్వమంత్రైకరూపం సురేశం శుభం
సిద్ధిదం శాశ్వతం సత్త్రిలోకేశ్వరం |
వజ్రహస్తేరుహం విశ్వనిర్మాపకం
భీషణం భూమిపాలం భజేఽహం ముహుః || 7 ||
సర్వకారుణ్యమూర్తిం శరణ్యం సురం
దివ్యతేజఃసమానప్రభం దైవతం |
స్థూలకాయం మహావీరమైశ్వర్యదం
భద్రమాద్యంతవాసం భజేఽహం ముహుః || 8 ||
భక్తవాత్సల్యపూర్ణం చ సంకర్షణం
సర్వకామేశ్వరం సాధుచిత్తస్థితం |
లోకపూజ్యం స్థిరం చాచ్యుతం చోత్తమం
మృత్యుమృత్యుం విశాలం భజేఽహం ముహుః || 9 ||
భక్తిపూర్ణాం కృపాకారణాం సంస్తుతిం
నిత్యమేకైకవారం పఠన్ సజ్జనః |
సర్వదాఽఽప్నోతి సిద్ధిం నృసింహాత్ కృపాం
దీర్ఘమాయుష్యమారోగ్యమప్యుత్తమం || 10 ||

శ్రీ నృసింహాష్టకం 2  

ధ్యాయామి నారసింహాఖ్యం బ్రహ్మవేదాంతగోచరం |
భవాబ్ధితరణోపాయం శంఖచక్రధరం పదం ||
నీళాం రమాం చ పరిభూయ కృపారసేన
స్తంభే స్వశక్తిమనఘాం వినిధాయ దేవీం |
ప్రహ్లాదరక్షణవిధాయవతీ కృపా తే
శ్రీనారసింహ పరిపాలయ మాం చ భక్తం || 1 ||
ఇంద్రాదిదేవనికరస్య కిరీటకోటి-
-ప్రత్యుప్తరత్నప్రతిబింబితపాదపద్మ |
కల్పాంతకాలఘనగర్జనతుల్యనాద
శ్రీనారసింహ పరిపాలయ మాం చ భక్తం || 2 ||
ప్రహ్లాద ఈడ్య ప్రళయార్కసమానవక్త్ర
హుంకారనిర్జితనిశాచరబృందనాథ |
శ్రీనారదాదిమునిసంఘసుగీయమాన
శ్రీనారసింహ పరిపాలయ మాం చ భక్తం || 3 ||
రాత్రించరాద్రిజఠరాత్పరిస్రంస్యమాన
రక్తం నిపీయ పరికల్పితసాంత్రమాల |
విద్రావితాఽఖిలసురోగ్రనృసింహరూప
శ్రీనారసింహ పరిపాలయ మాం చ భక్తం || 4 ||
యోగీంద్ర యోగపరిరక్షక దేవదేవ
దీనార్తిహారి విభవాగమ గీయమాన |
మాం వీక్ష్య దీనమశరణ్యమగణ్యశీల
శ్రీనారసింహ పరిపాలయ మాం చ భక్తం || 5 ||
ప్రహ్లాదశోకవినివారణ భద్రసింహ
నక్తంచరేంద్ర మదఖండన వీరసింహ |
ఇంద్రాదిదేవజనసన్నుతపాదపద్మ
శ్రీనారసింహ పరిపాలయ మాం చ భక్తం || 6 ||
తాపత్రయాబ్ధిపరిశోషణబాడబాగ్నే
తారాధిపప్రతినిభానన దానవారే |
శ్రీరాజరాజవరదాఖిలలోకనాథ
శ్రీనారసింహ పరిపాలయ మాం చ భక్తం || 7 ||
జ్ఞానేన కేచిదవలంబ్య పదాంబుజం తే
కేచిత్ సుకర్మనికరేణ పరే చ భక్త్యా |
ముక్తిం గతాః ఖలు జనా కృపయా మురారే
శ్రీనారసింహ పరిపాలయ మాం చ భక్తం || 8 ||
నమస్తే నారసింహాయ నమస్తే మధువైరిణే |
నమస్తే పద్మనేత్రాయ నమస్తే దుఃఖహారిణే ||

శ్రీ మట్టపల్లి నృసింహ మంగళాష్టకం

మట్టపల్లినివాసాయ మధురానందరూపిణే |
మహాయజ్ఞస్వరూపాయ శ్రీనృసింహాయ మంగళం || 1 ||
కృష్ణవేణీతటస్థాయ సర్వాభీష్టప్రదాయినే |
ప్రహ్లాదప్రియరూపాయ శ్రీనృసింహాయ మంగళం || 2 ||
కర్తస్థితాయ ధీరాయ గంభీరాయ మహాత్మనే |
సర్వారిష్టవినాశాయ శ్రీనృసింహాయ మంగళం || 3 ||
ఋగ్యజుః సామరూపాయ మంత్రారూఢాయ ధీమతే |
శ్రితానాం కల్పవృక్షాయ శ్రీనృసింహాయ మంగళం || 4 ||
గుహాశయాయ గుహ్యాయ గుహ్యవిద్యాస్వరూపిణే |
గుహరాంతే విహారాయ శ్రీనృసింహాయ మంగళం || 5 ||
శ్రీపల్యద్రిమధ్యస్థాయ నిధయే మధురాయ చ |
సుఖప్రదాయ దేవాయ శ్రీనృసింహాయ మంగళం || 6 ||
తాపనీయరహస్యాయ తాపత్రయవినాశినే |
నతానాం పారిజాతాయ శ్రీనృసింహాయ మంగళం || 7 ||
రాజ్యలక్ష్ంయా సమేతాయ రాగద్వేషవినాశినే
మట్టపల్లినివాసాయ శ్రీనృసింహాయ మంగళం || 8 ||
ముక్కూర్ నృసింహదాసేన ప్రోక్తం మంగళమద్భుతం |
యః పఠేచ్ఛ్రద్ధయా భక్త్యా సర్వపాపైర్విముచ్యతే || 9 ||
ఇతి శ్రీముక్కూర్ లక్ష్మీనృసింహస్వామినా అనుగృహీతం శ్రీ మట్టపల్లి నృసింహ మంగళాష్టకం |

 శ్రీ మట్టపల్లి నృసింహాష్టకం (పుత్రప్రాప్తికరం)

ప్రహ్లాదవరదం శ్రేష్ఠం రాజ్యలక్ష్ంయా సమన్వితం |
పుత్రార్థం ప్రార్థయే దేవం మట్టపల్యాధిపం హరిం || 1 ||
భరద్వాజ హృదయాంతే వాసినం వాసవానుజం |
పుత్రార్థం ప్రార్థయే దేవం మట్టపల్యాధిపం హరిం || 2 ||
సుశ్రోణ్యా పూజితం నిత్యం సర్వకామదుఘం హరిం |
పుత్రార్థం ప్రార్థయే దేవం మట్టపల్యాధిపం హరిం || 3 ||
మహాయజ్ఞస్వరూపం తం గుహాయాం నిత్యవాసినం |
పుత్రార్థం ప్రార్థయే దేవం మట్టపల్యాధిపం హరిం || 4 ||
కృష్ణాతీరవిహారం తం కృష్ణాం రక్షితవాన్ స్వయం |
పుత్రార్థం ప్రార్థయే దేవం మట్టపల్యాధిపం హరిం || 5 ||
యమమోహితక్షేత్రేఽస్మిన్ నిత్యవాసప్రియం పరం |
పుత్రార్థం ప్రార్థయే దేవం మట్టపల్యాధిపం హరిం || 6 ||
చక్రిణా పూజితం సంయక్ చక్రిణం సర్వతోముఖం |
పుత్రార్థం ప్రార్థయే దేవం మట్టపల్యాధిపం హరిం || 7 ||
యోగానందం నిత్యానందం నిగమాగమసేవితం |
పుత్రార్థం ప్రార్థయే దేవం మట్టపల్యాధిపం హరిం || 8 ||
శ్రీనృసింహం హృది ధ్యాత్వా ముక్కూర్ నృహరిణా కృతం |
యే పఠంత్యష్టకం నిత్యం ఇష్టప్రాప్తిర్భవిష్యతి || 9 ||
ఇతి శ్రీముక్కూర్ లక్ష్మీనృసింహస్వామినా అనుగృహీతం పుత్రప్రాప్తికరం నామ శ్రీ మట్టపల్లి నృసింహాష్టకం ||

శ్రీనివాస (నృసింహ) స్తోత్రం

అథ విబుధవిలాసినీషు విష్వ-
-ఙ్మునిమభితః పరివార్య తస్థుషీషు |
మదవిహృతివికత్థనప్రలాపా-
-స్వవమతినిర్మితనైజచాపలాసు || 1 ||
త్రిభువనముదముద్యతాసు కర్తుం
మధుసహసాగతిసర్వనిర్వహాసు |
మధురసభరితాఖిలాత్మభావా-
-స్వగణితభీతిషు శాపతశ్శుకస్య || 2 ||
అతివిమలమతిర్మహానుభావో
మునిరపి శాంతమనా నిజాత్మగుప్త్యై |
అఖిలభువనరక్షకస్య విష్ణోః
స్తుతిమథ కర్తుమనా మనాగ్బభూవ || 3 ||
శ్రియఃశ్రియం షడ్గుణపూరపూర్ణం
శ్రీవత్సచిహ్నం పురుషం పురాణం |
శ్రీకంఠపూర్వామరబృందవంద్యం
శ్రియఃపతిం తం శరణం ప్రపద్యే || 4 ||
విభుం హృది స్వం భువనేశమీడ్యం
నీళాశ్రయం నిర్మలచిత్తచింత్యం |
పరాత్పరం పామరపారమేన-
-ముపేంద్రమూర్తిం శరణం ప్రపద్యే || 5 ||
స్మేరాతసీసూనసమానకాంతిం
సురక్తపద్మప్రభపాదహస్తం |
ఉన్నిద్రపంకేరుహచారునేత్రం
పవిత్రపాణిం శరణం ప్రపద్యే || 6 ||
సహస్రభానుప్రతిమోపలౌఘ-
-స్ఫురత్కిరీటప్రవరోత్తమాంగం |
ప్రవాలముక్తానవరత్నహార-
-తారం హరిం తం శరణం ప్రపద్యే || 7 ||
పురా రజోదుష్టధియో విధాతు-
-రపాహృతాన్ యో మధుకైటభాభ్యాం |
వేదానుపాదాయ దదౌ చ తస్మై
తం మత్స్యరూపం శరణం ప్రపద్యే || 8 ||
పయోధిమధ్యేఽపి చ మందరాద్రిం
ధర్తుం చ యః కూర్మవపుర్బభూవ |
సుధాం సురాణామవనార్థమిచ్ఛం-
-స్తమాదిదేవం శరణం ప్రపద్యే || 9 ||
వసుంధరామంతరదైత్యపీడాం
రసాతలాంతర్వివశాభివిష్టాం |
ఉద్ధారణార్థం చ వరాహ ఆసీ-
-చ్చతుర్భుజం తం శరణం ప్రపద్యే || 10 ||
నఖైర్వరైస్తీక్ష్ణముఖైర్హిరణ్య-
-మరాతిమామర్దితసర్వసత్త్వం |
విదారయామాస చ యో నృసింహో
హిరణ్యగర్భం శరణం ప్రపద్యే || 11 ||
మహన్మహత్వేంద్రియపంచభూత-
-తన్మాత్రమాత్రప్రకృతిః పురాణీ |
యతః ప్రసూతా పురుషాస్తదాత్మా
తమాత్మనాథం శరణం ప్రపద్యే || 12 ||
పురా య ఏతత్సకలం బభూవ
యేనాపి తద్యత్ర చ లీనమేతత్ |
ఆస్తాం యతోఽనుగ్రహనిగ్రహౌ చ
తం శ్రీనివాసం శరణం ప్రపద్యే || 13 ||
నిరామయం నిశ్చలనీరరాశి-
-నీకాశసద్రూపమయం మహస్తత్ |
నియంతృ నిర్మాతృ నిహంతృ నిత్యం
నిద్రాంతమేనం శరణం ప్రపద్యే || 14 ||
జగంతి యః స్థావరజంగమాని
సంహృత్య సర్వాణ్యుదరేశయాని |
ఏకార్ణవాంతర్వటపత్రతల్పే
స్వపిత్యనంతం శరణం ప్రపద్యే || 15 ||
నిరస్తదుఃఖౌఘమతీంద్రియం తం
నిష్కారణం నిష్కలమప్రమేయం |
అణోరణీయాంసమనంతమంత-
-రాత్మానుభావం శరణం ప్రపద్యే || 16 ||
సప్తాంబుజీరంజకరాజహాసం
సప్తార్ణవీసంసృతికర్ణధారం |
సప్తాశ్వబింబాశ్వహిరణ్మయం తం
సప్తార్చిరంగం శరణం ప్రపద్యే || 17 ||
నిరాగసం నిర్మలపూర్ణబింబం
నిశీథినీనాథనిభాననాభం |
నిర్ణీతనిద్రం నిగమాంతనిత్యం
నిఃశ్రేయసం తం శరణం ప్రపద్యే || 18 ||
నిరామయం నిర్మలమప్రమేయం
నిజాంతరారోపితవిశ్వబింబం |
నిస్సీమకల్యాణగుణాత్మభూతిం
నిధిం నిధీనాం శరణం ప్రపద్యే || 19 ||
త్వక్చర్మమాంసాస్థ్యసృగశ్రుమూత్ర-
-శ్లేష్మాంత్రవిట్చ్ఛుక్లసముచ్చయేషు |
దేహేష్వసారేషు న మే స్పృహైషా
ధ్రువం ధ్రువం త్వం భగవన్ ప్రసీద || 20 ||
గోవింద కేశవ జనార్దన వాసుదేవ
విశ్వేశ విశ్వ మధుసూదన విశ్వరూప |
శ్రీపద్మనాభ పురుషోత్తమ పుష్కరాక్ష
నారాయణాచ్యుత నృసింహ నమో నమస్తే || 21 ||
దేవాః సమస్తామరయోగిముఖ్యాః
గంధర్వవిద్యాధరకిన్నరాశ్చ |
యత్పాదమూలం సతతం నమంతి
తం నారసింహం శరణం ప్రపద్యే || 22 ||
వేదాన్ సమస్తాన్ ఖలు శాస్త్రగర్భాన్
ఆయుః స్థిరం కీర్తిమతీవ లక్ష్మీం |
యస్య ప్రసాదాత్ పురుషా లభంతే
తం నారసింహం శరణం ప్రపద్యే || 23 ||
బ్రహ్మా శివస్త్వం పురుషోత్తమశ్చ
నారాయణోఽసౌ మరుతాం‍పతిశ్చ |
చంద్రార్కవాయ్వగ్నిమరుద్గణాశ్చ
త్వమేవ నాన్యత్ సతతం నతోఽస్మి || 24 ||
స్రష్టా చ నిత్యం జగతామధీశః
త్రాతా చ హంతా విభురప్రమేయః |
ఏకస్త్వమేవ త్రివిధా విభిన్నః
త్వాం సింహమూర్తిం సతతం నతోఽస్మి || 25 ||

శ్రీ షోడశబాహు నృసింహాష్టకం

భూఖండం వారణాండం పరవరవిరటం డంపడంపోరుడంపం
డిం డిం డిం డిం డిడింబం దహమపి దహమైః ఝంపఝంపైశ్చఝంపైః |
తుల్యాస్తుల్యాస్తు తుల్యాః ధుమధుమధుమకైః కుంకుమాంకైః కుమాంకైః
ఏతత్తే పూర్ణయుక్తమహరహకరహః పాతు మాం నారసింహః || 1 ||
భూభృద్భూభృద్భుజంగం ప్రలయరవవరం ప్రజ్వలజ్జ్వాలమాలం
ఖర్జర్జం ఖర్జదుర్జం ఖిఖచఖచఖచిత్ఖర్జదుర్జర్జయంతం |
భూభాగం భోగభాగం గగగగగగనం గర్దమర్త్యుగ్రగండం
స్వచ్ఛం పుచ్ఛం స్వగచ్ఛం స్వజనజననుతః పాతు మాం నారసింహః || 2 ||
ఏనాభ్రం గర్జమానం లఘులఘుమకరో బాలచంద్రార్కదంష్ట్రో
హేమాంభోజం సరోజం జటజటజటిలో జాడ్యమానస్తుభీతిః |
దంతానాం బాధమానాం ఖగటఖగటవో భోజజానుస్సురేంద్రో
నిష్ప్రత్యూహం సరాజా గహగహగహతః పాతు మాం నారసింహః || 3 ||
శంఖం చక్రం చ చాపం పరశుమశమిషుం శూలపాశాంకుశాస్త్రం
బిభ్రంతం వజ్రఖేటం హలముసలగదాకుంతమత్యుగ్రదంష్ట్రం |
జ్వాలాకేశం త్రినేత్రం జ్వలదనలనిభం హారకేయూరభూషం
వందే ప్రత్యేకరూపం పరపదనివసః పాతు మాం నారసింహః || 4 ||
పాదద్వంద్వం ధరిత్రీకటివిపులతరో మేరుమధ్యూఢ్వమూరుం
నాభిం బ్రహ్మాండసింధుః హృదయమపి భవో భూతవిద్వత్సమేతః |
దుశ్చక్రాంకం స్వబాహుం కులిశనఖముఖం చంద్రసూర్యాగ్నినేత్రం
వక్త్రం వహ్నిస్సువిద్యుత్సురగణవిజయః పాతు మాం నారసింహః || 5 ||
నాసాగ్రం పీనగండం పరబలమథనం బద్ధకేయూరహారం
రౌద్రం దంష్ట్రాకరాలం అమితగుణగణం కోటిసూర్యాగ్నినేత్రం |
గాంభీర్యం పింగలాక్షం భ్రుకుటితవిముఖం షోడశాధార్ధబాహుం
వందే భీమాట్టహాసం త్రిభువనవిజయః పాతు మాం నారసింహః || 6 ||
కే కే నృసింహాష్టకే నరవరసదృశం దేవభీత్వం గృహీత్వా
దేవంద్యో విప్రదండం ప్రతివచన పయాయాంయనప్రత్యనైషీః |
శాపం చాపం చ ఖడ్గం ప్రహసితవదనం చక్రచక్రీచకేన
ఓమిత్యే దైత్యనాదం ప్రకచవివిదుషా పాతు మాం నారసింహః || 7 ||
ఝం ఝం ఝం ఝం ఝకారం ఝషఝషఝషితం జానుదేశం ఝకారం
హుం హుం హుం హుం హకారం హరిత కహహసా యం దిశే వం వకారం |
వం వం వం వం వకారం వదనదలితతం వామపక్షం సుపక్షం
లం లం లం లం లకారం లఘువణవిజయః పాతు మాం నారసింహః || 8 ||
భూతప్రేతపిశాచయక్షగణశః దేశాంతరోచ్చాటనా
చోరవ్యాధిమహజ్జ్వరం భయహరం శత్రుక్షయం నిశ్చయం |
సంధ్యాకాలే జపతమష్టకమిదం సద్భక్తిపూర్వాదిభిః
ప్రహ్లాదేవ వరో వరస్తు జయితా సత్పూజితాం భూతయే || 9 || |
ఇతి శ్రీవిజయీంద్రతీర్థ కృతం శ్రీ షోడశబాహు నృసింహాష్టకం |

 శ్రీ లక్ష్మీనృసింహ అష్టోత్తరశతనామ స్తోత్రం

నారసింహో మహాసింహో దివ్యసింహో మహాబలః |
ఉగ్రసింహో మహాదేవః స్తంభజశ్చోగ్రలోచనః || 1 ||
రౌద్రః సర్వాద్భుతః శ్రీమాన్ యోగానందస్త్రివిక్రమః |
హరిః కోలాహలశ్చక్రీ విజయో జయవర్ధనః || 2 ||
పంచాననః పరబ్రహ్మ చాఽఘోరో ఘోరవిక్రమః |
జ్వలన్ముఖో జ్వాలమాలీ మహాజ్వాలో మహాప్రభుః || 3 ||
నిటిలాక్షః సహస్రాక్షో దుర్నిరీక్ష్యః ప్రతాపనః |
మహాదంష్ట్రాయుధః ప్రాజ్ఞశ్చండకోపీ సదాశివః || 4 ||
హిరణ్యకశిపుధ్వంసీ దైత్యదానవభంజనః |
గుణభద్రో మహాభద్రో బలభద్రః సుభద్రకః || 5 ||
కరాళో వికరాళశ్చ వికర్తా సర్వకర్తృకః |
శింశుమారస్త్రిలోకాత్మా ఈశః సర్వేశ్వరో విభుః || 6 ||
భైరవాడంబరో దివ్యశ్చాఽచ్యుతః కవిమాధవః |
అధోక్షజోఽక్షరః శర్వో వనమాలీ వరప్రదః || 7 ||
విశ్వంభరోఽద్భుతో భవ్యః శ్రీవిష్ణుః పురుషోత్తమః |
అనఘాస్త్రో నఖాస్త్రశ్చ సూర్యజ్యోతిః సురేశ్వరః || 8 ||
సహస్రబాహుః సర్వజ్ఞః సర్వసిద్ధిప్రదాయకః |
వజ్రదంష్ట్రో వజ్రనఖో మహానందః పరంతపః || 9 ||
సర్వమంత్రైకరూపశ్చ సర్వయంత్రవిదారణః |
సర్వతంత్రాత్మకోఽవ్యక్తః సువ్యక్తో భక్తవత్సలః || 10 ||
వైశాఖశుక్లభూతోత్థః శరణాగతవత్సలః |
ఉదారకీర్తిః పుణ్యాత్మా మహాత్మా చండవిక్రమః || 11 ||
వేదత్రయప్రపూజ్యశ్చ భగవాన్పరమేశ్వరః |
శ్రీవత్సాంకః శ్రీనివాసో జగద్వ్యాపీ జగన్మయః || 12 ||
జగత్పాలో జగన్నాథో మహాకాయో ద్విరూపభృత్ |
పరమాత్మా పరంజ్యోతిర్నిర్గుణశ్చ నృకేసరీ || 13 ||
పరతత్త్వం పరంధామ సచ్చిదానందవిగ్రహః |
లక్ష్మీనృసింహః సర్వాత్మా ధీరః ప్రహ్లాదపాలకః || 14 ||
ఇదం లక్ష్మీనృసింహస్య నాంనామష్టోత్తరం శతం |
త్రిసంధ్యం యః పఠేద్భక్త్యా సర్వాభీష్టమవాప్నుయాత్ || 15 ||
ఇతి శ్రీనృసింహపూజాకల్పే శ్రీ లక్ష్మీనృసింహాష్టోత్తరశతనామ స్తోత్రం |