Sacred Stotras & Deities

శ్రీ దుర్గా చంద్రకళా స్తుతిః

వేధోహరీశ్వరస్తుత్యాం విహర్త్రీం వింధ్యభూధరే |
హరప్రాణేశ్వరీం వందే హంత్రీం విబుధవిద్విషాం || 1 ||
అభ్యర్థనేన సరసీరుహసంభవస్య
త్యక్త్వోదితా భగవదక్షిపిధానలీలాం |
విశ్వేశ్వరీ విపదపాకరణే పురస్తాత్
మాతా మమాస్తు మధుకైటభయోర్నిహంత్రీ || 2 ||
ప్రాఙ్నిర్జరేషు నిహతైర్నిజశక్తిలేశైః
ఏకీభవద్భిరుదితాఽఖిలలోకగుప్త్యై |
సంపన్నశస్త్రనికరా చ తదాయుధస్థైః
మాతా మమాస్తు మహిషాంతకరీ పురస్తాత్ || 3 ||
ప్రాలేయశైలతనయా తనుకాంతిసంపత్
కోశోదితా కువలయచ్ఛవిచారుదేహా |
నారాయణీ నమదభీప్సితకల్పవల్లీ
సుప్రీతిమావహతు శుంభనిశుంభహంత్రీ || 4 ||
విశ్వేశ్వరీతి మహిషాంతకరీతి యస్యాః
నారాయణీత్యపి చ నామభిరంకితాని |
సూక్తాని పంకజభువా చ సురర్షిభిశ్చ
దృష్టాని పావకముఖైశ్చ శివాం భజే తాం || 5 ||
ఉత్పత్తిదైత్యహననస్తవనాత్మకాని
సంరక్షకాణ్యఖిలభూతహితాయ యస్యాః |
సూక్తాన్యశేషనిగమాంతవిదః పఠంతి
తాం విశ్వమాతరమజస్రమభిష్టవీమి || 6 ||
యే వైప్రచిత్తపునరుత్థితశుంభముఖ్యైః
దుర్భిక్షఘోరసమయేన చ కారితాసు |
ఆవిష్కృతాస్త్రిజగదార్తిషు రూపభేదాః
తైరంబికా సమభిరక్షతు మాం విపద్భ్యః || 7 ||
సూక్తం యదీయమరవిందభవాది దృష్టం
ఆవర్త్య దేవ్యనుపదం సురథః సమాధిః |
ద్వావప్యవాపతురభీష్టమనన్యలభ్యం
తామాదిదేవతరుణీం ప్రణమామి మూర్ధ్నా || 8 ||
మాహిష్మతీతనుభవం చ రురుం చ హంతుం
ఆవిష్కృతైర్నిజరసాదవతారభేదైః |
అష్టాదశాహతనవాహతకోటిసంఖ్యైః
అంబా సదా సమభిరక్షతు మాం విపద్భ్యః || 9 ||
ఏతచ్చరిత్రమఖిలం లిఖితం హి యస్యాః
సంపూజితం సదన ఏవ నివేశితం వా |
దుర్గం చ తారయతి దుస్తరమప్యశేషం
శ్రేయః ప్రయచ్ఛతి చ సర్వముమాం భజే తాం || 10 ||
యత్పూజనస్తుతినమస్కృతిభిర్భవంతి
ప్రీతాః పితామహరమేశహరాస్త్రయోఽపి |
తేషామపి స్వకగుణైర్దదతీ వపూంషి
తామీశ్వరస్య తరుణీం శరణం ప్రపద్యే || 11 ||
కాంతారమధ్యదృఢలగ్నతయాఽవసన్నాః
మగ్నాశ్చ వారిధిజలే రిపుభిశ్చ రుద్ధాః |
యస్యాః ప్రపద్య చరణౌ విపదస్తరంతి
సా మే సదాఽస్తు హృది సర్వజగత్సవిత్రీ || 12 ||
బంధే వధే మహతి మృత్యుభయే ప్రసక్తే
విత్తక్షయే చ వివిధే య మహోపతాపే |
యత్పాదపూజనమిహ ప్రతికారమాహుః
సా మే సమస్తజననీ శరణం భవానీ || 13 ||
బాణాసురప్రహితపన్నగబంధమోక్షః
తద్బాహుదర్పదలనాదుషయా చ యోగః |
ప్రాద్యుంనినా ద్రుతమలభ్యత యత్ప్రసాదాత్
సా మే శివా సకలమప్యశుభం క్షిణోతు || 14 ||
పాపః పులస్త్యతనయః పునరుత్థితో మాం
అద్యాపి హర్తుమయమాగత ఇత్యుదీతం |
యత్సేవనేన భయమిందిరయాఽవధూతం
తామాదిదేవతరుణీం శరణం గతోఽస్మి || 15 ||
యద్ధ్యానజం సుఖమవాప్యమనంతపుణ్యైః
సాక్షాత్తమచ్యుత పరిగ్రహమాశ్వవాపుః |
గోపాంగనాః కిల యదర్చనపుణ్యమాత్రాః
సా మే సదా భగవతీ భవతు ప్రసన్నా || 16 ||
రాత్రిం ప్రపద్య ఇతి మంత్రవిదః ప్రపన్నాన్
ఉద్బోధ్య మృత్యువధిమన్యఫలైః ప్రలోభ్య |
బుద్ధ్వా చ తద్విముఖతాం ప్రతనం నయంతీం
ఆకాశమాదిజననీం జగతాం భజే తాం || 17 ||
దేశకాలేషు దుష్టేషు దుర్గాచంద్రకలాస్తుతిః |
సంధ్యయోరనుసంధేయా సర్వాపద్వినివృత్తయే || 18 ||
ఇతి శ్రీమదపయ్యదీక్షితవిరచితా దుర్గాచంద్రకళాస్తుతిః ||

శ్రీ దుర్గా ద్వాత్రింశన్నామ స్తోత్రం

దుర్గా దుర్గార్తిశమనీ దుర్గాఽఽపద్వినివారిణీ |
దుర్గమచ్ఛేదినీ దుర్గసాధినీ దుర్గనాశినీ || 1 ||
దుర్గతోద్ధారిణీ దుర్గనిహంత్రీ దుర్గమాపహా |
దుర్గమజ్ఞానదా దుర్గదైత్యలోకదవానలా || 2 ||
దుర్గమా దుర్గమాలోకా దుర్గమాత్మస్వరూపిణీ |
దుర్గమార్గప్రదా దుర్గమవిద్యా దుర్గమాశ్రితా || 3 ||
దుర్గమజ్ఞానసంస్థానా దుర్గమధ్యానభాసినీ |
దుర్గమోహా దుర్గమగా దుర్గమార్థస్వరూపిణీ || 4 ||
దుర్గమాసురసంహంత్రీ దుర్గమాయుధధారిణీ |
దుర్గమాంగీ దుర్గమాతా దుర్గంయా దుర్గమేశ్వరీ || 5 ||
దుర్గభీమా దుర్గభామా దుర్గభా దుర్గధారిణీ |
నామావళిమిమాం యస్తు దుర్గాయా మమ మానవః || 6 ||
పఠేత్సర్వభయాన్ముక్తో భవిష్యతి న సంశయః |
శత్రుభిః పీడ్యమానో వా దుర్గబంధగతోఽపి వా |
ద్వాత్రింశన్నామపాఠేన ముచ్యతే నాత్ర సంశయః || 7 ||
ఇతి శ్రీ దుర్గా ద్వాత్రింశన్నామావళి స్తోత్రం |

శ్రీ దుర్గా పంచరత్నం

తే ధ్యానయోగానుగతా అపశ్యన్
త్వామేవ దేవీం స్వగుణైర్నిగూఢాం |
త్వమేవ శక్తిః పరమేశ్వరస్య
మాం పాహి సర్వేశ్వరి మోక్షదాత్రి || 1 ||
దేవాత్మశక్తిః శ్రుతివాక్యగీతా
మహర్షిలోకస్య పురః ప్రసన్నా |
గుహా పరం వ్యోమ సతః ప్రతిష్ఠా
మాం పాహి సర్వేశ్వరి మోక్షదాత్రి || 2 ||
పరాస్య శక్తిః వివిధైవ శ్రూయసే
శ్వేతాశ్వవాక్యోదితదేవి దుర్గే |
స్వాభావికీ జ్ఞానబలక్రియా తే
మాం పాహి సర్వేశ్వరి మోక్షదాత్రి || 3 ||
దేవాత్మశబ్దేన శివాత్మభూతా
యత్కూర్మవాయవ్యవచోవివృత్యా
త్వం పాశవిచ్ఛేదకరీ ప్రసిద్ధా
మాం పాహి సర్వేశ్వరి మోక్షదాత్రి || 4 ||
త్వం బ్రహ్మపుచ్ఛా వివిధా మయూరీ
బ్రహ్మప్రతిష్ఠాస్యుపదిష్టగీతా |
జ్ఞానస్వరూపాత్మతయాఖిలానాం
మాం పాహి సర్వేశ్వరి మోక్షదాత్రి || 5 ||
ఇతి పరమపూజ్య శ్రీచంద్రశేఖరేంద్రసరస్వతీ స్వామి కృతం దుర్గా పంచరత్నం సంపూర్ణం |

శ్రీ దుర్గా పరమేశ్వరీ స్తోత్రం

[** అధునా సర్వత్ర జగతి ప్రసరతః జనానం ప్రాణాపాయకరస్య కొరోనా నామకస్య రోగవిశేషస్య నివారణార్థం శృంగేరీ జగద్గురు విరచిత శ్రీ దుర్గా పరమేశ్వరీ స్తోత్ర పారాయణం కరిష్యే | **] ఏతావంతం సమయం
సర్వాపద్భ్యోఽపి రక్షణం కృత్వా |
దేశస్య పరమిదానీం
తాటస్థ్యం కేన వహసి దుర్గాంబ || 1 ||
అర్థం – ఇప్పటి వరకు దేశమును అన్ని ఆపదల నుంచి కాపాడావు. ఓ దుర్గాంబా, ఇప్పుడు నువ్వు ఏమీ పట్టించుకోనట్టుగా ఉన్నావు.
అపరాధా బహుశః ఖలు
పుత్రాణాం ప్రతిపదం భవంత్యేవ |
కో వా సహతే లోకే
సర్వాంస్తాన్మాతరం విహాయైకాం || 2 ||
అర్థం – పిల్లలు అడుగడుగునా చాలా తప్పటడుగులు వేస్తారు. ఈ లోకంలో వారిని కన్నతల్లి కాకుండా అవన్నీ ఇంకెవరు సహించగలరు?
మా భజ మా భజ దుర్గే
తాటస్థ్యం పుత్రకేషు దీనేషు |
కే వా గృహ్ణంతి సుతాన్
మాత్రా త్యక్తాన్వదాంబికే లోకే || 3 ||
అర్థం – అలాంటి కన్నతల్లులు కూడా వదిలేసిన దీనావస్థలో ఉన్న పిల్లలను, ఓ దుర్గంమా, నీవు కూడా పట్టించుకోకుండా ఉంటే ఇంకెవరు రక్షిస్తారు?
ఇతః పరం వా జగదంబ జాతు
దేశస్య రోగప్రముఖాపదోఽస్య |
న స్యుస్తథా కుర్వచలాం కృపాం
ఇత్యభ్యర్థనాం మే సఫలీకురుష్వ || 4 ||
అర్థం – కాబట్టి, ఓ జగదంబా (లోకాన్ని కన్నతల్లీ), ఈ రోగంతో దేశానికి వచ్చిన ముఖ్యమైన ఆపదను తొలగించు. నీ కరుణను స్థిరముగా చూపుము. నా ఈ అభ్యర్థనను (కోరిక) సఫలము చేయి.
పాపహీనజనతావనదక్షాః
సంతి నిర్జరవరా న కియంతః |
పాపపూర్ణజనరక్షణదక్షాం
త్వాం వినా భువి పరాం న విలోకే || 5 ||
అర్థం – ఏటువంటి పాపము లేకుండా, నశించిపోకుండా, జనులను రక్షించేవారు (దేవతలు) ఎవరైనా ఉన్నరా? ఓ దుర్గంమా, నువ్వు తప్ప పాపము చేసిన జనులను కూడా రక్షించగల సమర్థత ఉన్నవారు ఎవరూ కనిపించడం లేదు. కాబట్టి రక్షించు.
ఇతి శృంగేరీ జగద్గురు విరచితం శ్రీ దుర్గా పరమేశ్వరీ స్తోత్రం ||

శ్రీ దుర్గా మానస పూజా

ఉద్యచ్చందనకుంకుమారుణపయోధారాభిరాప్లావితాం
నానానర్ఘ్యమణిప్రవాలఘటితాం దత్తాం గృహాణాంబికే |
ఆమృష్టాం సురసుందరీభిరభితో హస్తాంబుజైర్భక్తితో
మాతః సుందరి భక్తకల్పలతికే శ్రీపాదుకామాదరాత్ || 1 ||
దేవేంద్రాదిభిరర్చితం సురగణైరాదాయ సింహాసనం
చంచత్కాంచనసంచయాభిరచితం చారుప్రభాభాస్వరం |
ఏతచ్చంపకకేతకీపరిమలం తైలం మహానిర్మలం
గంధోద్వర్తనమాదరేణ తరుణీదత్తం గృహాణాంబికే || 2 ||
పశ్చాద్దేవి గృహాణ శంభుగృహిణి శ్రీసుందరి ప్రాయశో
గంధద్రవ్యసమూహనిర్భరతరం ధాత్రీఫలం నిర్మలం |
తత్కేశాన్ పరిశోధ్య కంకతికయా మందాకినీస్రోతసి
స్నాత్వా ప్రోజ్జ్వలగంధకం భవతు హే శ్రీసుందరి త్వన్ముదే || 3 ||
సురాధిపతికామినీకరసరోజనాలీధృతాం
సచందనసకుంకుమాగురుభరేణ విభ్రాజితాం |
మహాపరిమలోజ్జ్వలాం సరసశుద్ధకస్తూరికాం
గృహాణ వరదాయిని త్రిపురసుందరి శ్రీప్రదే || 4 ||
గంధర్వామరకిన్నరప్రియతమాసంతానహస్తాంబుజ-
-ప్రస్తారైర్ధ్రియమాణముత్తమతరం కాశ్మీరజాపింజరం |
మాతర్భాస్వరభానుమండలలసత్కాంతిప్రదానోజ్జ్వలం
చైతన్నిర్మలమాతనోతు వసనం శ్రీసుందరి త్వన్ముదం || 5 ||
స్వర్ణాకల్పితకుండలే శ్రుతియుగే హస్తాంబుజే ముద్రికా
మధ్యే సారసనా నితంబఫలకే మంజీరమంఘ్రిద్వయే |
హారో వక్షసి కంకణౌ క్వణరణత్కారౌ కరద్వంద్వకే
విన్యస్తం ముకుటం శిరస్యనుదినం దత్తోన్మదం స్తూయతాం || 6 ||
గ్రీవాయాం ధృతకాంతికాంతపటలం గ్రైవేయకం సుందరం
సిందూరం విలసల్లలాటఫలకే సౌందర్యముద్రాధరం |
రాజత్కజ్జలముజ్జ్వలోత్పలదలశ్రీమోచనే లోచనే
తద్దివ్యౌషధినిర్మితం రచయతు శ్రీశాంభవి శ్రీప్రదే || 7 ||
అమందతరమందరోన్మథితదుగ్ధసింధూద్భవం
నిశాకరకరోపమం త్రిపురసుందరి శ్రీప్రదే |
గృహాణ ముఖమీక్షతుం ముకురబింబమావిద్రుమై-
-ర్వినిర్మితమఘచ్ఛిదే రతికరాంబుజస్థాయినం || 8 ||
కస్తూరీద్రవచందనాగురుసుధాధారాభిరాప్లావితం
చంచచ్చంపకపాటలాదిసురభిద్రవ్యైః సుగంధీకృతం |
దేవస్త్రీగణమస్తకస్థితమహారత్నాదికుంభవ్రజై-
-రంభఃశాంభవి సంభ్రమేణ విమలం దత్తం గృహాణాంబికే || 9 ||
కహ్లారోత్పలనాగకేసరసరోజాఖ్యావలీమాలతీ-
-మల్లీకైరవకేతకాదికుసుమై రక్తాశ్వమారాదిభిః |
పుష్పైర్మాల్యభరేణ వై సురభిణా నానారసస్రోతసా
తాంరాంభోజనివాసినీం భగవతీం శ్రీచండికాం పూజయే || 10 ||
మాంసీగుగ్గులచందనాగురురజః కర్పూరశైలేయజై-
-ర్మాధ్వీకైః సహ కుంకుమైః సురచితైః సర్పిర్భిరామిశ్రితైః |
సౌరభ్యస్థితిమందిరే మణిమయే పాత్రే భవేత్ ప్రీతయే
ధూపోఽయం సురకామినీవిరచితః శ్రీచండికే త్వన్ముదే || 11 ||
ఘృతద్రవపరిస్ఫురద్రుచిరరత్నయష్ట్యాన్వితో
మహాతిమిరనాశనః సురనితంబినీనిర్మితః |
సువర్ణచషకస్థితః సఘనసారవర్త్యాన్విత-
-స్తవ త్రిపురసుందరి స్ఫురతి దేవి దీపో ముదే || 12 ||
జాతీసౌరభనిర్భరం రుచికరం శాల్యోదనం నిర్మలం
యుక్తం హింగుమరీచజీరసురభిర్ద్రవ్యాన్వితైర్వ్యంజనైః |
పక్వాన్నేన సపాయసేన మధునా దధ్యాజ్యసంమిశ్రితం
నైవేద్యం సురకామినీవిరచితం శ్రీచండికే త్వన్ముదే || 13 ||
లవంగకలికోజ్జ్వలం బహులనాగవల్లీదలం
సజాతిఫలకోమలం సఘనసారపూగీఫలం |
సుధామధురిమాకులం రుచిరరత్నపాత్రస్థితం
గృహాణ ముఖపంకజే స్ఫురితమంబ తాంబూలకం || 14 ||
శరత్ప్రభవచంద్రమః స్ఫురితచంద్రికాసుందరం
గలత్సురతరంగిణీలలితమౌక్తికాడంబరం |
గృహాణ నవకాంచనప్రభవదండఖండోజ్జ్వలం
మహాత్రిపురసుందరి ప్రకటమాతపత్రం మహత్ || 15 ||
మాతస్త్వన్ముదమాతనోతు సుభగస్త్రీభిః సదాఽఽందోలితం
శుభ్రం చామరమిందుకుందసదృశం ప్రస్వేదదుఃఖాపహం |
సద్యోఽగస్త్యవసిష్ఠనారదశుకవ్యాసాదివాల్మీకిభిః
స్వే చిత్తే క్రియమాణ ఏవ కురుతాం శర్మాణి వేదధ్వనిః || 16 ||
స్వర్గాంగణే వేణుమృదంగశంఖ-
-భేరీనినాదైరూపగీయమానా |
కోలాహలైరాకలితా తవాస్తు
విద్యాధరీనృత్యకలా సుఖాయ || 17 ||
దేవి భక్తిరసభావితవృత్తే
ప్రీయతాం యది కుతోఽపి లభ్యతే |
తత్ర లౌల్యమపి సత్ఫలమేకం
జన్మకోటిభిరపీహ న లభ్యం || 18 ||
ఏతైః షోడశభిః పద్యైరుపచారోపకల్పితైః |
యః పరాం దేవతాం స్తౌతి స తేషాం ఫలమాప్నుయాత్ || 19 ||
ఇతి దుర్గాతంత్రే శ్రీ దుర్గా మానస పూజా స్తోత్రం ||

శ్రీ దుర్గా షోడశనామ స్తోత్రం

నారద ఉవాచ |
దుర్గా నారాయణీశానా విష్ణుమాయా శివా సతీ |
నిత్యా సత్యా భగవతీ శర్వాణీ సర్వమంగళా || 1 ||
అంబికా వైష్ణవీ గౌరీ పార్వతీ చ సనాతనీ |
నామాని కౌథుమోక్తాని సర్వేషాం శుభదాని చ || 2 ||
ఇతి శ్రీబ్రహ్మవైవర్తే మహాపురాణే ప్రకృతిఖండే సప్తపంచాశత్తమోఽధ్యాయే శ్రీ దుర్గా షోడశనామ స్తోత్రం ||

శ్రీ దుర్గా స్తోత్రం (అర్జున కృతం)

అర్జున ఉవాచ |
నమస్తే సిద్ధసేనాని ఆర్యే మందరవాసిని |
కుమారి కాళి కాపాలి కపిలే కృష్ణపింగళే || 1 ||
భద్రకాళి నమస్తుభ్యం మహాకాళి నమోఽస్తు తే |
చండి చండే నమస్తుభ్యం తారిణి వరవర్ణిని || 2 ||
కాత్యాయని మహాభాగే కరాళి విజయే జయే |
శిఖిపింఛధ్వజధరే నానాభరణభూషితే || 3 ||
అట్టశూలప్రహరణే ఖడ్గఖేటకధారిణి |
గోపేంద్రస్యానుజే జ్యేష్ఠే నందగోపకులోద్భవే || 4 ||
మహిషాసృక్ప్రియే నిత్యం కౌశికి పీతవాసిని |
అట్టహాసే కోకముఖే నమస్తేఽస్తు రణప్రియే || 5 ||
ఉమే శాకంభరి శ్వేతే కృష్ణే కైటభనాశిని |
హిరణ్యాక్షి విరూపాక్షి సుధూంరాక్షి నమోఽస్తు తే || 6 ||
వేదశ్రుతిమహాపుణ్యే బ్రహ్మణ్యే జాతవేదసి |
జంబూకటకచైత్యేషు నిత్యం సన్నిహితాలయే || 7 ||
త్వం బ్రహ్మవిద్యా విద్యానాం మహానిద్రా చ దేహినాం |
స్కందమాతర్భగవతి దుర్గే కాంతారవాసిని || 8 ||
స్వాహాకారః స్వధా చైవ కలా కాష్ఠా సరస్వతీ |
సావిత్రీ వేదమాతా చ తథా వేదాంత ఉచ్యతే || 9 ||
స్తుతాసి త్వం మహాదేవి విశుద్ధేనాంతరాత్మనా |
జయో భవతు మే నిత్యం త్వత్ప్రసాదాద్రణాజిరే || 10 ||
కాంతారభయదుర్గేషు భక్తానాం చాలయేషు చ |
నిత్యం వససి పాతాళే యుద్ధే జయసి దానవాన్ || 11 ||
త్వం జంభనీ మోహినీ చ మాయా హ్రీః శ్రీస్తథైవ చ |
సంధ్యా ప్రభావతీ చైవ సావిత్రీ జననీ తథా || 12 ||
తుష్టిః పుష్టిర్ధృతిర్దీప్తిశ్చంద్రాదిత్యవివర్ధినీ |
భూతిర్భూతిమతాం సంఖ్యే వీక్ష్యసే సిద్ధచారణైః || 13 ||
ఇతి శ్రీమన్మహాభారతే భీష్మపర్వణి త్రయోవింశోఽధ్యాయే అర్జున కృత శ్రీ దుర్గా స్తోత్రం |

శ్రీ దుర్గా స్తోత్రం (మహాదేవ కృతం)

మహాదేవ ఉవాచ |
రక్ష రక్ష మహాదేవి దుర్గే దుర్గతినాశిని |
మాం భక్తమనురక్తం చ శత్రుగ్రస్తం కృపామయి || 1 ||
విష్ణుమాయే మహాభాగే నారాయణి సనాతని |
బ్రహ్మస్వరూపే పరమే నిత్యానందస్వరూపిణీ || 2 ||
త్వం చ బ్రహ్మాదిదేవానామంబికే జగదంబికే |
త్వం సాకారే చ గుణతో నిరాకారే చ నిర్గుణాత్ || 3 ||
మాయయా పురుషస్త్వం చ మాయయా ప్రకృతిః స్వయం |
తయోః పరం బ్రహ్మ పరం త్వం బిభర్షి సనాతని || 4 ||
వేదానాం జననీ త్వం చ సావిత్రీ చ పరాత్పరా |
వైకుంఠే చ మహాలక్ష్మీః సర్వసంపత్స్వరూపిణీ || 5 ||
మర్త్యలక్ష్మీశ్చ క్షీరోదే కామినీ శేషశాయినః |
స్వర్గేషు స్వర్గలక్ష్మీస్త్వం రాజలక్ష్మీశ్చ భూతలే || 6 ||
నాగాదిలక్ష్మీః పాతాలే గృహేషు గృహదేవతా |
సర్వసస్యస్వరూపా త్వం సర్వైశ్వర్యవిధాయినీ || 7 ||
రాగాధిష్ఠాతృదేవీ త్వం బ్రహ్మణశ్చ సరస్వతీ |
ప్రాణానామధిదేవీ త్వం కృష్ణస్య పరమాత్మనః || 8 ||
గోలోకే చ స్వయం రాధా శ్రీకృష్ణస్యైవ వక్షసి |
గోలోకాధిష్ఠితా దేవీ వృందా వృందావనే వనే || 9 ||
శ్రీరాసమండలే రంయా వృందావనవినోదినీ |
శతశృంగాధిదేవీ త్వం నాంనా చిత్రావలీతి చ || 10 ||
దక్షకన్యా కుత్రకల్పే కుత్రకల్పే చ శైలజా |
దేవమాతాఽదితిస్త్వం చ సర్వాధారా వసుంధరా || 11 ||
త్వమేవ గంగా తులసీ త్వం చ స్వాహా స్వధా సతీ |
త్వదంశాంశాంశకలయా సర్వదేవాదియోషితః || 12 ||
స్త్రీరూపం చాపి పురుషం దేవి త్వం చ నపుంసకం |
వృక్షాణాం వృక్షరూపా త్వం సృష్టా చాంకురరూపిణీ || 13 ||
వహ్నౌ చ దాహికా శక్తిర్జలే శైత్యస్వరూపిణీ |
సూర్యే తేజఃస్వరూపా చ ప్రభారూపా చ సంతతం || 14 ||
గంధరూపా చ భూమౌ చ ఆకాశే శబ్దరూపిణీ |
శోభాస్వరూపా చంద్రే చ పద్మసంఘే చ నిశ్చితం || 15 ||
సృష్టౌ సృష్టిస్వరూపా చ పాలనే పరిపాలికా |
మహామారీ చ సంహారే జలే చ జలరూపిణీ || 16 ||
క్షుత్ త్వం దయా త్వం నిద్రా త్వం తృష్ణా త్వం బుద్ధిరూపిణీ |
తుష్టిస్త్వం చాపి పుష్టిస్త్వం శ్రద్ధాస్త్వం చ క్షమా స్వయం || 17 ||
శాంతిస్త్వం చ స్వయం భ్రాంతిః కాంతిస్త్వం కీర్తిరేవ చ |
లజ్జా త్వం చ తథా మాయా భుక్తిముక్తిస్వరూపిణీ || 18 ||
సర్వశక్తిస్వరూపా త్వం సర్వసంపత్ప్రదాయినీ |
వేదేఽనిర్వచనీయా త్వం త్వాం న జానాతి కశ్చన || 19 ||
సహస్రవక్త్రస్త్వాం స్తోతుం న శక్తః సురేశ్వరి |
వేదా న శక్తాః కో విద్వాన్ న చ శక్తా సరస్వతీ || 20 ||
స్వయం విధాతా శక్తో న న చ విష్ణుః సనాతనః |
కిం స్తౌమి పంచవక్త్రైస్తు రణత్రస్తో మహేశ్వరి |
కృపాం కురు మహామాయే మమ శత్రుక్షయం కురు || 21 ||
ఇతి శ్రీబ్రహ్మవైవర్తే మహాపురాణే శ్రీకృష్ణజన్మఖండే నారదనారాయణసంవాదే అష్టాశీతితమోఽధ్యాయే మహాదేవ కృత శ్రీ దుర్గా స్తోత్రం |

శ్రీ దుర్గా స్తోత్రం (యుధిష్ఠిర కృతం)

విరాటనగరం రంయం గచ్ఛమానో యుధిష్ఠిరః |
అస్తువన్మనసా దేవీం దుర్గాం త్రిభువనేశ్వరీం || 1 ||
యశోదాగర్భసంభూతాం నారాయణవరప్రియాం |
నందగోపకులే జాతాం మంగళ్యాం కులవర్ధినీం || 2 ||
కంసవిద్రావణకరీమసురాణాం క్షయంకరీం |
శిలాతటవినిక్షిప్తామాకాశం ప్రతి గామినీం || 3 ||
వాసుదేవస్య భగినీం దివ్యమాల్యవిభూషితాం |
దివ్యాంబరధరాం దేవీం ఖడ్గఖేటకధారిణీం || 4 ||
భారావతరణే పుణ్యే యే స్మరంతి సదాశివాం |
తాన్ వై తారయతే పాపాత్ పంకే గామివ దుర్బలాం || 5 ||
స్తోతుం ప్రచక్రమే భూయో వివిధైః స్తోత్రసంభవైః |
ఆమంత్ర్య దర్శనాకాంక్షీ రాజా దేవీం సహానుజః || 6 ||
నమోఽస్తు వరదే కృష్ణే కుమారి బ్రహ్మచారిణి |
బాలార్కసదృశాకారే పూర్ణచంద్రనిభాననే || 7 ||
చతుర్భుజే చతుర్వక్త్రే పీనశ్రోణిపయోధరే |
మయూరపిచ్ఛవలయే కేయూరాంగదధారిణి || 8 ||
భాసి దేవి యథా పద్మా నారాయణపరిగ్రహః |
స్వరూపం బ్రహ్మచర్యం చ విశదం తవ ఖేచరి || 9 ||
కృష్ణచ్ఛవిసమా కృష్ణా సంకర్షణసమాననా |
బిభ్రతీ విపులౌ బాహూ శక్రధ్వజసముచ్ఛ్రయౌ || 10 ||
పాత్రీ చ పంకజీ ఘంటీ స్త్రీవిశుద్ధా చ యా భువి |
పాశం ధనుర్మహాచక్రం వివిధాన్యాయుధాని చ || 11 ||
కుండలాభ్యాం సుపూర్ణాభ్యాం కర్ణాభ్యాం చ విభూషితా |
చంద్రవిస్పర్ధినా దేవి ముఖేన త్వం విరాజసే || 12 ||
ముకుటేన విచిత్రేణ కేశబంధేన శోభినా |
భుజంగాభోగవాసేన శ్రోణిసూత్రేణ రాజతా || 13 ||
విభ్రాజసే చాబద్ధేన భోగేనేవేహ మందరః |
ధ్వజేన శిఖిపిచ్ఛానాముచ్ఛ్రితేన విరాజసే || 14 ||
కౌమారం వ్రతమాస్థాయ త్రిదివం పావితం త్వయా |
తేన త్వం స్తూయసే దేవి త్రిదశైః పూజ్యసేఽపి చ || 15 ||
త్రైలోక్యరక్షణార్థాయ మహిషాసురనాశిని |
ప్రసన్నా మే సురశ్రేష్ఠే దయాం కురు శివా భవ || 16 ||
జయా త్వం విజయా చైవ సంగ్రామే చ జయప్రదా |
మమాపి విజయం దేహి వరదా త్వం చ సాంప్రతం || 17 ||
వింధ్యే చైవ నగశ్రేష్ఠే తవ స్థానం హి శాశ్వతం |
కాళి కాళి మహాకాళి శీధుమాంసపశుప్రియే || 18 ||
కృతానుయాత్రా భూతైస్త్వం వరదా కామచారిణీ |
భారావతారే యే చ త్వాం సంస్మరిష్యంతి మానవాః || 19 ||
ప్రణమంతి చ యే త్వాం హి ప్రభాతే తు నరా భువి |
న తేషాం దుర్లభం కించిత్ పుత్రతో ధనతోఽపి వా || 20 ||
దుర్గాత్ తారయసే దుర్గే తత్ త్వం దుర్గా స్మృతా జనైః |
కాంతారేష్వవసన్నానాం మగ్నానాం చ మహార్ణవే |
దస్యుభిర్వా నిరుద్ధానాం త్వం గతిః పరమా నృణాం || 21 ||
జలప్రతరణే చైవ కాంతారేష్వటవీషు చ |
యే స్మరంతి మహాదేవి న చ సీదంతి తే నరాః || 22 ||
త్వం కీర్తిః శ్రీర్ధృతిః సిద్ధిర్హ్రీర్విద్యా సంతతిర్మతిః |
సంధ్యా రాత్రిః ప్రభా నిద్రా జ్యోత్స్నా కాంతిః క్షమా దయా || 23 ||
నృణాం చ బంధనం మోహం పుత్రనాశం ధనక్షయం |
వ్యాధిం మృత్యుం భయం చైవ పూజితా నాశయిష్యసి || 24 ||
సోఽహం రాజ్యాత్పరిభ్రష్టః శరణం త్వాం ప్రపన్నవాన్ |
ప్రణతశ్చ యథా మూర్ధ్నా తవ దేవి సురేశ్వరి || 25 ||
త్రాహి మాం పద్మపత్రాక్షి సత్యే సత్యా భవస్వ నః |
శరణం భవ మే దుర్గే శరణ్యే భక్తవత్సలే || 26 ||
ఏవం స్తుతా హి సా దేవీ దర్శయామాస పాండవం |
ఉపగంయ తు రాజానామిదం వచనమబ్రవీత్ || 27 ||
దేవ్యువాచ |
శృణు రాజన్ మహాబాహో మదీయం వచనం ప్రభో |
భవిష్యత్యచిరాదేవ సంగ్రామే విజయస్తవ || 28 ||
మమ ప్రసాదాన్నిర్జిత్య హత్వా కౌరవవాహినీం |
రాజ్యం నిష్కంటకం కృత్వా భోక్ష్యసే మేదినీం పునః || 29 ||
భాత్రృభిః సహితో రాజన్ ప్రీతిం ప్రాప్స్యసి పుష్కలాం |
మత్ప్రసాదాచ్చ తే సౌఖ్యమారోగ్యం చ భవిష్యతి || 30 ||
యే చ సంకీర్తయిష్యంతి లోకే విగతకల్మషాః |
తేషాం తుష్టా ప్రదాస్యామి రాజ్యమాయుర్వపుః సుతం || 31 ||
ప్రవాసే నగరే చాపి సంగ్రామే శత్రుసంకటే |
అటవ్యాం దుర్గకాంతారే సాగరే గహనే గిరౌ || 32 ||
యే స్మరిష్యంతి మాం రాజన్ యథాఽహం భవతా స్మృతా |
న తేషాం దుర్లభం కించిదస్మిల్లోకే భవిష్యతి || 33 ||
ఇదం స్తోత్రవరం భక్త్యా శృణుయాద్వా పఠేత వా |
తస్య సర్వాణి కార్యాణి సిద్ధిం యాస్యంతి పాండవాః || 34 ||
మత్ప్రసాదాచ్చ వః సర్వాన్విరాటనగరే స్థితాన్ |
న ప్రజ్ఞాస్యంతి కురవో నరా వా తన్నివాసినః || 35 ||
ఇత్యుక్త్వా వరదా దేవీ యుధిష్ఠిరమరిందమం |
రక్షాం కృత్వా చ పాండూనాం తత్రైవాంతరధీయత || 36 ||
ఇతి శ్రీమన్మహాభారతే విరాటపర్వణి అష్టమోఽధ్యాయే యుధిష్ఠిర కృత శ్రీ దుర్గా స్తోత్రం 

నవదుర్గా స్తోత్రం

శైలపుత్రీ –
వందే వాంఛితలాభాయ చంద్రార్ధకృతశేఖరాం |
వృషారూఢాం శూలధరాం శైలపుత్రీం యశస్వినీం || 1 ||
బ్రహ్మచారిణీ –
దధానా కరపద్మాభ్యామక్షమాలా కమండలూ |
దేవీ ప్రసీదతు మయి బ్రహ్మచారిణ్యనుత్తమా || 2 ||
చంద్రఘంటా –
పిండజప్రవరారూఢా చండకోపాస్త్రకైర్యుతా |
ప్రసాదం తనుతే మహ్యం చంద్రఘంటేతి విశ్రుతా || 3 ||
కూష్మాండా –
సురాసంపూర్ణకలశం రుధిరాప్లుతమేవ చ |
దధానా హస్తపద్మాభ్యాం కూష్మాండా శుభదాస్తు మే || 4 ||
స్కందమాతా –
సింహాసనగతా నిత్యం పద్మాశ్రితకరద్వయా |
శుభదాస్తు సదా దేవీ స్కందమాతా యశస్వినీ || 5 ||
కాత్యాయనీ –
చంద్రహాసోజ్జ్వలకరా శార్దూలవరవాహనా |
కాత్యాయనీ శుభం దద్యాద్దేవీ దానవఘాతినీ || 6 ||
కాలరాత్రీ –
ఏకవేణీ జపాకర్ణపూర నగ్నా ఖరాస్థితా |
లంబోష్ఠీ కర్ణికాకర్ణీ తైలాభ్యక్తశరీరిణీ ||
వామపాదోల్లసల్లోహలతాకంటకభూషణా |
వర్ధన్మూర్ధధ్వజా కృష్ణా కాలరాత్రిర్భయంకరీ || 7 ||
మహాగౌరీ –
శ్వేతే వృషే సమారూఢా శ్వేతాంబరధరా శుచిః |
మహాగౌరీ శుభం దద్యాన్మహాదేవప్రమోదదా || 8 ||
సిద్ధిదాత్రీ –
సిద్ధగంధర్వయక్షాద్యైరసురైరమరైరపి |
సేవ్యమానా సదా భూయాత్ సిద్ధిదా సిద్ధిదాయినీ || 9 ||

వంశవృద్ధికరం (వంశాఖ్యం) దుర్గా కవచం

(ధన్యవాదః – శ్రీ పీ.ఆర్.రామచన్దర్ మహోదయ)
శనైశ్చర ఉవాచ |
భగవన్ దేవదేవేశ కృపయా త్వం జగత్ప్రభో |
వంశాఖ్యం కవచం బ్రూహి మహ్యం శిష్యాయ తేఽనఘ |
యస్య ప్రభావాద్దేవేశ వంశో వృద్ధిర్హి జాయతే |
సూర్య ఉవాచ |
శృణు పుత్ర ప్రవక్ష్యామి వంశాఖ్యం కవచం శుభం |
సంతానవృద్ధిర్యత్పాఠాద్గర్భరక్షా సదా నృణాం ||
వంధ్యాఽపి లభతే పుత్రం కాకవంధ్యా సుతైర్యుతా |
మృతవత్సా సపుత్రాస్యాత్ స్రవద్గర్భా స్థిరప్రజా ||
అపుష్పా పుష్పిణీ యస్య ధారణాచ్చ సుఖప్రసూః |
కన్యా ప్రజా పుత్రిణీ స్యాదేతత్ స్తోత్ర ప్రభావతః |
భూతప్రేతాదిజా బాధా యా బాధా కలిదోషజా |
గ్రహబాధా దేవబాధా బాధా శత్రుకృతా చ యా ||
భస్మీ భవన్తి సర్వాస్తాః కవచస్య ప్రభావతః |
సర్వే రోగాః వినశ్యంతి సర్వే బాలగ్రహాశ్చ యే ||
|| అథ కవచం ||
పూర్వే రక్షతు వారాహీ చాగ్నేయ్యామంబికా స్వయం |
దక్షిణే చండికా రక్షేత్ నైరృత్యాం శవవాహినీ ||
వారాహీ పశ్చిమే రక్షేద్వాయవ్యాం చ మహేశ్వరీ |
ఉత్తరే వైష్ణవీ రక్షేత్ ఐశాన్యాం సింహవాహినీ ||
ఊర్ధ్వం తు శారదా రక్షేదధో రక్షతు పార్వతీ |
శాకంభరీ శిరో రక్షేన్ముఖం రక్షతు భైరవీ ||
కంఠం రక్షతు చాముండా హృదయం రక్షతాచ్ఛివా |
ఈశానీ చ భుజౌ రక్షేత్కుక్షిం నాభిం చ కాళికా ||
అపర్ణా హ్యుదరం రక్షేత్కటిం బస్తిం శివప్రియా |
ఊరూ రక్షతు కౌమారీ జయా జానుద్వయం తథా ||
గుల్ఫౌ పాదౌ సదా రక్షేత్ బ్రహ్మాణీ పరమేశ్వరీ |
సర్వాంగాని సదా రక్షేత్ దుర్గా దుర్గార్తినాశినీ ||
నమో దేవ్యై మహాదేవ్యై దుర్గాయై సతతం నమః |
పుత్రసౌఖ్యం దేహి దేహి గర్భరక్షాం కురుష్వ నః ||
|| మూలమంత్రః ||
ఓం హ్రీం హ్రీం హ్రీం శ్రీం శ్రీం శ్రీం ఐం ఐం ఐం మహాకాళీ మహాలక్ష్మీ మహాసరస్వతీ రూపాయై నవకోటిమూర్త్యై దుర్గాయై నమః ||
ఓం హ్రీం హ్రీం హ్రీం దుర్గార్తినాశినీ సంతానసౌఖ్యం దేహి దేహి వంధ్యత్వం మృతవత్సత్వం చ హర హర గర్భరక్షాం కురు కురు సకలాం బాధాం కులజాం బాహ్యజాం కృతాం అకృతాం చ నాశయ నాశయ సర్వగాత్రాణి రక్ష రక్ష గర్భం పోషయ పోషయ సర్వోపద్రవం శోషయ శోషయ స్వాహా ||
|| ఫలశృతిః ||
అనేన కవచేనాంగం సప్తవారాభిమంత్రితం |
ఋతుస్నాత జలం పీత్వా భవేత్ గర్భవతీ ధ్రువం |
గర్భపాతభయే పీత్వా దృఢగర్భా ప్రజాయతే |
అనేన కవచేనాథ మార్జితా యా నిశాగమే ||
సర్వబాధావినిర్ముక్తా గర్భిణీ స్యాన్న సంశయః |
అనేన కవచేనేహ గ్రంథితం రక్తదోరకం |
కటి దేశే ధారయంతీ సుపుత్రసుఖభాగినీ |
అసూతపుత్రమింద్రాణాం జయంతం యత్ప్రభావతః ||
గురూపదిష్టం వంశాఖ్యం కవచం తదిదం సదా |
గుహ్యాత్ గుహ్యతరం చేదం న ప్రకాశ్యం హి సర్వతః |
ధారణాత్ పఠనాదస్య వంశచ్ఛేదో న జాయతే ||

దుర్గా సూక్తం

దుర్గా దేవి మనలో నిగుడంగా దాగి ఉన్న శక్తికి ప్రతీక. ప్రతి రోజూ దుర్గా సూక్తాన్ని పఠించటం వల్ల ఆ శక్తి ప్రజ్వరిల్లి మన కష్టాలు, సమస్యలను దహించివేస్తుంది మరియు ఎలాంటి సమస్యలనుండి అయినా బయటపడే ఆత్మస్థైర్యాన్ని ఇస్తుంది.

దుర్గా సూక్తం

ఓం జా॒తవే॑దసే సునవామ॒ సోమ॑ మరాతీయ॒తో నిద॑హాతి॒ వేద॑: |
స న॑: పర్‍ష॒దతి॑ దు॒ర్గాణి॒ విశ్వా॑ నా॒వేవ॒ సిన్ధు॑o దురి॒తాఽత్య॒గ్నిః || 1 ||

తామ॒గ్నివ॑ర్ణా॒o తప॑సా జ్వల॒న్తీం వై॑రోచ॒నీం క॑ర్మఫ॒లేషు॒ జుష్టా”మ్ |
దు॒ర్గాం దే॒వీగ్ం శర॑ణమ॒హం ప్రప॑ద్యే సు॒తర॑సి తరసే॒ నమ॑: || 2 ||

అగ్నే॒ త్వ॑o పా॑రయా॒ నవ్యో॑ అ॒స్మాన్ స్వ॒స్తిభి॒రతి॑ దు॒ర్గాణి॒ విశ్వా” |
పూశ్చ॑ పృ॒థ్వీ బ॑హు॒లా న॑ ఉ॒ర్వీ భవా॑ తో॒కాయ॒ తన॑యాయ॒ శంయోః || 3 ||

విశ్వా॑ని నో దు॒ర్గహా॑ జాతవేద॒: సిన్ధు॒o న నా॒వా దురి॒తాఽతి॑పర్షి |
అగ్నే॑ అత్రి॒వన్మన॑సా గృణా॒నో”ఽస్మాక॑o బోధ్యవి॒తా త॒నూనా”మ్ || 4 ||

పృ॒త॒నా॒జిత॒గ్ం సహ॑మానము॒గ్రమ॒గ్నిగ్ం హు॑వేమ పర॒మాథ్స॒ధస్థా”త్ |
స న॑: పర్ష॒దతి॑ దు॒ర్గాణి॒ విశ్వా॒ క్షామ॑ద్దేవో॒ అతి॑ దురి॒తాఽత్య॒గ్నిః || 5 ||

ప్ర॒త్నోషి॑ క॒మీడ్యో॑ అధ్వ॒రేషు॑ సనాచ్చ॒ హోతా॒ నవ్య॑శ్చ॒ సత్సి॑ |
స్వాం చా”ఽగ్నే త॒నువ॑o పి॒ప్రయ॑స్వా॒స్మభ్య॑o చ॒ సౌభ॑గ॒మాయ॑జస్వ || 6 ||

గోభి॒ర్జుష్ట॑మ॒యుజో॒ నిషి॑క్త॒o తవే”న్ద్ర విష్ణో॒రను॒సంచ॑రేమ |
నాక॑స్య పృ॒ష్ఠమభి స॒oవసా॑నో॒ వైష్ణ॑వీం లో॒క ఇ॒హ మా॑దయన్తాం || 7 ||

ఓం కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి | తన్నో॑ దుర్గిః ప్రచో॒దయా”త్ ||

ఓం శాంతి శాంతి శాంతిః |