Sacred Stotras & Deities

పంచముఖ హనుమత్కవచం

॥ పంచముఖ హనుమత్కవచమ్ ॥

అస్య శ్రీ పంచముఖహనుమన్మంత్రస్య బ్రహ్మా ఋషిః గాయత్రీఛందః పంచముఖవిరాట్ హనుమాన్ దేవతా హ్రీం బీజం శ్రీం శక్తిః క్రౌం కీలకం క్రూం కవచం క్రైం అస్త్రాయ ఫట్ ఇతి దిగ్బంధః ।

శ్రీ గరుడ ఉవాచ ।
అథ ధ్యానం ప్రవక్ష్యామి శృణు సర్వాంగసుందరి ।
యత్కృతం దేవదేవేన ధ్యానం హనుమతః ప్రియమ్ ॥ 1 ॥

పంచవక్త్రం మహాభీమం త్రిపంచనయనైర్యుతమ్ ।
బాహుభిర్దశభిర్యుక్తం సర్వకామార్థసిద్ధిదమ్ ॥ 2 ॥

పూర్వం తు వానరం వక్త్రం కోటిసూర్యసమప్రభమ్ ।
దంష్ట్రాకరాళవదనం భృకుటీకుటిలేక్షణమ్ ॥ 3 ॥

అస్యైవ దక్షిణం వక్త్రం నారసింహం మహాద్భుతమ్ ।
అత్యుగ్రతేజోవపుషం భీషణం భయనాశనమ్ ॥ 4 ॥

పశ్చిమం గారుడం వక్త్రం వక్రతుండం మహాబలమ్ ।
సర్వనాగప్రశమనం విషభూతాదికృంతనమ్ ॥ 5 ॥

ఉత్తరం సౌకరం వక్త్రం కృష్ణం దీప్తం నభోపమమ్ ।
పాతాళసింహవేతాలజ్వరరోగాదికృంతనమ్ ॥ 6 ॥

ఊర్ధ్వం హయాననం ఘోరం దానవాంతకరం పరమ్ ।
యేన వక్త్రేణ విప్రేంద్ర తారకాఖ్యం మహాసురమ్ ॥ 7 ॥

జఘాన శరణం తత్స్యాత్సర్వశత్రుహరం పరమ్ ।
ధ్యాత్వా పంచముఖం రుద్రం హనూమంతం దయానిధిమ్ ॥ 8 ॥

ఖడ్గం త్రిశూలం ఖట్వాంగం పాశమంకుశపర్వతమ్ ।
ముష్టిం కౌమోదకీం వృక్షం ధారయంతం కమండలుమ్ ॥ 9 ॥

భిందిపాలం జ్ఞానముద్రాం దశభిర్మునిపుంగవమ్ ।
ఏతాన్యాయుధజాలాని ధారయంతం భజామ్యహమ్ ॥ 10 ॥

ప్రేతాసనోపవిష్టం తం సర్వాభరణభూషితమ్ ।
దివ్యమాల్యాంబరధరం దివ్యగంధానులేపనమ్ ।
సర్వాశ్చర్యమయం దేవం హనుమద్విశ్వతోముఖమ్ ॥ 11 ॥

పంచాస్యమచ్యుతమనేకవిచిత్రవర్ణ-
-వక్త్రం శశాంకశిఖరం కపిరాజవర్యమ్ ।
పీతాంబరాదిముకుటైరుపశోభితాంగం
పింగాక్షమాద్యమనిశం మనసా స్మరామి ॥ 12 ॥

మర్కటేశం మహోత్సాహం సర్వశత్రుహరం పరమ్ ।
శత్రుం సంహర మాం రక్ష శ్రీమన్నాపదముద్ధర ॥ 13 ॥

హరిమర్కట మర్కట మంత్రమిదం
పరిలిఖ్యతి లిఖ్యతి వామతలే ।
యది నశ్యతి నశ్యతి శత్రుకులం
యది ముంచతి ముంచతి వామలతా ॥ 14 ॥

ఓం హరిమర్కటాయ స్వాహా ।

ఓం నమో భగవతే పంచవదనాయ పూర్వకపిముఖాయ సకలశత్రుసంహారకాయ స్వాహా ।
ఓం నమో భగవతే పంచవదనాయ దక్షిణముఖాయ కరాళవదనాయ నరసింహాయ సకలభూతప్రమథనాయ స్వాహా ।
ఓం నమో భగవతే పంచవదనాయ పశ్చిమముఖాయ గరుడాననాయ సకలవిషహరాయ స్వాహా ।
ఓం నమో భగవతే పంచవదనాయ ఉత్తరముఖాయ ఆదివరాహాయ సకలసంపత్కరాయ స్వాహా ।
ఓం నమో భగవతే పంచవదనాయ ఊర్ధ్వముఖాయ హయగ్రీవాయ సకలజనవశంకరాయ స్వాహా ।

ఓం అస్య శ్రీ పంచముఖహనుమన్మంత్రస్య శ్రీరామచంద్ర ఋషిః అనుష్టుప్ఛందః పంచముఖవీరహనుమాన్ దేవతా హనుమాన్ ఇతి బీజం వాయుపుత్ర ఇతి శక్తిః అంజనీసుత ఇతి కీలకం శ్రీరామదూతహనుమత్ప్రసాదసిద్ధ్యర్థే జపే వినియోగః ।
ఇతి ఋష్యాదికం విన్యసేత్ ।

అథ కరన్యాసః ।
ఓం అంజనీసుతాయ అంగుష్ఠాభ్యాం నమః ।
ఓం రుద్రమూర్తయే తర్జనీభ్యాం నమః ।
ఓం వాయుపుత్రాయ మధ్యమాభ్యాం నమః ।
ఓం అగ్నిగర్భాయ అనామికాభ్యాం నమః ।
ఓం రామదూతాయ కనిష్ఠికాభ్యాం నమః ।
ఓం పంచముఖహనుమతే కరతలకరపృష్ఠాభ్యాం నమః ।

అథ అంగన్యాసః ।
ఓం అంజనీసుతాయ హృదయాయ నమః ।
ఓం రుద్రమూర్తయే శిరసే స్వాహా ।
ఓం వాయుపుత్రాయ శిఖాయై వషట్ ।
ఓం అగ్నిగర్భాయ కవచాయ హుమ్ ।
ఓం రామదూతాయ నేత్రత్రయాయ వౌషట్ ।
ఓం పంచముఖహనుమతే అస్త్రాయ ఫట్ ।
పంచముఖహనుమతే స్వాహా ఇతి దిగ్బంధః ।

అథ ధ్యానమ్ ।
వందే వానరనారసింహఖగరాట్క్రోడాశ్వవక్త్రాన్వితం
దివ్యాలంకరణం త్రిపంచనయనం దేదీప్యమానం రుచా ।
హస్తాబ్జైరసిఖేటపుస్తకసుధాకుంభాంకుశాద్రిం హలం
ఖట్వాంగం ఫణిభూరుహం దశభుజం సర్వారివీరాపహమ్ ।

అథ మంత్రః ।
ఓం శ్రీరామదూతాయ ఆంజనేయాయ వాయుపుత్రాయ మహాబలపరాక్రమాయ సీతాదుఃఖనివారణాయ లంకాదహనకారణాయ మహాబలప్రచండాయ ఫాల్గునసఖాయ కోలాహలసకలబ్రహ్మాండవిశ్వరూపాయ
సప్తసముద్రనిర్లంఘనాయ పింగళనయనాయ అమితవిక్రమాయ సూర్యబింబఫలసేవనాయ దుష్టనివారణాయ దృష్టినిరాలంకృతాయ సంజీవినీసంజీవితాంగద-లక్ష్మణమహాకపిసైన్యప్రాణదాయ
దశకంఠవిధ్వంసనాయ రామేష్టాయ మహాఫాల్గునసఖాయ సీతాసహితరామవరప్రదాయ షట్ప్రయోగాగమపంచముఖవీరహనుమన్మంత్రజపే వినియోగః ।

ఓం హరిమర్కటమర్కటాయ బంబంబంబంబం వౌషట్ స్వాహా ।
ఓం హరిమర్కటమర్కటాయ ఫంఫంఫంఫంఫం ఫట్ స్వాహా ।
ఓం హరిమర్కటమర్కటాయ ఖేంఖేంఖేంఖేంఖేం మారణాయ స్వాహా ।
ఓం హరిమర్కటమర్కటాయ లుంలుంలుంలుంలుం ఆకర్షితసకలసంపత్కరాయ స్వాహా ।
ఓం హరిమర్కటమర్కటాయ ధంధంధంధంధం శత్రుస్తంభనాయ స్వాహా ।

ఓం టంటంటంటంటం కూర్మమూర్తయే పంచముఖవీరహనుమతే పరయంత్ర పరతంత్రోచ్చాటనాయ స్వాహా ।
ఓం కంఖంగంఘంఙం చంఛంజంఝంఞం టంఠండంఢంణం తంథందంధంనం పంఫంబంభంమం యంరంలంవం శంషంసంహం ళంక్షం స్వాహా ।
ఇతి దిగ్బంధః ।

ఓం పూర్వకపిముఖాయ పంచముఖహనుమతే టంటంటంటంటం సకలశత్రుసంహరణాయ స్వాహా ।
ఓం దక్షిణముఖాయ పంచముఖహనుమతే కరాళవదనాయ నరసింహాయ ఓం హ్రాం హ్రీం హ్రూం హ్రైం హ్రౌం హ్రః సకలభూతప్రేతదమనాయ స్వాహా ।
ఓం పశ్చిమముఖాయ గరుడాననాయ పంచముఖహనుమతే మంమంమంమంమం సకలవిషహరాయ స్వాహా ।
ఓం ఉత్తరముఖాయ ఆదివరాహాయ లంలంలంలంలం నృసింహాయ నీలకంఠమూర్తయే పంచముఖహనుమతే స్వాహా ।
ఓం ఊర్ధ్వముఖాయ హయగ్రీవాయ రుంరుంరుంరుంరుం రుద్రమూర్తయే సకలప్రయోజననిర్వాహకాయ స్వాహా ।

ఓం అంజనీసుతాయ వాయుపుత్రాయ మహాబలాయ సీతాశోకనివారణాయ శ్రీరామచంద్రకృపాపాదుకాయ మహావీర్యప్రమథనాయ బ్రహ్మాండనాథాయ కామదాయ పంచముఖవీరహనుమతే స్వాహా ।

భూతప్రేతపిశాచబ్రహ్మరాక్షస శాకినీడాకిన్యంతరిక్షగ్రహ పరయంత్ర పరతంత్రోచ్చటనాయ స్వాహా ।
సకలప్రయోజననిర్వాహకాయ పంచముఖవీరహనుమతే శ్రీరామచంద్రవరప్రసాదాయ జంజంజంజంజం స్వాహా ।

ఇదం కవచం పఠిత్వా తు మహాకవచం పఠేన్నరః ।
ఏకవారం జపేత్ స్తోత్రం సర్వశత్రునివారణమ్ ॥ 15 ॥

ద్వివారం తు పఠేన్నిత్యం పుత్రపౌత్రప్రవర్ధనమ్ ।
త్రివారం చ పఠేన్నిత్యం సర్వసంపత్కరం శుభమ్ ॥ 16 ॥

చతుర్వారం పఠేన్నిత్యం సర్వరోగనివారణమ్ ।
పంచవారం పఠేన్నిత్యం సర్వలోకవశంకరమ్ ॥ 17 ॥

షడ్వారం చ పఠేన్నిత్యం సర్వదేవవశంకరమ్ ।
సప్తవారం పఠేన్నిత్యం సర్వసౌభాగ్యదాయకమ్ ॥ 18 ॥

అష్టవారం పఠేన్నిత్యమిష్టకామార్థసిద్ధిదమ్ ।
నవవారం పఠేన్నిత్యం రాజభోగమవాప్నుయాత్ ॥ 19 ॥

దశవారం పఠేన్నిత్యం త్రైలోక్యజ్ఞానదర్శనమ్ ।
రుద్రావృత్తిం పఠేన్నిత్యం సర్వసిద్ధిర్భవేద్ధృవమ్ ॥ 20 ॥

నిర్బలో రోగయుక్తశ్చ మహావ్యాధ్యాదిపీడితః ।
కవచస్మరణేనైవ మహాబలమవాప్నుయాత్ ॥ 21 ॥

ఇతి సుదర్శనసంహితాయాం శ్రీరామచంద్రసీతాప్రోక్తం శ్రీ పంచముఖహనుమత్కవచమ్ ।

ఏకాదశముఖి హనుమత్కవచం

(రుద్రయామలతః)

శ్రీదేవ్యువాచ
శైవాని గాణపత్యాని శాక్తాని వైష్ణవాని చ ।
కవచాని చ సౌరాణి యాని చాన్యాని తాని చ ॥ 1॥
శ్రుతాని దేవదేవేశ త్వద్వక్త్రాన్నిఃసృతాని చ ।
కించిదన్యత్తు దేవానాం కవచం యది కథ్యతే ॥ 2॥

ఈశ్వర ఉవాచ
శ‍ఋణు దేవి ప్రవక్ష్యామి సావధానావధారయ ।
హనుమత్కవచం పుణ్యం మహాపాతకనాశనమ్ ॥ 3॥
ఏతద్గుహ్యతమం లోకే శీఘ్రం సిద్ధికరం పరమ్ ।
జయో యస్య ప్రగానేన లోకత్రయజితో భవేత్ ॥ 4॥

ఓం అస్య శ్రీఏకాదశవక్త్రహనుమత్కవచమాలామంత్రస్య
వీరరామచంద్ర ఋషిః । అనుష్టుప్ఛందః । శ్రీమహావీరహనుమాన్ రుద్రో దేవతా ।
హ్రీం బీజమ్ । హ్రౌం శక్తిః । స్ఫేం కీలకమ్ ।
సర్వదూతస్తంభనార్థం జిహ్వాకీలనార్థం,
మోహనార్థం రాజముఖీదేవతావశ్యార్థం
బ్రహ్మరాక్షసశాకినీడాకినీభూతప్రేతాదిబాధాపరిహారార్థం
శ్రీహనుమద్దివ్యకవచాఖ్యమాలామంత్రజపే వినియోగః ।

అథ కరన్యాసః ।
ఓం హ్రౌం ఆంజనేయాయ అంగుష్ఠభ్యాం నమః ।
ఓం స్ఫేం రుద్రమూర్తయే తర్జనీభ్యాం నమః ।
ఓం స్ఫేం వాయుపుత్రాయ మధ్యమాభ్యాం నమః ।
ఓం స్ఫేం అంజనీగర్భాయ అనామికాభ్యాం నమః ।
ఓం స్ఫేం రామదూతాయ కనిష్ఠికాభ్యాం నమః ।
ఓం హ్రౌం బ్రహ్మాస్త్రాదినివారణాయ కరతలకరపృష్ఠాభ్యాం నమః ।

అథ అంగన్యాసః ।
ఓం హ్రౌం ఆంజనేయాయ హృదయాయ నమః ।
ఓం స్ఫేం రుద్రమూర్తయే శిరసే స్వాహా ।
ఓం స్ఫేం వాయుపుత్రాయ శిఖాయై వషట్ ।
ఓం హ్రౌం అంజనీగర్భాయ కవచాయ హుమ్ ।
ఓం స్ఫేం రామదూతాయ నేత్రత్రయాయ వౌషట్ ।
ఓం హ్రౌం బ్రహ్మాస్త్రాదినివారణాయ అస్త్రాయ ఫట్ ।
ఇతి న్యాసః ।

అథ ధ్యానమ్ ।
ఓం ధ్యాయేద్రణే హనుమంతమేకాదశముఖాంబుజమ్ ।
ధ్యాయేత్తం రావణోపేతం దశబాహుం త్రిలోచనం
హాహాకారైః సదర్పైశ్చ కంపయంతం జగత్త్రయమ్ ।
బ్రహ్మాదివందితం దేవం కపికోటిసమన్వితం
ఏవం ధ్యాత్వా జపేద్దేవి కవచం పరమాద్భుతమ్ ॥

దిగ్బంధాః
ఓం ఇంద్రదిగ్భాగే గజారూఢహనుమతే బ్రహ్మాస్త్రశక్తిసహితాయ
చౌరవ్యాఘ్రపిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం అగ్నిదిగ్భాగే మేషారుఢహనుమతే అస్త్రశక్తిసహితాయ చౌరవ్యాఘ్ర-
పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం యమదిగ్భాగే మహిషారూఢహనుమతే ఖడ్గశక్తిసహితాయ చౌరవ్యాఘ్ర-
పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం నిఋర్తిదిగ్భాగే నరారూఢహనుమతే ఖడ్గశక్తిసహితాయ చౌరవ్యాఘ్ర-
పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం వరుణదిగ్భాగే మకరారూఢహనుమతే ప్రాణశక్తిసహితాయ
చౌరవ్యాఘ్ర పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం వాయుదిగ్భాగే మృగారూఢహనుమతే అంకుశశక్తిసహితాయ
చౌరవ్యాఘ్రపిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం కుబేరదిగ్భాగే అశ్వారూఢహనుమతే గదాశక్తిసహితాయ
చౌరవ్యాఘ్ర పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం ఈశానదిగ్భాగే రాక్షసారూఢహనుమతే పర్వతశక్తిసహితాయ
చౌరవ్యాఘ్ర పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం అంతరిక్షదిగ్భాగే వర్తులహనుమతే ముద్గరశక్తిసహితాయ
చౌరవ్యాఘ్ర పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం భూమిదిగ్భాగే వృశ్చికారూఢహనుమతే వజ్రశక్తిసహితాయ
చౌరవ్యాఘ్ర పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

ఓం వజ్రమండలే హంసారూఢహనుమతే వజ్రశక్తిసహితాయ చౌరవ్యాఘ్ర-
పిశాచబ్రహ్మరాక్షసశాకినీడాకినీవేతాలసమూహోచ్చాటనాయ
మాం రక్ష రక్ష స్వాహా ।

మాలామంత్రః ।
ఓం హ్రీం యీం యం ప్రచండపరాక్రమాయ ఏకాదశముఖహనుమతే
హంసయతిబంధ-మతిబంధ-వాగ్బంధ-భైరుండబంధ-భూతబంధ-
ప్రేతబంధ-పిశాచబంధ-జ్వరబంధ-శూలబంధ-
సర్వదేవతాబంధ-రాగబంధ-ముఖబంధ-రాజసభాబంధ-
ఘోరవీరప్రతాపరౌద్రభీషణహనుమద్వజ్రదంష్ట్రాననాయ
వజ్రకుండలకౌపీనతులసీవనమాలాధరాయ సర్వగ్రహోచ్చాటనోచ్చాటనాయ
బ్రహ్మరాక్షససమూహోచ్చాటానాయ జ్వరసమూహోచ్చాటనాయ రాజసమూహోచ్చాటనాయ
చౌరసమూహోచ్చాటనాయ శత్రుసమూహోచ్చాటనాయ దుష్టసమూహోచ్చాటనాయ
మాం రక్ష రక్ష స్వాహా ॥ 1 ॥

ఓం వీరహనుమతే నమః ।
ఓం నమో భగవతే వీరహనుమతే పీతాంబరధరాయ కర్ణకుండలాద్యా-
భరణాలంకృతభూషణాయ కిరీటబిల్వవనమాలావిభూషితాయ
కనకయజ్ఞోపవీతినే కౌపీనకటిసూత్రవిరాజితాయ
శ్రీవీరరామచంద్రమనోభిలషితాయ లంకాదిదహనకారణాయ
ఘనకులగిరివజ్రదండాయ అక్షకుమారసంహారకారణాయ
ఓం యం ఓం నమో భగవతే రామదూతాయ ఫట్ స్వాహా ॥

ఓం ఐం హ్రీం హ్రౌం హనుమతే సీతారామదూతాయ సహస్రముఖరాజవిధ్వంసకాయ
అంజనీగర్భసంభూతాయ శాకినీడాకినీవిధ్వంసనాయ కిలికిలిచుచు కారేణ
విభీషణాయ వీరహనుమద్దేవాయ ఓం హ్రీం శ్రీం హ్రౌ హ్రాం ఫట్ స్వాహా ॥

ఓం శ్రీవీరహనుమతే హౌం హ్రూం ఫట్ స్వాహా ।
ఓం శ్రీవీరహనుమతే స్ఫ్రూం హ్రూం ఫట్ స్వాహా ।
ఓం శ్రీవీరహనుమతే హ్రౌం హ్రూం ఫట్ స్వాహా ।
ఓం శ్రీవీరహనుమతే స్ఫ్రూం ఫట్ స్వాహా ।
ఓం హ్రాం శ్రీవీరహనుమతే హ్రౌం హూం ఫట్ స్వాహా ।
ఓం శ్రీవీరహనుమతే హ్రైం హుం ఫట్ స్వాహా ।

ఓం హ్రాం పూర్వముఖే వానరముఖహనుమతే
లం సకలశత్రుసంహారకాయ హుం ఫట్ స్వాహా ।

ఓం ఆగ్నేయముఖే మత్స్యముఖహనుమతే
రం సకలశత్రుసకలశత్రుసంహారకాయ హుం ఫట్ స్వాహా ।

ఓం దక్షిణముఖే కూర్మముఖహనుమతే
మం సకలశత్రుసకలశత్రుసంహారకాయ హుం ఫట్ స్వాహా ।

ఓం నైఋర్తిముఖే వరాహముఖహనుమతే
క్షం సకలశత్రుసకలశత్రుసంహారకాయ హుం ఫట్ స్వాహా ।

ఓం పశ్చిమముఖే నారసింహముఖహనుమతే
వం సకలశత్రుసకలశత్రుసంహారకాయ హుం ఫట్ స్వాహా ।

ఓం వాయవ్యముఖే గరుడముఖహనుమతే
యం సకలశత్రుసకలశత్రుసంహారకాయ హుం ఫట్ స్వాహా ।

ఓం ఉత్తరముఖే శరభముఖహనుమతే
సం సకలశత్రుసకలశత్రుసంహారకాయ హుం ఫట్ స్వాహా ।

ఓం ఈశానముఖే వృషభముఖహనుమతే హూం
ఆం సకలశత్రుసకలశత్రుసంహారకాయ హుం ఫట్ స్వాహా ।

ఓం ఊర్ధ్వముఖే జ్వాలాముఖహనుమతే
ఆం సకలశత్రుసకలశత్రుసంహారకాయ హుం ఫట్ స్వాహా ।

ఓం అధోముఖే మార్జారముఖహనుమతే
హ్రీం సకలశత్రుసకలశత్రుసంహారకాయ హుం ఫట్ స్వాహా ।

ఓం సర్వత్ర జగన్ముఖే హనుమతే
స్ఫ్రూం సకలశత్రుసకలశత్రుసంహారకాయ హుం ఫట్ స్వాహా ।

ఓం శ్రీసీతారామపాదుకాధరాయ మహావీరాయ వాయుపుత్రాయ కనిష్ఠాయ
బ్రహ్మనిష్ఠాయ ఏకాదశరుద్రమూర్తయే మహాబలపరాక్రమాయ
భానుమండలగ్రసనగ్రహాయ చతుర్ముఖవరప్రసాదాయ
మహాభయరక్షకాయ యం హౌమ్ ।

ఓం హస్ఫేం హస్ఫేం హస్ఫేం శ్రీవీరహనుమతే నమః ఏకాదశవీరహనుమన్
మాం రక్ష రక్ష శాంతిం కురు కురు తుష్టిం కురు కరు పుష్టిం కురు కురు
మహారోగ్యం కురు కురు అభయం కురు కురు అవిఘ్నం కురు కురు
మహావిజయం కురు కురు సౌభాగ్యం కురు కురు సర్వత్ర విజయం కురు కురు
మహాలక్ష్మీం దేహి హుం ఫట్ స్వాహా ॥

ఫలశ్రుతిః
ఇత్యేతత్కవచం దివ్యం శివేన పరికీర్తితమ్ ।
యః పఠేత్ప్రయతో భూత్వా సర్వాన్కామానవాప్నుయాత్ ॥

ద్వికాలమేకకాలం వా త్రివారం యః పఠేన్నరః ।
రోగాన్ పునః క్షణాత్ జిత్వా స పుమాన్ లభతే శ్రియమ్ ॥

మధ్యాహ్నే చ జలే స్థిత్వా చతుర్వారం పఠేద్యది ।
క్షయాపస్మారకుష్ఠాదితాపత్రయనివారణమ్ ॥

యః పఠేత్కవచం దివ్యం హనుమద్ధ్యానతత్పరః ।
త్రిఃసకృద్వా యథాజ్ఞానం సోఽపి పుణ్యవతాం వరః ॥

దేవమభ్యర్చ్య విధివత్పురశ్చర్యాం సమారభేత్ ।
ఏకాదశశతం జాప్యం దశాంశహవనాదికమ్ ॥

యః కరోతి నరో భక్త్యా కవచస్య సమాదరమ్ ।
తతః సిద్ధిర్భవేత్తస్య పరిచర్యావిధానతః ॥

గద్యపద్యమయా వాణీ తస్య వక్త్రే ప్రజాయతే ।
బ్రహ్మహత్యాదిపాపేభ్యో ముచ్యతే నాత్ర సంశయః ॥

ఏకాదశముఖిహనుమత్కవచం సమాప్త ॥

శ్రీ కృష్ణ కవచం (త్రైలోక్య మంగళ కవచం)

శ్రీ నారద ఉవాచ –
భగవన్సర్వధర్మజ్ఞ కవచం యత్ప్రకాశితమ్ ।
త్రైలోక్యమంగళం నామ కృపయా కథయ ప్రభో ॥ 1 ॥

సనత్కుమార ఉవాచ –
శృణు వక్ష్యామి విప్రేంద్ర కవచం పరమాద్భుతమ్ ।
నారాయణేన కథితం కృపయా బ్రహ్మణే పురా ॥ 2 ॥

బ్రహ్మణా కథితం మహ్యం పరం స్నేహాద్వదామి తే ।
అతి గుహ్యతరం తత్త్వం బ్రహ్మమంత్రౌఘవిగ్రహమ్ ॥ 3 ॥

యద్ధృత్వా పఠనాద్బ్రహ్మా సృష్టిం వితనుతే ధ్రువమ్ ।
యద్ధృత్వా పఠనాత్పాతి మహాలక్ష్మీర్జగత్త్రయమ్ ॥ 4 ॥

పఠనాద్ధారణాచ్ఛంభుః సంహర్తా సర్వమంత్రవిత్ ।
త్రైలోక్యజననీ దుర్గా మహిషాదిమహాసురాన్ ॥ 5 ॥

వరతృప్తాన్ జఘానైవ పఠనాద్ధారణాద్యతః ।
ఏవమింద్రాదయః సర్వే సర్వైశ్వర్యమవాప్నుయుః ॥ 6 ॥

ఇదం కవచమత్యంతగుప్తం కుత్రాపి నో వదేత్ ।
శిష్యాయ భక్తియుక్తాయ సాధకాయ ప్రకాశయేత్ ॥ 7 ॥

శఠాయ పరశిష్యాయ దత్వా మృత్యుమవాప్నుయాత్ ।
త్రైలోక్యమంగళస్యాఽస్య కవచస్య ప్రజాపతిః ॥ 8 ॥

ఋషిశ్ఛందశ్చ గాయత్రీ దేవో నారాయణస్స్వయమ్ ।
ధర్మార్థకామమోక్షేషు వినియోగః ప్రకీర్తితః ॥ 9 ॥

ప్రణవో మే శిరః పాతు నమో నారాయణాయ చ ।
ఫాలం మే నేత్రయుగళమష్టార్ణో భుక్తిముక్తిదః ॥ 10 ॥

క్లీం పాయాచ్ఛ్రోత్రయుగ్మం చైకాక్షరః సర్వమోహనః ।
క్లీం కృష్ణాయ సదా ఘ్రాణం గోవిందాయేతి జిహ్వికామ్ ॥ 11 ॥

గోపీజనపదవల్లభాయ స్వాహాఽననం మమ ।
అష్టాదశాక్షరో మంత్రః కంఠం పాతు దశాక్షరః ॥ 12 ॥

గోపీజనపదవల్లభాయ స్వాహా భుజద్వయమ్ ।
క్లీం గ్లౌం క్లీం శ్యామలాంగాయ నమః స్కంధౌ రక్షాక్షరః ॥ 13 ॥

క్లీం కృష్ణః క్లీం కరౌ పాయాత్ క్లీం కృష్ణాయాం గతోఽవతు ।
హృదయం భువనేశానః క్లీం కృష్ణః క్లీం స్తనౌ మమ ॥ 14 ॥

గోపాలాయాగ్నిజాయాతం కుక్షియుగ్మం సదాఽవతు ।
క్లీం కృష్ణాయ సదా పాతు పార్శ్వయుగ్మమనుత్తమః ॥ 15 ॥

కృష్ణ గోవిందకౌ పాతు స్మరాద్యౌజేయుతౌ మనుః ।
అష్టాక్షరః పాతు నాభిం కృష్ణేతి ద్వ్యక్షరోఽవతు ॥ 16 ॥

పృష్ఠం క్లీం కృష్ణకం గల్ల క్లీం కృష్ణాయ ద్విరాంతకః ।
సక్థినీ సతతం పాతు శ్రీం హ్రీం క్లీం కృష్ణఠద్వయమ్ ॥ 17 ॥

ఊరూ సప్తాక్షరం పాయాత్ త్రయోదశాక్షరోఽవతు ।
శ్రీం హ్రీం క్లీం పదతో గోపీజనవల్లభపదం తతః ॥ 18 ॥

శ్రియా స్వాహేతి పాయూ వై క్లీం హ్రీం శ్రీం సదశార్ణకః ।
జానునీ చ సదా పాతు క్లీం హ్రీం శ్రీం చ దశాక్షరః ॥ 19 ॥

త్రయోదశాక్షరః పాతు జంఘే చక్రాద్యుదాయుధః ।
అష్టాదశాక్షరో హ్రీం శ్రీం పూర్వకో వింశదర్ణకః ॥ 20 ॥

సర్వాంగం మే సదా పాతు ద్వారకానాయకో బలీ ।
నమో భగవతే పశ్చాద్వాసుదేవాయ తత్పరమ్ ॥ 21 ॥

తారాద్యో ద్వాదశార్ణోఽయం ప్రాచ్యాం మాం సర్వదాఽవతు ।
శ్రీం హ్రీం క్లీం చ దశార్ణస్తు క్లీం హ్రీం శ్రీం షోడశార్ణకః ॥ 22 ॥

గదాద్యుదాయుధో విష్ణుర్మామగ్నేర్దిశి రక్షతు ।
హ్రీం శ్రీం దశాక్షరో మంత్రో దక్షిణే మాం సదాఽవతు ॥ 23 ॥

తారో నమో భగవతే రుక్మిణీవల్లభాయ చ ।
స్వాహేతి షోడశార్ణోఽయం నైరృత్యాం దిశి రక్షతు ॥ 24 ॥

క్లీం హృషీకేశ వంశాయ నమో మాం వారుణోఽవతు ।
అష్టాదశార్ణః కామాంతో వాయవ్యే మాం సదాఽవతు ॥ 25 ॥

శ్రీం మాయాకామతృష్ణాయ గోవిందాయ ద్వికో మనుః ।
ద్వాదశార్ణాత్మకో విష్ణురుత్తరే మాం సదాఽవతు ॥ 26 ॥

వాగ్భవం కామకృష్ణాయ హ్రీం గోవిందాయ తత్పరమ్ ।
శ్రీం గోపీజనవల్లభాయ స్వాహా హస్తౌ తతః పరమ్ ॥ 27 ॥

ద్వావింశత్యక్షరో మంత్రో మామైశాన్యే సదాఽవతు ।
కాళీయస్య ఫణామధ్యే దివ్యం నృత్యం కరోతి తమ్ ॥ 28 ॥

నమామి దేవకీపుత్రం నృత్యరాజానమచ్యుతమ్ ।
ద్వాత్రింశదక్షరో మంత్రోఽప్యధో మాం సర్వదాఽవతు ॥ 29 ॥

కామదేవాయ విద్మహే పుష్పబాణాయ ధీమహి ।
తన్నోఽనంగః ప్రచోదయాదేషా మాం పాతుచోర్ధ్వతః ॥ 30 ॥

ఇతి తే కథితం విప్ర బ్రహ్మమంత్రౌఘవిగ్రహమ్ ।
త్రైలోక్యమంగళం నామ కవచం బ్రహ్మరూపకమ్ ॥ 31 ॥

బ్రహ్మణా కథితం పూర్వం నారాయణముఖాచ్ఛ్రుతమ్ ।
తవ స్నేహాన్మయాఽఖ్యాతం ప్రవక్తవ్యం న కస్యచిత్ ॥ 32 ॥

గురుం ప్రణమ్య విధివత్కవచం ప్రపఠేత్తతః ।
సకృద్ద్విస్త్రిర్యథాజ్ఞానం స హి సర్వతపోమయః ॥ 33 ॥

మంత్రేషు సకలేష్వేవ దేశికో నాత్ర సంశయః ।
శతమష్టోత్తరం చాస్య పురశ్చర్యా విధిస్స్మృతః ॥ 34 ॥

హవనాదీందశాంశేన కృత్వా తత్సాధయేద్ధ్రువమ్ ।
యది స్యాత్సిద్ధకవచో విష్ణురేవ భవేత్స్వయమ్ ॥ 35 ॥

మంత్రసిద్ధిర్భవేత్తస్య పురశ్చర్యా విధానతః ।
స్పర్ధాముద్ధూయ సతతం లక్ష్మీర్వాణీ వసేత్తతః ॥ 36 ॥

పుష్పాంజల్యష్టకం దత్వా మూలేనైవ పఠేత్సకృత్ ।
దశవర్షసహస్రాణి పూజాయాః ఫలమాప్నుయాత్ ॥ 37 ॥

భూర్జే విలిఖ్య గుళికాం స్వర్ణస్థాం ధారయేద్యది ।
కంఠే వా దక్షిణే బాహౌ సోఽపి విష్ణుర్న సంశయః ॥ 38 ॥

అశ్వమేధసహస్రాణి వాజపేయశతాని చ ।
మహాదానాని యాన్యేవ ప్రాదక్షిణ్యం భువస్తథా ॥ 39 ॥

కళాం నార్హంతి తాన్యేవ సకృదుచ్చారణాత్తతః ।
కవచస్య ప్రసాదేన జీవన్ముక్తో భవేన్నరః ॥ 40 ॥

త్రైలోక్యం క్షోభయత్యేవ త్రైలోక్యవిజయీ స హి ।
ఇదం కవచమజ్ఞాత్వా యజేద్యః పురుషోత్తమమ్ ।
శతలక్షప్రజప్తోఽపి న మంత్రస్తస్య సిద్ధ్యతి ॥ 41 ॥

ఇతి శ్రీ నారదపాంచరాత్రే జ్ఞానామృతసారే త్రైలోక్యమంగళకవచమ్ ।

మహాశాశ్తా అనుగ్రహ కవచం

శ్రీదేవ్యువాచ-
భగవన్ దేవదేవేశ సర్వజ్ఞ త్రిపురాంతక ।
ప్రాప్తే కలియుగే ఘోరే మహాభూతైః సమావృతే ॥ 1

మహావ్యాధి మహావ్యాళ ఘోరరాజైః సమావృతే ।
దుఃస్వప్నశోకసంతాపైః దుర్వినీతైః సమావృతే ॥ 2

స్వధర్మవిరతేమార్గే ప్రవృత్తే హృది సర్వదా ।
తేషాం సిద్ధిం చ ముక్తిం చ త్వం మే బ్రూహి వృషద్వజ ॥ 3

ఈశ్వర ఉవాచ-
శృణు దేవి మహాభాగే సర్వకళ్యాణకారణే ।
మహాశాస్తుశ్చ దేవేశి కవచం పుణ్యవర్ధనమ్ ॥ 4

అగ్నిస్తంభ జలస్తంభ సేనాస్తంభ విధాయకమ్ ।
మహాభూతప్రశమనం మహావ్యాధినివారణమ్ ॥ 5

మహాజ్ఞానప్రదం పుణ్యం విశేషాత్ కలితాపహమ్ ।
సర్వరక్షోత్తమం పుంసాం ఆయురారోగ్యవర్ధనమ్ ॥ 6

కిమతో బహునోక్తేన యం యం కామయతే ద్విజః ।
తం తమాప్నోత్యసందేహో మహాశాస్తుః ప్రసాదనాత్ ॥ 7

కవచస్య ఋషిర్బ్రహ్మా గాయత్రీః ఛంద ఉచ్యతే ।
దేవతా శ్రీమహాశాస్తా దేవో హరిహరాత్మజః ॥ 8

షడంగమాచరేద్భక్త్యా మాత్రయా జాతియుక్తయా ।
ధ్యానమస్య ప్రవక్ష్యామి శృణుష్వావహితా ప్రియే ॥ 9

అస్య శ్రీ మహాశాస్తుః కవచమంత్రస్య । బ్రహ్మా ఋషిః । గాయత్రీః ఛందః । మహాశాస్తా దేవతా । హ్రాం బీజమ్ । హ్రీం శక్తిః । హ్రూం కీలకమ్ । శ్రీ మహాశాస్తుః ప్రసాద సిద్ధ్యర్థే జపే వినియోగః ॥

హ్రాం ఇత్యాది షడంగన్యాసః ॥

ధ్యానం-
తేజోమండలమధ్యగం త్రినయనం దివ్యాంబరాలంకృతం
దేవం పుష్పశరేక్షుకార్ముక లసన్మాణిక్యపాత్రాఽభయమ్ ।
బిభ్రాణం కరపంకజైః మదగజ స్కంధాధిరూఢం విభుం
శాస్తారం శరణం భజామి సతతం త్రైలోక్య సంమోహనమ్ ॥

మహాశాస్తా శిరః పాతు ఫాలం హరిహరాత్మజః ।
కామరూపీ దృశం పాతు సర్వజ్ఞో మే శ్రుతిం సదా ॥ 1

ఘ్రాణం పాతు కృపాధ్యక్షః ముఖం గౌరీప్రియః సదా ।
వేదాధ్యాయీ చ మే జిహ్వాం పాతు మే చిబుకం గురుః ॥ 2

కంఠం పాతు విశుద్ధాత్మా స్కంధౌ పాతు సురార్చితః ।
బాహూ పాతు విరూపాక్షః కరౌ తు కమలాప్రియః ॥ 3

భూతాధిపో మే హృదయం మధ్యం పాతు మహాబలః ।
నాభిం పాతు మహావీరః కమలాక్షోఽవతు కటిమ్ ॥ 4

సనీపం పాతు విశ్వేశః గుహ్యం గుహ్యార్థవిత్సదా ।
ఊరూ పాతు గజారూఢః వజ్రధారీ చ జానునీ ॥ 5

జంఘే పాత్వంకుశధరః పాదౌ పాతు మహామతిః ।
సర్వాంగం పాతు మే నిత్యం మహామాయావిశారదః ॥ 6

ఇతీదం కవచం పుణ్యం సర్వాఘౌఘనికృంతనమ్ ।
మహావ్యాధిప్రశమనం మహాపాతకనాశనమ్ ॥ 7

జ్ఞానవైరాగ్యదం దివ్యమణిమాదివిభూషితమ్ ।
ఆయురారోగ్యజననం మహావశ్యకరం పరమ్ ॥ 8

యం యం కామయతే కామం తం తమాప్నోత్యసంశయః ।
త్రిసంధ్యం యః పఠేద్విద్వాన్ స యాతి పరమాం గతిమ్ ॥

ఇతి శ్రీ మహాశాస్తా అనుగ్రహ కవచమ్ ।

శ్రీ సుబ్రహ్మణ్య కవచ స్తోత్రం

అస్య శ్రీసుబ్రహ్మణ్యకవచస్తోత్రమహామంత్రస్య, బ్రహ్మా ఋషిః, అనుష్టుప్ఛందః, శ్రీసుబ్రహ్మణ్యో దేవతా, ఓం నమ ఇతి బీజం, భగవత ఇతి శక్తిః, సుబ్రహ్మణ్యాయేతి కీలకం, శ్రీసుబ్రహ్మణ్య ప్రసాదసిద్ధ్యర్థే జపే వినియోగః ॥

కరన్యాసః –
ఓం సాం అంగుష్ఠాభ్యాం నమః ।
ఓం సీం తర్జనీభ్యాం నమః ।
ఓం సూం మధ్యమాభ్యాం నమః ।
ఓం సైం అనామికాభ్యాం నమః ।
ఓం సౌం కనిష్ఠికాభ్యాం నమః ।
ఓం సః కరతలకరపృష్ఠాభ్యాం నమః ॥
అంగన్యాసః –
ఓం సాం హృదయాయ నమః ।
ఓం సీం శిరసే స్వాహా ।
ఓం సూం శిఖాయై వషట్ ।
ఓం సైం కవచాయ హుమ్ ।
ఓం సౌం నేత్రత్రయాయ వౌషట్ ।
ఓం సః అస్త్రాయ ఫట్ ।
భూర్భువస్సువరోమితి దిగ్బంధః ॥

ధ్యానమ్ ।
సిందూరారుణమిందుకాంతివదనం కేయూరహారాదిభిః
దివ్యైరాభరణైర్విభూషితతనుం స్వర్గాదిసౌఖ్యప్రదమ్ ।
అంభోజాభయశక్తికుక్కుటధరం రక్తాంగరాగోజ్జ్వలం
సుబ్రహ్మణ్యముపాస్మహే ప్రణమతాం సర్వార్థసిద్ధిప్రదమ్ ॥ [భీతిప్రణాశోద్యతం]

లమిత్యాది పంచపూజా ।
ఓం లం పృథివ్యాత్మనే సుబ్రహ్మణ్యాయ గంధం సమర్పయామి ।
ఓం హం ఆకాశాత్మనే సుబ్రహ్మణ్యాయ పుష్పాణి సమర్పయామి ।
ఓం యం వాయ్వాత్మనే సుబ్రహ్మణ్యాయ ధూపమాఘ్రాపయామి ।
ఓం రం అగ్న్యాత్మనే సుబ్రహ్మణ్యాయ దీపం దర్శయామి ।
ఓం వం అమృతాత్మనే సుబ్రహ్మణ్యాయ స్వాదన్నం నివేదయామి ।
ఓం సం సర్వాత్మనే సుబ్రహ్మణ్యాయ సర్వోపచారాన్ సమర్పయామి ।

కవచమ్ ।
సుబ్రహ్మణ్యోఽగ్రతః పాతు సేనానీః పాతు పృష్ఠతః ।
గుహో మాం దక్షిణే పాతు వహ్నిజః పాతు వామతః ॥ 1 ॥

శిరః పాతు మహాసేనః స్కందో రక్షేల్లలాటకమ్ ।
నేత్రే మే ద్వాదశాక్షశ్చ శ్రోత్రే రక్షతు విశ్వభృత్ ॥ 2 ॥

ముఖం మే షణ్ముఖః పాతు నాసికాం శంకరాత్మజః ।
ఓష్ఠౌ వల్లీపతిః పాతు జిహ్వాం పాతు షడాననః ॥ 3 ॥

దేవసేనాపతిర్దంతాన్ చిబుకం బహులోద్భవః ।
కంఠం తారకజిత్పాతు బాహూ ద్వాదశబాహుకః ॥ 4 ॥

హస్తౌ శక్తిధరః పాతు వక్షః పాతు శరోద్భవః ।
హృదయం వహ్నిభూః పాతు కుక్షిం పాత్వంబికాసుతః ॥ 5 ॥

నాభిం శంభుసుతః పాతు కటిం పాతు హరాత్మజః ।
ఊరూ పాతు గజారూఢో జానూ మే జాహ్నవీసుతః ॥ 6 ॥

జంఘే విశాఖో మే పాతు పాదౌ మే శిఖివాహనః ।
సర్వాణ్యంగాని భూతేశః సర్వధాతూంశ్చ పావకిః ॥ 7 ॥

సంధ్యాకాలే నిశీథిన్యాం దివా ప్రాతర్జలేఽగ్నిషు ।
దుర్గమే చ మహారణ్యే రాజద్వారే మహాభయే ॥ 8 ॥

తుములే రణ్యమధ్యే చ సర్వదుష్టమృగాదిషు ।
చోరాదిసాధ్వసేఽభేద్యే జ్వరాదివ్యాధిపీడనే ॥ 9 ॥

దుష్టగ్రహాదిభీతౌ చ దుర్నిమిత్తాదిభీషణే ।
అస్త్రశస్త్రనిపాతే చ పాతు మాం క్రౌంచరంధ్రకృత్ ॥ 10 ॥

యః సుబ్రహ్మణ్యకవచం ఇష్టసిద్ధిప్రదం పఠేత్ ।
తస్య తాపత్రయం నాస్తి సత్యం సత్యం వదామ్యహమ్ ॥ 11 ॥

ధర్మార్థీ లభతే ధర్మమర్థార్థీ చార్థమాప్నుయాత్ ।
కామార్థీ లభతే కామం మోక్షార్థీ మోక్షమాప్నుయాత్ ॥ 12 ॥

యత్ర యత్ర జపేద్భక్త్యా తత్ర సన్నిహితో గుహః ।
పూజాప్రతిష్ఠాకాలే చ జపకాలే పఠేదిదమ్ ॥ 13 ॥

తేషామేవ ఫలావాప్తిః మహాపాతకనాశనమ్ ।
యః పఠేచ్ఛృణుయాద్భక్త్యా నిత్యం దేవస్య సన్నిధౌ ।
సర్వాన్కామానిహ ప్రాప్య సోఽంతే స్కందపురం వ్రజేత్ ॥ 14 ॥

ఉత్తరన్యాసః ॥
కరన్యాసః –
ఓం సాం అంగుష్ఠాభ్యాం నమః ।
ఓం సీం తర్జనీభ్యాం నమః ।
ఓం సూం మధ్యమాభ్యాం నమః ।
ఓం సైం అనామికాభ్యాం నమః ।
ఓం సౌం కనిష్ఠికాభ్యాం నమః ।
ఓం సః కరతలకరపృష్ఠాభ్యాం నమః ॥
అంగన్యాసః –
ఓం సాం హృదయాయ నమః ।
ఓం సీం శిరసే స్వాహా ।
ఓం సూం శిఖాయై వషట్ ।
ఓం సైం కవచాయ హుమ్ ।
ఓం సౌం నేత్రత్రయాయ వౌషట్ ।
ఓం సః అస్త్రాయ ఫట్ ।
భూర్భువస్సువరోమితి దిగ్విమోకః ॥

ఇతి శ్రీ సుబ్రహ్మణ్య కవచ స్తోత్రమ్ ।

శ్రీ కుమార కవచం

ఓం నమో భగవతే భవబంధహరణాయ, సద్భక్తశరణాయ, శరవణభవాయ, శాంభవవిభవాయ, యోగనాయకాయ, భోగదాయకాయ, మహాదేవసేనావృతాయ, మహామణిగణాలంకృతాయ, దుష్టదైత్య సంహార కారణాయ, దుష్క్రౌంచవిదారణాయ, శక్తి శూల గదా ఖడ్గ ఖేటక పాశాంకుశ ముసల ప్రాస తోమర వరదాభయ కరాలంకృతాయ, శరణాగత రక్షణ దీక్షా ధురంధర చరణారవిందాయ, సర్వలోకైక హర్త్రే, సర్వనిగమగుహ్యాయ, కుక్కుటధ్వజాయ, కుక్షిస్థాఖిల బ్రహ్మాండ మండలాయ, ఆఖండల వందితాయ, హృదేంద్ర అంతరంగాబ్ధి సోమాయ, సంపూర్ణకామాయ, నిష్కామాయ, నిరుపమాయ, నిర్ద్వంద్వాయ, నిత్యాయ, సత్యాయ, శుద్ధాయ, బుద్ధాయ, ముక్తాయ, అవ్యక్తాయ, అబాధ్యాయ, అభేద్యాయ, అసాధ్యాయ, అవిచ్ఛేద్యాయ, ఆద్యంత శూన్యాయ, అజాయ, అప్రమేయాయ, అవాఙ్మానసగోచరాయ, పరమ శాంతాయ, పరిపూర్ణాయ, పరాత్పరాయ, ప్రణవస్వరూపాయ, ప్రణతార్తిభంజనాయ, స్వాశ్రిత జనరంజనాయ, జయ జయ రుద్రకుమార, మహాబల పరాక్రమ, త్రయస్త్రింశత్కోటి దేవతానందకంద, స్కంద, నిరుపమానంద, మమ ఋణరోగ శతృపీడా పరిహారం కురు కురు, దుఃఖాతురుం మమానందయ ఆనందయ, నరకభయాన్మాముద్ధర ఉద్ధర, సంసృతిక్లేశసి హి తం మాం సంజీవయ సంజీవయ, వరదోసి త్వం, సదయోసి త్వం, శక్తోసి త్వం, మహాభుక్తిం ముక్తిం దత్వా మే శరణాగతం, మాం శతాయుషమవ, భో దీనబంధో, దయాసింధో, కార్తికేయ, ప్రభో, ప్రసీద ప్రసీద, సుప్రసన్నో భవ వరదో భవ, సుబ్రహ్మణ్య స్వామిన్, ఓం నమస్తే నమస్తే నమస్తే నమః ॥

ఇతి కుమార కవచమ్ ।

శ్రీ రామ భుజంగ ప్రయాత స్తోత్రం

విశుద్ధం పరం సచ్చిదానందరూపం
గుణాధారమాధారహీనం వరేణ్యమ్ ।
మహాంతం విభాంతం గుహాంతం గుణాంతం
సుఖాంతం స్వయం ధామ రామం ప్రపద్యే ॥ 1 ॥

శివం నిత్యమేకం విభుం తారకాఖ్యం
సుఖాకారమాకారశూన్యం సుమాన్యమ్ ।
మహేశం కలేశం సురేశం పరేశం
నరేశం నిరీశం మహీశం ప్రపద్యే ॥ 2 ॥

యదావర్ణయత్కర్ణమూలేఽంతకాలే
శివో రామ రామేతి రామేతి కాశ్యామ్ ।
తదేకం పరం తారకబ్రహ్మరూపం
భజేఽహం భజేఽహం భజేఽహం భజేఽహమ్ ॥ 3 ॥

మహారత్నపీఠే శుభే కల్పమూలే
సుఖాసీనమాదిత్యకోటిప్రకాశమ్ ।
సదా జానకీలక్ష్మణోపేతమేకం
సదా రామచంద్రం భజేఽహం భజేఽహమ్ ॥ 4 ॥

క్వణద్రత్నమంజీరపాదారవిందం
లసన్మేఖలాచారుపీతాంబరాఢ్యమ్ ।
మహారత్నహారోల్లసత్కౌస్తుభాంగం
నదచ్చంచరీమంజరీలోలమాలమ్ ॥ 5 ॥

లసచ్చంద్రికాస్మేరశోణాధరాభం
సముద్యత్పతంగేందుకోటిప్రకాశమ్ ।
నమద్బ్రహ్మరుద్రాదికోటీరరత్న
స్ఫురత్కాంతినీరాజనారాధితాంఘ్రిమ్ ॥ 6 ॥

పురః ప్రాంజలీనాంజనేయాదిభక్తాన్
స్వచిన్ముద్రయా భద్రయా బోధయంతమ్ ।
భజేఽహం భజేఽహం సదా రామచంద్రం
త్వదన్యం న మన్యే న మన్యే న మన్యే ॥ 7 ॥

యదా మత్సమీపం కృతాంతః సమేత్య
ప్రచండప్రకోపైర్భటైర్భీషయేన్మామ్ ।
తదావిష్కరోషి త్వదీయం స్వరూపం
సదాపత్ప్రణాశం సకోదండబాణమ్ ॥ 8 ॥

నిజే మానసే మందిరే సన్నిధేహి
ప్రసీద ప్రసీద ప్రభో రామచంద్ర ।
ససౌమిత్రిణా కైకయీనందనేన
స్వశక్త్యానుభక్త్యా చ సంసేవ్యమాన ॥ 9 ॥

స్వభక్తాగ్రగణ్యైః కపీశైర్మహీశై-
-రనీకైరనేకైశ్చ రామ ప్రసీద ।
నమస్తే నమోఽస్త్వీశ రామ ప్రసీద
ప్రశాధి ప్రశాధి ప్రకాశం ప్రభో మామ్ ॥ 10 ॥

త్వమేవాసి దైవం పరం మే యదేకం
సుచైతన్యమేతత్త్వదన్యం న మన్యే ।
యతోఽభూదమేయం వియద్వాయుతేజో
జలోర్వ్యాదికార్యం చరం చాచరం చ ॥ 11 ॥

నమః సచ్చిదానందరూపాయ తస్మై
నమో దేవదేవాయ రామాయ తుభ్యమ్ ।
నమో జానకీజీవితేశాయ తుభ్యం
నమః పుండరీకాయతాక్షాయ తుభ్యమ్ ॥ 12 ॥

నమో భక్తియుక్తానురక్తాయ తుభ్యం
నమః పుణ్యపుంజైకలభ్యాయ తుభ్యమ్ ।
నమో వేదవేద్యాయ చాద్యాయ పుంసే
నమః సుందరాయేందిరావల్లభాయ ॥ 13 ॥

నమో విశ్వకర్త్రే నమో విశ్వహర్త్రే
నమో విశ్వభోక్త్రే నమో విశ్వమాత్రే ।
నమో విశ్వనేత్రే నమో విశ్వజేత్రే
నమో విశ్వపిత్రే నమో విశ్వమాత్రే ॥ 14 ॥

నమస్తే నమస్తే సమస్తప్రపంచ-
-ప్రభోగప్రయోగప్రమాణప్రవీణ ।
మదీయం మనస్త్వత్పదద్వంద్వసేవాం
విధాతుం ప్రవృత్తం సుచైతన్యసిద్ధ్యై ॥ 15 ॥

శిలాపి త్వదంఘ్రిక్షమాసంగిరేణు
ప్రసాదాద్ధి చైతన్యమాధత్త రామ ।
నరస్త్వత్పదద్వంద్వసేవావిధానా-
-త్సుచైతన్యమేతీతి కిం చిత్రమత్ర ॥ 16 ॥

పవిత్రం చరిత్రం విచిత్రం త్వదీయం
నరా యే స్మరంత్యన్వహం రామచంద్ర ।
భవంతం భవాంతం భరంతం భజంతో
లభంతే కృతాంతం న పశ్యంత్యతోఽంతే ॥ 17 ॥

స పుణ్యః స గణ్యః శరణ్యో మమాయం
నరో వేద యో దేవచూడామణిం త్వామ్ ।
సదాకారమేకం చిదానందరూపం
మనోవాగగమ్యం పరం ధామ రామ ॥ 18 ॥

ప్రచండప్రతాపప్రభావాభిభూత-
-ప్రభూతారివీర ప్రభో రామచంద్ర ।
బలం తే కథం వర్ణ్యతేఽతీవ బాల్యే
యతోఽఖండి చండీశకోదండదండమ్ ॥ 19 ॥

దశగ్రీవముగ్రం సపుత్రం సమిత్రం
సరిద్దుర్గమధ్యస్థరక్షోగణేశమ్ ।
భవంతం వినా రామ వీరో నరో వా
సురో వాఽమరో వా జయేత్కస్త్రిలోక్యామ్ ॥ 20 ॥

సదా రామ రామేతి రామామృతం తే
సదారామమానందనిష్యందకందమ్ ।
పిబంతం నమంతం సుదంతం హసంతం
హనూమంతమంతర్భజే తం నితాంతమ్ ॥ 21 ॥

సదా రామ రామేతి రామామృతం తే
సదారామమానందనిష్యందకందమ్ ।
పిబన్నన్వహం నన్వహం నైవ మృత్యో-
-ర్బిభేమి ప్రసాదాదసాదాత్తవైవ ॥ 22 ॥

అసీతాసమేతైరకోదండభూషై-
-రసౌమిత్రివంద్యైరచండప్రతాపైః ।
అలంకేశకాలైరసుగ్రీవమిత్రై-
-రరామాభిధేయైరలం దైవతైర్నః ॥ 23 ॥

అవీరాసనస్థైరచిన్ముద్రికాఢ్యై-
-రభక్తాంజనేయాదితత్త్వప్రకాశైః ।
అమందారమూలైరమందారమాలై-
-రరామాభిధేయైరలం దైవతైర్నః ॥ 24 ॥

అసింధుప్రకోపైరవంద్యప్రతాపై-
-రబంధుప్రయాణైరమందస్మితాఢ్యైః ।
అదండప్రవాసైరఖండప్రబోధై-
-రరామాభిధేయైరలం దైవతైర్నః ॥ 25 ॥

హరే రామ సీతాపతే రావణారే
ఖరారే మురారేఽసురారే పరేతి ।
లపంతం నయంతం సదాకాలమేవం
సమాలోకయాలోకయాశేషబంధో ॥ 26 ॥

నమస్తే సుమిత్రాసుపుత్రాభివంద్య
నమస్తే సదా కైకయీనందనేడ్య ।
నమస్తే సదా వానరాధీశవంద్య
నమస్తే నమస్తే సదా రామచంద్ర ॥ 27 ॥

ప్రసీద ప్రసీద ప్రచండప్రతాప
ప్రసీద ప్రసీద ప్రచండారికాల ।
ప్రసీద ప్రసీద ప్రపన్నానుకంపిన్
ప్రసీద ప్రసీద ప్రభో రామచంద్ర ॥ 28 ॥

భుజంగప్రయాతం పరం వేదసారం
ముదా రామచంద్రస్య భక్త్యా చ నిత్యమ్ ।
పఠన్సంతతం చింతయన్స్వాంతరంగే
స ఏవ స్వయం రామచంద్రః స ధన్యః ॥ 29 ॥

ఇతి శ్రీమచ్ఛంకరాచార్య కృతం శ్రీ రామ భుజంగప్రయాత స్తోత్రమ్ ।

శ్రీ రామ కర్ణామృతం

మంగళశ్లోకాః
మంగళం భగవాన్విష్ణుర్మంగళం మధుసూదనః ।
మంగళం పుండరీకాక్షో మంగళం గరుడధ్వజః ॥ 1

మంగళం కోసలేంద్రాయ మహనీయగుణాబ్ధయే ।
చక్రవర్తితనూజాయ సార్వభౌమాయ మంగళమ్ ॥ 2

వేదవేదాంతవేద్యాయ మేఘశ్యామలమూర్తయే ।
పుంసాం మోహనరూపాయ పుణ్యశ్లోకాయ మంగళమ్ ॥ 3

విశ్వామిత్రాంతరంగాయ మిథిలానగరీపతేః ।
భాగ్యానాం పరిపాకాయ భవ్యరూపాయ మంగళమ్ ॥ 4

పితృభక్తాయ సతతం భ్రాతృభిః సహ సీతయా ।
నందితాఖిలలోకాయ రామచంద్రాయ మంగళమ్ ॥ 5

త్యక్తసాకేతవాసాయ చిత్రకూటవిహారిణే ।
సేవ్యాయ సర్వయమినాం ధీరోదాత్తాయ మంగళమ్ ॥ 6

సౌమిత్రిణా చ జానక్యా చాపబాణాసిధారిణా ।
సంసేవ్యాయ సదా భక్త్యా సానుజాయాస్తు మంగళమ్ ॥ 7

దండకారణ్యవాసాయ ఖండితామరశత్రవే ।
గృధ్రరాజాయ భక్తాయ ముక్తిదాయాస్తు మంగళమ్ ॥ 8

సాదరం శబరీదత్తఫలమూలాభిలాషిణే ।
సౌలభ్యపరిపూర్ణాయ సత్త్వోద్యుక్తాయ మంగళమ్ ॥ 9

హనూమత్సమవేతాయ హరీశాభీష్టదాయినే ।
వాలిప్రమథనాయాస్తు మహాధీరాయ మంగళమ్ ॥ 10

శ్రీమతే రఘువీరాయ సేతులంఘితసింధవే ।
జితరాక్షసరాజాయ రణధీరాయ మంగళమ్ ॥ 11

ఆసాద్య నగరీం దివ్యామభిషిక్తాయ సీతయా ।
రాజాధిరాజరాజాయ రామభద్రాయ మంగళమ్ ॥ 12

విభీషణకృతే ప్రీత్యా విశ్వాభీష్టప్రదాయినే ।
జానకీప్రాణనాథాయ సదా రామాయ మంగళమ్ ॥ 13

—-

శ్రీరామం త్రిజగద్గురుం సురవరం సీతామనోనాయకం
శ్యామాంగం శశికోటిపూర్ణవదనం చంచత్కలాకౌస్తుభమ్ ।
సౌమ్యం సత్యగుణోత్తమం సుసరయూతీరే వసంతం ప్రభుం
త్రాతారం సకలార్థసిద్ధిసహితం వందే రఘూణాం పతిమ్ ॥ 14

శ్రీరాఘవం దశరథాత్మజమప్రమేయం
సీతాపతిం రఘువరాన్వయరత్నదీపమ్ ।
ఆజానుబాహుమరవిందదళాయతాక్షం
రామం నిశాచరవినాశకరం నమామి ॥ 15

శ్రీరామచంద్ర కరుణాకర రాఘవేంద్ర
రాజేంద్రచంద్ర రఘువంశసముద్రచంద్ర ।
సుగ్రీవనేత్రయుగళోత్పల-పూర్ణచంద్ర
సీతామనఃకుముదచంద్ర నమో నమస్తే ॥ 16

సీతామనోమానసరాజహంస
సంసారసంతాపహర క్షమావన్ ।
శ్రీరామ దైత్యాంతక శాంతరూప
శ్రీతారకబ్రహ్మ నమో నమస్తే ॥ 17

విష్ణో రాఘవ వాసుదేవ నృహరే దేవౌఘచూడామణే ।
సంసారార్ణవకర్ణధారక హరే కృష్ణాయ తుభ్యం నమః ॥ 18

సుగ్రీవాదిసమస్తవానరవరైస్సంసేవ్యమానం సదా ।
విశ్వామిత్రపరాశరాదిమునిభిస్సంస్తూయమానం భజే ॥ 19

రామం చందనశీతలం క్షితిసుతామోహాకరం శ్రీకరం
వైదేహీనయనారవిందమిహిరం సంపూర్ణచంద్రాననమ్ ।
రాజానం కరుణాసమేతనయనం సీతామనోనందనం
సీతాదర్పణచారుగండలలితం వందే సదా రాఘవమ్ ॥ 20

జానాతి రామ తవ నామరుచిం మహేశో
జానాతి గౌతమసతీ చరణప్రభావమ్ ।
జానాతి దోర్బలపరాక్రమమీశచాపో
జానాత్యమోఘపటుబాణగతిం పయోధిః ॥ 21

మాతా రామో మత్పితా రామచంద్రో
భ్రాతా రామో మత్సఖా రాఘవేశః ।
సర్వస్వం మే రామచంద్రో దాయాళు-
ర్నాన్యం దైవం నైవ జానే న జానే ॥ 22

విమలకమలనేత్రం విస్ఫురన్నీలగాత్రం
తపనకులపవిత్రం దానవధ్వంతమిత్రమ్ ।
భువనశుభచరిత్రం భూమిపుత్రీకళత్రం
దశరథవరపుత్రం నౌమి రామాఖ్యమిత్రమ్ ॥ 23

మార్గే మార్గే శాఖినాం రత్నవేదీ
వేద్యాం వేద్యాం కిన్నరీబృందగీతమ్ ।
గీతే గీతే మంజులాలాపగోష్ఠీ
గోష్ఠ్యాం గోష్ఠ్యాం త్వత్కథా రామచంద్ర ॥ 24

వృక్షే వృక్షే వీక్షితాః పక్షిసంఘాః
సంఘే సంఘే మంజులామోదవాక్యమ్ ।
వాక్యే వాక్యే మంజులాలాపగోష్ఠీ
గోష్ఠ్యాం గోష్ఠ్యాం త్వత్కథా రామచంద్ర ॥ 25

దురితతిమిరచంద్రో దుష్టకంజాతచంద్రః
సురకువలయచంద్రస్సూర్యవంశాబ్ధిచంద్రః ।
స్వజననివహచంద్రశ్శత్రురాజీవచంద్రః
ప్రణతకుముదచంద్రః పాతు మాం రామచంద్రః ॥ 26

కళ్యాణదం కౌశికయజ్ఞపాలం
కళానిధిం కాంచనశైలధీరమ్ ।
కంజాతనేత్రం కరుణాసముద్రం
కాకుత్స్థరామం కలయామి చిత్తే ॥ 27

రాజీవాయతలోచనం రఘువరం నీలోత్పలశ్యామలం
మందారాంచితమండపే సులలితే సౌవర్ణకే పుష్పకే ।
ఆస్థానే నవరత్నరాజిఖచితే సింహాసనే సంస్థితం
సీతాలక్ష్మణలోకపాలసహితం వందే మునీంద్రాస్పదమ్ ॥ 28

ధ్యాయే రామం సుధాంశుం నతసకలభవారణ్యతాపప్రహారమ్ ।
శ్యామం శాంతం సురేంద్రం సురమునివినుతం కోటిసూర్యప్రకాశమ్ ।
సీతాసౌమిత్రిసేవ్యం సురనరసుగమం దివ్యసింహాసనస్థమ్ ।
సాయాహ్నే రామచంద్రం స్మితరుచిరముఖం సర్వదా మే ప్రసన్నమ్ ॥ 29

ఇంద్రనీలమణిసన్నిభదేహం
వందనీయమసకృన్మునిబృందైః ।
లంబమానతులసీవనమాలం
చింతయామి సతతం రఘువీరమ్ ॥ 30

సంపూర్ణచంద్రవదనం సరసీరుహాక్షం
మాణిక్యకుండలధరం ముకుటాభిరామమ్ ।
చాంపేయగౌరవసనం శరచాపహస్తం
శ్రీరామచంద్రమనిశం మనసా స్మరామి ॥ 31

మాతుః పార్శ్వే చరంతం మణిమయశయనే మంజుభూషాంచితాంగమ్ ।
మందం మందం పిబంతం ముకుళితనయనం స్తన్యమన్యస్తనాగ్రమ్ ।
అంగుళ్యాగ్రైః స్పృశంతం సుఖపరవశయా సస్మితాలింగితాంగమ్ ।
గాఢం గాఢం జనన్యా కలయతు హృదయం మామకం రామబాలమ్ ॥ 32

రామాభిరామం నయనాభిరామం
వాచాభిరామం వదనాభిరామమ్ ।
సర్వాభిరామం చ సదాభిరామం
వందే సదా దాశరథిం చ రామమ్ ॥ 33

రాశబ్దోచ్చారమాత్రేణ ముఖాన్నిర్యాతి పాతకాః ।
పునః ప్రవేశభీత్యా చ మకారస్తు కవాటవత్ ॥ 34

అనర్ఘమాణిక్యవిరాజమాన-
శ్రీపాదుకాలంకృతశోభనాభ్యామ్ ।
అశేషబృందారకవందితాభ్యాం
నమో నమో రామపదాంబుజాభ్యామ్ ॥ 35

చలత్కనకకుండలోల్లసితదివ్యగండస్థలం
చరాచరజగన్మయం చరణపద్మగంగాశ్రయమ్ ।
చతుర్విధఫలప్రదం చరమపీఠమధ్యస్థితం
చిదంశమఖిలాస్పదం దశరథాత్మజం చింతయే ॥ 36

సనందనమునిప్రియం సకలవర్ణవేదాత్మకం
సమస్తనిగమాగమస్ఫురితతత్త్వసింహాసనమ్ ।
సహస్రనయనాబ్జజాద్యమరబృందసంసేవితం
సమష్టిపురవల్లభం దశరథాత్మజం చింతయే ॥ 37

జాగ్రత్స్వప్నసుషుప్తి-కాలవిలసత్తత్త్వాత్మచిన్మాత్రకం
చైతన్యాత్మకమాధిపాపరహితం భూమ్యాదితన్మాత్రకమ్ ।
శాంభవ్యాదిసమస్తయోగకులకం సాంఖ్యాదితత్త్వాత్పరం
శబ్దావాచ్యమహం నమామి సతతం వ్యుత్పత్తినాశాత్పరమ్ ॥ 38

ఇక్ష్వాకువంశార్ణవజాతరత్నం
సీతాంగనాయౌవనభాగ్యరత్నమ్ ।
వైకుంఠరత్నం మమ భాగ్యరత్నం
శ్రీరామరత్నం శిరసా నమామి ॥ 39

ఇక్ష్వాకునందనం సుగ్రీవపూజితం
త్రైలోక్యరక్షకం సత్యసంధం సదా ।
రాఘవం రఘుపతిం రాజీవలోచనం
రామచంద్రం భజే రాఘవేశం భజే ॥ 40

భక్తప్రియం భక్తసమాధిగమ్యం
చింతాహరం చింతితకామధేనుమ్ ।
సూర్యేందుకోటిద్యుతిభాస్వరం తం
రామం భజే రాఘవరామచంద్రమ్ ॥ 41

శ్రీరామం జనకక్షితీశ్వరసుతావక్త్రాంబుజాహారిణం
శ్రీమద్భానుకులాబ్ధికౌస్తుభమణిం శ్రీరత్నవక్షస్స్థలమ్ ।
శ్రీకంఠాద్యమరౌఘరత్నమకుటాలంకారపాదాంబుజం
శ్రీవత్సోజ్జ్వలమింద్రనీలసదృశం శ్రీరామచంద్రం భజే ॥ 42

రామచంద్ర చరితాకథామృతం
లక్ష్మణాగ్రజగుణానుకీర్తనమ్ ।
రాఘవేశ తవ పాదసేవనం
సంభవంతు మమ జన్మజన్మని ॥ 43

అజ్ఞానసంభవ-భవాంబుధిబాడబాగ్ని-
రవ్యక్తతత్త్వనికరప్రణవాధిరూఢః ।
సీతాసమేతమనుజేన హృదంతరాళే
ప్రాణప్రయాణసమయే మమ సన్నిధత్తే ॥ 44

రామో మత్కులదైవతం సకరుణం రామం భజే సాదరం
రామేణాఖిలఘోరపాపనిహతీ రామాయ తస్మై నమః ।
రామాన్నాస్తి జగత్రయైకసులభో రామస్య దాసోఽస్మ్యహం
రామే ప్రీతిరతీవ మే కులగురో శ్రీరామ రక్షస్వ మామ్ ॥ 45

వైదేహీసహితం సురద్రుమతలే హైమే మహామంటపే ।
మధ్యేపుష్పకమాసనే మణిమయే వీరాసనే సంస్థితమ్ ।
అగ్రే వాచయతి ప్రభంజనసుతే తత్త్వం మునిభ్యః పరమ్ ।
వ్యాఖ్యాంతం భరతాదిభిః పరివృతం రామం భజే శ్యామలమ్ ॥ 46

వామే భూమిసుతా పురస్తు హనుమాన్పశ్చాత్సుమిత్రాసుత-
శ్శత్రుఘ్నో భరతశ్చ పార్శ్వదళయోర్వాయ్వాదికోణేష్వపి ।
సుగ్రీవశ్చ విభీషణశ్చ యువరాట్ తారాసుతో జాంబవాన్
మధ్యే నీలసరోజకోమలరుచిం రామం భజే శ్యామలమ్ ॥ 47

కేయూరాంగదకంకణైర్మణిగణైర్వైరోచమానం సదా
రాకాపర్వణిచంద్రకోటిసదృశం ఛత్రేణ వైరాజితమ్ ।
హేమస్తంభసహస్రషోడశయుతే మధ్యే మహామండపే
దేవేశం భరతాదిభిః పరివృతం రామం భజే శ్యామలమ్ ॥ 48

సాకేతే శరదిందుకుందధవళే సౌఘే మహామంటపే ।
పర్యస్తాగరుధూపధూమపటలే కర్పూరదీపోజ్జ్వలే ।
సుగ్రీవాంగదవాయుపుత్రసహితం సౌమిత్రిణా సేవితం
లీలామానుషవిగ్రహం రఘుపతిం రామం భజే శ్యామలమ్ ॥ 49

శాంతం శారదచంద్రకోటిసదృశం చంద్రాభిరామాననం
చంద్రార్కాగ్నివికాసికుండలధరం చంద్రావతంసస్తుతమ్ ।
వీణాపుస్తకసాక్షసూత్రవిలసద్వ్యాఖ్యానముద్రాకరం
దేవేశం భరతాదిభిః పరివృతం రామం భజే శ్యామలమ్ ॥ 50

రామం రాక్షసమర్దనం రఘుపతిం శక్రారివిధ్వంసినం
సుగ్రీవేప్సితరాజ్యదం సురపతేః పుత్రాంతకం శార్‍ంగిణమ్ ।
భక్తానామభయప్రదం భయహరం పాపౌఘవిధ్వంసినం
సీతాసేవితపాదపద్మయుగళం రామం భజే శ్యామలమ్ ॥ 51

కందర్పాయుతకోటికోటితులితం కాలాంబుదశ్యామలం
కంబుగ్రీవముదారకౌస్తుభధరం కర్ణావతంసోత్పలమ్ ।
కస్తూరీతిలకోజ్జ్వలం స్మితముఖం చిన్ముద్రయాలంకృతం
సీతాలక్ష్మణవాయుపుత్రసహితం సింహాసనస్థం భజే ॥ 52

సాకేతే నవరత్నపంక్తిఖచితే చిత్రధ్వజాలంకృతే
వాసే స్వర్ణమయే దళాష్టలలితే పద్మే విమానోత్తమే ।
ఆసీనం భరతాదిసోదరజనైః శాఖామృగైః కిన్నరైః
దిక్పాలైర్మునిపుంగవైర్నృపగణైస్సంసేవ్యమానం భజే ॥ 53

కస్తూరీఘనసారకుంకుమలసచ్ఛ్రీచందనాలంకృతం
కందర్పాధికసుందరం ఘననిభం కాకుత్స్థవంశధ్వజమ్ ।
కళ్యాణాంభరవేష్టితం కమలయా యుక్తం కలావల్లభం
కళ్యాణాచలకార్ముకప్రియసఖం కళ్యాణరామం భజే ॥ 54

ముక్తేర్మూలం మునివరహృదానందకందం ముకుందం
కూటస్థాఖ్యం సకలవరదం సర్వచైతన్యరూపమ్ ।
నాదాతీతం కమలనిలయం నాదనాదాంతతత్త్వం
నాదాతీతం ప్రకృతిరహితం రామచంద్రం భజేఽహమ్ ॥ 55

తారాకారం నిఖిలనిలయం తత్త్వమస్యాదిలక్ష్యం
శబ్దావాచ్యం త్రిగుణరహితం వ్యోమమంగుష్ఠమాత్రమ్ ।
నిర్వాణాఖ్యం సగుణమగుణవ్యోమరంధ్రాంతరస్థం
సౌషుమ్నాంతః ప్రణవసహితం రామచంద్రం భజేఽహమ్ ॥ 56

నిజానందాకారం నిగమతురగారాధితపదం
పరబ్రహ్మానందం పరమపదగం పాపహరణమ్ ।
కృపాపారావారం పరమపురుషం పద్మనిలయం
భజే రామం శ్యామం ప్రకృతిరహితం నిర్గుణమహమ్ ॥ 57

సాకేతే నగరే సమస్తమహిమాధారే జగన్మోహనే
రత్నస్తంభసహస్రమంటపమహాసింహాసనే సాంబుజే ।
విశ్వామిత్రవసిష్ఠగౌతమశుకవ్యాసాదిభిర్మౌనిభిః
ధ్యేయం లక్ష్మణలోకపాలసహితం సీతాసమేతం భజే ॥ 58

రామం శ్యామాభిరామం రవిశశినయనం కోటిసూర్యప్రకాశం
దివ్యం దివ్యాస్త్రపాణిం శరముఖశరధిం చారుకోడండహస్తమ్ ।
కాలం కాలాగ్నిరుద్రం రిపుకులదహనం విఘ్నవిచ్ఛేదదక్షం
భీమం భీమాట్టహాసం సకలభయహరం రామచంద్రం భజేఽహమ్ ॥ 59

శ్రీరామం భువనైకసుందరతనుం ధారాధరశ్యామలం
రాజీవాయతలోచనం రఘువరం రాకేందుబింబాననమ్ ।
కోదండాదినిజాయుధాశ్రితభుజైర్భ్రాంతం విదేహాత్మజా-
ధీశం భక్తజనావనం రఘువరం శ్రీరామచంద్రం భజే ॥ 60

శ్రీవత్సాంకముదారకౌస్తుభలసత్పీతాంబరాలంకృతం
నానారత్నవిరాజమానమకుటం నీలాంబుదశ్యామలమ్ ।
కస్తూరీఘనసారచర్చితతనుం మందారమాలాధరం
కందర్పాయుతసుందరం రఘుపతిం సీతాసమేతం భజే ॥ 61

సదానందదేవే సహస్రారపద్మే
గలచ్చంద్రపీయూషధారామృతాంతే ।
స్థితం రామమూర్తిం నిషేవే నిషేవే-
ఽన్యదైవం న సేవే న సేవే న సేవే ॥ 62

సుధాభాసితద్వీపమధ్యే విమానే
సుపర్వాళివృక్షోజ్జ్వలే శేషతల్పే ।
నిషణ్ణం రమాంకం నిషేవే నిషేవే-
ఽన్యదైవం న సేవే న సేవే న సేవే ॥ 63

చిదంశం సమానందమానందకందం
సుషుమ్నాఖ్యరంధ్రాంతరాళే చ హంసమ్ ।
సచక్రం సశంఖం సపీతాంబరాంకం
పరంచాన్యదైవం న జానే న జానే ॥ 64

చతుర్వేదకూటోల్లసత్కారణాఖ్యం
స్ఫురద్దివ్యవైమానికే భోగితల్పే ।
పరంధామమూర్తిం నిషణ్ణం నిషేవే
నిషేవేఽన్యదైవం న సేవే న సేవే ॥ 65

సింహాసనస్థం సురసేవితవ్యం
రత్నాంకితాలంకృతపాదపద్మమ్ ।
సీతాసమేతం శశిసూర్యనేత్రం
రామం భజే రాఘవ రామచంద్రమ్ ॥ 66

రామం పురాణపురుషం రమణీయవేషం
రాజాధిరాజమకుటార్చితపాదపీఠమ్ ।
సీతాపతిం సునయనం జగదేకవీరం
శ్రీరామచంద్రమనిశం కలయామి చిత్తే ॥ 67

పరానందవస్తుస్వరూపాదిసాక్షిం
పరబ్రహ్మగమ్యం పరంజ్యోతిమూర్తిమ్ ।
పరాశక్తిమిత్రాఽప్రియారాధితాంఘ్రిం
పరంధామరూపం భజే రామచంద్రమ్ ॥ 68

మందస్మితం కుండలగండభాగం
పీతాంబరం భూషణభూషితాంగమ్ ।
నీలోత్పలాంగం భువనైకమిత్రం
రామం భజే రాఘవ రామచంద్రమ్ ॥ 69

అచింత్యమవ్యక్తమనంతరూప-
మద్వైతమానందమనాదిగమ్యమ్ ।
పుణ్యస్వరూపం పురుషోత్తమాఖ్యం
రామం భజే రాఘవ రామచంద్రమ్ ॥ 70

పద్మాసనస్థం సురసేవితవ్యం
పద్మాలయానందకటాక్షవీక్ష్యమ్ ।
గంధర్వవిద్యాధరగీయమానం
రామం భజే రాఘవ రామచంద్రమ్ ॥ 71

అనంతకీర్తిం వరదం ప్రసన్నం
పద్మాసనం సేవకపారిజాతమ్ ।
రాజాధిరాజం రఘువీరకేతుం
రామం భజే రాఘవ రామచంద్రమ్ ॥ 72

సుగ్రీవమిత్రం సుజనానురూపం
లంకాహరం రాక్షసవంశనాశమ్ ।
వేదాశ్రయాంగం విపులాయతాక్షం
రామం భజే రాఘవ రామచంద్రమ్ ॥ 73

సకృత్ప్రణతరక్షాయాం సాక్షీ యస్య విభీషణః ।
సాపరాధప్రతీకారః స శ్రీరామో గతిర్మమ ॥ 74

ఫలమూలాశినౌ దాంతౌ తాపసౌ ధర్మచారిణౌ ।
రక్షఃకులవిహంతారౌ భ్రాతరౌ రామలక్ష్మణౌ ॥ 75

తరుణౌ రూపసంపన్నౌ సుకుమారౌ మహాబలౌ ।
పుండరీక విశాలాక్షౌ చీరకృష్ణాజినాంబరౌ ॥ 76

కౌసల్యానయనేందుం దశరథముఖారవిందమార్తాండమ్ ।
సీతామానసహంసం రామం రాజీవలోచనం వందే ॥ 77

భర్జనం భవబీజానాం మార్జనం సుఖసంపదామ్ ।
తర్జనం యమదూతానాం రామరామేతి కీర్తనమ్ ॥ 78

న జానే జానకీ జానే రామ త్వన్నామవైభవమ్ ।
సర్వేశో భగవాన్ శంభుర్వాల్మీకిర్వేత్తి వా నవా ॥ 79

కరతలధృతచాపం కాలమేఘస్వరూపం
సరసిజదళనేత్రం చారుహాసం సుగాత్రమ్ ।
విచినుతవనవాసం విక్రమోదగ్రవేషం
ప్రణమత రఘునాథం జానకీప్రాణనాథమ్ ॥ 80

విద్యుత్స్ఫురన్మకరకుండలదీప్తచారు-
గండస్థలం మణికిరీటవిరాజమానమ్ ।
పీతాంబరం జలదనీలముదారకాంతిం
శ్రీరామచంద్రమనిశం కలయామి చిత్తే ॥ 81

రత్నోల్లసజ్జ్వలితకుండలగండభాగం
కస్తూరికాతిలకశోభితఫాలభాగమ్ ।
కర్ణాంతదీర్ఘనయనం కరుణాకటాక్షం
శ్రీరామచంద్ర ముఖమాత్మని సన్నిధత్తమ్ ॥ 82

వైదేహీసహితం చ లక్ష్మణయుతం కైకేయిపుత్రాన్వితం
సుగ్రీవం చ విభీషణానిలసుతౌ నీలం నలం సాంగదమ్ ।
విశ్వామిత్రవసిష్ఠగౌతమభరద్వాజాదికాన్ మానయన్
రామో మారుతిసేవితః స్మరతు మాం సామ్రాజ్యసింహాసనే ॥ 83

సకలగుణనిధానం యోగిభిస్స్తూయమానం
భజితసురవిమానం రక్షితేంద్రాదిమానమ్ ।
మహితవృషభయానం సీతయా శోభమానం
స్మరతు హృదయభానుం బ్రహ్మరామాభిరామమ్ ॥ 84

త్రిదశకుముదచంద్రో దానవాంభోజచంద్రో
దురితతిమిరచంద్రో యోగినాం జ్ఞానచంద్రః ।
ప్రణతనయనచంద్రో మైథిలీనేత్రచంద్రో
దశముఖరిపుచంద్రః పాతు మాం రామచంద్రః ॥ 85

యన్నామైవ సహస్రనామసదృశం యన్నామ వేదైస్సమం
యన్నామాంకితవాక్య-మాసురబలస్త్రీగర్భవిచ్ఛేదనమ్ ।
యన్నామ శ్వపచార్యభేదరహితం ముక్తిప్రదానోజ్జ్వలం
తన్నామాఽలఘురామరామరమణం శ్రీరామనామామృతమ్ ॥ 86

రాజీవనేత్ర రఘుపుంగవ రామభద్ర
రాకేందుబింబసదృశానన నీలగాత్ర ।
రామాఽభిరామ రఘువంశసముద్భవ త్వం
శ్రీరామచంద్ర మమ దేహి కరావలంబమ్ ॥ 87

మాణిక్యమంజీరపదారవిందం
రామార్కసంఫుల్లముఖారవిందమ్ ।
భక్తాభయప్రాపికరారవిందాం
దేవీం భజే రాఘవవల్లభాం తామ్ ॥ 88

జయతు విజయకారీ జానకీమోదకారీ
తపనకులవిహారీ దండకారణ్యచారీ ।
దశవదనకుఠారీ దైత్యవిచ్ఛేదకారీ
మణిమకుటకధారీ చండకోదండధారీ ॥ 89

రామః పితా రఘవ ఏవ మాతా
రామస్సుబంధుశ్చ సఖా హితశ్చ ।
రామో గురుర్మే పరమం చ దైవం
రామం వినా నాఽన్యమహం స్మరామి ॥ 90

శ్రీరామ మే త్వం హి పితా చ మాతా
శ్రీరామ మే త్వం హి సుహృచ్చ బంధుః ।
శ్రీరామ మే త్వం హి గురుశ్చ గోష్ఠీ
శ్రీరామ మే త్వం హి సమస్తమేవ ॥ 91

రామచంద్రచరితామృతపానం
సోమపానశతకోటిసమానమ్ ।
సోమపానశతకోటిభిరీయా-
జ్జన్మ నైతి రఘునాయకనామ్నా ॥ 92

రామ రామ దయాసింధో రావణారే జగత్పతే ।
త్వత్పాదకమలాసక్తి-ర్భవేజ్జన్మని జన్మని ॥ 93

శ్రీరామచంద్రేతి దయాపరేతి
భక్తప్రియేతి భవబంధనమోచనేతి ।
నాథేతి నాగశయనేతి సదా స్తువంతం
మాం పాహి భీతమనిశం కృపణం కృపాళో ॥ 94

అయోధ్యానాథ రాజేంద్ర సీతాకాంత జగత్పతే ।
శ్రీరామ పుండరీకాక్ష రామచంద్ర నమోఽస్తు తే ॥ 95

హే రామ హే రమణ హే జగదేకవీర
హే నాథ హే రఘుపతే కరుణాలవాల ।
హే జానకీరమణ హే జగదేకబంధో
మాం పాహి దీనమనిశం కృపణం కృతఘ్నమ్ ॥ 96

జానాతి రామ తవ తత్త్వగతిం హనూమాన్ ।
జానాతి రామ తవ సఖ్యగతిం కపీశః ।
జానాతి రామ తవ యుద్ధగతిం దశాస్యో ।
జానాతి రామ ధనదానుజ ఏవ సత్యమ్ ॥ 97

సేవ్యం శ్రీరామమంత్రం శ్రవణశుభకరం శ్రేష్ఠసుజ్ఞానిమంత్రం
స్తవ్యం శ్రీరామమంత్రం నరకదురితదుర్వారనిర్ఘాతమంత్రమ్ ।
భవ్యం శ్రీరామమంత్రం భజతు భజతు సంసారనిస్తారమంత్రం
దివ్యం శ్రీరామమంత్రం దివి భువి విలసన్మోక్షరక్షైకమంత్రమ్ ॥ 98

నిఖిలనిలయమంత్రం నిత్యతత్త్వాఖ్యమంత్రం
భవకులహరమంత్రం భూమిజాప్రాణమంత్రమ్ ।
పవనజనుతమంత్రం పార్వతీమోక్షమంత్రం
పశుపతినిజమంత్రం పాతు మాం రామమంత్రమ్ ॥ 99

ప్రణవనిలయమంత్రం ప్రాణనిర్వాణమంత్రం
ప్రకృతిపురుషమంత్రం బ్రహ్మరుద్రేంద్రమంత్రమ్ ।
ప్రకటదురితరాగద్వేషనిర్ణాశమంత్రం
రఘుపతినిజమంత్రం రామరామేతిమంత్రమ్ ॥ 100

దశరథసుతమంత్రం దైత్యసంహారమంత్రం
విబుధవినుతమంత్రం విశ్వవిఖ్యాతమంత్రమ్ ।
మునిగణనుతమంత్రం ముక్తిమార్గైకమంత్రం
రఘుపతినిజమంత్రం రామరామేతిమంత్రమ్ ॥ 101

సంసారసాగరభయాపహవిశ్వమంత్రం
సాక్షాన్ముముక్షుజనసేవితసిద్ధమంత్రమ్ ।
సారంగహస్తముఖహస్తనివాసమంత్రం
కైవల్యమంత్రమనిశం భజ రామమంత్రమ్ ॥ 102

జయతు జయతు మంత్రం జన్మసాఫల్యమంత్రం
జననమరణభేదక్లేశవిచ్ఛేదమంత్రమ్ ।
సకలనిగమమంత్రం సర్వశాస్త్రైకమంత్రం
రఘుపతినిజమంత్రం రామరామేతిమంత్రమ్ ॥ 103

జగతి విశదమంత్రం జానకీప్రాణమంత్రం
విబుధవినుతమంత్రం విశ్వవిఖ్యాతమంత్రమ్ ।
దశరథసుతమంత్రం దైత్యసంహారమంత్రం
రఘుపతినిజమంత్రం రామరామేతిమంత్రమ్ ॥ 104

బ్రహ్మాదియోగిమునిపూజితసిద్ధమంత్రం
దారిద్ర్యదుఃఖభవరోగవినాశమంత్రమ్ ।
సంసారసాగరసముత్తరణైకమంత్రం
వందే మహాభయహరం రఘురామమంత్రమ్ ॥ 105

శత్రుచ్ఛేదైకమంత్రం సరసముపనిషద్వాక్యసంపూజ్యమంత్రం
సంసారోత్తారమంత్రం సముచితసమయే సంగనిర్యాణమంత్రమ్ ।
సర్వైశ్వర్యైకమంత్రం వ్యసనభుజగసందష్టసంత్రాణమంత్రం
జిహ్వే శ్రీరామమంత్రం జప జప సఫలం జన్మసాఫల్యమంత్రమ్ ॥ 106

నిత్యం శ్రీరామమంత్రం నిరుపమమధికం నీతిసుజ్ఞానమంత్రం
సత్యం శ్రీరామమంత్రం సదమలహృదయే సర్వదారోగ్యమంత్రమ్ ।
స్తుత్యం శ్రీరామమంత్రం సులలితసుమనస్సౌఖ్యసౌభాగ్యమంత్రం
పఠ్యం శ్రీరామమంత్రం పవనజవరదం పాతు మాం రామమంత్రమ్ ॥ 107

వ్యామోహప్రశమౌషధం మునిమనోవృత్తిప్రవృత్త్యౌషధం
దైత్యోన్మూలకరౌషధం భవభయప్రధ్వంసనైకౌషధమ్ ।
భక్తానందకరౌషధం త్రిభువనే సంజీవనైకౌషధం
శ్రేయః ప్రాప్తికరౌషధం పిబ మనః శ్రీరామనామౌషధమ్ ॥ 108

సకలభువనరత్నం సర్వశాస్త్రార్థరత్నం
సమరవిజయరత్నం సచ్చిదానందరత్నమ్ ।
దశముఖహరరత్నం దానవారాతిరత్నం
రఘుకులనృపరత్నం పాతు మాం రామరత్నమ్ ॥ 109

సకలభువనరత్నం సచ్చిదానందరత్నం
సకలహృదయరత్నం సూర్యబింబాంతరత్నమ్ ।
విమలసుకృతరత్నం వేదవేదాంతరత్నం
పురహరజపరత్నం పాతు మాం రామరత్నమ్ ॥ 110

నిగమశిఖరరత్నం నిర్మలానందరత్నం
నిరుపమగుణరత్నం నాదనాదాంతరత్నమ్ ।
దశరథకులరత్నం ద్వాదశాంతస్స్థరత్నం
పశుపతిజపరత్నం పాతు మాం రామరత్నమ్ ॥ 111

శతమఖసుతరత్నం షోడశాంతస్స్థరత్నం
మునిజనజపరత్నం ముఖ్యవైకుంఠరత్నమ్ ।
నిరుపమగుణరత్నం నీరజాంతస్స్థరత్నం
పరమపదవిరత్నం పాతు మాం రామరత్నమ్ ॥ 112

సకలసుకృతరత్నం సత్యవాక్యార్థరత్నం
శమదమగుణరత్నం శాశ్వతానందరత్నమ్ ।
ప్రణయనిలయరత్నం ప్రస్ఫుటద్యోతిరత్నం
పరమపదవిరత్నం పాతు మాం రామరత్నమ్ ॥ 113

నిగమశిఖరరత్నం నిత్యమాశాస్యరత్నం
జననుతనృపరత్నం జానకీరూపరత్నమ్ ।
భువనవలయరత్నం భూభుజామేకరత్నం
రఘుకులవరరత్నం పాతు మాం రామరత్నమ్ ॥ 114

విశాలనేత్రం పరిపూర్ణగాత్రం
సీతాకలత్రం సురవైరిజైత్రమ్ ।
కారుణ్యపాత్రం జగతః పవిత్రం
శ్రీరామరత్నం ప్రణతోఽస్మి నిత్యమ్ ॥ 115

హే గోపాలక హే దయాజలనిధే హే సద్గుణాంభోనిధే
హే దైత్యాంతక హే విభీషణదయాపరీణ హే భూపతే ।
హే వైదేహసుతామనోజవిహృతే హే కోటిమారాకృతే
హే నవ్యాంబుజనేత్ర పాలయ పరం జానామి న త్వాం వినా ॥ 116

యస్య కించిదపి నో హరణీయం
కర్మ కించిదపి నో చరణీయమ్ ।
రామనామ చ సదా స్మరణీయం
లీలయా భవజలం తరణీయమ్ ॥ 117

దశరథసుతమీశం దండకారణ్యవాసం
శతమఖమణినీలం జానకీప్రాణలోలమ్ ।
సకలభువనమోహం సన్నుతాంభోదదేహం
బహుళనుతసముద్రం భావయే రామభద్రమ్ ॥ 118

విశాలనేత్రం పరిపూర్ణగాత్రం
సీతాకళత్రం సురవైరిజైత్రమ్ ।
జగత్పవిత్రం పరమాత్మతంత్రం
శ్రీరామచంద్రం ప్రణమామి చిత్తే ॥ 119

జయ జయ రఘురామ శ్రీముఖాంభోజభానో
జయ జయ రఘువీర శ్రీమదంభోజనేత్ర ।
జయ జయ రఘునాథ శ్రీకరాభ్యర్చితాంఘ్రి
జయ జయ రఘువర్య శ్రీశ కారుణ్యసింధో ॥ 120

మందారమూలే మణిపీఠసంస్థం
సుధాప్లుతం దివ్యవిరాట్స్వరూపమ్ ।
సబిందునాదాంతకలాంతతుర్య-
మూర్తిం భజేఽహం రఘువంశరత్నమ్ ॥ 121

నాదం నాదవినీలచిత్తపవనం నాదాంతత్త్వప్రియం
నామాకారవివర్జితం నవఘనశ్యామాంగనాదప్రియమ్ ।
నాదాంభోజమరందమత్తవిలసద్భృంగం మదాంతస్స్థితం
నాదాంతధృవమండలాబ్జరుచిరం రామం భజే తారకమ్ ॥ 122

నానాభూతహృదబ్జపద్మనిలయం నామోజ్జ్వలాభూషణమ్ ।
నామస్తోత్రపవిత్రితత్రిభువనం నారాయణాష్టాక్షరమ్ ।
నాదాంతేందుగళత్సుధాప్లుతతనుం నానాత్మచిన్మాత్రకమ్ ।
నానాకోటియుగాంతభానుసదృశం రామం భజే తారకమ్ ॥ 123

వేద్యం వేదగురుం విరించిజనకం వేదాంతమూర్తిం స్ఫుర-
ద్వేదం వేదకలాపమూలమహిమాధారాంతకందాంకురమ్ ।
వేదశృంగసమానశేషశయనం వేదాంతవేద్యాత్మకం
వేదారాధితపాదపంకజమహం రామం భజే తారకమ్ ॥ 124

మజ్జీవం మదనుగ్రహం మదధిపం మద్భావనం మత్సుఖం
మత్తాతం మమ సద్గురుం మమ వరం మోహాంధవిచ్ఛేదనమ్ ।
మత్పుణ్యం మదనేకబాంధవజనం మజ్జీవనం మన్నిధిం
మత్సిద్ధిం మమ సర్వకర్మసుకృతం రామం భజే తారకమ్ ॥ 125

నిత్యం నీరజలోచనం నిరుపమం నీవారశూకోపమం
నిర్భేదానుభవం నిరంతరగుణం నీలాంగరాగోజ్జ్వలమ్ ।
నిష్పాపం నిగమాగమార్చితపదం నిత్యాత్మకం నిర్మలం
నిష్పుణ్యం నిఖిలం నిరంజనపదం రామం భజే తారకమ్ ॥ 126

ధ్యాయే త్వాం హృదయాంబుజే రఘుపతిం విజ్ఞానదీపాంకురం
హంసోహంసపరంపరాదిమహిమాధారం జగన్మోహనమ్ ।
హస్తాంభోజగదాబ్జచక్రమతులం పీతాంబరం కౌస్తుభం
శ్రీవత్సం పురుషోత్తమం మణినిభం రామం భజే తారకమ్ ॥ 127

సత్యజ్ఞానమనంతమచ్యుతమజం చావ్యాకృతం తత్పరం
కూటస్థాదిసమస్తసాక్షిమనఘం సాక్షాద్విరాట్తత్త్వదమ్ ।
వేద్యం విశ్వమయం స్వలీనభువనస్వారాజ్యసౌఖ్యప్రదం
పూర్ణం పూర్ణతరం పురాణపురుషం రామం భజే తారకమ్ ॥ 128

రామం రాక్షసవంశనాశనకరం రాకేందుబింబాననం
రక్షోరిం రఘువంశవర్ధనకరం రక్తాధరం రాఘవమ్ ।
రాధాయాత్మనివాసినం రవినిభం రమ్యం రమానాయకం
రంధ్రాంతర్గతశేషశాయినమహం రామం భజే తారకమ్ ॥ 129

ఓతప్రోతసమస్తవస్తునిచయం ఓంకారబీజాక్షరం
ఓంకారప్రకృతిం షడక్షరహితం ఓంకారకందాంకురమ్ ।
ఓంకారస్ఫుటభూర్భువస్సుపరితం ఓఘత్రయారాధితం
ఓంకారోజ్జ్వలసింహపీఠనిలయం రామం భజే తారకమ్ ॥ 130

సాకేతే నగరే సమస్తసుఖదే హర్మ్యేఽబ్జకోటిద్యుతే
నక్షత్రగ్రహపంక్తిలగ్నశిఖరే చాంతర్యపంకేరుహే ।
వాల్మీకాత్రిపరాశరాదిమునిభిస్సంసేవ్యమానం స్థితం
సీతాలంకృతవామభాగమనిశం రామం భజే తారకమ్ ॥ 131

వైకుంఠే నగరే సురద్రుమతలే చానందవప్రాంతరే
నానారత్నవినిర్మితస్ఫుటపటుప్రాకారసంవేష్టితే ।
సౌధేందూపలశేషతల్పలలితే నీలోత్పలచ్ఛాదితే
పర్యంకే శయనం రమాదిసహితం రామం భజే తారకమ్ ॥ 132

వందే రామమనాదిపూరుషమజం వందే రమానాయకం
వందే హారికిరీటకుండలధరం వందే సునీలద్యుతిమ్ ।
వందే చాపకలంబకోజ్జ్వలకరం వందే జగన్మంగళం
వందే పంక్తిరథాత్మజం మమ గురుం వందే సదా రాఘవమ్ ॥ 133

వందే శౌనకగౌతమాద్యభినుతం వందే ఘనశ్యామలం
వందే తారకపీఠమధ్యనిలయం వందే జగన్నాయకమ్ ।
వందే భక్తజనౌఘదేవివటపం వందే ధనుర్వల్లభం
వందే తత్త్వమసీతివాక్యజనకం వందే సదా రాఘవమ్ ॥ 134

వందే సూర్యశశాంకలోచనయుగం వందే జగత్పావనం
వందే పత్రసహస్రపద్మనిలయం వందే పురారిప్రియమ్ ।
వందే రాక్షసవంశనాశనకరం వందే సుధాశీతలం
వందే దేవకపీంద్రకోటివినుతం వందే సదా రాఘవమ్ ॥ 135

వందే సాగరగర్వభంగవిశిఖం వందే జగజ్జీవనం
వందే కౌశికయాగరక్షణకరం వందే గురుణాం గురుమ్ ।
వందే బాణశరాసనోజ్జ్వలకరం వందే జటావల్కలం
వందే లక్ష్మణభూమిజాన్వితమహం వందే సదా రాఘవమ్ ॥ 136

వందే పాండరపుండరీకనయనం వందేఽబ్జబింబాననం
వందే కంబుగళం కరాబ్జయుగళం వందే లలాటోజ్జ్వలమ్ ।
వందే పీతదుకూలమంబుదనిభం వందే జగన్మోహనం
వందే కారణమానుషోజ్జ్వలతనుం వందే సదా రాఘవమ్ ॥ 137

వందే నీలసరోజకోమలరుచిం వందే జగద్వందితం
వందే సూర్యకులాబ్ధికౌస్తుభమణిం వందే సురారాధితమ్ ।
వందే పాతకపంచకప్రహరణం వందే జగత్కారణం
వందే వింశతిపంచతత్త్వరహితం వందే సదా రాఘవమ్ ॥ 138

వందే సాధకవర్గకల్పకతరుం వందే త్రిమూర్త్యాత్మకం
వందే నాదలయాంతరస్థలగతం వందే త్రివర్గాత్మకమ్ ।
వందే రాగవిహీనచిత్తసులభం వందే సభానాయకం
వందే పూర్ణదయామృతార్ణవమహం వందే సదా రాఘవమ్ ॥ 139

వందే సాత్త్వికతత్త్వముద్రితతనుం వందే సుధాదాయకం
వందే చారుచతుర్భుజం మణినిభం వందే షడబ్జస్థితమ్ ।
వందే బ్రహ్మపిపీలికాదినిలయం వందే విరాట్విగ్రహం
వందే పన్నగతల్పశాయినమహం వందే సదా రాఘవమ్ ॥ 140

సింహాసనస్థం మునిసిద్ధసేవ్యం
రక్తోత్పలాలంకృతపాదపద్మమ్ ।
సీతాసమేతం శశిసూర్యనేత్రం
రామం భజే రాఘవరామచంద్రమ్ ॥ 141

శ్రీరామభద్రాశ్రితసద్గురూణాం
పాదారవిందం భజతాం నరాణామ్ ।
ఆరోగ్యమైశ్వర్యమనంతకీర్తి-
రంతే చ విష్ణోః పదమస్తి సత్యమ్ ॥ 142

దశరథవరపుత్రం జానకీసత్కళత్రం
దశముఖహరదక్షం పద్మపత్రాయతాక్షమ్ ।
కరధృతశరచాపం చారుముక్తాకలాపం
రఘుకులనృవరేణ్యం రామమీడే శరణ్యమ్ ॥ 143

దశముఖగజసింహం దైత్యగర్వాతిరంహం
కదనభయదహస్తం తారకబ్రహ్మ శస్తమ్ ।
మణిఖచితకిరీటం మంజులాలాపవాటం
దశరథకులచంద్రం రామచంద్రం భజేఽహమ్ ॥ 144

రామం రక్తసరోరుహాక్షమమలం లంకాధినాథాంతకం
కౌసల్యానయనోత్సుకం రఘువరం నాగేంద్రతల్పస్థితమ్ ।
వైదేహీకుచకుంభకుంకుమరజోలంకారహారం హరిం
మాయామానుషవిగ్రహం రఘుపతిం సీతాసమేతం భజే ॥ 145

రామం రాక్షసమర్దనం రఘువరం దైతేయభిధ్వంసినం
సుగ్రీవేప్సితరాజ్యదం సురపతేర్భీత్యంతకం శార్‍ంగిణమ్ ।
భక్తానామభయప్రదం భయహరం పాపౌఘవిధ్వంసినం
సామీరిస్తుతపాదపద్మయుగళం సీతాసమేతం భజే ॥ 146

యత్పాదాంబుజరేణునా మునిసతీ ముక్తింగతా యన్మహః
పుణ్యం పాతకనాశనం త్రిజగతాం భాతి స్మృతం పావనమ్ ।
స్మృత్వా రాఘవమప్రమేయమమలం పూర్ణేందుమందస్మితం
తం రామం సరసీరుహాక్షమమలం సీతాసమేతం భజే ॥ 147

వైదేహీకుచమండలాగ్ర-విలసన్మాణిక్యహస్తాంబుజం
చంచత్కంకణహారనూపుర-లసత్కేయూరహారాన్వితమ్ ।
దివ్యశ్రీమణికుండలోజ్జ్వల-మహాభూషాసహస్రాన్వితం
వీరశ్రీరఘుపుంగవం గుణనిధిం సీతాసమేతం భజే ॥ 148

వైదేహీకుచమండలోపరి-లసన్మాణిక్యహారావళీ-
మధ్యస్థం నవనీతకోమలరుచిం నీలోత్పలశ్యామలమ్ ।
కందర్పాయుతకోటిసుందరతనుం పూర్ణేందుబింబాననం
కౌసల్యాకులభూషణం రఘుపతిం సీతాసమేతం భజే ॥ 149

దివ్యారణ్యయతీంద్రనామనగరే మధ్యే మహామంటపే
స్వర్ణస్తంభసహస్రషోడశయుతే మందారమూలాశ్రితే ।
నానారత్నవిచిత్రనిర్మలమహాసింహాసనే సంస్థితం
సీతాలక్ష్మణసేవితం రఘుపతిం సీతాసమేతం భజే ॥ 150

కస్తూరీతిలకం కపీంద్రహరణం కారుణ్యవారాంనిధిం
క్షీరాంభోధిసుతాముఖాబ్జమధుపం కల్యాణసంపన్నిధిమ్ ।
కౌసల్యానయనోత్సుకం కపివరత్రాణం మహాపౌరుషం
కౌమారప్రియమర్కకోటిసదృశం సీతాసమేతం భజే ॥ 151

విద్యుత్కోటిదివాకరద్యుతినిభం శ్రీకౌస్తుభాలంకృతం
యోగీంద్రైస్సనకాదిభిః పరివృతం కైలాసనాథప్రియమ్ ।
ముక్తారత్నకిరీటకుండలధరం గ్రైవేయహారాన్వితం
వైదేహీకుచసన్నివాసమనిశం సీతాసమేతం భజే ॥ 152

మేఘశ్యామలమంబుజాతనయనం విస్తీర్ణవక్షస్స్థలం
బాహుద్వంద్వవిరాజితం సువదనం శోణాంఘ్రిపంకేరుహమ్ ।
నానారత్నవిచిత్రభూషణయుతం కోదండబాణాంకితం
త్రైలోక్యాఽప్రతిమానసుందరతనుం సీతాసమేతం భజే ॥ 153

వైదేహీయుతవామభాగమతులం వందారుమందారకం
వందే ప్రస్తుతకీర్తివాసితతరుచ్ఛాయానుకారిప్రభమ్ ।
వైదేహీకుచకుంకుమాంకితమహోరస్కం మహాభూషణం
వేదాంతైరుపగీయమానమసకృత్సీతాసమేతం భజే ॥ 154

దేవానాం హితకారణేన భువనే ధృత్వాఽవతారం ధ్రువం
రామం కౌశికయజ్ఞవిఘ్నదలనం తత్తాటకాసంహరమ్ ।
నిత్యం గౌతమపత్నిశాపదలనశ్రీపాదరేణుం శుభం
శంభోరుత్కటచాపఖండనమహాసత్వం భజే రాఘవమ్ ॥ 155

శ్రీరామం నవరత్నకుండలధరం శ్రీరామరక్షామణిం
శ్రీరామం చ సహస్రభానుసదృశం శ్రీరామచంద్రోదయమ్ ।
శ్రీరామం శ్రుతకీర్తిమాకరమహం శ్రీరామముక్తిప్రదం
శ్రీరామం రఘునందనం భయహరం శ్రీరామచంద్రం భజే ॥ 156

రామమిందీవరశ్యామం రాజీవాయతలోచనమ్ ।
జ్యాఘోషనిర్జితారాతిం జానకీరమణం భజే ॥ 157

దీర్ఘబాహుమరవిందలోచనం
దీనవత్సలమనాథరక్షకమ్ ।
దీక్షితం సకలలోకరక్షణే
దైవతం దశరథాత్మజం భజే ॥ 158

ప్రాతస్స్మరామి రఘునాథముఖారవిందం
మందస్మితం మధురభాషి విశాలఫాలమ్ ।
కర్ణావలంబిచలకుండలగండభాగం
కర్ణాంతదీర్ఘనయనం నయనాభిరామమ్ ॥ 159

ప్రాతర్భజామి రఘునాథకరారవిందం
రక్షోగణాయ భయదం వరదం నిజేభ్యః ।
యద్రాజసంసది విభిద్య మహేశచాపం
సీతాకరగ్రహణమంగళమాప సద్యః ॥ 160

ప్రాతర్నమామి రఘునాథపదారవిందం
పద్మాంకుశాదిశుభరేఖశుభావహం చ ।
యోగీంద్రమానసమధువ్రతసేవ్యమానం
శాపాపహం సపది గౌతమధర్మపత్న్యాః ॥ 161

ప్రాతర్వదామి వచసా రఘునాథనామ
వాగ్దోషహారి సకలం కలుషం నిహంతృ ।
యత్పార్వతీ స్వపతినా సహ భోక్తుకామా
ప్రీత్యా సహస్రహరినామసమం జజాప ॥ 162

ప్రాతః శ్రయే శ్రుతినుతం రఘునాథమూర్తిం
నీలాంబుదోత్పలసితేతరరత్ననీలామ్ ।
ఆముక్తమౌక్తికవిశేషవిభూషణాఢ్యాం
ధ్యేయాం సమస్తమునిభిర్నిజభృత్యముఖ్యైః ॥ 163

రఘుకులవరనాథో జానకీప్రాణనాథః
పితృవచనవిధాతా కీశరాజ్యప్రదాతా ।
ప్రతినిశిచరనాశః ప్రాప్తరాజ్యప్రవేశో
విహితభువనరక్షః పాతు పద్మాయతాక్షః ॥ 164

కువలయదళనీలః పీతవాసాః స్మితాస్యో
వివిధరుచిరభూషాభూషితో దివ్యమూర్తిః ।
దశరథకులనాథో జానకీప్రాణనాథో
నివసతు మమ చిత్తే సర్వదా రామచంద్రః ॥ 165

జయతు జయతు రామో జానకీవల్లభోఽయం
జయతు జయతు రామశ్చంద్రచూడార్చితాంఘ్రిః ।
జయతు జయతు వాణీనాథనాథః పరాత్మా
జయతు జయతు రామోఽనాథనాథః కృపాళుః ॥ 166

వదతు వదతు వాణీ రామరామేతి నిత్యం
జయతు జయతు చిత్తం రామపాదారవిందమ్ ।
నమతు నమతు దేహం సంతతం రామచంద్రం
న భవతు మమ పాపం జన్మజన్మాంతరేషు ॥ 167

ఆనందరూపం వరదం ప్రసన్నం
సింహేక్షణం సేవకపారిజాతమ్ ।
నీలోత్పలాంగం భువనైకమిత్రం
రామం భజే రాఘవరామచంద్రమ్ ॥ 168

లంకావిరామం రణరంగభీమం
రాజీవనేత్రం రఘువంశమిత్రమ్ ।
కారుణ్యమూర్తిం కరుణాప్రపూర్తిం
శ్రీరామచంద్రం శరణం ప్రపద్యే ॥ 169

సుగ్రీవమిత్రం పరమం పవిత్రం
సీతాకళత్రం నవహేమసూత్రమ్ ।
కారుణ్యపాత్రం శతపత్రనేత్రం
శ్రీరామచంద్రం శిరసా నమామి ॥ 170

శ్రీరాఘవేతి రమణేతి రఘూద్వహేతి
రామేతి రావణహరేతి రమాధవేతి ।
సాకేతనాథసుముఖేతి చ సువ్రతేతి
వాణీ సదా వదతు రామ హరే హరేతి ॥ 171

శ్రీరామనామామృతమంత్రబీజం
సంజీవనం చేన్మనసి ప్రతిష్ఠమ్ ।
హాలాహలం వా ప్రళయానలం వా
మృత్యోర్ముఖం వా వితథీకరోతి ॥ 172

కిం యోగశాస్త్రైః కిమశేషవిద్యా
కిం యాగగంగాదివిశేషతీర్థైః ।
కిం బ్రహ్మచర్యాశ్రమసంచరేణ
భక్తిర్నచేత్తే రఘువంశకీర్త్యామ్ ॥ 173

ఇదం శరీరం శ్లథసంధిజర్ఝరం
పతత్యవశ్యం పరిణామపేశలమ్ ।
కిమౌషథం పృచ్ఛసి మూఢ దుర్మతే
నిరామయం రామకథామృతం పిబ ॥ 174

హే రామభద్రాశ్రయ హే కృపాళో
హే భక్తలోకైకశరణ్యమూర్తే ।
పునీహి మాం త్వచ్చరణారవిందం
జగత్పవిత్రం శరణం మమాఽస్తు ॥ 175

నీలాభ్రదేహ నిఖిలేశ జగన్నివాస
రాజీవనేత్ర రమణీయగుణాభిరామ ।
శ్రీదామ దైత్యకులమర్దన రామచంద్ర
త్వత్పాదపద్మమనిశం కలయామి చిత్తే ॥ 176

శ్రీరామచంద్ర కరుణాకర దీనబంధో
సీతాసమేత భరతాగ్రజ రాఘవేశ ।
పాపార్తిభంజన భయాతురదీనబంధో
పాపాంబుధౌ పతితముద్ధర మామనాథమ్ ॥ 177

ఇందీవరదళశ్యామ-మిందుకోటినిభాననమ్ ।
కందర్పకోటిలావణ్యం వందేఽహం రఘునందనమ్ ॥ 175

ఇతి శ్రీబోధేంద్రసరస్వతీ కృత శ్రీరామకర్ణామృతమ్ ॥

శ్రీ రామ కవచం

అగస్తిరువాచ
ఆజానుబాహుమరవిందదళాయతాక్ష-
-మాజన్మశుద్ధరసహాసముఖప్రసాదమ్ ।
శ్యామం గృహీత శరచాపముదారరూపం
రామం సరామమభిరామమనుస్మరామి ॥ 1 ॥

అస్య శ్రీరామకవచస్య అగస్త్య ఋషిః అనుష్టుప్ ఛందః సీతాలక్ష్మణోపేతః శ్రీరామచంద్రో దేవతా శ్రీరామచంద్రప్రసాదసిద్ధ్యర్థే జపే వినియోగః ।

అథ ధ్యానం
నీలజీమూతసంకాశం విద్యుద్వర్ణాంబరావృతమ్ ।
కోమలాంగం విశాలాక్షం యువానమతిసుందరమ్ ॥ 1 ॥

సీతాసౌమిత్రిసహితం జటాముకుటధారిణమ్ ।
సాసితూణధనుర్బాణపాణిం దానవమర్దనమ్ ॥ 2 ॥

యదా చోరభయే రాజభయే శత్రుభయే తథా ।
ధ్యాత్వా రఘుపతిం క్రుద్ధం కాలానలసమప్రభమ్ ॥ 3 ॥

చీరకృష్ణాజినధరం భస్మోద్ధూళితవిగ్రహమ్ ।
ఆకర్ణాకృష్టవిశిఖకోదండభుజమండితమ్ ॥ 4 ॥

రణే రిపూన్ రావణాదీంస్తీక్ష్ణమార్గణవృష్టిభిః ।
సంహరంతం మహావీరముగ్రమైంద్రరథస్థితమ్ ॥ 5 ॥

లక్ష్మణాద్యైర్మహావీరైర్వృతం హనుమదాదిభిః ।
సుగ్రీవాద్యైర్మాహావీరైః శైలవృక్షకరోద్యతైః ॥ 6 ॥

వేగాత్కరాలహుంకారైర్భుభుక్కారమహారవైః ।
నదద్భిః పరివాదద్భిః సమరే రావణం ప్రతి ॥ 7 ॥

శ్రీరామ శత్రుసంఘాన్మే హన మర్దయ ఖాదయ ।
భూతప్రేతపిశాచాదీన్ శ్రీరామాశు వినాశయ ॥ 8 ॥

ఏవం ధ్యాత్వా జపేద్రామకవచం సిద్ధిదాయకమ్ ।
సుతీక్ష్ణ వజ్రకవచం శృణు వక్ష్యామ్యనుత్తమమ్ ॥ 9 ॥

అథ కవచం
శ్రీరామః పాతు మే మూర్ధ్ని పూర్వే చ రఘువంశజః ।
దక్షిణే మే రఘువరః పశ్చిమే పాతు పావనః ॥ 10 ॥

ఉత్తరే మే రఘుపతిర్భాలం దశరథాత్మజః ।
భ్రువోర్దూర్వాదలశ్యామస్తయోర్మధ్యే జనార్దనః ॥ 11 ॥

శ్రోత్రం మే పాతు రాజేంద్రో దృశౌ రాజీవలోచనః ।
ఘ్రాణం మే పాతు రాజర్షిర్గండౌ మే జానకీపతిః ॥ 12 ॥

కర్ణమూలే ఖరధ్వంసీ భాలం మే రఘువల్లభః ।
జిహ్వాం మే వాక్పతిః పాతు దంతపంక్తీ రఘూత్తమః ॥ 13 ॥

ఓష్ఠౌ శ్రీరామచంద్రో మే ముఖం పాతు పరాత్పరః ।
కంఠం పాతు జగద్వంద్యః స్కంధౌ మే రావణాంతకః ॥ 14 ॥

ధనుర్బాణధరః పాతు భుజౌ మే వాలిమర్దనః ।
సర్వాణ్యంగులిపర్వాణి హస్తౌ మే రాక్షసాంతకః ॥ 15 ॥

వక్షో మే పాతు కాకుత్స్థః పాతు మే హృదయం హరిః ।
స్తనౌ సీతాపతిః పాతు పార్శ్వం మే జగదీశ్వరః ॥ 16 ॥

మధ్యం మే పాతు లక్ష్మీశో నాభిం మే రఘునాయకః ।
కౌసల్యేయః కటీ పాతు పృష్ఠం దుర్గతినాశనః ॥ 17 ॥

గుహ్యం పాతు హృషీకేశః సక్థినీ సత్యవిక్రమః ।
ఊరూ శార్ఙ్గధరః పాతు జానునీ హనుమత్ప్రియః ॥ 18 ॥

జంఘే పాతు జగద్వ్యాపీ పాదౌ మే తాటకాంతకః ।
సర్వాంగం పాతు మే విష్ణుః సర్వసంధీననామయః ॥ 19 ॥

జ్ఞానేంద్రియాణి ప్రాణాదీన్ పాతు మే మధుసూదనః ।
పాతు శ్రీరామభద్రో మే శబ్దాదీన్విషయానపి ॥ 20 ॥

ద్విపదాదీని భూతాని మత్సంబంధీని యాని చ ।
జామదగ్న్యమహాదర్పదలనః పాతు తాని మే ॥ 21 ॥

సౌమిత్రిపూర్వజః పాతు వాగాదీనీంద్రియాణి చ ।
రోమాంకురాణ్యశేషాణి పాతు సుగ్రీవరాజ్యదః ॥ 22 ॥

వాఙ్మనోబుద్ధ్యహంకారైర్జ్ఞానాజ్ఞానకృతాని చ ।
జన్మాంతరకృతానీహ పాపాని వివిధాని చ ॥ 23 ॥

తాని సర్వాణి దగ్ధ్వాశు హరకోదండఖండనః ।
పాతు మాం సర్వతో రామః శార్ఙ్గబాణధరః సదా ॥ 24 ॥

ఇతి శ్రీరామచంద్రస్య కవచం వజ్రసమ్మితమ్ ।
గుహ్యాద్గుహ్యతమం దివ్యం సుతీక్ష్ణ మునిసత్తమ ॥ 25 ॥

యః పఠేచ్ఛృణుయాద్వాపి శ్రావయేద్వా సమాహితః ।
స యాతి పరమం స్థానం రామచంద్రప్రసాదతః ॥ 26 ॥

మహాపాతకయుక్తో వా గోఘ్నో వా భ్రూణహా తథా ।
శ్రీరామచంద్రకవచపఠనాచ్ఛుద్ధిమాప్నుయాత్ ॥ 27 ॥

బ్రహ్మహత్యాదిభిః పాపైర్ముచ్యతే నాత్ర సంశయః ।
భో సుతీక్ష్ణ యథా పృష్టం త్వయా మమ పురాః శుభమ్ ।
తథా శ్రీరామకవచం మయా తే వినివేదితమ్ ॥ 28 ॥

ఇతి శ్రీమదానందరామాయణే మనోహరకాండే సుతీక్ష్ణాగస్త్యసంవాదే శ్రీరామకవచమ్ ॥

శ్రీ నరసింహ కవచం

నృసింహకవచం వక్ష్యే ప్రహ్లాదేనోదితం పురా ।
సర్వరక్షాకరం పుణ్యం సర్వోపద్రవనాశనమ్ ॥ 1 ॥

సర్వసంపత్కరం చైవ స్వర్గమోక్షప్రదాయకమ్ ।
ధ్యాత్వా నృసింహం దేవేశం హేమసింహాసనస్థితమ్ ॥ 2 ॥

వివృతాస్యం త్రినయనం శరదిందుసమప్రభమ్ ।
లక్ష్మ్యాలింగితవామాంగం విభూతిభిరుపాశ్రితమ్ ॥ 3 ॥

చతుర్భుజం కోమలాంగం స్వర్ణకుండలశోభితమ్ ।
సరోజశోభితోరస్కం రత్నకేయూరముద్రితమ్ ॥ 4 ॥ [రత్నకేయూరశోభితం]

తప్తకాంచనసంకాశం పీతనిర్మలవాసనమ్ ।
ఇంద్రాదిసురమౌళిస్థస్ఫురన్మాణిక్యదీప్తిభిః ॥ 5 ॥

విరాజితపదద్వంద్వం శంఖచక్రాదిహేతిభిః ।
గరుత్మతా సవినయం స్తూయమానం ముదాన్వితమ్ ॥ 6 ॥

స్వహృత్కమలసంవాసం కృత్వా తు కవచం పఠేత్ ।
నృసింహో మే శిరః పాతు లోకరక్షాత్మసంభవః ॥ 7 ॥

సర్వగోఽపి స్తంభవాసః ఫాలం మే రక్షతు ధ్వనిమ్ ।
నృసింహో మే దృశౌ పాతు సోమసూర్యాగ్నిలోచనః ॥ 8 ॥

స్మృతిం మే పాతు నృహరిర్మునివర్యస్తుతిప్రియః ।
నాసాం మే సింహనాసస్తు ముఖం లక్ష్మీముఖప్రియః ॥ 9 ॥

సర్వవిద్యాధిపః పాతు నృసింహో రసనాం మమ ।
వక్త్రం పాత్విందువదనః సదా ప్రహ్లాదవందితః ॥ 10 ॥

నృసింహః పాతు మే కంఠం స్కంధౌ భూభరణాంతకృత్ ।
దివ్యాస్త్రశోభితభుజో నృసింహః పాతు మే భుజౌ ॥ 11 ॥

కరౌ మే దేవవరదో నృసింహః పాతు సర్వతః ।
హృదయం యోగిసాధ్యశ్చ నివాసం పాతు మే హరిః ॥ 12 ॥

మధ్యం పాతు హిరణ్యాక్షవక్షఃకుక్షివిదారణః ।
నాభిం మే పాతు నృహరిః స్వనాభి బ్రహ్మసంస్తుతః ॥ 13 ॥

బ్రహ్మాండకోటయః కట్యాం యస్యాసౌ పాతు మే కటిమ్ ।
గుహ్యం మే పాతు గుహ్యానాం మంత్రాణాం గుహ్యరూపధృక్ ॥ 14 ॥

ఊరూ మనోభవః పాతు జానునీ నరరూపధృక్ ।
జంఘే పాతు ధరాభారహర్తా యోఽసౌ నృకేసరీ ॥ 15 ॥

సురరాజ్యప్రదః పాతు పాదౌ మే నృహరీశ్వరః ।
సహస్రశీర్షా పురుషః పాతు మే సర్వశస్తనుమ్ ॥ 16 ॥

మహోగ్రః పూర్వతః పాతు మహావీరాగ్రజోఽగ్నితః ।
మహావిష్ణుర్దక్షిణే తు మహాజ్వాలస్తు నైరృతౌ ॥ 17 ॥

పశ్చిమే పాతు సర్వేశో దిశి మే సర్వతోముఖః ।
నృసింహః పాతు వాయవ్యాం సౌమ్యాం భూషణవిగ్రహః ॥ 18 ॥

ఈశాన్యాం పాతు భద్రో మే సర్వమంగళదాయకః ।
సంసారభయదః పాతు మృత్యోర్మృత్యుర్నృకేసరీ ॥ 19 ॥

ఇదం నృసింహకవచం ప్రహ్లాదముఖమండితమ్ ।
భక్తిమాన్యః పఠేన్నిత్యం సర్వపాపైః ప్రముచ్యతే ॥ 20 ॥

పుత్రవాన్ ధనవాన్ లోకే దీర్ఘాయురుపజాయతే ।
యం యం కామయతే కామం తం తం ప్రాప్నోత్యసంశయమ్ ॥ 21 ॥

సర్వత్ర జయమాప్నోతి సర్వత్ర విజయీ భవేత్ ।
భూమ్యంతరిక్షదివ్యానాం గ్రహాణాం వినివారణమ్ ॥ 22 ॥

వృశ్చికోరగసంభూతవిషాపహరణం పరమ్ ।
బ్రహ్మరాక్షసయక్షాణాం దూరోత్సారణకారణమ్ ॥ 23 ॥

భూర్జే వా తాళపత్రే వా కవచం లిఖితం శుభమ్ ।
కరమూలే ధృతం యేన సిధ్యేయుః కర్మసిద్ధయః ॥ 24 ॥

దేవాసురమనుష్యేషు స్వం స్వమేవ జయం లభేత్ ।
ఏకసంధ్యం త్రిసంధ్యం వా యః పఠేన్నియతో నరః ॥ 25 ॥

సర్వమంగళమాంగళ్యం భుక్తిం ముక్తిం చ విందతి ।
ద్వాత్రింశతిసహస్రాణి పఠేచ్ఛుద్ధాత్మనాం నృణామ్ ॥ 26 ॥

కవచస్యాస్య మంత్రస్య మంత్రసిద్ధిః ప్రజాయతే ।
అనేన మంత్రరాజేన కృత్వా భస్మాభిమంత్రణమ్ ॥ 27 ॥

తిలకం విన్యసేద్యస్తు తస్య గ్రహభయం హరేత్ ।
త్రివారం జపమానస్తు దత్తం వార్యభిమంత్ర్య చ ॥ 28 ॥

ప్రాశయేద్యో నరో మంత్రం నృసింహధ్యానమాచరేత్ ।
తస్య రోగాః ప్రణశ్యంతి యే చ స్యుః కుక్షిసంభవాః ॥ 29 ॥

కిమత్ర బహునోక్తేన నృసింహసదృశో భవేత్ ।
మనసా చింతితం యత్తు స తచ్చాప్నోత్యసంశయమ్ ॥ 30 ॥

గర్జంతం గర్జయంతం నిజభుజపటలం స్ఫోటయంతం హఠంతం
రూప్యంతం తాపయంతం దివి భువి దితిజం క్షేపయంతం క్షిపంతమ్ ।
క్రందంతం రోషయంతం దిశి దిశి సతతం సంహరంతం భరంతం
వీక్షంతం ఘూర్ణయంతం శరనికరశతైర్దివ్యసింహం నమామి ॥

ఇతి శ్రీబ్రహ్మాండపురాణే ప్రహ్లాదోక్తం శ్రీ నృసింహ కవచమ్ ।

శ్రి దత్తాత్రేయ వజ్ర కవచం

ఋషయ ఊచుః ।
కథం సంకల్పసిద్ధిః స్యాద్వేదవ్యాస కలౌయుగే ।
ధర్మార్థకామమోక్షాణాం సాధనం కిముదాహృతమ్ ॥ 1 ॥

వ్యాస ఉవాచ ।
శృణ్వంతు ఋషయస్సర్వే శీఘ్రం సంకల్పసాధనమ్ ।
సకృదుచ్చారమాత్రేణ భోగమోక్షప్రదాయకమ్ ॥ 2 ॥

గౌరీశృంగే హిమవతః కల్పవృక్షోపశోభితమ్ ।
దీప్తే దివ్యమహారత్న హేమమండపమధ్యగమ్ ॥ 3 ॥

రత్నసింహాసనాసీనం ప్రసన్నం పరమేశ్వరమ్ ।
మందస్మితముఖాంభోజం శంకరం ప్రాహ పార్వతీ ॥ 4 ॥

శ్రీదేవీ ఉవాచ ।
దేవదేవ మహాదేవ లోకశంకర శంకర ।
మంత్రజాలాని సర్వాణి యంత్రజాలాని కృత్స్నశః ॥ 5 ॥

తంత్రజాలాన్యనేకాని మయా త్వత్తః శ్రుతాని వై ।
ఇదానీం ద్రష్టుమిచ్ఛామి విశేషేణ మహీతలమ్ ॥ 6 ॥

ఇత్యుదీరితమాకర్ణ్య పార్వత్యా పరమేశ్వరః ।
కరేణామృజ్య సంతోషాత్ పార్వతీం ప్రత్యభాషత ॥ 7 ॥

మయేదానీం త్వయా సార్ధం వృషమారుహ్య గమ్యతే ।
ఇత్యుక్త్వా వృషమారుహ్య పార్వత్యా సహ శంకరః ॥ 8 ॥

యయౌ భూమండలం ద్రష్టుం గౌర్యాశ్చిత్రాణి దర్శయన్ ।
క్వచిత్ వింధ్యాచలప్రాంతే మహారణ్యే సుదుర్గమే ॥ 9 ॥

తత్ర వ్యాహర్తుమాయాంతం భిల్లం పరశుధారిణమ్ ।
వధ్యమానం మహావ్యాఘ్రం నఖదంష్ట్రాభిరావృతమ్ ॥ 10 ॥

అతీవ చిత్రచారిత్ర్యం వజ్రకాయసమాయుతమ్ ।
అప్రయత్నమనాయాసమఖిన్నం సుఖమాస్థితమ్ ॥ 11 ॥

పలాయంతం మృగం పశ్చాద్వ్యాఘ్రో భీత్యా పలాయతః ।
ఏతదాశ్చర్యమాలోక్య పార్వతీ ప్రాహ శంకరమ్ ॥ 12 ॥

శ్రీ పార్వత్యువాచ ।
కిమాశ్చర్యం కిమాశ్చర్యమగ్రే శంభో నిరీక్ష్యతామ్ ।
ఇత్యుక్తః స తతః శంభుర్దృష్ట్వా ప్రాహ పురాణవిత్ ॥ 13 ॥

శ్రీ శంకర ఉవాచ ।
గౌరి వక్ష్యామి తే చిత్రమవాఙ్మానసగోచరమ్ ।
అదృష్టపూర్వమస్మాభిర్నాస్తి కించిన్న కుత్రచిత్ ॥ 14 ॥

మయా సమ్యక్ సమాసేన వక్ష్యతే శృణు పార్వతి ।
అయం దూరశ్రవా నామ భిల్లః పరమధార్మికః ॥ 15 ॥

సమిత్కుశప్రసూనాని కందమూలఫలాదికమ్ ।
ప్రత్యహం విపినం గత్వా సమాదాయ ప్రయాసతః ॥ 16 ॥

ప్రియే పూర్వం మునీంద్రేభ్యః ప్రయచ్ఛతి న వాంఛతి ।
తేఽపి తస్మిన్నపి దయాం కుర్వతే సర్వమౌనినః ॥ 17 ॥

దలాదనో మహాయోగీ వసన్నేవ నిజాశ్రమే ।
కదాచిదస్మరత్ సిద్ధం దత్తాత్రేయం దిగంబరమ్ ॥ 18 ॥

దత్తాత్రేయః స్మర్తృగామీ చేతిహాసం పరీక్షితుమ్ ।
తత్‍క్షణాత్ సోఽపి యోగీంద్రో దత్తాత్రేయః సముత్థితః ॥ 19 ॥

తం దృష్ట్వాశ్చర్యతోషాభ్యాం దలాదనమహామునిః ।
సంపూజ్యాగ్రే విషీదంతం దత్తాత్రేయమువాచ తమ్ ॥ 20 ॥

మయోపహూతః సంప్రాప్తో దత్తాత్రేయ మహామునే ।
స్మర్తృగామీ త్వమిత్యేతత్ కిం వదంతీ పరీక్షితుమ్ ॥ 21 ॥

మయాద్య సంస్మృతోఽసి త్వమపరాధం క్షమస్వ మే ।
దత్తాత్రేయో మునిం ప్రాహ మమ ప్రకృతిరీదృశీ ॥ 22 ॥

అభక్త్యా వా సుభక్త్యా వా యః స్మరేన్నామనన్యధీః ।
తదానీం తముపాగమ్య దదామి తదభీప్సితమ్ ॥ 23 ॥

దత్తాత్రేయో మునిం ప్రాహ దలాదనమునీశ్వరమ్ ।
యదిష్టం తద్వృణీష్వ త్వం యత్ ప్రాప్తోఽహం త్వయా స్మృతః ॥ 24 ॥

దత్తాత్రేయం మునిం ప్రాహ మయా కిమపి నోచ్యతే ।
త్వచ్చిత్తే యత్ స్థితం తన్మే ప్రయచ్ఛ మునిపుంగవ ॥ 25 ॥

శ్రీ దత్తాత్రేయ ఉవాచ ।
మమాస్తి వజ్రకవచం గృహాణేత్యవదన్మునిమ్ ।
తథేత్యంగీకృతవతే దలాదమునయే మునిః ॥ 26 ॥

స్వవజ్రకవచం ప్రాహ ఋషిచ్ఛందః పురస్సరమ్ ।
న్యాసం ధ్యానం ఫలం తత్ర ప్రయోజనమశేషతః ॥ 27 ॥

అస్య శ్రీదత్తాత్రేయ వజ్రకవచ స్తోత్రమంత్రస్య, కిరాతరూపీ మహారుద్రృషిః, అనుష్టుప్ ఛందః, శ్రీదత్తాత్రేయో దేవతా, ద్రాం బీజం, ఆం శక్తిః, క్రౌం కీలకమ్.
ఓం ఆత్మనే నమః
ఓం ద్రీం మనసే నమః
ఓం ఆం ద్రీం శ్రీం సౌః
ఓం క్లాం క్లీం క్లూం క్లైం క్లౌం క్లః
శ్రీ దత్తాత్రేయ ప్రసాద సిద్ధ్యర్థే జపే వినియోగః

కరన్యాసః ।
ఓం ద్రాం అంగుష్ఠాభ్యాం నమః ।
ఓం ద్రీం తర్జనీభ్యాం నమః ।
ఓం ద్రూం మధ్యమాభ్యాం నమః ।
ఓం ద్రైం అనామికాభ్యాం నమః ।
ఓం ద్రౌం కనిష్ఠికాభ్యాం నమః ।
ఓం ద్రః కరతలకరపృష్ఠాభ్యాం నమః ।

హృదయాదిన్యాసః ।
ఓం ద్రాం హృదయాయ నమః ।
ఓం ద్రీం శిరసే స్వాహా ।
ఓం ద్రూం శిఖాయై వషట్ ।
ఓం ద్రైం కవచాయ హుమ్ ।
ఓం ద్రౌం నేత్రత్రయాయ వౌషట్ ।
ఓం ద్రః అస్త్రాయ ఫట్ ।
ఓం భూర్భువస్సువరోమితి దిగ్బంధః ।

ధ్యానమ్ ।
జగదంకురకందాయ సచ్చిదానందమూర్తయే ।
దత్తాత్రేయాయ యోగీంద్రచంద్రాయ పరమాత్మనే ॥ 1 ॥

కదా యోగీ కదా భోగీ కదా నగ్నః పిశాచవత్ ।
దత్తాత్రేయో హరిః సాక్షాత్ భుక్తిముక్తిప్రదాయకః ॥ 2 ॥

వారాణసీపురస్నాయీ కొల్హాపురజపాదరః ।
మాహురీపురభీక్షాశీ సహ్యశాయీ దిగంబరః ॥ 3 ॥

ఇంద్రనీల సమాకారః చంద్రకాంతిసమద్యుతిః ।
వైఢూర్య సదృశస్ఫూర్తిః చలత్కించిజ్జటాధరః ॥ 4 ॥

స్నిగ్ధధావల్య యుక్తాక్షోఽత్యంతనీల కనీనికః ।
భ్రూవక్షఃశ్మశ్రునీలాంకః శశాంకసదృశాననః ॥ 5 ॥

హాసనిర్జిత నిహారః కంఠనిర్జిత కంబుకః ।
మాంసలాంసో దీర్ఘబాహుః పాణినిర్జితపల్లవః ॥ 6 ॥

విశాలపీనవక్షాశ్చ తామ్రపాణిర్దలోదరః ।
పృథులశ్రోణిలలితో విశాలజఘనస్థలః ॥ 7 ॥

రంభాస్తంభోపమానోరుః జానుపూర్వైకజంఘకః ।
గూఢగుల్ఫః కూర్మపృష్ఠో లసత్వాదోపరిస్థలః ॥ 8 ॥

రక్తారవిందసదృశ రమణీయ పదాధరః ।
చర్మాంబరధరో యోగీ స్మర్తృగామీ క్షణేక్షణే ॥ 9 ॥

జ్ఞానోపదేశనిరతో విపద్ధరణదీక్షితః ।
సిద్ధాసనసమాసీన ఋజుకాయో హసన్ముఖః ॥ 10 ॥

వామహస్తేన వరదో దక్షిణేనాభయంకరః ।
బాలోన్మత్త పిశాచీభిః క్వచిద్ యుక్తః పరీక్షితః ॥ 11 ॥

త్యాగీ భోగీ మహాయోగీ నిత్యానందో నిరంజనః ।
సర్వరూపీ సర్వదాతా సర్వగః సర్వకామదః ॥ 12 ॥

భస్మోద్ధూళిత సర్వాంగో మహాపాతకనాశనః ।
భుక్తిప్రదో ముక్తిదాతా జీవన్ముక్తో న సంశయః ॥ 13 ॥

ఏవం ధ్యాత్వాఽనన్యచిత్తో మద్వజ్రకవచం పఠేత్ ।
మామేవ పశ్యన్సర్వత్ర స మయా సహ సంచరేత్ ॥ 14 ॥

దిగంబరం భస్మసుగంధ లేపనం
చక్రం త్రిశూలం ఢమరుం గదాయుధమ్ ।
పద్మాసనం యోగిమునీంద్రవందితం
దత్తేతినామస్మరణేన నిత్యమ్ ॥ 15 ॥

పంచోపచారపూజా ।

ఓం లం పృథివీతత్త్వాత్మనే శ్రీదత్తాత్రేయాయ నమః ।
గంధం పరికల్పయామి।

ఓం హం ఆకాశతత్త్వాత్మనే శ్రీదత్తాత్రేయాయ నమః ।
పుష్పం పరికల్పయామి ।

ఓం యం వాయుతత్త్వాత్మనే శ్రీదత్తాత్రేయాయ నమః ।
ధూపం పరికల్పయామి ।

ఓం రం వహ్నితత్త్వాత్మనే శ్రీదత్తాత్రేయాయ నమః ।
దీపం పరికల్పయామి ।

ఓం వం అమృత తత్త్వాత్మనే శ్రీదత్తాత్రేయాయ నమః ।
అమృతనైవేద్యం పరికల్పయామి ।

ఓం సం సర్వతత్త్వాత్మనే శ్రీదత్తాత్రేయాయ నమః ।
తాంబూలాదిసర్వోపచారాన్ పరికల్పయామి ।

(అనంతరం ‘ఓం ద్రాం…’ ఇతి మూలమంత్రం అష్టోత్తరశతవారం (108) జపేత్)

అథ వజ్రకవచమ్ ।

ఓం దత్తాత్రేయాయ శిరఃపాతు సహస్రాబ్జేషు సంస్థితః ।
ఫాలం పాత్వానసూయేయః చంద్రమండలమధ్యగః ॥ 1 ॥

కూర్చం మనోమయః పాతు హం క్షం ద్విదలపద్మభూః ।
జ్యోతిరూపోఽక్షిణీపాతు పాతు శబ్దాత్మకః శ్రుతీ ॥ 2 ॥

నాసికాం పాతు గంధాత్మా ముఖం పాతు రసాత్మకః ।
జిహ్వాం వేదాత్మకః పాతు దంతోష్ఠౌ పాతు ధార్మికః ॥ 3 ॥

కపోలావత్రిభూః పాతు పాత్వశేషం మమాత్మవిత్ ।
సర్వాత్మా షోడశారాబ్జస్థితః స్వాత్మాఽవతాద్ గలమ్ ॥ 4 ॥

స్కంధౌ చంద్రానుజః పాతు భుజౌ పాతు కృతాదిభూః ।
జత్రుణీ శత్రుజిత్ పాతు పాతు వక్షస్థలం హరిః ॥ 5 ॥

కాదిఠాంతద్వాదశారపద్మగో మరుదాత్మకః ।
యోగీశ్వరేశ్వరః పాతు హృదయం హృదయస్థితః ॥ 6 ॥

పార్శ్వే హరిః పార్శ్వవర్తీ పాతు పార్శ్వస్థితః స్మృతః ।
హఠయోగాదియోగజ్ఞః కుక్షిం పాతు కృపానిధిః ॥ 7 ॥

డకారాది ఫకారాంత దశారసరసీరుహే ।
నాభిస్థలే వర్తమానో నాభిం వహ్న్యాత్మకోఽవతు ॥ 8 ॥

వహ్నితత్త్వమయో యోగీ రక్షతాన్మణిపూరకమ్ ।
కటిం కటిస్థబ్రహ్మాండవాసుదేవాత్మకోఽవతు ॥ 9 ॥

వకారాది లకారాంత షట్పత్రాంబుజబోధకః ।
జలతత్త్వమయో యోగీ స్వాధిష్ఠానం మమావతు ॥ 10 ॥

సిద్ధాసన సమాసీన ఊరూ సిద్ధేశ్వరోఽవతు ।
వాదిసాంత చతుష్పత్రసరోరుహ నిబోధకః ॥ 11 ॥

మూలాధారం మహీరూపో రక్షతాద్ వీర్యనిగ్రహీ ।
పృష్ఠం చ సర్వతః పాతు జానున్యస్తకరాంబుజః ॥ 12 ॥

జంఘే పాత్వవధూతేంద్రః పాత్వంఘ్రీ తీర్థపావనః ।
సర్వాంగం పాతు సర్వాత్మా రోమాణ్యవతు కేశవః ॥ 13 ॥

చర్మ చర్మాంబరః పాతు రక్తం భక్తిప్రియోఽవతు ।
మాంసం మాంసకరః పాతు మజ్జాం మజ్జాత్మకోఽవతు ॥ 14 ॥

అస్థీని స్థిరధీః పాయాన్మేధాం వేధాః ప్రపాలయేత్ ।
శుక్రం సుఖకరః పాతు చిత్తం పాతు దృఢాకృతిః ॥ 15 ॥

మనోబుద్ధిమహంకారం హృషీకేశాత్మకోఽవతు ।
కర్మేంద్రియాణి పాత్వీశః పాతు జ్ఞానేంద్రియాణ్యజః ॥ 16 ॥

బంధూన్ బంధూత్తమః పాయాచ్ఛత్రుభ్యః పాతు శత్రుజిత్ ।
గృహారామధనక్షేత్రపుత్రాదీన్ శంకరోఽవతు ॥ 17 ॥

భార్యాం ప్రకృతివిత్ పాతు పశ్వాదీన్ పాతు శార్‍ంగభృత్ ।
ప్రాణాన్ పాతు ప్రధానజ్ఞో భక్ష్యాదీన్ పాతు భాస్కరః ॥ 18 ॥

సుఖం చంద్రాత్మకః పాతు దుఃఖాత్ పాతు పురాంతకః ।
పశూన్ పశుపతిః పాతు భూతిం భూతేశ్వరో మమ ॥ 19 ॥

ప్రాచ్యాం విషహరః పాతు పాత్వాగ్నేయ్యాం మఖాత్మకః ।
యామ్యాం ధర్మాత్మకః పాతు నైరృత్యాం సర్వవైరిహృత్ ॥ 20 ॥

వరాహః పాతు వారుణ్యాం వాయవ్యాం ప్రాణదోఽవతు ।
కౌబేర్యాం ధనదః పాతు పాత్వైశాన్యాం మహాగురుః ॥ 21 ॥

ఊర్ధ్వం పాతు మహాసిద్ధః పాత్వధస్తాజ్జటాధరః ।
రక్షాహీనం తు యత్ స్థానం రక్షత్వాదిమునీశ్వరః ॥ 22 ॥

కరన్యాసః ।
ఓం ద్రాం అంగుష్ఠాభ్యాం నమః ।
ఓం ద్రీం తర్జనీభ్యాం నమః ।
ఓం ద్రూం మధ్యమాభ్యాం నమః ।
ఓం ద్రైం అనామికాభ్యాం నమః ।
ఓం ద్రౌం కనిష్ఠికాభ్యాం నమః ।
ఓం ద్రః కరతలకరపృష్ఠాభ్యాం నమః ।

హృదయాదిన్యాసః ।
ఓం ద్రాం హృదయాయ నమః ।
ఓం ద్రీం శిరసే స్వాహా ।
ఓం ద్రూం శిఖాయై వషట్ ।
ఓం ద్రైం కవచాయ హుమ్ ।
ఓం ద్రౌం నేత్రత్రయాయ వౌషట్ ।
ఓం ద్రః అస్త్రాయ ఫట్ ।
ఓం భూర్భువస్సువరోమితి దిగ్విమోకః ।

ఫలశృతి ॥

ఏతన్మే వజ్రకవచం యః పఠేత్ శృణుయాదపి ।
వజ్రకాయశ్చిరంజీవీ దత్తాత్రేయోఽహమబ్రువమ్ ॥ 23 ॥

త్యాగీ భోగీ మహాయోగీ సుఖదుఃఖవివర్జితః ।
సర్వత్ర సిద్ధసంకల్పో జీవన్ముక్తోఽద్యవర్తతే ॥ 24 ॥

ఇత్యుక్త్వాంతర్దధే యోగీ దత్తాత్రేయో దిగంబరః ।
దలాదనోఽపి తజ్జప్త్వా జీవన్ముక్తః స వర్తతే ॥ 25 ॥

భిల్లో దూరశ్రవా నామ తదానీం శ్రుతవానిదమ్ ।
సకృచ్ఛ్రవణమాత్రేణ వజ్రాంగోఽభవదప్యసౌ ॥ 26 ॥

ఇత్యేతద్ వజ్రకవచం దత్తాత్రేయస్య యోగినః ।
శ్రుత్వా శేషం శంభుముఖాత్ పునరప్యాహ పార్వతీ ॥ 27 ॥

శ్రీ పార్వత్యువాచ ।

ఏతత్ కవచ మాహాత్మ్యం వద విస్తరతో మమ ।
కుత్ర కేన కదా జాప్యం కియజ్జాప్యం కథం కథమ్ ॥ 28 ॥

ఉవాచ శంభుస్తత్ సర్వం పార్వత్యా వినయోదితమ్ ।

శ్రీపరమేశ్వర ఉవాచ ।

శృణు పార్వతి వక్ష్యామి సమాహితమనావిలమ్ ॥ 29 ॥

ధర్మార్థకామమోక్షాణామిదమేవ పరాయణమ్ ।
హస్త్యశ్వరథపాదాతి సర్వైశ్వర్య ప్రదాయకమ్ ॥ 30 ॥

పుత్రమిత్రకళత్రాది సర్వసంతోషసాధనమ్ ।
వేదశాస్త్రాదివిద్యానాం విధానం పరమం హి తత్ ॥ 31 ॥

సంగీత శాస్త్ర సాహిత్య సత్కవిత్వ విధాయకమ్ ।
బుద్ధి విద్యా స్మృతి ప్రజ్ఞా మతి ప్రౌఢిప్రదాయకమ్ ॥ 32 ॥

సర్వసంతోషకరణం సర్వదుఃఖనివారణమ్ ।
శత్రుసంహారకం శీఘ్రం యశఃకీర్తివివర్ధనమ్ ॥ 33 ॥

అష్టసంఖ్యా మహారోగాః సన్నిపాతాస్త్రయోదశ ।
షణ్ణవత్యక్షిరోగాశ్చ వింశతిర్మేహరోగకాః ॥ 34 ॥

అష్టాదశతు కుష్ఠాని గుల్మాన్యష్టవిధాన్యపి ।
అశీతిర్వాతరోగాశ్చ చత్వారింశత్తు పైత్తికాః ॥ 35 ॥

వింశతిః శ్లేష్మరోగాశ్చ క్షయచాతుర్థికాదయః ।
మంత్రయంత్రకుయోగాద్యాః కల్పతంత్రాదినిర్మితాః ॥ 36 ॥

బ్రహ్మరాక్షస వేతాలకూష్మాండాది గ్రహోద్భవాః ।
సంగజా దేశకాలస్థాస్తాపత్రయసముత్థితాః ॥ 37 ॥

నవగ్రహసముద్భూతా మహాపాతక సంభవాః ।
సర్వే రోగాః ప్రణశ్యంతి సహస్రావర్తనాద్ ధ్రువమ్ ॥ 38 ॥

అయుతావృత్తిమాత్రేణ వంధ్యా పుత్రవతీ భవేత్ ।
అయుతద్వితయావృత్త్యా హ్యపమృత్యుజయో భవేత్ ॥ 39 ॥

అయుతత్రితయాచ్చైవ ఖేచరత్వం ప్రజాయతే ।
సహస్రాయుతదర్వాక్ సర్వకార్యాణి సాధయేత్ ॥ 40 ॥

లక్షావృత్త్యా సర్వసిద్ధిర్భవత్యేవ న సంశయః ॥ 41 ॥

విషవృక్షస్య మూలేషు తిష్ఠన్ వై దక్షిణాముఖః ।
కురుతే మాసమాత్రేణ వైరిణం వికలేంద్రియమ్ ॥ 42 ॥

ఔదుంబరతరోర్మూలే వృద్ధికామేన జాప్యతే ।
శ్రీవృక్షమూలే శ్రీకామీ తింత్రిణీ శాంతికర్మణి ॥ 43 ॥

ఓజస్కామోఽశ్వత్థమూలే స్త్రీకామైః సహకారకే ।
జ్ఞానార్థీ తులసీమూలే గర్భగేహే సుతార్థిభిః ॥ 44 ॥

ధనార్థిభిస్తు సుక్షేత్రే పశుకామైస్తు గోష్ఠకే ।
దేవాలయే సర్వకామైస్తత్కాలే సర్వదర్శితమ్ ॥ 45 ॥

నాభిమాత్రజలే స్థిత్వా భానుమాలోక్య యో జపేత్ ।
యుద్ధే వా శాస్త్రవాదే వా సహస్రేణ జయో భవేత్ ॥ 46 ॥

కంఠమాత్రే జలే స్థిత్వా యో రాత్రౌ కవచం పఠేత్ ।
జ్వరాపస్మారకుష్ఠాది తాపజ్వరనివారణమ్ ॥ 47 ॥

యత్ర యత్ స్యాత్ స్థిరం యద్యత్ ప్రసక్తం తన్నివర్తతే ।
తేన తత్ర హి జప్తవ్యం తతః సిద్ధిర్భవేద్ధ్రువమ్ ॥ 48 ॥

ఇత్యుక్తవాన్ శివో గౌర్వై రహస్యం పరమం శుభమ్ ।
యః పఠేత్ వజ్రకవచం దత్తాత్రేయ సమో భవేత్ ॥ 49 ॥

ఏవం శివేన కథితం హిమవత్సుతాయై
ప్రోక్తం దలాదమునయేఽత్రిసుతేన పూర్వమ్ ।
యః కోఽపి వజ్రకవచం పఠతీహ లోకే
దత్తోపమశ్చరతి యోగివరశ్చిరాయుః ॥ 50 ॥

ఇతి శ్రీ రుద్రయామళే హిమవత్ఖండే మంత్రశాస్త్రే ఉమామహేశ్వరసంవాదే శ్రీ దత్తాత్రేయ వజ్రకవచస్తోత్రం సంపూర్ణమ్ ॥

బృహస్పతి కవచం (గురు కవచం)

అస్య శ్రీబృహస్పతి కవచమహా మంత్రస్య, ఈశ్వర ఋషిః,
అనుష్టుప్ ఛందః, బృహస్పతిర్దేవతా,
గం బీజం, శ్రీం శక్తిః, క్లీం కీలకం,
బృహస్పతి ప్రసాద సిద్ధ్యర్థే జపే వినియోగః ॥

ధ్యానం
అభీష్టఫలదం వందే సర్వజ్ఞం సురపూజితమ్ ।
అక్షమాలాధరం శాంతం ప్రణమామి బృహస్పతిమ్ ॥

అథ బృహస్పతి కవచం
బృహస్పతిః శిరః పాతు లలాటం పాతు మే గురుః ।
కర్ణౌ సురగురుః పాతు నేత్రే మేభీష్టదాయకః ॥ 1 ॥

జిహ్వాం పాతు సురాచార్యః నాసం మే వేదపారగః ।
ముఖం మే పాతు సర్వజ్ఞః కంఠం మే దేవతాగురుః ॥ 2 ॥

భుజా వంగీరసః పాతు కరౌ పాతు శుభప్రదః ।
స్తనౌ మే పాతు వాగీశః కుక్షిం మే శుభలక్షణః ॥ 3 ॥

నాభిం దేవగురుః పాతు మధ్యం పాతు సుఖప్రదః ।
కటిం పాతు జగద్వంద్యః ఊరూ మే పాతు వాక్పతిః ॥ 4 ॥

జానుజంఘే సురాచార్యః పాదౌ విశ్వాత్మకః సదా ।
అన్యాని యాని చాంగాని రక్షేన్మే సర్వతో గురుః ॥ 5 ॥

ఫలశృతిః
ఇత్యేతత్కవచం దివ్యం త్రిసంధ్యం యః పఠేన్నరః ।
సర్వాన్ కామానవాప్నోతి సర్వత్ర విజయీ భవేత్ ॥

॥ ఇతి శ్రీ బృహస్పతి కవచమ్ ॥